إلغاء وجود الحرس الجامعي داخل جامعة القاهرة

انا ضد الحكم ده .. لأنه معنى إلغاء الحرس الجامعى داخل جامعة القاهره .. يعنى التسيب والفوضى
يعنى اى حد سواء فى الجامعه او فى الشارع يدخل ويخرج وكأنها وكالة من غير بواب
يعنى مرتع للإخوانجية يصولوا ويجولو ويعلقوا لافتاتهم ويصيحوا بمظاهراتهم التى لن تنتهى
وبعد أن كان يفد اليها الطلاب للتعليم ستكون معقل للتخلف والرجعية
الغاء الحرس الجامعى ... يعنى غرزة للشباب الكوووول
يعنى دعارة مقننة للجميع
يعنى كباريهات شارع الهرم لن تضاهى جامعة القاهره
الغاء وجود الحرس الجامعى = فوضى .. تسيب .. شغب .. عنف .. مرتع للجماعات المحظورة والمشبوهه .. تجاوازت من الجميع
يعنى مولد دون ضابط ولا رابط
لذلك اؤيد جدا استشكال الحكم القضائى .. واتمنى ان يتم إلغاء الحكم الصادر

تعليقات

‏قال محمد حمدي
انا رايى ان الامن هيفضل متواجد لكن بشكل متخفى ... الامن مستحيل يسيب الجامعه بشكل كامل ابدا

تحياتى
‏قال أسماء علي
أنا مع الحكم لأن من وجهة نظري الخاصة جدا ,, أن التواجد الأمني لا يجب تواجده في الحرم الجامعي لأنه يتواجد بصفة مراقبة كل من يعارض سياسة الدولة
هناك حد من الحرية داخل الحرم الجامعي

أما بالنسبة للأمن العام للجامعة فبكل بساطة طبقا للقوانين يتم تعيين أفراد أمن من الجامعة لحفظ النظام

لكن هناك فارق بين ظباط و عساكر يحفظون الحكم و يمنعون اي تفكير مغاير

و أفراد أمن عاديين لحفظ النظام كما يوجد في جميع الجامعات الخاصة

و أنا مع محمد إن الأمن هيفضل شغال ف الخفاء و في طلبة بيقوموا بالواجب و نص
:)

بقيت بارغي كتير اوي الايام دي يا قطتي
!!
‏قال TAFATEFO
طباً مع خيالية افتراض ان الأمن هيستجيب ويخرج .. بس ما علينا

هو ليه كل الكلام ده حضرتك متأكده انه هيحصل؟؟ ليه مثلاً ميجدش كل النشطاء الحقوقيين والسياسيين مناخ ملائم داخل جدران الجامعه

ليه مش هنتخلص من سطوة الأمن على كل شئ من أول التعيينات لغاية دخول الامتحانات

ليه مش هنجد اتحاد طلبه ممثل للطلبه حقيقي .. وليس ممثل لمن ترضى عنهم أمن الدوله

ليه مش هيبقى في حريه في التعبير وبناء لشخضيه إيجابيه للطالب

ليه ميبقاش وداعاً لبلطجية الأمن وتخدلهم السافر في الجامعات

وعشرين ألف ليه؟؟

أنا عمري ما تخيلت ان حضرتك (أو أي حد تاني) يستنكر مثل هذا الحكم .. بل ويطالب ببقاء الأمن داخل الجامعه ؟؟!!

س سؤال
هو حضرتك تقربي لمواطن مصري؟
‏قال Unknown
بالاضافة لكلام طفاطيفو

اكيد هايكون فى امن بديل مش تبع الداخلية

زى الامن اللى بيقى فى المول او المطار وما شابة
‏قال مواطن مصري
@طفاطفيو

احنا بنكرة بس الجهل و الاخوان

كدة ولا كدة الامن مش هيطلع في اي حتة غير لما الزمالك ياخد الدوري او مرتضى منصور يمسك الزمالك تاني

غير كدة لو خرج فية مرشدين جوة
‏قال Unknown
انا كمان موافقاكي يا قطه انه مينفعش جامعه من غير حرس
يتغير بس الشخص المسيء لوظيفته
لكن منع الحرس دي متنفعش
‏قال TAFATEFO
على فكره الحكم (للي قراه) بيقول ان الجامعه عليها تكوين جهاز أمني داخل الجامعه تابع للعميد .. مسؤول عن حفظ النظام

يعني لو الحكم اتطبق .. رئيس الجامعه هو اللي هيعين الأمن .. مش الأمن هو اللي هيعين ؤئيس الجامعه والعمداء والفراشين زي دلوقتي

وهيبقى الأمن تابع لسلطة الجامعه .. مش العكس زي دلوقتي

وبعدين يا مواطن .. كلامك بيدينك .. وأنا مقصدش غلط
حضرتك بتكره الإخوان .. اللي هما فصيل من الشارع المصري إن مكانوش أكبرهم حجماً وتأثيراً .. يبقى اسمحلي ماخدش على كلامك لأنه شهاده مجروحه .. لما تتكلم عن الاخوان طبعاً مش هقلاالك وكلامك مش هيدخل دماغي لأنه كلام واحد كاره .. مش واحد منتقد موضوعي

