اسقاطات

من المعروف للجميع ان الاسقاط هو نوع من انواع الاضطراب النفسى ومن السهل ملاحظته فى خلال معاملتنا مع الشخص
فالاسقاط هو حيله دفاعية يستخدمها المضطرب نفسيا لينسب عيوبه وكبته للأخرين حتى يبعد الانظار عنه
فاحيانا تقابل من يدعى الوطنية وحبه الجم وانتمائه لوطنه وعند اول اختبار حقيقى تجده ذهب مع الريح لتفاجا به ينسب فشله وهروبه الى اخر .. هو اللى هرب مش انا .. اصله تقريبا افتكر ان وراه مشوار مهم فى الوقت ده .. لكن المجهول هو اللى هرب
وهناك من لم يكف لسانه عن ذكر الله وذكر رسوله ... وتجده فى المعاملة لا يتقى الله ولا رسوله وحينما تحدثه بان الدين المعاملة يكون رده الفورى كما من الاتهامات لم توجد بك انت ولكن ما به يلصقه بك حتى يشعر براحة ..
وهناك من ليس لديه اصل ولا يعلم من هو وتجده يخترع حكايات ومؤلفات عن عائلته الوهمية التى لا يوجد لها اى اساس او ربما طرد من بينهم فى يوم من الايام وعندما يشعر بدفئك بين عائلتك تجده ينسب ما به بك كى يشعر بالراحة النفسية ولا ادرى اى راحة نفسية هذه ولكن ليس على المضطرب نفسيا حرج ...
وهناك الكاذب الافاق الذى يدعى ما ليس به من دين وعلم ومعرفه وعندما تقترب منه تجده سطحى هش لا قاعدة له ولا سقف ايضا فهو متدين لغرض ما وسياسى لغرض اخر ... وان تحاورت معه فجميع الناس هكذا وهو العالم الوحيد فى هذه الحياة
موقف اثارنى وجعلنى اتذكر كل الكلام اعلاه
الصبح كنت فى البنك ... فى طريقى توقعت انى الاقيه فاضى لاننا فى رمضان والحياة صعبة شويتين تلاته اربعه المهم توقعاتى جت العكس ولا قيت على شباك الايداع ناس كتيييير طبعا العرف السائد فى اى مكان ان فى طابور ستات وطابور رجاله وانا اكره موت وقفة الطوابير دى زمان البنك كان جنبى مباشرة مش كنت بقف كنت بروح شوية لما يكون فاضى وارجع لكن دلوقتى بعيد شوية فمضطرة انتظر .. موضوع النقل من مكان لمكان ده صعب عليا حاجات كتير ما علينا ... قربت من الشباك الموظف قالى خلى الفلوس معاكى هاتى الدفتر بس وانا هنادى اسمك قولت وماله روحت قعدت لما ينادينى .. جنبى اتنين ستات الست الداعية قاعدة فى النص بينى وبين واحدة تانية ... وقاعدة تتكلم عن رمضان وفضل رمضان والتانية شكلها من الناس اللى بتكبر دماغها وتسمع من هنا وتطلع من هناك عمال تهز دماغها وخلاص ... شوية ولاقيتها بتوجه لى الكلام انتى عارفه يا اختى رمضان ده زى الضيف العزيز اللى عينك بتتمناه .. مش لما بيجى لك ضيف عزيز بتقدمى له كل اللى عندك فى البيت وبتتمنى تشيليه من على الارض شيل ... اهو رمضان كدا بالظبط لازم نقدم له كل الطاعات والعبادات ونصوم ونقرا قران ونؤدى كل الفروض والتراويح ده هو شهر فى السنة ... قولت لها يعنى مش نصلى طول السنة ولا نؤدى الفروض غير فى رمضان بس ؟؟؟
قالت لى انتى هتغلطينى ليه انا مش قولت كدا انا بقول نعبده زى ما ربنا امر ... نعبد مين يا ست انتى ؟؟ نعبد رمضان ؟؟؟ ايوا ده شهر مفضل عند ربنا يبقى ازاى مش نقيم الليل ومش نقرا القران كله حتى لو الواحد بيموت لازم يصوم ويصلى ... سالتها مين اللى قالك الكلام ده .. ده ربنا نفسه بيقول وان كنت مريضا او على سفر فعدة من ايام اخر .. مش لو بنموت نصوم ونصلى ... وبعدين احنا مش بنعبد رمضان احنا بنعبد رب رمضان وهو نفسه رب كل الشهور يمكن رمضان له قدسية بين الشهور اينعم لانه شهر القرآن والصوم للتقوى .. ربنا لما فرض الصيام قال لعلكم تتقون مش لعلكم تعبدون رمضان ... سابت كل الحوار ده ومسكت فى انا ديانتى ايه .. اصلى كدا بغلط فى رمضان ... سالتها انتى حافظة كام جزء من القرآن لاقيتها بتجاوبنى على حاجه تانيه خالص قالت انها دارسه دين وبتحضر دروس دينية فى المسجد ومن واجبها انها ترشد للطريق الصحيح .. يا ستى ارشدى مش حد ماسك فى لوزك .. بس مش تقولى كلام مغلوط كفاية الجهل اللى الناس فيه ...
واحدة تانية واقفه تقولى هما ضافوا الارباح بتاع شهر 7 اصلى مش جيت من زمان قولت لها مش عارفه انا برضه مش جيت هنا انا كنت بروح هناك .. لاقيتها خبطت الكلمة فى وشى .. انا مش عارفه اخدهم ولا لاء اصل الشيخ كان بيقول ان الارباح حرام .. خلا الواحد يشك فى كل الفلوس اللى اخدها قبل كدا .. مش عارفه اعمل ايه لو الارباح دى حرام .. قولت لها يا ستى الشيوخ دى مش وراها حاجه غير انها تحرم الحلال وتحلل الحرام وتشكك الناس فى نفسها مش تتفرجى على الناس دى تانى .. يعنى ارباح البنوك حرام وفلوس الفتاوى الهزلية اللى قاعدين يفتوا بيها طول النهار فى القنوات دى حلال ... يعنى انتى تشيلى فلوسك فى بنك حرام وهما ثرواتهم بالملايين فى بنوك سويسرا وامريكا حلال .. قالت لى ربنا يسامحنا بقى لو حرام ... قولت لها حلى الموضوع واتصلى بدار الافتاء مش تعتمدى على القنوات الهابطة ... لسه بترد وتقولى هابطة ازاى .. الموظف نادى اسمى ودخلت عملت الايداع طبعا هى سمعت اسمى لما الموظف ناداه وانا ماشية لاقيتها بتقولى انتى ساكنه فين يا حنون .. قولت لها فى دنيا الله الواسعه ومشيت على طول ... طيب انا قاعده احسبها مع نفسى من الصبح لحد دلوقتى لاقيت ان كل واحد عنده استعداد يسلم دماغه لاى حد وكانه بيدق ... ولما تيجى تكلمه تلاقيه بيلومك ويتهمك باللى فيه هو شخصيا ...
الست الداعية اللى مفوضة نفسها تدى دروس فى الاماكن العامة ولما ترد عليها تشكك فى دينك و الست اللى خايفة ان فوايد البنك حرام نظرا لقول الشيخ بتاع التلفزيون وبرضه بتسال عنها وهتاخدها .. والشيخ بتاع التلفزيون اللى شكك الناس فى نفسها مع ان هو نفسه بيتربح من الفتة اللى بيفتها كل يوم والتانى ... من كام يوم استاذى الجميل سالنى .. اين اختفت عبارة والله اعلم التى كان يقولها المفتى بعد كل فتواه .. كان يقول هذا والله اعلم .. دلوقتى بقوا بيقولوا الفتوى وكانها قران كريم لا جدال فيها .. قولت له الاول كان فى ناس بتفهم .. وبتسال بعد كل فتوى عن مدى صحتها مع انها من دار الافتاء وعلى لسان المفتى نفسه ... كمان خوفه من ربنا انه يقول حيحرم حاجه وتطلع حلال والعكس وكان فى احترام لعقول الناس .. كمان الناس كان بتتبين مدى صحة الكلام من الكتاب والسنة .. لكن دلوقتى الناس فى دوامة ومسلمة عقلها لاى حد يلعب فيها شطرنج ..
اضطرابات نفسية ادت الى فصام ثم اسقاط وادى النتيجة

