ومـــاذا بعــــد الشــــورى ؟؟؟؟

احترق مجلس الشورى وحتى الآن التقرير حول سبب الحادث واهى ماذا لو انتهى الامر بالقضاء والقدر ولم يكن هناك جانى ؟؟؟؟
كسابق مثيلاتها من المصايب التى تندلع تلو الأخرى فوق رؤس الشعب جمعاء وفى النهاية الشعب وحده من يدفع الثمن
فالوزارء والمسؤلون فى ابراجهم العاجية يتابعون الموقف من اجهزتهم المحمولة التى تاتيهم بالحقائق ومن دون ذلك كذب .. وتعدى على سياسة الدولة ... فقط من يدفع الثمن هو من فقد عزيز لديه .. هو من لم يجد قوت يومه ويزداد على عاتقه نسبة الضرائب والتامينات وفواتير الكهرباء والمياه والغاز كل ذلك وهو لم يجد وجبة العشاء فكأنه يدور فى ساقيه ويواصل الليل بالنهار عمل كى يدفع مقابل إهمال وأخطاء الحكومة .. إن كانت أخطاء ... فطبعة البديل التى تم حجبها ولم تسمح مطابع الأهرام بطبعتها فجر اليوم .. تفجر مفاجأة بان ما لتهمه النيران مستندات العبارة و قطار الصعيد و المبيدات المسرطنة و أكياس الدم الفاسدة .... فماذا أنتم ايها المسؤلون بالشعب فاعلون ؟؟؟؟
فممدوح اسماعيل تمت تبرئته من التهمة واتضح مدى ظلمنا له وربنا يحسابنا كلنا الـ 80 مليون على الظلم البين اللى ظلمناه للطاهر الشريف العفيف البريئ ممدوح وابنه ... هانى سرور واخد براءة والنتيجة ان دم المصريين هو اللى لوث اكياس الدم اللى استوردها صاحب الضمير واللى قلبه على المصريين هانى سرور لكن احنا اللى شعب ملوث بطبعه ومش ينفع لنا النظافه .... السرطنات واهو بناكل وعايشين ولا بيحوء فينا ده احنا بنتزايد ونتكاثر على الاكل المسرطن .... قطار الصعيد واهل الضحايا اللى اخد بقرة واللى اخد جاموسة واللى اخد بالبوكس فى مناخيره
يبقى فين المشاكل هنا ؟؟؟ الشعب ماهو واخد على قفاه وبيقول كوماااان والحياة زى الفل سحابة سودا وسرطنات وعاااادى
المثير للضحك الهستيرى استمرار النيران 9 ساعات ... اجهزة الاطفاء دى كلها بجلالة قدرها والطائرات المروحية اللى جت بعد الهنا بسنة واستمرت النيران 9 ساعات... وحتى الان لم يتم الوصول للسبب الرئيسى ده ان كان هناك تحقيق ... فلربما يخرج علينا من يقول ان المسؤل ملف كان هربان من المبنى واثناء مطاردته ولع فى نفسه وتسبب فى اندلاع النيران .. ولربما ايضا يخرج من يقول شعر النساء الغير محجبات فهذا غضب من الله علي الجميع بسبب تلك النسوة ...... اتحجبوا واتلموا يا كفرة من أجل ان لا يحدث حرائق ويتوقف نزيف غلاء الاسعار ونعيش فى رخاء ... ولكن فى الغالب سيقال هو القضاء القدر .. اليس عندكم ايمان كى تتناقشوا وتتحاورا فى شيئ بفعل القضاء والقدر الذى هو بيد الله ... اذن ادفعوا ضرائب اضعاف مضاعفه وصوموا ليل ونهار لسددا ما ستفرضه الدولة .... ويبقى السؤال !!! ماذا بعد حريق الشورى ؟؟؟ ففى السابق حرقت القاهره مرتين وحرقت الاوبرا وحرق قطار وغرقت ثلاث عبارات ومن مصيبة الى مصيبة ومن كارثه الى اخرى والشعب يتزايد ويتكاثر وينتشر ... فماذا ننتظر حريق قاهره ثالث ؟؟؟؟