ديزيرت كات مختلفه شويه .. هي كارهه .. بس ساعات بتتكلم بموضوعيه .. وساعات لا .. أرجو انك متزعليش من كلامي .. بس ده رأيي

يا ساده .. الحكم مقالش غيبوا النظام
الحكم قال .. الأمن تابع للجامعه ورئيسها .. مش العكس

أنا كنت في جامعة الأزهر .. ومش إخوان .. وكان لما عسكري واحد بيقولي حاجه .. بقوله انت مالك .. لأني وهو عارفين ان مكانه مش هنا .. وكنت بقول لقائد الحرس انت اللي مكانك بره .. بس الزمن اللي بالعكس

كل كلاب وشرفاء الداخليه .. مكانهم بره أسوار الجامعه .. واللي يقول غير كده يبقى يراجع كلامه ويراجع منطوق الحكم ومسودته
‏قال TAFATEFO
ديزيرتكات .. لو سمحتي لو مقريتيش الحكم .. قوليلي وأنا أجيب لحضرتك نص الحكم

ولو قريتيه أرجوكي اقريه تاني .. وقولي رأيك انتي معاه ولا ضده

أنا متأكد مليون في الميه ان في فقرات حضرتك مأخدتيش بالك منها .. فأرجوكي أعيدي القراءه مره تانيه


@ مواطن

مش عارف ليه يا مواطن .. حاسس كده وأنا إحساسي ساعات بيصدق .. ان الأمن هيخرج السنه الجايه .. والزمالك هياخد الدوري . ومرتضى هيبقى رئيس الزمالك .. وأقولك حاجه كمان .. زيوس هيغور في ستين داهيه .. أهو احساس والسلام
‏قال غير معرف…
انتبهوا
هناك من يروج اشاعات بلهاء ليشعل الفتنه الطائفيه
من مثل انهم يستخدمون مكبرات صوت او يدقون اجراس بالذات اوقات الأذان ويسدق البلهاء هذا الهراء
‏قال mUsLiM
انتى مش مع الحرية

انتى ضد الاسلاميين والفكر الاسلامى على طول الخط

فين الحرية اللى بتنادوا بيهــا

ولا انتو مع الحريه بشرط متكون فى صالح الاسلاميين

لعلمك لو فى حرية فى البلاد دى او فى اى بلد عربى

الشريعة الاسلاميه هاتحكم البلاد فى سنوات معدوده

صحيــح

حريتكم اللى عايزنها حريه عرجــاء

عامله زى ديمقراطية أمريكا

لما جابت حماس رفضتها

علشان تعرفى مع كامل احترامى ليكى

انك بتنافقى نفسك

السلام عليكم يا أختى
‏قال غير معرف…
للأخ مسلم
لاتناقض ولا يحزنون
ليست قضسة حريه القضيه هلى نسمح لمن لا يؤمنون بالديمقراطيه ان يستغلوها لهدم الديمقراطيه؟
طبعا لا دوله متقدمه جدا مثل المانيا تحظر قيام حزب نازى
وكذلك ايطاليا تحظر قيام حزب فاشيستى
واى دعوه لحكم البلاد باسم السماء وبتفويض منها فاشيه واستبداد
وفعلا لسه بدرى اوى على العرب انهم يعرفوا هذا الكلام للأسف
‏قال Unknown
ممكن يكون فخ .. أو ستارة لحاجه تانيه أو خطوة ضمن خطه ..
إذا كانوا لو ف إيدهم يراقبوا البيوت من جوا .. مش هيفكروا يحطوا تواجد أمني ؟؟
‏قال غير معرف…
الخبر ده بداية الديمقراطية الحقيقية اللى هاتبقى فرس الاخوان الرامح للحكم.

تبقى مصيبة سودة لو اتنفذ
لايجوز الغاء الحرس الجامعى من الجامعة تحت اى مسمى وتحت اى ظروف .. فهذا قد يؤدى بالفعل الى كوارث لا يعلمها الا الله

اتمنى عودة المسئولين عن هذا القرار الى صوابهم قبل حدوث ما لا يحمد عقباه
‏قال مواطن مصري
@ مسلم

عامله زى ديمقراطية أمريكا

لما جابت حماس رفضتها



يا ريت نكون زي ديموقراطية امريكا ولا ديموقراطية فرنسا او تركيا يا ريت اتاتورك يرجع و يحكم مصر


حماس جات ب انقلاب مش ب الانتخاب
زي ما الناس من كتر كرهم للوطني اختارو الاخوانجية و هم نادمين الان من الاختيار دة
لائنهم معملوش حاجة
و بيعطلو دايما اي قانون
من حقوق الطفل ل انشاء دور عبادة موحد الخ
‏قال مواطن مصري
@ مسلم
دة اذا كانت اساسا
الاخوانجية بيعترفو ب الديموقراطية و الحرية


