الدنيا مش بتدى محتاج .. بتدى عايز

الدنيا مش بتدى محتاج ... بتدى عايز
الكلام ده قاله لى دكتورى العزيز
فى مرة من ذات المرارير كنت قاعدة بحكى له على حاجه واقوله عارف انت اللى شاف حد قاعد على شط البحر وساله انت قاعد كدا ليه .. قاله محتاج اعدى الشط التانى ومش عارف .. قاله طيب تعالى انا هساعدك .. وفعلا اخد بايده ومشى بيه فى البحر وهما فى نص المسافة بالظبط .. قاله كمل لوحدك انا ماليش دعوة بيك ... التانى وقف محتار لا عارف يكمل ولا عارف يرجع .. طيب كان ليه من الاول اخده من مكانه ؟؟؟
قوم لاقيته بيقولى يابنتى الدنيا مش بتدى محتاج بتدى عايز
قولت له وايه الفرق يا دوك
قالى محتاج = لا املك اختيار .. مش عارف اعيش من غير الحاجه دى ولا قادر استغنى عنها
لكن عايز = اعرف اختار واميز بين الحاجات وبعضها واقدر اعيش
صحت باعلى صوتى وقولت له
WooooooooooW
I am now at ease psychologically
Merci Dr. :)

رجعت امبارح من اسكندرية عندى ميكس من الاحاشيش ودى جمع احساس مش حشاش يمكن علشان مش قعدت هناك كتير
ويمكن علشان فى ناس زعلانة منى بدون ذكر اسماء وخلى الطابق مستور يا اللى زعلان ههههههه
اول ما نزلت الرمل وشوفت تمثال سعد زغلول وقفت قدامه ولاقيت نفسى بفتكر حياته طبعا حسب ما قريت فى كتب التاريخ وتذكرت منفاه وثورة 19 وقعدت اقارن لو هو موجود فى الفساد والسرقة ومصر كلها عايشة فى الفقر ده ايه اللى كان ممكن يحصل ؟؟؟
على ايامه الستات كانوا بيلبسوا برقع وعباية لف .. طيب لما نفكر نرجع للايام الخوالى دى مش نرجع لجذورنا .. ما يلبسوا العباية اللف والبرقع بدل ما يبدلوا هويتنا وتاريخنا رايحين يرجعوا لجذور شبه الجزيرة الصحراء الجرداء ناقص يجيبوا لنا شوية غنم ويعلموا لهم مراعى فى ميدان التحرير ... فينك ياباشا تشوف الدروشة اللى الخلق بقت فيها ؟؟؟
هو ايامه مش كان فى عبارات بتغرق فى البحر ولا شورى بيتحرق ...ولا القاهره اتحرقت ايامه اصلا .. اللى حرقها البطل المغوار ناصر واعوانه ... وجه بعدهم الرئيس المؤمن كمل بشعاراته التى يتوارثها اخوان بعض عبر الزمان كل واحد ومصلحته بقى .. قصدى كل واحد وضميره ... وصولا الى المبارك اللى ماكلنا ومشربنا ومهنينا ومن الهنا اللى احنا فيه من كل قلبنا بنشكره ونقوله كفاية اوى ياريس الـ30سنة عز وفخفخفه وانتخه .. نفسنا بقى نجرب حياة الجوع ياراجل .. نفسنا نجرب ان لما رمضان والمدارس والاعياد يدخلوا ورا بعض الناس تمشى تكلم فى نفسها وتقول هنعمل ايه ؟؟ وهنجيب منين ؟؟ ويعملوا مظاهرات واعتصامات علشان الدراسة تتاجل ... مش علشان الاكل غالى ياريس ولا حاجه .. ولا علشان مش عارفين يدفعوا للعيال مصاريف المدارس اللى بتقل سنة ورا التانية ولا علشان دخول العيد كل سنة وانت منور وحسك فى الدنيا ياريس فى وسطنا كدا ... انما علشان بس هما بيشتكوا من قلة المصاريف نفسهم يصرفوا كتير وانت مش مدي حد فرصه .. لما الناس اتحرقت احتراق ذاتى ...
وفجأة انتبهت على انى واقفه على البحر مش فى مجلس النواب لاقيت نفسى بقول مفيش فايدة .. مفيش فايده وجريت على تريانون قولت اضيع المود اللى يجيب هارت اتاك ده
وقعدت اقول فعلا الدنيا مش بتدى محتاج بتدى عايز


البحر وقت الضهر .. بس انا مش نزلته خالص اصلى بصراحة وقتها كنت عايزه مش محتاجه

كل رمضان ومدارس وعيد والناس مش بتكلم نفسها والسنة اللى جاية نكون بنهنى بعض وبنقول رمضان كريم او سيد او سعيد

Comments

tamer.sala7 said…
كل سنة وانتي طيبة والتجديد مطلوب فعلا
بس عايز اقولك ان انا كل يوم بالليل بروح اقف عند التمثال بتاع سعد باشا علشان بركب من الموقف اللي قدامه وبرده اشوف العيال الحبيبة قاعدين تحت التمثال بتاع سعد باشا او قاعدين علي البحر في وشه ومحدش في دماغه اي حاجة ولا حد فاكر المنفي ولا حياة البؤس
ارجع برده واقول مفيش فايدة مفيش فايدة
صفا said…
فعلا الدنيا بتدى عايز
وانا عايزة يكون فى فايدة مش مفيش فايده
وان شاء الله رمضان الجاى يكون احسن
كل سنة وانتى طيبه مره تانية
nody_1987 said…
كل سنه وانتى طيبه ياقطه

