اين تذهب هذا العيد ؟؟؟؟؟

انتهى شهر رمضان وبعد ساعات صلاة العيد .. انا شخصيا بحب احضرها جدا واقعد اصور فى الناس وهما يبصوا لى ويستغربوا بتصورنا ليه دى .. وناس تدينى ضهرها وناس تبصلى وتبتسم وكل سنة اقول انا هبقى استنى اخر واحده واخرج او اول ما الامام يخلص اخد الشوز فى ايدى واجرى على الشارع اول واحدة .. لكن فى كل مرة المحاولات تبوء بالفشل .. واخرج بين الجمع اللى بيدهوسونى تحت رجليهم وانا اصلا قصيرة يعنى كدا كدا رايحه فى الرجلين .. ما قولنا الصبر حلو بس هنجيب منين الاستاذ صابر يصبرنا ...

حاجات بتضايقنى فى العيد ..


الشباب اللى بيشدوا الرحال من الصبح ويقسموا نفسهم على النواصى وفى منتصف الطرقات وصفافيح الزباله .. علشان اى واحدة معدية اهو ان مش طال يمسك كم التيشرت يرمى كلمه زبالة زي البيئة اللى هو متربى فيها .. البنات ياخدوا بالهم كويس واللى تخرج .. تخرج مع اهلها او فى شنطتها مطوة علشان تضمن انها ترجع بيتها بسلام .. لم ولن يخرج من الاذهان تحرشات العيد وكل سنة وسعد ودينا طيبين

الحاجه التانية .. انى اكون ماشية والاقى حد بيفرقع صواريخ تحت رجلى باقف اتنطط وساعتها بتحول لدراكولا وبيبقى نفسى امسك اللى عمل كدا علشان اشرب من دمه .. لكن فى كل مرة بيعملها ويتبخر ... اخر مرة شهدت هذا الموقف البشع اول يوم فى رمضان واقفه باتكلم فى الموبايل عدى من قدامى ولدين اخرهم 10 سنين بالكتير ووقفوا يتكلموا شوية انا مش مركزة معاهم وبعدين دول اطفال مش فى نيتى اى سوء يعنى... بعد دقيقتين مشيو .. مفيش ثوانى والاقى صاروح مفرقع تحت رجلى رقعت بالصوت الحيانى اللى وقف يتفرج واللى قالى مين اللى عمل كدا .. وانا ايه عرفنى يا ضنايا ؟؟؟ اللى بيكلمنى طبعا اتخض قولت له الحرب العالمية التالتة قامت تحت رجلى قعد يضحك قفلت السكه فى وشه ..

من شوية سمعت اغنية اهلا بالعيد لسيدة الشاشه البرونزية صفاء ابو السعود ... حسيت الحقيقة انى رجعت طفلة من تانى مش عارفه ليه دايما عندى احساس انى مش بكبر خالص .. مع انى بلغت من العمر ارذله ... فضلت اقول معاها اهلا اهلا بالعيد مرحب مرحب بالعيد .. ولسه واخده بالى النهارده بس بعد العمر ده كله انها بتقول سعدنا بيها بيخليها ذكرى جميله لبعد العيد .. انا طول عمرى بقولها سعد نبيهه .. واقعد طول السنة افكر مين سعد نبيهه ده يا جدعان اللى دائما يخلينا نتذكر فرحة العيد .. يا بخته الحاجه صفاء بتغنى له كل سنة

الكحك يا جماعه اعملوا حساب ان المعدة لسه ما اخدتش على الاكل الكتير .. وانها اتنظمت لمدة 30 يوم على وجبه وليها وقت معين .. يعنى الحذر ثم الحذر ثم الحذر وإلا بدال ما نسمع عن شهداء طوابير العيش هنسمع عن شهداء طوابير التواليت


وكل سنة والجميع بالف خير
عيد سعيد

تعليقات

‏قال mido
عيد سعيد
وكل سنة وانت طيبة

مع انى بلغت من العمر ارذله

:)
‏قال ... amr
و سعدنا بيها ... بيخليها .... ذكرى جميلة لبعد العيد .... و غنوا معانا غنو (( غنواا )) قولوا ورايا ....


