قالوا علينا فى جريدة الجماهير

نبتدى منين الحكاية ... أمممممممم طيب بلاش البداية وخلينا من اول ما بدأنا فى عمل الجروب
من فترة مش بعيدة اوى يعنى من كام يوم كدا .. واثناء حوار ماسنجرى شيق يجمع عدد من الاصدقاء جميعنا فى انفيت واحد .. وكان معنا فى الانفيت صديق مر بتجربة حب بدأت تفاصيلها على الأنترنت وانتهت بجرح عميق صعيب رهيب موهيب الله يباعد بينا وبين الجروح ... انتهت المحادثة لكن اللى ما انتهاش ولا خرج من دائرة تفكيرنا خالص انا واحمد نصار تفاصيل التجربة ... ففكرنا فى عمل جروب اسمه لا للحب على الانترنت .. قولت لاحمد انا هبقى عضو عادى انا اصلا ادمن 4 جروبات ده غير شغلى لاء حرام كدا .. احمد قالى وانا ادمن 6 جروبات برضه غير شغلى .. شغلك ايه بس يا احمد ... قالى قصدك ايه ؟؟؟؟ طيب تعالوا كلنا نفهم قصدى كان ايه مع بعض ... طبعا احمد نصار غنى عن التعريف الشاب الجريئ بتاع 6 ابريل و 23 يوليو ... اكيد دلوقتى وصل قصدى واللى هو برضه فهمه فى وقتها وقعد يضحك وفى الاخر قالى مش تخافى انا موجود الايام دى على النت لكن بعد كدا بقى الله اعلم لو اختفيت انتى عارفه هكون فين .. طيب الحل بقى علشان مش نظلم بعض يبقى احنا الاتنين ادمن .. من اول يوم وفى تفاعل فى الجروب وعدد الاعضاء كل يوم فى ازدياد ما شاء الله الله اكبر .. والنهارده تم تتويج الجروب بتاعنا بمقال فى جريدة الجماهير
مش هتكلم هنا عن اهداف الجروب
ولا عن التجارب اللى بتيجى لنا عليه
انا هسيبك لكو اللنكات وانتو تشرفونا
لنك جريدة الجماهير اللى فيها جروب لا للحب على الانترنت
لنك الجروب على الفيسبوك
الصحاب والحبايب بس يشرفونا
والاعداء يمتنعوا

تحياتى لكل الناس الحلوة

تعليقات

حب ايه اللى انته جاى تقول عليه
انت عارف ابله معنى الحب ايه

تحياتى
علاء
‏قال غير معرف…
مبروك يا حنان
الصحفى اللى نشر الجروب فى الجرنان نزل لكو كمان بوست فيه
انتى افكارك تنتشر واحنا ننقهر
موزحه يا ست الكل
جاى اقولك كل سنة وانتى طيبة
واتمنى لك التوفيق الدائم
‏قال ويكا
لولا الحب على وجه البسيطة
لانتحرت البشرية في زمن الكراهيه
الحب هبه ؛ غريزة ؛ احسااااااااس
الحب يعنى حبي لله سبحانه وتعالى
حبي لأمي - حبي لأبي - حبي لأخواتي
حبي لزوجتي العزيزة
حبي لأصدقائي
الحب الشئ الوحيد النابع من القلب
تحياتي
علي ويكا
‏قال محمد صالح
موضوع جرئ كالعاده
انا بعتقد ان الحب اسمى مشاعر الانسان
ومن غيره الانسان مقدرس بتخطى صعاب كثيره
ولكن الحب عن طريق الانترنت دا شئ تانى ودا ملئ ومحفوف بالمخاطر لان بيعتمد على الكلام سواء المكتوب او المسموع وثانيا غير موثوق فيه يعنى سهل ان الشخص يكدب بكل بساطه واكبر مثال على كدا واحد صحبى بيحب بنت من على النت والعلاقه دى واكله عقل الواد كانه لقى لقيه
هههههههههههههههه
بس انا اعتقد ان الحب عن طريق النت غير متكاقئ الا اذا التقى الشخصين والحب عن طريق النت ما هو الا محض اعجاب
تحياتى
‏قال rommantic
الحب ممكمن ىيحصل فى اى وقت وتحت اى ظروف وصعب حاجه تمنعه سواء نت او غيره ومش معنى فشل او نجاح تحربه ان اح-0نا نعمم
اسلوبك جميل والمدونه هايله
تقبلى مرورى
سلام
‏قال nody
مبروك ياقمر ومن نجاح لنجاح اكبر منه
اما بالنسبه للحب على النت
فاده فاشل بنسبه كبيره جداااااااااااااا
بس ممكن تحصل مره وتخيش
وده طبعا مره فى المليون
الحب شىء رائع لكن احنا الى بندنسه بضيرنا المنعدمه
وبينى وبينك بقت معظم نهايات الحب نهايات غيرسعيده
سواء نت ولا غيره