دة انتو مكفرين الحريات ولا تؤمنو ب المواطنة
‏قال ابو احمد
أنا مختلف معاكى ياإبنتى وهذا لايفسد للود قضيه
ايامنا لم يكن هناك حرس بهذا الشكل كان الداخليه وظيفتها خارج حرم الجامعه
مع وجود الحرس بعد يناير77 نما التيار الأصولى واستشرى لم يمنع الحرس نمو وإذدهار هذا التيار الظلامى بل أزعم أن السياسه الأمنيه ومنع كل التيارات السياسيه من التواجد والنشاط داخل الجامعه هو الذى سمح بانتشار وسيطره هذا التيار لأنه أصبح هو التيار الوحيد ولم يجد تيار غيره يتصدى له بعكس أيامنا كانت الأنديه السياسيه والأسر السياسيه تتصدى له وتحجم من تأثيره
مع إختلافى معكى الا أنى أقدرك وأحترم نشاطك
تحياتى
‏قال AHMED SAMIR
الامن الجامعي لم يتم الغاءه
ولكن ماتم الغاءه او المطالبة بالغاءه هو الامن الجامعي بالشكل الحالي باعتباره يتبع وزير الداخلية ويتدخل بشكل سافر في كل ما يمت للجامعة بصلة من التعيين وحتى التعليم
انما لحفظ النظام لابد من وجود وحدات امنية تتبع رئيس الجامعة وتؤتمر بأوامره وليس وزير الداخلية
هي دي كل الحكاية
‏قال mUsLiM
الأخ انونوميس

أولا : عرفلى يعنى ايه الديمقراطيه ..

الديمقراطيه فى أصلها حكم الشعب نفسه بنفسه عن طريق نواب منتخبون

سبحان الله

افرض الشعب عاوز الإخوان

مين اللى قالك ان الاخوان هايمسكوا البلد مش هايخلوا فى انتخابات

لا طبعا ده مش صحيح

وعلى فكره انا مش اخوان ولا حاجه

وانا بختلف مع الاخوان فى حاجات كتير

لكن مفيش مانع أدى للناس دى فرصه

اشمعنى الحزب الوطنى جربناه وقرفنا منه

ادوا فرصه لغيره وجربوه

السلام عليكم
‏قال mUsLiM
الأخ مواطن مصرى

لأ حماس جت بانتخابات حرة ونزيهه شهد بها أمريكا نفسها

وانا مش فاهم ايه قصة الانقلاب اللى كل الناس ماسكاها

انقلاب على مين

حماس أصلا هى الحكومه المنتخبه من الشعب الفلسطينى

حماس هى الأغلبيه فى مجلس النواب

فى حكومه هاتنقلب على نفسهــا ..!!

هذا والله فى القياس بديـــع ..!!

السلام عليكم
‏قال غير معرف…
استاذه قطه
يا ابنتى اختلف معك ..

الحرس ليست وظيفته حماية منشئات الجامعه او سير الدراسه بها كما تظنين ... الغرض منه خلق اجيال عقيمه تجرى وراء مصالحها ولاتسأل اين حقوقها
بعد ٢٠ عاما من تخرجى زرت كليتى لامر ما .. الدراسه تدهورت لدرجه مرعبه .. الكليه قذرره ومهمله .. الدكاتره اما غير متواجدين او فى غرفتهم يتحدثون عن عمل طاجن السمك (حصل امامى) والكفاءات منهم طفشوا
شئ وحيد لاحظته هو تطور الامن من ٢ عساكر و نقيب الى ٥ او سته عساكر واتنين مخبرين وملازم وعقيد .. هايحاربوا بقى ..
وتفتكرى مين بقى دافع الفاتوره؟ العمليه التعليميه طبعا

وبعدين الخطيئه بقى انك مؤيده لتقييد الحريات وقمع الاخر لاختلافك معاهم فى الرأى ..
طيب هافترض فرضا جدليا خياليا مهلبيا ان الاخوان هم من يحكمون .. فرضا فرضا يعنى ماتزعليش ! .. ترضى انى اسكت لما يقرروا ان سعادتك لازم تتقيد حريتك او تمنعى من التعبير عن رأيك لأنه فى نظرهم خطأ ؟ ينفع برضه؟
لازم نتعلم ثقافة الاختلاف ... والاستقواء بزقزوق والداخليه هو ضعف حجه ودليل على هزيمة الفكره وعجزها ...
مع احترامى الشديد لرأيك واستعدادى لأن أموت فى سبيل حريتك فى اعتناق ما تريدين من أراء
‏قال TAFATEFO
@ مواطن

يا ريت اتاتورك يرجع و يحكم مصر

يا سيدي أبوس ايدك ركز في اللي بتكتبه

حماس جت بانقلاب

الحكومه الأولى الي أقالها أبو مازن والل كان اسماعيل هنيه وزير الداخليه فيها كانت نتيجة انتخابات حره اتسحتها حماس .. لكن أبو مازن عطل المجلس النيابي وأقال الحكومه قامت حماس انقلبت عليه .. يعني أبو مازن هو من بدأ الخروج عن الشرعيه

انت عارف اني لا حمساوي ولا فتح .. بس الحق يقال .. وإن كنت عندي على حماس عشرميت مأخذ ومأخذ ده مش مجالهم