تعليقات

‏قال Yasmine
انا كنت كاتبة الكلام ده من كام يوم عشان احطه فى البلوج و نظرا لحالة الاكتئاب الرهيبة اللى انا فيها من امبارح ماليش مزاج اكتب حاجة جديدة هناك..خدى عندك

من انهاردة لا عايزة اسمع نصيحة ولا عايزة حد يفيض عليا من علمه الغزير و دماغه الكبيرة و زناد فكره اللى مش عارفة جراله ايه
من انهاردة مش هسمح لحد يشتغل وسيط بينى و بين ربنا
من انهاردة مش هسمح لحد بالتدخل فى ادق نفاصيل حياتى معتقد انه بيدعو لسبيل الله و انه مجاهد و داعية..عايز تدعى ادعى لنفسك و لأهلك بعيد عنى
من انهاردة مش هسمع غير اللى انا عايزة اسمعه و مش هعمل غير اللى انا مقتنعة بيه
اللى عايز يربى دقنه هو حر
اللى عايزة تمشى بخيمة على دماغها و تقول ان النقاب فرض-مش عارفة على اساس ايه- هى حرة برضه
عايزة تمشى بهوت شورت فى الشارع..برضه انتى حرة
لكن انا لا هتنقب فى يوم من الايام ولا ناوية اربى دقنى
دينى عارفاه كويس و حتى لو مش عارفاه مش شغلة حد دى
علاقتى بربنا –صدق او لا تصدق- علاقة شخصية جدا..و مش ناوية احشر حد فيها
كلامى موجه للمتحرر قبل المتخلف
لا عايزة اسمع تفسيرات cool و فهم واسع لدرجة الهبل لدين من اوضح ما يكون
ولا عندى اى استعداد اسمع تخلفات ناس مش شايفة غير نار و عذاب و جهنم الحمرا و تعبان اقرع و فار مسلوخ
لا عايزة ابقى مودرن و متحضرة مكسوفة اقول اللى انا فاهماه من دينى فألونه عشان يعجب اللى قدامى
ولا هكون فى يوم سجينة افكار متخلفة تقعدنى جنب الحيط خوفا من انى اقول كلمة غلط ولا تصرف مش ولا بد يدخلنى نار جهنم
عايزين تعملوا جلسات دعوى و قعدات اصلاح و تهذيب فى اماكن لا حد عارفها ولا عارف مين اللى بيتكلم فيها ولا مؤهلاته ايه..اعملوها بعيد عنى
عايزين تزوقوا فى الدين و تنتقدوا اشرف خلقه لزوم الافق الواسع و تقبل الاخر و حرية الرأى..برضه بعيد عنى
عايزينه اسلام مودرن لزوم البنطلونات الواقعة..حاجة تخصكم
او اسلام قديم بجلابية و عمة..براحتكم..لكم دينكم و لي دين
لا شغلتى اكفر دول ولا فى نيتى امشى ورا دول..
انا ماعرفش غير اسلام واحد..دين وسطية و اعتدال..لا بيلغى العقل ولا فيه اكراه و ارهاب
ملحدين.. متخلفين.. ارهابيين..متأخرين..محتكرى الجنة..مشركين..متحجرين..رجعيين..متحضرين..متطرفين..متلونين
ما يخصنيش..
انت حر فى دقنك و انا حرة فى دماغى!!
سيبونى فى حالى..
‏قال عزيز عيني
جيتي عالوجع تناقض غريب ادي الي المرض واصرار علي تحويل علاقتنا بربنا الي بيزينس واوكازيو
فكرتيني بنكتة الشيطان لما هجّ من مصر و بيسألوه طفشت ليه قاللهم اصلها حاجه تكفر اساعد الواحد من دول في انه ينصب ويسرق ويرتشي وفي الآخر يعلّق يافطه فوق دماغه هذا من فضل ربي
‏قال tarek alghnam
قطه الصحراء
فعلا مانحن فيه سببه التناقضات
ولو انها ليست كلها من رجال الفتوى
ولكن فى جميع المجالات
اما بالنسبه للفتاوى
فانا متأكد ان كل انسان يعرف الحلال من الحرام ولكن احيانا نريد فتوى على مزاجنا
والمفتى ايا كان فهو بشر معرض للخطأ
تقبلى تحياتى
ودمتى كاتبه رائعه
‏قال eshrakatt
عارفه ايه المشكله الازدواجيه والجهل

عارفه اول حاجه اتعلمناها فى السياسه
لا تتناقش مع متعصب ولا جاهل

الاسقاط تبع الى على راسه بطحه

الدين جلابيه ودقن ونقاب

وقال الله وقال الرسول وهمه لا عرفين فين الله حاطتهم

انت عارفه الفقر الثقافى الى وصلناله اد ايه

عارفه المد الوهابى الى غزانا وخيم على عقول الناس بقى مغطى شريحه اد ايه

دول حولو الناس لودان

تبع واطيعو الله واطيعو الرسول واولى الامر منكم فاكره الفيلم ده

صدقى ان الحوار بقى كفر واعمال العقل بقى من الكبائر

اقولك انا كبرت دماغى لدرجة انى معنتش قادره اشيلها

عارفه انت اجمل قطه شقيه جميله

ميت بوسه يا قمر
‏قال غير معرف…
بصى أنا متفقة معاكى فى كل اللى قولتيه بس
معلش هو فى حاجة بس بس حبيت أوضحها:
فوائد البنوك لو ثابتة فهى حرام شرعا و كل علماء الدين أجمعوا على كده (لأنها زى الربا)
أما لو متغيرة فده زيه زي التجارة يعنى يحتمل المكسب و الخسارة فده ما يعتبر حلال
و علشان بس ما حدش يقول انى بفتى ممكن تسألوا أى عالم دين تثقوا فى رأيه للتأكيد
التناقض الأفكار مع الأفعال هو مرضنا العزيز الذى لايفارقنا أبداً فى مصر.
وبصى على كلام الحكومة تعرفى إنها كمان مريضة بنفس المرض، يعنى منتشر فى مصر من القاعدة للقمة.
ماتستغربيش هى دى مصر
‏قال tamer.sala7
وحدي الله كدة ايه الدخلة الجامدة دي

