نطالب بقانون لردع ظاهره التحرش الجنسى


انتشرت فى مصر فى جميع الآماكن العامة والشوارع ظاهره التحرش الجنسى إن لم يكن باللمس فبالالفاظ الخادشة للحياء فليس غائب عن الاذهان حادث التحرش الجماعى اول ايام عيد فطر 2006 تلك الحادثة التى تكررت مرة أخرى فى شارع جامعة الدول العربية بحى المهندسين ثانى ايام عيد فطر 2008 كما ان الظاهره لم تقتصر على المناسبات فقط وانما ممتدة طوال العام عرض مستمر لدرجة أن شركات السياحة العالمية تحذر السائحات الوافدات إلى مصر من تحرش الرجال المصريين
لم يعد الأمر يتحمل السكوت فقد بدأ بالفعل نواب مجلس الشعب المطالبة بوضع قانون لردع المتحرش
وأشار النواب إلى إمكانية توقيع عقوبات تأديبية صارمة على طلبة المدارس أو الجامعات وموظفي الدولة في حالة ارتكاب جرائم التحرش وثبوتها بأحكام قضائية نهائية.واقترح النواب معاقبة الطالب الذي يرتكب جريمة التحرش بالحرمان من استكمال العام الدراسي الذي ارتكب فيه الجريمة كما اقترحوا أيضا حرمان الموظف مرتكب الجريمة من الحوافز لمدد تتراوح ما بين ثلاثة وستة أشهر أو حرمانه من الترقية المستحقة لمدة عام أو عامين حسب طبيعة الجريمة
المرتكبةاؤيد مطلبهم هذا وانادى باعلى صوتى مواااااااافقه

تعليقات

‏قال romansy
دى فعلا حاجه مش يتسكت عليها
احنا فى غابه
بصراحة انا مش عارف شبابنا رايح على فين ..والاحداث الاخيرة اصبحت تؤكد ان الشارع المصرى اصبح غير آمن لفتاياتنا

فهل نحن فى بداية مرحلة منحرفة عن العرف والتقاليد والدين ..وهل شبابنا قد وصل لمرحلة التشبه بقطيع الذئاب ..حيث لايهاجم الا مجتمعا

لابد من وقفة تبدأ من بيوتنا ومع اولادنا وتنتهى عند مسئولية الدولة فيما يحدث
إن لكل دين خُلقًا، وخُلُقُ الإسلام الحياء


إذا لم تخـش عـاقبة الليـالي --- ولم تستحِ فاصنع ما تشاءُ


يعيش المرء ما استحيا بخير --- ويبقى العود ما بقي اللحاءُ


إذا لـم تَخْــشَ عاقبـة اللَّـيـالي -- ولـم تَسْتَحْ فـاصنـعْ ما تـشاءُ


فـلا والله ما في الْعَيْشِ خيــرٌ-- ولا الدنيا إذا ذهـب الحيـاءُ
‏قال oRiGiNaL HeArT
ايــه دة!!
هو مفيش اصلا قانون لردع التحرش
ياخبر
احنا بالتخلف دة؟؟
والله شئ غريب بجد
ويجى فى الاخر يقول ماهم البنات السبب
طب ما يبصو على امريكا و اروبا البنات فيهم بيبقى شكلهم ازاى
ورغم كدة فى الدول دى البنت بتلاقى اكبر احترام فى التعامل ومحدش بيقدر يضايقها
بس علشان عندهم قوانين مخليه كل واحد يلزم حده وعندهم عقوبات صارمة علشان محدش يستخف بالموضوع
يبقى هما واخدين الموضوع بالجدية دى واحنا لسة بناقشة اصدار القانون فى مجلس الشعب
:((((((((
طبعا كلنا لازم نطالب بوضع قانون راادع للتحرش الجنسى
.....................
مدونتك عجبانى اوى
فيها فكر كدة وبتتكلم فى مواضيع مهمة
بس عونيا هتوجعنى كدة
انا اخدت البوست وكبرته وقريته ورجعته تاى :))
وانا بضم صوتى لصوتك وبؤيد العقوبة دى