كملي انتي بقى .... و كل سنة و انتي طيبة .... و لو عنك اقتراحات على خروجة العيد -- غير الامريكين والنبي -- سمعينا رايك

و خللي بالك من الصواريــــــــخ

و كل سنة و انتي طيبة يا قطقوطة
‏قال صفا سارة
كل سنه وانتى طيبه يا جميل
:)
كووووول سنة وانتي طيبة وربنا يبعد عنك العيال الرزلة كلها
:D
‏قال غير معرف…
كل سنه و انتى طيبه يا قطه

و ربنا يجعل كل عيد اسعد من اللى قبله
‏قال خالد كامل
كل سنة و انتى طيبة
:)
‏قال الازهرى
قطة الصحراء

شر البلية ما يضحك ولذلك فقد ضحكت كثيرا لما حدث لك
نصيحتى كونى مثلى لا اخرج من المنزل الا لمحيط قريب للغاية فى اول يوم وبعدها تبدأ الزيارات البعيدة
فى اليوم الثانى او الثالث حسب المزاج

كما ان الرجزع الى الطفولة هو افضل احساس ممكن حيث لا تفكير سوى فى اللعب ثم اللعب ثم اللعب هذا بالاضافة الى العيديات التى كنا نأخذها واصبحنا الان نعطيها

تحياتى وكل سنة وانت طيبة
وادعوا لك بالاستمتاع بالعيد
‏قال ابو احمد
كل سنه وإنتى طيبه وبخير وصحه وسعاده
والله انا سعيد جدا بكل خواطرك التى تخص العيد .. ولكن ازعجنى جدا ما فعله معك الاولاد الاشقياء فى رمضان ؟ بصراحة مقلب مش ظريف ؟؟ معلش شغل عيال وقلة تربية!! عموما عبد مبارك علينا وعليك
وبخصوص الكحك والحاجات دى ربنا يقدرنا على مقاومة هذا الاغراء
‏قال ابو العربى
يعنى كل بنات بنات
مهو احنا بردو بندايق وبيتغلس علينا بردو ( واحد فرفور ) كل عام وانتم بخير
تحياتى
ابوالعربى
‏قال صوت من مصر
عارفه هروح فين
من غير ما تتخيلى فى جزيره القطن ؟
قريبه جدا منى
كل سنه وانتى طيبه
‏قال FaceMoon
كلة كوم والصواريخ كوم جيتى على الجرح يااحلى قطة
كل سنة وانت طيبة
‏قال Heart Beat
الصديقة العزيزة جدا على قلبي

Desert Cat

كل سنة و انتي طيبة

و خلي بالك من اطفال الصواريخ احسن دي بتكون هواية عندهم عشان كده يتفننوا في الايقاع بالضحايا و يضحكوا عليهم اما يتخضوا

كنت لسه بقول لاجندا عن مظاهر العيد هنا

ان الحكاية مش بمب و صواريخ و كده لا الموضوع اكبر بكتير

هنا تلاقي الاطفال و الشباب يستخدموا انواع من الالعاب النارية اللي تخلي السما تنور بالليل و كأننا الساعة 12 الظهر

مع سماع فرقعة و كأنها قنابل مدوية ثم ظهور تشكيلات ملونة

بعد بقى اما تتخضي من الضوء الغريب اللي ظهر في السما بالليل ده و تساورك الشكوك و الهواجس ... تسمعي ساعتها صوت قنبلة و تظهر التشكيلات النارية في السما اعلان بأن اللي حصل ده هو من احد الالعاب النارية بس الكبيرة الشوية

كل سنة و انتي طيبة

و في جملة معايدة دائما ما تقال في المناسبات اللي زي دي .... لكنها مؤخرا اصبحت تقال للدلالة على التريقة او عشان تغيظي الشخص اللي اودامك

تقولي

عيد

""" مبارك """
‏قال mostafa rayan
عندك حق المفروض ان رمضان يكون له اثر في اخلاقنا وتصرفتنا ونخرج منه واحنا احسن لكن للأسف احنا عندنا فصل شنيع بين العبادة والمعاملة رغم انه بنص حديث الرسول الكريم صلي الله عليه وسلم الدين المعاملة
كل سنةوانت طيبة يا حنان وجعل الله ايامك كلها اعياد
كل سنة وانتي طيبة ياقطة وعيد سعيد يارب ودايما متهنية ومبسوطة وتحققي كل ماتتمنيه
عيد سعيد
تقبل الله منا ومنكم وكل عام وانتم بخير
تقبل الله منا ومنكم وكل عام وانتم بخير
‏قال فاروق عادل
وانتى طيبة ياحنان

وانا على فكرة زيك فى حكاية سعد نبيهة ولسة مكتشف الحقيقة السنة اللى قبل اللى فاتت
كل سنه وانت طيبه يا جميله البوست حلو جدا جدا وحقيقي جدا جدا يا اجمل قطه في الدنيا ....
موضوع الصاروخ موتني من الضحك .
والسؤال " الهدف ايه من استيراد كل كميه الصورايخ والبمب ديه رغم الاف الحوادث ؟؟"
انا فخوره بيكي جدا جدا يا قطه يا جميله
.

