أموال صاحب المحل حل لنا ...

بدلاً من الحلم وتحقيق الطموح المشروع
بدلا من السعى والبحث عن لقمة عيش بشرف وامانة
بدلاً من اعلاء كلمة الحق التى يتشدقون بها ليل نهار
كل هذا تبدل بالاسلحة النارية .. ميلشيات بقى .. والبلطجة .. والإرهاب .. والسرقة وارتكاب الحماقات
والغريب قولهم ان هذه الاموال حل لهم
وترديدهم للعبارات الدينية اثناء القبض عليهم وهذا كلام شهود عيان
إذن من الذى أحلها لكم أيها المدعون الكاذبون ؟؟؟
من الذى أحلها لكم ايها البلطجية النشالون ؟؟؟
من الذى أحلها لكم يا تجار الدين يا همج ؟؟؟؟؟
هى السرقة والنصب فى عرفكو دلوقتى بقت جهاد .. شوهتوا صورة الدين بتاجارتكو وارهابكو وتطرفكو لو تعرفوا معنى الدين بجد كنتوا عرفتوا ان الدين لا قال تسرق مسلم ولا مسيحى ولا اللى مالوش ملة
نــــص المقال
http://www.almasry-alyoum.com/article2.aspx?ArticleID=131097

تعليقات

‏قال غير معرف…
فى مجتمع اصبح المناخ فيه هو الاحباط فى كل مكان .. ليس امام اى واحد سوى الهروب الى الخارج ان امكنه ذلك .. فان لم يمكن فأمامه طربق من ثلاث

اما ان يسلك طريق الفساد متغاضيا عن ضميره

أو ان يغيب عن الحاضر حتى لايشعر بوطأة الحقيقة ويتعاطى البانجو

أو ان يتطرف .. فيتجرد من انسانيته تماما بلفظ الآخر .. اى آخر

هؤلاء هم الفريق الثالث

لاادرى هل العيب فى هؤلاء .. ام فى المناخ الذى طرح امثالهم؟
‏قال غير معرف…
بدأها الأخوان باستغلال الدين من أجل الوصول للحكم و استثمر الفكره الريان فى النصب و الاحتيال ، و أخيرا هؤلاء اللصوص من أجل تحليل السرقه و القتل
‏قال عزيز عيني
الكار ثه مش في العيال دول غالبا ما بيكونوا غلابة و ملعوب في دماغهم الكارثه وفي اللي بيملوا دماغهم و عاملين الدين سبوبة وبيزنس
ونلتقي بعد الفاصل
‏قال nody
الممشكله دى ليها جذور عميقه جدا
من اول الطفل الى يسأل زميله انت مسلم ولا مسيحى
لحد الى يقتل مسيحى بااسم الدين
احنا السبب
الجهل والغباء وسؤ التربيه

هما السبب

الدوله المحروقه دى مسؤله
العيال الى معمول لها غسيل مخ دول
ماكانش عندهم حلجه فى مخهم اصلا
مافيش وعى ولا ثقافه
العشوائيات دى جمهوريه داخل الجمهوريه
محدش بيعبرهم
ماما سوزى ما بتعملهمش مكتبات فى الحوارى
والمشكله انها حتى لو عملتها العيال ها يكسروها وياخدوا الكتب يبعوها وياكلوا بتمنها
ماهو مافيش حد جعان ها يقعد يقرا
ولا واحد مافيش فى جيبه غير 10 جنيه
هايروح يجيب بيهم مدينه الملائكه ليوسف ادريس
هايجيب بيهم عشا لامه واخواته
الفقر والجهل وغياب التوعيه
تحياتى
‏قال Hook
هدي اعصابك شوية يا كات :-)
مش اي حاجة تتكتب في الجرايد نصدقها...الموضوع مش راكب على بعضه خالص...يعني لو كان صاحب محل الدهب ده مسيحي كنا قلنا ماشي...لكن ده المحل اسمه شمس الاسلام و لا نور الاسلام...و امبارح كمان في العاشرة مساء اتصلو بمراسل البديل و اتسأل بالذات عن الصيحات الدينية دي و قال ل محصلش...
مش قصدي طبعا ان فيه ارهابيين و متطرفين و ناس بتستغل الدين..اكيد موجودين...
بس ماعتقدش في الموضوع ده...
و ده رأيي اللي ممكن يكون غلط طبعا
:-)
انا مشكلتنا اننا لما بنحاول ناخد من الدين بناخد اللى نشوفه ينفعنا وساعات كمان بنحرفه تبع اهوائنا
وبنحاول نقنع نفسنا بأى حاجه وطبعا اكتر حاجه مفيهاش جدال او الى بتبقى صعب تقرب منها طبعا الدين وللأسف معظمنا ميعرفش حاجات كتير عن دينه وانا اولكم
بس اهم حاجه اننا منفتيش فى حاجات منعرفهاش ومنحاولش نعمل كل حاجه باسم الدين ونتخذه كستاره نتخفى ورائها

