مصر المحروقة

حريق بالمسرح القومى بالعتبه
شب الحريق قبل المغرب مباشرة وأسفر عن ؟؟؟؟ لاء مش قتل حد انما دمر القاعه الرئيسية بالمسرح والقبة تماما
والظريف ان بعد الحريقه مباشرة فاروق حسنى يقولك السبب ماس كهربائى .. يعنى من غير لجان فنية ولا خبراء ولا اى حد يحدد سبب الماس حدده سيادة الوزير الفنان وهو قاعد فى مكتبه وبيشرب السيجار
هو الحاج ماس ماله ماشى فى البلد كدا بالترتيب ومختار الاماكن الاثرية ليه .. مش ياخد بعضه ويتمشى ناحيه القبة يمكن يغلط ويدخل المكان إياه .. ولا ده متحصن .. قاريين عليه عدية ياسين .. يعنى ايه مجلس الشورى يتحرق وبعده بشهر مسرح جورج ابيض
يعنى ايه اثارنا تدمر بالتدريج
يعنى ايه البطل فى كل مرة من اول حريق الاوبرا مرورا بحريق المسافر خانة وصولا لحريق المسرح القومى البطل هو الماس الكهربائى
ده ايه المجرم العتيد اللى مش حد قادر يسيطر عليه من سنة 71 ده
الناس بتتعلم من اخطائها واحنا سايبين الاخطاء تولع فينا واحدة واحدة وبالتدريج
من 71 لـ 2008 الجانى واحد واحنا قاعدين نتفرج .. مش مهم والنبى مشوها ماس كهربائى
بيدمر فى اثارنا وبيولع فى البلد بالتدريج .. ما تخلصنا بقى يا حج ماس وتقضى على مصر المحروقه
تحديث تالت
رساله من احمد عبدالفتاح على الجايكو
الحريقة خلصت تم اخماده
الحريقة شغاله من 5.30 وتم اخمادها الساعه 10.30 .. حريقه عبور المسرح القومى
يا ظالمه امال لو مش كان المطافى جنبها كنتوا طفيتوها فى كام ساعه ؟؟
خط بارليف اتحطم وتم العبور فى 6 ساعات والمسرح القومى اللى جنبه المطافى يتطفى فى 5 ساعات امال لو فى الهرم كنتوا عبرتوا فى اد ايه فى 48 ساعه ؟؟؟؟؟
بالمناسبة الماس الكهربائى عامل جايزة ذهبية للى يعرف الشهر الجاى الحريقه هتكون فين ؟؟؟؟
تحديث تانى
من عزة مغازى
الامن ابتدي مصادرة الموبايلات و الكاميرات و اقتياد اصحابها للبوكسات
تحديث
رساله من عزة مغازى .. هى دلوقتى موجودة فى مكان الحدث
عاجل: الحريق يعاود الاشتعال الان في مخزن الديكور



تعليقات

‏قال micheal
اااااااااااااااه
يلعن أبو الماس الكهربائي المظلوم مع اللي خلفونا ده
زهقت يا قطتي
:)
طب ينوعوا حتي ولا هما مفترضين فينا ضفة الغباء لهذه الدرجة
:)
تحياتي
‏قال AHMED SAMIR
تقريبا كدة والله اعلم ان في روح شريرة ماشية في القاهرة شغالة حرايق على انهيارات والذي منه
ربنا يستر
تحياتي و كل سنة وانتي طيبة
‏قال غير معرف…
علم في المتبلم ياقطتنا

دول مش بيتعلموا

تصدقي ان الماس بيصعب عليا
اصله بيشيل بلاوي في الزمن ده

ياقطتنا انتي في زمن التكنولوجيا

لجان فنيه ايه و بتاع ايه اللي بتتكلمي عنها
ده يحصل الحريق من هنا و متبرمجين علي انهم يقولوا السبب من غير معاينه ولا اي حاجه

و عارفه بيقولوا ان الناس هي السبب ناس مين الله اعلم

و بخصوص القبه شوفي دي منطقه محرم علي الماس يقرب منها
انتي عارفه اذا كان الماس قوي فيه اللي اقوي منه

