هو فى ظابط امن دولة كدا ؟؟؟؟

محسن السكرى ثابته عليه كل الادلة الجنائية داخل عمارة مثبت فيها كاميرات تصوير بدون حتى ما يغطى وجهه مع انه ظابط امن دولة ويفهم كويس فى الاصول .. قصدى فى الحاجات دى اشترى الكوتشى اللى لبسه وقت الجريمة والخنجر اللى قتل بيه سوزان تميم اللى محدش سمع عنها قبل كدا واشتهرت بعد قتلها .. بالفيزا كارت الخاصه بيه يعنى فيها اسمه وكل بياناته ... واللى توصلت ليهم شرطة دبى من خلال الوصول للشركتين بائعه الخنجر والكوتشى وملابسه كان عليه دم القتيله وغيرها ورماها فى الدور اللى تحت شقتها وتحليل الدى ان ايه اثبت فعلا انه خاص بالسيد ظابط مباحث امن الدولة محسن السكرى الهمام ياترى السيد محسن السكرى بالغباء ده علشان يسيب كل الادلة دى وراه وقت ارتكاب الجريمة ولا هو مقصود بالفعل انه يسيبها وانه قبض اكتر من حد تانى لايقاع طلعت مصطفى فى المحظور وانها فعلا عملية مدبرة من منافسية او مدبرة من حد هو مش اشترى منه الحديد لمشاريعه واستورد حديد من اكورانيا فالاخر حس انه انضرب فى مقتل فقال يخلص منه ؟؟؟؟
طيب ليه صور هشام هى اللى ماليه الجرايد الرسمية والمعارضه وكل المواقع الاخبارة والفنية كمان .. ومحسن السكرى مش اتنشر له ولا صورة ؟؟؟؟
تساؤلات محتاجه اجابات هل من مجيب ؟؟؟؟؟؟

Comments

يعني ايه يا قطة؟ انت شايفة ايه؟
خناقة كبار وبرضه ح يخرج منها؟
afew good men said…
طبعا في

انتي في مصر

هو انت في سويسرا
؟؟؟؟؟؟؟؟؟؟؟؟؟؟؟؟؟؟؟

من غير تساؤلا ت
واحد يادوبك واخد الثانويه عالحركرك واهله دافعلينه مبلغ وقدره لشرا المنصب وبيعلمومهم في الكلية بأن الظابط الشاطر هو من يُحضر المجرم قبل وقوع الجريمه راضي ذمتك عاوزاه يطلع ايه طيار؟؟؟؟
هما فعلا بالغباء ده
يا ستي احنا مالنا
احنا عايزين كيك وجاتوه
lastknight said…
عندى صورته و هو عنده حداشر سنه .. ابعتهالك ؟ هاهاهاه
المصيبه أن الكدبه وسعت .. و تخبطهم واضح .. و تقريبا كل البيانات اللى اتنشرت مغلوطه
حالة فوضى عارمه فى بقايا النظام المنحل
مثلا مثلا .. محسن السكرى لم يستقل من جهاز الشرطه حتى عام واحد مضى .. حين قابلته للمره الأخيره .. لكن البيانات الأعلاميه الخايبه بتقول أنه استقال من ييجى تمنتاشر سنه
محسن السكرى اشتغل فى موبينيل بصفته ضابط أمن دوله .. و ده وضع طبيعى فى شركات الأتصالات كلها .. و فى فندق شرم الشيخ و فى العراق كان برضه بصفته ضابط
لكن من كنت احسبهم مفكرين و أعلاميين نشطاء وجدتهم كسالى عن مجرد التفكير
مثلا .. نشرت عنوان بيت محسن السكرى قبل فك حظر النشر بيومين .. و لم يتحرك أحد لمجرد مقابلة جيرانه و سؤالهم .. أو حتى محاولة مقابلة أهله و الحديث معهم
قطه .. أنا يائس ... مش من النظام .. لأ .. من الناس اللى بقت بتصدق من غير ماتفكر
كل سنه و انتى طيبه
Heart Beat said…
الصديقة العزيزة جدا على قلبي

