من عجائب الاخبار

اول خبر السيدة الوزيرة عائشة عبدالهادى رجعت فى كلامها تانى وسمحت بسفر الاطباء للسعودية مرة اخرى للجلد .. سورى للعمل .. مش مهم الغاء الحظر ما احنا اتعودنا اننا بنلعب مع المسئولين بتوعنا .. شوية هنلعب وشوية تانية مش لاعبيين .. لكن تفسير السيدة الوزيرة لقرار حظر سفر الأطباء من الأساس ...كان كالآتى
وأوضحت الوزيرة أن قرارها السابق يحظر سفر الأطباء المصريين كان "تنظيمياً"، يهدف لتنظيم تدفق سفر العمالة المصرية للسعودية، دون أن تشير من قريب أو بعيد إلى وجود علاقة لقرارها السابق بأزمة الطبيبين المصريين، .
طيب ياترى لم تشير للطبيبين ليه ؟؟ يمكن نسيتهم ؟؟؟ طيب هو كدا خلاص يعنى يتجلدوا وينفذوا الحكم والموضوع ذهب طى النسيان ؟؟
الخبر التانى والمضحك حقاً
قاض سعودي يحكم بتطليق زوجة وصفت زوجها بـ"الحمار" في غيابه
طيب هى لو كانت قالت له يا حمار فى وشه كان مش هيطلقها ؟؟ يعنى المشكلة انها اغتابته ولا انها هزأته ؟؟
وكانت السيدة من سكان الاحساء في زيارة صديقتها، عندما اتصلت بزوجها هاتفيا للحضور وإعادتها إلى المنزل، إلا أنه تأخر لنحو نصف ساعة، فعاودت الاتصال به ليعتذر عن التأخير واعدا بسرعة الحضور.
وما إن انتهت من حديثها معه، وظنت أنه أغلق الخط، حتى بدأت تكيل السباب له أمام صديقتها، وتصفه بأنه ضعيف الشخصية ونعتته بوصف (الحمار) الذي تسيره كيفما تشاء. وما كان من الزوج الذي استمع لكامل الحوار إلا أن أغلق الخط، وأرسل إليها رسالة تفيد بعدم حضوره، وعليها الحضور إلى المحكمة صباح اليوم التالي لحسم طلاقها، حسبما نقلت صحيفة "عكاظ" السعودية، الثلاثاء 2-12-2008.وأقرت الزوجة بفعلتها أمام القاضي، لتسمع طلاقها بأذنها صادرا من قاضي محكمة الإحساء.

ده ايه الطلاق السريع ده ؟؟؟ لما هما حقانيين اوى كدا بيجلدوا اطبائنا عندهم وبيسجنوهم بدون عدل ليه ؟؟؟ الكفيل الاقطاعى اللى بياكل حقوق العاملين استشرى ظلمه وانتشر فى المجتمع السعودى ليه ؟؟ لو جينا للعكس وكان الزوج اللى شتم زوجته مش هقول مد ايده عليها .. ياترى لو كانت تجرأت وراحت للقاضى ده كان حقق طلبها بالسرعة العجيبة دى ؟؟ كان رد لها حقها وخلى زوجها يعتذر لها بلاش يطلقها وده اضعف الايمان ؟؟ ولا كان هيبقى مصيرها نفس مصير فتاة القطيف ؟؟؟
الخبر الثالث .. الطامة الكبرى
السجن 7 سنوات لأردني قتل ابنة أخيه المتزوجة "لتطهير شرف العائلة"
مش قتلها علشان سيئة السمعة ولا قتلها علشان حامل فى سفاح لا سمح الله وانما قتلها علشان شك هو وابوها انها كانت على علاقة بزوجها اللى اتجوزها .. قمة المهازل الحقيقة .. عيب قانون القبيلة بيقول التار ولا العار ازاى تتجوز واحد تعرفه قبل الجواز دى مصيبة لازم يقضوا عليها شرفهم يا ناس .. المفروض تبقى زى الجاموسة على عنيها غمى تتسحب من بيت ابوها لبيت زوجها حتى من غير ما تشوفه ولاتعرفه ... وآدى العادات القبلية واللى بيجى لنا منها منتهى التخلف والهمجية .. المثير للغثيان انه اتحكم عليه بـ 7 سنين ونص سجن .. يعنى واحدة اتقتلت علشان متجوزة والقاتل يتحكم عليه بـ 7 سنين يعنى مش مؤبد بلاش اعدام فى ميدان عام علشان يكون عبرة لكل متخلف بدوى يتمتع بالهمجية ازاى البنت تتجوز وجوزها يعاشرها معاشرة الازواج ياعيب الشوم .. كام لازم يعين من نفسه خصم وقاضى وجلاد