تحياتى
‏قال غير معرف…
عزيزتى
مره اخرى نلجا للحل السهل
قانون جديد وكانه لا يوجد بالفعل قوانين رادعه
الموضوع لن يجل بمزيد من القوانين
اننا نحاول فى فوره مؤقته ستخمد بعد قليل نعالج العرض دون
ان نصل الى المرض
مثلا لم نسمع عن دراسه اجتماعيه نفسيه للمقبوض عليهم فى حادثة شارع جامعة الدول العربيه ومنهم من لم يتجاوزوا السادسة عشره
وهذا امر بالغ الغرابه ويختاج لدراسه متعمقه
هذه بعض اعراض تظهر على السطح كالطفح الجلدى نتيجة لخلل اعمق فى المجتمع وتفككه وتآكل القيم والعادات التى كانت وراء التماسك الأجتماعى الماسوف على شبابه...كانت عائلات مثلا تمتنع عن فتح التيلفزيون او الراديو لو حدثت حالة وفاه عند جيرانهم
وكان شباب الحى يذودون عن بنات حيهم لو عاكسهم غريب
لن تعود هذه الصفات مادام الشعب اصبح اكثر من شعب شعب يعيش فى النعيم ويلعب بالملايين ومستعد ان يدفع 20 مليون دولار فديه لقتله عشيقته وشعب يموت من الجوع وشعب يناطح الحجر ليظل عائما فوق الماء ولا يغرق...وشعب وشعب...الخ
من المستحيل ان يوجد تماسك اجتماعى هنا بل استهتار بالفيم واندفاع الى الجنون ياسا والجنون خنا يتخذ اشكالا كثيره منها التطرف او الأعتداء الجنسى فعلى الرغم من التناقض الظاهرى بينهما الا انهما ينبعان من نفس المنبع
التفسخ المجنمعى وتحكم طبقة
جديده هى الكلفتوكرات
‏قال الازهرى
صديقتى العزيزة

اسمحى لى ان اسأل اولا ما الذى ادى الى انتشار الظاهرة ؟

وما الذى جعلنا نطالب بوقفها ؟
‏قال غير معرف…
عزيزتى
وماذا تنتظرين من مجتمع بعيش ضبابية المستقبل..من فى مصر يعرف كيف ستحكم البلاد فى خلال سنوات قليله؟؟؟
لآ احد يعلم...وانظرى الى كيف تدار الأمور والقاء اللوم على الماس الكهربائى استخفافا بعقول الناس
وهذا مستمر من سنوات ويتراكم فتقابله الناس بنفس الأستهبال...وهذه كلمه خطيره وليست نكته الأستهبال يعنى ان نضرب عرض الحائط بابسط قواعد العقل والمنطق اى رافد آخر من روافد
التفكك الأجتماعى والأندفاع وراء اللامنطق واللا عقل ...الى جنون الجريمه او التطرف...جريمة التحرش اوالأرهاب
ونحن قى ذكرى 6 اكتوبر 1973 وهى آخر سنه فى عمر التماسك الأجتماعى الذى اتحدث عنه...تصورى حتى اللصوص والنشالون توقفوا وقتها عن ممارسة جرائمهم...اين نحن من هذا اليوم
لو عايزة رأيي بجد
المفروض تتفرض عقوبة مشددة للتحرش
وتستحدث جريمة "شروع في إغتصاب"
على غرار "الشروع في القتل"

أهو ده رايي المحايد
باقوله ورزقي على الله
مع إني كنت أحد المستفيدين من حالة الفلتان دي أيام الشباب
ياللا بقى ... أهي أيام وعدت
أياليت الشباب يعود يوما
فأخبره بما فعل الجواز

مع تحياتي/ إحسان الروش
فى البوست القادم ان شاء الله فكرى بقى فى كيفية منع تحرش بنات حواء ببنى ادم
وانت اكيد حاسة بكدة برضوا
مش كده ولا ايه؟
يا سلام بقى لو فى عقوبة زى بتاعة الفراعنة كده للمتحرش جنسيا بانثى وهى عقوبة الاخصاء لو ان الأمر وصل لمرحلة اغتصاب وجدع الانف لمن تحرش باللمس علشان يعيش بقيت عمره مفضوح بسبب الحكاية دى
‏قال ... amr
اعتقد ان التفكير لازم يكون ازاي نرجع الاخلاق اللي افتقدناها :((
ازاي ندي امان للشارع ... ازاي زمان في السبعينات كان في الميني جيب و الميكرو جيب و احدث صيحات الموضة من لبس لتصفيفات الشعر وووووو ... و مع ذلك ... نادرا ما حد يقف يتحرش بواحدة منهم ... و اذا حد عمل حاجة كدة و لا كدة ... تلاقي الشارع هاج و ماج علية ... و لغاية كام سنة و الله كان فية النخوة دي .... بس تقولي اية بس !! و لا تقولي لمين ... !! كل واحد بيتحجج بالتاني ... الشباب يقولولك ... مش لاقيين جواز و لا شغل و كل شوية الدنيا بتتعقد و الكليبات مش هلرية الواحد و الصابون اشتكى ووووووو ... تيجي تسمعي البنات بقى ... تقوللك اية .. انا حرة البس اللي يعجبني ... هو اية انا بالبس لنفسي ... لو هو ماشي في حالة و مش بيبص على البنات ... مش هيفضل يبحلق ولا كأنة شاف بنات قبل كدة ... وكمان ماحنا كمان علينا ضغوطات ... سن الجواز اتاخر ... و الشباب منهم كتير مش عارف يكون نفسة .... ووووو

