حواء بين فكى الاسد

كنت وإحدى صديقاتى نشترى بعض الاشياء من أحد المولات فى محافظتنا العامرة كان الوقت متاخرا فالساعه تشير الى الثانية عشرة والنصف بعد منتصف الليل انتهينا سريعا من شراء حاجتنا التى لم تكتمل بعد ولكن نظرا لتأخر الوقت اكتفينا بهذا القدر ... ولكن قبل ان نغادر توجهنا الى كافيه بالمول لشرب شيئ دافئ بعدها نعود ادراجنا ... فى الطاولة المقابلة لنا كان يجلس رجل وامرأة كان صوتهم يعلو بعض الشيئ ثم يخفت ... لحظة صمت .. ثم بدأوا يتحدثون والصوت يعلو تدريجيا ... حتى لفت انظار جميع الجالسين ... وفجأة رفع يده وصفعها على وجهها .. حينها شعرت بدوار وكأن من صفعت انا ... تماسكت وجلست اتأمل ذلك الاسد الذى صفع حواء التى اخذت القلم واستكانت وليته بعد ذلك صمت .. او تركها وذهب الى حال سبيله ... ولكنه امطرها من السباب ما لايعد ولا يحصى .. وحينما هم احدهم بالتدخل ليفهمه ان ما يحدث عيب ولا يصح فى الاماكن العامة ... وجدت لسان حالى يردد .. يا حلولى وهو يعنى ينفع فى الاماكن الخاصة ؟؟؟؟ وقبل ان اعلنها كان الرجل اسرع منى فكان رده مش حد ليه دعوة دى مراتى وبربيها ... وجذبها من خمارها ومازال يثرثر عاجبك كدا فرجتى علينا الناس قومى واخذ يجرجرها بين يديه وانا عينى تتبعهما ليس بدافع الفضول ولكن .. كيف تستكين له هذه السيدة بهذه الطريقة ؟؟؟
ولما تتركه يهينها امام جميع الحاضرين ؟؟؟
لما لم تنسحب عندما بدأ ذلك الاسد الذى أكاد أن أجزم أنه يقف امام مديرة فى العمل يسمع الأوامر فى صمت وتوأد وان أخطأ فى تنفيذها يسمع بعض التوبيخ مع خصم من مرتبه ؟؟؟؟
كيف تركت هذا الاسد يزأر ويطلق كلماته الفجة فى حقها بل ويمد يديه عليها وهى تقابل كل ذلك باستكانة ودموع تجرى كالانهار على خديها ؟؟؟
اثناء عودتنا وصديقتى كانت هذه السيدة محور حديثى ... وطول الطريق اتسائل .. لما تسمح له بكل الاهانة المطلقة هذه ؟؟
ولما هو يسمح لنفسه بارتكاب هذا الحمق؟؟؟
الهذا الحد لم يستطيع ان يتحكم فى اعصابه حتى وهو يجلس فى مكان عام ؟؟؟
واذا كان يفعل ذلك وهو جالس فى مكان عام فما الذى يفعله اذا فى المكان الخاص ؟؟؟
حتى ان صديقتى توقفت فجأة عن القيادة وكان ردها .. تحبى ألف وأرجع نسألها على السبب ؟؟؟
يا ستى اطلعى خلينا نروح انا مش متعاطفة معها انا بس بلومها

Comments

صفا said…
الموقف نفسة نرفزنى بس تصدقى طالما هيا سمحتله انه يعاملها المعامله دى تبقى تستاهل اللى يجرالها بئه
فى ناس تقول دى بتستحمل عشان عاوزة تعيش دى مش عيشه اللى هيا تستحمل عشانها دى موت ومش موت مره واحده ده موت الف مره

تقبلى مرورى
انا عايزة اعرف ازاى اصلا فكر انه يعمل كده فى مكان عام وعلى رأيك امل مكان خاص هعيمل ايه؟؟؟

وازاى هى سكتت على حقها والاهانة قدام نفسها وقدام الناس

وبعدين لما ربنا قال اضربهوهن سيدنا محمد عليه افضل الصلاة والسلام قال دى آآآآخر حاجة يفكر فيها الزوج بعد لفت نظرها مليون مرة وكمان قال حضرت النبى انه الضرب بالسواك يعنى مش مؤلم ولا اى حاجة

الناس دى بجد تستاهل الحرق اللى بياخد حق حد واللى بيتنازل عن حقه برده

انا شكلى اتنرفزت اوىىى

سلاام
nody_1987 said…
لا حول ولا قوه ال بالله
راجل ناقص وست سلبيه
ومجتمع ذكورى
بس هى دى كل الحكايه
Anonymous said…
وانتى ايه اللى مخرجك الساعه 12.30 بالليل
ده انا راجل بدخل بيتنا بعد المغرب
وبتشتمى فى الرجالة ومش عايزاهم يقطموا رقبة اللى زيك
تلاقيها واحده قلبها ميت تشبهلك وجوزها حب يربيها انتى مالك تتدخلى وكمان جاية تكتبى عليهم وتفضحيهم انتى بت قادرة بئا
خليكى فى نفسك يعنى اكتبى طفحتى ايه لبستى ايه ودعى الخلق للخالق يا قوطه
Desert cat

الموقف نشاهده كثيرا فى حياتنا العامة(فى الشوارع ), وفى حياتنا الخاصة أيضا , حيث يصعب ان تجدى بيتا مصريا ليس فيه ضربا أو إهانات من الزوج للزوجة أو إهانات متبادلة وفى أحيان قليلة ما تكون الزوجة هى التى تضرب!!

_ فى أواخر القرن ال19 أصدر المفكر العربى(عبد الرحمن الكواكبى) كتابه طبائع الإستبداد, وذكر فيه مايفسر لك هذا المشهد الذى ترينه , فقد أوكل العنف الكامن فى السلوك إلى الإستبداد السياسى والفكرى والدينى السائد فى مجتمعاتنا,, فيستبد القوى بالضعيف , ويستبد الضعيف بالأضعف والأضعف بالأضعف وهكذا , من قمة الهرم إلى أدنـاه , وفى النهاية تجدى الفئات التى تحمل عبء الفساد والديكتاتورية وتتحمل كبت المكبوتين هى اضعف فئات المجتمع سواء كانت مرأة أو طفل أو أقليات دينية أو عرقية ....

