اين تذهب هذا العيد ؟؟؟؟؟

انتهى شهر رمضان وبعد ساعات صلاة العيد .. انا شخصيا بحب احضرها جدا واقعد اصور فى الناس وهما يبصوا لى ويستغربوا بتصورنا ليه دى .. وناس تدينى ضهرها وناس تبصلى وتبتسم وكل سنة اقول انا هبقى استنى اخر واحده واخرج او اول ما الامام يخلص اخد الشوز فى ايدى واجرى على الشارع اول واحدة .. لكن فى كل مرة المحاولات تبوء بالفشل .. واخرج بين الجمع اللى بيدهوسونى تحت رجليهم وانا اصلا قصيرة يعنى كدا كدا رايحه فى الرجلين .. ما قولنا الصبر حلو بس هنجيب منين الاستاذ صابر يصبرنا ...

حاجات بتضايقنى فى العيد ..


الشباب اللى بيشدوا الرحال من الصبح ويقسموا نفسهم على النواصى وفى منتصف الطرقات وصفافيح الزباله .. علشان اى واحدة معدية اهو ان مش طال يمسك كم التيشرت يرمى كلمه زبالة زي البيئة اللى هو متربى فيها .. البنات ياخدوا بالهم كويس واللى تخرج .. تخرج مع اهلها او فى شنطتها مطوة علشان تضمن انها ترجع بيتها بسلام .. لم ولن يخرج من الاذهان تحرشات العيد وكل سنة وسعد ودينا طيبين

الحاجه التانية .. انى اكون ماشية والاقى حد بيفرقع صواريخ تحت رجلى باقف اتنطط وساعتها بتحول لدراكولا وبيبقى نفسى امسك اللى عمل كدا علشان اشرب من دمه .. لكن فى كل مرة بيعملها ويتبخر ... اخر مرة شهدت هذا الموقف البشع اول يوم فى رمضان واقفه باتكلم فى الموبايل عدى من قدامى ولدين اخرهم 10 سنين بالكتير ووقفوا يتكلموا شوية انا مش مركزة معاهم وبعدين دول اطفال مش فى نيتى اى سوء يعنى... بعد دقيقتين مشيو .. مفيش ثوانى والاقى صاروح مفرقع تحت رجلى رقعت بالصوت الحيانى اللى وقف يتفرج واللى قالى مين اللى عمل كدا .. وانا ايه عرفنى يا ضنايا ؟؟؟ اللى بيكلمنى طبعا اتخض قولت له الحرب العالمية التالتة قامت تحت رجلى قعد يضحك قفلت السكه فى وشه ..

من شوية سمعت اغنية اهلا بالعيد لسيدة الشاشه البرونزية صفاء ابو السعود ... حسيت الحقيقة انى رجعت طفلة من تانى مش عارفه ليه دايما عندى احساس انى مش بكبر خالص .. مع انى بلغت من العمر ارذله ... فضلت اقول معاها اهلا اهلا بالعيد مرحب مرحب بالعيد .. ولسه واخده بالى النهارده بس بعد العمر ده كله انها بتقول سعدنا بيها بيخليها ذكرى جميله لبعد العيد .. انا طول عمرى بقولها سعد نبيهه .. واقعد طول السنة افكر مين سعد نبيهه ده يا جدعان اللى دائما يخلينا نتذكر فرحة العيد .. يا بخته الحاجه صفاء بتغنى له كل سنة

الكحك يا جماعه اعملوا حساب ان المعدة لسه ما اخدتش على الاكل الكتير .. وانها اتنظمت لمدة 30 يوم على وجبه وليها وقت معين .. يعنى الحذر ثم الحذر ثم الحذر وإلا بدال ما نسمع عن شهداء طوابير العيش هنسمع عن شهداء طوابير التواليت


وكل سنة والجميع بالف خير
عيد سعيد

Comments

mido said…
عيد سعيد
وكل سنة وانت طيبة

مع انى بلغت من العمر ارذله

:)
A m R said…
و سعدنا بيها ... بيخليها .... ذكرى جميلة لبعد العيد .... و غنوا معانا غنو (( غنواا )) قولوا ورايا ....