Desert Cat

تعرفي يا قطة دي هي نفس التساؤلات اللي جت على بالي و انا بقرا الموضوع في الجرايد او بتفرج على حديث محامي السكري

يمكن يكون هشام كلف السكري بمراقبة سوزان في لندن لمجرد انه يعرف بتقابل مين و بتكلم مين ... على اساس يعني ان في بينهم علاقة عاطفية كما ذكرت بعض الصحف

انما بحسب قول محامي السكري انه قال باللفظ لهشام ان قتل لأ و بعدين يلاقوا التي شيرت بتاعه عليه دم القتيلة ... يعني مش متركبة

و كمان المكالمات المزعومة اللي دارت بينهم و اللي اذكى اخواته سجل منها تلات مكالمات ... هو في حد بيتفق على قتل واحد تاني يقوم مكلم القاتل في التليفون و يقوله و النبي اقتل لي فلان ... دول بتوع القاعدة كانوا بيبعتوا لبعض رسايل ارهابية و اتفاقيات على عمليات ارهابية على التكست بانر في قنوات الاغاني

يعني شوفي اللف و الدوران فيجي واحد بحجم هشام كرجل اعمال يرتكب خطأ صغير و غبي زي ده

و بعدين يجي بتاع امن الدولة و يرتكب جريمة قتل و يشتري ادواتها من نفس المدينة و بالفيزا كارد الخاص بتاعه بعدين يعدي من اودام كاميرات امن المبنى عادي كده من غير اي تنكر بسيط و لا حاجه

دي حتى لو كانت قرصة ودن من حد من اعدائه و لا من الكبار ... ده يبقى حد غبي اوي لان حتى حبكة الجريمة و تلبيسها لهشام السيناريو بتاعها اسوء و اتفه من الافلام الهندي زمان

و بعدين السادة محامي السكري قعدوا يقولوا مش هو اللي ظهر على كاميرات المراقبة مش هو اللي كان لابس التي شيرت مش هو اللي الدم بتاعه على التي شيرت و فوق ده كله انه انكر ارتكابه للجريمة من اساسه

يمكن شبيه بقى هو اللي عمل كده او يطلع له اخ تؤام لدرجة تطابق الدي ان ايه و دي بتحصل في حالات نادرة جدا طبعا

هافكر في الموضوع تاني و ارجع اعلق تاني يا قطقوطة

تحياتي
قطقوطتنا الجميله

صباح الفل ياقمر

شوفي مبدئيا مفيش جريمه كامله بس فعلا هل محسن السكري بالغباء ده كله مع انه كان بيشتغل في منصب حساس انه يسيب وراه كل الأدله دي معقوله دي؟
بخصوص ياجميله حكايه ان مفيش صور له انا قريت امبارح في الأهرام ان وزاره الداخليه عملت باسورد علي صفحه محسن السكري و اسرته في السجل المدني عشان ماحدش يقدر يدخل عليها الا لو معاه الباسورد

كتير بيقولوا ان ممكن ورا كل ده بعض المنافسين لهشام طلعت مصطفي و خصوصا اللي بالي بالك اللي ماكانش بيشتري منه الحديد و بيروح يجيبه من بره بس العلم عند الله و ادينا قاعدين و حنشوف حيحصل ايه بس ده مايمنعش ان هشام طلعت مصطفي كان فيه بينه و بين المرحومه حاجه
حنشوف حترسي علي ايه

تسلمي ياقطتنا علي التغطيه الجامده للموضوع دايما سباقه
محبتي ياقمرايه
الموضوع مليان الغاز كتير وحدش عارف فين الحقيقه
بس اللى متأكد منه انه مش هيخلص بسهوله
amr said…
اعتقد ان لسة في خبايا كتير في الموال دة .... الله اعلم هتنكشف امتى


