كـــلام النـــاس

من وجهة نظرى الشخصية ان كلام الناس لا يمس من بحقه الكلام فقط بل يمس اسم عائلة باكملها ودائما اتعجب كثيرا من يترك حاله ومحتاله ويجلس للهمز واللمز على شخص فى الغالب لأنه افضل منه ولا يوجد تفسير لهذا فقط سوى الحقد والغيرة ... ايضا كلام الناس ليس فى ترديد الاشعات فقط بل انه فى الوقيعة بين الناس وبعضهم البعض وكم من بيوت خربت بسبب تدخل الناس وكلامهم .. فربما يكون أحد تحدث مع من ظنه صديق فى لحظة فضفضه .. ليأخذ هذا الصديق الكلام ويجعله تسلية بينه وبين الآخرين فى اوقات فراغهم لربما زاد علي الكلمات سطور وجعل منها قصة تروى فى المجالس ..عن نفسى لا ألوم من يفعل ذلك ولكنى القى اللوم على من جعل حياته الشخصية على المشاع .. فإن كنت لا تستطيع حفظ سرك وأخرجته من صدرك فكيف تلوم من أخرجه أيضاً مؤمنة جداً بإنه إذا خرج السر بين إثنان فشى .. فالحياة الشخصية ملك الانسان لوحده .. إن اردت الفضفضة فيكون مجرد معلومات عامة لا تؤثر ولا تتأثر بها .. حتى لا يكون الشخص عرضه لكلام الناس .. ولكن ماذا نفعل فى المتطفلين ففى بعض الأحيان ايضاً يكون عرضة لكلام الناس دون ان يتلفظ لا باسرار ولا معلومات وإنما يكون من قبيل الصدفة .. انا شخصيا تعرضت مرتين لكلام الناس ومش عارفه بصراحة اذا كان اتكلموا تانى ولا لاء بس المرتين دول اكتر حاجه اثرت فيا .. اول مرة كنت من ضمن المشاركين فى ملتقى الشباب العربى ايام الشباب بقى وطبعا ده كان يستدعى سفرى لسوريا ، .. بدأت الإعدادت لليوم ده تقريبا قبل السفر باسبوع خلال الاسبوع ده كانت جارتنا الله يكرمها كل يوم ماسكة ودن ماما وقاعدة تقولها ازاى تسمحى لبنتك تسافر بلد تانية ومعاها شباب ده اسمه انحلال .. دى اسمها قلة ادب .. بصراحة كان رد ماما رادع وقتها وعجبتنى قالت لها انا مش مستنية حد يقولى اعمل ايه فى بيتى ومش اعمل ايه انتى بس خليكى فى اولادك .. التانية تسكت ابدا نم × نم .. لحد لما ماما فى الآخر قالت لى مش فى سفر .. لا مش انا اللى يتقالى مش فى سفر بتهرجى ولا ايه .. ومسكتها من الحتة اللى بتوجعها بقى انتى مش واثقه فيا .. اهئ اهئ عااااااا .. انتى اذاى تسمعى كلام واحده غريبة مش انتى اللى مربيانى وعارفانى كويس اعاااااااااا .. هنا والدمعه فرت من عينها وقالت لى خلاص يا حبيبتى سافرى لو عايزة تاخدى جولة عبر العالم من بره بره روحى .. انا قولت لها لاء دى خليها بعدين مش وقته .. وسافرت لما رجعت لاقيت جارتنا دى مسيحة فى المنطقة كلها انى كنت مسافرة مع ولاد فى الجامعه وكل اللى يسالنى اغيظه اقولهم علشان ولادكو متخلفين وفاشلين وبيسقطوا ... اعتقد انى لحد ما عزلت من المنطقة دى كلها وانا مش بكلم جارتنا ولا حد فى عيلتها خالص .. طيب وعيلتها ذنبهم ايه مش عارفه حاجتين ماليش فيهم انى اعاتب حد على حاجه عملها .. لأنى اعرف اللى بيعاتب حد بيكون باقى عليه وانا ببيع بسرعه الصاروخ ... وانى اضحك فى وش حد وانا جوا قلبى بياكل منه باحس انه مش يستاهل انى ابص له مش اكلمه .. وسافرت وسلامة يا سلامة روحنا تبادلنا الثقافات وجينا بالسلامة واحنا هناك نزلنا فى فندق انترادوس وده فى محافظة اسمها طرطوس كل شارع تمشيه فيها تحس انك منبهر .. راجعة بقى سعيدة بالتغيير ومنفهشه انا بطبيعتى مش بكلم حد اساسا لا جيران ولا خيار مسلوق فى الفترة دى كنت كل لما انزل الشارع ولا اخرج البلكونة الاقى اللى بتقولى فى وشى رجعتى امتا حمد الله على السلامة وضحكة صفرا من تحت لتحت كانى راجعه من سهره حمرا ايه يا حاجه هو انا كنت عاملة اعلانات ولا ايه ؟؟ لاء اصل فلانة قالت كيت وكيت وكيت .. وانا اخرج البلكونة ولا انزل الشارع انشحن واروح لماما افرغ الشحنة .. اه علشان هى اتكلمت بس قدام جارتنا وهى قاعدة معاها ما هو لو مش كلامها كانت جارتنا دى مش عملت كدا خالص وقعدت ترغى فى سيرتى مع الناس

