!!! هـــى لــــو محجبـــة

زوجة شابه تبلغ من العمر 23 سنة ترتدى عبائه وتضع قطع القماش على شعرها وايضا جوانتى وبصحبتها ابنة اخيها التى تبلغ من العمر 3 سنوات .. تحرش بها عامل فى اكتوبر منذ يومين يعنى تقريبا فى نفس اليوم اللى شرفت انا فيه اكتوبر بالاقامة حتى الآن .. انا لازم انسحب من هناك على اقصى تقدير بكره بالكتير الواحد مش ضامن بعد بكرة ممكن ايه اللى يحصل ... لما شريف تحرش بنهى قالوا اصلها مش محجبة والمحامى قال فى المحكمة بالفاظه السوقية اصلها كانت ماشية تتقصع هى وصاحبتها .. ولو كانت لابسه حجاب مش كان حد مد ايده عليها مش عارفه الحقيقة المحامى اللى يتكلم بالطريقة دى متخرج من كلية حقوق ولا من مرحاض عمومى .. طيب صاحبة قضية اليوم محجبة ومش ماشية تتقصع يا جهابذه وبالرغم من كدا المتحرش مسك صدرها واجزاء حساسه من جسمها ووقعها على الارض يبقى ده ايييييييه ؟؟؟
مجرد انشطار سرمدى ؟؟؟
يعنى الحجاب مش منع عنها المتحرش .. مش منع عنها اللى مد ايده اللى عايزه قطعها على جسمها وهى ماشية
الحجاب عفه طهاره
مش كنت ناوية اتكلم فى الموضوع ده لأنى قولت اللى انا عايزاه كله على الفيسبوك
لكن التعليقات اللى شوفتها على المقال اللى نازل فى المصرى اليوم على موضوع التحرش اعلاه جعلتنى ارى مجتمع لا يختلف كثيرا عن الكرة التى تسقط من منحدر
لما قالوا محجبة انبرى واحد من لسانه وقال وايه يعنى محجبة ولا تخضعن فى القول ... كان نفسى اشوفه قدامى او اعرفه مين علشان ادخل صوابعى فى قناة استاكيوس بتاعته علشان اعرف هو سمعها بتتكلم فين علشان يقول تخضع له بالقول ... فى حادث تبادل الأزواج الست الزوجة مربية الاجيال ترتدى الاسدال الايرانى .. يعنى مش عفه ولا حاجه ؟؟؟
يعنى خضعت للقول اللين ومتعت واستمتعت مع واحد غير جوزها وطبعا بالتبادل زوجها عمل العكس
الناس دى عارفه يعنى ايه لفظة كرامة
عارفه يعنى ايه تهون كل الهموم وتموت كل المتاعب فى سبيل الكرامة ؟؟؟؟
مع ان تبادل الزوجات يعتبر مش هموم ولا حاجه
هل قطعه القماش حفظت كرامة وحفظت حسن الختام ؟؟؟
انا طبعا لا الوم على قطعة القماش لانها مجرد شيئ يتم وضعه وازالته زى شكة الدبوس كدا بالظبط انا كلامى موجه لأصحاب الأبواق العالية والعقول التخينة المتشدقين دائما باسم اصل البنت هى اللى غلطانة .. اصل البنت هى مش محجبة .. اصل الحجاب عفة
طيب اتحجبت واتحرشوا بيها .. واتحجبت واتخفت علشان تعيش احلى الاوقات وتجرب كل اللى تشتهيه عينها من الرجالة
حراسة الفضيلة
طفلة بـ«الفيوم» تصارع الموت بعد عملية ختان على يد «طبيبة»
ألم يحن للجهل أن يفارق مصرنا ؟؟؟
إلى متى تستمر العادات الرديئة يتمسك بها الجاهلون حتى يسقطن بناتهن صرعى للموت بدعوى الفضيلة
من امتا الفضيلة والادب والاخلاق والاحترام بقطع الاعضاء ؟؟؟ وهل قطع الأعضاء يغنى عن التربية هل من يقطع اعضاء اطفاله بدعوى الفضيله اراح نفسه واعصابه من كلكم راع وكلكم مسئول عن رعيته ؟؟؟
لان هى كدا خلاص اتقطعت اعضائها يعنى هتطلع متربية وعلى خلق منها لحالها ؟؟؟
طيب ياترى اللى فى اوكار الليل واللى فاتحين بيوتهم كل يوم للغائد والعائد مقطوع اعضائهم
ألم يحن الوقت لنتقدم ونفهم .. نحيا فى الالفية الثامنة ومازال التخلف والجهل ينتشر من مشرق مصر لمغربها حتى اصبح مثل الغولة الحامل فى وحش