_ومن خلال هذه المنظومة والتى بها اتفاق ضمنى غير معلن بين جميع أطراف الصراع , بين الظالم والمظلوم , وبين القاهر والمقهور, لوجود شبكة روابط ومصالح تربط الجميع سواء كان وظيفة عامة يستبد فيها الرئيس مرءوسه أو بين زوج وزوجة يسفه فيه الزوج زوجته ويمحيها تماما, أو بين مدرس وتلميذ يخرج فيه المدرس همومه فى تلميذه _أقول من خلال هذه المنظومة_ لا تندهشى كثيرا إذا ماتدخلتى للدفاع عن هذه المرأة أن تسمعيها توبخكى قائلة: (وانتى مالك انتى ياشابة , جوزى وبيربينى , ايه اللى يدخلك بيننا) فبينهما مصالح مشتركة لن تتنازل عنها الزوجة من اجل من يدافع عنها (انتى)...

وهذا المشهد مألوف وفلكلورى ويحدث كثيرا فى الشارع المصرى..

والمنظومة السياسية من وجهة نظر الكواكبى ووجهة نظرى أيضا تؤدى مباشرة إلى هذا المشهد...

تحياتى وتقديرى
PrInCeSS BeRy said…
ازيك يا قطة اتمنى تكونى تمام

المشكلة بقة يا قطة ان فى ناس مبتفكرش فى خصوصية غيرها ولا بتحترمها وللاسف ما بيستهلوش غير انهم يعاملوا معاملة سيئة وترد اهانتهم باهانة بس انا كنت شايفة
انها كانت لازم ترد برد يرد كرامتها ويردلة الاهانة لانة حد ناقص بجد اف حاجة بجد مؤرفة ومنرفزة حسبى الله ونعم الوكيل

تحياتى
mohamed hesham said…
"كيف تستكين له هذه السيدة بهذه الطريقة ؟؟؟ "
وماذا يمكنها أن تفعل بدلا من ذلك ؟

مشكلة كبيرة حقا ألا نفصل بين الخاص والعام ...
سنووايت said…
ظلمتي الأسد يا قطة
اللي يسمح لنفسه انه يمد ايده علي امرأة حتي وان كان زوجته وسواء امام العامة او الخاصة فهو لم يرقي لمنزلة البشر , ولا يستحق لقب "رجل"

وبالنسبة لها فهي غلطانة انها تساهلت في حق نفسها للدرجة المهينة دي فحولت نفسها لمجرد جارية وتابع لعقلية متخلفة , فحتي لو كانت غلطانة في حقه فهي غلطانة انها سابت الموضوع يوصل للدرجة دي
mohra said…
كان عبد الوهاب مطاوع يكتب " لماذا لا نحتد و نقسو الا على من يحبوننا على من هم اضعف منا ...لماذا لا تحتد و تسيئ لرئيسك فى العمل و تتحمل منه اقسى الكلمات؟؟؟؟
لماذا تحتمل هى؟ لان بعض النساء تحسب ان الزواج برجل هى نهايه المطاف و لا حل لمشاكلها الا الصبر
اللى يقبل يعيش فى وضع زى وضعها ده يبقى لو طلع قلبها من مكانه متتكلنش هى اللى بتسمحله بكده
Rania said…
المشكله مش فيها هى
المكله فى واحد اتجرا و عمل كدة و لم يحترم انثوتها و لا مكانتها و لا حتى المكان الى قاعدفيه
المشكله فى مجتمع غبى بيبص للراجل و بيديله الحق فى اى شىء ممكن يعمله
زى ما قال مراتى بربيها
قال يعنى دة تصرف اصلا من واحد متربى و محترم و مثقف
مجتمع بقى مؤرف


تحياتى
قطتى الجميله
تصدقى انتى فعلا مستفزه ايه يابت انتى عاوزه تنقطينى يعنى هو عمل فيها ده وهى ساكتهخ خالص يعنى
بس عموما فى ستات كتير فى كل بلاد العالم بيعانوا من ضعف الشخصيه
مش عارفه تفتكرى ده ليه علاقه بالمجتمع المشوه بتاعنا
انا اهه من مدونتى عليكى يا قطه والبوست ده وجعلى بطنى وده اليى انا عماله ااقوله ضرب ايه اليى الرجاله جايه تقول عليه وهوا بيرفع ايده اليى عايزه قطعها يفتكر كلام الرسول الكريم (لا يضرب الا شراركم)يعنى الرسول وصف الراجل اليى بيتهبش فى عقله ويضرب مراته بالشر ..شئ يمكن السيطره عليه لو اتنفذ الى قولت عليه فى بوست فلسفة الضرب والطرح بقولك ايه يا قطه انا هعملها حمله على الفيس بوك وطبعا لو احتجت مساعده اتمنى انى الاقيكى ...اما صور القطط تجنن كان عندى قط وانا فى الجامعه كنت مسمياه بيرو كنت بموت فيه رجعت مره لقيت ماما مسرباه بره اللهم لا اعتراض بس دلوقتى بيرو اسم الدلع لابنى..مدونتك لذيذه وجميله قوى ..سلام فر رعاية الله وامنه..
dina said…
يا خبر ابيض
انا لسا شايفة المنظر دا قريب بردو...مش عارفة اقول العيب على مين..العيب على واحد محدش عرفه يعنى ايه اصول ولا دين ولا جنتلة ولا على واحدة محدش قالها ان كرامتها اهم من اى حاجة تانية ولا على علاقات مش متوافقة و مش صحيحة ولا على ايه بالظبط
المشهد دى بنشوفه على طول فى شوارعنا
اعتقد بان لو فيه ولو ذره حب واحده بينهم عمره ما هيضربها او حتى يسبها حتى لو غلطت..بس الله اعلم ايه الحكايه..بس مهما تكون دا ما يدهوش الحق انه يضربها ويهنها بالشكل الموحش ده
ربنا يهديهم يارب لبعض
تحياتى
Anonymous said…
انا برضو معاه اييييييييه اللي مخرجك في نصاص اليالي

ينفع كده وكمان قاعد تشربي حاجه

ربنا يهديكي يا رب

مش سلام خالص
A7MeD F@hMy said…
مش شايف ان المفروض الست السلبية دي يبقي عليها لوم كبير
يعني ايه لو هي كدة تستاهل اللي هي عايشة فيه
كتير من الستات بتوعنا خايفين من الطلاق و بييجوا علي نفسهم بس اكيد في حد للمعاناة دي
المجتمع مش بيرحم و اهو ضل راجل زي ضل حيطة
العيب كله ف الحيوان اللي هو جوزها
حتي لو غلطت في طريقة نقاش و في اطار للتفاهم هي مش شغالة عنده
لا يمكن تكون دي طريقة نقاش بني ادم
ضرب ايه ده اللي بين اتنين مشتركين في حياة واحدة
اومال صحيح ف المكان الخاص بيعمل فيها ايه
و الله حيوان دي قليلة عليه
و هي مش لازم تسكت
ربنا معاها ع اللي هي فيه و هو ربنا ياخده
بجد موقف ضايقني جدا جدا جدا
قطة الصحراء

