ارجوكى كفايانا سلبية

ارجوكى كفايانا سلبية
بالأمس أثناء تجولى بين قنوات التلفزيون وإذا بى أتوقف على برنامج فى قناة الحياة تقدمة الدكتورة هبه قطب ، ومن خلال حديث الدكتورة هبه علمت ان الحلقة تابعة لحلقة سابقة قامت بتقديمها فى الاسبوع الماضى وهى عن التحرش الجنسى ايضا فى هذه الحلقة السابقة استضافت امهات الذكرين واسمحوا لى اعزائى بكلمة الذكرين لان لا استطيع كتابة رجل او ولد ، واللتان كل واحدة منهن صورت ابنها على انه الملاك الناقص له جناحين من شهادات فى الادب والاخلاق والقاء المزيد من الصفات الحسنة عليهم وصرحت الدكتورة هبه بانها عندما ذهبت وقابلت الذكران ادلوا بمعلومات وكلام مختلف تماما عما قالته امهاتهم كما استضافت فى الحلقة التى شاهدتها الشهادان اللذان رئا واقعة التحرش وقاما بنجدة الفتيات واخذهم محل التليفونات المحمولة التابع لهم فى الحقيقة وددت الاتصال لاشكرهم من كل قلبى على ما قدموه ولم يقولوا انا مالى وهى اللى تستاهل واصل لبسها والمبررات العقيمة التى يستخدمها المتحرش والمتفرج ايضا واللذان شهدا بقولهما ان الفتيات كان لبسهم غير ملفت وان الشارع كان يوجد بها اكثر من 200 ذكر واقفين للتحرش والمعاكسة خصيصا بدءا من التصوير بالتليفون المحمول وصولا الى لمس الجسد ، فى اثناء البرنامج اتصل شخص يدعى هشام من منطقة الجبل الاصفر ، وقال فى سياق كلامه انه امسك بمتحرش كان معتاد التحرش فى هذه المنطقة يومياً ولكن اليوم الذى تم الامساك بالمتحرش فيه كان صعدا خلف ليلى من الليلات فى طريقها لشقتها وهى على السلم اعترضها وخلع بنطلونة ولا اعلم كان متعاطى ايه هذا المتحرش القذر ولكنها استغاثت وذهب هشام وجيرانه وامسكو به واخذوه بفعلته الى القسم التابعين له وقابلهم النوبتجى ولم يتخذ اى اجراءات وحجته ان المأمور ليس موجود وظلوا منتظرين المامور فوق الساعتين وبين قبضتهم المتحرش وعندما أتى المأمور لم يتخذ اى اجراء بل كانت الصدمة والكلام ما زال على لسان هشام بان المأمور اجابهم خذوه وحلوا الموضوع ده بينكو بره هذا المتحرش مسجل خطر ، أيضاً المكالمة التى هى سبب موضوعى مكالمة لمدام تدعى هند أتصلت بالدكتورة هبه تقص عليها حاثة تحرش مهينة حدثت لإبنتها وصديقتها فى العام الماضى واللتان تدرسان الخدمة الاجتماعية وكانا قد تاخرا فى تدريب واثناء ذهابهما لمحطة المترو اعترض طريقهم 3 ذكور رافعين عليهم المطاوى وقاموا بجرجرتهم خلف سيارات تقف فى هذا المكان ومزقوا ملابسهم واعتدوا عليهم بل واصابوهم بالمطاوى التى يحملونها وعندما سالت الدكتورة هبه المتصلة عما كانت ترتدى ابنتها اجابت ابنتى كانت ترتدى جاكيت وتحته بلوفر وبنطلون ومحجبة وصديقة ابنتى كانت ترتدى الاسدال وعندما سالتها وما الاجراءات التى اتخذيتها اجابت مدام هند بانها لم تتخذ اى اجراءات ولم تقوم بالتبليغ بل ضمدت جراح ابنتها التى كانت فى قدمها بفعل المطواة ولكنها الى الآن تضمد جرحها النفسى بسبب الاعتداء الذى تعرضت له ولم تفلح ، انتهت المكالمة وانا إلى الان لم أتخيل كم البشاعة التى واجهتها البنتين ، كيف لبشر لم يتحرك قلبه وهو يفعل هذا فى إنسان ولن اقول انثى او بنت ، كيف لبشر انا يضع عقله بنصفه الاسفل بارادته ليصبح مسير خلف سوسته البنطلون ، البنات والسيدات يسيرون فى الشارع دون شعور بالامان ، رجائى لكل ليلى ارجوكى اوعى تسكتى عن حقك ، صوتى اصرخى امسكى فيه جرجرية من ايديه لاقرب عسكرى ليس كل رجال الشرطة مامور قسم الجبل الاصفر وعندنا مثال شجاع جدا نهى رشدى والتى تحرش بها السائق ولم تدعه يفلت منها وهو الآن فى انتظار المحاكمة ، فاتوسل الى كل ليلى الا تدع حقها يضيع من بين يديها ، اما الذكور فارحمونا يرحمكم الله