كل سنة و انتي طيبة
almasry said…
كتير دوتنا بتهييس وكتر احنا لكن ايا كان الوضع حضرتك فى النهايه عارفه ان بلدنا بلد الكوسه ... ومصر ياما ياسفينه يارب ما تغرق يارب ماتغرق بينا



تحيـــاتى
المصرى
الواصل مش بيخاف حد يمسك عليه حاجة هيطلع منها يبقى يتعب نفسه في اخفاء آثار الجريمة ليه..عموما أنا لما بشوف حاجة معقدة كده بأقول اللهم سلط الظاليمين على الظالمين وأخرجنا من بينهم سالمين..وبعدين مين سوزان تميم دي الي الدنيا قامت ومقعدتش عشانها يا ترى كانت مسلمة ولا ايه وحتى لو دي يعني حتت مطربة مش حاحة ولا يعني هي الدنيا تقوم متقعدش عشانها وفلسطين كلها على بعضها عمالة كل يوم تولع وشعبها يتقتل ويموت ومحدش يتكلم..ده عدل بالذمة..معلش طولت ووجعت دماغك..
كل ودي وورمضان كريم
أنا االلي بجد معصبني إنمفيش صورةليه كأنهم عاملين منع لنشرالصورة يعني الحكومة بتقولنا كده من آخرها الراجل ده بتاعنا ..
...

الموضوع بتاع محسن السكرلاي مليان كدب واضح وتناقض أوضح .

مش عايزة أسبق الأحداث

بس واضح إن دي حلقة من حلقات استهبال الحكومة و حاطين ف بالهم ان الشعب اللي عايش بالعافية هيفرح ويهلل لسقوط أي رجل أعمال..!

ولسا ياما نشوف ..