Comments

A7MeD F@hMy said…
عمار يا مصر عمار
ما شاء الله البلد بتفوق من مصيبة تقع ف التانية
يمكن دي الحاجة الوحيدة اللي بتحصل فيها بانتظام
تاه الكلام مني مش عارف اقول ايه ولا ايه ولا ايه
ده ايه القرف اللي احنا فيه ده

بس انتي ظلمتي الناس الابرياء دول
احنا اللي غلطانين و رجلنا فوق رقبتنا
و بالتالي نستقحوا العقاب و بناخدوا علي دماغنا

ربنا يلطف بينا بقي
nody_1987 said…
ياسلام عاى ظلم الانسان لأخوه الانسان
ايه ده كله
ايه الحقد والتشنيع ده

مبنى واتحرق حريقه غريبه
وفيه مستندات
وفضلوا يطفوا فيه لحد الفجر
ولا كأنه بير بترول مولع
فيها ايه بس
ليه بتظلمى الناس؟
funckydoctor said…
فعلا مهزلة بكا المقاييس
ولسه ولسه
بس شوفتى مش الناس طلعو براءة مش من حقنا بقى نتكلم منه لله اللى كان السبب
عموما انا خايف السجل المدنى يتحرق هو كمان ونبقى كلنا ساقطين قيد
أن انفسى حاجة تانية تتحرق
lastknight said…
المسأله أوسخ و أعمق بكتير من كل اللى ممكن تفكرى فيه .. عموما شرفينى .. عندى شوية حقايق مفرطه نشرتها .. ماقدرش أحللها .. لأن التحليل هايعرضنى لكارثه .. اقرى و حللى انتى بمعرفتك بقى
عموما .. احنا فى عصر المماليك
tamer.sala7 said…
انتي عارفة مين السبب في حريق مجلس الشوري


حتستغربي لو عرفتي

زينة الممثلة

امبارح قريتلها تصريح لمجلة بتقول فيها ان هي عايزة تدخل المجلس وتلغي مكتب التنسيق وسبحانك يا رب الموضوع لسة منشور راح المجلس مولع

بالنسبة بقي لأنظمة الاطفاء كان في من سنتين موسسة امريكة اهدت مصر نظام اطفاء الكتروني لكل المؤسسات والمتاحف والمفجأة بقي ان مصر رفضت الاجهزة دي وقالت حنعمل مناقصة

بالنسبة لطيارت القوات المسلحة دي بقي اللي موتتني من الضحك طيارة هيلكوبتر عادية جدا ونازل منها جردل بيخر مية والله عيب

اللي حصل ده لو في اي دولة محترمة كان علي الاقل استقال وزير الكهرباء ووزير الداخلية مش حنقول الحكومة كلها

بس محدش فكر يستقيل علشان احنا في مصر
صفا said…
بعد الشورى الشعب ويستمر ويتوغل وينتشر
بس كده
rain man said…
ليس سيئا ان يحترق مجلس الشورى في بلد احترقت فيه الشورى ذاتها منذ الاذل
hui mu han said…
سؤال صعب اوي
خايف من اجابته اوي

تحياتي ليكي يا cat
يا شباب انتوا كلكوا عمالين تقولوا الشعب ساكت ليه ساكت ليه
ماهو طيب الشعب ح يعمل ايه يا قطة

يعني خليني اتخيل معاكي كده ان تمانية مليون من التمانين مليون نزلوا في الشارع واعتصموا واسقطوا نظام الحكم

وبعدين يا قطة؟ وبعدين؟ مين اللي ح ييجي؟ ايمن نور اللي بيبعت جوابات غرامية لاوباما؟ ربنا يفك سجنه يارب ويرفع عنه الظلم ويسعده ويبعده
وللا الاخوان؟ ربنا يفك سجنهم هم كمان ويرفع عنهم الظلم ويسعدهم ويهديهم وينور مخهم