دمتى مبدعه
علاء
‏قال Heart Beat
الصديقة العزيزة جدا على قلبي

Desert Cat

استغلال الدين او استغلال العقول الضعيفة دايما بيؤدي الى كوارث ... زي المثال بتاع السرقة ده

ممكن يكون من وجهة نظرهم ان محل المجوهرات ده امواله حلال ليهم لانه بيبع لمسيحين مع ان اصحابه مسلمين او يكون في خلاف بينهم و بين صاحبه

بس طبعا ايا كان السبب ... السرقة في كل الاديان و المعتقدات حرام

لكن نقول ايه للمجرم اللي دايما بيبرر افعاله و خاصة بقى اما يكون السبب الديني

خلينا نشوف التحقيقات هاتنتهي على ايه ... المهم انه اتقبض عليهم و هايلاقوا جزائهم اللي يستاهلوه

تحياتي يا جميلة
‏قال مؤمنه
السلام عليكم ورحمة الله وبركاته
اعوذ بالله
ربنا يهديهم ربنا قادر على هدايتهم

هما اكيد بيغلطوا فى الدين بتصرفاتهم دى بس العالم كله عارف ايه هو الاسلام حتى الكفره مش اقليه هى الى هتشوه الدين
دونتى بخير
والسلام عليكم ورحمة الله وبركاته
Desert Cat

معلشى مختلف معاكى شويةوالإختلاف يستحق البحث كما أرى ومنتظر رأيك..

الإخوة اللى سطوا على محل المجوهرات ليس لهم من الفكر الإستحلالى إلا الاسم فقط, وليسوا على مستوى التنظير الذى يتمتع به الإخوة المتطرفين على أية حال...

فلو راجعتى بعض مانشر بالمصرى اليوم من حديث أهالى الموقع الذى تم به ضبطهم وكذلك أقوال ضباط مكافحة الإرهاب والشرطة المصرية ستجدى أنهم مجموعة من المسجلين خطر والعاطلين والبلطجية وكان معاهم فتاة فى منتصف العشرينات يبدو انها لزوم القعدة ويبدو من صورتها التى صورتها لهم الداخلية إرتدائها لقميص (نصف كم ولا ترتدى ايشارب او ماشابه)

ماقاموا به بغرض الإثراء ليس إلا , ولا يفرق كثيرا عن السرقات العامة إلا فى كونه سطوا عنيفا وليس (سوفت سطو) كما يفعل الأباطرة فى بلادنا..

وغاية ماهناك انهم حينما جاءت لحظة القبض عليهم لم يجدوا أية حجة او قولا يجعلون صورتهم به داخل إطار مقبول غير الدين لعل يكون هناك تعاطفا ما معهم من قبل بعض السذج فى بلادنا أو يجعل لهم شرعية ما وهو ما أطلق عليه أنا شخصيا جملة (حينما يكون التدين قلة أدب) أو ما يطلق عليه أستاذى الجليل الدكتور ضياء فى مدونته (مداراة النقيصة بالتوقح فيها)!!