(هو انا يا بنتي أغيب يومين أرجع الاقي بوستين ..!)
انتى يا بنتى
بطلى تلسنى على اسيادك ليجبوكى من شعرك
مالك انتى يا امعه مصريه بمين الى قتل ومين الى لبس التهمه ومين الى لبسهاله
ارفعى القبعه لرجال الاعمال المصريين
وتحيا الشفافيه
كل سنه وانتى طيبه
Desert cat said…
جبهة التهييس الشعبية
اعتقد يا نوارة هى كدا
وهنشوف
Desert cat said…
afew good men
اه عارفه ان انا فى مصر وعلشان كدا عندك كارثه جديده فى الدويقة النهارده
Desert cat said…
عزيز عيني
عايزاه يطلع دكتور عيون
يمكن يكون عنده احساس ويعرف يشوف حاجه
Desert cat said…
عزيز عيني
بعد الحادثة دى اتاكدت انهم فعلا بالغباء ده
Desert cat said…
شملولي بن سحلولي
كيك وجاتوه استغفر الله العظيم
انت كفرت يابنى
روح توب وارجع ن ذنوبك ربك غفور رحيم
Desert cat said…
lastknight
انا عارفهان اخوه صديقك قولت لى بقى عندك صورته وهو عنده 15 سنة يكون كبر شوية وملامحه ظهرت ههههههههه
يا سيدى الفاضل الاخبار دلوقتى بتقولك هشام عنده اكتئاب ومحسن عليه حراسه مشدده اصلهم خايفين عليه ينتحر مع ان التنبؤات اللى جاية بتقول انهم ممكن يشتروا اهل سوزان تميم والقضيه تروح مهب الرياح والله اعلى واعلم
يبقى نشر ايه بقى وعنوان مين يا فندم
ابتسم انت فى مصر
تحياتى
Desert cat said…
Heart Beat
صديقتى الجميلة كنت طرحت نفس الموضوع فى الفيسبوك وكانت الاجابة ان الحكومة عامله باسوورد لكل صور محسن وعائلته لان اى شائبه تمس جهازة امن الدولة ككل بصفته كان ظابط امن دولة ورد اجندتنا الجميلة كمان بياكد على نفس الكلام
النقطة التانية دخول محسن المبنى وهو عارف بكاميرات التصوير تقريبا لان محسن اتردد على المكان قبل كدا بصحبتها لذلك هشام اختاره لانه ممكن يكون بعيد عن اى شك ... لكن الظابط الذكى وقع فى المحظور وجميع اصابع الاتهام تشير عليه
المحامى يهمه يخفف دلوقتى الحكم يبقى تحريض على حيازة المخدرات بدل القتل لانه لو ثبت موضوع القتل اكتر ماهو ثابت فيها اعدام ولو انى برضه اشك
محبتى ليكى يا قمراية
Desert cat said…
اجندا حمرا
اجندتى الرقيقه
فعلا موضوع باسوورد السجل المدنى على صورة وصور العائلة قريته على الفيسبوك
اما هشام طلعت بنفسه اكد ان كان فى علاقة عاطفيه بينه وبين سوزان تميم
انما مش توصل للقتل .. لكن فى انتظار حكم القضاء المصرى العادل الشريف العفيف النزيه بالرغم من كل الادلة وجميع اصابع الاتهام المشيره عليه هو والسكرى
ان غدا لناظره قريب
محبتى يا جميله
Desert cat said…
عايش ولكن
هو فعلا الموضوع فيه الغاز كتير لكن بعد الكوارث المتتالية الى مصر فيها الموضوع هيخلص وبكل سهوله
تحياتى
Desert cat said…
amr
كل يوم فعلا بيطلع حاجه جديدة يعنى النهارده منشور فى المصرى اليوم تورط عادل معتوق وقبل كدا تورط رجل اعمال خليجى
هتنتهى امتا وعلى ايه هنشوف
كل سنة وانت بالف خير
Desert cat said…
almasry
لسه بتقول يارب ما تغرق بينا
مصر خلاص غرقت يا قبطان
تابع اخبار الدويقة واللى حصل فيها
وادعى للاهالى
تحياتى
Desert cat said…
كاتب مصري
يا سيدى الفاضل حتى لو سوزان تميم دى كافره حتى لو واحده ملهاش ملة خالص دينها مش مبرر خالص لقتلها
وبعدين غزة ايه ووزة مين اللى حضرتك بتتكلم عليهم
ما تشوف بلدك والمصايب اللى فيها
دور الاول على اطفال الشوارع
سكان العشوائيات والدويقة اللى مات منها 30 قتيل غير 500 مازالوا تحت الانقاض بسبب وقوع صخرة وجاى تقولى غزة
لنا الله
Desert cat said…
د\أسماء علي
مانعين نشر صوره لانه ظابط امن دولة سااااابق
اما الكابتن هشام طلعت معترف بالعلاقة العاطشفيه اللى كانت بتربطة بسوزان وبالتالى يستحق الشهره بقى
انا نزلت بوستين علشان مش تغيبى تانى
كل سنة وانتى طيبة
Desert cat said…
قلوب بتغنى
ماهو من الحقد الدفين يا جميل قاعده السن عليهم
ده انا رفعت القبعه والجزمة كمان لرجال اعمالنا اللى رافعين راسنا ومشرفينا
كل سنة وانتى بخير
برنامج انت تسال والكمبيوتر يجيب said…
عزيزتى حنان
ادعوك وادعو زوارك لقراءة ما كتبته بعض الصحف الأميركيه من جديد فى هذه الجريمة البشعه التى هزت مشاعر الناس
http://netonradio.blogspot.com
قلب مصرى said…
ومين قال إن السادة الضباط المذكورين وبالذكاء والنصاحة اللى انتى متخيلاها ده ممكن يكون كل ده حصل بغباوة منه.
Desert cat said…
برنامج انت تسال والكمبيوتر يجيب
اهلا وسهلا بحضرتك استاذ صلاح
نورت البلوج
وانا وضيوفى يشرفنا زيارة المدونة
Desert cat said…
قلب مصرى
كل ده حصل وهو متخيل انه فوق القانون
يعمل اللى هو عايزة ولا حسيب ورقيب
تحياتى
Hook said…
ايوه عادي ضابط امن الدولة يعمل كده و نص..
ماهو لو كانو بيدرسوهم في الكلية اسس البحث الجنائي و الأدلة كان بقى حويط و يعرف يعمل العملة من غير ما يسيب أثر...لكن دول البحث الجنائي و الاستدلال عندهم لا يتعدي تعليق الدبيحة و كهربتها و تعذيبها لغاية ما تقر..
تلاقيه كان فاكر في الامارات دول بهايم و غشم و مش يعرفو يوصالوله
Desert cat said…
Hook
بيعلموهم صدقنى انا شايفة الكتب بتاعتهم بعينى
لكن السكرى تخيل ان كل البلاد بفوضاوية مصر
Sara said…
طب يديني انا ياستي واحد مليون دولار من الاتنين اللى خدهم واقوله اعملها في مصر على الاقل هاتقتلها وتشرب دمها ياسيدي كمان ويجي البوليس يسلم عليك ويقولك ارجع يافندم ولو قتلت العمارة كلها ياسيدي حتى هاتطلع براءة
ياستي يديني المليون دولار بس وانا اقوله ياحماااااااار على الاقل يعني خليك قاتل نضيف وخبي وشك

