مبروك جالك بنت

قديما قبل ظهور اشعة السونار ومعرفة نوع الجنين يظل الابوان ينتظران المولود على احر من الجمر بل العائلتان عائلة الاب وعائلة الام وربما الجيران .. وما ان تقترب ايام الوضع حتى يظل الجميع فى حالة ترقب لمعرفة نوع المولود هل هو ولد ليحمل اسم العائلة ويرث والدة حتى وان كان هذا الميراث عبارة عن ثوب مهترئ وليست الابعدية التى سينعم بها طوال حياته .. ولو بشر بأنثى تظهر جليا على ملامحة ما وصفه الله سبحانه وتعالى فى كتابه الكريم " وإذا بشر أحدهم بالأنثى ظل وجهه مسودًا وهو كظيم يتواري من القوم من سوء ما بشر به أيمسكه علي هون أم يدسه في التراب ألا ساء ما يحكمون " صدق الله العظيم
ومع التقدم والتطور التكنولوجى تقدمت عقول الناس وليس جميعهم لانه مازال هذا موجود فى القبائل البدوية والتى تتفنن فى إخفاء المرأة بأى شكل من الاشكال فتارة وجهها عورة وتارة اخرى عينيها الاثنتين عورة وتارة هى على بعضها عورة وخروجها من المنزل حرام حرام حرام وانا أرى معهم أن هذا أرحم لها حتى تدراى عورتها وللآخرين كى لا تقع اعينهم على عورتها ، ولكن ما يغفل على هؤلاء هل يخلق الله شيئاً عورة ، فكل مسخر لما خلق له حتى الدابة فما بالك بانسان كرمه الله وميزة بعقل يعمل ، وهل يقبل على نفسه من يطلق على المرأة عورة ان يقال له انت ذكر عورة ؟؟ لربما تكون من يراها عورة هى أكفأ منه فالمرأة التى يدعونها عورة تقلدت أعلى المناصب فى نفس الوقت الذى ما زال فيه ذكور تعدت اعمارهم الثلاثون عاما شغلهم الشاغل هو التحرش بمن تعمل وتكد وتنتج وتحقق طموحها وتفيد مجتمعها وهو العالة الذى يأخذ مصروفة من والدته والتى هى ايضا من وجهة نظر ذكورية عورة فيا ايها الذكور وأوجه ندائى للذكور لأنه مازال هناك من يملك من الرجولة الاسم والفعل إن بشرت بأنثى فأعلم بأنك إن راعيتها ولم تميز بين اخوها الذكر وبينها فستكون لك خير معين .. لربما تكبر ويهجرك الذكر الى بلاد لم يعرف لها مكان أو تزوج ليكون رب اسرة وحينها لربما يسال عليك من العام للعام ، وفى هذا الحالة بنفسك ستقول مرحبا بكل بنات الأرض ولكن بعد فوات الاوان.

***********************
مشاركتى فى كلنا ليلى
ولان يوم ليلى للعام الثالث هو يوم 19 اكتوبر حبيت اشاركها واقولها لا تقلقى وراكى ليلات كتير
مودتى واحترامى للجميع