الناس غلابة ومحدش عارف حاجة

والذنب مش ذنبهم الذنب ذنب الشيوخ اللي ماشية بمبدأ اللي يلاقي عبيط وميسطعبتوش ربنا يحاسبه
‏قال مواطن مصري
فية مصر مشكلة اسمها تدين بديل

و ل الاسف كل المصريين كلهم و كل المسلمين 90 في المية بينافقو في رمضان عشان كدة رمضان الان شهر النفاق
دة غير

ان الفلوس سواء بنوك اسلامية او عادية واحدة
‏قال غير معرف…
آه و الله .....هو ده حال ناس كتييير
بجد الواحد من يوم ما وعى على الدنيا و هو فى تناقض فى كل حاجة القول غير الفعل و السلوك غير المعتقدات

بصى الحموضوع ده بينرفزنى اوى فانا ححاول ارتب افكارى و آجيلك تانى يا جميلة و انونو معاكى براحتنا
قال احد العلماء( لو جادلت مائة عالغلبتهم ولو جادلت جاهل واحد لغلبنى)
و الامام على يقول
ليس كل ما يعرف يقال
ولا قيل ماقيل حضر اهله
ولا كل ماقيل جاء اوانه
بالتأكيد افتقدنا اشياء مهمة وكثيرة بس قلة الصبر وسعة الصدر جعلت لم الكثيرين فى حلبة صراح الكل بنجذب لرايه ويحاول بشتى الطرق اقناع غيره به
جميل اننا نتعرف على فكر غيرنا بس الاجمل اننا نأخذ كل هذه الامور ونعتبرها بداية لنصحح بها انفسنا ثم غيرنا
تفألى فاءن القادم احسن ان شاء الله
طيب اعلق اقول ايه بس

ربنا يهدى
شارك فى حملة مصر بلا نقاب

مصر تسامح وامان
‏قال Unknown
يا ربنااااااااااا باكره الجهل باكرهه جدا جدا وباكره الجهلاء اللى بيسلموا دماغهم وحياتهم وباحترم اللى يناقش ويرد زيك بجد الله ينور عليكى والله كان لازم تردى ومش تسكتى زى غيرك ...الناس مسلمة دماغها وحياتها لكلام فارغ وناس بيحللوا ويحرموا بمزاجهم ربنا يرحمنا
‏قال HANY YASSIN
السلام عليكم
اولا الموضوع جميل جداً وفي وقته
اقتباس
قولت لها يا ستى الشيوخ دى مش وراها حاجه غير انها تحرم الحلال وتحلل الحرام وتشكك الناس فى نفسها مش تتفرجى على الناس دى تانى ..
هذه هي الحقيقة فالقرآن موجود لنعرف منه حقيقة اي شيء لكن يبدو لاننا نملك عقل مثل اي احد فقط

بدار الافتاء مش تعتمدى على القنوات الهابطة ...

ما يدعى دار الافتاء ايضاً لها اهدافها

تحياتي لك على تحليلاتك الجميلة واتمنى ان استفيد منها مستقبلاً
هاني يس
‏قال غير معرف…
قطقوطتنا الجميله
صباح الفل ياقمر
عامله ايه؟وحشتنا موضوعاتك اللي دايما بنستناه من البوست للتاني

عندك حق ياقطه الناس مستعده تسلم دماغها وودنها لأي حد يقول كلام يجي علي هواها
بجد انا بتفرس لما بسمع عن حد بيقول فوائد البنوك حرام و تلاقيه بيجيب عربيه بالقسط تبع اي بنك طب و بسلامتك ايه رأيك في الفوايد اللي بتدفعها للبنوك؟يقولك مضطر
للاسف الشيوخ النص كم اللي انتشروا بسبب الفضائيات لبعوا في دماغ ناس كتيره و كل واحد مفكر انه حامي الحما
زي مفتي السعوديه اللي افتي بسلامته بحرامنيه مشاهده مسلسل نور لأنه كما ذكر بيعادي الله و رسوله
شوفتي وصل بينا الحال لأيه ياقطه؟

معلش مشوار البنك ده تعبك
كل شهر و انتي طيبه
سلام ياقمر
‏قال blackcairorose
من أول اول الناس اللى اشتغلت معاهم ياقطة كانت واحدة مديرة شكلها ظريف وبنت ناس وحبوبة جدا، ويمكن من اول او تانى يوم لقيتها بتقولنا ـ لاننا كنا كذا شخص متعينيين جداد ـ انها عايزانا نحترم الصغير قبل الكبير ونتعامل بدون تفرقة مع كافة العاملين وان هى شخصيا هو ده منهجهها واقل واحد ولو فراش بتعامله بالاحترام زيه زى اكبر واحد

بصراحة الكلام وشكل الست الراقى خلانى اشعر بالانبساط والبساطة والاقبال على العمل

والله ياقطة بدون اى مبالغة الايام والموتقف بعد كده ورتنا قد ايه الست دى بتكسكس للناس اللى ليها اقارب مهمين وقد ايه بتموت انها تتقرب قوى وتعمل لطيفة قوى مع الناس المهمة او اللى تقرب لناس مهمة

والله والله بدون مبالغة بقيت مش مصدقة ووكنت بقول طيب لزومه ايه المحاضرة اللى ادتهلنا فى الاول ، ما هو اساسا محدش سألها ولا اتهمها بحاجة لاننا كنا لسه جداد ومنخرجين ومعندناش فكرة عن الدنيا ماشية ازاى، يعنى لو متكلمتش وادعت انها موضوعيةوعادله ولا كان هيفرق معانا اصلا لاننا لسه مش داريين بحاجة

بس الظاهر ان حالة الاسقاط عندها كانت فى النزع الاخير

اول ما قريت تدوينتك خطرت فورا على البالى الست دى رغم مرور سنين طويلة قوى على الموقف ده