فعلا الدنيا بتدى عايز

اما بالنوسبه للرخاء
لا ماتقولليش

ايه ده
رفاهيه والنعمه
ماهو الجوع بقى مزمن فابقى رجيم مستمر
وماحدش بيعمل دايت غير الاغنيا
تحياتى
مسلم said…
لا كده انتى بتتبترى على النعمه
احنا فى رخاء وازدهار ومفيش بطاله ومفيش حد محتاج حاجه وطبعا زى ما قولتى مفيش فايده
برغم انى مش مع كلامك فى موضوع عبد الناصر والسادات لان كل واحد كان بيعمل على قد ما كان فى عهده متاح ليه طبعا كل واحد فيهم له حاجات مش كويسه بس الحاجات الكويسه اكتر بس طبعا اكتر حاجه عملها السادات غلط انه اختار نائب ليه :ي
كل سنه وانتى طيبه
مطلع said…
معلومه صغيره
قبل ثورة عبد الناصر كان فى مصر مشروع وطنى ضخم تعرفى ليه؟
لمكافحة الحفاء
نعم لمكافحة الحفاء لأن اغلب المصريين وهم الفلاجين لم يكن يخطر ببيالهم ضرورة لبس شىء قى ارجلهم وكذلك فى المدن كان كثيرون يمشون حفاه لأنهم لا يملكون ثمن حذاء او صندل
واضطر الوطنيون لعمل حمله ضخمه لمكافحة الحفاء
Anonymous said…
ثلاثة اخبار
الأول
من سويسرا
العلماء يستعدون بعد
ايام
لأجراء تجربه مهوله لأعادة انناج الحاله التى كان عليها الكون بعد مولده باقل من ثانيه
لكشف اسرار الكون
ويشترك فى التجربه علماء من كل انحاء العالم الا من عندنا
الخبر الثانى
فى باكستان وفى منطفة القبائل التى تدعم طالبان
دفنوا خمس نساء احياء لمجرد انهم اصروا على الزواج من اشخاص معيينين
وليس من اختارته لهم القبيله
الخبر التالت
صحفى فى الدستور كتب عن سر حجاب حنان ترك
فانبرى له الأشاوس فى هجوم مسعور عليه ودفاعا عن تحجبها وسيل من الأتهامات وجهت له ومنها معلقه تقول ان شيخ افتى بحرمانية التمثيل
قرات الأخبار الثلاثه فى الوقت نفسه فاصابنى الحزن والكمد والياس على ما نحن فيه
الحكومه لا تلام فقط الشعب نفسه فى غيبوبه ولا يدرى حتى مثقفوه شيئا عما يجرى فى العالم
يحتاجون لبنابليون آخر يوقظهم من نومهم الطويل
وتحميل الحاكم بكل اسباب المصايب هو بحث عن شماعه
فاليابنيون تقدموا وهم تحت الأحتلال
اللى عاوز يتقدم بيتقدم وفعلا الدنيا لا تعطى محتاج ولكن تعطى عايز
MEDUS said…
قطتى الصحراوية
اهلا بك فى الاسكندرية
حيث الهواء والرمال والمية
لكن عندى عليكى عتب شوية
ازاى تكونى فى الاسكندرية
وما عرفش الحكاية ديا
عزيزتى
الايام السعد زغلولية
كانت ايام تحررية
ولا انتى نسيتى الست صفية
ورفيقتها هدى هانم التقدمية
اما ايامنا ديا
هى ايام تأسلمية
اى انها ظاهرية لا باطنية
المهم بابعتلك
فى النهاية تحية رمضانية
لك ولكل الصحبة ديا
هى دى الدنياالحاجة اللى عايزها عمرها ماتجيلك ابدا
ثانيا انا قريت انك تانى رمضان يمر من غير والدتك
ربنا يصبرك ويوفقك
ADAM said…
السلام عليك

قطتي الجميلة

كل عام وأنت ِ بخير

ورمضان كريم

وحوي يا وحوي

اليوحة

وكمان وحوي

اليوحة

ههههههههههههه

ربنا يعيد علينا وعليكي

الأيام بخير

وإن شاء الله

رمضان السنة دي

يكون طريقنا للجنة


سلام يا صديقتي


آدم
كل عام وانتم بخير

اللهم تقبل صيامنا وقيامنا وركوعنا وسجودنا

رمضان كريم
وليد
Misrdream said…
كل سنه وانتى طيبه
يا قطه ورمضان كريم
واجازه سعيده
بس كنت عاوز اوضحلك ان ناصر واعوانه
موش هما اللى حرقوا القاهرة
زي ما شوفتي فى مسلسل الملك فاروق
ناصر واعوانه كانوا اخر كرامه
وشكرا
;)
soska said…
يا قطتي يا جميله بحب طلعاتك السيكولوجيه دي و بستفيد جدا منها والله فعلا المحتاج بيرضى بأي حاجه من غير ما ينقي اما اللي عايز بيختار و يدور كويس
حبيبتي كل سنه وانتي بألف خير و السنه الجايه نكون في عهد جديد ياااااااااااااارب عيييييينه اللي في بالي
وزي ماقال الشاعر يجعل شهر الكريم ابيض عال الكريم اخبر عاللئيم اسود عاللي ينكد عال حريم قادر يا كريم
الربان said…
تحياتي

اولا كل سنة و حضرتك طيبة و رمضان يعود عليكم بالرحمة و المغفرة.

ثانيا فكرتيني بالاسكندرية التي احبها و افتقدها من سنوات فلم ازرها...