كملي انتي بقى .... و كل سنة و انتي طيبة .... و لو عنك اقتراحات على خروجة العيد -- غير الامريكين والنبي -- سمعينا رايك

و خللي بالك من الصواريــــــــخ

و كل سنة و انتي طيبة يا قطقوطة
صفا said…
كل سنه وانتى طيبه يا جميل
:)
كووووول سنة وانتي طيبة وربنا يبعد عنك العيال الرزلة كلها
:D
MaGn0liA... said…
كل سنه و انتى طيبه يا قطه

و ربنا يجعل كل عيد اسعد من اللى قبله
كل سنة و انتى طيبة
:)
الازهرى said…
قطة الصحراء

شر البلية ما يضحك ولذلك فقد ضحكت كثيرا لما حدث لك
نصيحتى كونى مثلى لا اخرج من المنزل الا لمحيط قريب للغاية فى اول يوم وبعدها تبدأ الزيارات البعيدة
فى اليوم الثانى او الثالث حسب المزاج

كما ان الرجزع الى الطفولة هو افضل احساس ممكن حيث لا تفكير سوى فى اللعب ثم اللعب ثم اللعب هذا بالاضافة الى العيديات التى كنا نأخذها واصبحنا الان نعطيها

تحياتى وكل سنة وانت طيبة
وادعوا لك بالاستمتاع بالعيد
ابو احمد said…
كل سنه وإنتى طيبه وبخير وصحه وسعاده
والله انا سعيد جدا بكل خواطرك التى تخص العيد .. ولكن ازعجنى جدا ما فعله معك الاولاد الاشقياء فى رمضان ؟ بصراحة مقلب مش ظريف ؟؟ معلش شغل عيال وقلة تربية!! عموما عبد مبارك علينا وعليك
وبخصوص الكحك والحاجات دى ربنا يقدرنا على مقاومة هذا الاغراء
ضد الظلم said…
يعنى كل بنات بنات
مهو احنا بردو بندايق وبيتغلس علينا بردو ( واحد فرفور ) كل عام وانتم بخير
تحياتى
ابوالعربى
عارفه هروح فين
من غير ما تتخيلى فى جزيره القطن ؟
قريبه جدا منى
كل سنه وانتى طيبه
FaceMoon said…
كلة كوم والصواريخ كوم جيتى على الجرح يااحلى قطة
كل سنة وانت طيبة
Heart Beat said…
الصديقة العزيزة جدا على قلبي

Desert Cat

كل سنة و انتي طيبة

و خلي بالك من اطفال الصواريخ احسن دي بتكون هواية عندهم عشان كده يتفننوا في الايقاع بالضحايا و يضحكوا عليهم اما يتخضوا

كنت لسه بقول لاجندا عن مظاهر العيد هنا

ان الحكاية مش بمب و صواريخ و كده لا الموضوع اكبر بكتير

هنا تلاقي الاطفال و الشباب يستخدموا انواع من الالعاب النارية اللي تخلي السما تنور بالليل و كأننا الساعة 12 الظهر

مع سماع فرقعة و كأنها قنابل مدوية ثم ظهور تشكيلات ملونة

بعد بقى اما تتخضي من الضوء الغريب اللي ظهر في السما بالليل ده و تساورك الشكوك و الهواجس ... تسمعي ساعتها صوت قنبلة و تظهر التشكيلات النارية في السما اعلان بأن اللي حصل ده هو من احد الالعاب النارية بس الكبيرة الشوية

كل سنة و انتي طيبة

و في جملة معايدة دائما ما تقال في المناسبات اللي زي دي .... لكنها مؤخرا اصبحت تقال للدلالة على التريقة او عشان تغيظي الشخص اللي اودامك

تقولي

عيد

""" مبارك """
mostafa rayan said…
عندك حق المفروض ان رمضان يكون له اثر في اخلاقنا وتصرفتنا ونخرج منه واحنا احسن لكن للأسف احنا عندنا فصل شنيع بين العبادة والمعاملة رغم انه بنص حديث الرسول الكريم صلي الله عليه وسلم الدين المعاملة
كل سنةوانت طيبة يا حنان وجعل الله ايامك كلها اعياد
كل سنة وانتي طيبة ياقطة وعيد سعيد يارب ودايما متهنية ومبسوطة وتحققي كل ماتتمنيه
عيد سعيد
تقبل الله منا ومنكم وكل عام وانتم بخير
تقبل الله منا ومنكم وكل عام وانتم بخير
وانتى طيبة ياحنان

وانا على فكرة زيك فى حكاية سعد نبيهة ولسة مكتشف الحقيقة السنة اللى قبل اللى فاتت
كل سنه وانت طيبه يا جميله البوست حلو جدا جدا وحقيقي جدا جدا يا اجمل قطه في الدنيا ....
موضوع الصاروخ موتني من الضحك .
والسؤال " الهدف ايه من استيراد كل كميه الصورايخ والبمب ديه رغم الاف الحوادث ؟؟"
انا فخوره بيكي جدا جدا يا قطه يا جميله
.

اميره جمال
اجمل ما في العيد حب الناس لبعضها
المفرقعات والمعاكسات من الظواهر المزعجه في العيد في المجتمعات العربيه
وكل عام وانتم بخير
Desert cat said…
mido
وانت طيب يا ميدو
معلشى بقى حكم السن
:)
Desert cat said…
A m R
وانت طيب عمرو
وربنا يستر فى الصواريخ دى
Desert cat said…
صفا
وانتى طيبة يا جميل
عيد سعيد
Desert cat said…
آلام وآمال
وانت طيب يا محمود
ربنا يتقبل دعائك
Desert cat said…
MaGn0liA...
وانتى طيبة يا جميل
وربنا يجعل ايام الجميع سعيدة
Desert cat said…
مهيج الجماهير
وانت طيب
:)
Desert cat said…
الازهرى
كل سنة وحضرتك بالف خير
وربنا يبعد عننا شياطين الانس
سواء اللى بيضربوا صواريخ او اللى بيتحرشوا
تحياتى لحضرتك
Desert cat said…
ابو احمد
دكتورنا الجميل
كل سنة وحضرتك طيب وبالف خير
عيد سعيد
Desert cat said…
وميض ابتسامة
بصراحة المقلب كان صعب تخيله
بس الحمد لله
ربنا يجعلها اخر الصواريخ اللهم امين
كل سنة وحضرتك طيب وبالف خير
عيد سعيد
Desert cat said…
ضد الظلم
انتوا بس سيبوا البنات فى حالها وانتوا تحسوا بسعاده
:)
كل سنة وانت طيب
Desert cat said…
صوت من مصر
مكان لذيذ انا شايفه تقضى فيه 3 او 4 ايام
كل سنة وانت طيب
Desert cat said…
FaceMoon
ربنا يبعد عنك كل الجروح ويبعد عننا جميعا الصواريخ
كل سنة وانتى طيبة
Desert cat said…
Dear Heart Beat
صديقتى الغالية ارق دقة قلب
كل سنة وانتى طيبة وبالف خير
وربنا يستر من اطفال الصواريخ
طبعا الالعاب النارية كلها مخاطر بخلاف اصواتها العاليه المسببة للازعاج
المفروض يكون فى قانون رادع للتفاهات دى الاحتفال بالعيد مش بالعاب نارية وتسبب فى اذى الاخرين
كل سنة وانتى بالف خير
عيد سعيد يا جميله
Desert cat said…
mostafa rayan
بالظبط مصطفى
الرسول قال الدين المعاملة
والناس بعدت عن الاخلاق وحسن المعامله
كل سنة وانت بالف خير
عيد سعيد
Desert cat said…
بنات صاحبة الجلالة
كل سنة وبنات صاحبة الجلالة طيبين وبالف خير
عيد سعيد
Desert cat said…
م/ الحسيني لزومي
اللهم آمين
كل سنة وحضرتك طيب
Desert cat said…
طالب ثانوى
ده سعد نبيهه شكله محير الكون
بس الحمد لله اننا اكتشفنا الصح بدل ما كنا فضلنا ظالمين الراجل
:)
كل سنة وانت طيب عيد سعيد
Desert cat said…
واحده من أصحاب القمر
كل سنة وانتى واسرتك بالف خير يا اميرة الكون
اعمل ايه بس يا حبيبتى تقريبا بيستورودا الصواريخ دى مخصوص للفرقعه تحت رجلى
:)
انا اللى فخورة جدا بيكى وسعيدة اوى اوى بمعرفتك يا احلى الناس
كل سنة وانتى بالف خير
Desert cat said…
راعى الناقه
المجتمعات العربية فازت وبجدارة فى تجميع كل ماهو سيئ فى جميع المظاهر
كل سنة وحضرتك طيب وبالف خير
عمر said…
كل سنة وانتي طيبة

متشكر على التهنئة

وأتمنى تكوني بخير

عمر
Desert cat said…
عمر
وانت طيب عمر
عيد سعيد يا فندم
كل سنه وانتي طيبه فكرتيني ده انا كنت مهووس بُمب وانا صغير
Desert cat said…
عزيز عينى
كل سنة وانت طيب وبالف خير
الحمد لله انك كبرت يا احمد علشان هوسه البمب دى ترولح لحالها
الله يرحم الضحايا
:)
عيد سعيد يا باشا
كل سنه وانتو طيبين
العيد فرحه مااااااااااء
ربنا يخلى العيد دا علينا سعيد
ومنشعرش فيه باى وحده يارب
تحياتى
Desert cat said…
عيد سعيد
كل سنة وانت طيب
عيد سعيد
ADAM said…
السلام عليكم ورحمة الله

كل سنة وأنتِ طيبة

يا قطتي الجميلة

أيتها الصديقة العزيزة

لك مني في هذا العيد

أخلص الأمنيات

بالتوفيق والنجاح

والسعادة والحب

عيد سعيد


آدم
أنا حر said…
كل سنة وانت طيبة
انا مش بخرج على فكرة في العيد يعني بفضل في بيتنا علشان مااتخنقش من اللي بشوفه
عيد سعيد
تحياتي
قطقوطتنا العسل

كل سنه و انتي طيبه ياجميله و عيد سعيد ليكي و لكل أسرتك و يارب دايما بخير

شوفي ياقمر المظاهر اللي بتتكلمي عنها بقت خلاص سمه من سمات العيد عندنا في مصر

اكتر حاجه بتنرفزني موضوع المفرقعات دي و المصيبه ياقطه ان كل سنه بيتفننوا في حاجات جديده تفرقع اكتر من السنه اللي قبلها و لا لما الواحد يكون نايم و يصحي من احلاها نومه علي حاجه بتفرقع منتهي الاستفزاز و قله الأدب تحسي انها قنابل كأننا خلاص حنحارب
طبعا الشبان الصايعه اللي علي النواصي حدث و لا حرج ياقطتنا
واحد زميلي كنت بتكلم معاه و هو ايحه حبتين و بيموت علي القرض فبسأله بحسن نيه بتروح انهو كافيهات ؟فقاللي لأ انا بلم صحابي و نقعد علي الناصيه و طبعا ماسألتهوش بيعمل ايه علي الناصيه اكيد مفهومه
بس بجد الشباب اللي بيقعدوا علي النواضي دول و يعاكسوا خلق الله و بعد كده يقولوا ان البنات هي اللي عايزه تتعاكس بجد حاجه قله ادب و مايصحش
كل سنه و انتي بخير ياقمرايه و دايما بعيده عن اي واغش و اي مضايقه
Desert cat said…
ADAM
عليكم السلام ورحمة الله وبركاته
كل سنة وات طيب آدم
عيد سعيد عليك ان شاء الله
Desert cat said…
أنا حر
العزيز احمد
كل سنة وانت طيب
طبعا عدم خروجك فى العيد ريحك من حاجات كتير اولهم زحمة الشوارع
عيد سعيد
Desert cat said…
اجندا حمرا
صديقتى الجملة ارق اجندة كل سنة وانتى بالف خير يا جميلة
بالنسبة لمظاهر العيد والشباب اللى بيتصدر الطرقات والنواصى فدى بتكون ناس مش سمعت عن كلمة اسمها تربية
لانك مستحيل تلاقى ابن ناس ومتربى وماشى يقل ادبه على حد
ربنا يكفينا شرهم
كل سنة وانتى بالف خير
نورتينى يا جميله
ههههههههههههههه
ههههههههههه
هههههههههههه

اه يانا موتينى من الضحك بسعد نبيهه دا انا كنت فاكره انى لوحدى اللى كان سمعى تقيل

لسه فاهماها السنه اللى فاتت كنت اقعد اقول هيا مين نبيهه ومين سعد وازاى بيخلوها ذكرى جميله دول ههههههههههه

اه والله العظيم كانت الجمله دى بستفزنى بس كنت بتكسف اسال ليقولو عليا عبيطه

كل سنه وانتى طيبه ياقمر وابقى سلكى ودانك بعد كدا
Desert cat said…
سمر الشافعى
ااااه سعد نبيهه ده شكله كان محير جيل باكمله
عموما الحمد لله ان الطلاسم اتفكت وسمعنها صح
بس تصدقى يا سمورة انى لحد دلوقتى بنطقها برضه سعد نبيهه
وبقول لنفسى واحده واحده هتعود على النطق الصح
كل سنة وانتى طيبة يا جميل
عيد سعيد
banouta masreya said…
اولا كل سنة و انتى بالف خير يا رب
بالنسبة لبتوع النواصى فهم شدوا الرحال بعد فطار اخر يوم رمضان و الحمد لله شايفين شغلهم الله ينور

الصواريخ انا كمان بكرهها من صغري و الغريب انى عمرى ما عرفت افرقع اى حاجة حتى البمب فشلت فيه:D
الجبن سيد الاخلاق فى المواقف اللى زى دى

اغنية صفاء ابو السعود دى انا مش بحس بالعيد غير لما اسمعها مش عارفة ليه

كل سنة و انتى طيبة:)
micheal said…
ههههههههههههههه..ده أنا كنت فاكر نفسي الوحيد اللي بسمعها سعد نبيها
:)
فعلا التحرش والبمب أصبحوا من أبرز السلبيات لدرجة أن الواحد بيتكسف دلوقتي يقفول أن ساكن في وسط البلد بعد فضيحة دينا وسعد
:)
تحياتي
tamer.sala7 said…
كل سنة وانتي طيبة
وانشاء الله السنة الجاية نأكل الكحك في بيتك
Desert cat said…
banouta masreya
كل سنة وانتى طيبة بوالف خير
لو الاخوة المتحرشين يخلصوا فى اى عمل فى الحياة حتى لو غسل وشهم الصبح زى اخلاصهم المستميت فى المعاكسة والتحرش كان زمانا من تعداد الدول المتقدمة
اغنية اهلا بالعيد بالفعل بتدى العيد بهجة
عيد سعيد عليكى
Desert cat said…
micheal
مش قولت انا سعد نبيهه دى شكلها مشكلة جيل باكمله
ههههههههه
كل سنة وانت طيب
Desert cat said…
tamer.sala7
ولك بالمثل يا تامر
كل سنة وانت طيب
سنووايت said…
كل سنة وانتي طيبة يا حنون
انا جيت من غير صواريخ علشان شكلك مش بتحبيها كنت ناوية الغملك المدونة :)

رغم ان اغنية اهلا بالعيد دي لما باسمعها فعلا باحس بيه بس مش عارفة السنة دي العيد غريب

وانا بضم صوتي لصوتك ويا ريت محدش يخرج في العيد من بيتهم علشان الاشكال الضالة اللي بتبقي موجودة

كل سنة وانتي طيبة
Desert cat said…
سنووايت
كل سنة وانتى طيبة يا سنو
ويارب عيد سعيد عليكى
وربنا يبعد عننا جميعا الاشكال الضاله دى
محبتى يا قمراية
السلام عليكم
إن سبقتنى فأنتى الكريمة إبنة الكرام

و إن سبقتكى فلأنكى تستحقين الإحترام

نحن لا نرسل لمن يعيشون معنا

ولكن نرسل لمن لا نستطيع العيش بدون تواصلهم و صداقتهم

أتمنى و أدعو الله عز وجل أن يجعل أيامكى سعادة و صمتكى عبادة و خاتمتكى شهادة و يؤتيكى الحسنى و زيادة

كم أفتقدكى أختاه و جميع من أتواصل معهم فى ظل صداقة قوية و إحترام متبادل
ولكن و الحق يقال أننى لم أستطع أن أستمتع بالعيد و فرحته..
لأسباب ذكرتها فى قصيدتى الجديدة..

أتمنى أن تقرئيها

كل عام و أنتى بكل خير
Desert cat said…
اشكرك جدا على كلماتك وان شاء الله اقرأ القصيدة
كل سنة وحضرتك بخير
فى القلب said…
كل سنه و أنتى طيبه
و أن شاء الله عيد سعيد عليكى بدون أى مضايقات
Desert cat said…
فى القلب
وانتى طيبة يا جميل وبالف خير
عيد سعيد
almasry said…
تعرفى انك جريئه بس واقعيه جدا

وانا شخصيا معجب بيكى علشان كده الواقعيه


وكما يقولون الغايه تبرر الوسيله


تحــــــــياتى
المصــــــــــــــرى
Desert cat said…
almasry
ميرسى جدامصرى على كلامك
كل سنة وانت طيب
tarek alghnam said…
كل عام وانتى بخير
كل عام وانتى متألقه
اعاد الله العيد عليكى بأعياد دائمه
تقبلى تحياتى
ودمتى بود
Desert cat said…
tarek alghnam
ميرسى جدا لحضرتك استاذ طارق
كل سنة وانت واسرتك وكل محبيك بالف خير
عيد سعيد
romansy said…
كل سنه وانتى طيبه
عيد سعيد عليكى وعلينا
وعلى امه المسلمين جميعا
وربنا يعينا بقى
Zika said…
كل سنه وانتي طيبه يا قطة وعيد سعيد عليكي
معرفش ليه يا قطه حاسس ان حوار التحرش ده بقي زي الميه والهوا في حياتنا
حتي ولو مش بالايد بيبقي بالكلام
ربنا يشفي
....
تعرفي انا مش بحس ان العيد جه غير لما اسمع الاغنيه بتاعة صفاء ابو السعود
ووالله طول عمري فاكر زيك بالظبط
سعد نبيهه
وكنت متعقد من الاغنيه لحد ما الوحي نزل من حوالي سنه ونص او سنتين ... اه والله...
وعرفت انها بتقول
سعدنا بيها
يا سلام
اغنيه حلوه اوي
اه بما اني بقالي شهر كامل مادخلتش عنك
احب احييك يعي زوقك في اختيار المزيكا اللي شغاله عندك في البلوج
بجد حلوه
انا كنت سمعتها قبل كده بس ماكنتش اعرف بتاعة مين
واديني عرفت
ياللا عيد سعيد
وكل سنه وانتي طيبه
كل سنة و انتى طيبة يا قطة لونها جاية متاخر وعلش اعذرينى

انا ريحت نفسى بصراحة السنة و قلت مش حخرج
غير انى بصراحة ما بقتش اعرف اصلى جماعة خالص فى الجامع بسبب الى بيعملوه الستات و عيالهم جوه ما بعرفش اركز و لا ادعى خالص

قلت كده ثواب الصلاة رايح رايح
اصلى فى البيت اخد الثواب مضمون احسن و ربنا يسامحنى لانه عارف سبب تقصيرى فى صلاة الجماعة

بس غريبة حكاية الشباب الى بيلموا بعضهم دول انا ما شفتش الموضوع ده قبل كده و بعدين بيعاكسوا على ايه البنات بتبقى رايحة تصلى العيد بالعبايات و الاسدالات
و بعد كده يقولك برده اللبس هو السبب

ربنا يهدى
Tarkieb said…
كل سنة وانت طيبة يا قطة وتخربشي وتتنونو بتوع السلطةوببعد عنك عسكر النقطة وتبقى مدونتك حاجة لقطة
PrInCeSS BeRy said…
قطتىىىىىىى ازيك يا قلبى كل سنة وانتى طيبة وعيد سعيد عليكى يارب وحشتينى كتيييييييييييير
Desert cat said…
romansy
وانت طيب رومانسى
كل عام وانت بالف خير
Desert cat said…
Zika
اهلا يا زيكا كل سنة وانت طيب وبالف خير
عيد سعيد
احنا كدا نبعت فاكس لصفاء تعمل حلقات متتاليه لتوضيح الكلمة والتفريق بين سعدنا بيها وسعد نبيهه اصل الموضوع شكله منتشر
عيد سعيد يا فندم
Desert cat said…
عاليا حليم
كل سنة وانتى طيبة عاليا وبالف خير
مفيش تاخير ولا حاجه يا جميل انتى تشرفى
اما المتحرشين مش بيرفق معاهم لبس البنت ولكى ان تطالعى استطلاعات الراى التى تحدث عن هذا الامر لتعلمى كم عدد المتحرش بهم من المحجبات
تحياتى
Desert cat said…
Tarkieb
كل سنة وانت طيب
شرفتنى جدا
Desert cat said…
PrInCeSS BeRy
كل سنة وانتى طيبة يا جميله وبالف خير
انتى كمان وحشتينى جدا
ايه اخباراتك
واخبار ست الحبياب
سلامى ليها
عيد سعيد عليكى وعلى اسرتك
Anonymous said…
كل سنة وانتي طيبة

egyyemen@hotmail.com

Popular posts from this blog

قميص دهشور

كل تحرش وانتوا طيبين