فلو سألتى أحد هؤلاء المغاوير (المسجلين خطر) على عدد ركعات الظهر ما استطاع إجابتك أو قراءة سورة الإخلاص لسألك على الفور (اللى هى إيه؟!!),,,

الأمر لا يعدو سوى حجة للخروج من المأزق,,
وفى أسوأ الفروض أن يكونوا أوراقا فى يد الغير سواء اطراف داخلية أو جهات خارجية وفعلوا جريمتهم فى مقابل دراهم معدودة بالطبع وبالمرة (أهو جهاد)..

هذا تفسيرى للأمر فى ضوء ما تم إعلانه حتى الآن...

وما اتفق معكى فيه أن من أورثهم ذلك المنطق هم أغبياء الدعوة فى بلادنا ممن يستحلون الطعن فى عقائد الآخرين وجعلوا الآخر دائما منبوذا ننتظر فقط لحظة مناسبة للإنقضاض عليه!!
‏قال Unknown
لا تجادلى ولا تناقشى يا اخت قطة
فأن هؤلاء كفرة وفجرة وداعرين وان اموالهم حل لنا ونساؤهم متاع لنا
هذا هو لسان حال الجماعة الفاشية المتأسلمة
حال القتلة ومرتكبى الجرائم بأسم الاسلام
تحياتى
‏قال غير معرف…
ايه علاقتك الدين بالحرامى اصلا هما تلاقيهم كانوشربين حاجه ولا حد اقنعهم يقولو البوقين دول عشان شغل ميديا انما الاشكال دى للاسف اليى بتجيبنا ورا وبيشوهو منظر الدين السمح ...كل رمضان وانتى بالف خير وربنا يعوده علينا بكل خير..سلام يا كاتى..
‏قال محمد صالح
والله الموضوع دا بيرجع الى بدايه السابعينات من الاخوان الى الناجون من النار وغيره وغيره ودا بيفكرنى بفيلم المصير للراحل العبقرى يوسف شاهين مبدأ الجماعات الاسلاميه اللى بيقودها دجال الكل لازم ولا بد يسمع كلامه من غير مناقشه لانه هو اللى على صله مع ربنا لازم نطيعه ونبجله كانهم بيتعبدو شئ غير الله اعوذ بالله
نرجع لموضوعنا بالنسبه لسرقة محال المجوهرات ودى بترجع ان تلتين السوق المصرى من الذهب بيتحكم فيه المسيحين لازم طبعا ناخد منهم الجزيه وان مدفعوش نسرقهم شغل بلطجه وحرميه
وتقبلى تحياتى
القطة الساحرة
وأثرت موضوعا شائكا..المتدين أهو دلك القنفد الشوكي أم هو تلك الصابونة المتملصة أم هو داك الدخان الخرافي..
وفي اعتقادي هو دلك الكائن الهلامي ..هو انسان يتلون بمدهب ، بفكر، برؤية ميتافيزيقية ادا قالت له اسرق سيسرق..ادا قالت انفجر سينفجر..
ولأن الانسان لم يفصل بعد بين مرجعيته الروحية، خلاصه العاطفي وبين قوت يومه ومخالطته للبشر والدنيا فهو يعيش كائنا ازدواجديا يريدها دينا ودنيا، تدنيسا وتقديسا..
ولكم في هذا المثال الطريف ألف علامة استفهام:
واحد مسافر في حافلة يخرج سكينة يلعب بها يزخرف بها المقعد الدي أمامه يمزق أطرافه المهترئة_سلوك منتهى التخلف-.. تتوقف الحافلة في محطة استراحة.. يخرج يرى كسرة خبز يقبلها يضعها جانب الحائط- سلوك منتهى التحضر- لكن بدافع ديني بدافع الوصول الى مبتغى النفس الجنة..لو كان السلوك الموصل للجنة هو قطع الرقاب -الجهاد- لما تردد..
مودتي
‏قال Rania Lelah
الجهل هو المشكله
الجهل و بس
و غياب الوعى و الثقافه الصحيحة

تحياتى
‏قال هانى المصرى
كل سنه وانتى طيبه وشكرا قوى على المرور والتعليق عندى فى المدونه
وهدى اعصابك احنا داخلين على رمضان
‏قال Tamer silit
قطة الصحراء