*********************************
المشاركة التانية مع ليلى
فى الحقيقة مش كنت ناوية اكتب تانى فى يوم ليلى
لكن الموضوع استفزنى جدا
وسلبية الام استفزتنى اكتر
ولما قريت حوار نهى رشدى النهارده فى اليوم السابع فرحت بيها جدا جدا
وتفائلت خير
وتمنيت ان جميع الليلات تكون بجرأة نهى

تعليقات

‏قال مثليه
قطه

الموضوع خطير و أخطر ما فيه استسلام البنات و عدم تبليغ الاهل خوفا من الفضيحه بالذمه الناس هتنضف مخها امتى ازاااااااي تسيب حق بنتها بالشكل ده دي مصيبه و جهل فادح يارب الناس تفوق بقى
العزيزة قطة
بإختصار العيب فى نوعية الثقافة الحالية و اللى هى بالأساس ثقافة ذكورية بتدافع عن الشاب فى كل الحالات و دايما العيب على البنت و لبس البنت .....الخ
انا مش بقول كدة وبعفى نفسى من المسئوليه لانى فى الحقيقة ياما تحرشت ببنات بس انا حاليا نادم جدا و بتأسف جدا لكل بنت اذيت احاسيها البريئة. و اظن ان الحل فى اننا نبطل كبت و ننفتح على انفسنا و نعترف باخطائنا و ندرس الثقافة الجنسيه فى المدارس و دة مش معناه اننا نقولهم ازاى يمارسو ا الجنس زى ما الجهله فاكرين و لكن نعرفهم اهم الفروق ما بين الجنسين لأن الشباب دايما فاكرين وكان البنت قطعه حلوى قادمة من الفضاء الخارجى لإحتلالنا و إثارة غرائزنا و لو المفهوم دة متغيرش ليكون ان البنت هى إنسان وهى مش مجرد عورة و حلوى و فتنه فهيفضل الإعتداء و التحرش هو السكة الوحيدة لمعرفة و إستكشاف هولاء الغزاة من الفضاء.
تحياتى
السلام عليكم

العلاج الاول لحل (جزء) من المشكلة دي (يَا أَيُّهَا النَّبِيُّ قُلْ لأزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلابِيبِهِنَّ ذَلِكَ أَدْنَى أَنْ يُعْرَفْنَ فَلا يُؤْذَيْنَ وَكَانَ اللَّهُ غَفُوراً رَحِيماً] (الأحزاب:59)

الالتزام بالحجاب الشرعي يقي المسلمة من شريحة من أولئك السوافل الذين لم تنتقض عندهم اصل الفطرة تماما

ومع ذلك فهناك شريحة أخري أشد سفولا من الأولي .. منتكسة الفطرة.. قلوبها في جوف خنازير

وهذه حلها بأن يُضرب عليها بيدٍ من حديد

هذه الجرائم قد تصل عقوبتها في شرع الله الي عقوبة الحرابة: (إنما جزاء الذين يحاربون الله ورسوله ويسعون في الأرض فساداً أن يقتلوا أو يصلبوا أو تقطع ايديهم وارجلهم من خلاف أو ينفو من الارض ذلك لهم خزي في الدنيا ولهم في الاخرة عذاب عظيم

أما وقد أبت البشرية أن تنصاع لحكم ربها فلتشرب من كاس خبالها ولتذوق وبال أمرها.. ألا يعلم من خلق وهو اللطيف الخبير؟؟

ومع ذلك.. فليس تبريرا لأن نقف مكتوفي الايدي امام امثال هؤلاء السوافل

بل هي اعراض مسلمة.. وقبل ذلك اعراض آدمية.. ينبغي عليها أن تستر بستر الاسلام كما امر الله

