اخبار تثير القئ العمد

هما فى الحقيقة خبران وليس خبر واحد
الاول ان السيد المحترم عضو مجلس الشعب احمد فتحى سرور هيعمل اجتماع يحاكم فيه معاليه اعضاء البرلمان ويختص بالمحاكمة عبدالعظيم وزير محافظ القاهره والسيد المحترم وزير الاسكان والسيد المحترم وزير التمية المحلية .. يعنى الحكومة هتحاكم الحكومة واحلى سلام وتحية لكل الناس الموجودة فى قلب المنطقة ديا .. يعنى لما هشام طلعت ابن الحكومة البار .. سورى ابن الاسكندرية البار يتحبس فى سجن 7 نجوم ويطلب مكتب يجى له وجهاز كمبيوتر واتنين محمول وسكرتيره الخاص كل يوم يزوره من الساعه 10صباحا للفطار لمتابعه اعماله من داخل السجن .. وكأن سيادته محبوس فى الفورسيزون مش فى برج العرب ... يبقى لما السيد المبجل رئيس مجلس الشعب يحاكم السادة الوزراء .. مش بعيد سيادته يلومهم ازاى الصخور مش وقعت على كل سكان الدويقة ومنشية ناصر واهى كانت ابادة جماعية للمنطقة كلها وخلصنا ...

نيجى بقى لعجب العجاب والمثير للاشمئزاز والقئ العمد والغثيان
ان السيد الاستاذ المبجل رئيس هيئة قناة السويس تبرع بمليون جنية لضحايا الدويقة .. واخدين بالكو تبرررررررع
تبرع من جيب السيد الوالد يعنى ... هى مش قناة السويس دى برضه هيئة حكومية ؟؟؟
وهما موظفين الحكومة من اول السيد الرئيس لحد الساعى فى اى مصلحة حكومية بيشتغلوا فى خدمة الشعب اللى المفروض انهم قائمين لحمايته والحفاظ على مصلحته وحفظ حقوقه ؟؟؟
ده المفروض وخير دليل عندنا من الحفاظ على الحقوق والمصالح الدويقة اقرب كارثة مش هفكروا باللى قبلها لانهم مش اتنسوا
يقوم السيد المحترم بكل فخر يقول انه تبرع لمنكوبى الدويقة بمليون دولار .. لما حكومتنا تتبرع لنا امال الدول التانية تقول ايه بنشحتكو يا كلاب
طيب هيئة قناة السويس والاستاذ الفاضل فاضل تبرع ذكاة عن صحته وصحة اولاده والسيد الرئيس
فين بقى باقى التبرعات من البترول للسياحة للزراعة للاستثمار والتنمية
ياريت كل الهيئات والوزارات فى مصر تتبرع للاجئين اللى قاعدين فى عزبتهم ده احنا حتى فى رمضان

البانر من عند نوارة

تعليقات

‏قال nody
ايه ده هما مش كانوا امموا القناه
ووقف عبد الناصر قال لما افتكر دليسبس انها شركه مساهمه مصريه؟
ولا دى كمان تمثليه زى تمثليه حادثه المنشيه؟
هههههههههههه
ماتخديش فى بالك احنا الى شغالين عندهم
قولى الحمد لله انه تبرع
‏قال tamer.sala7
يا بنتي الناس دي ماشية بنفس المبدأ اللي ماشي بيه السيد الرئيس وابنه

وهو ان اللي يلاقي عبيط وميستعبطوش ربنا يحاسبه

غير ان هشام طلعت ده مسجون في طرة مش في البرج لأن البرج ده بتاع المعتقلين السياسين والجنائيين مش رجال الاعمال الكبار

ومعلومة ليكي سجن مزرعة طرة ده حاجة كدة زي القناطر الخيرية ولو احنا مش في رمضان كنت كولت كلمة وسخة علي الراجل الناقص بتاع قناة السويس ده