تعليقات

‏قال Yasmine
انا هعلق على اول قضية عشان لسه قرياها حالا فى المصرى اليوم و مش مصدقة نفسي
انا مش قادرة استوعب الرجالة المصريين جرالهم ايه..بجد مش قادرة اصدق ان كم الحيوانات اللى مسميين نفسهم ذكور زاد للدرجة دى..هو ايه مفيش احترام لادمية الست..لدرجة دى شرفها بقى مستباح لاى كلب معدى..انا مرعوبة انزل الشارع..بجد مرعوبة..فكرت اكتب بوست تانى عن الموضوع ده لانها الظاهر موضة..انهاردة تلميذين و ست اتعرضوا للتحرش..امبارح طفلة عندها خمس سنين..بكرة عجوز فى السبعين من عمرها
و مش هنخلص قريب على فكرة..لا قانون هيردع ولا توعية هتنفع..دول عايزين يتعمل فيهم اللى بيعملوه فى الست..زى ما بيستبيحوا عرضها يتعمل فيهم كده..بيتهيألى ده الحل الوحيد للحيوانات دى..انا من ساعة المقالة و انا بفكر المرة الجاية اللى هنزل فيها الشارع هاخد ايه معايا عشان اى حيوان من دول اعرف اتعامل معاه..هيوصلوا بينا لفين..هننزل بشوم و مطاوى مثلا؟
و حجاب ايه اللى بيتكلموا عنه الست لابسة جوانتى كمان يعنى مافيش حاجة منها باينة..عايزين منها ايه تلبس نقاب اعور ولا تغطى عنيها الاتنين بالمرة درءا للفتنة..لحد امتى هيفضل اللوم كله على الست..لحد امتى هنعيش فى مجتمع احول..غبى ما بيشوفش غير اللى يرضى الراجل
حسبي الله و نعم الوكيل فى كل حيوان فاكر نفسه راجل و فى كل عيل امه ما عرفتش تربيه و تعلمه الحلال من الحرام و فى كل كلب فاكر ان الست هدفها الاوحد فى الدنيا الجنس و مشتقاته
اسفة على التطويل بس انا بجد فى حالة ذهول من ساعة ما شفت المقالة
‏قال Rania Lelah
تقريبا نفس الفكرة يا قطة
التخلف و الانثى و المبررات الواهيه الى ديما بتتقال علشان يبرروا التحرشات
و الافعال المشينه دى
عامه اللبس عمره ما كان دلاله على الاحترام و الادب
لان ببساطه زىما ذكرتى فى مثالك فى ناس شكلهم الظاهرى محترم و الله اعلم بيهم من جوة

تحياتى
‏قال dr.lecter
انا كذكر مش عارف اعلق بجد هو اعتقد ان ده وباء بيصيب الرجاله كلهم ربنا يستر عليا بجد
بس اللي عاوز اقوله ان اللي بيحصل ده بقي مريب يعني زياده عن الحد الطبيعي

يعني بالدماغ كده من ساعه القضيه ماتعرفت المفروض العمليه تهدي وكل ذكر هيتحرش هيبقي عارف ان فيه عقوبات وسجن وفضيحه لكن العكس بيحصل العمليه بتسخن معاهم اكتر

هو خلاص السعار الجنسي بياكل فينا كرجاله وخلاص بيقنا مشغولين بالعضاء التناسليه للدرجه دي؟ ماظنش اللي بيحصل ده مش طبيعي باكررها مره تانيه فعلا

مش معقول كل اسبوع قضيه تحرش وكوارث فيها حاجه انا مش فاههمها هل خلاص الرجاله بتعلن الحرب الجنسبه علي الحريم في مصر ولا ايه؟

بالطول بالعرض هنتحرش ونجيب بدماغكم الارض؟
هو ده بقي الشعار ولا ايه؟


فيه مبدا تاني علي موضوع اللبس بس يفطس من الضحك رغم ان صديق ليا قاللي انه اتاكد منه من طبيب نفسي يعرفه

ان كل مالراجل يلاقي الست محتمشمه اكتر بتثور عنده الشهوه اضعاف مضاعفه اكتر لو كانت عاريه تماما يعني كل ماتغطي يهيج اكتر

مش عارف ده صحيح ولا لا بس تبقي مصيبه بجد لان كده الايه اتعكست

يبقي فيه حاجه مش طبيعيه للمره التالته بكررها اللي بيحصل ده محتاج فعلا وقفه وتحليل نفسي لمرتكبي الجرائم دي
مش بصراحه ايه اللى جرى للمجتمع المصرى.. بقينا نسمع عن حاجات غريبه بعيده كل البعد عن دينا وقيمنا وعاداتنا وتقاليدنا المحافظه...
تحرش بالبنات والستات فى الشوارع وتبادل زوجات وحاجات غريبه؟؟
ايه اللى جرالك يا بلد؟ فين النخوه والشهامه؟؟ فين الرجوله؟ بجد حاجه تكسف.
والانحطاط الأخلاقى ده ما هو الا نتيجه لحاله الإنحطاط اللى البلد عايشاها فى كل المجالات.
بصراحه الموضوع طويل جداً وعايز صفحات وصفحات للنقاش... بس للأسف الواحد بيشعر بمراره واسى ان حال البلد وصل للدرجه دى.. بجد خساره يا مصر يا بلد الأزهر
انا بجد مش عارف ايه اللى جرى للبلد دى..
تحرش بالبنات والستات فى الشوارع وتبادل ازواج، وحاجات غريبه عمرنا
.ما سمعنا عنها فى مجتمعنا قبل كده
فين النخوه والرجوله؟؟
الناس فى حالة انحطاط اخلاقى رهيب نتيجه لعدم التوعيه والتربيه الصحيحه. والأكيد ان الانحطاط الأخلاقى ده مش جاى من فراغ ما هو الإ انعكاس لأحوال البلد المترديه فى كل المجالات.