ثم ينبغي علي من بقيت عنده بقايا من نخوة العرب ان يستنهض رجولته ودينه امام اشباه الخنازير
‏قال Zika
مش بس في التحرش في اي مشكله تانيه
احنا بقت عندنا سلبيه اكتر من الحيطان اللي حوالينا
بقينا نسكت علي اي حاجه
ونقول عادي
وده بيبقي لاسباب كتير
منها :
الخوف ... دلوقت بقي ممكن واحد يدخل القسم يشتكي حاجه يطلع متهم
فقدان الامل في الحل ... بمعني او باخر ( مفيش فايده ) !!؟
الجهل بالقانون ... ناس كتيره اوي ما تعرفش حقوقها عشان كده ما تعرفش اذا كان من حقها تطالب بيه او لأ
الفضيحه ... ممكن بنت يحصلها موضوع التحرش تخاف تقول اهلها او يخاف اهلها ياخدوا موقف خوفا من الفضايح يعني
وغيرها كتير
تحياتي
‏قال MISS\GH
الله عليكى بوست فى منتهى الروعه وموضوه هايل بجد بحييكى على مدونتك الجميله واسلوبك المتميز واتمنى لكى دوام النجاح.
‏قال أسماء علي
لو بطلنا خوف و سلبية

لو عرفنا إن العيب هو عيب المتحرش لأن نفسه مريضة

لو عرفنا نقدم المتحرشين دول للمحاكمة في كل مرة

بجد هيفرق كتير

...

قطتي متابعة معاكي ...
‏قال blackcairorose
قبل كده قالوا ازاى هند تفضح نفسها فى قضية الفيشاوى

ودلوقتى قالوا لنهى ازاى تفضحى نفسك وتنشرى قصة التحرش بيكى

انا مش عارفه ايه المطلوب

يتم التحرش ونسكت؟

اهو لبسوا حجاب واسدال ونقاب وبرضه التحرش مستمر

نقعد فى البيت منخرجش ؟

كل ده علشان منديش للراجل فرصة انه يشم ريحة ست ويستثار زى الكلب ما بيعمل؟

بجد حاجة مقززة من اجمالى الجوانب المتعفنة جدا فى بلدنا
‏قال الربان
تحياتي

في رأيي ان هناك بعض المبالغة في واقعة
المهندسين التي حدثت اثناء العيد...

كما انوه ان هذا المكان به بعض الكافتيريات المشبوهه و التي ترتادها بعض الفتيات...و هي معروفة خاصة للاخوة العرب.

ارجو من اخواتي الفتيات و السيدات
ان يأخذن الحيطة و الحذر...و يتحرين
الاماكن الآمنه...و يبتعدن عن تلك غير
الآمنه...و ان يخترن الوقت المناسب و الملائم....فأوقات العيد و ما شابهها تكون هي الوقت المفضل لدي المتحرشين
لانها تكون مزدحمة بالبشر ....

ايضا...ارجو منهن الاسراع الي اقرب
مركز شرطة و الابلاغ رسميا عن اي مضايقة
قد تتعرض لها...و ان تحتفظ برقم المحضر
حتي يمكن لها متابعة الاجراءات ان ارادت.

الشيء الاخير انصحهن بأن تحتفظ كل منهن
بسبراي مخدر..في حقيبة يدها...و هي عبوة
تستخدم في تسكين الالم...و يمكن ان ترش بها
المتحرش فينشل تفكيرة للحظات بسيطة تكون خلالها قد لجأت الي مكان آمن....

او قليل من النشوق او بدرة الفلفل الاحمر...

نسأل الله السلامة للجميع...و ان يحفظ
الله الجميع.

تحياتي و تقديري
‏قال مؤمنه
السلام عليكم ورحمة الله وبركاته

حسبنا الله ونعم الوكيل
عنى دلوقتى اى بنت ما شيه فى الشارع معرضه للتحرش

طب اذا كانت الشرطه المسؤله عن ضبط الامان وحماية المجتمع سلبيه ايحنا يا شعب هنعل ايه

حسبنا الله ونعم الوكيل
شئ مثير للاشمئزاز
دومتى بخير
والسلام عليكم ورحمة الله وبركاته
‏قال momken
مع انى متاكد ان مافيش ليلى