بس أبوس ايدك تركز يابني
عفواً .. لست معك فى هذا الرأى
هو احنا ليه اتعودنا دايماً ان فيه واحد يمشى ورانا يراقبنا ويقيد حريتنا؟؟
المفروض الحرس الجامعى حدوده البوابه بس ميخطيهاش.
همه بيدخلوا يقمعوا المظاهرات والطلاب بأساليب متخلفه بتأدى فى كثير من الأحيان لموت واصابات بين الطلاب وده حصل فعلاً انا مابدعيش على حد.
ان شاء الله الأستشكال بتاعهم مش هيتقبل فليتركوا للجامعات خصوصيتها لقد حولوا كل اماكن الدوله الى مناطق امنيه فليذهبوا بلا رجعه وتكون بدايه ان شاء الله لزوال الدوله الأمنيه اللى الشرطه فيها راكبه الشعب المسكين.
‏قال Desert cat
Mohamed Hamdy
متخفى ولا ظاهر المهم انه يفضل موجود يا محمد

برضه تحياتى
:)
‏قال Desert cat
د\أسماء علي
والله يا دكتورتنا المفروض ان الجامعه مش مكان للتجمع السياسى
واللى عايز يكون احزاب او جماعات يتفضل خارج اسوار الجامعات

مودتى يا جميله
‏قال Desert cat
TAFATEFO
بدون خيالية ان شاء الله الامن مش هيخرج وهيتقبل الاستشكال وهيترفض القرار الغبى باستبعادهم من الجماعه
ستحيل الجماعه تكون مرتع للمتطرفين والارهابيين والمتخلفين علقيا
مستحيل تكون مرتع لعيل مأجور كل يومين يلم شلته بعد ما يدفع لهم اللى فيه النصيب ويقوموا بمظاهرات وتخريب وتكدير للأمن العام
الجامعه مش هتتقلب شارع لممارسة التطرف والعهر الفكرى
‏قال dr.lecter
لا طبعا مش علشان الاخوانجيه ولا حاجه

علشان ههتبقي فوضي بالمعني الالصح والبلطجه هتشتغل وتبقي سيرك

وبعدين يلغوا الحرس ليه مش كفايه الاعداد المهوله من الامن المركزي اللي محيطه بالجامعه زي ماحصل امبارح وجاهزين للفتك بالطلبه والمتظاهرين
‏قال Desert cat
واحد مش فاهم حاجة
وطالما هيكون فى بدائل ليه يتلغى من البداية ؟؟؟
علشان الفوضى تتنشر
‏قال Desert cat
مواطن مصري