الكلام كتير ... و كل طرف شايف نفسة صح و بس !!! اعتقد انة اخلاقنا بقى فيها مشكلة كبيرة اوي ..... انا اسف طولت عليكي
‏قال غير معرف…
وتاملوا ياساده الخبار جيدا
حوالى 100 من الشباب والصبيه يتيرون مصادمات طائفيه فى نجع العيله بابو تشت بقنا
وحوالى مائه من الشباب والصبيه يتحرشون بالفتيات فى شارع جامعة الدول العربيه
المنبع واحد ...وان اختلفت صورة الأعتداء
تحرش او تطرف ينبعان من مجتمع فقد عقله
لفقدانه وضوح الرؤيه وسقوطه فى ضباب التخبط والياس
‏قال mina
من امتى الاخلاق بقت محتاجة قوانين عشان الناس تمشى عليها ... لما الاديان كلها تحرم كدة و الناس مش سمعة يبقى قانون ايه الى هيحل المشكلة .. و لا احنا وصلنا لدرجة من الاستخفاف بالدين للدرجة دى ؟؟؟؟؟؟؟ انا حزين على اللى وصلنا له
يا قطه تسمحيلي انونو معاك
التحرش الجنسي موجود منذ الازل و لكن الجديد و الغريب هو التحرش الجنسي الجماعي
يعني قطيع من الذئاب الجائعة تتهجم علي اي انثي تقع في طريقهم سواء كانت محجبة او مبتزلة
اما عن القانون خللي البلد تمنع تدريس الدين في المدارس و ما تقوليش هي فين هيه مدارس
‏قال غير معرف…
عزيزتى
هل منع تشديد العقوبه على تهريب المخدرات وجودها؟ ابدا بل ظهرت انواع جديده مثل البانجو
ليس معنى ذلك عدم سن قوانين رادعه ولكنها كما يقولون فى المنطق هى ضروريه ولكن غير كافيه وحدها
وتعالوا نترك جانبا العقليه العقابيه مؤقتا
ونبدا بالأندهاش من دهشتنا مما يحدث
هذا نتاج طبيعى لما زرعنا
علينا ان نبحث عن مصادر الخلل فى حياتنا وهى كثيره جدا وقد تكون مستتره او كامنه ولكن اعراضها تظهر بين الحين والآخر من فوضى الشارع الى الأهمال واللامبالاه الى الأستهبال على كافة المستويات الى الأنانيه والجشع والتطرف واللا منطق او اللاعقل
هو القاسم المشترك بينها جميعا
الهند منذ ثلاثين سنه كانت فى مستوانا اليوم هى فى المرتبه 12 بين الدول ونحن فى الذيل
فكروا فى اوجه الخلل لأن مانراه هو الثمن الذى ندفعه ان آجلا اوعاجلا ولا مهرب منه ولا يجدى الضحك على النفس
والخلل على كل المستويات
ولنضرب مثلا من اللاعقل واللامنطق من اهم وثيقه تنطم حياة المجتمع سياسيا او من يحكم وكيف يحكم ومن يحاسبه اذا اخطا
فى دستورنا شىء غريب جدا ماخوذ من العصر الأقطاعى فى اليابان
كيف؟
كان ابن الأمبراطور اذا اخطأ فى المدرسه لا يعاقب
وخلاص كده؟
لأ طبعا
يجب الا تذهب الأخطاء بدون عقاب رادع
ولذلك كانوا يجلسون تلميذا من عامة الشعب الى جوار ابن الأمبراطور ليتلقى هو العقاب دون ذنب جناه
فى دستورنا رئيس الدوله هو رئيس الحكومه او السلطه التنفيذيه ولكنه لا يحاسب الذى توجه له الأستجوابات شخص آخر هو رئيس الوزراء
!!!!!!!!!!!
‏قال Rania Lelah
عزيزتى موافقون
نرفع يدانا و نقول موافقون