بس نقول ايه
‏قال karim
انا معك تماما ولكل منا اسلوبة لابد من الاختيار المناسب للتفاهم مع الغير, تحياتى
‏قال غير معرف…
القاهره لن تكون ضاحيه لمدينه من مدن الملح الصجراويه الأسلام فى مصر فى اروع اطار تسامح وعمقايمان وجمال ...نعم جمال اجمل اصوات من قرا القرآن من مصر...اجمل عماره اسلاميه فى مصر بنيت بايدى مصريه حتى فى تركيا وكامع السلطان حسن فى القلعه مجرد مثال واحد
...ثم ماحدث؟
فورة النفط
ودولارات
النفط المنهمره دون مجهود
فكيف استخدمت؟
استخدمت فى بناء اسوار تحمى اشد انواع الحكم تحلفا وفسادا والأسوار هى الفضائيات التى تشغل الناس بالحلال والحرام فى اموال البنوك مع ان اموالهم المتراكمه فى بنوك الغرب وحتى البنوك التى تسمى اسلاميه تودع اموالها فى بنوك غربيه
والناس البسطاء تلفهم الحيره وهو المطلوب حتى لا يفكروا اين تذهب جبال الأموال هذه
والنتيجه
ضباب فكر وتخبط فى السلوك
والأخطر من كل هذا
ان تصبح القاهره بكل شموخها وتاريخها
مجرد ضاحيه من ضواحى مدينه من مدن الملج فى صحراء الخليج
‏قال غير معرف…
ماذا قدمنا عن الأسلام للعالم غيرعزل المراه بالنقاب والعداء لكل انجاز انسانى قتل الأبرياء واسالة الدماء وجز الرقاب؟
حتى اصبحت كلمة مسلم مرادفه للأرهابى او مشروع ارهابى
ولا
نلوم غيرنا اذا اتخذ موقف
المتوجس او المرتاب
وضيعنا حقوقنا عندما استغل اعداؤنا الفرصه للصيد فى الماء العكر فخلطوا النضال المشروع بالأرهاب وبسبب سفاهة السفهاء منا صدقهم العالم
بينما المغتصب يقدم نفسه فى شكل حضارى جذاب فيقيم المعارض الفنيه والحفلات الموسيقيه السيمفونيه
وماذا قدمنا نحن عن الأسلام
لماذا لم نقدمالديمقراطيه والعداله والحريه التى من صميم الأسلام؟ حتى يحترمنا العالم يا لنا
من اغبياء
‏قال سنووايت
احنا في زمن يا قطة كل واحد بيفتي علي مزاجه وكل واحد شايف انه اعلم من غيره
وكل يوم داعية جديد وبيحاول يبتكر في اسلوبه علشان يجذب الناس ليه بسحر كلامه مع ان كلام ربنا واضح في القران وكتب التفسير المحترمة القيمة والسنة وزي ما قلتي لو حاجة من حاجات العصر فيه دار الافتاء وليها موقعها علي النت
يعني مش اي حد يتكلم في الدين لانه بحر واسع ومهم بلغت فيه من علم فانت غير مؤهل انك تفتي فيه علي مزاجك
طيب علي الاقل دي واحدة عادية وقاعده بتفتي في مكان عام لكن يكون ايه الوضع لما الائمة وشيوخ المساجد يألفوا هم كمان ويستشهدوا بحكايات ملهاش اساس واحاديث اسناداتها ضعيفة وحكايات من الاسرائيليات القديمة

الجهل يعمل اكتر من كدة
‏قال raspoutine
كل سنة وانتى طيبة
‏قال كلام حسام
كنت اعرف بنت بتصرف علاج علي نفقة الدولة وتروح تبيعه لصيدلة بنص التمن وكل ما تسال شيخ يقولها حرام لفت اكتر من سنة لحد ما لقت واحد يقولها حلال وثبتت علي كلمته
صحيح
كش ملك
كش مات
‏قال الربان
تحياتي


الناس بتحاول ان تسير في الطريق الي الله
و ربما تجد من يضعها علي بداية الطريق
الصحيح...و ربما تجد من يضللها...

الدعوة الي الله...لها اصول و قواعد...و دراسات...و تمكن من مفردات او ادوات الدعوة....و حتي من يمتلك كل هذا قد لا
يكون مؤهلا للدعوة ربما لوجود شيء ما في شخصيته مثل سرعة الغضب...او عدم قدرته علي ادارة حوار و تقبل الرأي
والراي الاخر.....

بالنسبة للفوائد...بعض الفقهاء احلوها...و الاخر حرموها....و للمسلم
ان يأخذ باحد الرأيين...و الله اعلم.

علما بأن شيخ الازهر احلها حينما كان
مفتيا للديار....و المفتي الحالي الدكتور
علي جمعه احلها...و بالمناسبة هو حاصل علي بكالوريوس تجارة قبل ان ينضم للازهر....

نسأل الله السلامة لنا و للجميع.