ومش هقول زى كل رجال السياسه ياجماعه المساله لم تصبح ظاهر بقدر ماهى حاله فرديه

لاء ابداً
هقول احنا عندنا مشكله حقيقيه بعد انتشار القناوات الفضائيه

الموضوع ده اول ما ظهر من عامين فى وسط البلد واصبح ينتشر بسرعه عجيبه

والى يساعد عليه الجمهره اى وجود جمهور يشجع بعضه

لكن اى ولد من دول بيكون لوحده زى الكلب ميقدرش يعاكس حتى

الى بقوله توعيه دينيه قويه
ومساعده من البنات نفسهم
ايوة مساعده الولاد دول
ماهم دول مش من زفت كوكب تانى
دول اخوتنا واصحابنا وجيرانا وقريبنا وعلى اقل الافتراضات بلديتنا ولا دى كمان هننكرها

طي البنات تساعد ازاى ياعم الفتك
هقولك
مثلا مثلا
انا فى العيد اعرف وحده قالتلى انها نزلت وسط البلد تتفرج على التحرش الى يحكوا عنه
ولما مالقتش حاجه وسمعت انه ظهر فى المهندسين راحت المهندسين
تخيلى البنات كمان بتتجمهر
بيكونوا مشاهدين فى الاول ومتابعين الحاله
وناقدين سواء ناتقدين للولاد او البنات
وممكن الموضوع يقلب معاهم بضحك وهزار وهنا يجد المتحرش ضالته النشوده
وحده وخدها هزار وضحك وشخليل
فبيتجراء عليها

دى رائى ببساطه وربنا يهدى الجميع

اما بخصوص الى الست الى اتصلت وبنتها وصحبتها حد وقفهم بمطوه فده مش تحرش خالص خالص خالص ده حضرتك اغتصاب
وجزاءه الموت ايوة القتل جزاء الاغتصاب والست وبنتها غلطانين
لانهم سكتوا وتركوا المغتصب
فرق كبير بين التحرش والمعكسه والغزل والاغتصاب

ربنا يفك كرب المصرين وكبتهم

تحياتى
ما يحدث عن التحرش يدمي القلب أيتها القطة العزيزة..والأخطر أني تنبهت مؤخر الى أن هناك تحرشا جماعيا في بعض الأحيان يحدث كرد فعل انتقامي..
الحال في المغرب هو أسوأ حالا، والواقع المر يحثم تغيير العقليات أولا فمثل هؤلاء الأمهات التي ذكرت لا يمكن الا أن يرسخوا العادات الذكورية المتسلطة ليبقى الحال عما هو عليه فلتستشعر الأنثى هذا الظلم قبل أن تكون أنثى لتربي أبناءها على القيم التي تزرع الحب بدل الكره..
أشار مصطفى حجازي في دراسة قيمة له الى أن هناك استلاب عقائدي تتعرض له المرأة وهو تبخيسها لقدرها ووقوفها صد نفسها هذا الاستلاب في اعتقادي هو ما يجعل الأم أسوء مربية ويجعل القيم نفسها تتوارث من جيل لآخر
مودتي
من أسف يا حبيبتي نحن المومات في كل الأحوال
علينا أن نبحث عن تربة ندفن أنفسنا فيها حتى نحتمي من التحرش والسفالة
ثقافة ذكورية متعفنة
وقهر واضح وبين في كل الأحوال
على كل بنت أن تكون شجاعة وتدافع عن نفسها
وإن لم تستطع فلتلجأ للوسائل الشرعية المعروفة
الشرطة والنيابة
وجمعيات حقوق الإنسان
وجمعيات المجتمع المدني التي تدافع عن حقوق المرأة
لا تصمتن
لا تخفن
لا تدارين ما يحدث
‏قال Abu Shahin
المشكلة ان دى ثقافة راسخة عند كل الشعب تقريبا

المتحرش ده ملاك نازل م السما
البنت هى اللى غلطانة وتستاهل اللى يحصل لها
نبلغ مين يا عم سمعة بنتنا

بس انا شايف ان الموضوع بدا ياخد منحى تانى افضل .. والبنات بقت متمسكة بحقها اكتر .. اما بقى شهامة الرجالة فدى انا شايف انها بتتناقص وللاسف

تحياتى لمواضيعك اللى ف الجول
‏قال Desert cat
مثلية تبحث عن ذاتها
طبعا كلام الست كان صدمة بالنسبة لى وانها مش اخذت اى اجراء ده فى حد ذاته مصيبة .. بكدا الجناة متواجدين فى اى مكان يحبوه ويغتصبوا من البنات اللى تعجبهم وفى النهاية كلهم بيخافوا يبلغوا من الفضيحة ونهيئا للذكور باجساد الفتيات نهارا جهارا