هذه الظاهرة ظهرت و نتشرت مع ظواهر اخرى كثيرة فى بلدنا
المطلوب ان نردعها كما قلتى و ان نقف امامها
لم يعد لدينا طاقه كى نتحمل المزيد من هذا

تحياتى
‏قال Desert cat
ماهو السائد حاليا بالفعل هو قانون الغاب
‏قال Desert cat
وميض ابتسامة
كلام حضرتك منطقى جدا
ومتفقه معاه
تحياتى
‏قال Desert cat
ABOALI
جميع الديانات حثت على حسن الخلق والتسامح
اشكرك جدا على الابيات
تحياتى
‏قال Desert cat
oRiGiNaL HeArT
حبيبتى احنا احسنناس نقلد فى الحاجات الوحشة اما الحاجات المفيدة لاء
الادب والاخلاق لاء
احنا بنتفنن فى ضياع الوقت
دول اوربا بيقدسو الوقت
الاخلاق فى انحدار والقيم فى انهيار
ربنا يستر علينا من اللى جاى
هكبر لك الخط من عنيا
اشكرك جدا لذوقك وسعيدة بتشريفك مدونتى
‏قال Desert cat
bos bos
بقينا اغلبية
:)
‏قال Desert cat
Anonymous
كلام حضرتك منطقى جدا
الحل الجذرى لاى مشكلة هو المواجهه
الحلول المؤقته بعتبرها هروب
لكن اعتقد وجود قانون رادع للمتحرش يجعله يفكر مرات قبل ارتكاب فعله
ايضا غياب رجل الامن من الشارع أفقده الامان
تحياتى
‏قال Desert cat
الازهرى
الذى ادى الى انتشار الظاهره عدم الوعى وغياب الاخلاق
الاب والام يفرحوا بابنهم اللى عاكس بنت الجيران اصله كدا بقى راجل وتقعد الست الوالدة تفتخر بين الجيران ان ابنها بيعاكس فى الشوارع والولد عايز يثبت رجولته اكتر يقوم ينزل يتحرش
‏قال Desert cat
Anonymous
عزيزى القيم والاخلاق تبدأ من الاسرة
ليس مبرر انا اقابلك اقذفك بحجر دون ان تفعل لى شيئ
وعندما يسالنى احدهم لماذا اجيبه الضغط والكبت جعلنى افعل هكذا
وجود العذر لا يمحى ذنب ولا يكمل نقيصه
مودتى
‏قال Desert cat
شفقة هانم واحسان بك
غياب رجل الامن سبب هام جدا يا استاذ احسان فى التسيب والفوضى
كان زمان قدام مدارس البنات دوريات منتظمة وكان فى الاسواق ظابط نظام وكان المعاكس يتاخد يتحلق له زلبطة ويخرج يبقى ماشى فى الشارع فضيحته بجلاجل دلوقتى الظلبطة بقت موضه علشان كدا الشباب بيعاكس براحته
تحياتى لحضرتك ولشفقه هانم
‏قال Desert cat
ABOALI
لاء مش حاسه بكدا الحقيقة
لان بنات حوا بيكونوا ماشيين فى حالهم والمرضى النفسيين هما الى بيهوهو عليهم
‏قال Desert cat
قلب مصرى
بضم صوتى لصوتك يا ابو رقية
لاننا شعب يخاف
تحياتى
‏قال Desert cat
... amr
طيب يا عمرو بالفعل لبس البنات مش مبرر للتحرش
يعنى هو مش منزل من السما علشان يعاقبها
ربنا موجود يحاسبها على لبسها
هو بقى يتحرش ليه ؟؟
اعتقد ان المتحرش مريض نفسى يستحق العلاج والشفقه معا
تحياتى
‏قال Desert cat
Anonymous
العنف اصبح لغة الشعب
‏قال Desert cat
mina
اتفق معاك
جميع الادين تدعو لمكارم الاخلاق والتسامح لكن غياب دور الاسرة له اثر واضح وغياب رجل الامن له اثر جلى
لذلك وجب القانون لان الظاهره بالفعل خطيرة وتستحق وقفه
حزنى يعادل حزنك
تحياتى
‏قال Desert cat
a7wal el Hawa
زمان كان فى تحرش بس كان فى برضه قانون رادع كان اللى بيتحرش بيتحلق شعره زلبطة
دلوقتى علشان التسيب ومبقاش لا زلبطة ولا زلوزة حتى
اصبحوا يجمعوا بعض وهجووووووم
انا مقدرش امنع مادة بتدرس فى المدارس لانه بالفعل مبقاش فى مدارس
كنا زمان بنشوف المدرس جاى من اول الشارع نمشى من شارع تانى احترام مش خوف
دلوقتى ان راحوا اصلا المدرسة بيقضوا الحصة تريقة على المدرس بيضربوه لو مش غششهم فى الامتحان