ربنا يرجع عزه بسلامه لبيتها

تسلمي ياقطتنا علي التغطيه
‏قال Heart Beat
صديقتي الغالية جدا على قلبي

Desert Cat

ما هو يا ماس كهربائي يا قدر احنا بقى نختار التسمية الانسب لينا و اللي غصب عننا لازم نصدقها

يعني مثلا لو حد من الشعب طالب بتشكيل لجنة تقصي حقائق تحقق في حريق مجلس الشورى و حريق المسرح القومي

هايقولوا ما احنا قولنا قدر انت هاتعترض و لا ايه

او يقولوا ماس كهربائي و يرفعوا قضية على شركة الكهرباء اللي هي بتاعة الحكومة برضه

و يفضل المسلسل كده مط و تطويل زي مسلسلات ر مضان و تيجي النهاية زي ما توقعنا من الاول

انه يبقى الحال كما هو عليه و انه ماس كهربائي
‏قال صفا سارة
هو انتى كنتى عاوزاه يستنى ليه التقرير هو قال يوفر على الناس تعبهم اللى هيكتبوا فيه التقرير ده خايف على تعبهم
‏قال Yasmine
والله خايفة بكرة الاهرامات تولع و يطلعوا يقولولنا ماس كهربائي برضه
و مش بعيد تكون لجماعات الاسلامية ورا الحادث الاليم اصلها بقت الشماعة الجديدة اللى بيداروا وراها خيبيتهم

بكرة يطلع فاروق بيه و يقولنا قضاء و قدر و حسبي الله و نعم الوكيل فالى مش بيؤمنوابالقضاء و القدر
اصلهم لما بيجيلهم مزاجهم يطلعوا تصريحات دينية بتبقى دى الموضة لفترة مش قليلة فتوقعى المزيد من الهطل الحكومى
‏قال عزيز عيني
ادعوله بطولة العمر نفسي اسمع مرة عن حريقة في قصر من قصورهم
‏قال Fantasia
قطتي الجميلة

وحشتيني ووحشتني مدونتك والفضفضة من القلب الموجوع على حال البلد
مش عارفة ليه هافف عليا حريق القاهرة.. على رأيك كلها مباني أثرية وليها قيمتها التاريخية.. هو فيه إيه بالظبط؟ أنا ابتديت أشم ريحة مش تمام

لأ وكله كوم وموضوع الماس إياه ده كوم تاني.. برضه بيفكرني بموضوع فار السبتية اللي كانوا قالوا إن هوايته ومزاج أهله إنه ياكل كابلات الكهربا.. أهو الفار اتطور وبقى ماس

يا عيني على البنية الاساسية اللي قعدنا نعمل فيها ربع قرن وحالها بالشكل ده

قلبي معاكي يا حبيبتي.. ودعائي لمصر في هذه الأيام المفترجة إن ربنا يبعد عنها ولاد الحرام
‏قال غير معرف…
ايه ده !!!

انا بجد مش فاهمه

المفروض سبب الحاجات دى ايه ؟؟؟
‏قال صوت من مصر
تصدقى كل ده من حمله توفير الطاقه
ههههههههههههه
ال ماس ال ؟
الماس ده اغلى من الدهب صح
‏قال الازهرى
صديقتى العزيزة

لم اعلم بالخبر الا من مدونتك منذ دقائق

وعندما اجريت اتصالاتى باصدقائى وعلمت حجم الكارثة لم اتمالك نفسى من لعن الجميع وهو ما لا افعله عادة
فقد اعاد الى ما حدث ذكرى ابعد حتى من حريق الاوبرا الذى ذكرتيه
انه حريق مسرح البالون
حيث احترق هو والسيرك ومسرح السامر او بيتنا كما كنا نسميه ولادهى انه عند الحريق كنا بداخله
ولك ان تتخيلى شعورنا آنذاك او الان
كما ان هناك حريق اخر لم تذكروه انه حريق بنى سوبف الذى راح ضحيته العديد من الفنانين الشرفاء الذين كانوا ينحتون فى الصخر ويعادون الجميع كى يعبروا عن قضايانا بحس فنى يعلمه كل من تعامل معهم
فالبقاء لله فى الجميع
وحسبنا الله ونعم الوكيل فى المتسبب الذى سنعرفه جميعا ان لم نكن علمناه بالفعل
ولتكن صفحة اخرى فى السجل الاسود
‏قال Unknown
لا دة مش ماس كهربى ولا حاجة دة على راى واحد صاحبى من كتر ما الناس دعوا على البلد انها تولع ربنا استجاب واهى بتولع اهى
‏قال سمراء
اللي بيولع في البلد نفس 70 مليون واحد ماشي فيها حاسس بلظلم والقهر والخوف

اشكرك
سمراء
عارفة النكتة الى تضحك وتبكى فعلا ان مطافى العتبة الشهيرة فى الجانب الآخر من المسرح المحروق .. يعنى احنا عليه العوض لو كانت الحريقة على بعد كام شارع

حداجة تكسف بجد ..وحاجة مؤسفة للغاية
وربنا يستر من مسلسل الحرائق والماس الكهربائى
الماس الكهربائى هو بطل حقيقى لأنه الوحيد فى مصر الذى ينجز أعماله بكفاءة ودون أن يملء الدنيا ضجيجاً قبل الفعل ويترك الآخرون يتكلمون عن نجاحه.
أرى أن نختاره بطلنا فى الألومبياد القادمة وأضمن لكم ميدالية ذهبية
‏قال غير معرف…
العزيزه حنان
الكل يتساءل هو فيه ايه
وتسخر وسائل العلام العالميه منا وهى تورد النبا وتشدد على نكتة الماس الكهربى
وهى تستعرض مسلسل الحرائق
والكل هنا يسال هو فيه ايه؟
ماهو السر وراء كل هذا؟
الأجابه المختصرهغير ممكنه ولذلك احوال ان اعرض فكرتى بطريقه ارجو ان اوفق فى شرحها
اشرح باقول هناك قانون فى علم الفيزياء
يقول ما معناه بدون الدخول فى تفاصيل فنيه ...يقول اذا تركت الأشياء على ماهى عليه دون تغيير
تاخذ فى التدهور بشكل تلقائى
وتتحلل
...مجتمعنا فى حالة تحلل ابرز اعراضه اللامبالاه والأهمال
وهذا هو المتهم الحقيقى
مجتمعنا يحتاج للتغيير الحقيقى والا سيستمر هذا المسلسل وتسوء الأمور اكثر
والآن لا اخشى من ذكر بعض المعلومات وقد ارجاتها للآخر حتى لا يستصعب احد الفكره من اولها وينصرف عن القراءه
هذا الذى ذكرته مع شىء كثير من التبسيط اسمه القانون الثانى فى علم او فرع الديناميكا الجراريه...من فروع الفيزياء
‏قال حزينه
تصدقى فعلا هو دة العنوان الصح

اللى المفروض يتقال على مصر دلوقتى

ربنا يستر عليكى يا مصر



حزينه
عزيزتي وصديقتي قطة الصحراء
قريبا سيتعين عليك أن تعنوني مدونتك بمدونة المصائب وتستبدلي رمز القطة بالغراب..انت أول من يعرف بهذه المصائب..
ان شاء الله يكون آخر حدث مأساوي.. ولو ان الضحية هذه المرة شخص معنوي ولا واحد سيهتم لأمره كثيرا

مودتي مثل الحرائق التي تحدث بدون ماس
‏قال غير معرف…
العزيزه حنان
استكمالا لفكرتى عن ضرورة التغيير الحقيقى والا...لابد من نفى اسطوره مغرضه نسمعها كثيرا وهى اسطورة الأستقرار...
كل شىء يؤجل لخدمة الأستقرار...وهذه الأسطوره التى يروج لها البعض تعتمد على تجاهل المنطق فى التفكير...بداية الأسقرار ليس عكس التغيير الحقيقى
عكس التغيير الحقيقى هو الجمود وليس الأستقرار
وما هو الدليل؟
لو كان الأستقرار عكس التغيير الحقيقى لكانت دول مثل بريطانيا والمانيا و الولايات المتحده دولا غير مستقره وهى التى شهدت تغييرات فى من يحكم عدة مرات فى عشر او عشرين سنه
وثانيا
الأستقرار الذى يروج له فى الدول المتخلفه يعنى غالبا استمرار من يحكم فى الحكم
والمعضله هنا اللامنطقيه هو انه بشر
اى يخضع لقوانين الفناء او الموت فى اى لحظه مثل سائر البشر
وعندها يمكن ان تنزلق البلاد الى اى احتمال
ومعنى ذلك ان مفهوم الأستقرار المعيب انما يرجأ المشكله الى حين ولا يحلها
وحسب قانون الديناميكا الحراريه الثانى ترك الأمور على ماهى عليه سيؤدى الىتحلل فى المجتمع وفى الدوله وتظهر اعراض هذا التحلل فى صور شتى منها تدهور القيم والأخلاق والأهمال والتناحر والجريمه والنصب والأحتيال والغش...ومحاولات التشبث بالماضى والهوس الدينى والجنسى كما نرى فى التحرش...الى آخر كل هذه الأمراض
‏قال غير معرف…
شهد المقر المركزي لحزب التجمع لقاء مهماً صباح الأربعاء الماضي حيث التقي قيادات حزب التجمع بوفد من حركة الاخوان المسلمين
وفي كلمتها أكدت أمينة النقاش نائب رئيس حزب التجمع أن التجمع والاخوان متفقان في الجانب المطالب بالديمقراطية ولكنهما مختلفان أشد الاختلاف في التداخل الذي تتعمده حركة الاخوان بخلط الدين والسياسة.. كما أشارت إلي أداء نواب الاخوان في البرلمان واصرارهم علي تطبيق قاعدة الحلال والحرام دون النظر إلي معايير المصلحة والجدوي والتقدم والتخلف علي كل شئون الحياة وقالت إن الدعوة لدولة دينية قسمت السودان واشعلت حروبا مذهبية في المنطقة واشارت إلي رفض نواب الاخوان لقانون الطفل وموقفهم الرافض للثقافة والفنون وحرية العقيدة
وقالت النقاش إن علي كل القوي السياسية ان تتمسك بشعار أن الدين لله والوطن للجميع وأن يكون الدستور والمواثيق الدولية لحقوق الانسان هي المرجعية الوحيدة لتلك القوي.

وهو ما اتجه اليه د. سمير فياض نائب رئيس الحزب في كلمته عندما أكد الخلط المتعمد بين المقدس وغير المقدس في أوراق الاخوان المسلمين ودعا فياض إلي فك هذا الاشتباك مشيراً إلي الفارق المهم بين الدين والسياسة.. ..
‏قال غير معرف…
اليابان جزر منعزلة حولتها "الهندسة" الي أرض متصلة ومصر أرض متصلة حولتها "السياسة" الي جزر منعزلة بعضها عبر من القرن العشرين وبعضها عبر الي القرن الأفريقي وصارت قضيتها من رأي شيعياً فليغيره بيده فان لم يستطع فيبلغ عنه... في محاورات "الضاني" التي سجلها تلميذه أفلاطون في جريدة "الجمهورية" أن الشيعي شيعي ولو استحمي كل يوم والسني سني ولو لسه قايم من النوم وقال إن السني قليل الحيلة أفضل من الشيعي طويل التيلة كفضل "دبي" علي باقي الامارات وكالفرق بين انهيار المقطم وانهيار البورصة... ونهي أبي عن لبس "الكافولة" وقال متي بلغت المرأة المحيض الأطلنطي فعليها أن تطيل اللحية وتوارب الشباك... فاشترطت أختي عليه أن يكون العفش من معرض "الانجازات" بمدينة نصر لحظة انقطاع المياه وطلبت أن تحضر الليلة الكبيرة التي تنكسر فيها الماسورة الرئيسية وتغرق الانجازات وأن تشهد بنفسها عملية الانقاذ واستخراج الجثث لتتعرف عليها فرفض الضاني واتهمها بالتشيع فقالت أمي (قطع لسانك أنا طالبه من هيئة المحكمة الموقرة كشف حكيم علي بنتي وتعويض) فطلب أبي الهدوء وسأل الضاني (أين محامي المتهم؟) قال الضاني (المحامي بتاعي موجود معانا بس متشفر في المحكمة وبيظهر فقط في الفضائية) رد أبي (هل تعين المحكمة لك محامي أرضي؟) قال الضاني (أنتم عيلة مجنونة وناويين تجنوني معاكم قوم أعمل قاضي بدالك شوية) فرفض أبي وطلب الضاني التأجيل فصرخت أختي (تأجيل لأ يا اما الفرح في ميعاده يا أما تاخد انجازاتك وتفارقنا) وقالت أمي (انجازات ايه يا أبو انجازات ده ما يفرشوش أوضة) وصرخ أبي ( أرجوكم الهدوء... اللي هيعمل دوشة هحبسه 24 سنة) .
تعرفى ان الماس ده صعبان عليا
ظالمينه احنا كده
المشكله ان من كتر ما بيكدبوا لو حصل حريق بماس بجد محدش هيصدقهم هههه
للأسف انا بجد بقيت بحس بتبلد مشاعر والاخبار دى بقت بتعدى على واذنى ولا اتعجب منها
‏قال Coca
علي راي اجنده حمرا

علم في المتبلم

الماس الكهربائي استحمل كتير في البلد دي
المفروض بقي يشوفوا حجه تانيه
يعني بلسوها لحد تاني
‏قال غير معرف…
تصحيح
عكس التغيير ليس الأستقرار
عكس التغيير هو الجمود
اى انه مع التغيير يحفظ الأستقرار ولا يتزعزع
وبالعكس الذى يهدد الأستقرار ويشيع الفوضى والتدهور هو الجمود
‏قال Eman Henaish
أنا خلااااااااااص جالي الضغط من الاحنا فيه ده
مش ممكن الكوارث دي كلها
ومفيش حد بيتعظ

تحياتي علي أسلوبك في عرض الموضوع
‏قال Desert cat
micheal
والله الماس ده مظلوم معانا يا مايكل متحمل بلاوى طول عمره
‏قال Desert cat
A.SAMIR
طيب حد يقول للروح الشريرة دى تهدى علينا شوية
احنا خلاص استوينا
كل سنة وانت بخير يا احمد
عيد سعيد يا فندم
‏قال Desert cat
الغالية اجندا حمرا
اخبارك ايه يا جميلة وحشتينى
السيد الوزير مع اندلاع اول شرارة قالك الماس لوحده كدا
طيب وهو الماس برضه نتج من ايه لو هنقول ماس مش من اهمالهم
ده اعتراف ضمنى من السيد المسئول الفنان ان فى اهمال يعنى المفروض يكون فى محكامه على التسيب ده لكن بما اننا فى بلد الفوضى فمرحبا بالماس
الحمد لله عزة رجعت بيتها بالسلامة والحقيقة انا بشكرها جدا على التغطية اللى علمتها لنا
كل سنة وانتى بالف خير
محبتى يا قمراية
‏قال Desert cat
Dear Heart Beat
ازيك حمد الله على سلامة اللاب توب
:)
كل سنة وانتى طيبة يا جميل وبالف خير
احنا خلاص وصلنا لمرحلة شديده من البلاهه والبلاده ومبقاش ينفع غير ان البلد كلها تولع مرة واحده يمكن نفوق
بقول يمكن
محبتى يا جميلة
‏قال Desert cat
صفا
تفتكرى يا صفا
يعنى مش هامه تاريخ بلد يتحرق ويهمه تعب واحد بيعمل تقرير
هو اعتقد انه هروب من المسؤليه بطريقة غبية
تحياتى
‏قال Desert cat
banouta masreya
لو الاهرامات ولعت هيبقى لعنة الفراعنه
واهو تجديد
انتى بتقولى فيها يا قلبى ماهو بالفعل اتقال قضاء وقدر
والنبى حد يقول للقدر يرحمنا شوية من النار اللى كل يوم والتانى تولع فى حاجه
شرفتينى جدا يا جميل
كل سنة وانتى طيبة
‏قال Desert cat
عزيز عيني
قصورهم محصنه
ضد المية ضد النار
ياااااااااارب
انت عارف بقى
‏قال Desert cat
Dear Fantasia
حبيبة قلبى وحشانى جدااا
كل سنة وانتى طيبة يا احلى فانتا
هو اى حاجه تحصل فى البلد لازم يلقوا لها فاعل فورى وبالطبع بييكون الفاعل حاجه غير قابلة للمحاكمة قضاء وقدر مرة فار مرة الماس مراااااات
وفى النهاية بلدنا بتضيع ومعالمها بتنتهى ليبقى من مصر الجميلة مجرد رماد يطير مع اول ذرة تراب
نورتي المدونة ونروتى الدنيا كلها يا فانتا
‏قال Desert cat
MaGn0liA...
سببها اننا فاض بينا
مصر بتروح مننا
والفاعل مجهول
‏قال Desert cat
صوت من مصر
اه يا محمد صح بس فى الحالة دى الماس ده عايز الحرق بماس برضه
‏قال Desert cat
الازهرى
سجل مصر حافل بالحرائق المدمرة للأمكان الاثرية
لماذا الماس يختار الاماكن الاثرية ليضيع معالمنا وتاريخنا معها لا ادرى
لن اقول القضاء والقدر لان الله رحيم بعباده دائما
وانه جميل يحب الجمال
فلن يترك القدر يشوه اثارنا
ولكنها ماس بفعل فاعل
دائما اختيارته تاتى عل الاماكن الاثرية بالعاصمه ليختفى معها تاريخنا وحضارتنا
مودتى
‏قال Desert cat
enjy
البلد بتضيع يا انجى مش مجرد نار بتولع فى مكان وتنتهى
لانها بتقضى على تراثنا فى لمح البصر
‏قال Desert cat
سمراء
70 مليون قلبهم موجوع
ماعدا شله الانس
الله يريحنا منهم
تحياتى
‏قال Desert cat
وميض ابتسامة
ماهو ده اللى استغربت له فعلا
المطافى جنب مكان الحريق والمسرح يتطفى فى 5 ساعات امال لو بعيد شوية كان ايه اللى حصل
كان زمان البلد كلها اتحرقت
ربنا يلطف بينا
‏قال Desert cat
قلب مصرى
خايفة يخزلنا يا ابو رقية
لانه مش بيعرف يعمل حاجه غير الدمار
تحياتى
‏قال Desert cat
مفكر يحترم عقله وعقل القراء
عزيزى المفكر اصبحنا اضحوكة العالم
بل كالهيكل العظمى الذى تاتى به الام لاودلاها وتقولهم اللى مش هيشرب اللبن هيبقى زى عمو كدا
فليهم الحق انهم يضحكو ويسخروا اما نحن فدعنا فى الثبات وسنظل نتسائل لان السؤال اصبح حجتنا للهروب من مواجهه الموقف فمن يسال يعنى لا يدرى ومن لا يدرى لا يبحث عن التغيير ولن يفعل شيئ تحياتى
‏قال Desert cat
حزينه
الله يسترها على الجميع حزينه
كل سنة وانتى طيبة يا جميل
‏قال Desert cat
الصديق العزيز نبراس العتمة
انا عرفت الخبر وانا قاعده على الفطار كنت بتلقى رسايل على الموبايل زى السيل .. لاقيت نفسى قايمة البس واجرى فى الشارع .. عايزة افتح نت بسرعه .. عايزة اعرف ايه اللى بيحصل فى البلد .. مصر مالها .. بتروح مننا ازاى كدا وبكل السهولة دى
قلبى موجوع يا عزيزى
الله يرحمنا من الماس ده
تحياتى
‏قال Desert cat
مفكر يخترم عقله وعقل القراء
عزيزى المفكر المحترم جدا جدا
الحقيقة سعيدة جدا بحضرتك وبافكارك التى دائما تزيدنى فخر بان مازال فى بلدنا الحبيب مثلها لعلنا ننتفع بيها
واتمنى انها تسود على الجميع
لك منى كل الود
ويارب دائما منور مدونتى المتواضعه
‏قال Desert cat
Anonymous
الحقيقة ارفع القبعه احترما وتقديرا لقيادات حزب التجمع
‏قال Desert cat
والله يا علاء حجة الماس دى للهروب من المسؤلية ليس اكثر وده يعتبر اعتراف ضمنى منهم بالاهمال احنا لو فى بلد محترمة كان كل المسؤلين اتحاكموا
لكن للاسف الماس يعنى كهربا هو حد يقدر يسيطر على الكهربا برضه
‏قال Desert cat
Coca
الماس الكهربى ده يا كوكا لو بيطق كان زمان اشتكانا للامم المتحدة
تحياتى
‏قال Desert cat
Eman
سلامتك يا ايمان من الضغط
ان شاء الله هما يارب
ميرسى جدا يا جميلة
تحياتى

المشاركات الشائعة