اميره جمال
‏قال راعى الناقه
اجمل ما في العيد حب الناس لبعضها
المفرقعات والمعاكسات من الظواهر المزعجه في العيد في المجتمعات العربيه
وكل عام وانتم بخير
‏قال Desert cat
mido
وانت طيب يا ميدو
معلشى بقى حكم السن
:)
‏قال Desert cat
A m R
وانت طيب عمرو
وربنا يستر فى الصواريخ دى
‏قال Desert cat
صفا
وانتى طيبة يا جميل
عيد سعيد
‏قال Desert cat
آلام وآمال
وانت طيب يا محمود
ربنا يتقبل دعائك
‏قال Desert cat
MaGn0liA...
وانتى طيبة يا جميل
وربنا يجعل ايام الجميع سعيدة
‏قال Desert cat
مهيج الجماهير
وانت طيب
:)
‏قال Desert cat
الازهرى
كل سنة وحضرتك بالف خير
وربنا يبعد عننا شياطين الانس
سواء اللى بيضربوا صواريخ او اللى بيتحرشوا
تحياتى لحضرتك
‏قال Desert cat
ابو احمد
دكتورنا الجميل
كل سنة وحضرتك طيب وبالف خير
عيد سعيد
‏قال Desert cat
وميض ابتسامة
بصراحة المقلب كان صعب تخيله
بس الحمد لله
ربنا يجعلها اخر الصواريخ اللهم امين
كل سنة وحضرتك طيب وبالف خير
عيد سعيد
‏قال Desert cat
ضد الظلم
انتوا بس سيبوا البنات فى حالها وانتوا تحسوا بسعاده
:)
كل سنة وانت طيب
‏قال Desert cat
صوت من مصر
مكان لذيذ انا شايفه تقضى فيه 3 او 4 ايام
كل سنة وانت طيب
‏قال Desert cat
FaceMoon
ربنا يبعد عنك كل الجروح ويبعد عننا جميعا الصواريخ
كل سنة وانتى طيبة
‏قال Desert cat
Dear Heart Beat
صديقتى الغالية ارق دقة قلب
كل سنة وانتى طيبة وبالف خير
وربنا يستر من اطفال الصواريخ
طبعا الالعاب النارية كلها مخاطر بخلاف اصواتها العاليه المسببة للازعاج
المفروض يكون فى قانون رادع للتفاهات دى الاحتفال بالعيد مش بالعاب نارية وتسبب فى اذى الاخرين
كل سنة وانتى بالف خير
عيد سعيد يا جميله
‏قال Desert cat
mostafa rayan
بالظبط مصطفى
الرسول قال الدين المعاملة
والناس بعدت عن الاخلاق وحسن المعامله
كل سنة وانت بالف خير
عيد سعيد
‏قال Desert cat
بنات صاحبة الجلالة
كل سنة وبنات صاحبة الجلالة طيبين وبالف خير
عيد سعيد
‏قال Desert cat
م/ الحسيني لزومي
اللهم آمين
كل سنة وحضرتك طيب
‏قال Desert cat
طالب ثانوى
ده سعد نبيهه شكله محير الكون
بس الحمد لله اننا اكتشفنا الصح بدل ما كنا فضلنا ظالمين الراجل
:)
كل سنة وانت طيب عيد سعيد
‏قال Desert cat
واحده من أصحاب القمر
كل سنة وانتى واسرتك بالف خير يا اميرة الكون
اعمل ايه بس يا حبيبتى تقريبا بيستورودا الصواريخ دى مخصوص للفرقعه تحت رجلى
:)
انا اللى فخورة جدا بيكى وسعيدة اوى اوى بمعرفتك يا احلى الناس
كل سنة وانتى بالف خير
‏قال Desert cat
راعى الناقه
المجتمعات العربية فازت وبجدارة فى تجميع كل ماهو سيئ فى جميع المظاهر
كل سنة وحضرتك طيب وبالف خير
‏قال عُمر
كل سنة وانتي طيبة