بصراحه الموضوع طويل وعايز صفحات وصفحات..... بجد خساره يا مصر ان ده بقى حالك يا بلد الأزهر؟؟
‏قال غير معرف…
للاسف المقال ملئ بعدم الموضوعية
ايه دخل الحجاب فى الموضوع
انتى حتقولى انه رد على ان الحجاب عفة وطهارة وغير كده
دا مش مبرر ان ناس محجمة الحجاب وفاهماه غلط ان احنا كمثقفين نرد عليهم باسلوبهم
الحجاب خارج الموضوع يا سيدتى
الحجاب فرض دينى ولكن تطبيق الفرض حرية شخصية
تماما كاى فرض اسلامى
انا لا املك ان اجبرك على الصلاة او الصيام او الاخلاق الحسنة اووغض البصر او او او
وانت لو تتكلمين من منطق علمى وثقافى هناك الكثير من المحجبات لم يمنعهن حجابهن من التعلم والتطور والترقى فى الحياة
اساتذة جامعات وطبيبا ومهندسا بل ةقاضيات
وشهادة المستشارة نهى الزينى ليست عنا ببعيد
فهى شهادة جبن عنها اعتى الرجال
حنانيك
ورفقا بنساء مصر محجبات وغير محجبات
وكنت ارجو منك الرد على بعض التعليقات عندك تصف الرجال بالحيوانات
وان تنهى عن التعليقا العنصرية
فمن يتحرش منةالرجال مثلهم مثل العاهرات من النساء
لا يجب ان نصف كل النساء بالعهر لوجود قلة قليلة
لان النساء منهم امى واختى وزوجتى وبنتى
اسف على الاطالة
‏قال mohamed ghalia
لا ادرى الى اين نسير
تحياتى
‏قال Unknown
انا بحس اللي بيقول لو محجبه زي اللي تقوليله طووووووووور يقول إحلبوه

معلش كان نفسي أبعبع ف الموضوع ده عشان بصراحه دمي محرووق جدا منه

بس عندي إمتحان و بذاكر بقي
إدعيلي:)
‏قال سمكه واحده
بجد نوع من اشمئزاز والقرف والهلع
بجد حاسه ان كده كتير اوي حيوانات مش بني ادمين في ايه ايه اللي جري ايه اللي بيحصل انا مقروفه ومخنوقه ومضايقه وحاسه ان الدنيا بقت كلها كده قرف ووو مش عارفه بجد اقول ايه انا والله دلوقت بقيت اخاف انزل في الشارع الواحد هيعمل ايه علي اد ما الواحد بيشوف وبيسمع ان في ناس محترمه ومثقفه ومتدينه بس مشوفتش سماع بس وحاسه ان كل اللي في الشارع جيوانات ايه اللي حصل لمصر والشباب والرجاله دي مش كده دول حيواناااااااات
يعني كنا بنقول البنات السبب البنات بتدلع البنات بتتهب في الشارع طيب واللي متحجبه واللي مغطيه اديها ايه؟
بجد ده غضب وابتلاء من ربنا سبحانه وتعالي وربنا يزيل الغمه ويفك الكرب ده يارب
علي كده الناس شكل ظاهري محترم فقط من جوه الله اعلم بقي
بجد حاله من التقزز ولقرف من الهم ده واللي بنشوفه بجد مستغربه
‏قال mando4ever
بتقري المصري اليوم كتير انتي....

ما علينا انا عقلت على اللي بتكتبيه باللي مقدرش ازيد عنه في الفيس بوك...

وده بجد...
لان لو على التعليق المستحق مش هخلص...

على الرغم من كدة بتهم نفسي بأني الشخص التافه الوحيد في العالم اللي مش لاقي حاجة يعملها في ليله لما بيبقى ملكي وانا ملكه وبس....

لو علقت على البوست ده بالتحديد هرجع بكلام قلته من زمان قوي...

وكنت معتبره بمثابة قضية....
عشان كدة لو عيدته هبقى مستهلك قدام نفسي....

وهفضل عاجز عن الرد واكتفي باعجابي الشخص اكتر ما احاول اثير اعجابك انتي برد طويل عريض...

