كنت فاكراه شغل سينما

كالعادة كل رمضان العيلة كلها بتتجمع فى بيت جدو يوم يكون مناسب للجميع لأن اليوم ده مش ينفع فيه استثناءات لا من صغير ولا كبير وبما اننا عيلة واحده يعنى تلاقى عمك هو نفسه جوز خالتك وهكذا عملية التزاوج والنسل مننا فى بعض .. مش دى قضيتنا المهم جه يوم الفطار العائلى وكلنا اتجمعنا وكعادتى فى اى حاجه بوصل اخر واحده على الاكل علشان اكل بس .. خلصنا الفطار وقمنا انا وبنات العيلة نشرب الشاى فى الفراندة ونرغى وننم وكل اللى عندها حكاية شيلاها لليوم ده تحكيها .. شوية وسمعنا دوشة وهيصة كتير خير فى ايه بيحصل بره طبعا قدامنا جونينة مش شايفين حاجه من الشجر .. يبقى اللى هجيب لنا الخبر اليقين عمو إسماعيل حارس المنزل .. تبرعت جينول ابنة خالى وقامت نادت عليه .. دخل علينا بضحكة من الودن للودن والله يا بنات انتوا منورين وياريت طول السنة رمضان علشان تنورنا بدل ما انا قاعد اكلم نفسى طول السنة .. رديت عليه انا المرة دى اه ما هو احنا هنسيب بيوتنا واشغالنا ونيجى نقعد هنا علشان نونسك .. قالى العفو مش قصدى .. وهنا بادرت غدير بسؤالها واللى هو كان خروج بعيد عن كلامى السخيف باين ... فى ايه بره ؟؟؟؟
قالها ده اللى بره ده حكاية من الف ليلة وليلة اصل بنت الحاج ( ..... ) هتتجوز ابن عمها
أنا : طيب وايه يعنى وبعدين عربيات البوكس دى ليه هو ابن عمها ده قريب وزير الداخلية ولا حاجه قال لاء اصل البنت كانت هربانة ولسه راجعه وخايفين عليها من ابوها او اخوها يعملوا فيها حاجه .... كلنا فى صوت واحد نعمممممممم
اقعد ياعم سيماعين احكى ... وقعدناه وقال الآتى والعهده على الراوى اللى هو عمو سيماعين
الولد والبنت بيحبوا بعض وهو سافر من سنتين البلد الى بيهربوا فيها الفلوس دى ... فلوس مين اللى بيهربوها ياعم سيماعين .. اللى فيها البنوك اللى الكبار بيحطوا فيها الفلوس .. اها قصدك سويسرا .. قال ايووا هى دى .. وبما ان الاتنين ولاد عم فالولد اخد ابوه وراحوا يتقدموا لها ابوها راجل تاجر وعايز يجوزها ابن تاجر صاحبه والمواضيع مصالح داخله فى بعضها .. طيب ماهو لو الموضوع فلوس اهو ابن عمها جاى من سويسرا اللى البلد كلها بتهرب فيها الفلوس يعنى معاه اد كدا .. قال لاء هو الموضوع مش فلوس ابوها يابنات اصلا تاجر كبير ومعروف اوى يعنى مش ناقصه فلوس .. هى مشاكل بينه وبين اخوه ومش عايز يبقى فى نسب بينهم حاجه زى كدا والله اعلم بالسبب الحقيقى ... قوم البنت عرفت الليلة دى اخدت بعضها وهربت يومين والدنيا اتقلبت وابوها خاف يبلغ عشان الفضايح و سمعته وقعد يهدد اخوه ويقوله هخطف ابنك واحرق قلبك عليه زى ما حرقت قلبى على بنتى ومهما تعملوا عمرها ما هتكون ليه ... البنت كل ده مستخبية فى بيت بنت عمها اللى هى اخت الولد بس الجميع انكر معرفته هى فين .. وراح لها عمها علشان ترجع لانه خايف على ابنه وكاننا فى ذئاب الجبل الحقيقة ... البنت رفضت ومش رضيت ترجع من هنا لهناك مش لقيوا حل غير ان البنت ترجع ويتكتب كتابها على ابن عمها ويتحط السيد الوالد قدام الامر الواقع وقد كان عملوا كدا بالفعل وبعدها مباشرة راحوا قسم الشرطة علشان ياخدوا على ابوها واخوها اللى عايزين يقتلوها تعهد بعدم التعرض ابوها واخوها وهما هناك قالوا لاء مش ينفع يبقى حاطين راسنا فى الرمل كدا احنا نعمل اشهار فى المسجد بعد صلاة العشا يوم الخميس وده كان اليوم اللى احنا متجمعين فيه الكل كليله ... طبعا عملوا الاشهار تحت حراسة الشرطة والبنت راحت تعيش فى بيت بنت عمها مرة تانيه وابن عمها ايام وراجع سويسرا وهى هتروح تعيش معاه هناك ..
انا قاعده بسمع الحكاية وكانى بتفرج على فيلم لسعاد حسنى وحسن يوسف وكل شوية اقول هو لسه فى كدا ؟؟؟
معقول لسه فى ناس بتحب كدا وعندها الجرأة لكدا ؟؟؟
انا كنت فاكره ان ده مش بيحصل غير فى التلفزيون بس وفى افلام الابيض واسود كمان
انا الحقيقة مش مغلطة البنت
ومش مغلطة عمها فى حاجه
انا مغلطة ابوها اللى مفضل مصلحته الخاصة على المشاعر الانسانية لبنته
قلب البنى ادم مش بالريموت اضغط على الزر يحب ويكره
انا لما قولت راى ده ناس قالت اه صح وناس تانية قالت لاء دى كدا البنت مش متربية ازاى تهرب وتعمل كدا فى اهلها
طيب معلشى ماهو اهلها اللى اضطروها لكدا .. تناسوا ادميتها واتعاملوا معاها على انها قطعه اثاث هيحركوها فى المكان اللى يحبوه
دى كيان كامل متكامل ومن حقها تختار حياتها بنفسها وتقرر هتقدر تعيش مع مين وترفض مين ولا انتوا ايه رايكو ؟؟؟؟