تحياتي و تقديري...و دمت بالف خير.
مهى دى الحاجه اللى بيتميز شعبنا المصرى بيها عن اى شعب تانى
نص الشعب مفتيين ونصهم سميعة خير
كل واحد عامل فيها مفتح وعاوز الناس تمشى وراه
وللاسف اعلامنا دلوقت بقا بيروج لموضوع الفتاوى الملخبطه اللى كل يوم نشوفها دى ونسمعها
اخر فتوى سمعتها ان 4 سجاير اى نوع غير كليوباترا فى رمضان ميفطروش
ههههههههه ولسه ياما هنشوف
دمتى موفقه
علاء
‏قال micheal
جهل علي تعصب علي إزدواجية علي تسطيح للأمور..ارحمنا يا رب واستر علينا منا لأيام الجاية
هي الناس لغت مخها ليه
والله الواحد متغاظ زيك وأمثر
:)
تحياتي
‏قال غير معرف…
الناس بتنسا بمزاجها ان اقربكم للفتوى اقربكم للنار..ويا سلام كل واحد بيفتى على مزاجه وللاسف بيلون الدين على مزاجه ...
اما الناس اليى شغاله عباده فى شغلها فشكلهم ميعرفوش ان العمل عباده وانهم هيجازو خير لو اتقو ربنا فى شغلهم وادوه صح مش سابوه وقعدوا يصلو..اه اصلى بس لما الفريضه تأذن مش ااقعد اصلى بقه التراويح...
والله اعلم ...
بس قوليلى هنا يا قطه هيا ارض الله دى فى الزقازيق انا سمعت انك من الشرقيه زى حالاتى ...
ده شئ اسعدنى قوى ...فى رعاية الله..
‏قال غير معرف…
ممكن يا جماعه نترك مؤقتا الموضوعات المثاره ونقف شويه مع حدث خطير جدا بدا اليوم الأربعاء 10-9 فى سويسرايهدد بفناء العالم
التفاصيل مشروحهفى مدونتنا والموضوع مش هزار بل جد جدا
http://netonradio.blogspot.com
‏قال Desert cat
banouta masreya
اولا سلامتك من الاكتئاب
ثانيا احييكى جدا على قراراتك واللى المفروض انها تكون قرارات اى حد بيفهم عنده وعى عارف ان الدين علاقة روحانية بحتة بين الانسان واللى خالقه يعنى مش ينفع اى حد يتدخل فيها ولا يفوض نفسه بالافتاء فى اللى مالوش فيه
تحياتى يا قمراية
‏قال Desert cat
عزيز عيني
تصدق ان دى مش نكتة يا عزيز عينى لانها الواقع اللى متفشى فى المجتمع ولك فى فتيتة الفضائيات اسوة
مودتى واحترامى
‏قال Desert cat
طارق الغنام
ماهو ده اللى انا بقوله يا استاذ طارق ان المفتى بشر يخطئ ويصيب
لكن فى ناس مبتصدق تسمع كلمة من واحد لمجرد انه لابس جلابية وقفطان يبقى هو كدا خلاص معاه صقوك الجنة جاى وفى ايده الخلاص لكل المشاكل من غير ما يفكروا فى كلامه ولا ايه القصد منه
تحياتى لحضرتك
‏قال Desert cat
Dear eshrakatt
كلامك لا غبار عليه
لا فض الله فوكى يا جميلة
ويارب دايما منورانى
‏قال Desert cat
ليلـــــــــــــــــــــــــــــى
لا يا جميل فى فرق بين انك تاخدى قرض وتروحى تسدديه ده غصب عنك لازم تكون الفايدة ثابته لانك بتوقعى على شيكات وكل شيك فيه المبلغ المذكور والفوايد مثلا بتكون بنسبة 13 % وده مش اسمه ربا لانه حل لك ازمتك
افرضى لو مش اخدتى القرض ده وانتى محتاجه هتعملى ايه ؟؟؟؟؟
انما انتى لما بيكون عندك رصيد بتاخدى فوايده مش بتكون ثابته لانك مش بتشترطى عليهم الفايدة كام % مثلا وانتى رايحة تودعى المبلغ اللى انتى عايزاه وبالتالى الربا فى حالة واحده لو انتى مثلا جاية تستلفى منى الف جنيه وانا اقولك معلشى الجنية بجنيه زيه يعنى ترجعى لى الالف ده الفين فى الحالة دى ده اسمه ربا
اذن فوايد البنوك هنا سواء مقترضة او مودعه ملهاش اى علاقة بالربا
تحياتى
‏قال Desert cat
قلب مصرى
لاء انا مش مستغربة ولا حاجه لان الحالة بقت صعبة ومحتاجين قوة خارجة علشان نرجع نشغل الفهامة تانى
مودتى واحترامى
‏قال Desert cat
tamer.sala7
لا اله الا الله محمد رسول الله
وهى الشيوخ اللى ماشية بمبدأ اللى مش يلاقى عبيط دى مش المفروض يكون ليهم رادع علشان يسيبوا الناس تعيش براحتها
طيب الناس والعبط ما اكثرهم وتلاقيهم بيدافعوا ويمتوا نفسهم فى سبيل الدفاع عن كلام الشيخ حزمبل
ليس عليهم حرج
تحياتى
‏قال Desert cat
مواطن مصري
بالظبط كدا يا مواطن قبل رمضان كان فى مقالة للاستاذ علاء الاسوانى فى المصرى اليوم قمة الروعة عن التدين البديل ده والناس راكبى الموجة
حقيقى من خلالها اكتشفت اد ايه الناس دى غلابة
:)
تحياتى
‏قال Desert cat
انا ودماغي
المجتمع من حولك فيه كتير مما يقولون ما لا يفعلون
رتبى افكارك براحتك يا جميل
تحياتى
‏قال Desert cat
ABOALI
ما شاء الله بشوف عقول جميلة جدا فى المدونة وردود فوق الممتازة لذلك انا متفائلة خير باذن الله
وينصلح حال البلد بايد اولادها وتصحيح المفاهيم بعقول مستنيرة
مودتى واحترامى
‏قال Desert cat
يوميات مواطن مصرى
طبعا يا احمد مصر عمرها ما كانت ملثمة .. مصر كانت منار للحضارة
وهترجع تانى باذن الله
تحياتى
‏قال Desert cat
enjy
كنت الاول بسكت يا انجى ولما لاقيتهم بينشروا كلام مغلوط قولت مبدهاش خصوصا وحوار الست استفزنى والغريب انها بتدافع عن كلام مغلوط بس مقتنعه بيه لمجرد ان الشيخ قاله
محبتى يا قمراية
‏قال Desert cat
HANY YASSIN
معاك يا هانى ان دار الافتاء احيانا ليها اغراضها لكن فى ناس مش بترجع للقران والسنة وتعتمد على كلام مشايخ يبقى الاولى دار الافتاء على الاقل مهما كان الشيخ اللى هيقول الفتوى مش هيكون ليه مصلحة فى نشر فكر وهابى ارهابى متطرف
اشكرك جدا
مودتى واحترامى
‏قال Desert cat
صديقتى الرقيقة اجندا حمرا
احنا لو قارنا بين العقول دلوقتى والعقول من 15 سنة مثلا هنلاقى ان التكنولجيا بتطور والعقول فى تخلف لانهم اعتمدوا على حد يفكر لهم وحد يصنع لهم فقالوا كمان نمشى ورا شيوخ الفضائيات وخصوصا فتوات ارض الرمال على اساس انهم بيصلوا الفجر والضهر والعصر والنغرب والعشا اجازة
مشوار البنك هتعود عليه يا جميلة ولا يهمك
شرفتينى جدا جدا
محبتى يا قمراية
‏قال Desert cat
blackcairorose
فى ناس كدا يا حبيبتى
تلاقيها قاعده تنسج حكايات وهمية وتعيش الدور على انهم ولاد امراء ولما تتعاملى معاهم كويس وتقربى منهم تكتشفى انهم ولاد رقصات سورى يعنى .. لكن ايه الدافع انهم يكدبوا ويعملوا الاسقاطات دى .. حالة شيزوفرنيا صعبة للغاية
مودتى واحترامى
‏قال Desert cat
karim
ايجاز فى الانجاز يا كريم
بالفعل لابد من حسن الاختيار
تحياتى
‏قال Desert cat
كشاف نور للمغيبين
اعتقد انه فى السنوات الاخيرة بدأ جيل باكمله فى عمل ثورة على المغيبين لافاقتهم من ظلام الجهل التى اسقطهم فيه القنوات الفضائية العاملة على نشر فكر وهابى ظلامى
فلنأمل فى الاجيال القادمة كل الخير
مودتى واحترامى
‏قال Desert cat
Anonymous
عزيز/تى لقد اختزلنا الاسلام فى الجلباب الذى طالما قصر طوله طالما قصر العقل واللحية واللثام للتخفى خلفه
والذى اصبح رمز للارهاب فى مصرنا الحبيبة فما بالك بدول الغرب الذي تم الاعتداء عليهم من مثل تلك الاشكال المريبة
فلهم كل الحق فى التوجس خيفة منهم
تحياتى
‏قال Desert cat
سنووايت
اوافقكى الراى يا دكتورة
بس هى الست العادية ماهى جابت معلوماتها من الشيوخ اللى بعمة وقفطان واللى قاعدين يرهبوا الناس بكلام مغلوط
اشكرك جدا
تحياتى
‏قال Desert cat
كلام حسام
لاء هى لو كانت كلفت خاطرها واتصلت على قناة الناس على احد الشيوخ اللى لكل مواطن شيخ يفتى له على حسب مزاجه كانت استريحت فى اقل من يومين مش قعدت سنة كاملة تسال
ربنا يتولانا برحمته
تحياتى
‏قال Desert cat
الربان
استاذى العزيز ولما هذه الحالة وعندنا المرجع الذى ارسل لنا الله به سيدنا محمد القران وسنة الرسول
الناطقين بلسان عربى
لما انساق خلف افكار اخرى ربما انجرف بها الى طريق اخر ربما يكون فه الضلال
اشكرك جدا
مودتى واحترامى
‏قال Desert cat
عايش ولكن
انت عارف يا علاء ردك فكرنى باننا فعلا شعب فلهوى بنحب نفتى فى اى حاجه حتى بدون علم ونصر على الكلام حتى لو خطأ ومش ندى نفسنا فرصة نسمع حد تانى يمكن اكون انا الصح ويتاكد معلوماتى
الا لو فكرت تبدى رايك فى حاجه تلاقى الاصوات والصخب من حواليك وساعتها يبقى خسارة فيهم النصيحة
بس موضوع الفتوى ده جامده
ههههههههههههه
هو مش قالوا ايه رايهم فى الدوفى دوف اصل لو كدا اشرب بقى بالنهار واكمل صيامى عادى خالص يعنى
تحياتى
‏قال Desert cat
micheal
الناس لغت مخها اصل زمان كان فى ناس لكن دلوقتى فى وادن ماشية تسمع وخلاص
تحياتى مايكل
‏قال Desert cat
عايزه اتطلق و
ده لوحده كوم تانى يا محاسن
تروحى علشان توقعى ورقة مش واخده دقيقتين تلاقى الموظف ماسك سجادة الصلاة .. خلص صلاة مسك المصحف ولو قولتى له يا سيدى وقع على الورقة يوقلك تعالى بكره .. طيب انت قصرت فى عملك وارهقت الناس فى مشاوير على الفاضى وبتقرأ علشان تصلى وتقرأ القرآن .. ماهو الدين المعاملة يا عم الشيخ .. يحس انك بتشتميه وممكن يحلف 100 يمين ماهو عاملك حاجه فى الحالة دى اقرب حاجه ورقة وقلم وشكوى لمديره طوالى انا بطلت اسكت على الخلق دى والله بكون داخله اى مكان ومستعدة لكتابة شكوى فى اى موظف يعطلى مصلحتى
..
اينعم يا فندم ارض الله الواسعة تبقى الزقازيق
ليا الشرف اننا شراقوة زى بعضينا يا جميل
مودتى واحترامى
‏قال Desert cat
برنامج انت تسال والكمبيوتر يجيب
قريت عنه الصبح
ربنا يستر
ها اجى حالا اشوف ايه اخر التطورات عند حضرتك
تحياتى
‏قال غير معرف…
تقول صحيفة الأوبزرفر
البريطانيه
وتروى وتهاجم اتجاه الأسر المالكه فى الدول الصحراويه المتحكمه فى دخل البترول الهائل
للفشخره
وذلك بعد اقدام امارة من الأمارات العربيه المتحده على شراء نوادى رياضيه ونوادى لهوومشروعات احرى غريبه فى بريطانيا
والراى العام معارض
وغير مرحب ولكن الأسر المالكه لا تجد غير الغرب امينا على ثرواتها بينما المحطات الفضائيه التى ينفقون عليها لصرف انظار الناس عنهم وشغلهم بفتاوى دخول الحمام -تلعن الغرب صبح مساء ومع ذلك فكر جهابذة هذه الأسر المحتكره لمعظم دخل البترول بالأستعانه بمؤسسه اعلاميه لها احترامخا مثل البىبى سى
ودفعت لها ملايين الجنيهات الأسترلينيه لتقيم تيلفزيون عربى
لنفس الهدف وهو صلاف اذهان الناس عنهم ولكن البى بى سى اذاعت كمحطه محترمه اراء المعارضين لهذه الأسر فكانت النتيجه التوقف عن الدفع واغلقت المحطه
وهذا يوضح كيف يفكر هؤلاء الناس وهم الآن يستغلون قنوات الفتاوى لنفس الغرض وهو شغل الناس بعيدا عنهم
‏قال غير معرف…
موضوع جميل والواحد بيعاني فعلا منة حتي بين الاهل لدرجة انهم ممكن يكفروني مع انهم ناس اصحاب درجات علمية عالية في تخصصاتهم
, بس انا عندي استفسار بسيط , هو انت لية الفعل المساعد في كلامك واقع
, انا مش جيت , انا مش قلت انا مش فعلت
المفروض انا لم اقل او انا مقلتش لكن مفيش حاجة اسمها انا مش قلت
‏قال صوت من مصر
زمان كنت بقولك انتى ليه بتهاجميهم ( الاخوان ) بس بصراحه كده ممكن مكنش ليه اختلاط بيهم لكن ربنا كرمنى بواحد فى الشغل هو مش اخوان هو تقريبا سلفى واعوذب الله بجد محسسنى انى استغفر الله كافر متعرفيش ليه حتى فى الشغل مشض بيشتغل وتقريبا منفض وبيقول على نفسه مهندس ازاى وهو اصلا مش خريج هندسه وبتعامل بكبرياء مع العمال
بجد حرام حرام
طلع عندك حق ؟
‏قال غير معرف…
تعليق لقارىءفى صحيفة الدستور
تشوف الناس خارجين من الجوامع و الكنايس بعد الصلاة .. بسم الله ماشاء الله حاجة تفرح .. الله . إمال الرشوة و