تحياتي و تقديري و حمدا لله علي سلامتك.
كل سنه وحضرتك طيبه
ويارب رمضان مبارك عليكى
تحياتى
قطقطوتنا العسل
كل سنه و انتي طيبه ياجميله و ينعاد عليكي رمضان و كل ايامك بالخير و السعاده و دايما في تألق و منورانا دايما
ايام زمان و ليالي زمان فينها بس دلوقتي ياقطه
عارفه اسكندريه ليها سحر خاص و حاجه كده بتهدي الأعصاب ماتعرفيش بتيجي منين بس من الأماكن الجميله اللي بحب ازورها
ربنا يجعل كل ايامك سعاده و كل سنه و انتي طيبه ياقمر
قطتي المشاكسة

كل سنة وانتي طيبة يا فندم

وعلى رأي عبد الرحمن فارس

رمضان مبارك عليكم في الدول العربية أما بالنسبة لمصر مبارك عليكم على طوووول ...

...

يا قمرايتي لما تروحي اسكندرية تاني اوعي تبصي لتمثال سعد

أصلها قضية أمن دولة كده ..!

ههههههههههه

وماتنسيش عمو سعد قاااااال ايييييييييييييه

مفيييييش فايدة
A7MeD F@hMy said…
كل سنة و انتي طيبة يا قطة
جميلة اوي المقولة دي فعلا و صح مية ف المية
الدنيا دي عايزة حد كدة واعي
ويجري وري الحاجة يجيبها مش يستناها لحد ما تيجي له

لس معدي من المكان ده امبارح مرتين حتي البحر اللي هناك مفيهوش شاطي
:-p
هههههههههه
كل سنة و انتي طيبة كمان مرة و رمضان كريم
العزيزة قطة الصحراء
أثارني المقطع التالي بشدة

وصولا الى المبارك اللى ماكلنا ومشربنا
ومهنينا ومن الهنا اللى احنا فيه من كل قلبنا بنشكره ونقوله كفاية اوى ياريس الـ30سنة عز وفخفخفه وانتخه

..

وتساءلت أولا عن مقدار الحرية المباحة لكم للتعبير عن آراء مثل هده في بلد الفرعون مبارك، ولمحت اللهجة الساخرة الحزينة وتساءلت هل بمقدور المصريين الصبر أكثر..وهل يقبلون أن تتحول الرئاسة الى رئاسة وراثية ..
أقول دلك لأن الكثير من الشعوب فاجأتني بمقدار الادعان والتمسك بصور ملوكها ورؤسائها حد الهلوسة

حقا الدنيا تدي عايز مش بتدي محتاج
مودتي
mahasen saber said…
يا قطه الدنيا ساعات مبتديش من اصله ..بس هنختلف تانى وللمره الكمان والى مش عارفه كام فى موضوع النقاب ..مع انى مش باييده..بس بصى يا ستى لو قدر لينا ناخد او نتشح بثقافه او هويه ما يبقى ناخد الهويه العربيه ولا الغربيه ولا الا هويه اصلا يعنى لما نقلد دوله عربيه اهى دوله عربيه يعنى ابناء دم واحد مش مثلا طمسنا هويتنا العربيه ومسكنا وصبغنا روحنا بهويه مش من لونا ودمنا ...
وللمره المليون كل واحد حر طالما حريته مش بتأذينى ولا ايه..مع انى من الناس اليى بتقول ان النقاب مينفعش لزمانا ده عشان البلاوى اليى ممكن تتعمل بيه على فكره ده ينفع زمن سعد زغلول ودققى كده...
اما بقه فيما يتعلق باغنية بريان ادامز ما انا عارفه ان البوست مش فيه كلمات مشابهه للاغنيه بس انا بقولك انا ممكن كلمه واحده او حرف فى جمله ما يفكرنى بشئ حلو عندى والبوست فيه كلمة cloudes
فبس علطول فكرتنى ب cloud number 9
معلش هيا دى دماغى مكلكعه ساعات وغريبه فى المطلق...كل رمضان وانتى بخير والمقطوعه الحلوه دى لمين..
مرة أخرى فى وسط تأملاتك ترمين على عبد الناصر تهمة ليس لها اى سند تاريخى او منطقى وهى الخاصة بكونه مسئولا عن حريق القاهرة, ولا أعرف صراحة ما علاقة ضابط جيش (حتى وقتها) بحريق عاصمة لديها ملك وحكومة وشرطـة حمايتها مسئوليتهم, وقـد تناقشنا فيها من قبل,,وليس هناك أى دليل على رؤيتك المنفردة تلك..

_المشروع اللى الأخ مطلع ذكره ليكى حقيقة فعلا وكان اسمه (مشروع القرش) وكان بيعتمد على التبرع بقرش صاغ لمكافحة الحفاء المتفشى بين المصريين و بعدها انتشرت القباقيب الخشبية بين المصريين,,

هذا طبعا فى العصر الملكى الذى ترينه سعيدا

تحياتى
والله انا شايف ان الجو جميل والامن مستتب
هههههههههههههه
والله البلد بتمر بظروف اقتصادي قاسيه والحكومه مبترعيش وكمان فى بداية كبوه اقتصاديه عالميه النهارده اليورو سعره نزل والدولار بيرتفع والدهب سعره نزل دا معناه ان فيه تقالبت اقتصاديه ولكن برده الحكومه مبترعيش واما بالنسبه لعبد الناصر فى واحد قال كلمه فى حقه انا مش ناسيها انجازته غالبت تجاوزته ودا شئ يخلينى اتغاضى عنها اما بالنسبه جدو مبارك وستو زوزان فدول بيليز محدس يكلمهم جدو لسه قاعد معانا شويه اما بالنسبه لستو رعاية الامومه والطفوله اللى بتسافر على حساب الدوله تروح مؤتمرات مالهاس اى لازمه
بلدنا بقت سلطة طماطم من غير اى اضافات
تحياتى
ههههههههههههههههه
حلو البوست يا قطه فعلا الدنيا ما بتديش محتاج علبى رأى الدرويش ابو فراج
كل سنة و أنت طيب يا جميل و يارب يعود عليكي بخير
بتفطري سمك ع الأفطار ؟