متشكر على التهنئة

وأتمنى تكوني بخير

عمر
‏قال Desert cat
عمر
وانت طيب عمر
عيد سعيد يا فندم
‏قال عزيز عيني
كل سنه وانتي طيبه فكرتيني ده انا كنت مهووس بُمب وانا صغير
‏قال Desert cat
عزيز عينى
كل سنة وانت طيب وبالف خير
الحمد لله انك كبرت يا احمد علشان هوسه البمب دى ترولح لحالها
الله يرحم الضحايا
:)
عيد سعيد يا باشا
‏قال محمد صالح
كل سنه وانتو طيبين
العيد فرحه مااااااااااء
ربنا يخلى العيد دا علينا سعيد
ومنشعرش فيه باى وحده يارب
تحياتى
‏قال Desert cat
عيد سعيد
كل سنة وانت طيب
عيد سعيد
‏قال الدرعمي
السلام عليكم ورحمة الله

كل سنة وأنتِ طيبة

يا قطتي الجميلة

أيتها الصديقة العزيزة

لك مني في هذا العيد

أخلص الأمنيات

بالتوفيق والنجاح

والسعادة والحب

عيد سعيد


آدم
‏قال أنا حر
كل سنة وانت طيبة
انا مش بخرج على فكرة في العيد يعني بفضل في بيتنا علشان مااتخنقش من اللي بشوفه
عيد سعيد
تحياتي
‏قال غير معرف…
قطقوطتنا العسل

كل سنه و انتي طيبه ياجميله و عيد سعيد ليكي و لكل أسرتك و يارب دايما بخير

شوفي ياقمر المظاهر اللي بتتكلمي عنها بقت خلاص سمه من سمات العيد عندنا في مصر

اكتر حاجه بتنرفزني موضوع المفرقعات دي و المصيبه ياقطه ان كل سنه بيتفننوا في حاجات جديده تفرقع اكتر من السنه اللي قبلها و لا لما الواحد يكون نايم و يصحي من احلاها نومه علي حاجه بتفرقع منتهي الاستفزاز و قله الأدب تحسي انها قنابل كأننا خلاص حنحارب
طبعا الشبان الصايعه اللي علي النواصي حدث و لا حرج ياقطتنا
واحد زميلي كنت بتكلم معاه و هو ايحه حبتين و بيموت علي القرض فبسأله بحسن نيه بتروح انهو كافيهات ؟فقاللي لأ انا بلم صحابي و نقعد علي الناصيه و طبعا ماسألتهوش بيعمل ايه علي الناصيه اكيد مفهومه
بس بجد الشباب اللي بيقعدوا علي النواضي دول و يعاكسوا خلق الله و بعد كده يقولوا ان البنات هي اللي عايزه تتعاكس بجد حاجه قله ادب و مايصحش
كل سنه و انتي بخير ياقمرايه و دايما بعيده عن اي واغش و اي مضايقه
‏قال Desert cat
ADAM
عليكم السلام ورحمة الله وبركاته
كل سنة وات طيب آدم
عيد سعيد عليك ان شاء الله
‏قال Desert cat
أنا حر
العزيز احمد
كل سنة وانت طيب
طبعا عدم خروجك فى العيد ريحك من حاجات كتير اولهم زحمة الشوارع
عيد سعيد
‏قال Desert cat
اجندا حمرا
صديقتى الجملة ارق اجندة كل سنة وانتى بالف خير يا جميلة
بالنسبة لمظاهر العيد والشباب اللى بيتصدر الطرقات والنواصى فدى بتكون ناس مش سمعت عن كلمة اسمها تربية
لانك مستحيل تلاقى ابن ناس ومتربى وماشى يقل ادبه على حد
ربنا يكفينا شرهم
كل سنة وانتى بالف خير
نورتينى يا جميله
‏قال سمر الشافعى
ههههههههههههههه
ههههههههههه
هههههههههههه

اه يانا موتينى من الضحك بسعد نبيهه دا انا كنت فاكره انى لوحدى اللى كان سمعى تقيل

لسه فاهماها السنه اللى فاتت كنت اقعد اقول هيا مين نبيهه ومين سعد وازاى بيخلوها ذكرى جميله دول ههههههههههه