كلام الناس التانى بقى وده ملحقش يحصل .. لأننا استاصلنا الناس اصلا من حياتنا تفاصيل اللى حصل كله مختصر فى الكلمات دى :

قولى انك لم تخونى ... قولى أن بريق عينيك كان حقاً لم يكن يخدعنى
قولى أنك عندما قلت لى أحبك وقتها لم تكرهنى
يا حلم عمرى اسمعى .. ارجوكى الا تدمعى
يا نور شمسى أنا لم اخنك ولن أخون
فلتقتلى كل الظنون قد خفت أن يجرح شعورك
خفت أن تذبل زهورك
خفت من كلمة تقال علينا يوما تندمى
قد خفت أن تتألمى
فتركتكى كى تسلمى
ولكنى الآن بين يديكى أعترف أنى أخطأت حين ظننت أن فراقنا فيه الامان ..
ففراقنا معناه موتى وهواكى معناه الحياة ..
أنتى الحياة

Comments

سمراء said…
فية في التراث الشعبي قصة شهيرة لجحا المضحك الضاحك الحكيم
لما ركب فوق الحمار وابنة ماشي
والناس اتعجبوا
ولما نزل وركب ابنه
والناس استنكروا
ولما ركب هو وابنة فوق الحمار
والناس رفضوا ظلم الحمار
ولما شال الحمار
والناس ضحكوا