شرفتينى
‏قال Desert cat
ابن المليونير
متفقة معاك جدا
وقرأت اعتذارك على مدونتك
ويارب يهدى كل المتحرشين ويرجعوا لصوابهم
‏قال Desert cat
القلم السكندري
الآية الى حضرتك استشهدت بيها كانت ليها ظروفها وهو ذهاب السيدات للتبول فى الصحرا دلوقتى انت عندك سيراميك وقيشانى ..
ثم حضرتك فى سياق كلامك خصيت المسلمات يعنى المسيحيات مثلا حلال التحرش بيهم علشان مش مسلمات ؟؟؟
طيب وايه رايك ان اقامة الحد على المتحرش سواء باللفظ او اللمس الشرع مفرقش فيها بين المتحرش بيها اذا كانت مسملمة ولا ملهاش ملة اساسا
لان الشرع واضح وصريح وليس طائفى
‏قال Desert cat
Zika
طيب ومين السبب فى السلبية دى زيكا مش احنا برضه بتصرفاتنا
ما اضع حق ورائه مطالب
واحنا بقى اسهل حاجه عندنا انا امشى جنب الحيط واتدارى من الفضايح مش مهم المجرم ربنا يسامحه بقى
مش يعرف انه بخنوعه وسكوته على الذل والمهانة الخطأ هيتكرر وفى اشخاص اخرين
الشرطة بقت عارفة ان المجتمع سلبى فكل واحد يمارس سلطته بالطريقة اللى تعجبه ما هو مش فى حد هيعمل حاجه
والمتحرش عارف ان البنت بتخاف من الفضيحة مش هتقول لاهلها يبقى يغتصبها كمان مش يتحرش بس وهو هيعيش حر يبرطع فى الدنيا زى الحمار الوحشى هو حد هيعرف حاجه
وهكذا على التوالى الحادث تلو الاخر لحد ما نلاقى نفسنا عايشين فى غابة البقاء للاقوى
‏قال Desert cat
MISS\GH
ميرسى جدا على كلماتك الطيبة
سعيدة بتشريفك البلوج
مودتى
‏قال Desert cat
د\أسماء علي
المجتمع يا حبيبتى اتعود على الذل والخنوع اصبح يلعب دور المضظهد بكل حرفنة واجتهاد
نحن نفلح فى الشكوى
ولكن فى عمل شيئ ايجابى هيهات
شرفتينى جدا يا احلى دكتورة
:)
‏قال Desert cat
blackcairorose
المتحرش لا بيميز بين محجبة ولا منقبة ولا من غير هدوم هو المهم انها حاجه بتتحرك على الارض
المهم انها يظهر بيها علامات الانثى حتى وان لم يظهر مش مشكلة يتحرش برضه
للاسف دى ثقافة مجتمع
الام فى البيت محسسة ابنها انه ديك البرابر يتجهز له الاكل وان احتاج يشرب اخته تقوم تجيب له او هى اللى تقوم تجيب مش مهم المهم انه على رجله نقش الحنة مش يتحرك
وفى اخر اليوم ياخد منهاالمصروف وينزل يقف على نواصى الشوارع يقل ادبه وهو حاسس ان الشارع ملكه لو بنت مشيت فيه يبقى تستحمل بقى سفالته وقلة ادبه ويرجع الفجر ينام علشان تانى يوم يلحق يروح يحجز على اول ناصية تقابله وبرضه مش مهم لبسها المهم جسمها
والمجتمع الجاهل يقولك هى السبب سلبية وانعدام ضمير وجهل ومستغربين ان المجتمع بيعانى من الانحدار
شرفتينى جدا يا احلى روزه
‏قال Desert cat
الربان
استاذى العزيز
اعتقد انه من الاولى استئصال الخطأ يعنى العمل على غلق الاماكن المشبوهه
وتأمين الشوارع بقدر الامكان ولا ننسى ان حى مثل المهندسين به سكان فكيف لهم ان يحبسوا انفسهم حتى المتحرش ياخذ راحته وان كانت من سيترحش بها فتاة ليل .. ولو آمنا حقا بالمبالغة فى واقعة المهندسين .. وواقعة وسط البلد ؟؟؟
والتحرشات التى تتم يوميا فى وسائل المواصلات والعمل حتى اصبح العادى هو التحرش لكن الغير عادى ان تبحث المتحرش بها عن حقها