مين؟ لو كان عبد الوهاب المسيري عايش كنت قلت لك هو
وبعدين القصة مش قصة شخص
ح نغير النظام؟
طيب ح نغير النظام
مين عنده نظام بديل
وللا نتوحل في ام الجيش تاني ويدبحونا بقى بجد واللي يتكلم يتعلق؟
ماهو عمالة ابص حواليا مش لاقية طوق نجاة ولا حتة فرع شجرة اتشعلق فيه
الله يخرب بيوتهم اصابونا بالعقم فعلا
mohamed said…
شكرا لزيارتك
بالنسبه لحريق مجلس الشورى
لو تابعتى برنامج 90دقيقه ستجدى أن احد الضيوف صور النار وهى مشتعله فى غرفتين فقط لاغير , وأن هناك سياره مطافى
تطلق الماء على المبنى ولكن المياة لاتصل
الا للدور الثانى وليس الثالث الذى به
الغرفتين التى بهن النار
وبالتالى لو أنه توجد فى هذة اللحظه بالذات سياره مطافى تصل مياهها للدور الثالث والسطح لتمكنوا من السيطره على الحريق,رد الفعل الغير ملائم أضاع جزءمن تاريخ مصر
مع تحياتى
طالب الاعدادى
أخوكى
محمد
Anonymous said…
اتحجبوا با كفره ختى تحل مشاكلكم
ارجعوا الى الدين لتحل مشاكلكم
وكان المصريين لم يعرفوا التدين حتى قبل ظهور الأديان
هذه الصيحات ظهرت بعد هزيمة 67
وبرر البعض الهزيمه بالبعد عن الدين
ولم يسالوا انفسهم ولا السذج الذين صدقوهم وهل الطرف المنتصر انتصر لتمسكه باللأسلام!!!!
وهل الأداء العظيم فى 73 كان للعوده الى الدين فى خلال 6 سنوات !!!فقط
مصر لم يكن فيها يوما ما مشكله مع الدين بل مصر هى التى اخترعت التامل الدين ومن ارضها ظهرت فكرة الحساب والعقاب يوم الحساب
وبذلك وبمثل هذه الصيحات البلهاء بدات الهوجه والهوس الدينى
ودعم كل هذا ارتفاع اسعار البترول بشده بسبب حرب 73 اى نتيجة لدماء شهداء المصريين فهاجر الكثيرون الى دول النفط
وهناك خضعوا دون ان يحسوا لثقافة يختلط فيها الموروث الثقافى بتفسيرات متشدده للدين
فظنوا ان هذه النسخه من الأسلام هى ما يجب ان يعودوا اليه لتنصلح اخوالهم
واستغل البعض الظرف وكما حاول الملوك والأباطره منذ ملوك مصر الفراعنه والى مهدى عاكف التمحك فى المقدس واضفاء نوع من القداسه على ما يفعلونه وهو دنيوى محض وذلك لأكتساب سلطه وقوه ومهابه لا تناقش
والناس البسطاء يصدقون ويتاثرون
Anonymous said…
السؤال الحقيقى ساله احد المعلقين
لماذا لا نتقدم ولدينا امكانيات افضل ممن نجحوا وانطلقوا وتركوا وراءهم وصمة التخلف
الشخصيه المصريه...لابد ان نعترف...بها عيوب قاتله
على راسها مرونه شديده
وهذه الصفه تفيد فى التاقلم مع ما مر به المصرى من عهود ظلم واستبداد
ولكنها مرض خطير عندما يتبنى المصرى اى شىء وافد دون تفكير وتمحيص
من الغرب او من دول البدو
لا فرق
هذه احدى السمات القاتله فى الشخصيه المصريه
تتقاذفها اى موجه فتعود بها الى الوراء فى اى لحظه بعد ان تكون قد تقدمت خطوه الى الأمام
ودائما نبدا من جديد الى ان تاتى موجه عاتيه اخرى من الغرب او من الصحراء
وتتخذ المرونه بالأضافه الى ذلك صورة التحايل والفهلوه ومشى حالك
والهروب من مواجهة النفس ومواجهة المشكله
قلب مصرى said…
الحريق ليس إلا جرس إنذار لسياسة الإهمال التى تحكم كافة مرافق الدولة وهو ليس بالأمر الجديد على مصر.
نحن لن فيق لمجرد حريق بسيط إمتد لمدة يسيرة وهى تسع ساعات وماذا تؤثر تسع ساعات فى عمر مصر الممتد إلى آلاف السنين إنه لاشيء ولن يتيغر شيء طالما لم تتغير السياسة المصرية