خاليكي بخير
‏قال غير معرف…
مؤتمر البث التجريبي



جلال عامر







كان المؤتمر ثلاثة أيام ويراعي التجديد في موعده وحضر "الضاني" المؤتمر بصفة مراقب بحكم محكمة كانت قد وصلته دعوة علي يد محضر ليخطب هناك فوقف وقال (يا رب أخدت مني كل حاجة وعطتني محدود الدخل يا رب خده هوه راخر)... ولأن محدودي الدخل كانوا يجلسون في الصفوف الأولي قال له أحدهم (عيب يا ضاني تقول علينا كده ده إحنا واكلين عيش وملح)... قال الضاني (يعني حضرتك تاكل عيش وملح وتفضل بعد كده تشرب وتقربع في ميه و"توشكي" يفضل عطشان) فرد المحدود (توشكي معاه مليارات ممكن يشرب عرقسوس)... وقال آخر (أنا هاخد توشكي أربيه عندي) فرفض الأول وطالب بتحويل توشكي إلي مسلسل تليفزيوني بطعم الفلفل وهددهم إذا لم يسمعوا كلامه أن يبلغ البوليس عن المؤتمر فقال الضاني (يعني ما شافوهمش وهمّه بيسرقوا شافوهم وهمّه بيجتمعوا)... ثم أضاف (ده مؤتمر محترم ومش عايز أسمع حد يقول محفظتي إتنشلت اللي معاه حاجة خايف عليها مايجيش بيها المؤتمر إتفضل عّقب يا أستاذ "برغوت") فقال الأستاذ برغوت (إحنا لازم نلسع المعارضة لسعة جامدة بس الأول ننقل المقر بتاعهم لفندق دبي وبعدين ربنا يحلها بمعرفته وعلي العموم الحزب جاهز ولابس الجوانتي)... وقال الضاني (إحنا هنوزع عليكم الفكر الجديد بمناسبة دخول الشتا واللي يطلع ضيق عليه يبدله مع زميله والمضبطة هنحرقها ومفيش كلمة تطلع بّره مهما عذبوك... يسألوك مين غرق ماأعرفش... مين إتحرق ماأعرفش... مين وقعت عليه الصخور تقول صخور إيه يا باشا مفيش صخور وقعت ده كان بث تجريبي) قال الأستاذ برغوت: (كل ده علي عيني وراسي لكن هنودي القتيلة فين؟) فقال محدود الدخل: (أدفنوها مع توشكي!).
‏قال blackcairorose
الحجاب فى بدايته كان له مدلول دينى أو سبب دينى، ولكن دلوقتى انا بشوفه مظهر اجتماعى بالدرجة الاولى، مثله مثل ارتداء المصريات فى الريف للطرحة سواء كن مسلمات او مسيحيات

نفس الشىء فى اوساط كثيرة جدا فى المجتمع الحجاب اصبح مكمل للزى من غير ما يكون له علاقة بالدين ومن هنا عادى انك تشوفى صورة حرامية او قاتلة او فتاة ليل ومع ذلك ترتدى الحجاب