عيشي زي مانت عايزة منفتحة مش خايفة ليقولوا الناس

فزمرنا لهم لم يرقصوا ونحنا لهم فلم يبكوا

انطلقي
سمراء
كباريه said…
بصي باي من الآخر فيه مثل فلاحي بيقول (كل واحد عارف شمس داره فين) وأنا بصراحه موش بأهتم قوي برأي معظم الناس فيما يخص حياتي وأولادي لإن عمر ماحد ماحيتكلم صح، وللأسف معظم من عرفتهم كدابين ومنافقين وكلهم بيمثلوا المثاليات لما يكون الموضوع مايخصهمش ، ، كل واحد يعمل اللي هو مقتنع بيه وطز في اللي عامل نفسه حجه في الدين والأدب والأخلاق
canary said…
ايه الكلام اللى انت بتقوليه دة يا أختى؟
ازاى الناس تلم لسانه وتحطه جوة بقها؟
انت عاوزة تخرسينا بقى
طب دة مفيش احلى من قعدة على الرصيف واحدة قاعدة فى النص ماسكه ودان الباقيين وهاتك يا زن وتلاقى الخبر من سطرين تحول الى قصه او ملحمه وتبصى تلاقى سيرتك بقت على كل لسان
وتحسى كدة وانت ماسكه سيرة الناس ان الكلام على لسانك طعمه زى البونبون
بسم الله الرحمن الرحيم
ولا تجسسو ولا يغتب بعضكم بعضا . أيحب أحدكم أن يأكل لحم أخيه ميتا فكرهتموة
صدق الله العظيم
mo7amed mamdo7 said…
فية في التراث الشعبي قصة شهيرة لجحا المضحك الضاحك الحكيم
لما ركب فوق الحمار وابنة ماشي
والناس اتعجبوا
ولما نزل وركب ابنه
والناس استنكروا
ولما ركب هو وابنة فوق الحمار
والناس رفضوا ظلم الحمار
ولما شال الحمار
والناس ضحكواهو ده الى كنت هاقولة بالظبط
عيشى زى مانتى عايزة مش زى ماهما عايزين
Anonymous said…
يا اختى سيبيهم يتكلموا اصلا مبيتكلمش على حد غير اللى النار بتكون مولعه فى قلبه
اصل لو انتى متهمنيش فى حاجه هتكلم عليكى ولا افكر فيكى ليه
ده كلام الناس دى معناه انك مميزة سيرى يا نورماندى فى طريقك وطنشى خالص
gehad said…
انتى عارفه يا حنان اللى زيك كدا محتاج يعيش فى دنيا لوحده
يعنى لا بيعجبك حاجه ولا بتسكتى على حاجه
حتى فى التوبيك اللى حضرتك كاتباه كنا فهمنا المشكلة الاساسية كلام الناس وفجاة دخلتى بينا فى موضوع تانى باينله كان موضوع مثير ليه مش حكيتيه بالتفصيل كنا عايزين نعرف يعنى
عواد باع ارضه ياولاد شوفوا طوله وعرضه ياولاد و....
الله هو انا فين ؟؟ ....كبري دماغك المشكله انك متقدرش تعيش من كلام الناس ومتقدرش تعيش من غيره
كنت عاوز اكتب رد مكعبر ومنبسط بين العربيه الفصحه واللاتينيه العميقه بس ملقتش
الحجه ام احمد هتفضل طول عمرها ماسكه ودان ام سمير
وكريم هيفضل طول عمره يحكي لاحمد عن خيبة كريم وكريم هينتقم ويحكي لشادي عبط احمد وام شادي هتقول لام احمد الي بيقوله عن احمد في بيت كريم و...كفايه عليك كده ولا لسه فيكي دماغ نكمل الحكايه
تلك الحياة ولن تستمر الا بذلك انت تفضفض وام احمد تعرف وتحكي وام سمير تغير وتتحول حكاية سفرك لبلد عربي شقيق لاسطور اودوسيوس وسيحكي اهل الحي عن مغامرات في مواجهة زيوس وحيرا وغدا تهدر بعض الجماعات دمك طبعا لانك قعدت مع زيوس
شوفتي الهنا
شكرا لك
PrInCeSS BeRy said…
ازيك يا قطتى وحشانى كتيرررررررر يارب تكونى بخير
فعلا معاكى حق كلام الناس ما بيعملش اى حاجة لا بيقدم ولا بياخر دة بيهدم ما فيش حاجة بتعجب لا الصح والغلط ودايما بيكون فى كومنت سبحان الله تلاقى الردود اية جاهزة هههههه بس بجد جميل اوى انك بتفتحى مواضيع بالطريقة دى تحياتى
مؤمنه said…
السلام عليكم ورحمة الله وبركاته

ربنا يهديهم ويسامحهم الكلام فى عرض الناس دا من الاشياء التى تغضب ربنا جدا
ربنا يوفقك يا قطه ويحققلك كل امانيكى
بس كنت سمعت ان البنت ما ينفعش تسافر من غير محرم معاها

قرات بوست نهى
الف مبروك ليها
خطوة جريئه
دومتى طيبه
والسلام عليكم ورحمة الله وبركاته
كلام الناس لا بيقدم و لا يأخر كما قال سلطان الطرب جورج وسوف

النميمه دي هوايه ياقطتنا
فيه ناس مزاج عندها انها تنم علي غيرها
للاسف مفيش دلوقتي سر تقدري تقوليه لحد و يحتفظ بيه
زمان كانت الناس بتحب بعضها و بتخاف علي بعضها