المحسوبية و السرقة و النصب و القتل و حوادث الإغتصاب و هتك العرض اللى حصل فى وسط البلد من سنتين و

عساكر و ظباط بيمرمطوا ويعجنوا فى الناس بدون رحمة .. كل ده منين لما الناس كلها بتصلى و عارفة ربنا ؟؟؟؟ شعب

تانى مستوردينه يعذب فينا .. طب والله والله والله أنا بعينى شوفت موظف لسة لاهف منى 20 جنيه رشوة علشان

يمشى لى موضوع ( حار ونار فة جتته هو واللى زيه ) و أول ما أذان الظهر أذن لاقيته بيجرى علشان يلحق الظهر و

الغريبة و الله كان الإمام بتاع زمايله ... وبعد ده تيجى تقوللى مصر أم الدنيا أقولك بأمارة إيه؟؟؟ مصر المحروسة .....

محروسة من إيه بالضبط سعادتك و كل البلاوى دى فيها ؟؟؟؟ إحنا شعب عشق أنه يكذب على نفسه و يبرر لنفسه

الأخطاء .. شعب كسول .. مكسل حتى أنه يمد إيده ياخد حريته و يقولك و أنا هقدر أعمل إيه مستنى اللى سارقه و

معذبه يصحى فيه الضمير فجأة يتأسف ويرد اللى خده مع تعويض مناسب .. بالذمة فيه أعبط من ده شعب فى الدنيا

؟؟؟؟؟ ولما تكلمه يقولك العين بصيرة و الإيد قصيرة .. طيب ما تجرب تمدها جايز تلقاها طويلة وتقدر تعمل أكتر ما فى

خيالك .. ليه مش بتبقى قصيرة لما تمدها للرشوة .. يقولك يا عم سيبنى أعيش و أربى العيال .. تربى العيال من حرام

!!! و أنت بتصلى و علامة الصلاة قد كدة فى قورتك و طول النهار والليل توعظ و تقول قال الله و قال الرسول !!!