تعليقات

‏قال صوت من مصر
هى دى ليلى الى غنا لها محمد منير
تحياتى
محمد كمال
‏قال Coca
قطتي
بمناسبه المولود جارنا جاب بنت بعد ما العماره كلها اكدت ان مراته حامل في ولد
بس شوفت في عينه فرحه ما شوفتهاش عليه قبل كده
الفكره دي اتغيرت كتير عن رجاله كتيره
برده فكرتيني بمسلسل سعد الدالي
لاني كنت هتشل من كم الحفاظ علي الولد الصغير اللي هيشيل اسم الدالي
وهم العائلات باسم العيله مش فاهمه
بس فيه بوادر امل ان الافكار دي تتغير
تحياتي يا جميله
‏قال romansy
والله دلوقتى مفيش فرق بين بنت ولد
فيه بنات كتيره متفوقه فى حياتها ورفعت راس اهلها وكمان مين البت
هى امى واختى وزوجتى
وبعدين لما نيجى لوظيفه المراه فى الاسلام
وفى الغزوات
كانت المراه ليها دور مهم انها تعالج المصابين يعنى فى وظايف فعلا البنت هى اللى تعملها بس
وكمان المراه عبقريه تبدع فى كل شئ
وزى ما بيقولوا
عبقرية المرأة تكمن في قلبها )
وقلبها هو نقطة ضعفها !!
‏قال شباب روش طحن
في الحقيقة أتفق معك في إنتقادك لهذا الأسلوب المتخلف في التفكير والذي ذمه القران فلا أعلم لماذا يعتبر البعض أن ميلاد البنت أمر سيء ويفضلون الذكور مع كل منهم كائن حي له مميزات وله عيوبه التي تختلف من الذكرو للإناث بل إن تربيه الذكور أصعب ورب إمراة بألف رجل هذا لو كان إعتراضهم علي مدي فعالية دور الكائن الحي في المجتمع

اما عن العورة


فدعيني أقول أن للرجل عورة وللمرأة عورة وعلي كلاهما ستر هذه العورة فكلاهما متساوي في ذلك ولكن ليس معني هذا الإبقاء علي ليلي سجينه بيتها أو فرض إرتداء زي ما عليها بالقوة بل يجب أن تترك لها مساحة من الحرية فلو أرادت النقاب أو الحجاب أو لم ترد كلاهما فلا ضرر عليها ولا يعتبر عدم إرتدائها لأي منهما مبرر لكي تتعرض للتحرش أو المضايقات
‏قال غير معرف…
انا عاوز أفهم من امتى مصر كانت بتفكر بطريقة بدو الصحرا دى؟
ليه بقينا مجتمع بدوى كده و احنا كنا اعظم بلد فى الدنيا؟؟
ايه اللى حلى البداوة ووحش الحضارة؟؟
‏قال مؤمنه
السلام عليكم ورحمة الله وبركاته

انا ليه تساؤل ممكن يكون غريب شويه من وجهة نظرك بس عايه اساله

ايحنا مجتمعنا فرق ازاى بين الرجل _1والمراه


وازاى نظر ليها على انها عوره _ 2

يعنى ايه هى الاساليب الى ظهرت من المجتمع اولدت الاحساس دى عند البنات

دومتى طيبه
والسلام عليكم ورحمة الله وبركاته
‏قال عُمر
مساء الخير أتمنى تكوني مبسوطة

وتواجهي مشاكل الحياة بصورة صحية

موضوع جميل جداً له علاقة وطيدة بمستوى ثقافة المجتمع وتعليمه وحضارته

فمجتمع تُسلب فيه حقوق المرأة ليس مجتمعاً حضارياً على الإطلاق

عارفة انا أعرف ناس قريبين أوي مني الزوجة تعمل في منصب كبير بهيئة مرموقة
بينما الزوج ترك عمله وإكتفى بدخل الزوجة ..أه والله

عموماً أنا سعيد أوي إن المرأة دلوقتي بقت واعية لحقوقها وبتقدر ترفع صوتها وتنادي بحقها من غير خوف

وأتمنى إن المسيرة دي تفضل ماشية لإني زعلت برضه لما لقيت بعض البنات أخدوا الموضوع ده بصورة حماسية في الاول وهمة ونشاط ونشر بوسترات وبعد كده فجأة كل حاجة سكتت ورجع الكلام عن العواطف والقلوب الجريحة المتكسرة

متهيألي المرأة في حاجة إلى أن تدوس شوية على عواطفها
لأننا في مجتمع لا يرعى للمرأة حق إن لم تكن قوية