اولا انا يرشفنى جدا بقى انى اكون قريبتك
ثانيا لو خرج بقى يا عمرو
ان شاء الله مش هيخرج
:)
‏قال Desert cat
لماضة
كلامك منطقى جدا يا دكتورة
‏قال Desert cat
TAFATEFO
طفاطفيو حكم المحكمة بيقول
الغاء وجود الحرس الجامعي داخل الجامعات وعدم ممارسته أى أنشطة داخل الجامعة
بالنسبة لمواطن مصرى كلامه بيدينو فى ايه ؟؟؟
ماهو من الطبيعى والمنطقى ان اى حد عايش فى الدنيا يبقى ضد اى تخلف ورجعية ضد اى حد بيلبس عباية الدين للوصول لمصلالح واهداف شخصية
يعنى مفيش كره فى كلام مواطن انما ده فكر
‏قال Desert cat
TAFATEFO
فقرات ايه اللى قفزت منى فى قراءة الحكم فى الحقيقة واضح ان حضرتك قريت الحكم ومش فاهمه .. اقراه تانى وبتركيز يمكن ربنا يفتح عليك
وان شاء الله الامن مش هيخرج من الجماعه وقرار الالغاء الغبى ده هيتلغى
‏قال Desert cat
انونومنس2
للاسف يا عزيزى البلهاء دائما يكذبون اذانهم ويصدقون الاشعات لانهم يلا يملكون سوى السمع والطاعة منساقون كالبعير
‏قال Desert cat
mUsLiM
حرية ايه فى الهمجية والتطرف
حرية ايه فى استغلال شباب فاقد الهدف واستقطاب مسجلين خطر ليروجوا لافكارهم العفنة
حرية ايه فى الارهاب البدنى والارهاب الفكرى سواء
المنافق ليس انا يا من تدعى مسلم
المنافق من يرى الظلام نور ويروج له
المنافق من يرضى للتخلف والجهل مكان بداخله ويدعى انه من عند الله
ومش فاهمه انا ايه موضوع اختك اللى كل لما تيجى تكتبه ده هى اختك بتقرا مدونتى ؟؟؟
‏قال Desert cat
انونومس2
يا سيدى الفاضل دةل مجرد ابواق
يرددون ما يسمعونه فقط لا غير دون فهم
واتحدى اذا كان الحاج مسلم يعرف مين هتلر ولا الحزب الفاشيستى
اصلهم تقريبا لسه مش اخدوها فى مكتب الارشاد
‏قال Desert cat
عاقلة علي ارض الجنون
لاء يا سمين الحكم كان بناء على شكوى تقدم بيها استاذة جامعة القاهره وعلى راسهم اصحاب حركة 9 مارس
‏قال Desert cat
An Egyptian
الحكم ده هيبقى بداية الفوضى والغوغائية اللى اسمهم اخوانجية
ان شاء الله مش هيتنفذ
‏قال Desert cat
وميض ابتسامة
اتمنى معك عودة المسؤلين الى صوابهم وان شاء الله يتم قبول الاستشكال
‏قال Desert cat
مواطن مصري
وزى ما الناس دلوقتى نادمين على اختيارهم للاخوانجية يا عمرو
الفلسطينيين بيبكو بدل الدموع دم بسبب حكومة حماس
شوفت الجهل والغباء بتاعهم اول ما مسكو الحكم سابو الاسرائليين واعتقلوا الفتحاوية وعملوا لهم مجازر كانوا بيسجنوهم ويجلدوهم
ولن اذكرك بتكسرهم للجدار الحاجز ودخلوهم مصر بالقوة الجبرية كنت متعاطفة على فكرة فى الفترة دى لكن قلة ادبهم على جنودنا واقتحامهم لاراضينا والغريب استعانهم بالسيدات اللى كانوا بيوجهوهم لحرس الحدود بتوعنا دعانى لانى احتقرهم اشد احتقار حقيقى
حكومة قذرة
‏قال sigon1977
أرى أأن الحكم سليم و صحيح ، و ليس لاجل الاختلافات السياسية نرفض عامل يؤدى الى سمعة أفضل للجامعات 0
يا قطة اهم المعايير فى أى جامعة هو التدخل من اى جهة فى الشئون و خلافة 0
ان اراد احد الاخوان فليكونوا بشرط الا يتجاوزوا الثوابت الثلاث
المواطنة
القانون
مبادئ العدالة و الحرية و المساواة
‏قال Desert cat
مواطن مصري
كلمة حرية وديموقراطية دى هيعروفها منين علشان يؤمنوا بيها يا عمرو
اذا كان طز فى مصر وشعبها ؟؟؟
‏قال Desert cat
ابو احمد
دكتورنا العزيز اختلف براحتك
فالاختلاف فى الراى ظاهره صحية
نمو هذا التيار الظلامى لا يعنى تقصير من الامن فهذا التيار تنامى داخل الجامعه بسبب ان الجماعه المحظوة حريصة كل الحرص على مد خيوطها فى كل مكان حتى داخل اسوار الجامعه وحتى لو استأجروا عدد من الطلبة يدفعون لهم من تمويلاتهم المشبوهه العيب ليس على الامن انما العيب فى النظام ككل لان سماحهم لهذه الجماعة بدخول مبنى مثل البرلمان يعتبر اعتراف منهم بهذه الجماعه والحل فى اقصائها نهائيا حتى لا يخرج علينما الرعاع بمظاهرات كل يوم تزعزع الامن
العام
مودتى واحترامى
‏قال Desert cat
A.SAMIR
يا دكتور احمد القرار فى ظاهره الرحمة وباطنه العذاب معنى الغاء ادارة حرس الجامعه التابع لوزارة الداخلية اى الغاء سلطة الامن ككل .. بمعنى عند حدوث مظاهره من عيل ماجور وتدخل اى فرد امن داخل الجامعه سيكون الرد الفورى انت بتتدخل بصفتك ايه
لان المفروض المسؤل فى هذه الحالة هى ادارة الجامعه بعد الغاء ادارة الحرس

وشكرا
‏قال Desert cat
mUsLiM
جميل بل هايل يا استاذ مسلم ان حضرتك عارف ان معنى الديموقراطية وهى حكم الشعب للشعب
بس متطلبش انك تجرب حكم الاخوانجية لانهم لا يصلحوا للحكم اصلهم مش عارفين كملة ديموقراطية لسبب بسيط جدا
مرشدهم الخرفان قالها وبالفم المليان المعارض بالجزمة .. واهو لسه مش مسك الحكم امال لما تجرب ويمسك الحكم هيعمل ايه ؟؟؟ هيجيب لنا الماليزى يحكمنا ؟؟؟ احنا مش فيران تجارب يا حج علشان نقعد نجرب فى نفسنا مين يحكمنا طبعا بعينه ذرة تراب من ارض مصر جزمة فى بؤ الاخوانجية واحد واحد
‏قال Desert cat
mUsLiM
اولا حماس جت بالانقلاب وراجع تاريخهم كويس
ثانيا ممكن شهادة امريكا ليهم اللى بتقول عليها دى ؟؟؟ مصدرها ايه وفين ؟؟
ثالثا سنفترض جدلا شهادة امريكا ليهم فالمفروض كمان ان اسرائيل تشهد ليهم .. عارف ليه ؟؟
لانهم سايبينهم فى غزة وجايين يحتلوا احنا .. شوية تحطيم الجدار العزال وشوية يتعالجو عندنا وشوية تالته يقولوا لك العريش بتاعتنا وضع يد كدا المفروض بالفعل اللى يشهد ليهم اسرائيل وليس امريكا
‏قال Desert cat
Ahmed
اولا الاخوانجية مش بيعبروا عن رايهم
الاخوانجية بيخربوا فى البلد
الاخوانجية جماعه متطرفة وليست جماعه صاحبة راى وفكر ولا ينفع انى اسمى الارهابى والمتطرف صاحب راى
مش معنى انك بتخاف لما بتشوف عسكرى امن مركزى ولا ظابط علشان كدا اترعبت لما شوفت بدال 2 امناء شرطة 5 لما روحت تزور الكلية يبقى كل الناس اعمالهم منافية للقانون اصل مش كل الناس بتخاف من الشرطة
ودعنا نفترض ان الاخوان مسكو الحكم فلن تسطيع انت الخروج من منزلك والا لو عارضت وخرجت هيكون نصيبك الجزمة الشعار الى رافعه مهدى عاكف للمعارض
الا اذا كانت متخيل انهم بالفعل ممكن يوصلوا للحكم وده من رابع المستحيلات ومن دلوقتى بتحابى لهم علشان تتلاشى شعار الجزمة
لذلك السطر الاخير فى ردك مالوش لزوم خالص اصل انا بعرف ازاى ادافع عن نفسى وعن آرائى دون المحاباة للارهابيين ومتطرفين ومرتزقة خوفا من جزمتهم
‏قال Desert cat
واحد من الناس
لاء احنا متعودناش ان فى حد يمشى ورانا ويراقبنا
بس الهمج والفوضويين فى ظل وجود امن وكل يوم عاملين مظاهرات وفوضى فى الجماعه امال فى غياب الامن هيعملوا ايه ؟؟
عايزها تبقى سايبة ؟؟؟
الطلاب اللى بيموتوا بسبب هنجية العيال المأجورة اللى بيدفع لهم الاخوان داخل اسوار الجامعه لعمل شغب
وليس الامن
‏قال Desert cat
sigon1977
سمعة افضل ازاى يا محمود للجامعات فى ظل غياب الامن ؟؟
حضرتك بتقول مواطنة
هما الاخوانجية يعرفوا معنى الكلمة دى ايه ؟؟؟
اذا كان الفتنة الطائفية لا تخرج الا من بينهم
الديموقراطية عذرا يا عزيزى فالمعارض هياخد بالجزمة
المساواة والعدالة
اسمح لى يا صديقى
فماليزى مسلم يحكم مصر ولا يحكمها مسيحى
شوفت بقى المواطنة والديموقراطية اللى بيتمتعوا بيها
‏قال a
منظر غريب
لنل موش فاهمة ليه كل موضوع بقى ينقلب لحوار عن حماس وفلسطين, طيب ما احنا بنتكلم عن امور رومانتيك جدا خاصة بمصر

ليه كل شيئ في مصر بقى عليه دمغة حماس وفلسطين؟
؟؟؟

او يمكن انا غلطانة؟
طيب قولولي من الصبح اصلي ما كنتش اعرف, بس دالوقت غيرت اسم الدولة في البروفايل عندي لفلسطين
‏قال Desert cat
واحة في الصحراء
لاء ماهو ده العادى
اى موضوع نتكلم لازم حب وغزل فى حماس وكانهم عملوا انجاز مش ارهابيين
‏قال a
ماشي
انا باعلن تراجعي عن قراري في تغيير البروفايل بتاعس من مصر الى فلسطين علشان موش عايزة ابقى مصنفة تحت الارهاب ولا الشعب المشتت ولا المحاصر علشان مقدرش استحمل

اصل بصراحة بعد البحث في جوجل طلعت التسمية "فلسطين" لا تنتمي الى اللغة العربية ولا للاسلام علشان اصل التسمية يوناني من المؤرخ هورديوت وهو اطلقها على مقاطعة معينة تتناقل الشعوب والامم الحكم عليها وهي منطقة جغراقية تحتوي على عناصر من شعوب محتلقة مثل جزيرة كريت وصعيد مصر او من القفقاز وروسيا او من العماليق وهي قبيلة من جزيرة العرب وانتشرت في الشرق الاوسط

اما مصر الفراغنة فهي شعب وعنصر بشري مستقل مثل الاتراك او الفرس او الاغريق

هم الصحافة ليه دايما بيكتبو الشعب الفلسطيني طالما تلك المحافظة مكونة من عدة شعوب؟؟؟ موش بيعرفو تاريخ؟ غير عن كدة كل الناس كفرو في ايات القران علشان محدش بيعترف ان ربنا امر بني اسرائيل بدخول هذه المنطقة, بس هم بصراحة كانو ناويين يروحو الكويت علشان البترول او يرجعو عبيد عند فرعون. بس ربنا رفض ودخلهم على المحافظة ذات التسمية الاغريقية وحطهم بمشاكل عويصة مع شعوب عايشة على الارهاب. يعني فيها ايه لو بعتهم عالكويت ونرتاح من الارهاب اللي بيتستر تحت شعارات اسلامية