تحياتى
‏قال HANY YASSIN
كل عام وانت بالف خير
اعتقد ان الحب حق فقط ولا يوجد شيء اسمه مكان له ممكن يكون صح في تجارب مش ناجحة بس ممكن برضه يكون في
اشياء اخرى
من حق الواحد يدور على الحب في اى مكان وممكن نلاقي ناس على النت احسن من كل اللي بنشفهم في حياتنا التعميم مرفوض دايماً
رمضان كريم
خالص التحية لك
هاني
‏قال الربان
تحياتي

أشكرك لانك حفزتيني لمعرفة و الاطلاع علي كل من الفيس بوك و جريدة الجماهير التي
اول مرة اسمع عنها...

نأتي للموضوع الاساسي " الحب علي الانترنت "....تفتكري ان البنت لا تعلم
بأنها تغامر ...و بتضيع وقتها و تستهلك مشاعرها...تماما كما ان الولد
او الشاب بيكون متأكد ان الموضوع وقت
فراغ...و الشعور بأنه يمكن ان يكون
محبوبا...و مرغوبا...

الموضوع كله اولا و أخيرا ، في رأيي ، يتوقف علي امرين ...الاول التربية و التنشئة الاجتماعية التي نشأ و تربي عليها كلا الطرفين....
الامر الثاني ... اتساع الافق و الثقة
بالنفس ...لكل من الولد و البنت...
و يبقي اضافة شيء مهم يتعلق بالبنت
خاصة..و هو مدي ثقة الاهل بها...و اعطائها حيز من الحرية الاجتماعية.


اعتقد ان الموضوع مهم...و خاصة بعد انتشار هذه الظاهرة...بل و ايضا انتشار ظاهرة " حب الموبايل "....اتصال عشوائي...فاعتذار
فكلام...فمعرفة الارقام و الاسماء..فرسائل....فأحاديث ساخنه
ليلا...ثم تطلب من شحن الموبايل و تحويل رصيد لها لان
الرصيد اوشك علي النفاذ....و هكذا..

ربنا يستر علي شبابنافبعد انتشار التقنيات الحديثة أخذنا اسوء ما فيها
و تركنا احسن و اصلح ما فيها.


تحياتي و تقديري
‏قال سمير مصباح
الفكرة جيدة جدا
واعتقد ان الحب على الانترنت هو نوع من انك نعيشى الحياة بشكل نظرى
يعنى تتفرجى عليها من برة وتتخيلى انك عايشاها وده من الحاجات اللى برع فيها المصريين
يعنى بشوية فزلكة فى الالفاظ نقدر نقول عليه الواقع التخيلى الافتراضى البديل عن المعاش فى ظل الرفض للمجتمع العاجز عن الوفاء بحاجات الفرد الاجتماعية والغريزية الضرورية وهو موقف انسحابى متموه فى صورة فعل اجتماعى ايجابى كاذب
وما حدش يسألنى يعنى ايه علشان انا مش فاهم حاجة اصلا
تحياتى
الحب في زمن الانترنيت..
عنوان لن يستطيع الغوص في مكنوناته سوى شباب أنترنيتي مهووس بالدردشات..
الفكرة لازمها شوية تنظير، لأنها فكرة هوائية..وكأننا نقول الحب المفترض في الزمن الافتراضي..ولهدا فهده التجربة يقدم عليها الشباب وأحيانا يقدم عليها حتى المتزوجون.. وهدا هو الأكثر طرافة في الموضوع..
وغيره..أن في هذا الحب لا نجد حب ابنة الجيران أو ابنة الخالة بل حب الجنتلمان الانجليزي أو اليوناني نجد اللقاء الأوروكواي والأسترالي..
حقيقة الأمر يحتاج جروب بحاله..
تحياتي
‏قال غير معرف…
قطة الصحراء

انا مبحبش الجروبات خالص

بس لما لقيت حكاية الاصحاب والحبايب دى اضطريت لزيارة الجروب

شغل زنقة يعني

هههههههههههه

بجد الفكرة جميلة

انا نفسى مش مؤيد لفكرة العلاقات على النت لأنها غالبا بتفتقد للمصداقية

بس مفيش مانع من أن اتنين يحبوا بعض

من خلال النت شرط انهم يكونوا يعرفوا بعض على ارض الواقع

والكلام فى النت بيوضح طريقة تفكير البنىآدم بردو

تحياتى
‏قال Yasmine
انتى عارفة انا الاول كنت ببص للناس اللى بتحب على النت دى بنظرة دونية جدا
ازاى بنت ممكن تستهلك مشاعرها و احساسها فى حاجة مش معروفلها اول من اخر
ازاى ممكن تغامر بقلبها فى عالم افتراضى من الالف للياء اذا كان فى الواقع ماحدش بقى عارف مين كذاب و مين صادق ما بالك بعالم كل اللى بيربط الناس ببعض فيه شوية اسلاك و كى بورد؟

لحد ما لقيت واحدة صاحبتى اتجوزت واحد عرفته على النت و خلفت منه من 3 اسابيع و سعيدة معاه جدا
دلوقتى بقيت بعذر الناس دى شوية..يمكن ربنا بيعوضهم عن اللى مش لاقيينه حواليهم
و مع انى استحالة اعمل فى نفسي العملة السودة دى :D
ثبت على مبدأ never judge unless you put yourself in their shoes
بطلت احكم على الناس من غير ما اعرف ظروفهم لكن ما يمنعش انها حاجة غريبة جدا و انتشرت بشكل غريب جدا

نسيت اقولك مبروك :)
‏قال Desert cat
يوميات مواطن مصرى
الحب فى زمن يفتقد الحب
‏قال Desert cat
عايش ولكن
هو عارف مستر الحب يبقى ايه ههههههه
كل سنة وانت طيب
‏قال Desert cat
Gehad
جهاد عندنا وكمان مش معترض يا قهلا يا قهلا
انا شوفت التوبيك فعلا فى الجروب ورديت وراك على طول
سلامتك من القهر يا سيدى
كل سنة وانت بخير
‏قال Desert cat
ويكا
متفقة معاك ان الحب احساس جميل لكن حب حرب الله والام والاب ده حب فطرى بيتولد معانا انما انا قصدى الحب للاشخاص الاخرين وبالوسائل المختلفة
تحياتى لحضرتك
‏قال Desert cat
محمد صالح
وده المقصود
ان انت مش عارف انت بتكلم مين ولا فين وممكن يكون كلام الشخص اللى بيكلمك كدب هو انت عارفه
علشان كدا الحذر ثم الحذر
تحياتى
‏قال Desert cat
rommantic
ماهو يا ما تجارب حقيقة وفاشلة ومن غير نت ممكن يعنى تكون بنت الجيران
انما المقصود هنا هو الفكرة نفسها الحذر واجب برضه لاننا بنتعامل من خلف شاشات مش عارفين احنا بنتعامل مع مين
ميرسى جدا لحضرتك
تحياتى
‏قال Desert cat
nody_1987
الله يبارك فيكى يا نودى
الحب احساس ومشاعر بين قلبين لازم تكون متبادلة ولازم توافر الصدق بينهم غير كدا يبقى مش اسمه حب حتى لو مش اتعرفوا على النت ... بس برضه لا يمنع الحذر من معرفة النت مش كل الناس بطيبة قلبك يا قمراية
محبتى ليكى
‏قال Desert cat
HANY YASSIN
متفقة معاك يا هانى مش كل الناس وحشة ومش كلها حلوة
لكن النت الغالبية العظمى بتستخدمه للدردشة وضياع اوقات فراغ واخرين بيستخدموه بث احقادهم وهكذا
لذلك وجب الحذر يا فندم
كل سنة وانت بالف خير
رمضان كريم عليك
مودتى
‏قال Desert cat
الربان
كل الشكر والود لحضرتك وسعيدة باطلاعك على الفيسبوك والجريدة
الحب على الانترنت سواء البنت او الولد بيكون عندهم فارغ مش بيفكروا فى مشاعر ولا احاسيس او مشابه المهم تقضية اوقات الفراغ ويمكن يكون من وراها افادة زى النقطة اللى حضرتك تطرقت ليها من شحن موبايل واحيانا بتوصل الامور لاكتر من كدا بكتير وهنا اتلغى دور الاحسايس والمشاعر واصبحت المعرفة مجرد منافع يقابلها انحدار
مودتى واحترامى
‏قال Desert cat
سمير مصباح
تصوير حضرتك لحب الانترنت ممتاز جدا
ولا تنطبق هذه ارؤية على الحب فقط وانما عن كل ما يبث من افكار فتجد من يتوهم اشياء واشياء وفى النهاية تجده لا شيئ
تحياتى لحضرتك
‏قال Desert cat
نبراس العتمة
هناك يعزيزى انه من يعتقد ان الحياة لا يمكن الحياة فيها بدون حب لذلك ينسج له حبيب من اى مكان حتى لو من خلال عالم افتراضى
وهناك من يستخدمه هذا العالم الافتراضى لتحقيق غرض شخصى ما
لذلك وجب التنوية بان كل ما يحدث من خلف شاشة ليس حب
ايضا المتزوجون هؤلاء من يستحقون الشفقة
تحياتى
‏قال Desert cat
المحارب المتيم
انت شرفت الجروب والمدونة والدنيا كلها
الحب على الانترنت سلبياته كتير جدا ومشاكله اكتر
لذلك لابد من اتخاذ الحذر والاحتياطات
تحياتى لحضرتك
‏قال Desert cat
banouta masreya
هى نفس الفكرة يا جميل
ازاى الواحد يعطى مشاعر وقلب لحد وهمى كل اللى بيربطك بيه شوية اسلاك طيب افرضى شوفتيه فى الواقع ومش عجبك وده حصل فعلا ...
خليك على مبدأك حقيقى جميل
تحياتى يا جميله
كل سنة وانتى حلوة يا قمر :)