عظيمة يا مصر .. بإيه مش عارف بس عظيمة .. وديع الصافى قال كدة إن نورك منور ليل الأمم .. أى نور ؟؟ و أى

أمم إحنا بنور لها دلوقتى باللمبة الجاز بتاعتنا ؟؟ هههههههههههههه .. و الله يا ريتنى فضلت حمااااااااار ... كنت

مرتاح عن كدة
‏قال maxbeta3zaman
مريت وعديت وقريت التعليقات هنا لكن لى عوده لقراءة باقى البوستات
كل عام وأنتم بخير
‏قال شادي أصلان
حاليا الناس تعييش في حالة من التناقض الغير طبيعي

وتأكيداً علي كلامك
الناس الي بتنتقد ان مني زكي وهند صبري بيقولو ادعية في رمضان
بغض النظر عن ان دا صح او غلط مش هي دي المشكلة

انما المشكلة ان الي بيقول دا غلط ومينفعش وحرام عليهم ممكن يكون بيسب الدين بنفسة ومبيصليش ومع ذلك نصب نفسة حاكم علي الدين

عارف في مثل شهير جدا بيعبر عن الحكاية دي بس للأسف أخجل من ذكرة هنا

تحياتي
‏قال wagdy El-Komy
مدونة وجدى الكومى وعليها اخبار رواية شديد البرودة ليلا وأيضا هذا رابط جروب الرواية على الفيس بوك
http://www.facebook.com/group.php?gid=21750116718
‏قال maxbeta3zaman
مريت على البلوج ده اثناء تجوالى فى دكان أخويا شريف وقلت اشوف من تلك الصحراوية ..لقيت عاصفة الصحراء وليس قطتها البلوج كله حيويه وردود والجراب مليان كلام فقعدت أقرا كل البوستات والتعليقات وأدليت بكوزى الصغير فى بحر بلوجكم الهادر ... ومعذرة فمشاركاتى تميل إلى الخيال المسرحى الكوميدى ..وأضحك وأنا اكتب التعليق ولكنه ضحك من النوع الذى يشبه ويحاكى ويطابق البكاء
‏قال لا أحد
قطتي الجميلة
لأننا دايما ساعة الكرب والشدة بنلجأ للماوراء
ونحن في شدة الكرب
فلازم نلجأ للماوراء أيا كان نوعه وتجليه
بصي بقى
أخذت على نفسي عهد إني مليش أي دعوة بأي هم عام
يخرب بيت الوقعة
بتجروني مير رغبة مني إني انشغل بالهم
أنا حالفة ميت يمين إني مش اسمع غير لصوت روحي اللي بدأت تضيع مني
قطة الصحراء

ازيك ياجميل كل سنة وانتي طيبة ورمضان كريم
بصي الشعب المصري يحب يهيص في الهيصة يفتي باي فتوي ويسلام لو راكبة مشروع وفتحتي اي موضوع ديني اتفرجي بقا كل واحد يحلل ويحرم علي مزاجه المشكلة ان الناس مبقاش عندها وعي ديني صحيح ناس بتجري ورا القنوات الفضائية ورا معرفش اية حاجة غريبة
موضوع جامد تسلم ايديكي

كل سنة وانتي طيبة كمان مرة
‏قال غير معرف…
حنان

تصدقى اول مرة أعرف اسمك

ما علينا

المهم

المشكلة غياب الوعى العام بأسس الشريعة السمحة وكمان غياب القدرة على التفكير عند أغلب الناس

علشان كدة تلاقيهم زى الحمير روحو شمال يروحوا روحوا يمين يروحوا وهما مش عارفين حاجة
ولما تعتب على حد مهم يقولك قول يارب
الله يخرب بيت مصطفى ناقص

كل سنة وانتى طيبة
‏قال Heart Beat
الصديقة العزيزة على قلبي

Desert Cat

الانسان اللي بيعمل اسقاطات على غيره لابعاد الانظار عنه هو

بيكون الوحيد اللي مصدق نفسه ... اما الناس اللي قدامه فهم فاهمينه كويس جدا و عارفين هو ايه ... بس ممكن بيعاملوه على انه مسكين مريض ... و ياخدوه على اد عقله

عندنا في مثال و هو الحكومة المصرية اللي كل اما تحصل مصيبة في البلد يقولوا الجملة الشهيرة اللي هي مش احنا البلد الوحيد اللي بيحصل فيه المصايب دي

سبحان الله ... طيب احنا كشعب يعني مالنا و مال البلاد التانية ماتخلينا فينا احنا الاول و بعدين نشوف غيرنا

او نشوف بلاد عايشين عيشة كريمة و هنية

لكن الحكومة بتحط اسقاطات على حد غيرها عشان تنفي عنها ان البلد بتتدهور بسبب الادارة الذكية ليها

او بقى واحدة متغاظة من التانية تروح تقول للدنيا كلها ... اصل فلانة دي كذا و كذا و تجيب سيرتها من اول فرد في عائلتها لغاية اللي لسه ماتولدوش ... مع انها هي اللي بتعمل كل الكلام الفارغ اللي بتقوله ده

هي بتعمل كده عشان عندها احساس ان البنت دي احسن منها بكتير و مهما عملت مش هاتقدر تكون زيها ابدا

بس بقى برضه الناس عارفين دي و عارفين دي و مهما اتقال من كلام وحش برضه مش هايصدقوه لكن هايخدوها على اد عقلها و يقولوا مسكينة مريضة نفسيا

----------------------------

تماشيا مع البوست الجميل ده هاحكي لك على موقف بيتكرر كل سنة في نفس الوقت هنا

طوال شهر رمضان تلاقي الناس هنا ما شاء الله بيواظبوا على اداء الصلوات الخمس و التراويح في مواعيدها بالثانية دون اي تأخير

ساعة صلاة العصر مثلا تلاقي الشوارع اللي فيها مساجد فيها زحام شديد جدا ... مش بيصلوا في الشارع لأ ... كل واحد فيهم يدخل الشارع بعربيته و يروح موقفها في اي مكان قريب من مدخل الجامع و يروح نازل داخل الجامع عشان يصلي

مش مهم بقى الازمة المرورية اللي بيتسببوا فيها و مش مهم الناس اللي راجعة من شغلها في الحر ده و عايزين يروحوا

و كأن الصلاة دي لا تجوز الا في شهر رمضان فقط

و مرة كنا مروحين دخلنا شارع فيه مسجد و كان وقت صلاة ... كان في امامنا عربية راح صاحبها موقفها و نزل منها بص علينا و لاقى طابور عربيات واقف ورانا و برضه و لا كأنه شايف حاجه و ساب عربيته واقفة مش مركونة حتى في وسط الشارع و دخل يصلي

طبعا العربيات بدأت ترجع بضهرها واحدة ورا التانية و اضطرينا نلف من طريق طويل عشان نخرج على الشارع العمومي

خلاصة الحكاية ... كف الاذى ده مش من سمات الانسان المسلم المؤمن

اللي بيعملوه ده يوميا في رمضان مافيهوش كف اذى خالص بالعكس ده ممكن يوصل انسان صايم لدرجة من العصبية انه يشتمه و في نفس الوقت هو ارتكب ذنب بعرقلة الطريق

لانه اصلا مش بيصلي كده غير في رمضان و بس

المسجد في طريقنا و كل يوم بتعدي عليه سواء في رمضان و لا غير رمضان و بيكون وقت صلاة لكن في غير رمضان بيكون الشارع فاضي و قلة اللي بيدخلوا يصلوا و الامور عادي جدا

يعني تأمرون بالمعروف و تفعلون عكسه

زي اي واحد من اللي بيفتوا ليل نهار على الفضائيات و في المجالس و حتى على المدونات و حياتك

اللي بيضايقني من السادة اهل الفتوى او الدعاة الجدد انهم اثناء كلامهم تلاقيهم بيحددوا مين هايدخل الجنة و مين هايدخل النار