وحكاية ربط التحرش بالزى هى حجة من الرجل ـ غالبا ـ لتبرير التحرش أو على الاقل تقليل مسئولية المتحرش عن جريمته، وبرضه بيلاقى المؤيدين له من الرجالة اللى هدفهم نفس التبرير او حتى هم نفسهم بيكونوا متحرشين فى وقت ما وظروف ما، لانى معتقدش ان فيه انسان بيحترم المرأة وبيعتبرها كائن انسانى بالدرجة الاولى وهيحاول يلاقى تبرير لجريمة التحرش اللى أثبتت كل الدلائل انها مرتبطة بدماغ وتفكير المتحرش قبل اى شىء آخر
عزيزتى
الحكاية مبقتش حكاية محجبة او غير محجبة ..من الواضح ان السادة المغتصبين اصبحوا لا يفرقون بين الفئتين والدليل واضح فى بعض هذه الانتهاكات
وانا اتفق تماما مع من يحاولون تنبيه السيدات والفتيات بضرورة عدم الابتذال فى الملابس والتواجد فى الاماكن الغير آمنة بدون صحبة حتى لا يتعرضن لذئاب الليل والنهار احيانا
فالننظر لموضوع التحرش من هذه الزاوية ولنحذر بناتنا وزوجاتنا واخواتنا من هذا المصير طالما انه قائم ووارد الحدوث وذلك بتجنب ماسبق توضيحه ولان كلاب الشوارع موجودة وخيالها المريض مازال يصاحبها ..اذن فاليكن الحذر وتجنب هذه الكارثة هو شعارنا الجديد
‏قال سراج
النفس المريضة تعتدي على أياً كان، لكن هذا لا يعني أن أنكر أن الحجاب عفة للمرأة وللرجل، أن أخرج بكامل زينتي أمام رجل غريب ، وأقول بأني لا أُثيره هذا هو الجنون بعينه، المرأة محط رغبة الرجل، هكذا خلقها الله ولولا هذه الرغبة لما وصل كلانا إلى هذا اليوم.. الله أعرف بأحكامه ولو كانت كما تقولين لما شرع الحجاب، هو من خلق الذكر والأنثى وهو أعلم بحالهم، فهو أحكم الحاكمين، وإلا أصبحت أحكامه عبثية، أو ظالمة لأنه أجبرني على شئ، ليس لها مبرر - على حد ماذهبتي إليه - وهذا هو عين الظلم وحاشا لله من الظلم لأنه أرحم الراحمين.. أتمنى أن لا تتعدي بحالات شاذه -على حسب ما اوردتي - على العباءة والحجاب.. اسئل الله أن يهدينا جميعا لما يحبه ويرضاه
القصه ملهاش علاقه بلابسه ايه
المشكله
شفتي احنا وصلنا لايه
‏قال غير معرف…
عزيزتى صاحبة المدونه
الاحظ ان كل النقاشات حول هذه الماساه تستند اما الى التعبير عن الغضب الشديد او الخوف من ملاقاة هذا المصير وهذا شعور طبيعى نظرا لتنامى هذا الفعل القبيح
واما على الجانب الآخر نجد تفسيرات وتبريرات تقليديه جاهزه مثل القول بان الله قد جعل المراه موضع جذب للرجل
وينسى ان يسال اليس هذا كان موجودا من قبل وطوال الوقت لماذا انحدر التعبير عن ذلك الى هذا المستوى المتدنى
الهمجى الآن؟
وينتمى الى هذا الفريق من يتحدث عن ملابس المراه
هذا مثال واحد على عجز التفسيرات الجاهزه عن تفسير هذا الذى ابتلى به المجتمع
نخن امام ظاهره فيها طرفان الضحيه والمعتدى
وكليهما يتحركان فى اطار مجتمع
وبخثنا يجب ان ينصب على الطرفين الرئيسين
وقد استمعنا للضحيه او من فى حكمها من بناتنا ونسائنا وما تمتلىء به نفوسهم من قلق واسى وخوف له ما يبرره تماما
وعلينا ان نستنع الى الجانى ايضا
وهذا دور البحث العلمى وحتى يستيقظ باحثونا من سباتهم ليس امامنا الا اعتراف متحرش سابق فى مدونته
ماذا يقول نستمع اليه
انا اسف . مقدرش اقول غير كده. ده مجرد إعتذار من متحرش إلى كل بنت أذيت مشاعرها و عاملتها كأنها لعبه طريه يجب الأستمتاع بملامستها مش عارف ابدا منين ولا اقول ايه غير انا اسف . أنا عايز اعتذر عايز اتبرر من ذنوبى عايز اغتسل من اثامى الثقيله على ظهرى. بصراحه معنديش اى مبرر لتحرشاتى لأنى لو اتحججت بالفقر فانا مش فقير بل من اسره غنيه و لو اتحججت بالجهل فانا مش جاهل بل متعلم و قارئ و عارف اهميه المرأه و دورها فى البشرية و لو اتحججت بعرى المرأه و إثارتها فده برضة مش حقيقى لأن كل اللى اتحرشت بيهم كانوا منقبات و محجبات
يقول انه ليس لديه اى مبرر او سبب ولكن لنتامل كلامه هو نفسه جيدا
الواقع دون ان يشعر قدم لنا مدخلا رائعا لتناول هذه المشكله
وعاملتها كانها لعبه طريه استمتع بها
نعم السبب الأول هو صورة المراه كلعبه تقتنى كما ترسخها سنوات طويله
من الوعط المتخلف
صوتها عوره....كل خطوه من خطواتها موضع شك ولابد ان توضع طوال الوقت تحت المراقبه فهى اقرب للحيوان لا يشغلها الى الجنس ....يجب ان تحدد اقامتها سواء بالفعل او بثقيل الملابس التى وصلت الى السماح لها بعين واحده فقط تنظر بها
كل الفتاوى حتى ما تدعى انها تكرم المراه عند التدقيق فيها نكتشف تحتها هذه النظره المتشككه المريبه
طبعا مثل هذه الصوره ومثل هذه الفتاوى المتخلفه يستمع اليها الكثيرون فلماذا تؤدى عند البعض دو ن غيرهم الى جريمة التحرش؟
هذه المواعظ مثلها مثل العنف فى الأفلام والمسلسلات لا تؤدى الى العنف عند كل من يشاهدها وانما فقط من لديه الأستعداد
وفى مجتمعنا الذى تتحرك فيه الضحيه والجانى اسباب عديده يمكن ان تصيب البعض بعاهات نفسيه تجعل مواعظ التخلف مؤثره فيهم بشكل خطير
كل مؤسسات التربيه او التنشئه من الأسره للمدرسه للنادى لبيوت الثقافه للحزب السياسى لوسائل الأعلام كلها تعانى من مشاكل جسيمه
بالأضافه الى سيادة الرغبه فى الهروب
ولو الى المجهول فى عرض البحر
88%من الشباب يبحثون لهم عن ملاذ ووطن ويفكرون حسب الأحصائيات فى الهروب وليس للهجره المنظمه فحسب
وماذا ننتظر من كائنات لم تخضع للتربيه او البناء لا اقول السليم او الصحى ولكن لما هو اقل من ذلك....النتيجه ضياع ضياع ضياع
ياخذ اشكالا متنوعه متعارضه تبدو على السطح متناقضه ولكنها تنبع من نفس المنبع
اما تشدد وعنف او انفلات وبهيميه
وما الحل
طبعا علاج كل ما ذكرت على المدى البعيد ولكن على المدى القصير وعلى الفور على الشرطه السريه ان تنتشر فى كل مكان فبمجرد احساس المتخرش ان هناك من سيردعه سيجعله يفكر اكثر من مره
وفى الأحوال التى جرى فيها تحرش فى الشارع سواء وسط البلد او شارع الجامعه العربيه كان غياب كامل للأمن
‏قال غير معرف…
الصراحة الحجاب و النقاب احيانا بيثير جنسيا برضو
الحجاب او النقاب بيفكرني بالورق اللى بيلف الهدية عشان يشوقنا و يثير خيالنا عن اللى تحته

طيب انا مرة ماشى و شفت واحدة منقبة و يالهوى كان عليها جسم ينشف الدم فى جتة الواحد

اللى شايف ان المراة عورة و لازم تتغطى يبقى مفروض ماتخرجش من بيتها بتاتا او تخرج بس يخترعولها طاقية الاخفا
‏قال a
اكيد هي السبب في اللي حصل
وايه يعني لابسة جلباب؟ . يمكن سدرها كبير وقفاها عريضة وشكلها اغرى الواد

ولكن من ناحية اخرى نرى ان الامر يتكرر والاحداث تتوالى بانتظام مدروس ولا بد ان تكون هذه مؤامرة صهيةنية على الشعب المصري لاضعافه لان المصريين لا يفعلون هذه الافعال الشائنة وكان لا بدن من استخدام ضعاف النفوس ليكونو عملاء للصهاينة لتنفيذ هذه الاعمال الدنيئة ومن جهة اخرى فان ظاهرة التحريض على على العنف ضد النساء بدا يزداد في القرن الواحد وعشرين 21 باستغلال عواطفنا الدينية لالباس النساء الجلباب وبدات الصهيونية بتحريض الشبان على التحرش بالنساء من جهة والحض على لبس الحجاب من جهة اخرى حتى يلهينا عن فقرنا وجوعنا ويتم توضيف اناس يتلبسون بملابس شيوح لتنفيذ هذا المحطط الصهيوني وها قد نجحو في الهائنا عن فقرنا وجوعنا باستغلال عواطفنا الدينية بتنفيذ هذا المخطط واما مؤيدين ومؤيدات العنف ضد النساء وترديدهم قول هي التي" جنت على نفسها" فما هم الا عملاء للصهاينة بيننا
فهل من يجري في عروقه دم مصري يؤيد مثل هذه الاعمال؟
‏قال Desert cat
اول حاجه هرد على واحده تقريبا فاتحه بيتها للغائد والعائد علشان كدا اتحرق دمها ودخلت تقل ادبها مع انها مش فى بالى خالص علشان افتكرها وقت كتابة البوست بس تقريبا اللى على راسه كوووووم من البطح بيحسس عليها اصل اللى رايحين جايين على بيتها كتير .. خليها تحسس بقى هتحسس على ايه ولا ايه الله يكون فى العون
نياهاهاهاهاهاها
‏قال Desert cat
banouta masreya
كمية الذكور اللى ملت الشوارع من حوالينا الخطأ ليس خطأهم فقط ده خطأ الذكور اللى بيتفرجوا ويقولوا لك تستاهل هى خارجه من بيتها ليه
المفروض كل واحده تمشى فى ايدها سيف لان فى بلدنا الذكور يخافوا مش يختشو

نورتينى يا جميله
‏قال Desert cat
Rania
يا رونا الغباء المتفشى فى المجتمع جعل السلبية اهم المظاهر وبدل ما كل واحد يتكتم ويسكت بيلقى اللوم على الانثى علشان يبرر عجزة مش اكتر

محبتى يا قمراية
‏قال Desert cat
dr.lecter
هما تقريبا يا دكتور والله اعمل حالة الهياج الجنسى عندهم بزيادة شوية فسمعوا عن عملية التحرش الجنسى داخل الاقسام قالوا نعتدى فى الشوارع على البنات لحد ما نوصل القسم نعيش حياتنا هناك
:)
تحياتى
‏قال Desert cat
واحد من الناس
المجتمع المصرى حصلت ه حالة شلل فكرى
توقف عن الابداع والابتكار ولم يعد يعرف من الدنيا سوى ان اجداده الفراعنه والذى بموتهم ماتت ايضا معهم الاخلاق
مودتى واحترامى
‏قال Desert cat
واحد من الناس
الاهل مش فاضيين يربوا يا سيدى
الاهل مشغولين بجمع الاموال
اما الاولاد فالشوارع اولى بهم
لذلك ترى ما تراه من تدنى وانحدار اخلاقى
مودتى
‏قال Desert cat
ابن مصر
بدأت كلامك بعدم الموضوعية ومن الواضح انك لا تعلم معناها
فلو كنت تعلم معناها لكنت تأكدت من حقيقة الكلام اللى فى المقال علشان يكون ردك على الاقل بموضوعيه
اما ايه دخل الحجاب فى الموضوع فينم عن عدم معرفه بما يحدث باسم الحجاب وجهل بالمتشدقين دائما فى القاء اللوم على الانثى لانها لم ترتدى الحجاب ومن ارتدت الحجاب تم التحرش بها والقائها ارضا
عرفت يا صاحب الموضوعيه ؟؟؟