بلوجتك وحشتنى :)

هدلى برأىى فى الموضوع فى وقت اخر انا بس جيت اسلم وماشي :D
‏قال Desert cat
كفاية طيبة
وانتى طيبة يا جميل وبكل خير
انتى كمان وحشتينا جدا
تحياتى ليكى
‏قال Unknown
للأسف مش هأقدر أشارككم في الجروب ده لإن حبيبة قلبي عرفتها ع النت وطلعت أجمل من كل شيء ومحترمة قوي وحنينة جدا عرفت أهلها وارتبطت بيها خلاص يعني الحمد لله تجربتي نجحت ولو إن مش كل التجارب بتبقى ناجحة بس بردو مقدرش أشارك ضد شيء أسس لي حياتي ومستقبلي
كل ودي وربنا يكرمك وييسرلكم حملتكم دي
رمضان كريم يا قطة
‏قال عروسة ننوسة
البوست من عنوانه هايل
الفكرة بتاعتكم شكلها هايل
ربنا يوفقكم
‏قال Desert cat
كاتب مصري
تجربة جميلة والله ومفرحة جدا كمان
ما انت ممكن تشارك معانا وتحكى عن تجربتك اللى ناجحه دى
ربنا يوفقك يا فندم
رمضان كريم عليك وعلى كل محبيك
‏قال Desert cat
عروسة ننوسة
ميرسى يا جميلة
شرفنى حضورك
‏قال Unknown
هههههههههههههه

حب علي النت ده إزاي ده يعني ؟

لا بجد مش شايفالها معني يعني .. اتنين مستخبيين ورا شاشات إزاي يعني يبقي بينهم حب !!!

أنا بضم صوتي لصوتك لأن أصلا ده درب من الفراغ العاطفي اللي إجتاح البلاد و سيطر علي عقول الولاد بهدل قلوب البنات و غطي علي المصالح و المنتجات :D

و لا عزاء لاي بتاع بعد كده

بحييكي علي الفكره جدا ..

دمت بود
انا من اول الناس اللي دخلت الجروب ده ومعجبه بيكم جدا جدا الف تحيه علي مجهودك الكبير يا بنوته .....واحمد نصار صديق افكاره بحترمها جدا ........
الله يوفقكم وتساعدوا الناس تفهم وتركز شويه .......
انتي كنتي تايهه عني فين اعترفي يا مودموزيلا يا بريه انتي !!!!!!!
"رمضان كريم يا حبيبتي "
اميره جمال
‏قال Desert cat
واحده من أصحاب القمر
انتى اول من نور الجروب يا جميله
متشكرة جدا لكلامك وانتى كمان افكارك جميلة يا قمر
كل سنة وانتى بالف خير
رمضان كريم عليكى وعلى اسرتك يا جميله

المشاركات الشائعة