موضوع جميل
وياريت تكملي فيه

خالص تحياتي
وشاكر جداً لكلامك المهذب
أخوكِ عُمر
‏قال barbie girl
لسة فى بعض الناس عندهم الفكر دا حتى الان.. رغم كل الشهادات العلمية اللى وصلولها الا انهم يفضلون الذكور على الاناث وبالمناسبة انا عاجبانى الحملة بتاعة كلنا ليلى اوى
‏قال غير معرف…
هو انتى حد قالك انتى هدى شعرواى ولا حاجه
يا اختى روحى اتجوزى وخلفى لك عيلين اتلهى فيهم
بدال ما كل يوم تكتبى لنا موضوع الستات متزفتين والستات الرجالة بيهم متحرشين
والنهاردة جبتيها من اول يوم ميلادها
اتهلوا على عنيكو بقى خلو الرجالة يشوفوا حالهم
بلا كلنا ليلى بلا كلنا زفت
سلام يا فيمينست هانم
‏قال canary
هو زى ما انتى قولتى
الكلام كان زمان
بس صدقينى دلوقتى النظرة اختلفت
ومبقاش فيه الراجل اللى بيطلق مراته لما تخلف بنت ... اللهم فى اضيق حدود وعند شريحه شديدة الجهل من المجتمع
يعنى وبجد انا عند بابا اغلى من مليون ولد لو خلفهم
وانا واخواتى البنات اغلى عند بابا من اخونا الولد الوحيد
واحنا صعايدة
‏قال a
جايز اننا احنا فاهمين الواقع غلط علشان احنا بنشوف الامور من بعيد, لكن لو وقفنا مكان كل بنت من دول خنلاقي الامر طبيعي لانها جائت الى الدنيا وعرفت انها مسخرة للرجل لتخدمه وتلبي رغباته الجنسية والخلف وليس لها راي اخر او اعتراض على الوضع وسيكون من الصعب عليها العيش في نمط حياة اخر

للتوضيح
اذا اخذنا كلب وربطناه منذ ولادته بحبل الى وتد وبعد فترة جئنا ورمينا الحبل وشلنا الوتد من مكانه ورمينا بالكلب بعيدا عن المكان الى مكان اخر فلن يطيق الحياة وسيعود الى حيث كان الحبل والوتد وهيقول مفيش قوة هتزحزحني من مكاني

ولشان يكون اوضح انا حاولت بنفسي اني اعامل بنات باسسلوب معاملة الاميرات فاحسو بالاندهاش والاستغراب وانا تحولت في نظرهم الى مخلوقة غريبة الاطوار

بس لو كان ربنا عايز يريح الرجالة كان خلق الاناث مع فرو على كل الجسم والوجه وحتبقى محجبة بحجاب طبيعي وحيوفر ثمن القماش والفساتين والمكياج, بيس بيلزم نضارة سوداء وكلو حيبقى تمام

معنديش مانع لو جوزي جاب من حديقة الحيوانات شمبانزي اسرح لها شعرها والبسها كالوت مغري علشان افرح جوزي, علشان التنين ح يبتسمو لي بدل ما يشوفوني غريبة الاطوار

انا كمت افضل ابذل مجهود مع نوع نساء مثقفات ودماغ متفتح علشان يفهمو انا باتكلم عن ايه

مجرد راي ولا اقصد ان حد يزعل
فيه أجمل من البنات يا بنوتة
على فكرة كنت فاكرة إنك مش مصرية
بس البنت الدكتورة صحبتي أسماء علي كانت عندي قريب في حلوان وقالت إنك مصرية .. أنا بفرح بكل البنات الجميلة الشاطرة الواعية
ويا ريت كل خلفة رجالة مصر تبقى بنات بس بشرط بنات حلوين وواعين
‏قال Zika
الافكار دي بدات تختفي لان
ازواج كتير دلوقت مابقتش تفرق معاهم ولد او بنت
وكل اللي يجيبوا ربنا كويس
وعائلات بارضه بتساوي بين الاتنين
في المعامله والتربيه
وبلاقي بنات ناجحه جدا في شغلها
وحياتها
ومابقاش فيه نفس التحفظ بتاع زمان
او ربما يكون موجود بس قل بنسبة ما
تحياتي يا قطه
‏قال Unknown
احنا تلات بنات لبابا و عمره ما قال ف يوم انه كان نفسه ف ولد .. بالعكس بيفخر بينا جدا .. عشان بنعمل اللي ولاد كتير معملوهوش .. أنا من رأي كوكا .. كتير من الرجاله مبقوش كده .. خصوصا بعد وصول المرأه لمراتب أكبر من الرجل في بعض الأحيان ..