و اننا يجب ان نتبع افعال الصحابي فلان مثر عشان ندخل الجنة

هو احنا اعمالنا يعني ماتشفعش لينا خالص كده ... كل البشر اللي جم بعد الصحابة او ماتولدوش في عهود الرسل و الانبياء مالهمش حق ان كل واحد فيهم يتحمل نتيجة افعاله سواء كانت كويسه او سيئة

لازم يعني نعيش اتباع و مقلدين عشان ندخل الجنة

من كتر اللخبطة اللي بيقولوها للناس ... اصبح عندنا ذبذبة فكرية ... و في ناس بقى الله يكون في عونها بتصدق كل حاجه و مش بتحاول تتناقش في اي حاجه يقولها الشيوخ

ميرسي على البوت الجميل ده يا صديقتي العزيزة
‏قال Desert cat
كشاف منير للمغيبين
هؤلاء اصحاب الفكر الوهابى ادعياء الدين .. ممثلى التشدد والصرامة تراهم دائما ما تجدهم لصيقى بالغرب فاموالهم متثمرة فى بلاد الغرب واولادهم يتعلمون فى بلاد الغرب ومستلزماتهم من بلاد الغرب لانهم لا يملكون 1/10 من قدرة تفكير الغرب .. جميع مؤهلاتهم هى الارهاب الفكرى .. وبعد كل ذلك تجد لديهم القدرة على التشدق بهم حقيقى بجاحه
‏قال Desert cat
Alaa Ahmed
كنت زمان بواجه المشكلة دى لكن مع مرور الوقت ثبتت وجهة نظرى والحمد لله
اما بالنسبة للفعل المساعد فانت فكرتنى بموقف طول عمرى لن انساه
اول يوم ليا فى المدينة الجامعية .. انا والبنات بقى بنتعرف على بعض وبيسالونى انتى منين .. قولت لهم مالشرقية .. لاقيت لك ضحكهم جايب من اخر الدنيا .. خير ياجدعان فى ايه .. قالوا حتى اول بلدكو مشششششش
عرفت بقى انا ليه مش اعرف اكتب الفعل المساعد غير بالطريقة دى .. حاولت كتير مش اكتبها لكن كنت بلاقى حروف الكلمة بتطلع غلط يعنى محتاجه دروس فى اللغة من جديد
تحياتى
‏قال Desert cat
صوت من مصر
يا عزيزى هما لا يهمهم الشغل ولا يهمهم المعاملة اللى هى اساس الدين
المهم انه طالما عمل دقن وقعد يقولك قال الله وقال الرسول يبقى كدا من الصفوة اللى هتدخل الجنة وما سواه رايح النار
ما عندك اخوانجية قاعدين يجاهدوا طول النهار على النت ومفيش مانع من ترويح القلوب بشوية شات وطول الليل مقضينها قهاوى .. المهم انه لزق فى اسم اخوانى او سلفى خلاص داخل الجنة يقابل بقى يكدب يرسق مش هتفرق كتير
المهم انك اكتشفت الحقيقة
كتير زيك على فكرة اكتشوف الحقيقة بنفسهم
:)
تحياتى ليك
‏قال Desert cat
Anonymous
احنا شعب مش بنقدر غير على بعض
يعنى كل واحد يستقوى على الاقل نه المدير فى الشغل يطلع غله فى الموظف والموظف فى المواطنين والمواطنين فى اولادهم وزويهم احنا كدا مش بنيجى غير بالعين الحمرا وربنا يجعلها اخر الاحزان يا فراعنه
تحياتى
‏قال Desert cat
maxbeta3zaman
تشرف والمدونة كلها تحت امر حضرتك
كل سنة وانت طيب وبالف خير
‏قال Desert cat
شادي أصلان
شوفت التناقض ده يا شادى هحكى لك حاجه
شوفت فى مارينا من كام شهر واحدة مش محجبه ولابسه بدى ستوميك بتتريق على واحده تانية مش محجبه برضه وتبوقهلا ما تحاولى تلمى نفسك شوية انتى كدا اوفر اوى ... انا كنت قريبه منهم كنت هرد عليها لكن التانية سبقتنى وقالت نفس كلامى اللى كنت هقوله .. قالت لها ما تنصحى نفسك الاول ولا مش عندك مراي تبصى فيها قبل ما تخرجى من البيت
بدلنا دى بلد العجاااااايب
تحياتى
‏قال Desert cat
wagdy El-Komy
اهلا وسهلا بمدونة وجروب حضرتك تشرفت جدا بيهم
مودتى واحترامى
‏قال Desert cat
maxbeta3zaman
انا متشكرة جدا على كلامك
وسعيدة جدا ان البلوج نال اعجاب حضرتك
ويارب دايما منورة
مودتى واحترامى
‏قال Desert cat
لا أحد
اولا انا اتشرفت جدا بزيارتك
ثانيا انتى عندك حق فى العهد اللى اخدتيه .. على الاقل الانسان لما ينشغل بنفسه ويبعد بيها عن اى مشاكل بيحس براحة وسلام وبالتالى يبقى اسمه بدأ بنفسه بالبعد عن الجو العام المشحون بكم من الخلافات والاختلافات
مودتى
‏قال Desert cat
بنات صاحبة الجلالة
كل سنة وانتى وكل اسرة صاحبة الجلالة بالف خير وسلام
بالنسبة لشعبنا الحبيب فهو الشعب الفتك اللى فاهم كل حاجه واى حاجه وبيعرف برضه فى الدين المهم ان المفتى يبقى على حسب مزاجه الشخصى
شرفتينى يا جميل
تحياتى
‏قال Desert cat
المحارب المتيم
طيب انت عرفت ان اسمى حنان
انما انا عايزة اعرف مين مصطفى اللى بتخرب بيته ده ههههههههه
الناس يا عزيزى مطحونة فى الحياة واخطائه زادت فنفسها فى مفتى تفصيل فتاى جاهره يمشوا وراه وخلاص
تحياتى
‏قال Desert cat
Heart Beat
صديقتى الجميلة ارق دقة قلب
اعتقد ان المجتمع مبقاش ساذج للانسياق خلف الكذب والاتهامات والاسقاط من ذوى النفوس المريضه
يعنى عندك مثلا الحكومة فى كل مصيبة تقول مش عندنا بس فالناس حتى الغلابة واللى عقلهم على ادهم خلاص فاض بيهم ومش طايقين الحكومة ... والنموذج الاخر المريضة نفسيا اللى بتكون حاقدة على غيرها وتتكلم عليهم وعلى عائلتهم مع انها عايشه فى حرمان من الجو الاسرى ده ممكن كام واحد يسمع لها اتنين تلاته قولى عشرة مع مرور الوقت بيبتدوا ينفضوا من حولها بعد ما يكتشفوا الحقيقة وفى الحالة دى بتكون تستحق الشفقه لانها مريضة .. مش لانها حقودة ..
على ذكر المواقف اللتى بتشوفيها عندك يا قلبى
فهى هنا تماما تلاقى المساجد على اخرها فى رمضان وايام الامتحانات مش مهم المعاملات مش مهم يرتشى مش مهم يكذب المهم انه يقول يارب انا بصلى اهوه ونجحنى او دخلنى الجنة احنا فى رمضان وباقى السنة باب المسجد ينادى هل من مصلين ؟؟
كل سنة وانتى بالف خير يا قمراية
محبتى ليكى

المشاركات الشائعة