لك الله يا مصر، أما المصريين فلا عزاء لهم
ايوية said…
حسبنا الله ونعم الوكيل
شوفي يا ست القطة
المواضيع الي انت بتطرحيها تستحق فعلا النقاش ووجهةالنظر الي بتقوليها تحترم بشدة لأنها ذات قيمة..أنا بدخل مدونتك وبجد بريح فيها واخد وقتي في قرايت البوست وبلاقي الي يعجبني كتير بس أحيانا ومعلش في الكلمة بحس إنك ترفضي النقاش أو أن أحد يعدل عليكي في رأي أو حتى يقولو أنا لما كتبتلك رد في موضوع الحجاب ده لقيتك بتردي علي بصورة كأنها هجوم لأن كل الي انا قلته في أدلة قرآنية وأحاديث شريفة واضحة ومع ذلك رفضتي قبوله..أسعد دائما بزياة مدونتك والقراءة فيما تخطه يدك..
كل ودي
amr said…
طب انا راضي ضميرك .... دي اسئلة دي ؟
اية يا قطة ؟؟؟؟؟ انتي مش من البلد دي ولا اية ؟؟؟
لالالالالا انتي الظاهر عليكي نسيتي سلو البلد دي .... نسيتي سلو اهلها الطيبين اللي للاسف يدوا انطباع انهم سذج ..... مش عارف ... تحسي ان احنا خلاص عارفين اللي فيها و مسلمين .. ساكتبن ... تحسي ان احنا شبعنا كلام .. هنقول جديد لو اتكلمنا ... اشك .. الله اعلم ... نفس اللي بيحصل مع كل مصيبة ... مش جديد يعني ... هي هي نفس عناوين الصحف القومية اللي مش بتتغير .... و كذللك الصحف بتاعت المعارضة ... تحسي انك شوفتي الفيلم دة قبل كدة ... مش جديدة يعني .. و اقل من يومين انشاء الله و الدنيا تنسى ونرجع للي كنا بنعملة ... ولا كأن حاجة حصلت ... ماس كهربائي او عقب السيجارة هما المتهمان ... و حكمة السيد الرئيس هي التي امرت الحكومة بتدبير نفقات اعادة الترميم .... و شوية كلام من اللي انتي عارفاة .. طب بزمتك يا قطقوطة .... مازهقتيش من الفيلم دة ؟؟؟
انشاء الله اللي بعد الشورى .. الديموقراطية .... دة الطبيعي ... بس بعد اللي حصل في الشورى ... الدور على الشعب ... الناس يعني .. البشر اللي منغصة على الحكومة دي عيشيتها .. البشر اللي مالهومش دية ولا لزمة