صراحة ومن غير زعل

مفيش فرق بينك وبين اى متطرف

الاتنين حيودونا فى داهية

عدم الفهم وان كل اتجاه مستنى للتانى على غلطة دا فى حد ذاته قمة المأساة

الموضوع واضح انه لا له دعوة بدين ولا استحلال

كلام جرايد لكن ازاى يعدى مينفعش حضرتك وناس كتير لازم تمسكى فيه وتعملى هوللة وتقولى اهه التطرف اهه

وطبيعى ان فى ناس تيجى وتعترض وتكفرك وتقول اهه وتبقى هيصة

والاسلام لازى ما انتى بتصوريه ولا زى ما هوما بيقولوا

وتبقى المشكلة لا فى الارهابين نفسهم ولا حتى فى الوجودى والملحد نفسه تبقى المشكله فينا احنا

ونبقى احنا اللى اخطر على البلد دى من الاتنين بس يا ريت نفهم يا ريت
‏قال Desert cat
Sherif
العيب فى العقول المتردية ومدى استعدادهم النفسى لإيذاء الآخرين
دون اى ذنب اقترفوه
العيب فى بيئة ونشأة لفظتهم خارجها اولا لذلك من الطبيعى لفظ المجتمع لهم فبائوا يحقدون حتى على انفسهم
احترامى وتقديرى
‏قال Desert cat
The Prof
امثال الريان يا عزيزى المجتمع مليان منهم .. كل ما فى الامر احفر زبيبة صلاة واحفظ حديث واية تشتهد بيهم وقت اللزوم وانصب وخد فلوس زى ما تحب واهرب ومش حد هيقولك بتعمل ايه ده انت كمان ممكن تتجز 28 واحدة واهو اسمك بتجاهد برضه
غار الريان ظهرت لنا العصابات ومنهم العيال اللى بتجاهد على النت دى برضه اهم بيروحوا مكتب الارشاد يحفظوا لهم كلمتين ويجوا يقرفونا بيهم وبعد يومين مش بعيد نلاقى منهم اللى مقبوض عليها وهو بيسرق ولا بيغتصب وفى حوزته اسلحه
تحياتى
‏قال Desert cat
عزيز عيني
ماهو اللى بيملوا دماغهم دول بيكون كل تركيزهم على العشوائيات والمسجلين خطر يقولوا توب الى الله وحط المصحف ده فى جيبك وهديلك شوية فلوس تمشى بيها حالك بس روح اسرق بن ستين فى سبعين ده او فجر نفسك فى ميدان عام وانت كدا شهيد شهيد شهيد يا ولدى
تحياتى
‏قال Desert cat
nody_1987
دلوقتى بقوا بيقولوا لعيالهم يا نودى مش تكلم عيال المسيحيين والعلمانيين بيورثوا الجهل والتخلف والتطرف لاودلاهم اللى شايفين امهاتهم قدامهم خدامات واخواتهم البنات شرحه فببيطلع يتعامل فى المجتمع على هذا الاساس بيطلع وارث الكره والحقد على ناس مش يعرفهم
علشان كدا مع اول فرصه تواتيه تلاقيه بقى زى التور الهايج يسرق يقتل يعمل اى حاجه بقى مش فارقه
بالنسبة للكتب فانتى ممكن تقولى لحد سمعت عن احسان عبدالقدوس يفتكرك بتشتميه وربنا يسترها عليكى بعد كدا
تحياتى يا جميل
‏قال Desert cat
Hook
صدقنى انا هادية خالص وقاعدة فى جو رومانسى برضه هادى فزيع مريع وبشرب بيبسى كنز وبسمع منير تحت الياسمين .. طيب والنبى فى هدوء اكتر من كدا
:)
نيجى بقى لان مش كل كلام الجرايد يتصدق
فى كلام حضرتك مفارقة غريبة
ليه كدبت المصرى اليوم وصدقت مراسل البديل ؟؟؟ .. علشان مش ذكر الشعارات الاسلامية اللى بيرددها كل منحرف وخارج على القانون .. الارهابيين موجودين وبيتاكثروا ربنا يبارك فى المسجلين خطر
برضه وجهه نظر ممكن تكون غلط يا فندم :)
تحياتى
‏قال Desert cat
عايش ولكن
الكلام اللى بتقوله ده كان زمان يا علاء
يعنى الناس بتتعامل معاملاتها بضمير
عايشين فى هدوء نفسى وسلام مع نفسهم
الدين معروف لدى الجميع انه علاقة روحية بحتة بين العبد وربه
الدين فى القلب مش فى التجارة ولا الوصول لكرسى ولا للنصب وخلافه من كل وسائل الاحتيال
انما دلوقتى الدين بقى ديلفرى وحجة كل نصاب وحرامى
تحياتى
‏قال Desert cat
Heart Beat
صديقتى الرائعة
اجمل دقة قلب
يا حبيبتى هؤلاء المرتزقة المتحدثين باسم الدين .. لا يهمهم سوى دخله اليومى كام ؟؟؟ ووصوله لهدف ما امتا وازاى .. زى ما قولتى الدين مجرد ستار يتحركون خلفه زى المنقبة اللى جات تقول انتى متغاظة ليه اتغطى زينا وروحى قابلى زينا فاكره هههههه
محل المجوهرات اللى اتسرق ده مش هو الاول ولا هيكون الاخير ... طول ما فى وصوليين وانتهازيين لا يعلموا من الدين غير الاسلام ... مش فى حاجه اسمها سرقة حلال مش فى حاجه اسمها اموال صاحب المحل حل لنا حتى لو بوذى
شرفتينى يا جميلة
‏قال Desert cat
مؤمنه
عليكم السلام ورحمة الله وبركاته
لما ادعياء الاسلام نفسهم هما اللى يشوهوا صورة الدين يبقى عليه السلام
الكفرة مش عارفين ايه هو الاسلام
لان العرب دلوقتى فى نظر العالم كله ارهابيين بافعالهم
شرفتينى مؤمنه
تحياتى
‏قال Desert cat
عمرو (مواطن مصرى)
اختلف براحتك يا عمرو فالاختلاف فى الراى ظاهره صحية