اتمنى ان الجميع يستمع لنصائح حضرتك من وضع اسبراى مخدر او بودرة فلفل
وربنا يهدى الجميع
شرفتنى جدا
مودتى واحترامى
‏قال Desert cat
مؤمنه
عليكم السلام ورحمة الله وبركاته
اذا كانت الشرطة سلبية عزيزتى
يبقى احنا الشعب نتدى ناخد الخطوات الايجابية وننشر ثقافة البنت تدافع عن نفسها ازاى
شرفتينى جدا مؤمنة
‏قال Desert cat
momken
لما البنات يصرخوا ومن جميع المحافظات والبلدان المصرية يبقى لما رجل السياسة يقول حالة فردية نقوله يخلى بنته تروح مشوار على رجليها او تركب اتوبيس ولما ترجع له حد متحرش بيها وقتها مش هينطق كلمة فردية ولا زوجية حتى
بالنسبة للبنت اللى راحت تتفرج على التحرش فالتفهات كتير
يعنى انا من كام يوم كنت بتناقش مع واحد زميلى فى الموضوع ده ولاقيته بيقولى ماهو لبس البنات قولت له والمنقبة ؟؟ قالى دلوقتى المنقبة بتتحط قاب قوسين يعنى يا اما لابسه النقاب مقهورة يا اما لابساه علشان رايحة تقابل ومش عايزة حد يعرفها وفى كلا الحالتين بيعاكس استجابت بيحط كل المنقبات جوا دايرة حمرا
قولت له وهو مين عينه خليفة الله فى الارض علشان اللى تستجيب من عدمه او اللى لابسه واللى مش لابسه قالى الشباب تعبان وعايز اى حاجه
قولت له وفين غض البصر
افرض انها فتاة ليل ودى شغلتها هو فين ادبه واخلاقه واحترامه لذاته
وقتها مش رد
وقالى ربنا يهديى البنات والولاد
يعنى بالفعل دى ثقافة الولد فى اعدادى بيعاكس علشان شاف العواطلى اللى فى الشارع بيعاكس وعلشان لما وقف فى البلكونة يصفر لواحدة معدية امه باسته وقالت له ولا كبرت يا حبيبى وقاعدة تتفشخر بيه قدام الناس ان ابنها بيقف يعاكس وطبعا علشان يعجب اكتر بيتحرش ومن التحرش لاغتصاب
وبعد كل ده برضه الضحية مكتومة مش قادرة تنطق خايفة من الفضيحة
طبعا الست اللى اتصلت وبينتها مش هقول تستاهل اللهم ما لا شماته انما اعطت فرصة للى اغتصب بنتها انه يكرر الفعله تانى ومع اتنين وعشرة وعشرين كمان
ربنا يحفظ الجميع
‏قال Desert cat
صديقى العزيز نبراس العتمة
يبدو ان كلمة شهامة اصبح لا محل لها من الاعراب على المستوى العربى
فانقرض الرجل الشهم بعد ان سادت ثقافة الذئاب
ايضا لا ابرء الامهات لانهن ان اعددت .. اعدتت شعبا طيب الاعراق
شرفتنى جدا
دمت بالف خير
‏قال Desert cat
هويدا صالح / عشق البنات
اديبتنا الجميلة
المجتمع تزعزعت منه القيم وانحدر اخلاقيا فكل يوم فتوى جديدة وكل يوم شعار جديد الى ان حدث خلط واصبح الذكر له حق الطريق والعمل والمنزل والانثى مجرد وعاء لافراغ شهوته حتى وان كان لا يعرفها
لكن اضم صوتى لصوتك عليها الا تستسلم وتصر على حقها
وتلجأ إلى جميع الوسائل للحصول عليه
شرفتينى جدا
مودتى
‏قال Desert cat
Abu Shahin
صح يا احمد كل واحد يقولك سمعة بنتنا وهو مش عارف المعاناة النفسية اللى بتعانيها بنته
البنات بدات تتحرك لان خلاص الكيل طفح
الشارع مش قادرين نمشى فيه المواصلات مش عارفين نركبها طيب نعمل ايه نتحبس
ما احنا لازم نتكلم