--------

أدعوك لزيارتي لمعرفة تفاصيل المشاركة في أفطار رمضاني
كل عام وأنت إلى الله أقرب

ومنه أخوف

وبه أعرف

وإلى دار كرامته اسبق

رمضان كريم
Desert cat said…
tamer.sala7
وانت طيب يا تامر
شوفتهم بالليل وكنت واقفه بقول الله عليكى وعلى شبابك يا مصر
فعلا مفيش فايدة
تحياتى
Desert cat said…
صفا
لاء يا صفا هو قالى بتدى عايز ومش بتدى محتاج
وعلشان انتى عايزة التغيير ان شاء الله هيكون فى فايدة
كل سنة وانتى بالف خير يا جميل
Desert cat said…
nody_1987
وانتى طيبة يا نودى
احنا علشان محتاجين التغيير مش هيحصل خلينا نوهم نفسنا ونقول عايزين يمكن
:)
تحياتى
Desert cat said…
مسلم
طبعا احنا فى رفاهيه بيحسدنا عليها الشعوب التانية ومش بيالفوا لنا اغانى شتيمة فينا ولا حاجه
بالنسبة لاختلافك او اتفاقك مع ناصر والسادات فهذه وجهات نظر ومن الطبيعى انى احترمها
تحياتى لحضرتك
Desert cat said…
مطلع
حركة وطنية لمحكافحة مين حضرتك ؟؟؟
الفلاحين الحفاة ؟؟؟
الفلاحين الحفاة اللى كانو يكونوا للملك فاروق كل حب واحترام
الفلاحين الحفاة اللى وقفوا فى الشمس يتنظروا قدوم الملك فى القطر لاستقباله بكل حب وترحاب فى بورسعيد .. الفلاحين الحفاة اللى اول ما سمعوا عن حادث انقلاب الملك بعربيته فى التل الكبير الجميع هرع للاطمئنان عليه ؟؟؟؟
ملك كان بيساعد الدول ويرسل الكسوة للكعبة الشريفه وفلاحين بلده حفاة ؟؟
Desert cat said…
Anonymous
تعليق على الخبر الأول
مثل شعبى ينطبق علينا 100%
الناس خيبتها السبت والحد واحنا خيبتنا مش عند حد
تعليق على الخبر الثانى
اهلا ومرحبا بوأد البنات مرة اخرى
والعودة الى عصور الجاهلية الاولى ..
تعليق على الخبر الثالث
حنان ترك قصدى الاخت حنان ترك ربنا تاب عليها خلاص ؟؟؟ يعنى مش بعد يومين هنلاقى الصحف بتتكلم عن قضية آداب تانية ؟؟؟؟
وبما ان التمثيل حرام شاغلين الفاضائيات باعمالهم الدرامية ليه ؟؟؟
يا سيدى الفاضل حركة الفنانة الفذة اتحجبت وبعد يومين تقلع الحجاب ماهى الا للشهره فقط لا غير اللى عايزة تتحجب او تتعزل تتحجب فى صمت ... مش احاديث فى الصحف والمجلات وبعدين يومين نلاقيها طالعه بمسلسل علشان الناس تشوف الفنانة المحجبة المعتزلة سابقا واللى رجعت فى كلامها لاحقا
تحياتى
المنافق said…
القطة الجميلة..
أنا على طول عايز..اللي عايز دوما متمرد.. تلتقي تدوينتك هده في هده النقطة بالتدوينة الأخيرة للجميل هرطقة الدي كتب في آخر تدويناته عن الناس السكونيين والناس المتمردين يعني بلغتك اللي عايزين واللي محتاجين..
جميل.. هدا يطمئن إلى أن الوعي في تطور الى الأحسن وأن الاناث لسن كلهن أكياس طينية
تحياتي
Desert cat said…
Anonymous
تعليق على الخبر الأول
مثل شعبى ينطبق علينا 100%
الناس خيبتها السبت والحد واحنا خيبتنا مش عند حد
تعليق على الخبر الثانى
اهلا ومرحبا بوأد البنات مرة اخرى
والعودة الى عصور الجاهلية الاولى ..
تعليق على الخبر الثالث
حنان ترك قصدى الاخت حنان ترك ربنا تاب عليها خلاص ؟؟؟ يعنى مش بعد يومين هنلاقى الصحف بتتكلم عن قضية آداب تانية ؟؟؟؟
وبما ان التمثيل حرام شاغلين الفاضائيات باعمالهم الدرامية ليه ؟؟؟
يا سيدى الفاضل حركة الفنانة الفذة اتحجبت وبعد يومين تقلع الحجاب ماهى الا للشهره فقط لا غير اللى عايزة تتحجب او تتعزل تتحجب فى صمت ... مش احاديث فى الصحف والمجلات وبعدين يومين نلاقيها طالعه بمسلسل علشان الناس تشوف الفنانة المحجبة المعتزلة سابقا واللى رجعت فى كلامها لاحقا
تحياتى
Desert cat said…
MEDUS
يا اهلا وسهلا بيك