الاخوة اللى سطوا على محل المجوهرات مسيرين لا مخيرين لانهم لو كانوا يمكلوا عقل كان استخدموه على الاقل قبل تنفيذ الجريمة .. انما هما يتم التخيطيط ليهم بدعوى الجهاد وهما ينفذوا برضه بيجاهدوا
راجعت وعلقت كمان فى الموقع على واحد قال البنت مش لابسه نقاب يعنى الكلام ده مش صح.. وكان ردى عليه ان تم القبض عليهم من شقتهم يعنى هتحط حتة القماش على وشها وهى قاعدة فى البيت ؟؟ هى بتستخدمها فى السرقة فى مشاغلة صاحب المحل على ما اعوانها يدخلوا يسرقوا او يجهزوا عليه اما الاقوال تضاربت ودى حقيقى مش لكن المقبوض عليهم فيهم ولد ملتحى وغالبا الجماعات المحظورة المنهورة تستقطب العواطلية ومسجلين الخطر لان عقلهم بيكون جاهز لاستقبال اى فكر يسمعوه هو كل الحكاية يحلف على المصحف والسيف ويقول سمعا وطاعه ويخرج يجاهد بقى يسرق يقتل مش فارقه ...
المهم انه بيجاهد واللى بيعمله ده حلال فى حال ان صاحب المحل مسيحى او مسلم بس مش بيؤدى الفروض او تحت اى حجه المهم انهم عبارة عن بيدق تحركة فى جميع الاتجاهات من اجل دخول الجنة
‏قال Desert cat
MEDUS
تاريخ الجماعة المحظروة معروف منذ مقتل النقراشى والخازندار والتاريخ يسجل افعالهم حتى الان
ولكن السذج ينقادون خلفهم
فطريق التوبة بعد افعالهم الاثمة مفروش بالورد ومن يستخدموا تلك البيادق يملكون مفتاح الجنة
تحياتى
‏قال Desert cat
عايزه اتطلق و
وهو حد قال الدين ليه علاقة بالسرقة والاجرام ؟؟؟
لكن تعملى ايه بقى فى اللى بيلزق افعاله للدين .... هما مش كانوا شاربين حاجه هما ملعوب فى دمافغهم شطرنج اصلهم كانوا بيجاهدوا
كل سنة وحضرتك بخير
‏قال hui mu han
اموالهم حل لنا