دلوقتي كل واحد عايز يمسك للتاني علي ذله
زي ماقلتي اذا كان الشخص اللي قال لحد سر ماعرفش يحتفظ بيه لنفسه منتظر ان غيره يحتفظله بيه؟

بس اللي كانت جارتكم دي انسانه غتيته
المهم انك في الاخر سافرتي و جيتي بسلامه
صدقيني ياقطه الكويس كويس سواء في بلده او بره و اللي اخلاقه مش تمام حيعمل كل حاجه في بلده و بيكون عارف يسلك اموره ازاي

موضوعك مميز ياعسل
مودتنا ليكي
funckydoctor said…
عارفة أنا مقتنع ان الير الى يطلع برايا ما بقاش سر يعتى أنا بس مش اتنين زى ما بيقولوا
وعمر الناس ما هتخلث من كلام الناس وحوش عبيدك عن عبيدك يا رب
يا بنتي

كلام الناس ده بيطلع من ناس عندها ازدواجية و فضا

ماتوجعيش دماغك

انا ماشية بمنطق اللي عارفني كويس هو اللي فاهمني

و اللي مش فاهمني مش عيزاه
عمر said…
أكاد أشك في نفسي

لأني أكاد أشك فيك وأنت مني

يقول الناس أنك خنت عهدي

ولم تحفظ هوايّ ولم تصني

...............

الناس فعلاً موش بتحترم الخصوصية خالص

نادراً
كل من يفتح باب بيته للنمام فانه يخرب بيته بيده وياما خربت بيوت - علشان اللي بيسمع للنمام يكون مقتنع "وما ينطق عن الهوى ان هو الا وحي يوحى" يعني دي اية قران بتتكلم عن الرسول بانه بيتكلم بما يوحى اليه, والنمام حينما يجد اذن صاغية فيصبح وكانه رسول --- ولكن في اية تقول "قل اعوذ برب الناس, ملك الناس, اله الناس, من شر الوسواس الخناس, الذي يوسوس في صدور الناس, من الجنة والناس" = دي سورة قرانية ابقي قوليها للماما حتى لمجرد الثقافة العامة وليست بالضرورة بانها تمنع كلام الناس

وفي حديث قدسي بيقول "واعلم أن الأمة لو اجتمعت علي أن ينفعوك بشئ لم ينفعوك إلا بشئ قد
كتبه الله لك ، وإن اجتمعوا علي أن يضروك يشئ لم يضروك إلا يشئ قد كتبه
الله عليك" ولكن من جهة اخرى يعلمنا السكوت على كلام الناس وبتتخرب بيوتنا

طالما عندك اهل بيقفلو الباب امام كلام الناس فاحمدي ربنا وخصوصا ان وضع البنت الشرقية في البيت هو دون مستوى الاولاد او الذكور