وعظيمة يا مصر
‏قال Desert cat
Anonymous
لان بلدنا الحبيب ام العجائب وام الدنيا فقد جمعت جميع سلبيات الدنيا بين احضانها
ايضا اذكر لحضرتك قانون ساكسونيا الذى كان قديما بالمانيا
فان اخطأ الغنى صاحب النفوذ عفوا عنه
وإن اخطأ الفقير يعاقب اشد انواع العقاب
نحن الآن نعانى الأمرين
من مصائب الدهر
تدهور الدولة وانهيار الاخلاق والقيم
والعجب العجاب لمن يخلق لكل هذه الأخطاء المبررات
تحياتى
‏قال Desert cat
Rania
صدقتى يا رانيا الواحد خلاص فاض بيه
بس انا من زمان قوى اتخذت لنفسى قانون اى حد يوجه لى كلمة بسمعه اللى فيه النصيب

:)
تحياتى
‏قال شق القمر
أما أنا فلا أوافق
لأنها ليست العقوبات الصحيحه
ولا تسألينى قطه ... إذن وما هى العقوبات من وجهة نظرك ؟؟
لأنى حقا لا أعرف
فعندما يتخبط بك الطفل الصغير فى موقف سيارات مثلا فنستنكر ما فعله ونكمل حديثنا وكأن شيئا لم يكن
هل تعرفين أن مجرد نظر أحدهم إلينا ثلاث فتيات فى المواصلات العامه .. جعلنى بالبلدى أهبّ فيه معرفش أنا بقول إيه
وتخيلى رد فعل الباقون ؟؟؟
لم ينبث أحد الرجال بمقام آبائنا واخوتنا بكلمه لولا أن السائق نفسه هددهم
وبعد أن ذهبت لبيتى وأنا على علم أنهم ليسوا طبيعيين ( شاربين حاجه يعنى ) كان رد فعل والدتى لأنها خافت علىّ ورد فعل زميلاتى اللاتى خفن علىّ أيضا ... كنتى سكتى وصبرتى .. افرضى كانوا عملوا فيكى حاجة ولا تبعوكى

العقاب مش انه ينطرد من التعليم لانه بالعكس يحتاج اكثر الى التعليم

لكن الصح انى اعلمهم الصح

بدل ما نفصل الفصول المشتركه عشان غلط الاختلاط
أعلمهم دول اخواتك واللى ما ترضيه على اختك مترضيهوش على أى بنت أيا كانت وأيا كان لبسها حتى

النظرة اللى هتنظر بيها لفتاه أكيد هيتنظر بيها لأختك أو والدتك أو زوجتك وهى ماشيه معاك أو حتى بنتك

والموظف .. ردعه دا بسيط .ز لازم يبقى الردع أكبر
لازم يدفعوا قدر من المال فى هذه الأزمه للمتوسطى الحال عشان يعرفوا ان الله حق

وعلى الناس القادرين اللى ميهمهش الفلوس انهم يتجاوزا بشىء أكبر


على دور السكر والعربدة انها تتقفل

على كل واحد لازم يتحط عسكرى يشوف رايح فين وبيعمل ايه ويوقفه عن السىء اللى بيشربه واللى بيشوفه

لازم محاطاتنا تشيل البلاوى اللى بتعرضها

لازم نشوف مدينتنا الفاضله بقى

حتى الاعلانات الهايفه المعمولة ملهاش قيمه

عارفين ليه ؟؟

عشان للأسف شايفينها ان الناس بيها هيلموا نفسهم وهيركنوا على جنب بعيد عن السياح

طب روح بقى شوفهم فى شرم

يا أهلنا لما انتم خايفين عالسياحه
بالكم بقى بناسنا العايشين فيها


والله بخاف اخرج من باب بيتى رغم انى فى قريه من كتر الشباب الغريبين اللى بيجوا فيها