لابجد جبروت للدرجة دي فاكرين الدنيا ملكهم بالفلوس يخش يقتل عادي ومش هامه حتى يتخفى والتاني يدفع 2 مليون دولادر عشان يقتل واحدة اومال هو لما بيروح يصيف بيدي مصروف للعيال كام ؟؟

عالم تاني ظهر في مصر من الثراء الفاحش واحنا لسه المصريين في الغلب والفقر الفاحش
ربنا يستر على اللى جاي بعد كده
maxbeta3zaman said…
ناو ناو....فيــــخ فيخ
الموضوع حايعفر ويجفر وبعدين يطلع ان البت اتزحلقت فى المطبخ وهى بتعمل سلطة وماسكة فى ايدها خنجر سلطة ..ومن سوء حظها المسكينة رشق الخنجر فى رقبتها عدل واللفندى السكرى ده كان طالع على السلم سمع صوت الوقعه وحاجة بتقول بالهوى "بالشامى" فراح داخل وقايل: اسم الله عليكى ياشبه وخدها ف حضنه راحت فانلته متعاصه دم قال يانهاراسود دلوقتى يلزقو التهمه فى!! وراح جارى ورامى الفانلة ورجع مصر وهو متأثر من الخضه البت ماتت من الوقعة والزحلقه أصل البلاط هناك ناعم جدا وكانو لسه مسيئينه بالجاز
سيناريو متوقع
ولو واحد غلس حايقول طب ازاى ماتت بالخنجر بتاع الواد ؟
يكون رد المحامى : اصل المرحومه ماكانش عندها خنجر سلطه من النوع الحامى فتحت الباب لقت اللفندى طالع عالسلم فقالت له بالشامى : الاقيش معاك ياخويا خنجر سلطه؟ ..فهو من شهامته قال اتفضلى ياحاجه والله لسه شاريه من عمر افندى بتاعكو اللى هنا ...وهو ده اللى حصل
محكمه ...
حكمت المحكمه ببراءة الجدع وبحبس الست اللى سيقت الشقه بالجاز قبيل الحادث انتهى
An Egyptian said…
اولا راجل امن الدولة فى مصر مش بيتعلم ازاى يبقى شيرلوك هولمز
بيتعلم ازاى يعذب او ينتزع اعتراف عن طريق هتك العرض مثلا
.بيبقى ارهابي ممتاز و رجل أمن فاشل

ثانيا انا اشك ان طلعت مصطفى اتحبس لان البلد فيها عدل
فى الغالب اتحبس لان فى حد كبير عاوزه يتحبس.

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز