اخبار تثير القئ العمد

هما فى الحقيقة خبران وليس خبر واحد
الاول ان السيد المحترم عضو مجلس الشعب احمد فتحى سرور هيعمل اجتماع يحاكم فيه معاليه اعضاء البرلمان ويختص بالمحاكمة عبدالعظيم وزير محافظ القاهره والسيد المحترم وزير الاسكان والسيد المحترم وزير التمية المحلية .. يعنى الحكومة هتحاكم الحكومة واحلى سلام وتحية لكل الناس الموجودة فى قلب المنطقة ديا .. يعنى لما هشام طلعت ابن الحكومة البار .. سورى ابن الاسكندرية البار يتحبس فى سجن 7 نجوم ويطلب مكتب يجى له وجهاز كمبيوتر واتنين محمول وسكرتيره الخاص كل يوم يزوره من الساعه 10صباحا للفطار لمتابعه اعماله من داخل السجن .. وكأن سيادته محبوس فى الفورسيزون مش فى برج العرب ... يبقى لما السيد المبجل رئيس مجلس الشعب يحاكم السادة الوزراء .. مش بعيد سيادته يلومهم ازاى الصخور مش وقعت على كل سكان الدويقة ومنشية ناصر واهى كانت ابادة جماعية للمنطقة كلها وخلصنا ...

نيجى بقى لعجب العجاب والمثير للاشمئزاز والقئ العمد والغثيان
ان السيد الاستاذ المبجل رئيس هيئة قناة السويس تبرع بمليون جنية لضحايا الدويقة .. واخدين بالكو تبرررررررع
تبرع من جيب السيد الوالد يعنى ... هى مش قناة السويس دى برضه هيئة حكومية ؟؟؟
وهما موظفين الحكومة من اول السيد الرئيس لحد الساعى فى اى مصلحة حكومية بيشتغلوا فى خدمة الشعب اللى المفروض انهم قائمين لحمايته والحفاظ على مصلحته وحفظ حقوقه ؟؟؟
ده المفروض وخير دليل عندنا من الحفاظ على الحقوق والمصالح الدويقة اقرب كارثة مش هفكروا باللى قبلها لانهم مش اتنسوا
يقوم السيد المحترم بكل فخر يقول انه تبرع لمنكوبى الدويقة بمليون دولار .. لما حكومتنا تتبرع لنا امال الدول التانية تقول ايه بنشحتكو يا كلاب
طيب هيئة قناة السويس والاستاذ الفاضل فاضل تبرع ذكاة عن صحته وصحة اولاده والسيد الرئيس
فين بقى باقى التبرعات من البترول للسياحة للزراعة للاستثمار والتنمية
ياريت كل الهيئات والوزارات فى مصر تتبرع للاجئين اللى قاعدين فى عزبتهم ده احنا حتى فى رمضان

البانر من عند نوارة

Comments

nody_1987 said…
ايه ده هما مش كانوا امموا القناه
ووقف عبد الناصر قال لما افتكر دليسبس انها شركه مساهمه مصريه؟
ولا دى كمان تمثليه زى تمثليه حادثه المنشيه؟
هههههههههههه
ماتخديش فى بالك احنا الى شغالين عندهم
قولى الحمد لله انه تبرع
tamer.sala7 said…
يا بنتي الناس دي ماشية بنفس المبدأ اللي ماشي بيه السيد الرئيس وابنه

وهو ان اللي يلاقي عبيط وميستعبطوش ربنا يحاسبه

غير ان هشام طلعت ده مسجون في طرة مش في البرج لأن البرج ده بتاع المعتقلين السياسين والجنائيين مش رجال الاعمال الكبار

ومعلومة ليكي سجن مزرعة طرة ده حاجة كدة زي القناطر الخيرية ولو احنا مش في رمضان كنت كولت كلمة وسخة علي الراجل الناقص بتاع قناة السويس ده