اه والله العظيم كانت الجمله دى بستفزنى بس كنت بتكسف اسال ليقولو عليا عبيطه

كل سنه وانتى طيبه ياقمر وابقى سلكى ودانك بعد كدا
‏قال Desert cat
سمر الشافعى
ااااه سعد نبيهه ده شكله كان محير جيل باكمله
عموما الحمد لله ان الطلاسم اتفكت وسمعنها صح
بس تصدقى يا سمورة انى لحد دلوقتى بنطقها برضه سعد نبيهه
وبقول لنفسى واحده واحده هتعود على النطق الصح
كل سنة وانتى طيبة يا جميل
عيد سعيد
‏قال Yasmine
اولا كل سنة و انتى بالف خير يا رب
بالنسبة لبتوع النواصى فهم شدوا الرحال بعد فطار اخر يوم رمضان و الحمد لله شايفين شغلهم الله ينور

الصواريخ انا كمان بكرهها من صغري و الغريب انى عمرى ما عرفت افرقع اى حاجة حتى البمب فشلت فيه:D
الجبن سيد الاخلاق فى المواقف اللى زى دى

اغنية صفاء ابو السعود دى انا مش بحس بالعيد غير لما اسمعها مش عارفة ليه

كل سنة و انتى طيبة:)
‏قال micheal
ههههههههههههههه..ده أنا كنت فاكر نفسي الوحيد اللي بسمعها سعد نبيها
:)
فعلا التحرش والبمب أصبحوا من أبرز السلبيات لدرجة أن الواحد بيتكسف دلوقتي يقفول أن ساكن في وسط البلد بعد فضيحة دينا وسعد
:)
تحياتي
‏قال tamer.sala7
كل سنة وانتي طيبة
وانشاء الله السنة الجاية نأكل الكحك في بيتك
‏قال Desert cat
banouta masreya
كل سنة وانتى طيبة بوالف خير
لو الاخوة المتحرشين يخلصوا فى اى عمل فى الحياة حتى لو غسل وشهم الصبح زى اخلاصهم المستميت فى المعاكسة والتحرش كان زمانا من تعداد الدول المتقدمة
اغنية اهلا بالعيد بالفعل بتدى العيد بهجة
عيد سعيد عليكى
‏قال Desert cat
micheal
مش قولت انا سعد نبيهه دى شكلها مشكلة جيل باكمله
ههههههههه
كل سنة وانت طيب
‏قال Desert cat
tamer.sala7
ولك بالمثل يا تامر
كل سنة وانت طيب
‏قال سنووايت
كل سنة وانتي طيبة يا حنون
انا جيت من غير صواريخ علشان شكلك مش بتحبيها كنت ناوية الغملك المدونة :)

رغم ان اغنية اهلا بالعيد دي لما باسمعها فعلا باحس بيه بس مش عارفة السنة دي العيد غريب

وانا بضم صوتي لصوتك ويا ريت محدش يخرج في العيد من بيتهم علشان الاشكال الضالة اللي بتبقي موجودة

كل سنة وانتي طيبة
‏قال Desert cat
سنووايت
كل سنة وانتى طيبة يا سنو
ويارب عيد سعيد عليكى
وربنا يبعد عننا جميعا الاشكال الضاله دى
محبتى يا قمراية
‏قال Desert cat
اشكرك جدا على كلماتك وان شاء الله اقرأ القصيدة
كل سنة وحضرتك بخير
‏قال فى القلب
كل سنه و أنتى طيبه
و أن شاء الله عيد سعيد عليكى بدون أى مضايقات
‏قال Desert cat
فى القلب
وانتى طيبة يا جميل وبالف خير
عيد سعيد
‏قال almasry
تعرفى انك جريئه بس واقعيه جدا

وانا شخصيا معجب بيكى علشان كده الواقعيه


وكما يقولون الغايه تبرر الوسيله


تحــــــــياتى
المصــــــــــــــرى
‏قال Desert cat
almasry
ميرسى جدامصرى على كلامك
كل سنة وانت طيب
‏قال tarek alghnam
كل عام وانتى بخير
كل عام وانتى متألقه
اعاد الله العيد عليكى بأعياد دائمه
تقبلى تحياتى
ودمتى بود
‏قال Desert cat
tarek alghnam
ميرسى جدا لحضرتك استاذ طارق
كل سنة وانت واسرتك وكل محبيك بالف خير
عيد سعيد
‏قال romansy
كل سنه وانتى طيبه
عيد سعيد عليكى وعلينا
وعلى امه المسلمين جميعا
وربنا يعينا بقى
‏قال Zika
كل سنه وانتي طيبه يا قطة وعيد سعيد عليكي
معرفش ليه يا قطه حاسس ان حوار التحرش ده بقي زي الميه والهوا في حياتنا
حتي ولو مش بالايد بيبقي بالكلام
ربنا يشفي
....
تعرفي انا مش بحس ان العيد جه غير لما اسمع الاغنيه بتاعة صفاء ابو السعود
ووالله طول عمري فاكر زيك بالظبط
سعد نبيهه
وكنت متعقد من الاغنيه لحد ما الوحي نزل من حوالي سنه ونص او سنتين ... اه والله...
وعرفت انها بتقول
سعدنا بيها
يا سلام
اغنيه حلوه اوي
اه بما اني بقالي شهر كامل مادخلتش عنك
احب احييك يعي زوقك في اختيار المزيكا اللي شغاله عندك في البلوج
بجد حلوه
انا كنت سمعتها قبل كده بس ماكنتش اعرف بتاعة مين
واديني عرفت
ياللا عيد سعيد
وكل سنه وانتي طيبه
‏قال Unknown
كل سنة و انتى طيبة يا قطة لونها جاية متاخر وعلش اعذرينى

انا ريحت نفسى بصراحة السنة و قلت مش حخرج
غير انى بصراحة ما بقتش اعرف اصلى جماعة خالص فى الجامع بسبب الى بيعملوه الستات و عيالهم جوه ما بعرفش اركز و لا ادعى خالص

قلت كده ثواب الصلاة رايح رايح
اصلى فى البيت اخد الثواب مضمون احسن و ربنا يسامحنى لانه عارف سبب تقصيرى فى صلاة الجماعة

بس غريبة حكاية الشباب الى بيلموا بعضهم دول انا ما شفتش الموضوع ده قبل كده و بعدين بيعاكسوا على ايه البنات بتبقى رايحة تصلى العيد بالعبايات و الاسدالات
و بعد كده يقولك برده اللبس هو السبب

ربنا يهدى
‏قال Tarkieb
كل سنة وانت طيبة يا قطة وتخربشي وتتنونو بتوع السلطةوببعد عنك عسكر النقطة وتبقى مدونتك حاجة لقطة
‏قال PrInCeSS BeRy
قطتىىىىىىى ازيك يا قلبى كل سنة وانتى طيبة وعيد سعيد عليكى يارب وحشتينى كتيييييييييييير
‏قال Desert cat
romansy
وانت طيب رومانسى
كل عام وانت بالف خير
‏قال Desert cat
Zika
اهلا يا زيكا كل سنة وانت طيب وبالف خير
عيد سعيد
احنا كدا نبعت فاكس لصفاء تعمل حلقات متتاليه لتوضيح الكلمة والتفريق بين سعدنا بيها وسعد نبيهه اصل الموضوع شكله منتشر
عيد سعيد يا فندم
‏قال Desert cat
عاليا حليم
كل سنة وانتى طيبة عاليا وبالف خير
مفيش تاخير ولا حاجه يا جميل انتى تشرفى
اما المتحرشين مش بيرفق معاهم لبس البنت ولكى ان تطالعى استطلاعات الراى التى تحدث عن هذا الامر لتعلمى كم عدد المتحرش بهم من المحجبات
تحياتى
‏قال Desert cat
Tarkieb
كل سنة وانت طيب
شرفتنى جدا
‏قال Desert cat
PrInCeSS BeRy
كل سنة وانتى طيبة يا جميله وبالف خير
انتى كمان وحشتينى جدا
ايه اخباراتك
واخبار ست الحبياب
سلامى ليها
عيد سعيد عليكى وعلى اسرتك
‏قال غير معرف…
كل سنة وانتي طيبة

egyyemen@hotmail.com
‏قال غير معرف…
What if there was a way to get thousands of visitors a day to your catofdesert.blogspot.ca website and make $144,000 in one month
with:

* No prior experience
* No SEO or tech experience
* No selling or cold calling
* No substantial investments in advertising or marketing

Sounds crazy, but it's true, and here's proof:

http://auto-traffic-avalanche.com/download.html

I don't know how long this system is going to be up, but you
owe it to yourself to check it out...

http://auto-traffic-avalanche.com/download.html

It will just take a minute, and it could change your life
for the better!

http://auto-traffic-avalanche.com/download.html

Best Regards,
Your old friend Elizabeth

المشاركات الشائعة