يعني القناة كسبت 504 مليون دولار وده بيتبرع بـ مليون جنيه

بجد بقت عزبة الحج ابو جمال
‏قال Heart Beat
الصديقة العزيزة جدا على قلبي

Desert Cat

ايه بس الاخبار الجميلة دي

عندك حق و الله انها اخبار تثير القيء و الاشمئزاز كمان

هو مين ده اللي هايحاكم المحافظ و الوزراء

هي الناس دي مش قادرة ماتكدبش دقيقة واحدة في حياتها

خلاص بقت عادة يومية يعني

سلامات يا حكومة ياللي بتحاكمي الحكومة

الخبر ده ينفع برضه نكتة استهزائية بالحال المايل اللي الحكومة المبجلة فيه

و على رأيك لو كان العم مصطفى مسجون عادي و في انتظار محاكمته يبقى نحاكم الوزراء

لكنه مسجون ترانزيت زيه زي كل زبانية الحكومة و ان شاء الله السادة الوزراء اللي هايتحاكوا دول

و مش في اخبار بتقول ان الحكومة الذكية تتجه لتحويل المنطقة الى مقبرة جماعية و اردم و خلاص ... اصل يا حرام ريحة جثث الضحايا اللي الحكومة موتتهم بقت تقرف الحكومة اوي و مش طايقين الريحة فقالوا نردم عليهم و تخلص و اهو كمان نوفر فلوس المدافن

عارفه التبرع بتاع رئيس هيئة القناة ده بيفكرني بمقولة ان مجلس الشورى هايتم اصلاحه على نفقة الدولة يعني من جيوب الشعب

و الله لو لقوا حاجه في جيوبنا يتفضلوا ياخدوها يعني هو احنا هانبخل على البلد يعني

لا بس رئيس الهيئة ده باين عليه غني اوي على كده ... لانه بيمن على الغلابة بمبلغ و قدره يعني

يبقى صح على السادة الوزراء و روؤساء الهيئات الاخرى التبرع برضه من مالهم الخاص مش خصومات من موظفين الحكومة الغلابة

و الله يا قطة هاقول ايه بس

حاميها حراميها

و بانيها هاديها
‏قال صوت من مصر
عجبنى البانر جدا وكنت شوفته عند نواره
وبصراحه كده نحن شعب مظلوم على ارضه اه ومحكوم عليه بسجن حريته اه
لكن مش هنسكت على ام الهزار ده انا تعبت ؟
‏قال صوت من مصر
نسيت اقول حسبى الله ونعم الوكيل مع انى بقولها على الفطار
نعم ناااااااااااعععععععععععععععععممممممممممممممم

دي فضيحة
ده لازم يتعمل له حملة سودا على دماغ امه ونطالب بمسائلته
جاب منين الفلوس دي بروح امه؟

اتبرع بمليون جنيه؟ امال رصيده في البنك كام؟

وجابهم منين؟
‏قال maxbeta3zaman
دى بفى موش عاوزه نونوه ..دى عوزه كاك كاك + بعض الأصوات الأخرى غير المكتوبه لكنها مفهومه
المحاكمه المطلوبه حاتكون مليئة باللغط والفبركه ... وف عز الكلام حايطلب واحد "وطنى " التصويت على قرار بالعودة لجدول الأعمال ووقف المداوله ...موافقة ..خبطتين بالشاكوش الخشب ..السيد مقرر اللجنه يقرالنا القانون التالى عشان نلحق نفبركه اشطب "نفبركه" دى واكتب نناقشه ..شكوش خشب تانى ...والنبى حد يطس لنا الجماعه النايمين ورا دول بشوية مايه معدنيه ..بس ابعد عن بقهم عشان رمضان ...سناريو واحد
هوه فيه حد فى البر ميعرفشى ان الكنال ده دخله خاص ويتبع فتيس العمرانيه مباشرة وان العكومه العاكمه مالهاش أى يد فيها ؟؟ من شان هيك المسؤل لما يؤول اتبرع يبقى بيتبرع بأمر فتيس العمرانيه ومن فوائض العوائد ..اللى محدش له دعوه بيها ..سيناريو اتنين
‏قال صفا سارة
مممممممممممم
مممممممممممممممم
لا تعليق يا قطة
حرقة دم
مش عارفة الناس هتفوق امتة
‏قال AHMED SAMIR
انتي مش عارفة ان قناة السويس عزبة
زي بالضبط قطاع البترول ما هو عزبة
زي كمان كليات الطب في اي جامعة
كل الحاجات دي عزب و دول داخل الدولة
وعادي جدا لما رئيس جمهورية قناة السويس يتبرع بمليون جنيه للشعب المصري الشقيق
ولسه هانشوف
تحياااتي
‏قال HANY YASSIN
السلام عليكم
كل عام وانتي بخير
انت تتحدثين عن عصابة كلاً له دور اساسي وبعد ذلك يفعل ما يشاء يقتل واحد الف مليون عادي المهم يكون ادى دوره الساقط اللي شبهه
احمد عز فتحي سرور كل الاشكال دي
دول لازم يضربوا بالرصاص كلهم بس لما يشيلوا الحراسة وده مش هينفع لانهم اجبن كائنات الارض
تحياتي لك
هاني يس
‏قال سمراء
دي تاني مرة يحصل انهيار في جزء من المقطم
محدش فكر يعمل جسة ارض ويشوف اسباب واحتماليات الاجزاء اللي ممكن تنهار تاني
ويحموا الناس من ده ؟
طبعا دة تفكير ميثالي