جديدة دي

ربنا يستر

بقيت اقولها كتير
‏قال Desert cat
محمد صالح
تفتكر جماعه تاريخها دموى
اللى بيدخل فى وسطهم بيحلف على السيف والمصحف ويخرج الحاجه اللى اسمها مخ يبيعها عند اول حاتى يقابله علشان يبقى سمعا وطاعه هيعملوا ايه
هيكون افعالهم ايه غير الخراب والدمار
والسرقة والنهب
جماعه المفسد العام بتاعه قاتل سابق يعنى مسجل خطر
فاذا كان رب البيت بالسلاح ضارب
تحياتى
‏قال Desert cat
نبراس العتمة
أولاً أضأت صفحتى المتواضعه
بالنسبة لادعياء التدين والمرتزقة فهؤلاء لو بالفعل يفقهو من الدين شيئا لكانوا علموا ان الدين المعاملة
وليس التهجم والسرقة والنصب ولنا فى ادعياء الدين اسوة حسنة فتجده يحرم ويحلل يدخل هذا الجنة وذاك النار وهو نفسه لا يعلم من امره رشدا
فمثال اخر يتكرر ذلك التقى الورع الذى كان بين يدى الله منذ ثوانى ليست بالكثيرة يخرج من المسجد ليجلس بين اقرانه يغتاب هذا ويسب ذاك وفى النهاية يحرك حبات سبحته ويستغفر الله العظيم
عزيزى لا تبالى فادعياء التدين كثروا

مودتى واحترامى
‏قال Desert cat
Rania
الجهل والفقر دعوى صريحة لالغاء العقل
مودتى
‏قال Desert cat
هانى علوان
وانت طيب يا هانى
انا اعصابى هادية فى الـ 12 شهر مش فى رمضان بس
:)
تحياتى
‏قال Desert cat
Tamer_silit
لاء خليك صريح وبدون زعل عادى جدا
بس رؤية حضرتك محتاجة التوضيح شوية
عارف ليه
لان فرق السما والارض بين متطرف يضر فى المجتمع ويعثو فى الارض فسادا
بين نقض افكار واراء هدامة
وبين الفتنة والوقيعة اللى هى اشد من القتل
فى فرق بين حد يطالبك بعدم خلط الدين بافعالك اللى الدين بريئ منها وبين السرقة والقتل والنصب
اذن الفرق شاسع جدا والرؤية فى الاتجاه المعاكس بمعنى انه مازال الاتجاه الصحيح مجرد شعاع نور حضرتك لم تلتقطه بعد
حضرتك بتقول ان الموضوع مجرد كلام جرايد يعنى العنوان اللى تم فيه القبض على المجرمين غلط والمتهمين مش ليهم وجود والموضوع مجرد فرقعه بقى من المفروض الداخلية تحاسب رجال الشرطة اللى جاذفوا بحياتهم للقبض على مجرمين .. لكن لما نفس المجرمين دول يهاجموا حضرتك يسرقوك يعملوا اى ضرر يبقى مش تشتكى للشرطة لان وقتها هيبقى مجرد كلام جرايد ... لو حضرتك راجعت الموضوع هتلاقينى مش جايبة سيرة الاسلام انما جايبة سيرة الافعال ولا ادرى لما الاصرار اقحام الاسلام فى اى حوار وكانها حجة لاسكات الصوت المعارض
اذن وضح هنا من المتطرف
اعتقد الذى يلقى اتهامات دون روية
:)
شرفت
‏قال Desert cat
hui mu han
اموالهم حل لهم ونسائهم سبايا عندهم والدنيا لونها فحلقى
ربنا يسترها على الجميع
تحياتى

المشاركات الشائعة