Comments

امونومس2 said…
ونندهش اذا نظر الينا الآخرون كاننا كائنات منقرضه او فى طريقنا للأنقراض
والعيش فى متحف لتطور الحيوانات المنقرضه
من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
انا حرة said…
كله كوم و جرايم "الشرف"دى كوم تانى
كل ذكر غبى من دول بقى بيقتصر شرفه على اخته و مراته و امه
هو بيعمل ايه ولا بيروح فين ولا بيشرب ايه ولا عارف كام واحدة مش مهم..المهم هم يتقفل عليهم و تتغمى عيونهم و يتدفنوا بالحيا عشان فضيلة هو بس اللى شايفها..حاجة مثيرة للغثيان بجد

كام قضية اتعملت على واحد قتل اخته ولا مراته عشان "مشتبه" فى سلوكها يعنى حتى مش متاكد..و الغريب انه ممكن اوى يكون لسه طالع من بيت واحدة تانية قبل ما يدارى "عاره" لكن هو راجل و دى فهلوة لكن الست تتوئد معلش..و احلى من الشرف مافيش
romansy said…
يا نهار ابيض
بقى دا بيحصل
الاردن
والسعوديه
ومصر

تحيا الامه العربيه
Anonymous said…
رد على نساء يعترضن على كشف حقيقة النقاب
فى مدونه اخرى
هذا هو السبب
المطلع على آراء المعلقات هنا يندهش من استسلامهن لفكره تريد ان تحولهم الى مجرد شىء يستمتع به الرجل ويتحمله على

مضض بين كل اشباع جنسى والآخر فيحاول ان يخفيه بشتى الطرق والحجج حتى لو اضطر للتمسح بالدين ....ولكن الحكايه

ان الأنثى فى مجتماعتنا تنشا فى بيئه تعاملها منذ البدايه بشده وصرامه وتحيطها بعشرات التحذيرات والتخويقات والحمايه

المبالغ فيها بعكس الولد ...وهى ايضا دائما موضع شك وريبه فى كل خطوه او سكنه ...حتى لو صمتت والكل ينتظر بقلق

اليوم الذى تتزوج ليسترها الزواج وفكروا فى هذه الكلمه يسترها ...ولا تستخدم مع الولد ...لماذا؟لأن البنت مصيبه يجب

الأسراع بسترها ....ووسط هذا الجو القاهر تغلب على امرها وتجد انه لا مفر الا التمرد او الأستسلام المشرف بمعنى ان

تتبنى هى نفس افكار من حولها عن نفسها وتصدقه بل وتتحمس له ويبدو الأمر وكانه نابع من داخلها ....ويترتب على ذلك

شل تفكيرها ورعبها من مناقشة اى امر من هذه الأمور والأستسلام الكامل
انونيمس 2 said…
رد على معترضات على كشف حقيقة النقاب قى مدونه اخرى
هذا هو السبب
المطلع على آراء المعلقات هنا يندهش من استسلامهن لفكره تريد ان تحولهم الى مجرد شىء يستمتع به الرجل ويتحمله على

مضض بين كل اشباع جنسى والآخر فيحاول ان يخفيه بشتى الطرق والحجج حتى لو اضطر للتمسح بالدين ....ولكن الحكايه

ان الأنثى فى مجتماعتنا تنشا فى بيئه تعاملها منذ البدايه بشده وصرامه وتحيطها بعشرات التحذيرات والتخويقات والحمايه

المبالغ فيها بعكس الولد ...وهى ايضا دائما موضع شك وريبه فى كل خطوه او سكنه ...حتى لو صمتت والكل ينتظر بقلق

اليوم الذى تتزوج ليسترها الزواج وفكروا فى هذه الكلمه يسترها ...ولا تستخدم مع الولد ...لماذا؟لأن البنت مصيبه يجب

الأسراع بسترها ....ووسط هذا الجو القاهر تغلب على امرها وتجد انه لا مفر الا التمرد او الأستسلام المشرف بمعنى ان

تتبنى هى نفس افكار من حولها عن نفسها وتصدقه بل وتتحمس له ويبدو الأمر وكانه نابع من داخلها ....ويترتب على ذلك

شل تفكيرها ورعبها من مناقشة اى امر من هذه الأمور والأستسلام الكامل
Mohamed Hamdy said…
عندك حق الى يعيش ياما يشوف

والى يعيش فى الوطن العربى خصوصا هيشوف ويشوف ويشوف

تحياتى
انها السياسة ..!!!!

فما بالك لو كانت سياسة الدولة

فلا حاجة اذن لاى تفسير ؟؟
An Egyptian said…
اعرفكم كمان مرة ياجماعة:
أمة لا أله الا الله الشهيرة بخير امة خرجت الى الناس
Anonymous said…
ماشى يا ستى كل الحوادث دى حصلت واكتر بكتير وانتى مالك
ولا ما بتصدقى مصيبة وتشبعى فيها لطم
Desert cat said…
امونومس2
بعد كم الحوادث الناتجة عن التخلف والجهل والهنجية لم يعد هناك ما يدعو للاستغراب
تحياتى
Desert cat said…
انا حرة
تعرفى اغرب حاجه ايه .. ان دائما الذكر اللى بيرتكب الحماقات دى بيكون انسان غير سوى ولا يعرف عن الاحترام والاخلاق شيئ لذلك يتخيل ان الجميع يتمتعون بنفس اخلاقه المنحطة ... وشوفى اللى بيحصل فى الشوارع من الذكور المنحطين اخلاقيا والالفاظ الزبالة اللى بيقولوها على اى بنت ماشية هى نفس الاشكال دى اللى بترتكب جرايم القتل تحت مسمى الشرف اللى مش يعرفوا معناه ايه
تحياتى
Desert cat said…
romansy
انهيار تام فى الدول العربية يا رومانسى والعامل المشترك هو الجهل
تحياتى
Desert cat said…
Anonymous
المشكلة فى ان تستلذ المرأة المقهورة بقهرها بمعنى ان هناك من النساء من ترى الانسانة الشيك المهندمة فى زيها وفى مظهرها تتمنى من داخلها ان تكون مثثلها ولكن لانها قبلت من البداية فلم تعد تملك طور التغيير بين يديها فتراها تنظر اليها بحسرة وغل ولسانها يردد بانها بهذا سترت نفسها وعفة والخ من الاسطوانة المشروخة الهابطة .. ايضا هناك من ترتديه بغرض الزواج .. عملا بقول ظل راجل ولا ظل حيطة ولكن فى هذه الحالة تصبح منافقة واعتقد ان الحيطة انسب لها
Desert cat said…
Mohamed Hamdy
الوطن العربى اصبح جميعه داخل دائرة يلف ويدور حول نفسه ليتفشى بينهم التخلف .. ولو نظرت داخل هذه الدائرة لوجدت من ينجو بنفسه خارج هذا العالم
تحياتى
Desert cat said…
وميض ابتسامة
عزيزى ما دخل السياسة بالتفكير المتغابى فى موقف السيدة الوزيرة اعتقد انها لم تملك القرار من نفسها اما المواقف الاخرى فالتخلف هو سيد الموقف
تحياتى
Desert cat said…
Anonymous
لاء فى الحالة دى وانت مالك انت
وطالما بتتضايق من القاء اللوم على المصايب اللى بشبع فيها لطم على حد قولك يبقى اكيد انت من مرتكبيها
هم يبكي و هم يضحك
Desert cat said…
مواطن مصري
وهمبرجر وهم يا جمل ههههههه
ربنا يشفيهم يا عمرو
وايه يعني قتلوها؟
في ستين داهية
محدش قال ليها تعمل غلط
عيب, هي موش عارفة انو عيب؟
يبقى خلاص قتلها حلال
-
اصل انا كنت اتعرف على اربعة اربعة
علشان لما يفتلوني هيمتوني مرة وحدة بس والتلاتة الباقيين هيفضلو عار على شرف العائلة