اما بالنسبة للمحاكمة دي عاملة زي المقولة الشهيرة

اللي يحب النبي يزق

مفيش مشكلة كلنا بنساعد بعض

سمراء
‏قال mido g
فتحى سرور ده مضحك جدا
كان لسه مع لميس الحديدى فى برنامج (الاختيار الصعب)
بس ماتبعتش الافيهات اللى كان بيقولها
‏قال قلوب بتغنى
قطتى الجميله
كل سنه وانتى طيبه
بس انا زعلانه منك
يابت بطلى تلسنى على الكبرات
يابت هيجيبوكى من شعرك
السيد الفاضل اتفضل وشحتنا من فلوسنا نبوس ايده شعر ودقن ولا نقل ادبنا عليه زيك كده
وبعدددددددددددين
مش حلو البوستات بتاعتك على المصريين
‏قال غير معرف…
قطقوطتنا العسل
مساء الفل ياجميله

ايه الأخبار اللي تفتح النفس دي؟
و الله ياقطه الواحد مابقي عارف يعمل ايه و لا يقول ايه

كلم الجرايد و الساده المسؤلين بقه حاجه تقرف و تسد النفس و فعلا تجيب قئ مع سبق الاصرار و الترصد

ال بتوع الحكومه حيحاكموا بعض فاكرينا مختومين علي قفانا يعني و حنصدق الكلام ده؟

لأ و في بدايه سجن هشام طلعت قالولك انه لابس لبس السجن زي اي سجين عادي و هو اي سجين عادي بيعيش حياته داخل السجن زي اللي بيعمله هشام؟سكرتاريه و موبيل و لاب تكتوك
ده مبقاش سجن ده
دأنا مره سمعت في التليفزيون كان ساعتها العيد بايني و اتكلمت المذيعه مع بعض المساجين
عارفه ياقطه لو سمعتيهم بيتكلموا الواحد ممكن يتمني يكون مكانهم من كتر الحلاوه و العيشه اللذيذه جوه السجن و انهم موفرينلهم كل حاجه و مش مخالينهم محتاجين حاجه ده حتي صلاه الجمعه بيبعتلهم شيخ يؤمهم و علي لسان سجين قال دأحنا ممكن مايكونش عندنا الفرصه دي اننا نصلي جماعه بره السجن
وحياه أمك؟طب تقولي لناس زي دي ايه؟شوفي كلمه ابيحه مش عايزه اقولها
مساءك فل ياقمر
‏قال غير معرف…
شكرا ياقطه على تعليقك على الحدث الخطير الذى يفوق فى اهميته هبوط الأنسان على القمر وهو اعادة خلق اللحطات الأولى لمولد الكون فى المسرع الذرى الأوربى
ببساطهليفهم كل انسان ويهتم
هو ببساطه عمل فلاش باك للحظة مولد الكون ...لحظة مولد الكون لم يكن يوجد الا حساء او شوربه سميكه من الجسيمات الذريه ومن تجمع هذه الجسيمات بنى كل شىء من النجوم للكواكب للبشر ...وهم يريدون عمل سيناريو عكسى ...تفتيت الماده لتعود الى حالة الحساء الأولى ...ولمعرفة ما بداخل هذا الحساء بالظبط والعوامل التى تتحكم فيه(او تحكمت فيه عند بداية الكون)ابسط الموضوع قدر الأمكان حتى يفهم كل شخص ويهتم بالموضوع
كما هو منشور فى مدونتنا
http://netonradio.blogspot.com
‏قال أنا حر
سيبك انتي البانر ده جامد مووت جدا
كل اللي بتقوليه ده طبيعي قوي على فكرة لاننا في مصر وده عادي في زمن الفساد والظلم
ربنا معانا
تحياتي
يا لأخبارك المقرفة - عفوا قطتي الجميلة ولكن ليس فيها ما يبهج الخاطر..

أشفقي على نفسك عزيزتي وارحمينا من أخبار تدمي القلب..

معدرة على صفاقتي..

ومودتي الغامرة
‏قال dr.lecter
فاكره اغنيه مسلسل الوسيه؟

مين قال ان الدنيا دي وسيه؟

البيه بتاع قناه السويس جايبها من فلوس امه ولا ايه؟ دي فلوس الشعب ياولاد ال تييييييت ياللي بتاخدوا تييييييييت

اما عن طلعت مصطفي والهيصه

فعلي راي الاخ الشفيق الفاضل بعرور في قصيدته هيصه


هييصه هيصه هيصه هيصه هيصه
انا فاض بيا خلاااااااااص
مش قادر اقول تعليق
تقبل الله منا ومنك وأعاد علينا رمضان أعوام مديده وأزمنة كثيره
الشعب هو الباقي حي هو اللي كان هو اللي جاي
احمد فؤاد نجم


سيبقي الشعب وسيذهب الطغاة الي مذبلة التاريخ
‏قال الدرعمي
يا قطتي الجميلة

بعد السلامات والطيبون

الحكومة مش منتظر منها تصرف أحسن من كده

حكومة فاشلة بعيد عنك



كل سنة وأنت ِ طيبة



آدم
‏قال Ahmed Al-Sabbagh
هما لحقوا عملوا البانر

كل سنة وانتى طيبة يا حنان ورمضان حلو عليكى

اسود على اللى فى بالى
‏قال ابو احمد
هى فعلا أخبار تثير القئ والغثيان
وترفع الضغط وتجيب السكر كمان
تحياتى وكل سنه وانتى طيبه
‏قال محمد صالح
والله مالفروض فى رمضان ان معدلات الجريمه بتقل ولكن اللى اناملاحظه انها فى ارتفاع المهم بالنسبه لاخونا بتاع القناه فالمفروض دا انه يتحاسب فورى منين المليون دووول وعلى ما اظن انه مش مليونير
وحكاية هشام طلعت بتفكرنى بفيلم لعادل امام انه كان محامى وبيدافععن تاجر مخدرات وجوه زنزانته تلفزيون بالدش بتاعه وبانيو والمكتب الخاص بيه والعسكرى بينضفها له كل يوم مكدبش عادل امام لما وصف الوضع بالشكل دا
بلدنا بقت عايشه فى حاله فوضى ولازم قياده جديده تحل محل القياده الحاليه بداية من الرئيس الى المحليات
تحياتى
‏قال Abu Shahin
عجبنى اوى التساؤل ده فعلا

لما حكومتنا تتبرع لنا امال الدول التانية تعملنا ايه

فكرنى بجملة نصر القفاص .. الشعب المصرى الشقيق

وبعدين ايه الجديد ف الخبر الاولانى .. طول عمر الحكومة بتحاكم الحكومة و تبتقدم استجوابات للحكومة و بتمرر القوانين للحكومة فى مسرحية هزلية
‏قال Ahmed Fahmy
و الله فيه الخبر
‏قال غير معرف…
بعض حق .. عاد لاصحابه ولكن متأخرا قليلا .. لأ .. كثيرا
‏قال Misrdream
احب اطمنك يا قطه بالنسبه للخبر التاني
ان احنا م.م.ع
يعني الحكومه دي بتشتغل عندنا
لان احنا موش فاضيين ندور البلد
وان التبرع بتاع قناة السويس ده لفظ خاطيء وانا بسجل اعتراضي عليه فى الامم المتحده لان دي حركة اسمها العلمي
قطع التحويلات بمعني انهم قطعوا التحويل
المباشر من خزنة قناة السويس اللى بنوك زيورخ فى سويسيرا الى خزينة محافظة القاهرة ومن ثم يتم توزيعاه التوزيع الامثل على الجهات المختصه
اقعدوا بالعافيه
بلاش نكون سيئين النية
التبرع ده من فلوس القناة تقربا لله فى الشهر الكريم عغلشان إيراد القناة يزيد السنة اللى جايه
أما حكاية المحاكمة دى فده معناه اننا مش عاجبنا العجب
يعنى لما يسكتوا يبقوا وحشين ولما يحاكموا يبقوا وحشين.

بلاش كده خلينا كويسين
ههههههههههههههههه
‏قال Desert cat
nody_1987
نفس الخاطر جه فى بالى يا نودى
هى القناة مش كانت اتممت ؟؟
‏قال Desert cat
tamer.sala7
معلشى يا تامر غلطة مطبعيه
المهم انه محبوس فى سجن 7 نجوم
يعنى كانه عايش فى الحياة عادى خالص
‏قال Desert cat
Heart Beat
صديقتى الحبيبة ارق دقة قلب
يا حبيبتى الكدب بقى سمة مميزة
وعود وعهود ومفيش اى فعل
الدويقة اتحولت بالفعل مقبرة جماعيه والاهالى مهددين بالاعتقال لو حد خرج من بيته .. شوفتى عظمة مصر
محبتى يا قمراية
‏قال Desert cat
صوت من مصر
ما حانا بنقول مش هنسكت وهنتكلم وهنوق اللى فى نفسنا بقالنا سنين والحال زى ما انت شايف من سيئ لأسوء
‏قال Desert cat
جبهة التهييس الشعبية
المليون جنيه يا نوارة من دخل القناة
وبعدين رصيده فى البنك تلاقيه حاجه تافهه كام مليار بس
‏قال Desert cat
maxbeta3zaman
تفتكر يا ما تركيس مش هنشوف القاضى بيحكم لهشام طلعت ومحسن السكرى بالبراءة وبعدها يقوم يجرى . متخيلة نفس المنظر
اما فيتيس العمرانية فاعتقد البلد كلها تبعه
مش الكناة بس وعلشان كدا الواحد بيقول باقى الوزارات والهيئات تتبرع ذكاة عن الفيتيس
‏قال Desert cat
صفا
لاء مش منتظر يفوقوا لانهم دخلوا فى مرحلة الموت الاكلنكى
‏قال Desert cat
A.SAMIR
هى البلد كلها بقت عذبه واحنا الرعايا لا نملك سوى السمع والطاعة
‏قال Desert cat
HANY YASSIN
عليكم السلام ورحمة الله وبركاته
وانت طيب يا هانى
طبعا مش يقدروا يمشوا من غير حراسه مش بتشوف وقف الحال اللى بيسببوه للناس اثناء مرورهم فى الشوارع ده اسمه رعب لان اعمالهم سودا
تحياتى
‏قال Desert cat
سمراء
الانهيارات الصخرية بالفعل حدثت قبل كدا لكن مش بالشكل المكثف ده
وحذر خبراء من السكن فى المناطق دى لكن الناس الغلابة دى هتروح فين مش ليهم اى ماوى تانى غير الجبل اللى هو نفسه اتضايق منهم وسابهم لصخورة تجهض عليهم
المحكامة دى شيئ لحفظ ماء الوجه اللى هو مش موجود اصلا
تحياتى
‏قال Desert cat
mido g 2006
انا لما بشوف حد من الناس بغير القناة ده بيكون بالصدفة البحته لانى مش متابعه للتلفزيون
‏قال Desert cat
قلوب بتغنى
لا عاش ولا كان اللى يزعلك يا مشمشه بس معلشى اصلى واخده على خاطرى شوية من السادة المسؤلين كان لازم يفهمونا التيتة علشان مش نتصدم بالكوارث المتتالية دى كان قالوا انهم مش عايزنا فى عزبتهم بالذوق ولو مش مشينا منها يقتلونا بقى بمعرفتهم
‏قال Desert cat
الرائعة اجندا حمرا
ضحكتينى جدا بالرد الجميل ده حقيقى شر البلية ما يضحك
هشام طلعت قاعد فى الفورسيزون
والحكومة بتنيم الشعب تنويم مغناطيسى وتقولهم هنحاكم بعضشينا بس مش حد يتدخل ..
اما بقى المساجين اللى عايشين فى حياة مرفهه دول اللى نكته الموسم
امال جوابات الاستغاثة اللى كل يوم من جوا السجن دى ليه بيهزروا مع الجرايد
نورتينى يا جميله
‏قال Desert cat
اول برنامج أذاعى عن النت فى الشرق الأوسط
الشكر لله يا فندم
ويارب دائما مدونتكم واذاعتكم فى تقدم مستمر
‏قال Desert cat
أنا حر
طيب ما تتفضل البانر عندك يا احمد مش يغلى عليك
‏قال Desert cat
الصديق العزيز نبراس العتمة
هى فعلا الاخبار قمة فى الارف لذلك ليس هناك ما يدعو للاسف
واان اللى اعتذر عنها لكن ادى الحال اللى احنا عايشينه عزيزى
شرفتنى جدا
مودتى واحترامى
‏قال Desert cat
dr.lecter
والله يا دكتور حاجه تخلى الواحد يخرج عن شعوره
منهم لله كلهم
‏قال Desert cat
عايش ولكن
سلامتك يا علاء
بس الحال فعلا من سيئ لاسوء
‏قال Desert cat
اعشق فى اليل ضوء القمر
اللهم تقبل دعاء
‏قال Desert cat
محمد حلمي مخلوف
امتا يا محمد وهما بيخلصوا على الشعب بالالاف مرة واحده فى عبارات وقطارات ومقابر جماعيه
‏قال Desert cat
Dear ADAM
يا عزيزى الحكومة فاشله وفشلها بيدمر فى الشعب وفى البلد وفى كل حاجه لها قيمة فى بلدنا
كل سنة وانت بالف خير
‏قال Desert cat
Ahmed Al-Sabbagh
عصر السرعة يا احمد
كل سنة وانت بالف خير
ورمضان حلو عليك وعلينا وكل الناس اللى مننا فينا البعدا التانيين لالالالالالالالالاء
‏قال Desert cat
ابو احمد
دكتورنا الفاضل الف سلامة على حضرتك
هما لوحدهم اللهم امين
كل سنة وحضرتك واسرتك بالف خير
‏قال Desert cat
محمد صالح
المليون جنيه من دخل القناة بس هو بيقول تبرع بيهم شوفت الفرسه
اما فيلم عادل امام كدا خلاص واقعى بيتمثل بحذافيره فى سجن طره وقايم بدور البطولة رجل الاعمال المشهور بقتل المطربة اللى كانت مش مشهورة سوزان تميم
واحلى سلام لحسن سبناخ المحامى اللى كان فى الفيلم اللى هو عادل امام يعنى
تحياتى
‏قال Desert cat
Abu Shahin
ماهو ده اللى المفروض يقولوه فيما بعد كباراتنا تبرعنا للشعب المصرى الشقيق ده ان اعتبرونا شعب يعنى
موضوع الحكومة ده شيئ هزلى ادينا بنححاكم بعض اهوه مش حد يفتح بؤه بعد كدا
تحياتى
‏قال Desert cat
A7MeD F@hMy
ما انا بقول برضه المفروض نبعت له جواب شكر
كتر الف خيره
‏قال Desert cat
Sherif
عاد واحد من المليون
لكن فى صورة هبه وكانهم صعبان عليهم يقولوا حق من حقوق الشعب
‏قال Desert cat
Misrdream
ما هما اللى بيشتغلوا عندنا بيشحتونا دلوقتى يا احمد
بقولوا انهم تبرعوا لنا
بالنسبة لموضوع قطع التحويلات فده هنبلغهم بيه علشان يعملوا لبعض محاكمة هزلية
اقعد بالعافيه
‏قال Desert cat
قلب مصرى
ايون السيد مدير الهيئة كان قصده يبعد العين عن القناة ودخلها ويخرج زكاة رمضان عن صحته وعافيته وولاده
اما محكمة الحكومة للحكومة فانا مش متعودين علشان كدا مستغربين
تحياتى
‏قال PrInCeSS BeRy
ازيك يا قطتى عاملة اية يارب تكونى بخير معلش مقصرة معاكى ظروف بجد وانتى عارفة ميرسى لسؤالك عليا وربنا يخليكى ليا


تحياتى ليكى يا متميزة
‏قال Desert cat
PrInCeSS BeRy
كل سنة وانتى طيبة يا جميله وبالف خير
مفيش تقصير ولا حاجه
المهم طمنينى عن اخبارك
‏قال أسماء علي
معلش بقى لظروف اني مش باستحمل القيئ وكده عشان قرحة معدتي قايمة بالواجب دايما

أأقدر أقولك بكل بساطة وجمال جملة واحدة جات ف بالي

ياحلاووووووووووووووة

المشاركات الشائعة