تحياتي

ياسمين
‏قال Desert cat
صوت من مصر
هى دى ليليى اللى تغنت بيها الدنيا كلها
‏قال Desert cat
Coca
ازيك يا كوكا
حبيبتى انا فى محور كلامى ذكرت ان دى عادات قبلية هى زمان كانت منتشرة حتى فى المدن والحقيقة ومازالت بس مش كل الناس فكرها واحد
نورتينى يا جميله
‏قال Desert cat
romansy
لاء لسه فى لحد دلوقتى ناس بتفرق بين البنت والولد
واصحاب مستويات اجتماعية مرموقة كمان
‏قال Desert cat
شباب روش طحن
كلامك منطقى جدا
والمثير للدهشه يا عزيزى انك تجد من يتشدق باسم المساواة وحينما يبشر بانثى يقولك تجده ضرب بوز مترين
ويضحك للمواجه ليه ابتسامة صفرا قال يعنى عادى لكن من جواه بيغلى
شرفتنى
‏قال Desert cat
An Egyptian
مصر بتقت بتفكر بطريقة بدو الصحراء منذ عهد الاحتلال الفضائى البترو دولاراتى
ومنذ ظهور قنوات الخناس واكره على الفضائيات قطعها الله قادر يا كريم
‏قال Desert cat
مؤمنه
عليكم السلام ورحمة الله وبركاته
ردا على اسئلتك مؤمنة
اقرب مثل والمشكلة المتفشية فى المجتمع ككل التحرش الجنسى واللى اول القاء للوم يقولك البنت هى السبب
قيسى على هذا النهج
المرأة العاملة
اسمعى بقى طول النهار هى الستات بتعرف تشتغل
هى الستات بتعرف توفق بين البيت والشغل
اااااف هى تخنت كدا ليه
وممكن يكون اللى بيتكلم اساسا معفن مش بيستحمى غير مرة فى السنة
قيسى بقى على المعاملات والتشدق باسم الاسلام من عينة ناقصات عقل ودين
يا سيدى اكسر للبنت ضلع يطلع لها 24
لسه عايزة امثلة كمان ؟؟؟
شرفتينى جدا مؤمنة
وعليكم السلام ورحمة الله وبركاته
‏قال Desert cat
عمر
اهلا بيك عمر انا الحمد لله تمام
يارب انت تكون بخير
حملة ليلى ما زالت مستمرة عزيزى
والمؤسسين ما شاء الله نشطاء جدا جدا فى الجروب وكمان المدونة اللى اصبحت حاليا موقع
بشكر لك كلامك الطيب
مودتى واحترامى
‏قال Desert cat
barbie girl
بالظبط وهذا ما اصبو اليه
شرفتينى جدا
:)
‏قال Desert cat
Anonymous
لا انا معروف كويس اوى انا مين
واحدة ليها هدف وعارفه اللى ليها من اللى عليها
مش زى اللى لا ليهم شغلة ولا مشغلة وكل اللى بيعملوه يدخلوا يرازوا الناس فى مدوناتهم
انت اولى بالنصيحة
يعنى روح اتلهى وشوف لك حاجه تنفعك
‏قال Desert cat
canary
طبعا الكلام ده مش موجود دلوقتى بكثرة لكنه موجود وفى المجتمعات المدنية تلاقيه برضه
لكنه مش منتشر زى زمان
لكنه مازال منتشر فى المجتمعات البدوية
شرفتينى يا جميلة
‏قال Desert cat
oasis in the desert
دعينى اتفق معاكى
ولكن اعقب على الفكر الذكورى المتفشى
لان ربنا لا يخلق شيئ عبثا
ولما احتلوا الارض بما رحبت
وتناسوا ان هناك من يشاركهم عليها انسان ربنا خلقه وكرمة اسمه الانثى وبدونها لن يكون ايضا الرجل
فليكن مبدأ جميع جنس حواء هو اهمال هذا العنصر الذكورى من يرى فى نفس مالك للارض اما من تجد فى نفسها الجارية التى جاءت للدنيا من اجل ان تمسح الحمام وتضاجع مولاها فتلزم بيتها وليس علي المتخلفين من حرج
مودتى
‏قال Desert cat
هويدا صالح / عشق البنات
اهلا اهلا بالجميل
لاء طبعا مفيش اجمل من البنات ده هما زهرة الكون ونوره
انا بتكلم على العقول الحجرية
انا يا ستى زى ما قالت لك الغالية
مصرية شرقاوية كمان
ميرسى جدا جدا على كلماتك الطيبة
شرفتى المدونة ويارب دايما منورانى
محبتى يا جميل
‏قال Desert cat
Zika
هو موجود بس مش بنفس النسبة بتاع زمان
لكن اعتقد فى ظل الوضع الراهن من تحرش وخلافه هترجع نفس عقدة زمان
وكل واحدة هتخاف تخلف بنت احسن ترجع لها مغتصبة فى عز الضهر
شرفتنى زيكا
‏قال Desert cat
عاقلة علي ارض الجنون
مش كل الناس زى بعضها ولا كل العقول واحد
والموضوع بالفعل مش منتشر زى الاول
ربنا يخلى لك بابا
شرفتينى
‏قال غير معرف…
انا لاتعليق لى