بالتوفيق
Desert cat said…
سمراء
انا شخصيا لا القى بالا لكلام الناس
اتعامل بما يرضينى انا ولا يرضى الناس
مودتى سمراء
Desert cat said…
كباريه
انتى عارفة بقى الشعب المصرى كل واحد سايب عيوبة وقاعد يدور على غيره
وطبعا منطقك صح جدا
تحياتى
Desert cat said…
للاسف يا حبيبتى مش حد بيفكر انه كدا بياكل لحم اخيه ميت اصله بيكون حاسس انه بيعمل عمل بطولى فى انه يغتاب الناس زى المتحرش كدا
:)
Desert cat said…
mo7amed mamdo7
ماهو ده اللى بيحصل بالظبط محمد
انى بعيش زى ما انا عايزة وطز فى الناس
مودتى
Desert cat said…
Anonymous
:)
طبعا كلامك حضرتك صح جدا
Desert cat said…
gehad
ايدى على كتفك يا جهاد وشنطة سفرى جاهزة من امبارح
جيب لى الدنيا اللى اعيش فيها لوحدى دى وانا اجرى عليها بدون تردد
اما تفاصيل الموضوع فمعلشى بقى
دى اسرار بيوت ههههههه
شرفت يا فندم
Desert cat said…
عايش علي الهامش
احنا شعب ممتاز جدا ودائما المركز الاول فى السلبيات التى يعسى اى مجتمع جاهدا للقضاء عليها
اما احنا بقى نسعى جاهدين للحفاظ عليها
تحياتى
Desert cat said…
PrInCeSS BeRy
انتى فين بقى من زمان وحشانى جدا
يارب تكونى بخير
طبعا الناس مش هتبطل رغى وعك وكلام فاضى لانهم فى الاساس مش بيعرفوا يعملوا حاجه غير كدا اما حاجة مفيدة التباكى موجود
الكومنتات بقى اللى جاهزة على طول تقريبا ده بيكون مرض عند الانونيمس
وجاى يتعالج عندنا
:)
نورتينى يا جميلة ومش تغيبى تانى لو سمحتى
Desert cat said…
مؤمنه
عليكم السلام ورحمة الله وبركاته
ميرسى جدا ليكى مؤمنة ولكلمك الطيب
بالنسبة للمحرم فده اعتقد انه قى دولة زى السعودية بل ان كمان فى وظائف ذى الدكاترة والممرضات ممكن تسافر بدون محرم .. اما انتى لو بتدرسى او مسافره تبع اى مؤسسة تعليمية برضه لا يشترط وجود محرم مش كل البلاد بتطبق النظام ده ..
بالنسبة لموضوع نهى البنت كمان كانت هايلة فى العاشرة مساءاً
ويارب تكون خطوة ايجابية لكل البنات
شرفتينى جدا
مودتى
Desert cat said…
اجندا حمرا +Heart Beat
صديقتى الجميلة ارق اجندة
طبعا انتى عارفه صحبتك دماغها ناشف ازاى ولا بعمل اعتبار لاى حد ايا كان طالما انا على صح فالكلاب تعوى والقافلة تسير ويا ما يا قلبى شوفنا دى انتى وهارت كمان عاصرتوا معايا شوية حاجات من عينة كلام الناس الفاضية اللى مش وراها حاجه غير النميمة دى .. واكتر واحدة عارفه واجهنها احنا التلاتة ازاى
اجمل حاجه فى الحياة تكبير الدماغ
:)
شرفتينى جدا جدا
وسلام كبير اوى للغالية
محبتى
Desert cat said…
funckydoctor
طبعا كلامك صح جدا يا دكتور
ومن اجمل الحاجات ان الانسان يبقى عنده خصوصيات يحتفظ بيها لنفسه ولا يجعل حياته على المشاع
شرفتنى جدا
Desert cat said…
د\أسماء علي
طبعا يا دكتورتنا منطقك صح جدا واكيد بيجنبك عقبات كتير
نورتينى يا احلى دكتورة
محبتى ليكى
Desert cat said…
عمر
طبعا الشاعرعبدالله الفيصل فى هذه الكلمات وصف حالة غير طبيعية وابدعت فى ادائها ام كلثوم ليخرج لنا فى النهاية عمل منتهى الروعة
اشكرك جدا عمر
مودتى واحترامى
Desert cat said…
واحة في الصحراء
دائما كلماتك تنم عن وعى واطلاع وعقل يستحق الاحترام
ماما اصلا مش بتدى ودانها لحد لكن هى فى الفترة دى كانت زهقت من كتر الزن تقريبا الجارة النمامة كانت بتزورنا فى اليوم مرتين تلاتة دى كان ناقص تعمل اقامة فى بيتنا
ودى كانت اول واخر مرة نختلط فيها بجيران اساسا
شرفتينى جدا يا جميل
:)
مودتى
احلى حاجه مثل انا ماشى عليه وهو مهم جدا
البس الى يعجبك وكل الى يعجبك وطظ فى الناس
Desert cat said…
صوت من مصر
بالظبط زى ما قولت ان دى احلى حاجه

Popular posts from this blog

قميص دهشور

كل تحرش وانتوا طيبين