مستاهلين
حد قال ليهم ان كدة بيتعمل شرف العائلة؟

طيب يروحو يعملو اعمال ارهابية ويقتلو ابرياء تانيين. اشمعنا اختاروني انا؟

ولما ييجو يقولو "والموؤودة اذا سئلت باي ذنب قتلت" موش هارد على سؤال هايف زي دة لانو مينفعنيش حد يتضامن معايا بعد ما اموت علشان النفاق دة مينفعش لانو لو كان حد عندو كرامة وشهامة هيبقى يدافع عني وانا عايشة, موش بعد ما اموت لاني هاكون مع اربعة تانيين
اشمعنا الذكور مسموح ليهم اربعة وانا لاء؟
انا كمان من حقي اكون مع اربعة

مسخرة بين الامم
اللي يعيش ياما يشوف
ويسمع
ويدون

أمنياتي
السلام عليكم

كل عام وانتم , والاسرة بخير ..بمناسبة عيد الاضحى المبارك ..أعاده الله عليكم و علي المسلمين بالخير والبركات .


اخبارك من مختارات صدق او لا تصدق
تحياتى
عم مينا said…
بالنسبة لقرار المناضلة عيشة عبد الهادي
فده مش غريب.. بصراحة احنا عرفنا حجمنا بعد القصة.. هم عملوا محاولة بتاعت وقف سفر الدكاترة و قالوا نشوف ايه اللي هيحصل.. راحوا السعوديين جابوهالنا من الاخر و قالولنا عنكو ما جيته.. الدكاترة علي افا من يشيل.. و هنجيب من باكستان و الهند و بنجلادش و و لا الحوجة للمصريين.. بس فالست عيشة قالت خلاص بقي بما انهم كده كده هيتجلدوا فاحنا أولي بشوية عقود العمل دول..
حاجة بجد تحزن.. الطريقة اللي بقينا نخلي اللي يسوي و ما يسواش يعاملنا بيها
ربنا يجازي اللي كان السبب
Migo Mishmish said…
قطه العزيزة
دا وضع طبيعى فى مجتمع ذكورى ..بدوى جاهل ..ايه الى اتغير علينا ؟ الى اتغير اننا كان عندنا كليوباترا ونفرتيتى وكان المجتمع المصرى يتقبل ان تحكمه امرأة وكانت المراة مساويه لرجل ولكن بعد ظهور الفكر البترودولارى ..الفكر الوهابى ..استقت مصر ثقافتها من هؤلاء البدو الاقحاح ..فطبيعى ان نتعامل مع المرأة بهذا الشكل ..فالمرأه فى فكر هؤلاء عبارة عن اداه لتفريغ شهوات الرجل ..تؤدى وظيفتها الجنسيه بدون ابداء اعتراض ..وحينما تكبر فى السن وتفقد انوثتها يكون مصيرها الركن على الرف وكفايه عليها ان جوزها بياكلها ويشربها ..هى هاتنهب بقى؟
كلمه اخيرة : يارب يخليلى مشمش هى وساندو دول اجمل حاجه فى حياتى عملتها
هما اجمل وردتين ..ويارب اشيلهم فى عنيا لحد ما اموت ..ويفضلو معايا فى البلكونه منورين ..لان البنات هما ضحكه الحياه
ميجوووووووو
Desert cat said…
واحة في الصحراء
ماهو الاعمال الارهابية المقرفة اللى بيعملها الغوغائيين من البدو والاحكام الحنينية اوى اللى بتصدر ضدهم هترجعنا تانى لعصر الوأد والجهل المتناهى
Desert cat said…
من غير عنـــوان
فعلا عندك حق
ربنا يكفينا شر الكوارث
تحياتى
Desert cat said…
أحــوال الهـوي
كل سنة وحضرتك بالف خير