فاولادى بنات .. وهن عندى أغلى من أى شئ على وجه الارض
‏قال مؤمنه
السلام عليكم ورحمة الله وبركاته
قطتنا الجميله

لا مش محتاجه امثله تانيه
ودى برده الى بيتقال على الرجاله
دول شباب فاضى مستهتر ما ورهومش حاجه يعملوها غير معاكسة البنات ويصاحب بنات والشكل دى

وزى ما هما مظلومين
لان طبعا مش كلهم كده ايحنا كمان مظلومين
طب وليه الناس بتقول كده
الناس بتقول كده لان فعلا فى نماذج بالشكل دى

فى نماذج مستهتر من الشباب وفى نماذج عاتيها لا مبالاه من البنات وكل هما الموضه وبس وتحمل راسا خاليا

اما عن حوادث التحرش فدا موضوع تانى

ليه اسبابه برده
الاقتصاديه والاجتماعيه حتى الاعلام مساهم فيه



اما الناس الى متهمين النساء علمال على بطال بالعجز وقلة القدره فدول اكيد عنده عيوب داخليه او نفسيه لان المرأه مش كده بدليل ان الاسلام كرمها

بس مش الكلام دى الى هيخلينا نشعر بقلة قيمتنا فى المجتمع مع العلم بان من يتفوه به ليس اهل للحكم على المرأه وليس هو من سيقدرها بعد ان قدرها الاسلام

فبعد دا المفروض المراه ما تشعرش بالظلم ولا حاجه
انجازاتها قدامها تعزز من مكانتها

دومتى بود
والسلام عليكم ورحمة الله وبركاته
‏قال karakib
هانفضل كده لحد ما نوصل لوأد البنات !! و كأنه كل واحد منهم ملك عايز ولي عهد يورث المملكة
‏قال غير معرف…
قطتنا الجميله

شوفي موضوع خلفه البنات ده و لحد دلوقتي شوفي من زمان فيه اهالي بتفرح بيه و بيقولك مايفرقش معايا ولد و لا بنت كل اللي يجبوا ربنا كويس و فيه اب يطلق مراته لما تخلفله بنت و ده قمه التخلف لأن لحد دلوقتي مش قادرين يستوعبوا ان سواء بنت او ولد اللي بيتحكم في الموضوع ده الراجل مش الست لكن تقولي لمين
صدقيني ياقطه بنت ولد مش فارقه المهم بس مايكونش فيه تفرقه في المعامله بينهم من الأهل
تحياتي لموضوعك الجرئ و محبتنا ليكي ياقمرايه
‏قال Desert cat
Dear Sherif
يعنى انسان يملك عقل وطيبة قلب حضرتك تفتكر ممكن يكون حاجه تانية غير ده
ربنا يخليهم لك
:)
دمت بكل ود
‏قال Desert cat
مؤمنه
عليكم السلام ورحمة الله وبركاته
انا كلامى كان فى سياق عام مؤمنة
يعنى بتكلم على مجتمعات بيحصل فيها كدا
بالنسبة للبنت اللى متبعة الموضه فان كانت محتشمة فلنفسها وان كانت خليعه فحسابها على الله الولاد المتحرشين مش موكلين من رب العباد لمحاسبة الناس فى الارض
ومش عذر ليهم ابدا يا قلبى الحياة الاقتصادة وعدم مقدرتهم على الزواج البنت اللى ماشية فى الشارع ذنبها ايهواحدة خارجه من شغلها ولا نازلة تشترى حاجه لاهلها ولا ايا كانت فين هى مالها انه مش قادر يتجوز ولا قادر يشتغل ولا قادر يعمل حاجه
ومش ده اللى هيقلل من قيمتنا ازاى يا مؤمنة
المجتمع دلوقتى يلقى اللوم على البنت فى كل حاجه
من غير ما يشوفها هى لابسه ايه ولا عاملة هى الحكم الفورى هى السبب فى اللى بيحصل
راجعى حوار نهى رشدى فى جريدة اليوم السابع او فى مدونة اجندة حمرا نشرته عندها اول فتاة تدافع عن نفسها ضد المتحرش
فى المقابل فى بنات بالف راجل بتشتغل وتنتج وبتفيد المجتمع

اشكرك جدا يا جميلة وحقيقى سعيدة جدا جدا بمتابعتك
شرفتينى
‏قال Desert cat
karakib
تقريبا قربنا خالص من المرحلة دى يا هانى
لو مش فوقنا توقع بعد عشر سنين كدا
‏قال Desert cat
اجندا حمرا +Heart Beat
صديقتى الجميلة
ازيك
وايه اخبارك
بصى يا قلبى هى النماذج دى موجودة لحد دلوقتى فى المجتمع
لكن فى المقابل فى عقول برضه متفتحة ومش فارق معاها بنت من ولد لانهم عارفين فى النهاية انه رزق من الله
اتمنى الفكر ده يسود المجتمع
شرفتينى جدا يا احلى اجندة
‏قال مؤمنه
السلام عليكم ورحمة الله وبركاته
حبيبتى قطه
انا ما قولتش ابدا ان الاسباب الاقتصاديه والا جتماعيه عذر ليهم لا رتكاب مثل هذه الافعال وهى جرائم بالفعل

ولكنى قصدت ان هما عندهم اسبابه م الى عملوا بيها كده

وان كانت البنت تلبس الى هى عايزاه وتمشى بالشكل الى هى عايزاه وتقول انا حره
خلاص تستحمل الى يجرالها لانها استفذته

طبعا مش هى لوحدها غلطانه هما الاتنين مشتركين فى الغلط
قطه
ايحنا بنبحث عن اسباب تقلل من هذه الظاهره التى ينظر لها الناس هن البنات
فعلينا فعل ما وسعنا تجاه انفسنا
ثم نحاسب الطرف الاخر على اقواله
بالفعل فيه نماذج من البنات مش كويسين وبيسعوا للفت الانظار ليهم
وفيا ايضا نماذج من الذكور مش كويسين وبيسعوا لافتراس اى فتاه سواء هى من اهل ذلك ام لا

ولم ولن اقول انهم جاؤا لمحاسبة الخلق
ولكن كانوا رد فعل على ما شاهدوه
واكرر لست اتكلم بصفه عامه
فهناك فتيات مظلومين راحوا ضحية هياج

ارجو ان تكونى وجة نظرى وصلت

دومتى طيبه

والسلام عليكم ورحمة الله وبركاته

المشاركات الشائعة