لما تشوفي اجدع ناس. معناه انهم من اصل فرعوني
‏قال ابو احمد
واضح إن مفاهيمنا مختلفه
ان مختلف معاكى فى إن الجامعه مش مكان لممارسه السياسه الجامعه مكان تعليمى صحيح لكن تعلم السياسه ده برضه علم وممارسه الأنشطه الرياضيه والثقافيه والأدبيه والفنيه ده دور للجامعه مهم
انتى عارفه مواجهه الإخوان اللى إحنا متفقين فيها بس الأسلوب والمفهوم مختلف
انا رأيي إن الديمقراطيه فى الجامعه وفى المجتمع وتقويه منظمات المجتمع المدنى وأهمهها الأحزاب هو الطريق السليم الوحيد لمواجهه التيارت الفاشيه كلها بما فيها الإخوان
المواجهه الأمنيه وجعل الأمن هو المتحدث السياسي الوحيد لن يقضى عليهم بل التجربه أثبتت أنه يقويهم
تحياتى لكى ياإبنتى
‏قال TAFATEFO
اللي أقصده من الحكم .. ان الحكم مقالش يبقى في فوضى .. فمحدش يدخل الفوضى من ضمن حجج رفضه للحكم (أول مره أسمع عن ناس ترفض حكم ترفضه وزارة الداخلية بس مش موضوعنا)

الحكم مقالش فوضى .. الحكم قال جهاز أمني تابع للجامعه .. مش تابع لوزارة الداخلية وتت سلطة رئيس الجامعه .. مش بياخد أوامره من جهاز أمن الدوله

وعلى العموم متقلقوش أمن الدوله مش هيخرج ولا حاجه


دمت بود .. وأتمنى كلامي ميضايقش حضرتك
القطة العزيزة
سأضم صوتي لأصوات المختلفين معك هذه المرة..
مقولة الحماية هي مقولة استعمارية أن يكون الأمن بين طلبة ليحميهم من أنفسهم هذا انتقاص من قيمة الطالب المصري،عليه أن يعرف كيف يسير مجتمعه بايجابياته وسلبياته بإخوانجييه ويساريه ومحايديه
للإضاءة فقط يدعى الحرس الجامعي بين الأوساط الطلابية في المغرب بالأواكس وهو اسم يشير مباشرة الى رجال الداخلية بالدولة الدين استطاعوا الدخول الى الجامعة بموجب مدكرة ثلاثية بين وزارة الداخلية ووزارة العدل ووزارة التعليم العالي
وقد لاقوا معارضة كبيرة من طرف جميع الفصائل الطلابية وظل الأواكس يتعامل بحساسية بالغة مع الوضع الطلابي ..
في أواخر التسعينات من القرن الماضي كثيرا ما تعدى الأواكس حدوده ليدخل الى قاعات الدرس والمدرجات والمكتبة الجامعية وليسائل بعض الطلبة عن هوياتهم وليتحرش بالطالبات وهو- الأواكس- يكون مسالما فينعثه الطلبة جهارا بالأواكس الحمار الغبي لكنه يتحول بعد الضغط على زر التحكم عن بعد إلى آلة من الدمار والتخريب عندما يحصل أي توثر..
أظن عزيزتي أن الدولة يكفيها الوجود السري وتجنيد العملاء داخل حرم الجامعة الذي يجب أن يبقى حرما من دخله فهو آمن ومن خرج منه فهو آمن
مودتي الموصولة
‏قال غير معرف…
قطتنا العسل

عامله ايه ياجميله؟وحشانا اوي اوي انا و هارت و هي بتسلم عليكي جدا جدا
:)))

بخصوص الحكم شوفي ياقمر أكيد سمعتي عن المصادمات اللي حصلت بين الشرطه و الطلبه المنتمين لجماعه الأخوان و كتير من الطلبه اتنقلوا للمستشفي في حاله خطيره

طبعا انا مع ان الأمن يكون مستتب من غير أي شغب لأن فعلا في المظاهرات دي بيحصل شغب كتير و بيختلط الحابل بالنابل

وجود أمن في الجامعه مع احترام ادميه الطلاب ده شئ انا مؤمنه بيه
قريت من فتره ان طلاب و طالبات الجامعه الأمريكيه في مصر قاموا بمظاهره احتجاجيه علي رفع المصروفات مع عدم تقديم خدمه توازي الارتفاع ده
عملوا التظاهر بشكل حضاري و مفيش اي امن تدخل لأن الطلبه عارفه اللي ليها و اللي عليها
لكن للاسف بيحصل تجاوزات كتيره في الجامعات المصريه و زي ماقلتلك ياقمر فيه اعمال شغب كتيره بتحصل
لكن لو فيه تظاهرات بشكل حضاري يبقي مفروض مايخافوش من الأمن لو حتي موجود
انا مع الحفاظ علي الشكل الحضاري مع ابداء الرأي بحريه و بشكل برضه لا يدعوا للشغب
اسفه للاطاله ياقمرايه بس موضوعك مميز و حبيت اتكلم فيه
محبتنا ليكي ياقمر
‏قال شباب روش طحن
في الحقيقة هو أنا بتمني طول عمري أن الأمن يمشي من الجامعة عشان أكون حر أصل أنا كده كده حخرج من الجامعة للعالم الواسع وحلاقي كل أشكال وألوان الناس موجوده قدامي من غير أسوار ولا أمن يبعدهم عني فعلي الأقل أعرفهم بدري وأهو أكون كونت خبرة برضه