انا نفسى اتفاجأت بزيارتى لاسكندرية
مش نسيت خالص الست صفية ولا هدى التقديمة بالعكس انا اتمنى ان ايامهم الجملية ديه ترجع او يفوق المدروشيين وحياتهم هلامية
اشكرك جدا
مودتى واحترامى
Desert cat said…
بنوتة مصرية
الدنيا مش ليها علاقة بافعالنا يا انجى
احنا اللى المفروض نتغير
ثانيا سمعتى فين الكلام ده
شكلك اختلط عليكى الامر خالص
انا ماما ربنا يخليها لى ويديها الصحة ويبارك لى فيها يارب
كل سنة وانتى طيبة يا جميل
Desert cat said…
ADAM
العزيز ادهم
كل سنة وانت طيب وبالف خير
رمضان كريم عليك وعلى اسرتك وكل محبنينك
مودتى واحترامى
Desert cat said…
!!! عارفة ... مش عارف ليه
كل سنة وانت بالف خير
رمضان كريم
تحياتى وليد
Desert cat said…
Misrdream
كل سنة وانت طيب يا احمد
بالمناسبة انا مش شوفت للاسف مسلسل الملك فاروق 10 دقايق على بعض
يعنى افتكر ان المسلسل مرة فى المقدمة بتاعته وانا نازلة ن البيت ومرة تانية كان بيتشغل فعلا بس انا كنت بتكلم فى التليفون .. دول المرتين اللى شوفته فيهم لكن حقيقى لا ركزت ولا عارفه ايه اللى فيه انما المؤكد المؤكد فعلا هو ان ناصر واعوانه اللى حرقوا القاهره والتاريخ شاهد يعنى لا انا ولا انت ... كرامتنا كانت ايام الملك .. اياما ماكنت مصر مصر لا بتتسرق ولا مديونة ولا بتاخد اعانات من حد ولا اولادها متبهدلين فى الدول
تحياتى
Desert cat said…
soska
حبيبتى انا متشكرة جدا لزوقك يا جميله
كل سنة وانتى طيبة وبالف خير
ورمضان كريم سعيد عليكى
شرفتينى جدا
Desert cat said…
الربان
كل سنة وحضرتك بالف خير
ان شاء الله تيجى بالسلامة وتزور اسكندرية وتستمع بجوها الجميل
الله يسلم حضرتك
احترامى وتقديرى
Desert cat said…
المستنصر بالله
وحضرتك طيب
رمضان مبارك على الجميع
Desert cat said…
اجندا حمرا
صديقتى الجميلة ارق اجندة
كل سنة وانتى طيبة وبالف خير
هى فعلا اسكنرية جميلة بشوارعها وشواطئها وجوها الجميل
انتى اى مكان تكونى فيه يا قلبى لازم تشوفيه بعوينك الجميلة جميل
كل سنة وانتى بالف خير
محبتى يا قمراية
Desert cat said…
د\أسماء علي
كل سنة وانتى طيبة وبالف خير يا جميل
رمضان كريم
انا خلاص حرمت ابص على حد يا اختى وكفاية اللى حصلى من يوم عمو سعد وانا نفسيا بح خالص
اصل تقريبا برضه مفيش فايدة
محبتى يا جميله
Desert cat said…
A7MeD F@hMy
كل سنة وانت طيب يا احمد
المقولة دى فعلا كانت جاية لى فى وقتها
يا بختك يا سيدى بتعدى من المكان ده كتير انا مش بحسد انا بقر بس
البحر اللى هناك تصدق فعلا مالوش شاطئ بس انا للاسف مش قضيت اليوم كله قدام عمو سعد يعنى اصلى رحت العجمى وعلشان كدا صورت البحر اللى هناك
:)
رمضان كريم
Desert cat said…
نبراس العتمة
العزيز نبراس مضيئ للدنيا كلها
اعتقد ان تساؤلك فى محله
الشعب المصرى تم تحطيمه معنويا لذلك ليس امامنا الان سوى الكلام ... اما الافعال انتهت اصبحت لا طائل منها لسبب بسيط لم يوجد من يقوى على الفعل الحقيقى .. فمن اراد الترشيح للرئاسه يكون نصيبه كم من القضايا التى لا تقوم له قائمه بعدها ... اما الشعوب التى تقدس ملوكها فاعتقد انهم ينعمون فى بلادهم ...
كل سنة وانت طيب
مودتى واحترامى
Amgad said…
ونبي يا بنتي
انا نفسي اقرا البوست
بس الصحة ع القد ومش شايف
انتي من دور ولادي برده
ومش هتكسف منك
ابقي كبريلنا الخط شوية
Desert cat said…
mahasen saber
الدنيا دى مظلومة معانا
بنرتكب كل افعالنا وفى الاخر نلوم على الدنيا ... بالنسبة لاختلافك فدى وجهة نظرك وانا لازم احترمها طبعا .. لكن معلشى لو عايزين نتخذ هوية يبقى ناخذ هويتنا المصرية .. نرجع لجذورنا احنا ... ايه دخل الغرب فى الكلام ؟؟؟ هو احنا اى حاجه نلزقها فى الغرب .. ما حضرتك دلوقتى قاعدة على كمببوتر من صنع الغرب ... وبتتكلمى على نت من اختراع الغرب ... وبتسمعى اغانى الغرب ... العرب جالنا منهم ايه غير التخلف والجهل وعقد الاضطهاد .. ابقى اخطفى رجلك للنيل وشوفى العرب وهما بيمثلوا فيه تياتنك ... نرجع تانى ونقول اللى عايزة ترجع للجذور .. ترجع لجذور ابائنا واجدادنا .. احنا مصريين لينا هوية واصل واجدادنا الفراعنة قالوا لنا انتوا ليكو اصل بدليل تشدقنا بيهم لحد النهارده ... وذكرنا المستمر على اننا احفاد الفراعنة .. يبقى نروح ناخد هوية ناس ملهاش اصل ليه بيجردونا احنا من هويتنا ليه ؟؟.... حضرتك قولتى انت حر مالم تضر
جميل
تفتكرى لما تكونى طالعه اتوبيس وتلاقى حد بيبص عليكى وترد الاخت اللى على شكل كس زباله تقوله بتبص كدا ليه يمكن مسيحية ... تفتكرى لما مش تعبريها وتعدى من قدامها تسمعى حد بيقول فى ضهرك لعنة الله عليكى .. هيكون ردك ايه ؟؟؟
تعرفى انا عملت ايه ؟؟ قلعت نضارتى وبصيت لها نظرة احتقار عمرى ما بصيتها لحد .. وتفيت تحت جزمتى ورحت قعدت فى كرسى ورا شوية ... اللى جنبى كان فاضى .. جت تقعد فيه مع انها كانت قاعده قبل ما انا اطلع الاتوبيس .. تفتكرى ليه ؟؟؟ يمكن علشان تسالنى وقتها مسلمة ولا مسيحية ... مش عارفه حقيقى لانى بمجرد ما جت قعدت جنبى سبتها انا وقومت علشان احسسها انها عبارة عن كيس زباله ريحته وحشه حاجه زى الجرب كدا ولازم ابعد عنها ... تفتكرى دى بكلامها بالطريقة دى على واحده مش تعرفها .. محترمة ؟؟؟؟؟
سابت الناس حرة وفى حالها ؟؟؟؟
بحكى لك على نموذج من النماذج اللى مش سايبه حد حر ورايحعه جاية تضر بالفاظها الخالية من الادب والزوق فما بالك بافعالها ؟؟؟
بالنسبة للاغنية
فيا ستى كل اغانى بريان ادامز اهداء لحضرتك
تحياتى
أنا حر said…
كل سنة وانت طيبة وبخير يا قمر
الدنيا بتدي عايز دي حقيقة علشان كده احنا مش بناخد حاجة لاننا مش عارفين مصر عايزه ايه
مش عارفين احنا ممكن يتصلح حالنا ازاي
افتحي باب النقاش في الموضوع ده وهتلاقي صواعق نزلت فوق النفوخ على طول
ناس عايزانا نبقى زي السعودية ونلبس زيهم وناس عايزين يهدوا تاريخ الفراعنة علشان اصنام
وناس عايزة تخرج المسيحيين من مصر علشان كفرة
وحاجات كتير من بابا التخاريف
ربنا معانا
تحياتي
Desert cat said…
عمرو (مواطن مصرى)
مرة اخرى اهلا وبيك وبمناقشة سابقه اعتقد انها لم تكتمل بعد
عزيزى انا لم القى اى تهم على عبدالناصر ولكن التاريخ خير شاهد على افعال عبد الناصر
لما تتفرض على الملك حكومة النحاس من الانجليز
لما ناصر يروح يلتقى بسفير امريكا ويتفقوا على استبعاد النظام الملكى فى نفس الوقت علاقاته ممتدة مع اى حد ضد الملك كالشيوعيين والاخوان
لما القاهره تتحرق 3 ايام والملك يفرض الاحكام العرفية والبلد كلها فى ظلام دامس من يناير حتى يوليو ويبقى فى حظر تجول ما عدا سيارات الجيش
اذا كانت فرصه لناصر واعوانه للقيام بعملهم المتهور اللى وصفوه بثورة فيما بعد ... يبقى كل المؤشرات بتقول ناصر ...
ناصر اللى مصر مش عرفت المعتقلات غير على ايامه والسجون الحربية .. ناصر اللى ارسل استورد احدث اجهزة تعذيب من المانيا ...
بالنسبة للفلاحين الحفاة فحبهم للملك فاروق لم ولن يتساوى بحبهم لاى حاكم بعد فاروق ... يكفى انه لم يعترف باسرائيل ولا كان عميل امريكى ولم يعقد اتفاقات مع سفراء امريكا ...
يكفى ان مصر كانت اسم يفتخر به وبشوارعها ونظافتها وليست عشوائيات واهلها فى فقر مدقع