يعني القناة كسبت 504 مليون دولار وده بيتبرع بـ مليون جنيه

بجد بقت عزبة الحج ابو جمال
Heart Beat said…
الصديقة العزيزة جدا على قلبي

Desert Cat

ايه بس الاخبار الجميلة دي

عندك حق و الله انها اخبار تثير القيء و الاشمئزاز كمان

هو مين ده اللي هايحاكم المحافظ و الوزراء

هي الناس دي مش قادرة ماتكدبش دقيقة واحدة في حياتها

خلاص بقت عادة يومية يعني

سلامات يا حكومة ياللي بتحاكمي الحكومة

الخبر ده ينفع برضه نكتة استهزائية بالحال المايل اللي الحكومة المبجلة فيه

و على رأيك لو كان العم مصطفى مسجون عادي و في انتظار محاكمته يبقى نحاكم الوزراء

لكنه مسجون ترانزيت زيه زي كل زبانية الحكومة و ان شاء الله السادة الوزراء اللي هايتحاكوا دول

و مش في اخبار بتقول ان الحكومة الذكية تتجه لتحويل المنطقة الى مقبرة جماعية و اردم و خلاص ... اصل يا حرام ريحة جثث الضحايا اللي الحكومة موتتهم بقت تقرف الحكومة اوي و مش طايقين الريحة فقالوا نردم عليهم و تخلص و اهو كمان نوفر فلوس المدافن

عارفه التبرع بتاع رئيس هيئة القناة ده بيفكرني بمقولة ان مجلس الشورى هايتم اصلاحه على نفقة الدولة يعني من جيوب الشعب

و الله لو لقوا حاجه في جيوبنا يتفضلوا ياخدوها يعني هو احنا هانبخل على البلد يعني

لا بس رئيس الهيئة ده باين عليه غني اوي على كده ... لانه بيمن على الغلابة بمبلغ و قدره يعني

يبقى صح على السادة الوزراء و روؤساء الهيئات الاخرى التبرع برضه من مالهم الخاص مش خصومات من موظفين الحكومة الغلابة

و الله يا قطة هاقول ايه بس

حاميها حراميها

و بانيها هاديها
عجبنى البانر جدا وكنت شوفته عند نواره
وبصراحه كده نحن شعب مظلوم على ارضه اه ومحكوم عليه بسجن حريته اه
لكن مش هنسكت على ام الهزار ده انا تعبت ؟
نسيت اقول حسبى الله ونعم الوكيل مع انى بقولها على الفطار
نعم ناااااااااااعععععععععععععععععممممممممممممممم

دي فضيحة
ده لازم يتعمل له حملة سودا على دماغ امه ونطالب بمسائلته
جاب منين الفلوس دي بروح امه؟

اتبرع بمليون جنيه؟ امال رصيده في البنك كام؟

وجابهم منين؟
maxbeta3zaman said…
دى بفى موش عاوزه نونوه ..دى عوزه كاك كاك + بعض الأصوات الأخرى غير المكتوبه لكنها مفهومه
المحاكمه المطلوبه حاتكون مليئة باللغط والفبركه ... وف عز الكلام حايطلب واحد "وطنى " التصويت على قرار بالعودة لجدول الأعمال ووقف المداوله ...موافقة ..خبطتين بالشاكوش الخشب ..السيد مقرر اللجنه يقرالنا القانون التالى عشان نلحق نفبركه اشطب "نفبركه" دى واكتب نناقشه ..شكوش خشب تانى ...والنبى حد يطس لنا الجماعه النايمين ورا دول بشوية مايه معدنيه ..بس ابعد عن بقهم عشان رمضان ...سناريو واحد
هوه فيه حد فى البر ميعرفشى ان الكنال ده دخله خاص ويتبع فتيس العمرانيه مباشرة وان العكومه العاكمه مالهاش أى يد فيها ؟؟ من شان هيك المسؤل لما يؤول اتبرع يبقى بيتبرع بأمر فتيس العمرانيه ومن فوائض العوائد ..اللى محدش له دعوه بيها ..سيناريو اتنين
صفا said…
مممممممممممم
مممممممممممممممم
لا تعليق يا قطة
حرقة دم
مش عارفة الناس هتفوق امتة
A.SAMIR said…
انتي مش عارفة ان قناة السويس عزبة
زي بالضبط قطاع البترول ما هو عزبة
زي كمان كليات الطب في اي جامعة
كل الحاجات دي عزب و دول داخل الدولة
وعادي جدا لما رئيس جمهورية قناة السويس يتبرع بمليون جنيه للشعب المصري الشقيق
ولسه هانشوف
تحياااتي
HANY YASSIN said…
السلام عليكم
كل عام وانتي بخير
انت تتحدثين عن عصابة كلاً له دور اساسي وبعد ذلك يفعل ما يشاء يقتل واحد الف مليون عادي المهم يكون ادى دوره الساقط اللي شبهه
احمد عز فتحي سرور كل الاشكال دي
دول لازم يضربوا بالرصاص كلهم بس لما يشيلوا الحراسة وده مش هينفع لانهم اجبن كائنات الارض
تحياتي لك
هاني يس
سمراء said…
دي تاني مرة يحصل انهيار في جزء من المقطم
محدش فكر يعمل جسة ارض ويشوف اسباب واحتماليات الاجزاء اللي ممكن تنهار تاني
ويحموا الناس من ده ؟
طبعا دة تفكير ميثالي