وبعدين ليه لازم الجامعة تتحرس هو إحنا داخلين نتعلم ولا داخلين معتقل وعموما هو حتي لو تم إلغاء الحرس الجامعي أكيد الأمن حيفضل صاحي لأي حد بيحاول يعمل أي حاجة ممكن تعمل مشاكل مع أي حد
سبحان الله الناس كلها بتفرح بالحرية
واحنا اتعودنا على القمع والقهر
بقينا حاسين اننا لو ماتحكمناش بالحديد والنار
مش هنعرف نعيش ...
للدرجة دى اتعودنا على السجانين ومش قادرين نتحمل مسئولية الحرية
.........
وعلى فكرة ما تزعليش يا سيدتى
الحكومة مش هتنفذ الحكم ..
احنا دولة محافظة مفيش عندنا قضاء أحكامه بتمشى
......
أمال قوانين الطوارئ معمولة ليه
‏قال صفا سارة
والله يا قطة قرار زى ده اكيد ضررة هيكون كبير اقل حاجة لو حصل خناقة فى الجامعة مجرد ان الحرس بييجى بيتم فضها على طول وبالنسبة لانهم بيكونوا امن دوله دى مشكله بردو بس كون انه يتلغى خالص ده شيئ صعب جدا
‏قال maxbeta3zaman
لكن الأساتذه ومعظم الطلبة كانو شايفين ان فيه تدخلات سافرة للأمن فى شئون الجامعة وانتخابات اتحاد الطلبة وتعيين المناصب القيادية مثل رئاسة الأقسام و عمادة الكليات والبعثات والأبحاث مما أوجد لهم سلطات تعلو على الجامعة نفسها ...وبعدين هم بهذا الحكم حايلبدوا على الباب بنفس الخرزانات والقنابل المسيلة للدموع واللوارى الخضراء التى تضم مئات الجنود المتنكرين فى زى الشباب والجاهزين للتسلل داخل الحرم وعكش أى قلة مارقة حاسدة فاسدة
‏قال غير معرف…
الأختلاط حرام حتى فى المدونات
كتبت مدونه منقبه نقول فى مدونتها تعرف نفسها
ملتزمه
لا اشاهد الأفلام واسال الله الثبات
وكانها تجاهد
لآ اسمع الموسيقى بفضل الله
هلى على هذا الأمتناع ثواب؟
ولكن اسمع
الأناشيد التى بدون ايقاع
هو فيه اناشيد كده
وناتى للأخطر
اعتذر
عنقبول اى تعليقات من الرجال ولن ارد الا على تعليقات النساء
وفطست من الضحك لما قريت بيتين من الشعر الملتهب الشوق الركيك تصوروا فى جوزها اللى معاها فى البيت
‏قال Prometheus
أولا أتفق مع الكثيرين ممن يرون أن الأمن لن ينسحب عمليًا من الجامعات ولكن سيظل يعمل بشكل خفي. المشكلة ماهي طبيعة عمله؟ لو أن عمله اقتصر على حفظ الأمن والحفاظ على الأخلاق الجامعية فمرحبًا به. لكن الواقع العملي قد يقتضي كذلك ممارسة دور رقابي خفي على حرية الفكر العلمي والأكاديمي والتربوي والسياسي داخل الجامعة، فانتخابات اتحادات الطلبة مثلا لم تخلو من أبدا من تأثير فعال للأمن على نتائج الانتخابات ليس بالضرورة عن طريق التزوير و لكن عن طريق تسهيل أو عرقلة انتخاب ه1ا أو ذاك.
بل أن الأمر كثيرًا ما تعدى الحياة السياسية إلى الرقابة على الفكر العلمي والأكاديمي. فالكثير من الأبحاث العلمية والموضوعات التدريسية تستغرق وقتًا كبيرا جدا في الموافقات الأمنية عليها أو حتى تتعرض للرفض لأسباب أمنية.
لذا فأنا أختلف معك يا قطة الصحراء هذه المرة في أن الديموقراطية الحقيقية تقتضي السماح لمن نختلف معهم كالإخوان أو غيرهم في ممارسة حقهم السياسي او العلمي طالما أنهم يلجأون لطرق شرعية خالية من العنف. وواجب من يختلف عنهم أو معهم أن يقدم بدائل للطلبة تجنبهم اختيار الاخوان كممثلين لهم.
ان مشكلة الاسلام السياسي ستتنامى إن تم كبت هذا التيار لانهم سيشعرون أنهم ضحايا، أما لو تم السماح لهم بممارسة السياسة بشكلها الشرعي فسوف ينفضح أمرهم و لن يستطيعو تقديم برامج تخدم الشرائح الأعم من الجماهير.
إن خطورة أن ينصب شخص ما أو جهة ما نفسه أو نفسها كقاض يصنف الفكر إلى صالح و فاسد هي كبيرة جدا، فقط احرصي على إضاءة شمعة لإنارة الطريق ليعرف الناس الصالح من الفاسد ولكن لا ينبغي أن ترسمي الطريق بنفسك للآخرين. تلك هي الليبرالية كما تعلمتها وكما أفهمها وكما أتمناها.
متفق معاكى جدا

أى مكان محتاج لأفراد لحفظ الأمن

لكن أظن إن الأمن سيظل موجود ولكن باختلاف المسمى الخاص به

دمتى بكل الود .. تحياتى
‏قال dina
اه فعلا ايه الكلام الفارغ دا...دى حتبقى مسخرة اصلا

المشاركات الشائعة