شرفتنى جدا
:)
‏قال صوت من مصر
الموضوع ده بعيد عنى لانى محمد مش منال صح ؟
‏قال Desert cat
صوت من مصر
لو قريت البوست كنت هتعرف انه مش بالضرورة تكون منال
:)
تحياتى
‏قال kmt
السلام عليكم ورحمة الله وبركاته

المشكلة اني ازاي بنت تجرر شحط ع القسم ومنين تجيب جرأه تدخل بيها القسم وفي حاجات كتير حلوة قوي نظريا لكن عمليا صعبه جدا

المسألة مسألة اخلاق
تحسي ان الناس كلها عايزة تتربى

تحياتي
الي اللقاء
‏قال Monzer
بساند اي حاجة تقهر السلبية
وتشجع الإيجابية
بس ياريت تبقى امر واقع فى العالم الحقيقي مش ورا الكيبورد
وتتحول الحملة الى على النتلحملة واقعية بجد وتبقى فى الشارع

علشان البنت
مش بتلاقي حد يدافع عنها فى الشارع للأسف
بيحصل وبيكون كل الناس شايفاها

وللأسف فيه الى بيشجع
يارب ينصرنا على سلبيتنا
‏قال micheal
تعرفيش يا قطة المحكمة قالت إيه النهاردة في موضوع نهي رشدي
أصل محدش جايب سيرة وكله مهتم بقضية نادي الزمالك النهادره اللي بين مرتضي منصور وممدوح عباس والمجلس القومي للرياضة
تحياتي
‏قال canary
عزيزتى . تحياتى لك فى البدأ
موضوعك هام للغايه
لكن انت تعرفى ان اى واحدة تتهم واحد بالتحرش وتمسكه وهو بيعمل كدة وتروح بيه اى قسم شرطه بيتم الضغط عليها بشدة عشان تتنازل؟؟
أمن ايه اللى تحس بيه الست او البنت فى ظل غياب واستهبال الامن مع حوادث من النوع دة
وبلاغ ايه اللى تعمله وهى هتتهدد بالفضيحه والبهدله من رجال الشرطه انفسهم
يظهر انه من هنا ورايح المفروض كل واحدة تمشى وفى جيبها مطوة قرن غزال
الموضوع فعلا خطير وهام

أنا بس ليا تعقيب بسيط يتعلق بجزئية شخصية المتحرش .. طبعا أمهات الشباب دول نعتوا أولادهم المتحرشين بالملائكية والخلق الرفيع ما إلى ذلك

طبعا مش هنقف قدام المثل القائل : القرد فى عيون أمه غزال والكلام ده

لكن فى دارسة نفسية على هؤلاء الشخصيات .. أكدت تلك الدراسات إن المتحرشين دول بيبقوا شخصيات طبيعية جدا ولكنهم بيعانوا من الكبت مهما إختلفت صوره

التنفيس عن الكبت ده قد يكون بدافع شهوانى ، أو بدافع إثارة الخوف والإحساس إنه مرعب ، أو بدافع إنه بيعمل شئ مختلف

أتمنى إنى أكون قد وفقت فى توصيل ما أريده بشئ من الإيجاز

دمتى بكل خير .. تحياتى
‏قال Desert cat
kemet
عليكم السلام ورحمة الله وبركاته
هى المشكلة فى جرجرة الشحط على القسم لكن اعتقد انها لو لمت عليه الناس ممكن يبقى بينهم واحد محترم على الاقل زى اللى ساعد نهى ويساعد البنت اللى تم التحرش بيها
اما بالنسبة لموضوع القسم فده اللى لازم البنت لا تلقى له بال
المجتمع مش بيسيب حد فى حاله
الناس قاعدة علشان تتكلم على بعضها وتالف حكايات يبقى البنت لو سابت حقها علشان عاملة حساب للناس هتقول وهتعيد هى لوحدها اللى هتتالم مش حد تانى
شرفتينى
‏قال Desert cat
Monzer
بدأت تتحول للشارع يا منذر وبدأ البنات بالفعل يدافعوا عن حقهم
وبالتدريج ان شاء الله تتغير سلبية المجتمع
تحياتى
‏قال Desert cat
micheal
تم الحكم بـ 3 سنين على المتحرش يا مايكل
‏قال Desert cat
canary
لو اصرينا على حقنا كنارى هناخده
وعندك النهادرة الحكم فى قضية نهى رشدى
واخدت حقها واللى اتحرش بيها اخد حكم 3 سنين
المفروض يكون لينا دافع علشان مفيش واحدة تسكت لما حد ياذيها
المجتمع اللى بيتكلم على البنت اللى بتدخل قسم هو نفسه اللى هيقولها برافو لما تاخد حقها
شرفتينى
‏قال Desert cat
د/ رامي شهاب الدين
هو الولد فى البيت بيكون طبيعى قدام عيلته واهله
علشان كدا تلاقى الاهل لو واحدة راحت اشتكت لهم من ابنهم يطلعوها هى اللى غلطانة ويقولك ابننا متربىىىىىىىى
وانتى عايزه منه ايه
الطبيعى ان الولد لما ينزل الشارع تانى ممكن يغتصب الى تقابله مش يتحرش بس
وطبعا وجهة نظر حضرتك وصلت
مودتى واحترامى
‏قال غير معرف…
البنات لازم تتجرأ و تتعلم التنفيس عن غضبها شوية

كمان مشكلة الكبت الجنسي لازم تتحل و الا طاقة التحرش هاتتنقل لمظاهرات و اعمل شغب او عنف عموما
‏قال Unknown
أحييكي بشده ..

فالملابس ليست الدافع للتحرشات و الاغتصابات

و المظاهر أيضا .. فالدين ليست له مظاهر معينه

و لو مبقاش فيه رادع للحيوانات دول
الطبيعي تلاقي اللي بتتحجب لمجرد عشان تحمي نفسها و هي مش مقتنعه و واحده تلبس النقاب عشان المفروض بقي بقينا ف زمن الفتنه و مش بعيد كمان شويه تلاقي اللي يقولك قعدوا بناتكم في البيت عشان محدش يتعرضلهم .. قال يعني هيحموهم .. و شويه كمان موت بنتك دي عار لو اتولدت هيتحرشوا بيها و ممكن تجيب أطفال سفاح ..

بجد دول حيوانات قذره و لازم البلد تنضف

تحياتي

ياسمين
‏قال Desert cat
An Egyptian
ما هو المشكلة انها ثقافة منتشرة فى المجتمع كله
يعنى العجوز بيتحرش والصغير بيتحرش
واقعة المهندسين كانت اعمار المتحرشين من 15 - 20 سنة كبت ايه ده اللى المجتمع محتاج اعادة تاهيل
مودتى
‏قال Desert cat
عاقلة علي ارض الجنون
يا حبيبتى اخر دراسة لظاهرة التحرش الجنسى فى مصر
اثبتت ان نسبة التحرش بالمحجبات 72 % وانتى عندك فى مصر 80% محجبات
يعنى بالفعل اللبس مش مبرر
خدى عندك كمان
مصر اول دولة على مستوى العالم فى التحرش الجنسى
يليها افغانستان
وانتى عارفه بقى طالبان عاملة ايه هناك
يعنى كلهم منقبات
تفتكرى لبسها بيثير المتحرش فى ايه ولا ازاى ؟؟
‏قال Sara
كتابتك على الوجيعة

بتتكلمي عن الاستسلام وعن تضيع الحقوق طب ازاي وفي ناس من الشرطة وظيفته تضييع الحقوق

من اسبوعين قررت اختصر الطريق لبيتي بشارعين ومن عشر سنين وانا مبمشيش في شوارع جانبية نهائي برضه لحادثة تحرش وانا صغيرة اليوم ده قلت ده انا شارع وهابقى في بيتي
في الشارع اللى قدام بيتي قبل 200 متر من بيتي وبلكونة بيتي بتطل على الشارع والشارع فيه كام محل جه واحد بعجلة وهو ماشي اتحرش ومعتقدش انه استفاد حاجة لانه كان ماشي بسرعة بس الضحكة بتاعته وضحكة صاحبه ونظرته لوشي بعدها وانا مخروسة صرخات جوايا مش عارفة تطلع حاجة مهينة
حسيت ساعتها اني عايزة اعمل زي نهى بس معرفتش الموقف كان معجزني الكلام والصريخ كان محشور في زوري مش عارف يطلع وصورة نهى قدام عنيا مع التتنيح


مش عارفة اقولك ولا عارفة اوصفلك بس انا مش عرفة الحل ايه ومستغربة للدرجة دي مفيش امان ازاي داحنا في بلد الاسلام


مش قادرة اكمل كتابة مع ان جويا كتير قوي
‏قال Sara
عايزة اقول حاجة بس كمان
ان حتى لو الست ماشية في الشارع سافرة مفيش حاجة اسمها ان واحد يدي نفسه الحق ان يلمسها ويتحرش بيها لان لو بنفس المبدا لو راجل ماشي في الشارع وانا رايي فيه انه سفيه مثلا اقوم مدياه على قفاه ماهو نفس المبدا ببيح لنفسي حاجة مش من حقى وبتنقص من ادمية اللى قدامي

المشاركات الشائعة