تعليقات

‏قال blackcairorose
متهيألى يا قطة الحكاية ممكن يكون فيها تفاصيل اكتر تبرر شوية موقف الاب والاخ لان من السمع كده موقف الاب تعنت زيادة من غير مبرر كاف

اما من حيث اذا كان لسه فيه كده فى الزمان ده فانا مقتنعة تماما ان لسه فيه كده واكتر من كده
‏قال Desert cat
Dear blackcairorose
انا كمان اعتقد ان فى تفاصيل اكتر
بس ده اللى سمعناه من حارس منزل جدو
على حسب ما سمع هو كمان
طبعا انا الفضول كان هيقتلنى واقابل اى حد قريب من الموضوع لكن بما اننا بنروح البلد ضيوف ومرة كل سنة .. لان فى العيله اللى مسافر بره مصر اصلا واللى مقيم فى محافظات مختلفة فالناس مش متعودة على رؤيتنا والطبيعى مش حد هيحكى لنا تفاصيل حتى لما جينول قالت لى تعالى ننزل نتمشى كدا يمكن نقدر نعرف حاجه عمو سيماعين نفسه قال مش حد هقيقول لكو حاجه
ده انا اللى عايش فى وسطهم عرفت التفاصيل دى بالعافية الناس بتخاف من الفضايح خصوصا فى موضوع زى ده
الحقيقة انا معجبة بموقف البنت
:)
تحياتى
‏قال غير معرف…
هو هنا الفكره الوحيده سؤال انتى سالتيه

هو فى ناس لسه بتحب كده ؟؟

اصل انا ساعات بحس ان الحاجات دى ماتت جوايا

بجد مش مصدقه اللى هى عملته

حاجه حلوه ان حد لسه بيحب كده

و شكرا على الفيلم العربى ده :):)
‏قال Desert cat
MaGn0liA...
اعتقد ان لو الشخص كويس وحاسه انه فعلا نصها التانى هو الحب والامن والامان بالنسبة لها
يبقى يستاهل الحب ده كله
بالفعل موقف البنت مذهل وشجاع للغايةلحد دلوقتى كل لما بفتكره حقيقى كانى شايفه قدامى سعاد حسنى
:)
تحياتى ليكى
‏قال غير معرف…
بصى هو نموذج الأب ده موجود وكتير قوى تلاقية
نموذج البنت والحب والكلام ده هو موجود بس مش كتير زى الأول بس لسة موجود ولسة فيه ناس عنده قلب وبتحب

تحياتى
‏قال prince4ever
ههههههههههه
شغل سيما بجد
بس على فكره دي بجد حاله نادره
لانه والله ماعدش فيه حد بيتمسك بحبه للدرجه دي...بس الغلط مش عالاب لوحده البنت كمان غلطانه لانها بكده بتعصي ابوها و دي حاجه ربنا نهانا عنها مهما كان الاب متسلط والبنت مظلومه
مدونتك حلوه و استايلها هادي فعلا
تحياتي
رامي..قصاصة ورق
‏قال محمد حمدي
بصراحه قصه غريبه جدا .. لو شوفتها فى فيلم مش هصدقها فما بالك لو كانت حقيقيه

مش عارف اقول ايه فى النهايه بس فعلا لو كل واحد وواحده اتمسكوا بحبهم كده كانت امور كتير هتتغير .. وان كنت بحس ان الاهل نظرهم بيكون ابعد وبيظهر ده مع الوقت

وربنا يستر

تحياتى
‏قال maxbeta3zaman
الحكايه غرابتها ان البنيه عاوزه تهرب لابن عمها ..بينما السائد ان يكون ابن العم هو العريس المفروض على البنت وابن الجيران هو الحبيب الذى لايمكن المعيشه بدونه الموضوع لازمه مخبر خصوصى من كولومبو إخوان ليمتد يفحص ويمحص ويجيب سر الرفض المخالف للطبيعه السينيمائيه والتليفيزيونه..وحتى المهنديه التركيه !!!
‏قال فاروق عادل
امممممممممممممم قصة عجيبة واللة وشغل سيما بس زى ما بلاك ايروس قال متهيألى فى تفاصيل اكتر
‏قال tamer.sala7
تصدقي فكرة ؟؟

بصراحة صقفة للبنت ولعمها دي بنت وقدرت تقف وتواجه الدور والباقي علي الرجالة اللي مش عارفة تتصرف ومش عارفة تدافع عن موقفها
(:
‏قال صفا سارة
موقف البت جامد بجد بس هو فعلا لسه فى حد كده وانا عاجبنى موقفها اوى
:)
‏قال Yasmine
المهم يكون يستاهل التضحية بتاعتها دى..مش سهل ابدا على البنت انها تعمل كده فى اهلها مهما كان اللى بيعملوه فيها قاسي..اولا و اخيرا هم ضهرها الوحيد فى الدنيا..تفتكرى لسه فى ناس تستاهل يتعمل عشانها كده؟..ماعتقدش بصراحة
‏قال عزيز عيني
ده العادي في بلدنا يتحول الجواز مزاد اللي يدفع اكتر يشيل نظرا لهجرة معظم شباب البلد لاوروبا بس همّا بيتحججوا بالفقر انما ابوها حجّته ايه؟ احتمال ابوها بيعاند لمعرفته بعلاقة الحب اللي بينهم ؟ انا كنت في حكاية مشابهه جدا حصلت لواحد صاحبي وانتهت بنهاية عجيبه ولا الافلام الهندي
‏قال Desert cat
bos bos
الله يبشركك بالخير يا بوسى اصلى كنت قربت اشك فى المشاعر الانسانية
‏قال Desert cat
prince4ever
اعتقد ان ابوها هو اللى كان ناوى يحطمها والاسلام قال اننا مخيرين مش مسيرين يبقى ازاى بشر يختاروا حياة بنى ادم ويحددوا له خط معين
تحياتى
‏قال Desert cat
Mohamed Hamdy
لاء يا محمد انا مش شايفه بعد نظر فى تحكمى فى حياة بنى ادم
والحقيقة ده بيعتمد على حس الاختيار من البداية للطرفين يعنى الولد والبنت اختيارهم لبعض
تحياتى
‏قال Desert cat
maxbeta3zaman
اه اللى حصل ده بالفعل لخبط كل الاعراف المتعارف عليها
والموضوع محتاج تدقيق فى معرفة التفاصيل لكن انت عارف مدى حساسية الناس من المواضيع دى والفضايح والتار ولا العار والكلام الفاضى ده
عموما انا سعيدة بموقف البنت حتى لو غلبت المعايير
‏قال Desert cat
طالب ثانوى
ماهو اكيد فى
بس ده اللى قدرنا نوصله
:)
تحياتى
‏قال Desert cat
tamer.sala7
طيب دى مرة وصابت
مش عارفين بعد كدا ايه اللى هيحصل
ربنا يهدى الناس ونفرح قريب اوى فى الرجالة اصلى حاسه انى شايله ههم مش عارفه ليه
:)
تحياتى
‏قال Desert cat
صفا
والحقيقة عاجبنى انا كمان يا صفا
تحياتى
‏قال Desert cat
banouta masreya
يمكن هى شافت الموضوع من زاوية مختلفة
واكيد هى اللى عايشه الموقف وتعرف كويس اوى انها تحدد وفى النهاية اللى هربت علشانه مش حد غريب يعنى ابن عمها بس يارب يقدر التضحية
انا بتمنى من كل قلبى
تحياتى يا جميل
‏قال Desert cat
عزيز عيني
لاء الولد عنده الفلوس ووالدها كمان عنده فلوس يعنى الموضوع مش كدا
ودى الحلقة المفقودة اللى كان نفسى اوصل لها
بتقول كنت فى حكاية مشابهه
ده انا اتفاجأت بموقف البنت وجرأتها
اتارى المجتمع فيه تانى من كدا
معقول
يعنى قريب هشوف نموذج اللى بتقعد فى الكوشة بوزها شبرين وتتطلق بعد شهر من الجواز لانها مش بتحبه
نفسى الحقيقة كل واحد يعرف حدوده فين ومش يتعداها حتى لو كان الاهل
تحياتى
هههه متأكده انك مكنتيش بتحلمى :)
هو على حسب ما بشوف ان حكايه حد يهرب والتعصب الجامد ده مبقتش بشوفه
انما كحب وان حد يفضل متمسك بحبه لابعد الحدود شوفت بس موصلش للهروب :)
انا عاجبنى موقف البنت برغم انى فى نفس الوقت شايف انها كانت قاسيه على ابوها وامها بس بردو هما كانوا قاسيين عليها
بس على فكره انا من رأيي ان حارس المنزل ذى اى راوى بينسى شوية حاجات وكمان بيحط شوية اضافات من عنده علشان يظبط الموضوع شويه اعتقد ان فى حلقه فى الموضوع ناقصه
***********
ملحوظه :- انا شاكك انه فيلم اصل كل الافلام اللى من النوع ده البواب او حارس البيت بيبقى اسمه عم اسماعين ههههه
‏قال Desert cat
عايش ولكن
ياريتنى كنت بحلم
كنت قومت عملت جمعيه لحقوق المرأة المهضومه
انما فى الموقف ده البنت اخدت حقها بطريقتها الخاصة
وبعدين احنا مش بنسمى عمو سيمعاين بواب بنسميه حارس المنزل لان الراجل عشرة عمر وموجود من زمان وبنعتبره واحد مننا والطبيعى بيت عائله وكل العائله متفرقه فى ارض الله الواسعه لازم يكون له حارس ولا نسيبه للحرامية هههههههههههه
اما الاسم مش هيختلف كتير عمو سيماعين عمو فيتامين مش مهم الاسم المهم انه قاعد بفايدة وبينقل لنا الاخبار
:)
تحياتى علاء

المشاركات الشائعة