سيبك انتي .... شوفتي المنتفخ و هو بيدلع في السودان .... حاجة كدة تنسيكي كل همومك الحقيقة . . . اسف للاطالة
Anonymous said…
من اخطر مايمكن ماقالته جبهة التهييس
ما البديل
برويز مشرف مثل غيره من الحكام على شاكلته قيل عنه انه مصاب بعقدة المخلص الذى لا يمكن الأستغناء عنه
ومتى سيطرت هذه العقده على احد ضحى باى شىء فى سبيل انفاذ مهمته المقدسه
هنا الوطن فى مقابل فرد ولقد قالها برويز مشرف لحظة تخليه عن السلطه اترك مكانى انقاذا لبلدى وشعبى
فالوطن هو الدائم وليس الفرد مهما امتد به العمر
وربط الدائم بالفانى ماساه كبرى
صحيح لم تتح للشعب ان يبرز منه قيادات بشكل تلقائى نتيجة للتضيق على ممارسة السياسه وهى خطه مقصوده حتى يقول القائل مثل المعلقه وما البديل
والأجابه ماذا لو تدخل القدر فى لحظه وانهى حياة الفرد الفانى هل ستضيع البلد
ماذا سيحدث
Blue Nile said…
والله انتي جدعة
شعب غلبان ربنا معانا
Desert cat said…
A7MeD F@hMy
ماهو احنا من المصايب والى المصايب نعود يا احمد
هما يولعوا واحنا اللى ندفع
ربنا يرحم الجميع
Desert cat said…
nody_1987
معلشى اصل انا بحقد عليهم يا نودى اشمعنا هما فى المجلس ههههههههه
يا حبيبتى انا شوفت الحريقة فى التلفزيون مش كنت مصدقه ان المنظر ده فى مصر ... لكن ادينا لسه ياما هنشوف
تحياتى
Desert cat said…
funckydoctor
ماهو فى حالة لو مش اتلمينا وسكتنا وبطلنا نتكلم على الناس اللى مستحملانا فى الوسية بتاعتهم واحنا مش تمران فينا لاننا رعاة بجحين وقتها ممكن يتحرق السجل المدنى من الصبح ويبقى كلنا بره وابقوا دوروا لكوا على بلد تانية ترضى بينا ... هما لو ولعوا فى بيوتنا احنا نسكت برضه ونديلهم هدومنا كمان يولعوا فيها واحنا مبتسمين وكلنا سعدة ورضا
تحياتى
ياست الكل/انا عامل مدونتي(مواطنون ضد الشعب) دعوه للثوره عن طريق تبصير الشعب بسلبيته واحنا من الشعب وممكن تكون فينا السلبيه لان احنا من الشعب لكن لازم نعاون بعضنا في محاوله لتغيير الشخصيه المصريه...الحمله ممكن تتعمل لمقاطعة شئ ما مثلا لان قراره في يدي ...يعني مثلا اضراب 6 ابريل قراره في يدي ممكن لا اذهب الي العمل واتحمل التبعات لكن ترميمم مجلس الشوري وها تشوفي سوف يكون مجال مساومه لرجال الاعمل ومحاولة لتجميل صورتهم
enjy said…
مصر كلها محروقة مش القاهرة بس الدنيا خربانة والحياة بايظة ماتفرقش بقى حريق ثالث حريق رابع النتيجة واحدة
3araby said…
إنها لكارثة بكل المقاييس ليس شرطاً أن عدد الضحايا قليل ولكن تراث مصر النيابي ذهب مع الحريق على الرغم من التأكيدات بأن الوثائق التاريخية موجودة ولم يمسسها سوء , وأن ما احترق من ملفات يوجد منها نسخ أخرى ولا داعى للقلق .. وإنما ما يدعو للقلق حرق ملفات حوادث هامة سطرت ادانة لتحامل السلطة على الشعب كملفات الدم الملوث والعبارة الغارقة و قطار الصعيد و صفر المونديال و المبيدات المسرطنة و ......و....و ..... . لكن أين الريادة المصرية فى السيطرة على كارثة كهذه من بدايتها لكى تصل النتائج لما هى عليه الآن ؟ لقد بدأ الحريق فى الطابق الثالث بمجلس الشورى نتيجة ماس كهربائي " المتهم دوماً " فى كل القضايا كقطار الصعيد وغرق العبارة وممكن نقول صفر المونديال الشهير تسبب فيه الماس الكهربائي..

ما سبق هو تعليق منى على موضوعك المتميز والذى أيضاً تناولته موضحاً قصور واستخفاف الحكومة بشعبها.
http://kalam3araby.blogspot.com/2008/08/blog-post.html