عيد سسعيد على الجميع ان شاء الله
تحياتى
Desert cat said…
عم مينا
يعنى هى الحاجه عيشة طالما السعوديين مش اهتموا اوى بالقرار
قالت انها اتخذت القرار لتنظيم السفر للسعودية ولم تشير للطبيبيين
دماغ وزيرة وزيرة يعنى
:)
تحياتى لحضرتك
Desert cat said…
Migo Mishmish
يا ميجو كيلوبترا فاسقه ونفرتيتى رجس من عمل الشيطان
والمرأة عورة
وتغطيتها هى الحل لاء ومش اى تغطية
دى لازم تمشى بعين واحدة بس لسه مش عرفوا انهى عين اللى ممكن تشوف بيها يعنى
بلاد الرمال والبدو مش بيجى لنا من عندهم غير الانحطاط الاخلاقى والانحدار الفكرى
ربنا يخلى لك مشمشة وساندوا
ويخليك ليهم يا فندم
مودتى واحترامى
ابو احمد said…
كل سنه وإنتى طيبه
كل سنة وانتي طيبة يا حنان
ويارب يكون عيد سعيد عليكي وعلى كل حبايبك
:)
Hani Michel said…
الف مبروك العبارتين
بس لو عبد الله مش قادر يعفو عن الطبيبان .. رغم عفوه عن اكتر من 5 الاف ارهابى
فالعدل انه كل عباره تكون مملوكه لأحد الطبيبين
بما انه هذا هو الثمن
HANY YASSIN said…
كلامك كله جميل
ومنطقي لان البلاد دي هي بلاد العالم الثالث
التخلف بالنسبة يهم هو الطبيعي
اي حاجة ايجابية بتكون استثناء ده النظام والواقع مستحيل ننكره
Misrdream said…
مازالت القطه تناضل
تحياتي لاصرارك
Desert cat said…
ابو احمد
دكتورنا العزيز
كل سنة وحضرتك طيب وبالف خير
عيد سعيد عليك وعلى اسرتك وكل محبيك
Desert cat said…
آلام وآمال
وانت طيب يا محمود وبالف خير
عيد سعيد علينا جميعا ان شاء الله
الحان said…
البي بي سي قالت ثمن عبارتين-سفينتين 1.8 مليار دلار
هدية لمبارك

ولهذا كان موقف الوزيرة
كان لا بد لي من كتابة بوست عن الصفقة كهدية لمبارك وليس كتعويض لاهدار كرامة الطبيبين

http://news-na.blogspot.com/2008/12/1500.html
Desert cat said…
Hani Michel
انا لحد دلوقتى يا هانى مش قادرة اجزم زيارة الرئيس مبارك للسعودية على اساس ايه ؟؟
لان قبل سفره بيوم واحد قريت فى موقع اخبارى ان اسرة الطبيبين توجهت لمقابلة الرئيس ليتدخل فى حل الازمة بنفسه .. فلو سفر الرئيس نتج عنه اى تطورات جديدة فى ازمة الطبيبيين يبقى خير لو مش فى حاجه حصلت يبقى العبارتين دول وجودهم فى مصر بااااااااطل
Desert cat said…
HANY YASSIN
جميل يا هانى ان فى ناس بالفعل بتفكر تفكير منطقى زيك لكن اليئ جدا هو انتشار ثقافتهم الهمجية دى تحت اسم الدين والاخلاق الحميدة
تحياتى
Desert cat said…
Misrdream
ميرسى يا احمد
تحياتى ليك
Desert cat said…
الحان
يبقى مبروك علينا الجلد فى السعودية والرجم فى الامارات
والاهانة فى الكويت

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز