مصر المحروقة

حريق بالمسرح القومى بالعتبه
شب الحريق قبل المغرب مباشرة وأسفر عن ؟؟؟؟ لاء مش قتل حد انما دمر القاعه الرئيسية بالمسرح والقبة تماما
والظريف ان بعد الحريقه مباشرة فاروق حسنى يقولك السبب ماس كهربائى .. يعنى من غير لجان فنية ولا خبراء ولا اى حد يحدد سبب الماس حدده سيادة الوزير الفنان وهو قاعد فى مكتبه وبيشرب السيجار
هو الحاج ماس ماله ماشى فى البلد كدا بالترتيب ومختار الاماكن الاثرية ليه .. مش ياخد بعضه ويتمشى ناحيه القبة يمكن يغلط ويدخل المكان إياه .. ولا ده متحصن .. قاريين عليه عدية ياسين .. يعنى ايه مجلس الشورى يتحرق وبعده بشهر مسرح جورج ابيض
يعنى ايه اثارنا تدمر بالتدريج
يعنى ايه البطل فى كل مرة من اول حريق الاوبرا مرورا بحريق المسافر خانة وصولا لحريق المسرح القومى البطل هو الماس الكهربائى
ده ايه المجرم العتيد اللى مش حد قادر يسيطر عليه من سنة 71 ده
الناس بتتعلم من اخطائها واحنا سايبين الاخطاء تولع فينا واحدة واحدة وبالتدريج
من 71 لـ 2008 الجانى واحد واحنا قاعدين نتفرج .. مش مهم والنبى مشوها ماس كهربائى
بيدمر فى اثارنا وبيولع فى البلد بالتدريج .. ما تخلصنا بقى يا حج ماس وتقضى على مصر المحروقه
تحديث تالت
رساله من احمد عبدالفتاح على الجايكو
الحريقة خلصت تم اخماده
الحريقة شغاله من 5.30 وتم اخمادها الساعه 10.30 .. حريقه عبور المسرح القومى
يا ظالمه امال لو مش كان المطافى جنبها كنتوا طفيتوها فى كام ساعه ؟؟
خط بارليف اتحطم وتم العبور فى 6 ساعات والمسرح القومى اللى جنبه المطافى يتطفى فى 5 ساعات امال لو فى الهرم كنتوا عبرتوا فى اد ايه فى 48 ساعه ؟؟؟؟؟
بالمناسبة الماس الكهربائى عامل جايزة ذهبية للى يعرف الشهر الجاى الحريقه هتكون فين ؟؟؟؟
تحديث تانى
من عزة مغازى
الامن ابتدي مصادرة الموبايلات و الكاميرات و اقتياد اصحابها للبوكسات
تحديث
رساله من عزة مغازى .. هى دلوقتى موجودة فى مكان الحدث
عاجل: الحريق يعاود الاشتعال الان في مخزن الديكور



Comments

micheal said…
اااااااااااااااه
يلعن أبو الماس الكهربائي المظلوم مع اللي خلفونا ده
زهقت يا قطتي
:)
طب ينوعوا حتي ولا هما مفترضين فينا ضفة الغباء لهذه الدرجة
:)
تحياتي
A.SAMIR said…
تقريبا كدة والله اعلم ان في روح شريرة ماشية في القاهرة شغالة حرايق على انهيارات والذي منه
ربنا يستر
تحياتي و كل سنة وانتي طيبة
علم في المتبلم ياقطتنا

دول مش بيتعلموا

تصدقي ان الماس بيصعب عليا
اصله بيشيل بلاوي في الزمن ده

ياقطتنا انتي في زمن التكنولوجيا

لجان فنيه ايه و بتاع ايه اللي بتتكلمي عنها
ده يحصل الحريق من هنا و متبرمجين علي انهم يقولوا السبب من غير معاينه ولا اي حاجه

و عارفه بيقولوا ان الناس هي السبب ناس مين الله اعلم

و بخصوص القبه شوفي دي منطقه محرم علي الماس يقرب منها
انتي عارفه اذا كان الماس قوي فيه اللي اقوي منه

ربنا يرجع عزه بسلامه لبيتها

تسلمي ياقطتنا علي التغطيه
Heart Beat said…
صديقتي الغالية جدا على قلبي

Desert Cat

ما هو يا ماس كهربائي يا قدر احنا بقى نختار التسمية الانسب لينا و اللي غصب عننا لازم نصدقها

يعني مثلا لو حد من الشعب طالب بتشكيل لجنة تقصي حقائق تحقق في حريق مجلس الشورى و حريق المسرح القومي

هايقولوا ما احنا قولنا قدر انت هاتعترض و لا ايه

او يقولوا ماس كهربائي و يرفعوا قضية على شركة الكهرباء اللي هي بتاعة الحكومة برضه

و يفضل المسلسل كده مط و تطويل زي مسلسلات ر مضان و تيجي النهاية زي ما توقعنا من الاول

انه يبقى الحال كما هو عليه و انه ماس كهربائي
صفا said…
هو انتى كنتى عاوزاه يستنى ليه التقرير هو قال يوفر على الناس تعبهم اللى هيكتبوا فيه التقرير ده خايف على تعبهم
banouta masreya said…
والله خايفة بكرة الاهرامات تولع و يطلعوا يقولولنا ماس كهربائي برضه
و مش بعيد تكون لجماعات الاسلامية ورا الحادث الاليم اصلها بقت الشماعة الجديدة اللى بيداروا وراها خيبيتهم

بكرة يطلع فاروق بيه و يقولنا قضاء و قدر و حسبي الله و نعم الوكيل فالى مش بيؤمنوابالقضاء و القدر
اصلهم لما بيجيلهم مزاجهم يطلعوا تصريحات دينية بتبقى دى الموضة لفترة مش قليلة فتوقعى المزيد من الهطل الحكومى
ادعوله بطولة العمر نفسي اسمع مرة عن حريقة في قصر من قصورهم
Fantasia said…
قطتي الجميلة

وحشتيني ووحشتني مدونتك والفضفضة من القلب الموجوع على حال البلد
مش عارفة ليه هافف عليا حريق القاهرة.. على رأيك كلها مباني أثرية وليها قيمتها التاريخية.. هو فيه إيه بالظبط؟ أنا ابتديت أشم ريحة مش تمام

لأ وكله كوم وموضوع الماس إياه ده كوم تاني.. برضه بيفكرني بموضوع فار السبتية اللي كانوا قالوا إن هوايته ومزاج أهله إنه ياكل كابلات الكهربا.. أهو الفار اتطور وبقى ماس

يا عيني على البنية الاساسية اللي قعدنا نعمل فيها ربع قرن وحالها بالشكل ده

قلبي معاكي يا حبيبتي.. ودعائي لمصر في هذه الأيام المفترجة إن ربنا يبعد عنها ولاد الحرام
MaGn0liA... said…
ايه ده !!!

انا بجد مش فاهمه

المفروض سبب الحاجات دى ايه ؟؟؟
تصدقى كل ده من حمله توفير الطاقه
ههههههههههههه
ال ماس ال ؟
الماس ده اغلى من الدهب صح
الازهرى said…
صديقتى العزيزة

لم اعلم بالخبر الا من مدونتك منذ دقائق

وعندما اجريت اتصالاتى باصدقائى وعلمت حجم الكارثة لم اتمالك نفسى من لعن الجميع وهو ما لا افعله عادة
فقد اعاد الى ما حدث ذكرى ابعد حتى من حريق الاوبرا الذى ذكرتيه
انه حريق مسرح البالون
حيث احترق هو والسيرك ومسرح السامر او بيتنا كما كنا نسميه ولادهى انه عند الحريق كنا بداخله
ولك ان تتخيلى شعورنا آنذاك او الان
كما ان هناك حريق اخر لم تذكروه انه حريق بنى سوبف الذى راح ضحيته العديد من الفنانين الشرفاء الذين كانوا ينحتون فى الصخر ويعادون الجميع كى يعبروا عن قضايانا بحس فنى يعلمه كل من تعامل معهم
فالبقاء لله فى الجميع
وحسبنا الله ونعم الوكيل فى المتسبب الذى سنعرفه جميعا ان لم نكن علمناه بالفعل
ولتكن صفحة اخرى فى السجل الاسود
enjy said…
لا دة مش ماس كهربى ولا حاجة دة على راى واحد صاحبى من كتر ما الناس دعوا على البلد انها تولع ربنا استجاب واهى بتولع اهى
سمراء said…
اللي بيولع في البلد نفس 70 مليون واحد ماشي فيها حاسس بلظلم والقهر والخوف

اشكرك
سمراء
عارفة النكتة الى تضحك وتبكى فعلا ان مطافى العتبة الشهيرة فى الجانب الآخر من المسرح المحروق .. يعنى احنا عليه العوض لو كانت الحريقة على بعد كام شارع

حداجة تكسف بجد ..وحاجة مؤسفة للغاية
وربنا يستر من مسلسل الحرائق والماس الكهربائى
قلب مصرى said…
الماس الكهربائى هو بطل حقيقى لأنه الوحيد فى مصر الذى ينجز أعماله بكفاءة ودون أن يملء الدنيا ضجيجاً قبل الفعل ويترك الآخرون يتكلمون عن نجاحه.
أرى أن نختاره بطلنا فى الألومبياد القادمة وأضمن لكم ميدالية ذهبية
مفكر يحترم عقله وعقل القراء said…
العزيزه حنان
الكل يتساءل هو فيه ايه
وتسخر وسائل العلام العالميه منا وهى تورد النبا وتشدد على نكتة الماس الكهربى
وهى تستعرض مسلسل الحرائق
والكل هنا يسال هو فيه ايه؟
ماهو السر وراء كل هذا؟
الأجابه المختصرهغير ممكنه ولذلك احوال ان اعرض فكرتى بطريقه ارجو ان اوفق فى شرحها
اشرح باقول هناك قانون فى علم الفيزياء
يقول ما معناه بدون الدخول فى تفاصيل فنيه ...يقول اذا تركت الأشياء على ماهى عليه دون تغيير
تاخذ فى التدهور بشكل تلقائى
وتتحلل
...مجتمعنا فى حالة تحلل ابرز اعراضه اللامبالاه والأهمال
وهذا هو المتهم الحقيقى
مجتمعنا يحتاج للتغيير الحقيقى والا سيستمر هذا المسلسل وتسوء الأمور اكثر
والآن لا اخشى من ذكر بعض المعلومات وقد ارجاتها للآخر حتى لا يستصعب احد الفكره من اولها وينصرف عن القراءه
هذا الذى ذكرته مع شىء كثير من التبسيط اسمه القانون الثانى فى علم او فرع الديناميكا الجراريه...من فروع الفيزياء
حزينه said…
تصدقى فعلا هو دة العنوان الصح

اللى المفروض يتقال على مصر دلوقتى

ربنا يستر عليكى يا مصر



حزينه
عزيزتي وصديقتي قطة الصحراء
قريبا سيتعين عليك أن تعنوني مدونتك بمدونة المصائب وتستبدلي رمز القطة بالغراب..انت أول من يعرف بهذه المصائب..
ان شاء الله يكون آخر حدث مأساوي.. ولو ان الضحية هذه المرة شخص معنوي ولا واحد سيهتم لأمره كثيرا

مودتي مثل الحرائق التي تحدث بدون ماس
مفكر يخترم عقله وعقل القراء said…
العزيزه حنان
استكمالا لفكرتى عن ضرورة التغيير الحقيقى والا...لابد من نفى اسطوره مغرضه نسمعها كثيرا وهى اسطورة الأستقرار...
كل شىء يؤجل لخدمة الأستقرار...وهذه الأسطوره التى يروج لها البعض تعتمد على تجاهل المنطق فى التفكير...بداية الأسقرار ليس عكس التغيير الحقيقى
عكس التغيير الحقيقى هو الجمود وليس الأستقرار
وما هو الدليل؟
لو كان الأستقرار عكس التغيير الحقيقى لكانت دول مثل بريطانيا والمانيا و الولايات المتحده دولا غير مستقره وهى التى شهدت تغييرات فى من يحكم عدة مرات فى عشر او عشرين سنه
وثانيا
الأستقرار الذى يروج له فى الدول المتخلفه يعنى غالبا استمرار من يحكم فى الحكم
والمعضله هنا اللامنطقيه هو انه بشر
اى يخضع لقوانين الفناء او الموت فى اى لحظه مثل سائر البشر
وعندها يمكن ان تنزلق البلاد الى اى احتمال
ومعنى ذلك ان مفهوم الأستقرار المعيب انما يرجأ المشكله الى حين ولا يحلها
وحسب قانون الديناميكا الحراريه الثانى ترك الأمور على ماهى عليه سيؤدى الىتحلل فى المجتمع وفى الدوله وتظهر اعراض هذا التحلل فى صور شتى منها تدهور القيم والأخلاق والأهمال والتناحر والجريمه والنصب والأحتيال والغش...ومحاولات التشبث بالماضى والهوس الدينى والجنسى كما نرى فى التحرش...الى آخر كل هذه الأمراض
Anonymous said…
شهد المقر المركزي لحزب التجمع لقاء مهماً صباح الأربعاء الماضي حيث التقي قيادات حزب التجمع بوفد من حركة الاخوان المسلمين
وفي كلمتها أكدت أمينة النقاش نائب رئيس حزب التجمع أن التجمع والاخوان متفقان في الجانب المطالب بالديمقراطية ولكنهما مختلفان أشد الاختلاف في التداخل الذي تتعمده حركة الاخوان بخلط الدين والسياسة.. كما أشارت إلي أداء نواب الاخوان في البرلمان واصرارهم علي تطبيق قاعدة الحلال والحرام دون النظر إلي معايير المصلحة والجدوي والتقدم والتخلف علي كل شئون الحياة وقالت إن الدعوة لدولة دينية قسمت السودان واشعلت حروبا مذهبية في المنطقة واشارت إلي رفض نواب الاخوان لقانون الطفل وموقفهم الرافض للثقافة والفنون وحرية العقيدة
وقالت النقاش إن علي كل القوي السياسية ان تتمسك بشعار أن الدين لله والوطن للجميع وأن يكون الدستور والمواثيق الدولية لحقوق الانسان هي المرجعية الوحيدة لتلك القوي.

وهو ما اتجه اليه د. سمير فياض نائب رئيس الحزب في كلمته عندما أكد الخلط المتعمد بين المقدس وغير المقدس في أوراق الاخوان المسلمين ودعا فياض إلي فك هذا الاشتباك مشيراً إلي الفارق المهم بين الدين والسياسة.. ..
Anonymous said…
اليابان جزر منعزلة حولتها "الهندسة" الي أرض متصلة ومصر أرض متصلة حولتها "السياسة" الي جزر منعزلة بعضها عبر من القرن العشرين وبعضها عبر الي القرن الأفريقي وصارت قضيتها من رأي شيعياً فليغيره بيده فان لم يستطع فيبلغ عنه... في محاورات "الضاني" التي سجلها تلميذه أفلاطون في جريدة "الجمهورية" أن الشيعي شيعي ولو استحمي كل يوم والسني سني ولو لسه قايم من النوم وقال إن السني قليل الحيلة أفضل من الشيعي طويل التيلة كفضل "دبي" علي باقي الامارات وكالفرق بين انهيار المقطم وانهيار البورصة... ونهي أبي عن لبس "الكافولة" وقال متي بلغت المرأة المحيض الأطلنطي فعليها أن تطيل اللحية وتوارب الشباك... فاشترطت أختي عليه أن يكون العفش من معرض "الانجازات" بمدينة نصر لحظة انقطاع المياه وطلبت أن تحضر الليلة الكبيرة التي تنكسر فيها الماسورة الرئيسية وتغرق الانجازات وأن تشهد بنفسها عملية الانقاذ واستخراج الجثث لتتعرف عليها فرفض الضاني واتهمها بالتشيع فقالت أمي (قطع لسانك أنا طالبه من هيئة المحكمة الموقرة كشف حكيم علي بنتي وتعويض) فطلب أبي الهدوء وسأل الضاني (أين محامي المتهم؟) قال الضاني (المحامي بتاعي موجود معانا بس متشفر في المحكمة وبيظهر فقط في الفضائية) رد أبي (هل تعين المحكمة لك محامي أرضي؟) قال الضاني (أنتم عيلة مجنونة وناويين تجنوني معاكم قوم أعمل قاضي بدالك شوية) فرفض أبي وطلب الضاني التأجيل فصرخت أختي (تأجيل لأ يا اما الفرح في ميعاده يا أما تاخد انجازاتك وتفارقنا) وقالت أمي (انجازات ايه يا أبو انجازات ده ما يفرشوش أوضة) وصرخ أبي ( أرجوكم الهدوء... اللي هيعمل دوشة هحبسه 24 سنة) .
تعرفى ان الماس ده صعبان عليا
ظالمينه احنا كده
المشكله ان من كتر ما بيكدبوا لو حصل حريق بماس بجد محدش هيصدقهم هههه
للأسف انا بجد بقيت بحس بتبلد مشاعر والاخبار دى بقت بتعدى على واذنى ولا اتعجب منها
Coca said…
علي راي اجنده حمرا

علم في المتبلم

الماس الكهربائي استحمل كتير في البلد دي
المفروض بقي يشوفوا حجه تانيه
يعني بلسوها لحد تاني
مفكر يحترم عقله وعقل القراء said…
تصحيح
عكس التغيير ليس الأستقرار
عكس التغيير هو الجمود
اى انه مع التغيير يحفظ الأستقرار ولا يتزعزع
وبالعكس الذى يهدد الأستقرار ويشيع الفوضى والتدهور هو الجمود
Eman said…
أنا خلااااااااااص جالي الضغط من الاحنا فيه ده
مش ممكن الكوارث دي كلها
ومفيش حد بيتعظ

تحياتي علي أسلوبك في عرض الموضوع
Desert cat said…
micheal
والله الماس ده مظلوم معانا يا مايكل متحمل بلاوى طول عمره
Desert cat said…
A.SAMIR
طيب حد يقول للروح الشريرة دى تهدى علينا شوية
احنا خلاص استوينا
كل سنة وانت بخير يا احمد
عيد سعيد يا فندم
Desert cat said…
الغالية اجندا حمرا
اخبارك ايه يا جميلة وحشتينى
السيد الوزير مع اندلاع اول شرارة قالك الماس لوحده كدا
طيب وهو الماس برضه نتج من ايه لو هنقول ماس مش من اهمالهم
ده اعتراف ضمنى من السيد المسئول الفنان ان فى اهمال يعنى المفروض يكون فى محكامه على التسيب ده لكن بما اننا فى بلد الفوضى فمرحبا بالماس
الحمد لله عزة رجعت بيتها بالسلامة والحقيقة انا بشكرها جدا على التغطية اللى علمتها لنا
كل سنة وانتى بالف خير
محبتى يا قمراية
Desert cat said…
Dear Heart Beat
ازيك حمد الله على سلامة اللاب توب
:)
كل سنة وانتى طيبة يا جميل وبالف خير
احنا خلاص وصلنا لمرحلة شديده من البلاهه والبلاده ومبقاش ينفع غير ان البلد كلها تولع مرة واحده يمكن نفوق
بقول يمكن
محبتى يا جميلة
Desert cat said…
صفا
تفتكرى يا صفا
يعنى مش هامه تاريخ بلد يتحرق ويهمه تعب واحد بيعمل تقرير
هو اعتقد انه هروب من المسؤليه بطريقة غبية
تحياتى
Desert cat said…
banouta masreya
لو الاهرامات ولعت هيبقى لعنة الفراعنه
واهو تجديد
انتى بتقولى فيها يا قلبى ماهو بالفعل اتقال قضاء وقدر
والنبى حد يقول للقدر يرحمنا شوية من النار اللى كل يوم والتانى تولع فى حاجه
شرفتينى جدا يا جميل
كل سنة وانتى طيبة
Desert cat said…
عزيز عيني
قصورهم محصنه
ضد المية ضد النار
ياااااااااارب
انت عارف بقى
Desert cat said…
Dear Fantasia
حبيبة قلبى وحشانى جدااا
كل سنة وانتى طيبة يا احلى فانتا
هو اى حاجه تحصل فى البلد لازم يلقوا لها فاعل فورى وبالطبع بييكون الفاعل حاجه غير قابلة للمحاكمة قضاء وقدر مرة فار مرة الماس مراااااات
وفى النهاية بلدنا بتضيع ومعالمها بتنتهى ليبقى من مصر الجميلة مجرد رماد يطير مع اول ذرة تراب
نورتي المدونة ونروتى الدنيا كلها يا فانتا
Desert cat said…
MaGn0liA...
سببها اننا فاض بينا
مصر بتروح مننا
والفاعل مجهول
Desert cat said…
صوت من مصر
اه يا محمد صح بس فى الحالة دى الماس ده عايز الحرق بماس برضه
Desert cat said…
الازهرى
سجل مصر حافل بالحرائق المدمرة للأمكان الاثرية
لماذا الماس يختار الاماكن الاثرية ليضيع معالمنا وتاريخنا معها لا ادرى
لن اقول القضاء والقدر لان الله رحيم بعباده دائما
وانه جميل يحب الجمال
فلن يترك القدر يشوه اثارنا
ولكنها ماس بفعل فاعل
دائما اختيارته تاتى عل الاماكن الاثرية بالعاصمه ليختفى معها تاريخنا وحضارتنا
مودتى
Desert cat said…
enjy
البلد بتضيع يا انجى مش مجرد نار بتولع فى مكان وتنتهى
لانها بتقضى على تراثنا فى لمح البصر
Desert cat said…
سمراء
70 مليون قلبهم موجوع
ماعدا شله الانس
الله يريحنا منهم
تحياتى
Desert cat said…
وميض ابتسامة
ماهو ده اللى استغربت له فعلا
المطافى جنب مكان الحريق والمسرح يتطفى فى 5 ساعات امال لو بعيد شوية كان ايه اللى حصل
كان زمان البلد كلها اتحرقت
ربنا يلطف بينا
Desert cat said…
قلب مصرى
خايفة يخزلنا يا ابو رقية
لانه مش بيعرف يعمل حاجه غير الدمار
تحياتى
Desert cat said…
مفكر يحترم عقله وعقل القراء
عزيزى المفكر اصبحنا اضحوكة العالم
بل كالهيكل العظمى الذى تاتى به الام لاودلاها وتقولهم اللى مش هيشرب اللبن هيبقى زى عمو كدا
فليهم الحق انهم يضحكو ويسخروا اما نحن فدعنا فى الثبات وسنظل نتسائل لان السؤال اصبح حجتنا للهروب من مواجهه الموقف فمن يسال يعنى لا يدرى ومن لا يدرى لا يبحث عن التغيير ولن يفعل شيئ تحياتى
Desert cat said…
حزينه
الله يسترها على الجميع حزينه
كل سنة وانتى طيبة يا جميل
Desert cat said…
الصديق العزيز نبراس العتمة
انا عرفت الخبر وانا قاعده على الفطار كنت بتلقى رسايل على الموبايل زى السيل .. لاقيت نفسى قايمة البس واجرى فى الشارع .. عايزة افتح نت بسرعه .. عايزة اعرف ايه اللى بيحصل فى البلد .. مصر مالها .. بتروح مننا ازاى كدا وبكل السهولة دى
قلبى موجوع يا عزيزى
الله يرحمنا من الماس ده
تحياتى
Desert cat said…
مفكر يخترم عقله وعقل القراء
عزيزى المفكر المحترم جدا جدا
الحقيقة سعيدة جدا بحضرتك وبافكارك التى دائما تزيدنى فخر بان مازال فى بلدنا الحبيب مثلها لعلنا ننتفع بيها
واتمنى انها تسود على الجميع
لك منى كل الود
ويارب دائما منور مدونتى المتواضعه
Desert cat said…
Anonymous
الحقيقة ارفع القبعه احترما وتقديرا لقيادات حزب التجمع
Desert cat said…
والله يا علاء حجة الماس دى للهروب من المسؤلية ليس اكثر وده يعتبر اعتراف ضمنى منهم بالاهمال احنا لو فى بلد محترمة كان كل المسؤلين اتحاكموا
لكن للاسف الماس يعنى كهربا هو حد يقدر يسيطر على الكهربا برضه
Desert cat said…
Coca
الماس الكهربى ده يا كوكا لو بيطق كان زمان اشتكانا للامم المتحدة
تحياتى
Desert cat said…
Eman
سلامتك يا ايمان من الضغط
ان شاء الله هما يارب
ميرسى جدا يا جميلة
تحياتى

Popular posts from this blog

قميص دهشور

كل تحرش وانتوا طيبين