فرض دينى من مين ؟؟؟
هو فى رسول نزل بعد الرسول محمد ومن رسالته الحجاب
هو يا حضرة المثقف انت مش تعرف ان معنى كلمة حجاب فى اللغة وتعنى الساتر يعنى زى الحائط الستارة اللى عندك فى البيت ؟؟ الحجاب الحجاز بين البطن والصدر
يعنى مالوش علاقه بالزى خالص يعنى لو عايز تطبق الكلمة بمعناها ابقى خلى اختك تنزل الشارع وهى ماشية ورا ستارة الحمام
انت لا تملك أن تجبر اى حد فى الدنيا على اى حاجه
بل اجبر نفسك على التزام الاخلاق وغض البصر وعدم القاء المحصنات
يعنى انت مش عارف من الطبيبات والمهندسات غير نهى الزينى وهى لا طبيبة ولا مهندسة اساسا ؟؟؟؟ ولا علشان الاخوانجية مش لاقيين غيرها يضربوا بيها المثل مع انها معملتش حاجه تذكر ولا حد بيتشدق بيها غير الاخوان اللى رايحين جايين يقولوا تصدت للتزوير مع انها اخدت مجهود مكى والبسطاويسى
ولأن الاخوانجية سمعهم تقيل فاكيد مسمعوش عن عالمة زى
نجوى عبد المجيد اول عالمة عربية تفوز بجائزة لوريال يونسكو

بالنسبة للراجل الحيوان فالحيوان فى الحالة دى مظلوم بالتشبيه لو واحد اتحرش ببنتك واغتصب مراتك وقال لفظ قذر لاختك هتصفه بايه ؟؟؟
ولا هتروح تعتذر له علشان عمل معاهم كدا اصل منظرهم استفزه
ماهو دائما من يبرر الخطأ ويدافع عنه لا يريد له ان ينتهى لأنه يقوم بمثل هذه الأفعال فكيف اذا وجد عقاب رادع سيمارس غريزته الحيوانية .. فدائما يهاجم ويلقى اللوم ولا املك سوى ان اقول لكل من يدافع عن الحيوانات المتحرشين تشوفها فى اقرب وقت لاقرب الناس عندك
اختك او امك او بنتك المهم انه حد يوجعك ومش يكون تحرش ولا القاء كلام قذر على سماعها يكون اغتصاب
‏قال Desert cat
mohamed ghalia
لو ظل هذا الاضمحلال الفكرى فحتما الى الهاوية

تحياتى
‏قال Desert cat
عاقلة علي ارض الجنون
الضحية المرة دى محجبة
قالوا لاء اصلها خضعت بالقول اللين
غباء قابع فى الاذهان
خلصى مذاكرة وفضفضى براحتك
:)
مودتى
‏قال Desert cat
سمكه وحده
اللى بيحصل فى الشارع ده اسمه انحطاط اخلاقى وانحدار ثقافى
الحقيقة انا حاسه اننا بنظلم الحيوانات معانا لما بنشبههم بالاشكال دى
اصل الحيوانات مش بتتحرش
الله يسترها على الجميع

مودتى
‏قال Desert cat
mando4ever
هو شكلنا احنا الاتنين خلصنا كلامنا على الموضوع ده فى الفيسبوك
هههههههههههه
عموما وجهة نظرك وضحت يا فندم
والطبيعى ان انسان بيتكلم بنفس منطقك يبقى ده يستحق كل تقدير مش تتهم نفسك بالتفاهه

مودتى واحترامى
‏قال Desert cat
Anonymous
مؤتمر البث التجريبى شكله هيجى على دماغنا احنا
وربنا يستر من الفكر الجديد

تحياتى
‏قال Desert cat
blackcairorose
حبيبتى فى اليهودية الستات ارتدوا الحجاب
وفى المسيحية ارتدوا الحجاب
هو الحجاب مظهر اجتماعى كما تفضلتى وذكرتى بالفعل
زى الطربوش ايام زمان
يعنى لو هنقول غطاء الرأس فرض يبقى الراجل كان بيلبس الطربوش فرض ومع التطور تخلى عن الفروض الدينية وبعد عن العادات الاجتماعية
اوافقكى الرأى تماما فى من يلقى اللوم دائما على الانثى
انه متحرش ولا يريد لتلك الظاهره ان تنقضى

محبتى يا قمراية
‏قال Desert cat
وميض ابتسامة
يا سيدى الفضال انا لا ادعو للابتذال ولا ادعو للثام
انما ادعو لتوخى الحذر
فليس ابدا عكس العرى هو التخفى
والا لن يأمن ابدا المجتمع من الانحرافات وسنظل فى عراك خفى ابدى
نحن امية الوسطية فالتزام الوسطية هو الطبيعى وفى المقابل لابد من الاخلاق والاحترام لذوى الرغبة البهيمية

مودتى وتحياتى لحضرتك
‏قال Desert cat
سراج
من اين اتيتى بمثل هذا الكلام
من قال لكى ان المرأة رغبة للرجل
يعنى ترين دائما الرجال الذين تعرفينهم يثاروا بمجرد رؤية اى انثى تسير امامهم ؟؟
ألم تعلمى ان حالة التحرش الوحيدة التى ذكرها القرآن الكريم كانت لرجل وهو سيدنا يوسف اى هو من فتن امرأة العزيز بجماله وليست هى
أتيت انتى لتقلبى الموازين وتبدلى كلام الله ... اين شرع الحجاب فى القرآن ؟؟
هل الجدار او الساتر ينتمى الى الملبس باى حال من الاحوال ؟؟
ما الدال على كلامك
فعلى من يتحدث البرهان وليس الكلام العائم لمجرد الكلام

تحياتى
‏قال Desert cat
مـحـمـد مـفـيـد
اه يا استاذى العزيز للاسف شوفت
ما وصلنا له من الافعال الهمجية
وما زلنا نختلق المبررات

مودتى
‏قال Desert cat
Anonymous
استاذى الفاضل
اصدقك القول باننى اكرر هذا الكلام غضب لما يحدث وخوف من القادم فلو ظلننا بهذه السلبية وهذا الوضع المتردى فالقادم اسوء لا محالة
اصحاب هذه التبريرات العقيمة لا يريدون للوضع القائم ان ينتهى حتى مع حدوث كم الجرائم الهائل والتى وصلت الى القتل فهم سعداء يعبثون بالاجسام وبمنتهى العبثية دون رادع حتى المارة لا يلتفتون لهم بل دائما يلتمسون لهم الاعذار .. اللوم على الاسرة اولا التى لا تهتم كثيرا بتربية ابنائهم ولا يحثونهم على مكارم الاخلاق فهم ملهون فى العمل لتوفير المال الكثير اما الابناء فالشارع اولى بهم
قرأت اعتراف ابن الملونير وهذا ما اغضبنى اكثر واكثر بان بالفعل المتحرش يرتكب جريمة وليس له عذر او مبرر فاغلبهم اما متزوجون او لا يتتعدى اعمارهم العشرون عاما فما ينقصهم هنا هو التربية واحترام آدمية الانثى
اشكر حضرتك جدا على جميع تعلقاتك القيمة

مودتى واحترامى
‏قال Desert cat
An Egyptian
واللى بتلبس نقاب وترسم عنيها وتولنها بالوان الطيف السبعه
دى تبقى ايه
انا برضه شايفه زيك اللى شايفه فى نفسها عورة تترمى فى بيتها
‏قال Desert cat
واحة في الصحراء
ايوا هى السبب حد قالها تخرج من بيتها
وبعدين تنكرى انه مخطط من احدى مخططات الصهاينة اللى كل اسبوع بندعى عليهم فى الصلاة
ههههههههههههه
طبعا حجة الجهلاء والمنافقين الصالق التهم واى حاجه نسميها مخطط صهيونى وهما اساسا لا عارفين يربوا اولادهم ولا هما متربيين
الراجل تلاقيه عنده خمسين سنة وماشى يعاكس فى الشارع
اعتقد برضه انه تبع المخطط الصهيونى
:)
تحياتى
‏قال Desert cat
مجداوية
مش قريت ردك ومش هنشر لك حرف
ومش تيجى هنا تانى
‏قال Zika
الموضوع ده غريب فعلا انا قريته من فتره في جرنال
وده اكبر دليل علي ان المشكله مش بس عند البنت ( يعني الناس اللي بيتلككوا بلبس البنات يتفضلوا يقروا الاخبار اللي زي دي )
واضح ان المرض او الوباء ده مش متعلق بالبنت
لا اهي واحده لابسه نقاب يعني مش باين منها فتفوته ( زي ما بيقولوا ... تثير الغرائز )
طيب تعمل ايه اكتر من كده مش كفايه لابسه الدولاب كله
ياللا قدر الله ما شاء فعل
المهم انتي عامله ايه ؟
تحياتي يا قطه
‏قال Desert cat
Zika
هى المشكلة فى المجتمع زيكا والافكار اللى معلقه اى خطأ على شماعة البنت حتى من غير ما يعرفوها وعلى رايك اللى لابسه الدولاب كله وماشية دى فيها ايه يير الغرائز دول حتى بيفكر يخبوا لها عنيها
انا كويسة يا فندم
المهم انت اخباراتك ايه
تحياتى
‏قال غير معرف…
معلش لو ممكن
انا فتحت الرابط بتاع الانونيمس وكان فيه صورة فيها واد لابس درع ووحدة محجبة|, وكان مكتوب على الصورة "اتدرعي قبل ما تتبعبصي" وكان نفسي اقول للانونيمس/ة يا ريت قل ما تقولو الكلام دة لبنات الناس - يا ريت تقوله وتوريه لاختك بالاول علشان انتا هنا بتكلم اختي وعايز اعرف ان دا اسلوبك في الكلام مع اختك؟

علشان انا عايز اوجه اللام دة لاختك بالاول ويا ريت وجها لوجه, بس قوللي على عنوان بيتك او انا اديلك عنواني وجيب اختك معاك علشان بحب اكون صريح ووجها لوجه وعايز اعرف واشوف رد فعلها لما اقولها -اتحجبي قبل ما تتبعبصي

http://shadow.manalaa.net/node/714

عبدو البلدي
‏قال Desert cat
عبدو البلدي
والله يا استاذ عبدو الناس المتخلفة دى مش عارفه هيحترموا نفسهم امتا
عموما ميرسى جدا لكلامك ويارب يحسوا على دمهم
شرفتنى جدا

المشاركات الشائعة