يا رب ارحمنا من غباءالحكومة.
Desert cat said…
lastknight
جيبت وشوفت يا استاذ فارس
فوجود الميلشيات المسلحة لم استغربه ولم استبعده .. فالمصلحة مشتركة ... عند ربط الاحداث ببعضها اثناء قرائتى لمقال حضرتك برز لى عدة استنتاجات ... لم افصح عنها حاليا ليس بدافع الخوف وانما حتى تتضح الصورة واعودك وقتها هنزلها فى بوست لوحدها فاهلا بالاسلامجية وميلشياتهم بحريق القاهره
Desert cat said…
tamer.sala7
زينة تدخل المجلس ومالوا حقها
وسعد ودينا مش يمكن هما اللى يعدلوا المايل
ههههههههههههه
والله مهازل بتحصل فى البلد شوفت الجردل يا تامر مش بقولك مهازل يا عزيزى
عايز مين يستقيل .. دى البلد تولع تغرق تحصل فيها انفجارات مش مهم المهم الكرسى ياباشا دول لازقين بلزقه امريكانى معتبره خالص
قال يستقيلوا قال امال مين اللى هيطلع عين احفاد احفادنا
تحياتى
Desert cat said…
صفا
ماهو الشعب اتحرق من قبل الشورى يا صفا .. ده من ريحة الشياط اللى الشعب فيها ماشى يكلم فى نفسه
كل سنة وانتى طيبة يا جميل
تحياتى
Desert cat said…
rain man
والقادم اسوء يا عزيزى
فالشورى ومن بعدها المجلس ومن قبلهم المواطنين المخروسين
تحياتى
Desert cat said…
hui mu han
ما احنا لازم نتوقع السيئ
لان الأسوء قادم
تحياتى
Desert cat said…
جبهة التهييس الشعبية
يا نوارة لا نور ولا الاخوان لان الاول فقد مصداقيته والتانيين بانت لبتهم ... الحل فى راجل همه على البلد .. همه على الناس موجود فين ده بقى ... فى كوكب زحل ممكن ... ماهى عمليات الاجهاض متتالية .. مش فى فرصه لبروز شخص نقدر كلنا نشاور عليه ونقول هو ده والحل ؟؟؟
هنفضل كلنا مش عارفين مين اللى ينفع يحرك الدفه ؟؟؟؟
اعتقد ان كلنا عايزين اجابة على نفس السؤال ... ده ان وجدت
تحياتى
يعنى هنقول ايه فوضنا امرنا فيهم لله كنا بنقول اياكش تولع واديها ولعت ولا حصل حاجه قبل كدا لما القاهره اتحرقت الناس كان عندها دم وشويه ومطاقوش والثوره قامت لكن دلوقتى محدش فاضى كانو بيتفرجو ويضحكو

كل حريقه وانتى طيبه يوووو قصدى كل سنه وانتى طيبه
Desert cat said…
mohamed
العفو يا استاذ محمد انا جيت ازور حضرتك بس علشان اعرفك ان الاختلاف فى الرأى لكن الود متصل
:)
بالنسبة لحريق الشورى
فياسيدى احنا احسن ناس نجمع تبرعات ونفرض اتاوات تحت اى مسمى لكن عند حدوث الكارثة لاتجد الامكانيات المتاحة لصدها فمثلما يحدث فى افلام الابيض واسود وصول البوليس بعد ارتكاب الجريمة باسبوع قول اتنين هكذا الحال فى الواقع يتم السيطرة على الموقف بعد ان يكون تلاشى الموقف من اساسه والكبير برضه بيتابع
من زمان كان نفسى يبقى عندى اخ وفى اعدادى اصل بعيد عنك انا اخر العنقود بشكر ربنا جدا انه بعت لى اخ فى اعدادى
:)
تحياتى
almasry said…
احنا بتوع الماس الكهربى .... بسم الله ماشاء الله الراجل اللى اسمه ماس كهربى مش ملاحق على المبانى الحكوميه ؟؟ ربنا يعينه !!!



تحيـــــأتى
المصـــــــــــرى
عني هما يا قطتي مستنيين يحرقوه عشان المستندات .

دي البلد بلدهم .. واحنا اكيد عبيد عندهم ..

و اونكل ممدوح الانتيم بتاع عمو زكريا عزمي وعيب اوي لما ياخد حاجة غير البراءة ..

و بعد كده هو من امتى بنعمل حاجة صح عشان نطفي الحريقة صح ..