من كتر مناظرهم اللى تخض
بقيت انا بتخض
‏قال Desert cat
شق القمر
حلولك منطقية جدا يا دكتورة
بس الشباب دلوقتى متبرمجين على حاجه وسمعتها من كذا واحد اتكلمت معاه بخصوص الموضوع ده
اللى يقولى لبس البنت
اقوله وانت حد طلب منك تعاقبها بالتحرش ؟
يرجع تانى يقولك البنات بتتبسط وهى اللى بتقول كدا بلسانها
طيب يا سيدى مش تجمع واللى تقولك كلمة زى دى تبقى فتاة ليل ولامؤاخذه وتستاهل اللى بيجرى لها ومش معنى كدا انى امشى اتحرش ببنات الناس بحجه انهم عايزين كدا
يعنى انا واحدة من الناس لو حد وجه لى كلمة بردها له الف ولو رد عليا وزاد عن حده بنسى نفسى واسمعه كلام عمره ما سمعه فى حياته
انا تقريبا الشوارع اللى بمشى فيها كل يوم واحده مش بتتغير العيال دى حفظتنى
بقى لو حد جديد معاهم جاى يفتح بؤه يقوله اسكت حتهزأنا
ده معناه ان العيال دى جبانه اصلا
وعايزين اللى يهزأهم علشان يحترموه وبالتالى لما يعرفوا ان فى قانون للى يفتح بؤه مع واحدة هيتلم غصب عنه
طالما التوعيه مش جايبة همها
احنا زهقنا احمى اختك والا امك
مش بيحوء

تحياتى
‏قال Yasmine
مش حل صدقينى
اولا عمر ما ضحية التحرش ما هتبلغ لو دا حصلها لان فى مجتمعنا العزيز البنت هى المتهمة دايما
ثانيا لو حصل و بلغت لسه هنستنى قضية و حكم و تنفيذ..
المجتمع ده لازمله اعادة غربلة و تثقيف من اول و جديد عشان الظاهر جاله حالة حول مستعصية و فقد القدرة على التمييز بين الضحية و الجانى
‏قال Desert cat
banouta masreya
انا بقول اقرار قانون للمتحرش خطوة ايجابية تخليه يتوخى الحذر
المشكلة فى بلدنا فعلا ان البنت بتخاف تتكلم فى موضوع زى ده
دى بتخاف تقول لاهلها يبقى هتروح تبلغ
وطبعا المتحرش عارف كدا
ولو قولنا البنت تدافع عن نفسها بى وسيله دفاعيه حتى تتعلم رياضه يبقى كدا قلبنا لغابة
والبقاء للأقوى
وغربلة المجتمع واعادة تثقيفه مش هتجيب همها لانه عارفين ان اى كلام يتوجه لهم شعارات
واللى تقولى له اختك هيحصل لها كدا يقولك اختى وامى محترمين على اساس انه عارف اللى بيعاكسها
طيب وبعدين بقى ؟؟؟
كدا مش وصلنا لحل
‏قال شق القمر
اكيد انتى ادرى قطه لانك فى المدينه ولكى شغلك اللى بيحركك بحريه
بعكس انى لو دخلت بيتنا بخاف اخرج من خوفى من الناس دى والله
ربنا يعافينا
اما حكاية الكلام والرد
فمشكلتى انى لما برد بيبقى بدون عقل
لدرجة انى انا لو متحمتش فى اعصابى انا اللى بعيط فى الاخر :))
بس لو مع حد معايا والله اقطعه اللى يعملها مشكله
دمتى بكل خير :)
‏قال غير معرف…
قطتنا الجميله

عامله ايه ياقمر؟

شوفي جريمه التحرش دي بقت سمه من سمات العصر اللي بنعيش فهي و تحسي بيها بقت مرتبطه بالأعياد مش عارفه ليه يعني بدال مالناس تخرج تعيد تتنكد بجريمه زي دي لو حصلت لواحده من بناتها
حسنا اتنبح اننا نقول للمتحرشين من الساده الرجال يعتبر البنت دي زي اخته او بنت من بنات عيلته يقبل ان حد يعمل فيها كده و برضه مش بيسمعوا
فيه ناس ماتجيش الا بقوانين صارمه بس المهم بقي ياقطه انها تتطبق علي الكل مش زي قانون المرور يعني لو المتحرش ابن واحد من المسؤلين يبقي زيه زي اي واحد تاني تفتكري ممكن ده يحصل؟بتمني كده
تحياتي و سلامتي و سلامه هارت ليكي ياقمرايه

المشاركات الشائعة