تحياتى
Desert cat said…
محمد صالح
فعلا الاقتصاد بيتغير والبورصة فى النازل ما شاء الله كدا
والحديد كمان سعره نزل يعنى اللى عايز يبنى يلحق نفسه قبل ما يرتفع 3 اضعاف
بالنسبة لناصر انجازاته ايه قولت لى ؟؟ السد العالى مش بفلوسنا ده ؟؟ اذاعه القرآن الكريم .. عبدالحليم وان كلثوم
انجازات صح
تحياتى
Desert cat said…
بنت مصريه
ميرسى يا جميل
الاحلى هو حضورك
تحياتى
Desert cat said…
عاليا حليم
وانتى طيبة يا لولو
انا مش بفطر سمك يا جميل انا بفطر استكاوزا
:)
ها اجى اضر اشوف ايه النظام
تحياتى
Desert cat said…
المحارب المتيم
وانت طيب
بس ليه عايزنا نخاف من ربنا
ده حتى ربنا كويس وبيساعد كل الناس واللى بيتوجه له بالدعاء وبيقوله يارب بيكون جنبه
يبقى المفروض اننا نحبه ونحترمه ونعبده ونؤدى فروضه علشان بنحبه مش علشان خايفين
تحياتى
Abu Shahin said…
كل سنة وانتى طيبة
كل سنة والناس محتاجة التغيير لكن مش عايزه
Desert cat said…
المنافق
كل سنة وانت طيب
التمرد فى حد ذاته شيئ جميل لكن يكون تمرد للصالح العام وليس للطالح ... تمرد ذو هدف وهوية محددة
كلامك عن بوست هرطقة دفعنى للاطلاع عليه
اشكرك جدا على كلماتك
مودتى واحترامى
Desert cat said…
Amgad
حاضر من عنيا
هبقى اكبر لك الخط بعد كدا
تحياتى
Desert cat said…
أنا حر
كل سنة وانت طيب يا احمد
وبالف خير
انا قبل كدا فتحت باب النقاش فى حاجه مشابهه اكتشفت انى كافرة وانا مش عارفه يعنى المفروض نتلثم زى قطاعين الطرق والحرامية والمفروض نهد حضارتنا ونتقلع من جذورنا والمفروض نطمس معالمنا ونحكم بالعصا والنار ونمشى اصحاب حق من بلدهم لمجرد ان دينهم مختلف مع ان الدين لله والوطن للجميع والدين علاقة روحية بين الانسان وربه
لكن معلشى الجهل نورن
تحياتى
Desert cat said…
Abu Shahin
وحضرتك طيب
هو المفروش نعمل ايه للناس دى بقى
انا شايفه انهم محتاجين وعى مش اكتر
تحياتى لحضرتك
قطق الصحراء..زى desert rose
اغنية ستيج مع الشاب مامى عارفاها..
المهم انا اولا مش من الناس اليى بتقول الغرب والغرب والغرب دول على راسى من فوق عارفه ليه عشان هما اليى كانوا عملين مظاهره عشان الحصار على غزه وهما اليى سافروا بمراكب تنبيه للعالم للي بيحصل هناك عشان بشوف فيهم ناس بتدافع عننا وعن قضايانا واحنا مش بنعمل كده عشان لما يبقى منهم ناس زى براين ادامز وستينج وجون بون جوفى وتينا تيرنر وغيرهم يعملوا حفلات وريعها يبقى للمسلمين فى كوسوفو او الصومال واحنا مطربينا بيتهربوا من الضرايب..
وعشان واحد زى اينشتاين وهو يهودى اعترف بكل موضوعيه ان اسرائيل مغتصبه لفلسطين وان هما عصوا الرب فلازم ينفذوا حكم الله فيهم ويعيشوا فى شتات ده كلام واحد غربى يهودى
وعشان الغرب دول منهم ناس منت لما بتكلم معاهم بلاقى حد بيحتوينى ويفهمنى احسن من مليون واحد لسانى زى لسانه..
انا عمرى ما كرهت الغرب ولا بصتلهم بعين رديه زى زى اى عالم فيه الحلو وفيه الوحش انما انا بقول لما ناخد من هويه عربيه زينا قصدى يعنى اهه زيتنا فى دقيقنا زى ما بيتقال كده..انما انتى بتنادى بجذورنا المصريه ومين فينا مش بينادى بجذورنا المصريه العربيه الاسلاميه والمسيحيه كمان مش هيا دى مصر...بس انا من انصار الوحده العربيه وعايشه على امل وعمر كمان تحقيقها...
بس وضحت وجهت نظرى انما تقوليلى الغرب والنبى اسكتى دا انا بسبب اعجابى بيهم كنت بتفهم غلط من اهلى حتى ...
اما اليى انتى بتتكلمى عليها دى ولا تبت للدين بصله كنتى قوليلها روحى ااقري سيرة الرسول وشوفى ذوقه ورقته واخلاقه فى تعامله مع البشر حتى اليهود والملحدين المخالفين لدينه ودعوته حتى مع اليى اذووه وهانةه..انما دول خدوا من الدين شكل اصلا عايزين يفرضوه على الدين وهو لا يبت للدين بصله ..
وهرجع ااقولك برضه كل واحد حر يعنى لو هيا لابسه نقاب بس محترمه معايا وبتتقى ربنا فيا اهلا وسهلا بيها اما معملتش كده يبقا البعد عنها غنيمه..وضحت خلاص بعدين انا بعتز بيكى جدا لانىك بيتقولى حاجات وافكار انا مقتنعه بيها المشكله بس فى طريقة طرحها انتى بتحدتى شويه وعصبيه حبيتين مع ان اليى بيسمع بريان ادامز بيبقا ريلاكس..واهه بريان ده بالذات ياما عاملى مشاكل كان كل ما حد يلاقينى بسمع اغانىه او غيرهيدينى موشح فى الانتماء للامه العربيه ولما ااقولهم والله ناصريه حتى النخاع وبحب وطنا العربى ومسلمه وبصلى وبصوم وايه يمنع انى بموت فى بريان وسكوربينز وكوين بحس انهم بيعبروا عن اليى جويا وبموت فىالست وحليم والله ...تخيلى كانوا بيبصولى نظرة ريبه وشك البت دى من عبدة الشيطان هههههه مع انى محجبه والمفروض ان هما ناس دكاتره ومهندسين وكده يعنى يخرب بيت التعليم اليى اتعلموه..وتحياتى بقه محاسن..
Desert cat said…
عايزه اتطلق و
عزيزتى انا مش سمعت الاغنية بس اسمعها علشان خاطرك
بالنسبة للغرب انا مش بمجد فيهم كل شعب وله سلبياته بس انا نظرتى للعرب على اننا عاجزين كمان عايشين عالة على غيرنا هما يفكروا ويبتكروا واحنا ناخد ناتج افكارهم على اساس انهم مسخرين لينا .... حضرتك بتؤمنى بالوحد العربية ودى حاجه جميلة ... لكن الشعوب العربية نفسها مش بتتقلع من جذورها .. بالعكس ده اللى مش عندهم اصل بيحاولوا يصنعوا لنفسهم تاريخ علشان يقولوا احنا اهوه واحنا تاريخنا موجود وشاهد على مر العصور تاريخنا دعوة للفخر مش للبعد عنه .. علشان كدا بقول ليه مش نرجع لجذورنا احنا وتاريخنا احنا ... موضوع طرح المواضيع بعصبية ده مش اقدر اقولك حاجه عليه هههههههههههههه
مع انى بسمع كمان يانى وزامفير وكينجى
يعنى المفروض ابقى تلاجه
بس تعملى ايه بقى بنت سبعه وكمان اخر العنقود دى لوحدها مشكلة ... اسفه حقيقى لو حسيتى بعصبية منى فى كلامى معاكى

مودتى واحترامى لحضرتك
maxbeta3zaman said…
الحمد لله الذى لا يحمدعلى مكروه سواه
اعجبنى البوست .. بس فيه فايده موش مافيش فايده آه لو اعتبر نظيف من سعد تحياتى
Desert cat said…
maxbeta3zaman
اتمنى يكون حقيقى فى فايده
بس امتا بقى هيبقى فى فايده
الله اعلم
تحياتى
Sherif said…
ناصر على علاته له اعمال باقية والرجل لم ينسبها لنفسها
نسبها الى شعبه الذى احبه بلا مواربة .. واستطاع معه ان يؤمم القناة ويبنى السد العالى ويطرد الانجليز والملك

مع كل مراقبتى للتاريخ .. يظل هذا الرجل رغم اخطائه نظيف اليدين .. وخرج من الدنيا هكذا

بوست جميل .. بالاخص اننا تحولنا الى محتاجين .. قليل منا عايز
Anonymous said…
لقيت شابة فلسطينية حتفها، بعدما دفنها والدها حية، حفاظاً على "شرف العائلة". وقال مصدر في الشرطة الفلسطينية إن أباً في العقد السابع من العمر، سلّم نفسه إلى الشرطة، مبلغاً إياهم عن قتله ابنته، وهي مطلقة في الرابعة والعشرين من العمر، بدفنها حيّة.

وبعد توجه قوات الشرطة إلى المكان، تبين أنه تم دفن الابنة في حفرة، بعد تقييد يديها ورجليها، وتكميم فمها بلاصق خاص، حسبما نقلت تقارير صحفية الاثنين 1-9-2008.

وتمت إحالة جثة الفتاة للطبيب الشرعي، للتأكد مما إذا كانت تعرضت للضرب، أو القتل قبل دفنها. فيما أشارت الشرطة إلى أنها اعتقلت 4 من أشقاء القتيلة، لمعرفة علاقتهم بالجريمة.
Desert cat said…
Sherif
لكل وجهة نظرة التى لابد من احترامها
اتمنى ان الشعب كله يجمع انه عايز مش محتاج يمكن يحصل تغيير
مودتى واحترامى لحضرتك
Desert cat said…
Anonymous
كان من الاولى ان الاب يوأد نفسه مكان بنته .. لانها لو غطلت هو اللى قام بتربيتها اعتقد .. التخلف والجهل عمى عيون الناس وطمس ما يسمى بالعقل
تحياتى
كالعادة متألقة ..الكلام سهل ومتواصل مع الاحداث ..وأخذتينا معاك من تاريخ لتاريخ وحكايات وروايات عن مصر المحروسة

ونحمد الله انك عايزة ومش محتاجة

كل عام وانت بخير ورمضان كريم
Desert cat said…
وميض ابتسامة
ميرسى جدا لذوقك وكلامك الجميل
كل سنة وانت بالف خير
احترامى وتقديرى
مطلع said…
انت تخلطين بين الملك فى فتره مبكره من حكمه كان الناس مستبشره فيها خيرا
والفتره الأخيره من حكمه عندما ظهر بوللى
هل تعرفين من هو بوللى وماهى مهمته بالظبط ؟
اما حكاية تجميع فلاحين بسطاء لأستقبال زائر مهم افتكر ان هذه مهمه سهله كانت لا تحتاج لأكثر من معاون فى نقطة الشرطه
اما حكاية الحفاء فهى حقيقه واسالى اى شخص فى السبعين سيذكرها لك
وشكرا للأخ عمرو مواطن مصرى ولكن مشروع القرش كان الهدف منه اقامة مصنع وطنى لصناعة الطرابيش للأستغناء عن المستورد وتحكم الأجنبى
وحكاية الحفاء هذه ممكن تشاهديها فى الصور الملتقطه فى هذا الزمن وهى كثيره وايضا فى مسرحية نعمان عاشور عيلة الدوغرى رمز لهذا المصرى الحافى بشخصية الطواف
اعتقد انك فى مثل هذه المواضيع تحتاجين للتعمق والرجوع للمصادر الموثوق بها
وعدم التعصب لريك باى ثمن خاصة اذا كان يمكن دحضه بسهوله
Desert cat said…
مطلع
اولا وقبل اى حاجه لما تحب تتكلم وتوجه نقد يبقى لرأى نفسه .. مش تتدخل فى شخص اللى انت موجه له الرد
ثانيا : حضرتك اعتقد ان مفيش حد بيخرج من بيته غصب عنه .. علشان تقول عسكرى يطلع الفلاحين يستقبلوا الملك
واعتقد نفس العسكرى هو اللى خرجهم من بيوتهم من شتى انحاء الجمهورية لاطمئنان على صحته لما اتقلبت عربيته فى التل الكبير مش كدا ... اذا كنت عاصرت السبعينات او سالت حد من الرعاع اللى كان عايش فى السبعينات لذلك هو حاقد على الملك اذا دى مشكلة شخصية مش من الواجب تعميمها ... ومن الواضح انك بتستند لكلامك من مسرحيات ومسلسلات وبالتالى وضح هنا مين اللى محتاج انه يقرى ويطلع اكتر اصل تقريبا مش سمعت فى منطقتك عن مبنى يسمى مكتبه ... اذن مشاريع حضرتك من خيال مؤلف مسرحية وبالتالى محتاج تقرى علشان تتنور مش عيب ولا حرام

Popular posts from this blog

مـصـــــر هـبـــة النيـــل