بس عارفة لو كان قصر الرياسة اللي اتحرق كنت ارتحت انا اووووي
على فكره ياقطه
انتى بتتجنى على النظام الالمعى الى بيحكمنا
فيها ايه يعنى لما الورق يتحرق
مش بدل ماهو سيبينه كده ومالى الدنيا زباله
مالكوا بينضفوكوا
اما شعب غريب صحيح
Desert cat said…
Anonymous
صيحات ترتفع وابواق تعلو للحط من شأن المرأة فهى سبب كل الفساد والبلاء
ولكن هناك من تضع فى قرارة نفسها هذا الاعتبار وتقوم بالتطبيق فهى عورة ولابد لها من الاختفاء ... عزيزى هذه صيحة باطل اراد بها حق فكم من المضحك حينما ترى جملة لاحد السلفيين مضمونها شعر النساء هو سبب الغلاء
احقا هل هو شعر النساء
يا للفصاحة والنباهه إذن شعر ذقنه سبب التدهور وقلة الحياء
تحياتى
Desert cat said…
Anonymous
التدهور الاقتصادى شغل الاذهان
واصبح اللهث لتوفير مقتضيات الحياة يشغل كل الاوقات اذن فما العمل عندما يوفر احدهم له حفنة من الدولارات بشرط نقل الثقافات ولكن عليه الا يتلفت الى المعاملات فالحل سهل ومتوفر ما المانع من تقليدهم عن طيب خاطر وايضا السعى لنشر هذا التقليد ولطالما هناك من يعطل عقله عن العمل فالطبيعى ان ينتقل ذلك الفكر بين تلك الاوساط
تحياتى
Desert cat said…
قلب مصرى
يا عزيزى نحن القلب النابض
نحن احفاد الفراعنة
فلقد عبرنا القناة فى 6 ساعات ولكن من الواضح ان الشورى اقوى والعدو ليس بالهين واقصد هنا النيران طبعا
فعبرنا الشورى فى 9 ساعات
تحياتى
Desert cat said…
ايوية
ربنا يتقبل يا ايوية
حسبنا الله ونعم الوكيل
Desert cat said…
كاتب مصري
اولا اشكرك جدا على الكلمات الطيبة
وحقيقى انا لما رديت عليك مش كان قصدى الهجوم خالص وربنا العالم
طيب راجع الردود تانى كدا وشوف انا هجومى كان فى ايه اصلى راجعت الردود لاقيتها كانت تعقيب مش اكتر
يا فندم طالما اختلافنا فى الرأى داخل دائرة الحوار ولا يخلو من اللياقة فى الكلام فالا وسهلا باى اختلاف
لكن بالفعل عكس ماهو كدا اصدقك القول فعلا ولا انكر لكن اعتقد ان ردك كان طبيعى جدا واختلافك فى الراى انا مرحبة بيه جدا لانى واثقه اكتر من مدى اسلوبك فى الكلام هتقولى ازاى
هقولك انا بتابع قصصك يا سيادة الكاتب
:)
شرفتينى جدا
Desert cat said…
amr
الشعب مش ساذج يا عمرو
الشعب ضعيف
تلاقى الاتوات بتتفرض عليه تحت اى مسمى وتلاقى كل واحد يقولك اشمعنا انا اللى مش هدفع ما الناس كلها بتدفع
وممكن يكون الجنية اللى بيدفعه ده ثمن العيش اللى هياكل بيه اولاده طول اليوم
العبارة غرقت عادى
الشورى اتحرق مش مهم
الشعب اتحرق من زمان اوى وريحة شياطة زكمت الانوف
الاهم من ده كله ان مصر هتلعب مع فرق قوية فى الفترة اللى جاية ابقى تابع المباريات
:)
تحياتى
Desert cat said…
Anonymous
لا وجه للمقارنة بين برويز مشرف وبين برويز مبارك
لاوجه للمقارنة بين إيف لوترم وبين من يسعى دائما لغسل جيوب الشعب حتى تصبح اخر نظافة
Desert cat said…
Blue Nile
ميرسى يا بلو
لنا الله
Desert cat said…
م/ الحسيني لزومي
اولا انا تشرفت جدا بزيارة حضرتك
ثانيا هدف المدونة جميل جدا واتمنى انه تكون صدمة كهربايئة لافقاتنا من مرحلة الموت الالكنيكى
ولكن يا عزيزى بالنسبة الشورى فهذا مبنى اثرى رمز مصرى ... من هان عليه العبث به فليتحمل تبعاته
غرقى العبارة ماتوا مرة واهاليهم اتحرق قلوبهم مرتين والجانى بريئ
ناس غلابة دمها اتلوث والجانى بريئ
انهارنا وانهارت رموزنا بفعل رجال اعمالنا ... فالى متى سنظل مجنى علينا ونتحمل تبعات مهاتراتهم ... فمن ينزف دائما هو الشعب منهم من يقول انه مستعد لاعادة ترميم الشورى ولكن بدات حملة التبرعات ايضا من الشعب ... فكل هذا كلام ... لذلك انا وافقت على الحملة لان الشعب ملقى على عاتقه ما لا يطيق من اعباء
تحياتى واحترامى
Desert cat said…
enjy
مصر كلها محروقة مازالت بقايا الرماد التى من الممكن ان تخنق من يقترب منها ولكن المهم هو اتحاد ذراتها
:)
تحياتى انجى
Desert cat said…
3araby
تشرفت بقراءة الموضوع فى مدونتك
فتحياتى لك مرتين
مودتى واحترامى
Desert cat said…
سمر الشافعى
الناس عايشة فى حالة من اللامبالاة يا سمر
مش فارقه البلد تولع لانهم محروقين من جواهم
كل سنة وانتى طيبة يا جميل
Desert cat said…
almasry
الراجل اللى اسمه ماس كهربى ده لابد القضاء عليه لانه شرير ومش يستحق الحياة
بيدمر فى البلد ولا هامه اى حاجه
تحياتى
Desert cat said…
د\أسماء علي
والله يا حبيبة قلبى ده الى انا بستغرب له يعنى هما الناس خدت براءة ومش محتاجين للبالو ده كله بس حقهم يعنى بلدهم حتى ويولعوا فينا كمان بالمرة القصر يا جميلة لو حد مشى من قدامه يبقى هو الجانى على نفسه من قريب كنت قريت فى العربية انهم قبضوا على طفلين فى رابعه ابتدائى علشان كتبوا اسمايهم على القصر وراحوا امن الدولة وطلبوا اولياء امورهم واخدوا عليهم التعهد اللازم .. طفلين يا سمسمه متخيله
ربنا يتولانا بقى
محبتى يا قمراية
Desert cat said…
قلوب بتغنى
ايوا احنا شعب مش وش نظافة يا قلوب
عايزين كمان زبالة فى المجلس ياااى دى حاجه مقرفة اوى
تحياتى
Miso soup said…
و هو يعني لو مكنش اتحرق و اتحرقت الاوراق كان المسئول عن موت الناس في العبارة ولا اللي لوث دم الناس كان جراله حاجة؟ّّ احنا بس اللي مغرمين بظرية الموامرة و ده بقي هي حجة البليد. اه طبيغي ان النار تشتعل كل الوقت ده .... ده مبني قديم كله خشب و النار مهتصدق تمسك فيه ...
الربان said…
تحياتي