اما بالنسبة للمحاكمة دي عاملة زي المقولة الشهيرة

اللي يحب النبي يزق

مفيش مشكلة كلنا بنساعد بعض

سمراء
mido g 2006 said…
فتحى سرور ده مضحك جدا
كان لسه مع لميس الحديدى فى برنامج (الاختيار الصعب)
بس ماتبعتش الافيهات اللى كان بيقولها
قطتى الجميله
كل سنه وانتى طيبه
بس انا زعلانه منك
يابت بطلى تلسنى على الكبرات
يابت هيجيبوكى من شعرك
السيد الفاضل اتفضل وشحتنا من فلوسنا نبوس ايده شعر ودقن ولا نقل ادبنا عليه زيك كده
وبعدددددددددددين
مش حلو البوستات بتاعتك على المصريين
قطقوطتنا العسل
مساء الفل ياجميله

ايه الأخبار اللي تفتح النفس دي؟
و الله ياقطه الواحد مابقي عارف يعمل ايه و لا يقول ايه

كلم الجرايد و الساده المسؤلين بقه حاجه تقرف و تسد النفس و فعلا تجيب قئ مع سبق الاصرار و الترصد

ال بتوع الحكومه حيحاكموا بعض فاكرينا مختومين علي قفانا يعني و حنصدق الكلام ده؟

لأ و في بدايه سجن هشام طلعت قالولك انه لابس لبس السجن زي اي سجين عادي و هو اي سجين عادي بيعيش حياته داخل السجن زي اللي بيعمله هشام؟سكرتاريه و موبيل و لاب تكتوك
ده مبقاش سجن ده
دأنا مره سمعت في التليفزيون كان ساعتها العيد بايني و اتكلمت المذيعه مع بعض المساجين
عارفه ياقطه لو سمعتيهم بيتكلموا الواحد ممكن يتمني يكون مكانهم من كتر الحلاوه و العيشه اللذيذه جوه السجن و انهم موفرينلهم كل حاجه و مش مخالينهم محتاجين حاجه ده حتي صلاه الجمعه بيبعتلهم شيخ يؤمهم و علي لسان سجين قال دأحنا ممكن مايكونش عندنا الفرصه دي اننا نصلي جماعه بره السجن
وحياه أمك؟طب تقولي لناس زي دي ايه؟شوفي كلمه ابيحه مش عايزه اقولها
مساءك فل ياقمر
اول برنامج أذاعى عن النت فى الشرق الأوسط said…
شكرا ياقطه على تعليقك على الحدث الخطير الذى يفوق فى اهميته هبوط الأنسان على القمر وهو اعادة خلق اللحطات الأولى لمولد الكون فى المسرع الذرى الأوربى
ببساطهليفهم كل انسان ويهتم
هو ببساطه عمل فلاش باك للحظة مولد الكون ...لحظة مولد الكون لم يكن يوجد الا حساء او شوربه سميكه من الجسيمات الذريه ومن تجمع هذه الجسيمات بنى كل شىء من النجوم للكواكب للبشر ...وهم يريدون عمل سيناريو عكسى ...تفتيت الماده لتعود الى حالة الحساء الأولى ...ولمعرفة ما بداخل هذا الحساء بالظبط والعوامل التى تتحكم فيه(او تحكمت فيه عند بداية الكون)ابسط الموضوع قدر الأمكان حتى يفهم كل شخص ويهتم بالموضوع
كما هو منشور فى مدونتنا
http://netonradio.blogspot.com
أنا حر said…
سيبك انتي البانر ده جامد مووت جدا
كل اللي بتقوليه ده طبيعي قوي على فكرة لاننا في مصر وده عادي في زمن الفساد والظلم
ربنا معانا
تحياتي
يا لأخبارك المقرفة - عفوا قطتي الجميلة ولكن ليس فيها ما يبهج الخاطر..

أشفقي على نفسك عزيزتي وارحمينا من أخبار تدمي القلب..

معدرة على صفاقتي..

ومودتي الغامرة
dr.lecter said…
فاكره اغنيه مسلسل الوسيه؟

مين قال ان الدنيا دي وسيه؟

البيه بتاع قناه السويس جايبها من فلوس امه ولا ايه؟ دي فلوس الشعب ياولاد ال تييييييت ياللي بتاخدوا تييييييييت

اما عن طلعت مصطفي والهيصه

فعلي راي الاخ الشفيق الفاضل بعرور في قصيدته هيصه


هييصه هيصه هيصه هيصه هيصه
انا فاض بيا خلاااااااااص
مش قادر اقول تعليق
تقبل الله منا ومنك وأعاد علينا رمضان أعوام مديده وأزمنة كثيره
الشعب هو الباقي حي هو اللي كان هو اللي جاي
احمد فؤاد نجم


سيبقي الشعب وسيذهب الطغاة الي مذبلة التاريخ
ADAM said…
يا قطتي الجميلة

بعد السلامات والطيبون

الحكومة مش منتظر منها تصرف أحسن من كده

حكومة فاشلة بعيد عنك



كل سنة وأنت ِ طيبة



آدم
هما لحقوا عملوا البانر

كل سنة وانتى طيبة يا حنان ورمضان حلو عليكى

اسود على اللى فى بالى
ابو احمد said…
هى فعلا أخبار تثير القئ والغثيان
وترفع الضغط وتجيب السكر كمان
تحياتى وكل سنه وانتى طيبه
والله مالفروض فى رمضان ان معدلات الجريمه بتقل ولكن اللى اناملاحظه انها فى ارتفاع المهم بالنسبه لاخونا بتاع القناه فالمفروض دا انه يتحاسب فورى منين المليون دووول وعلى ما اظن انه مش مليونير
وحكاية هشام طلعت بتفكرنى بفيلم لعادل امام انه كان محامى وبيدافععن تاجر مخدرات وجوه زنزانته تلفزيون بالدش بتاعه وبانيو والمكتب الخاص بيه والعسكرى بينضفها له كل يوم مكدبش عادل امام لما وصف الوضع بالشكل دا
بلدنا بقت عايشه فى حاله فوضى ولازم قياده جديده تحل محل القياده الحاليه بداية من الرئيس الى المحليات
تحياتى
Abu Shahin said…
عجبنى اوى التساؤل ده فعلا

لما حكومتنا تتبرع لنا امال الدول التانية تعملنا ايه

فكرنى بجملة نصر القفاص .. الشعب المصرى الشقيق

وبعدين ايه الجديد ف الخبر الاولانى .. طول عمر الحكومة بتحاكم الحكومة و تبتقدم استجوابات للحكومة و بتمرر القوانين للحكومة فى مسرحية هزلية
A7MeD F@hMy said…
و الله فيه الخبر
Sherif said…
بعض حق .. عاد لاصحابه ولكن متأخرا قليلا .. لأ .. كثيرا
Misrdream said…
احب اطمنك يا قطه بالنسبه للخبر التاني
ان احنا م.م.ع
يعني الحكومه دي بتشتغل عندنا
لان احنا موش فاضيين ندور البلد
وان التبرع بتاع قناة السويس ده لفظ خاطيء وانا بسجل اعتراضي عليه فى الامم المتحده لان دي حركة اسمها العلمي
قطع التحويلات بمعني انهم قطعوا التحويل
المباشر من خزنة قناة السويس اللى بنوك زيورخ فى سويسيرا الى خزينة محافظة القاهرة ومن ثم يتم توزيعاه التوزيع الامثل على الجهات المختصه
اقعدوا بالعافيه
قلب مصرى said…
بلاش نكون سيئين النية
التبرع ده من فلوس القناة تقربا لله فى الشهر الكريم عغلشان إيراد القناة يزيد السنة اللى جايه
أما حكاية المحاكمة دى فده معناه اننا مش عاجبنا العجب
يعنى لما يسكتوا يبقوا وحشين ولما يحاكموا يبقوا وحشين.

بلاش كده خلينا كويسين
ههههههههههههههههه
Desert cat said…
nody_1987
نفس الخاطر جه فى بالى يا نودى
هى القناة مش كانت اتممت ؟؟
Desert cat said…
tamer.sala7
معلشى يا تامر غلطة مطبعيه
المهم انه محبوس فى سجن 7 نجوم
يعنى كانه عايش فى الحياة عادى خالص
Desert cat said…
Heart Beat
صديقتى الحبيبة ارق دقة قلب
يا حبيبتى الكدب بقى سمة مميزة
وعود وعهود ومفيش اى فعل
الدويقة اتحولت بالفعل مقبرة جماعيه والاهالى مهددين بالاعتقال لو حد خرج من بيته .. شوفتى عظمة مصر
محبتى يا قمراية
Desert cat said…
صوت من مصر
ما حانا بنقول مش هنسكت وهنتكلم وهنوق اللى فى نفسنا بقالنا سنين والحال زى ما انت شايف من سيئ لأسوء
Desert cat said…
جبهة التهييس الشعبية
المليون جنيه يا نوارة من دخل القناة
وبعدين رصيده فى البنك تلاقيه حاجه تافهه كام مليار بس
Desert cat said…
maxbeta3zaman
تفتكر يا ما تركيس مش هنشوف القاضى بيحكم لهشام طلعت ومحسن السكرى بالبراءة وبعدها يقوم يجرى . متخيلة نفس المنظر
اما فيتيس العمرانية فاعتقد البلد كلها تبعه
مش الكناة بس وعلشان كدا الواحد بيقول باقى الوزارات والهيئات تتبرع ذكاة عن الفيتيس
Desert cat said…
صفا
لاء مش منتظر يفوقوا لانهم دخلوا فى مرحلة الموت الاكلنكى
Desert cat said…
A.SAMIR
هى البلد كلها بقت عذبه واحنا الرعايا لا نملك سوى السمع والطاعة
Desert cat said…
HANY YASSIN
عليكم السلام ورحمة الله وبركاته
وانت طيب يا هانى
طبعا مش يقدروا يمشوا من غير حراسه مش بتشوف وقف الحال اللى بيسببوه للناس اثناء مرورهم فى الشوارع ده اسمه رعب لان اعمالهم سودا
تحياتى
Desert cat said…
سمراء
الانهيارات الصخرية بالفعل حدثت قبل كدا لكن مش بالشكل المكثف ده
وحذر خبراء من السكن فى المناطق دى لكن الناس الغلابة دى هتروح فين مش ليهم اى ماوى تانى غير الجبل اللى هو نفسه اتضايق منهم وسابهم لصخورة تجهض عليهم
المحكامة دى شيئ لحفظ ماء الوجه اللى هو مش موجود اصلا
تحياتى
Desert cat said…
mido g 2006
انا لما بشوف حد من الناس بغير القناة ده بيكون بالصدفة البحته لانى مش متابعه للتلفزيون
Desert cat said…
قلوب بتغنى
لا عاش ولا كان اللى يزعلك يا مشمشه بس معلشى اصلى واخده على خاطرى شوية من السادة المسؤلين كان لازم يفهمونا التيتة علشان مش نتصدم بالكوارث المتتالية دى كان قالوا انهم مش عايزنا فى عزبتهم بالذوق ولو مش مشينا منها يقتلونا بقى بمعرفتهم
Desert cat said…
الرائعة اجندا حمرا
ضحكتينى جدا بالرد الجميل ده حقيقى شر البلية ما يضحك
هشام طلعت قاعد فى الفورسيزون
والحكومة بتنيم الشعب تنويم مغناطيسى وتقولهم هنحاكم بعضشينا بس مش حد يتدخل ..
اما بقى المساجين اللى عايشين فى حياة مرفهه دول اللى نكته الموسم
امال جوابات الاستغاثة اللى كل يوم من جوا السجن دى ليه بيهزروا مع الجرايد
نورتينى يا جميله
Desert cat said…
اول برنامج أذاعى عن النت فى الشرق الأوسط
الشكر لله يا فندم
ويارب دائما مدونتكم واذاعتكم فى تقدم مستمر
Desert cat said…
أنا حر
طيب ما تتفضل البانر عندك يا احمد مش يغلى عليك
Desert cat said…
الصديق العزيز نبراس العتمة
هى فعلا الاخبار قمة فى الارف لذلك ليس هناك ما يدعو للاسف
واان اللى اعتذر عنها لكن ادى الحال اللى احنا عايشينه عزيزى
شرفتنى جدا
مودتى واحترامى
Desert cat said…
dr.lecter
والله يا دكتور حاجه تخلى الواحد يخرج عن شعوره
منهم لله كلهم
Desert cat said…
عايش ولكن
سلامتك يا علاء
بس الحال فعلا من سيئ لاسوء
Desert cat said…
اعشق فى اليل ضوء القمر
اللهم تقبل دعاء
Desert cat said…
محمد حلمي مخلوف
امتا يا محمد وهما بيخلصوا على الشعب بالالاف مرة واحده فى عبارات وقطارات ومقابر جماعيه
Desert cat said…
Dear ADAM
يا عزيزى الحكومة فاشله وفشلها بيدمر فى الشعب وفى البلد وفى كل حاجه لها قيمة فى بلدنا
كل سنة وانت بالف خير
Desert cat said…
Ahmed Al-Sabbagh
عصر السرعة يا احمد
كل سنة وانت بالف خير
ورمضان حلو عليك وعلينا وكل الناس اللى مننا فينا البعدا التانيين لالالالالالالالالاء
Desert cat said…
ابو احمد
دكتورنا الفاضل الف سلامة على حضرتك
هما لوحدهم اللهم امين
كل سنة وحضرتك واسرتك بالف خير
Desert cat said…
محمد صالح
المليون جنيه من دخل القناة بس هو بيقول تبرع بيهم شوفت الفرسه
اما فيلم عادل امام كدا خلاص واقعى بيتمثل بحذافيره فى سجن طره وقايم بدور البطولة رجل الاعمال المشهور بقتل المطربة اللى كانت مش مشهورة سوزان تميم
واحلى سلام لحسن سبناخ المحامى اللى كان فى الفيلم اللى هو عادل امام يعنى
تحياتى
Desert cat said…
Abu Shahin
ماهو ده اللى المفروض يقولوه فيما بعد كباراتنا تبرعنا للشعب المصرى الشقيق ده ان اعتبرونا شعب يعنى
موضوع الحكومة ده شيئ هزلى ادينا بنححاكم بعض اهوه مش حد يفتح بؤه بعد كدا
تحياتى
Desert cat said…
A7MeD F@hMy
ما انا بقول برضه المفروض نبعت له جواب شكر
كتر الف خيره
Desert cat said…
Sherif
عاد واحد من المليون
لكن فى صورة هبه وكانهم صعبان عليهم يقولوا حق من حقوق الشعب
Desert cat said…
Misrdream
ما هما اللى بيشتغلوا عندنا بيشحتونا دلوقتى يا احمد
بقولوا انهم تبرعوا لنا
بالنسبة لموضوع قطع التحويلات فده هنبلغهم بيه علشان يعملوا لبعض محاكمة هزلية
اقعد بالعافيه
Desert cat said…
قلب مصرى
ايون السيد مدير الهيئة كان قصده يبعد العين عن القناة ودخلها ويخرج زكاة رمضان عن صحته وعافيته وولاده
اما محكمة الحكومة للحكومة فانا مش متعودين علشان كدا مستغربين
تحياتى
PrInCeSS BeRy said…
ازيك يا قطتى عاملة اية يارب تكونى بخير معلش مقصرة معاكى ظروف بجد وانتى عارفة ميرسى لسؤالك عليا وربنا يخليكى ليا


تحياتى ليكى يا متميزة
Desert cat said…
PrInCeSS BeRy
كل سنة وانتى طيبة يا جميله وبالف خير
مفيش تقصير ولا حاجه
المهم طمنينى عن اخبارك
معلش بقى لظروف اني مش باستحمل القيئ وكده عشان قرحة معدتي قايمة بالواجب دايما

أأقدر أقولك بكل بساطة وجمال جملة واحدة جات ف بالي

ياحلاووووووووووووووة

Popular posts from this blog

قميص دهشور

كل تحرش وانتوا طيبين