أقول ان ربنا ستر و لم تحترق القاهرة...

مبني الشوري يجوارة مساحات يمكن لسيارات
الاطفاء ان تدخل و تتحرك...

كما سمعت ان عملية الاطفاء بدات بعد ساعتين من اشتعال النيران بالداخل...ثم خرجت السنة اللهب من الشباك.

لسنا مؤهلين لادارة أي ازمة...حتي و لو
كانت حريق صغير...يمتد من مكان الي أخر..

تمت الاستعانة بمطافيء شركات البترول في
مسطرد بعد مكالمة هاتفية من صفوت
الشريف و وزير البترول...و طبعا بعد
ان كانت النيران قد اتت علي معظم المبني.....و تكدس المرور اعاق وصول سيارات الاطفاء التابعة لشركات البترول.

فعلا الحادث سيقيد قضاء و قدر...او أهمال....و إن كان هناك ضحية سيكون
عامل او موظف بسيط...

سننسي ان رئيس القطاع الهندسي كان مسؤولا عن توفير و تزويد المبني باجهزة الاطفاء الالي....سننسي ان امين عام مجلس الشوري كان ينبغي ان يسعي لتوفير المبالغ اللازمة لشراء هذه الاجهزة..
سننسي ان رئيس شرطة حرس المجلسين مسؤول
عن متابعة كل ما من شأنه تأمين المبني
و الاعضاء داخل المجلس...سننسي ...و سننسي...لاننا دائما ما ننسي....

تحياتي و تقديري
Zika said…
نستني المصيبه الجايه

Popular posts from this blog

قميص دهشور

كل تحرش وانتوا طيبين