فى الحقيقة انا الموضوع دة شاغلنى جدا


وللاسف لأننا فى مصر بل الشرق كلة نعيش

فى مجتمع ذكورى بالدرجة الاولى ويكاد

يختفى دور المرأة فى اتحاء كثيرة من

حياتنا

وسمعت فى برنامج تلفزيونى المذيع بيقول

للمذيعة

المعروف اننا فى مجتمع ذكورى والراجل

هو الفتى المدلل للاسرة

اكيد النظرة دى قاصرة جداااا

فالمرأة تحمل على عاتقها الكثير وينبغى

أن يكون لها الدور الاكبر فى بناء

المجتمع والتغير ييجى أولا من ايمان

المرأة بدورها وايمان الرجل بأهمية

الدور دة

تحياتى
MEDUS said…
عزيزتى قطة الصحراء
هذا الموقف شوفتة بعينى منذ 3 ايام امام معمل المختبر بتاع التحاليل اللى فى محطة الرمل عربية اجرة الشرقية واقفة وست رايحة تركب فيها واذا بزوجها يضربها بالشلوت ثم ينهال عليها ضرب بيدة دون رد منها سوى البكاءو دون ان ندرى لهذا سبب مما اثارنى واثار كثير من المارة فى الشارع ولكن احد لا يستطيع ان يتكلم مع ذلك الحيوان !! ولا حتى انا منعا للاحراج!!فأبسط كلمة وانت مالك مراتى وانا حر فيها !! وكأنها بهيمة اشتراها!! فمهما كان الموقف فلا يقابل بمثل هذة القسوة والهمجية الحيوانية وفى الشارع امال لية ربنا خلق للانسان لسان وعقل؟؟ انا رأئى المشكلة فى الستات فلو واحدة اتعرضت لمثل ذلك الموقف واشتكت فى البوليس ودا حق بيكفلة ليها القانون واخد الراجل دة عقابة ما كررها اخرون.. فالنساء فى مصر كالنعاج ومهما كان هناك من ينادى بحقوق المرأة المصرية فهى ذاتها قابلة لهذا الوضع ولا تريد ان تتغير
تحياتى
Misrdream said…
موضوع ضرب الرجل للمرأه موضوع مروفض تماما وليس هوه الحل سواء فى مكان خاص او عام وان دل يدل على ضعف شخصية الانسان وليس قوة شخصيته
-----------------------------
ضيفي لقائمة اعدائك سي السيد واتباعه
هع هع هع هع
اقعدي بالعافيه
Sherif said…
لماذا تفترضى أن كل رجل هو جنتلمان حقيقى؟

لابد أن يأخذ معنى الرجولة لدينا منحى آخر

ما أقصده أنه ليس كل شنب رجل .. للرجولة معنى أعمق بكثير .. هو فى النهاية موقف .. وليس أسم مذكر فى شهادة الميلاد
عزيزتى

شىء غير آدمى .. بل ومثير للاشمئزاز والقرف ..والاكثر منه قرفا تبريره الوقح فى عدم تدخل أى من الحضور فيما يحدث ..لانها زوجته!!!!!!!!! أى تبرير هذا ؟ .. هذا المعقد والغير آدمى لايحق له ان يصفع أى سيده أمام الجميع ..فما بالكم لو كانت هذه السيد زوجته..؟؟

قد تكون مخطئة فى حقه.. قد تكون وقحة وتستاهل التأديب ..قد تكون ..وقد تكون ..ولكن حتى ومهما كانت الاسباب فهذا لايعطيه أى حق فى التصرف كهمجى وقح .. بصراحة حاجة تحرق الدم ..

وللاسف مفيش حد يحب يتدخل بين زوج وزوجته !! وده تصرف الى حد ما طبيعى لكن كان نفسى يحصل ماهو غير طبيعى ..ويقوم احدهم بتلطيش هذا الزفت ..ويعلمه آداب التعامل مع الآخرين أيا كانوا فى الاماكن العامة والخاصة
ولعل هذا يكون درسا لكل رجل محترم فى كيفية التعامل مع المرأة فى الاماكن العامة ..وكيف يظبط انفعالاته ويختار الوقت المناسب للتحدث والتعنيف بدون ضرب .. مش كدة ولا أيه!!! على رأى فؤاد المهندس ..رحمه الله

الموضوع جميل ومهم والله ينور
ده انسان همجى وقح .. وأكيد عنده خلل وكان نفسى احد الموجودين يلطش له خدوده الباردة.. وحتى تبريره للتحجيز مابينه وبينها ..انها زوجته..قال يعنى ده مبرر ..!! حاجة تكسف ..مش كدة

عموما ومن الآخر الاسلوب مقرف جدا وغير مقبول من أى رجل محترم ..وبقول محترم انه يتصرف مثل هذا التصرف الغير أخلاقى لا فى الاماكن العامة أو الخاصة ..والعقاب البدنى اسلوب حقير ..وغير آدمى

الموضوع يحرق الدم ..لكنه مهم

شكرا لمرورك على مدونتى وشرفنى المرور على مدونتك الجميلة والواقعية

والسلام
ازيك يا قطه ..مدونتك جميله قوى بس حاسه انك بتخربشى فيها ...يا رب تبقى تهيئات اسعدتينى بالزياره الكريمه واتمنى تكرارها وعايزه اعرف حاجه بتهاجمى النقاب ليه ما اليى يلبس يلبس كل لاواحد حلر وعلى فكره فيه ناس لابساه محترمه وموضوعيه جدا وفيه ناس معايا فى الشغل لا يمتوا لاى اخلاق بصله ففيه الكويس ووفيه الوحش يعنى الناس اليى لابسينه وانا مع الناس اليى بتقول انه مش فريضه وانا مش منقبه على فكره وليا واحده صحبتى اتنقبت اخيرا فضلت اقنعها تشيل الفكره من دماغها انا واختها انما هيا اصرت عادى كل واحد حر طالما حريته مش بتأذينى لا من قريب ولا من بعيد وربنا يوفقنا للخير...سلام تركتك فى رعاية الله وامنه..انا بعت الصبح تعليق عن فكى الاسد معرفش وصل ولا لا عشان كده علقت فلى شئ مختلف ..
Blue Nile said…
للاسف في رجالة بتفتكر نفسها رجالةلما يعاملو زوجاتهم اكنهم جواري عندهم
وممكن للاسف تكون راضية بالعيشة دي عشان اولادها او انها مالهش مأوى
A long distance said…
الراجل اللي يعمل كده في مراته
سواء في مكان عام او خاص
يبقى راجل ضعيف
ومعقد نفسيا
حتى لو مراته غلطت
كان ممكن ينبها على الغلط ده
مره واتنين وتلاته
ولو منفعش
يريح نفسه ويطلقها
لكن يمد ايده على انسانه
اهلها ااتمنوه عليها
لا
اسد على و في الحروب نعامة

تحياتي
اعوذ بالله الموقف مخيف على فكرة اولا لاننا مانعرفش ايه اللى جابرها على كده وليه هى ساكتة فيه اسباب كتير هى شايفاها منطقية خليتها تستحمل الاهانة اللهم عافنا ولا تبتلنا
سلام
blackcairorose said…
قطة

موضوعاتك كلها حلوة ونفسى الاقى الوقت بعد عودتى للتعليق عليها واحد تلو الاخر

الايذاء الجسدى العائلى موضوع مؤلم ومتشعب وموجود للأسف بدرجات مختلفة فى جميع الثقافات تقريبا لكن طبعا يزداد فى مجتمعاتنا الشهيرة بامراضها الاجتماعية المستعصية

وقد شاهدت صورا منه فى مناسبات مختلفة مع الاسف ولا يقتصر فى مصر حتى على طبقة معينة ولكنه موجود فى كافة المستويات

ولا استطيع لوم المرأة فقط لقبولها وغض الطرف عن الايذاء الجسدى لأن الموضوع أكبر من أن يكون مجرد فاعل ومفعول

على كل

احببت نقل تحياتى وامنياتى القلبية لكى بعد عودتى من العطلة

ودمتى دائما بموضوعاتك وبجرأتك التى تثير بجد اعجابى
amr said…
مممممم ... قلة ادب !!! ... والله لو ناقحة عليك اوي كدة وعايز تفرد عضلاتك و تمد ايدك على مراتك - على الاقل يا اخي مش قدام الناس ... مش لازم يعني تعمل فيها عنتر وانك شجيع السيما ... ((( شايف عنييين القطة الطيبة هاتاكلني على اللي قلتة ... انا مش قصدي ان لية حق انة يضربها لان دي همجية و كمان مش زي مالشرع بيقول ))) وكمان انا مش بكرة اد اني اشوف واحد و مراتة بيتخانقوا في الشارع :((( بجد بكون عايز اولع فيهم الاتنين ))) ولا ياعيني بقى لما تلاقي واحدة ست و نازلة ضرب في ابنها او بنتها .... معلش في نقطة تانية بس استحمليني انا شايف ان موقف السيدة اللي انا اسف لانها متجوزة من حيواااان - مع الاعتذار للحيوان - مش سلبي زي ماهو باين ... ممكن تكون باللي عملتة دة انها امتصت الموقف ومخليتوش يتطور اكتر من كدة .. بس هي كانت هتعمل اية مثلا ؟؟؟ ... هاتضربة تشتمة ؟؟؟ طب و اية اللي هيحصل بعدها ؟؟ مش عارف بصراحة ... ربنا يعينها ..... اسف على الاطالة
هاي وحشاني والله
بالنسبه للحكايه دي
انا في الأول كنت بستغرب شوفت المناظر دي كتير اوي
بس بعدين عرفت ايه السبب
البنت لما بتحب بجد ممكن تخلي حبيبها يعمل فيها اللي هوه عايزه حتى ولو وصل وجرح كرامتها قدام الناس
بجد لانها ساعاتها بتبقى حاسه انها هي اللي غلطانه وهو معاه حق في اللي بيعمله
وان اللي بيعمله ده من دافع حبه ليها وغيرته عليها
صدقيني الكلام ده بجد
بس انا مش معنى كده اني معاه في اللي عمله بالعكس دي همجيه والانثى استحاله يتعمل فيها كده
لا ضرب ولا شتيمه لان ليها كرامه في كذا طريقه ممكن تحسسها انك زعلان واحسن من الضرب والشتيمه
ثانيا حكايه الشبكه بقى
البنات مش عايزين شبكه ماشي مش مشكله
المشكله في اهلها
يعني ليه هي بنتنا بايره
وحشه
اشمعنى فلانه وفلانه وبنت فلان
هما احسن مننا
البنت انا قلت مش عايزه بس اهلي بقى اعملهم ايه
فهماني
اعتقد لو اسد

مكانش هيعمل كدة فعلا

بس هى المشكلة فى ستات ضعيفة

انا بشوف ده كتير

بس بجد اللى يعمل كدة عمره مايكون راجل
ياجماعه احنا مشوفناش غير اللى حصل قدامنا الله اعلم ايه الموضوع اللى اتخانقو عشانه مش يمكن هيا غلطت غلط يستاهل اكتر من كدا كمان الله اعلم
Desert cat said…
صفا
كلامك صح يا صفا
هى اللى بدأت بالتنازل من الاول
وهى اللى سمحت بالاهانة من البداية
يبقى تستحمل اللى بيحصل لها
لان لو كانت اخدت موقف او كان ليها وقفه معاه مكنتش وصلت اهنتها فى مكان عام
تحياتى
Desert cat said…
رصيف نمره خمســــــه
يا ميمى احنا فين من تعاليم الرسول سواء فى المعاملة بين الناس وبعضها او بين الزوج وزوجته
احنا بنقول الرسول قدوتنا كلمة نتشدق بيها لكن فين من تعاليم الاسلام ومن اخلاق الرسول القدوة
اتنرفزى براحتك ما هى حاجه فعلا تنرفز
تحياتى
Desert cat said…
nody_1987
تقريبا ده تلخيص للحكاية كلها يا نودى
تحياتى
Desert cat said…
Anonymous
طريقة كلام حضرتك غير مقبولة
خروجى من بيتنا فى الوقت ده او اى وقت ايا كان مش يخصك فى حاجه
انت كتكوت لازم تكون فى العشة من المغرب مش يخصنى انا فى حاجه
من ناحية انا جاية افضحهم فهما اللى فضحو نفسهم
عقابل فضيحة حضرتك كدا
شرفت حضرتك
Desert cat said…
Anonymous
السيد المجهول اللى دخل يشرشح ويقل ادبه ويقول الفاظ تدل على تربيته وبيئته
طيب هو اهله مش عرفوا يربوه ذنبنا ايه يجى يرمى ذبالته عندنا
مش يستر على والديه اللى خرجوا لنا نموذج بقذارته ولا لازم يفضحهم ويجى يعرفنا انه مش متربى وسافل وقليل الادب
جتكو نيلة مليتو البلد
Desert cat said…
عمرو (مواطن مصرى)
والله يا عمرو اللى بيحصل فى المجتمع من حوالينا
من انعدام للقيم وقلب للمعايير
يجعلنى اؤكد على كلامك
بانك لو اتدخلت ممكن هى نفسها اللى ترد بطريقه تستعطفه وتسترضيه
والنماذج دى موجودة وهى من جعلت من يريد التدخل بكلمة طيبة فى تلك المواقف يفكر مرات من رد فعلها وربنا يصرف نظر عن التدخل
محتاجين صدمة كهربية قوية جدا لاحياء قيم ماتت اكلينيكيا
تحياتى
Desert cat said…
PrInCeSS BeRy
الحمد لله كويسه
ازيك انتى يا قمر
هى يمكن اتفاجات بالقلم وهو نازل على وشها
ماهو ساعات الواحد مش بيكون متوقع رد الفعل فلما بيكون عنيف الواحد بيقف زى التمثال
شرفيتنى يا جميل
تحياتى
Desert cat said…
mohamed hesham
المشكلة الاكبر فى انعدام الزوق العام وانعدام الاخلاق
تحياتى
Desert cat said…
سنووايت
بالظبط يا سنو
المشكلة عندها هى انها تركته يتمادى فى قلة ذوقه لحد ما وصلت بيه للمرحلة دى
انا طول الموقف مش متعاطفه معاها
تحياتى
Desert cat said…
mohra
علشان من وهى فى اولى ابتدائى بتسمع ان البنت نهايتها لبيت جوزها
وعلشان ضل راجل ولا ضل حيطة
مع ان فى الحالة دى شمس اغسطس ولا ضل ذكر
تحياتى
Desert cat said…
مدرسة الفشله بنات
كلامك صحيح يا شروق هى اللى سمحت له بكدا
وعلشان كدا انا مش حسيت باى تعاطف معها اطلاقا
تحياتى
Desert cat said…
Rania
ده اعتراف ضمنى منه يا رانيا ان مراته مش متربية اساسا
طيب هى ازاى مستحملة كم الاهانة ده
ماهو ده اللى غظنى يعنى تنضرب ومش متربية
وازاى استحملت الموقف ده فى وسط الناس دى كلها
تحياتى
Desert cat said…
قلوب بتغنى
انا مستفزة
الكلمة دى مش غريبة عليا
ههههههههه
المشكلة يا قلبى مش فى ضعف الشخصية المشكلة استحملت كدا ده فى حد ذاته بطولة دولية يعنى انها تبقى فى الموقف ده ومش يجى لها سكتة قلبية مثلا
تحياتى
طبعا موضوع يحرق الدم
بس حقيقى اللى حرق دمى اكتر الافندى اللى قالك انت خرجتى ليه الساعه اتناشر و نص
مال اهله هوه
حاجه تفرس يا بنتى
اما الست دى
في حاجه غريبه بس يا ريت نساعد بعض فيها
منين واخدها مول و مقعدها تشرب كافيه لاتيه
و منين بيمد ايده عليها
قصدى ان الطبقه اللى بتضرب مراتها دى مش وش كافيه ولا مول
كبيره يوديها عند الحاتى و ممكن يضربها برضه فى البيت
ده التناقض الغريب اللى بقه فى المجتمع
و شكرا على الموضوع المحفز للمناقشه
و عندى سؤال واحد
انت منين فى مصر ؟؟؟؟؟
أنا حر said…
بصي قبل ما نلوم على الست لازم نعرف الاسباب اللي خلتها تستكين كده
الفكر الوهابي في مصر ضخم من دور الرجل ودور الزوج لدرجة ان في مشايخ بيطلعوا على التليفزيون بيقولوا ان الراجل من حقه يعمل كده لأنه المفروض الزوج بالنسبة لمراته منزلته بعد ربنا وده يديله الحق انه يعمل اي حاجة لأن معصيته من معصية الله
للاسف الخلط بين الحقوق والواجبات وعدم تعليمها في مدارسنا وفي جامعاتنا وترك كل الامور لمشايخ الفضائيات ولرجال الدين هو سبب المشكلة
تحياتي
Desert cat said…
الاستاذ اللى دخل كتب لى رد طويل عريض لاء وبادئه تنشريه مش تنشريه يعنى الموضوع مش فارق معاه
طيب تاعب نفسك ليه فى الرد الطول بعرض ده طالما مش فارق نشره من عدمه
عموما انا مش نشرته مش علشان مش عندى اجابة لسؤالك العووووويص اللى مش مر عليك فى ابتدائى
انما علشان اولا انا لما دخلت مدونة
MEDUS
مش لاقيت نفس سؤال حضرتك هناك
مع انك شوفت ردى هناك وكان من الاولى انك تسالنى هناك بدل ما تيجى تكتب رد طول بعض مش ليه اى علاقة بالموضوع لا من قريب ولا من بعيد وفى النهاية مش فارق معاك نشره من عدمه
عموما ممكن حضرتك تكتب سؤالك
العووووويص فى مدونة الاستاذ MEDUS
وهتلاقى ردى هناك اصل انا مش برحب هنا غير تعليقات الناس اللى بتفرق معاها بس
مؤمنه said…
السلام عليكم و رحمة الله وبركاته
بالنسبه للموضوع الاول انا من رأيى ان هى السبب فى المعامله دى
الانسان الى يهين مراطه يبقى هو انسان مش محترم ومالوش حل الا الاهانه
احترام الزوج لزوجته يدل على احترامه لنفسه قبل احترامه ليهالان الازواج نفس احده فى الاصل
ولذلك يقول الله عز وجل فى كتابه الكريم وخلقنا لكم من انفسكم ازواجا صدق الله العظيم
بالنسبه للموضوع التانى
الشبكه فى نظرى تقدير من العريس للعروس وهذا التقدير ليس له نسبه مطلقه بل يتفاوت من اخر لاخر تبع لامكانيات العريس
فلا يجب على اهل العروسه ان يغالوا فى الشبكه للمظهره لكن لا يطلبوا منه اكثر من المستطاع ولا اقلمن المستطاع فقط لتقدير ابنتهم وليسالحاجه للشبكه ذاتها
دومتى بكل خير
والسلام عليكم ورحمة الله وبركاته
لقد سمحت لمتشبه بالرجال بصفعها في مكان عام

اذا فهي سلبية ..

أما هو فهو يتشبه بالرجال بصورة رسمها في مخيلته بأن الرجل هو من يضرب ولا يتعامل بالمعروف ..

رفقاااا بالقوراير كما قال رسولنا الحبيب ..

لكن كما أخبرتك يا قطتي بعضهم متشبهون ..

و هي سلبية و أستهانت في تقدير ذاتها ..
على فكرة المشهد ده شوفته مرة في العقاد في عربية وقفت قدامنا وفيها واحدة غير محبة وجوزها بيضربها في العربية وأولادها كانوا معاهم في العربية بيبهات صغيرين
وصدفة كان في شرطة وادخلت بينهم
لما وقفت العربية

-----------

وبالنسبة للواقعة اللي بتحكيها

كلاهما مخطئ

الأمر كله مهين لها وله
لهمجيته ولإستكانتها
في المكان العام والخاص أيضاً من غير
الممكن أن يكون مقبول إهانة إنسان بهذه الكيفية

وقد يكون والله أعلم سبب استكانتها هو أطالفها أو رفض أسرتها لما قد تصل إليه الأمور ونهرها حينما تعود إليهم

وقد يكون الأرجح هو العجز الاقتصادي عن أن تعول نفسها هو الذي اسكتها

الأسباب كثيره .. لكن
كل هذا لا يشفع لها .. ولا يشفع له


وليد
Desert cat said…
عايزه اتطلق و
حبيبتى مش كل ذكر راجل
احيانا بتكون صفة فى البطاقة الشخصية وخلاص
تفتكرى واحد لاغى عقله هيفقه ايه من كلام الرسول
ولما تعملى الحملة على الفيسبوك اتمنى توجهى لى الدعوة
انا كان عندى رينو بس اتخطف
اه وحياتك اتخطف ودلوقتى عندى لوجى
دعواتك بقى ربنا يخليها ويبعد عنها الشريرين
شرفتينى جدا
تحياتى ليكى
Desert cat said…
Blue Nile
هو بيكون فاكر نفسه راجل لما بيمد ايده على مراته لكن اللى حواليه بيقولوا عليه واحد ناقص
هى فعلا ممكن تكون ملهاش مأوى وغالبا بتكون مش ليها شخصية
تحياتى
Desert cat said…
dina
العيب على اللى ربوه ان المرأة عبارة عن جارية
على اللى علمه انها مخلوقه علشان خدمته وانها عورة ومش من حقها تفتح بؤها ولو فتحته تنضرب على طول
ناس قلالات الادب بجد
شرفتينى
Desert cat said…
طبيبك الخاص
غالبا اللى بيعمل كدا بيبقى واحد فاقد عقله
او مش عنده كرامة لانه مش عارف ان اللى بيهينها دى تحمل اسمه من يوم ما دخلت بيته يعنى بيهين نفسه
تحياتى
Desert cat said…
Anonymous
وانت مال حضرتك
برضه مش سلام خالص
Desert cat said…
A7MeD F@hMy
يا سيدى الفاضل هى لو كانت اخدت موقف حازم من البداية الامر مش كان هيوصل لكدا
لكنها تهاونت وتركت الامور توصل لحد اهانتها فى مكان عام قدام الناس
انا معاك المجتمع مش بيرحم وغالبا بينظر للمطلقة على انها فتاة ليل
لكن احنا مش بنقول تتطلق احنا بنقول تخلى عندها كرامة
تحياتى لحضرتك
Desert cat said…
المحارب المتيم
ماهى المشكلة فى النشأة
ساعة الولادة لو الدكتور قال بنت تلاقى الراجل وجه اسود وكأنها بتقول روح ارمى فى النيل ولو قال ولد يبقى اقيموا الافراح والليالى الملاح سبع ليالى حتى لو خرج الابن عاق والبنت عالمة ذرة
تظل النظرة المزدوجة
تحياتى
Desert cat said…
Dear MEDUS
من الواضح ان المنظر مش جديد
لان اغلب الكومنتات شافته
الست فى مجتمعنا قابلة للاستكانة تقولك انا احافظ عليه علشان يشيلها لى جميله
واثبت لى انى بنت ناس واصيلة لكن اللى ترجرج جوزها فى الاقسام دى مش متربية
مع ان اللى بتقول كدا تلاقيها شاربه من القهر والويلات مالا يعد ولا يحصى
وبالتالى غالبا بتكون تستاهل
تحياتى
Desert cat said…
Misrdream
بالظبط اوجزت فانجزت
وبعدين كل مرة كدا تزود لى فى قائمة الاعداء يا احمد مش ينفع كدا
ربنا يستر ومش اضيف حلم مصرى ليهم قريب
:)
تحياتى
Desert cat said…
Dear Sherif
طبعا كلام حضرتك صح
لكن المجتمع بيفرضه علينا راجل
طالما يحمل صورة ذكر وصفته فى شهادة الميلاد ذكر يبقى فى المجتمع يتحكم ويرضب كمان ويرتكب من الاخطاء ما يشاء ولو اتكلمت يقولك راجل
تحياتى
Desert cat said…
وميض ابتسامة
كلام حضرتك جميل وموضوعى
لكن الجميع يخاف من رد فعلها هى
هى ممكن تستحمل تتهان كرامتها تنضرب
لكن عند تدخل احدهم ممكن يكون ردها وانت مالك
بتدخل ليه طبعا قمة الاحراج
لان من قبلت الاهانة ورات الحل فى الاستكانة لا تامن رد فعلها
للاسف مش قادرة اتعاطف معاها
تحياتى لحضرتك
Desert cat said…
وميض ابتسامة
طبعا منتهى الهمجية وكاننا فى غابة والبقاء للاقوى
تشرفت بزيادة مدونة حضرتك كما تشرفت ايضا بزيارتك
تحياتى
Desert cat said…
عايزه اتطلق و
انا كمان اسعدتنى اوى زيارتك للمرة التانية
انا مش بهجكم النقاب انا بهاجم العفن الكامن خلف النقاب
لان كل منقبة متخيلة نفسها جسم سكسى مثير المفروض انها تتخفى او مجرد فرج ماشى على الارض لافراغ شهوة الراجل
منظرها كئيب ومشوه
بهاجم الخطر خلف النقاب وعندك الكثير والكثير من الحوادث التى ارتكبت باسمه
من حقى امشى فى شارع امن واركب وسيلة مواصلات امنة
والله لو الدولة هتوفر الامان ده وتقدر تتحقق من شخصية المتخفية خلفه يبقى اهلا وسهلا مش هتقدر يبقى لا للنقاب
شرفتينى جدا وسعيدة بزيارتك
تحياتى
Desert cat said…
A long distance
وجهة نظر تحترم
لكن " افلا يعقلون "
يا عزيزى اللى بيعمل حاجه زى كدا مش بيفكر ان البنى ادمه دى امانه فى بيته من عدمه هو بيكون حاسس انه اتجوز خدامة ومن حقه يعاقبها فى كل وقت حتى الخدمات مش بيتعاملوا كدا
تحياتى
Desert cat said…
كلبوزة لكن سمباتيك
ههههههههه
ايون هو كدا بالظبط
تحياتى
Desert cat said…
كلبوزة لكن سمباتيك
ههههههههه
ايون هو كدا بالظبط
تحياتى
Desert cat said…
كلام وخلاص
ممكن يكون من ضمن الاسباب كلمتين من الست الوالدة ان الست اللى بتستحمل وتتحمل قلة ادب الذكر هى اشتراها خدامة بتكون بنت اصول فبتطبق الكلام عملى
يمكن ويمكن تكون عايزة تعيش فى ضل راجل مع ان فى الحالة دى ضل الحيطة بيكون احسن الف مرة
تحياتى
Desert cat said…
blackcairorose
اولا حمد الله على سلامتك
نورتى بلوج سبوت والنت والدنيا كلها
بالنسبة للموقف ده كان تانى مرة اشوفه فاركة من حوالى 5 سنين كنت ماشية فى شارع الجلاء تقريبا قدام الاسعاف وكان الجو شتا وانا ماشية بصراحة مستمتعه بالجو وفى امان الله والاقى واحد واقف مرة واحده ورزع الست اللى جنبه بالقلم الناس اتلمت راح سابها ومشى وهى اخدت بعضها ورجعت
انا جريت مش عارفه ليه
بس فجأة لاقيت نفسى بجرى فى الشارع
المناظر دى بتثيرنى جدا وبتشعرنى بالاشمئزاز من الطرفين
شرفتى البلوج
وسعيدة اوى بعودتك
تحياتى
Desert cat said…
Dear amr
يا عزيزى اتكلم براحتك
انت مع موبينيل اتكلم من القلب
قصدى يعنى عيون القطة الطيبة عادى بتتقبل اى كلام
عموما انا مش قولت هى تضربه او تشتمه
كانت اول ما الحوار بدأ يحتد طلبت منه يروحوا يصفوا الامور بينهم فى البيت
او سابته هى ومشيت
اشترت نفسها بمعنى اصح
تحياتى
Desert cat said…
أحلام عمرنا
يا اهلا وسهلا بحضرتك
انا بعتبر موضوع الضرب ده شيئ غير ادمى بالمرة
ده الواحد بيتعاطف مع الحيوان فما بالك بالانسان
احيانا بيكون الكلام ابلغ من اى ضرب وبيوصل للى انت عايزة برضه
بالنسبة لموضوع الشبكة ده
فاجابته فى مدونة البرنامج
وانا هنقل ردك هناك
تحياتى
Desert cat said…
مدحت محمد
الرجولة مش بفرد الدراعات يا مدحت ولا بالصوت العالى
الرجولة افعال مش كلمة
تحياتى
Desert cat said…
سمر الشافعى
طيب يا سمر مهما كانت درجة غلطها تستحق انها تتهان بالشكل ده وقدام كم من الناس مختلفين لا هما قرايبها ولا تعرفهم ولا يعرفوها
اعتقد ان مش فى اى مبرر يعطيه الحق يعمل كدا حتى لو بينه وبينها
تحياتى
Desert cat said…
ايمان اسامه محمد عواد
طبعا تصرف الشخص ده وحشى وغير ادمى
بالنسبة للاخ اللى داخل بيتكلم وكانى على ذمته مش عارف والله حقيقى بلاوى بتتحدف علينا
نرجع تانى للراجل انا حقيقى مش عارفه سبب الخلاف ايه وايه اللى حصل ووصله للدرجة دى فى الكافيه بس على راى صديقتى كانت بتقولى يمكن كان عازمها هنا علشان يستلف منها كل مرتبها اخر الشهر ولما رفضت عمل كدا
بالنسبة لاجابة سؤالك يا ستى فهو انا من الزقازيق
تحياتى لحضرتك وشرفتينى جدا
Desert cat said…
أنا حر
ماهو حرب القنوات السلفية والوهابية ده اللى جايبنا لورا ومصر بتتاخر بينا
كل واحد معاه شوية فلوس مش بقى بيفكر يستسثمرهم غير فى عمل قناة تجذب الناس وبما اننا شعب متدين خالص وكل اللى نعرفه عن الدين ان المراة عورة فالقنوات دى لاقت رواج كبير من شيوخ الترهيب والثعبان الاقرع
انا اللى مضايقنى فى كل ده ازاى استنت لما الامر وصل لكدا مش فاهمه حقيقى
تحياتى
Desert cat said…
مؤمنه
عليكم السلام ورحمة الله وبركاته
بالنسبة للموضوع الاول فانا متفقه معاكى جدا
لان الانسان اللى بيعمل كدا مش بيكون محترم لالانه طالما اترضاها زوجة ليه وتكون ام لاولاده طالما حملت اسمه يبقى اصبحت جزء منه ازاى بقى يهينها الا اذا كان هو انسان مهان
بالنسبة للموضوع التانى فهو فى مدونة البرنامج
لكن لا عليكى انا هنقله هناك
مودتى واحترامى
Desert cat said…
د\أسماء علي
هو انا حقيقى يا دكتورة حاولت التمس لها عذر واحد مش لاقيت
جربت اتعاطف معاها مش عرفت
دايما فى حاجه بتقولى هى اللى سكتت على الاهانة من البداية لحد ما وصلت للشكل المستفز ده
ومن الطبيعى من يرتكب مثل تلك الحمقات لا ينتمى الى عالم الرجولة بصلة
شرفتينى يا جميل
Desert cat said…
!!! عارفة ... مش عارف ليه
هو من الواضح ان اللى بيتهور ويمد ايده على زوجته او اى حد بيكون حد فاقد عقله فمش مشكلة بقى اطفاله موجودين كبار ولا صغيرين المهم انه مش بيكون فى وعيه
فى الموقف ده الاتنين غلطانين بس انا بحملها هى الغلط الاكبر لانها استنيت لما المشكلة وصلت لهذا الحد
تحياتى
سمراء said…
دة طبيعي جدا في ثقافة زكورية
لما قالولي دة ولد انشد ظهري وانسند ولما قالولي دي بنية انهدت الحيطة على

اكسر للبت ضلع يطلع لها 24

يا مخلفة البنات يا شايلة الهم للممات

البنت لو طلعت المريخ اخرتها للطبيخ

اللي ما يهمة زناهم ما بقاهم

وهكذا

النهاردة كنت في كافية وسمعت البنت اللي قاعدة جنبي بتقول
انا عندي 39 سنة وبشتغل في الجامعة الامريكية وانا شايفة انا الجواز للبنات ستره

دائما متجددة يا قطة
سمراء
Desert cat said…
سمراء
تقريبا الفلكور الشعبى ده يا سمراء محتل مصر من شرقها لغربها
ولا فرق بين الطبيب من المهندس من عامل التراحيل فى رايهم فى البنت بالذات
وزى ما الاستاذه اللى بتشتغل فى الجامعه الامريكية شايفه ان الجواز للبنت سترة
فى ناس مبسوطة بحالها بس الله يخليه المجتمع يبعد عننا ويسيبنا فى حالنا
اشكرك جدا يا جميل
شرفتينى
مفيش حاجة بتيجي كده وخلاص

اللي شفتيه جزء من كل

تدني في القيم وعدم اتزان شنيع في التصرفات

ومش منتظر منها ابدا انها ترد القلم قلمين ولكن انا اعتقد انها امرأة ممتهنة -بنفسها -لذا فقد هان ان يحدث مثل هذا امام الناس

يا ريت متقعديش جنب الناس دول كتير!!ه
تحياتى لكى قطة..صحيح انا معك فى ان الرجال احيانا لا يتمالكو اعصابهم ..هناك بيت للحساب اما على الملأ فهو يجرح كرامتها مرتين..واية رايك ان العكس يحدث احيانا؟يعنى بيتبادلو الادوار؟؟سبحان الله
HANY YASSIN said…
السلام عليكم

كيف تستكين له هذه السيدة بهذه الطريقة ؟؟؟
ولما تتركه يهينها امام جميع الحاضرين ؟؟؟
هي اللى قبلته من الأول يبقى تتحمل
لما لم تنسحب عندما بدأ ذلك الاسد الذى أكاد أن أجزم أنه يقف امام مديرة فى العمل يسمع الأوامر فى صمت وتوأد وان أخطأ فى تنفيذها
طبيعي انه يعمل كده لانه جبان بيستغل ضعف الاخرين في اشباع عقدة بالنقص
العالم فيه كل شيء لا شيء يدعو للتعجب
تحياتي واحترامي
هاني يس
الربان said…
تحياتي

في رأيي ان اي علاقة انسانية يجب ان تقوم علي الاحترام المتبادل و التفاهم و التسامح....

و يبدو ان الزوج، في هذه الحالة التي سردتيها حضرتك ، لا يأبه و لا يعنيه و ربما لا يفهم معني الاحترام للنفس و للاخرين....و ان كرامة زوجته و كبريائها جزء من كرامته هو و كبريائه هو....

اما التساؤل حول ما يدفع هذه المرأة لتحمل هذا الاذي...فقد يكون الحاجة...
بمعني ان لا يكون لها مصدر دخل يمكنها من
الصرف منه علي نفسها حال قيامها بالابتعاد او الانفصال عن هذا الزوج...

أسأل الله لها ان يمنحها الصبر و البصيرة
وله ان يمنحه التعقل و التدبر و كظم الغيظ...


بالنسبة لموضوع الشبكة...في رأيي انه ليس موضوع اساسي في الزواج إن كانت الظروف المادية لا تسمح....
لكن الاهم في الزواج حسن الاختيار...ثم حسن الاختيار ثم حسن الاختيار.

تحياتي و تقديري
Migo Mishmish said…
صباح الخير يا قطوطة
معلش بقالي فترة مبجيش تعبانه من الشغل والحمل وحاسه اني مش هافضل عايشه لغايه لما اقبض مرتبي :-). ومش انا وبس اللي كدة دانا معذبة ميجو معايا. كل شوية ميجو انا حامل روح هاتلي ميه ميجو انا حامل اعملي نسكافيه. ميجو انا حامل.............. وحطي مكان النقط اللي انتي عايزاه. بصراحه هو ابن ناس جداً لو كان الوضع مقلوب كنت خدته وديته عند مامته وكنت قولتلها لما يولد ابقي اديني رنه
المهم بصي يا ستي حواء بتاعتك انا مش شايفه ان غلطها يختلف عن غلطتنا كلنا لان اكيد ديه مش اول مرة البغل ده يمد ايده عليها . اكيد كان في مقدمات وهي سابت الدنيا لغايه لما كبرت ومبقاش الضرب في البيت بس لا ده بقه على عينك يا تاجر. زينا بالظبط لما بنسيب الحاجات الصغيرة تكبر وتستفحل وتبقى سرطان وبعدين ندور مين كان غلطان
انا مش عايزة اطول بس عايزة اقولك على قصه كنت قرايتها وانا صغيرة القصه بتقول كان في بنت وماماتها بتعلمها ازاي تحل المشاكل من وهي صغيرة خدتها عند شوية نجيله في الارض وقالتها شديها فشدتها البنت بسهوله وبعدين راحوا لنبته كدة طويله شوية فكان الشد اصعب وبعدين لشجرة صغيرة وبعدين الموضوع بقى مستحيل لما خدتها علشان تشد شجرة كبيرة وتخلعها من الارض. وقالتها لما بنسيب المشاكل تتراكم ومانحلهاش بتبقى زي الشجرة الكبيرة مش ممكن تتشال وهتفضل موجودة
البغل بقه اللي فاكر نفسه بقه راجل علشان مد ايده على واحدة ست. ده اكيد جوه تجويف دماغه مفيش غير قشر فول سوداني. لان العنف معناه انعدام الفكر. والناس عندنا بيربوا ولادهم الصبيان على انهم خدوا نشان علشان هما رجاله. وده غلط طبعاً واللي بيبربوا ولادهم كدة مش بيضروا ولادهم بس لا ده بيضروا كل المتعاملين معاهم. يعني البغل ده ممكن يتحرش باي واحدة في الشارع ولو دافعت عن حقها او زعقت يقل ادبه وممكن يمد ايده عليها وديه الموضه الجديدة يبقى الواحد من دول عيان ويقل ادبه ولما تحاولي تخليه يلم نفسه يبين ربايته اكتر. وطبعاً اخواته البنات وبعديهم مراته يعاملها على ان وظيفتهم الاساسية في الحياه هي خدمة رغباته.
وبعدين انا مش شايفه ان ربنا خلق الستات علشان تتبهدل يعني. ربنا مش سادي للدرجه ديه. يعني كل الرجاله المسيحيين حافظين الايه بتاعه ايها النساء اخضعن لرجالكن . لكن الايه التانيه بتاعه حب امراتك كنفسك ما بتاكلش معاهم. مش احنا معنداش طلاق اعرف عيله وناس محترمين جداً الراجل والست استنوا لما ولادهم كبروا وانفصلوا وكل واحد عايش لوحدة ومع كدة في اي مناسبة اجتماعيه تلاقيهم موجودين مع بعض بتعاملوا بمنتهى الاحترام. وبصراحه انا بحترمهم جداً عن اي اتنين عايشين مع بعض وهما مش هاقولك مش بيحبوا بعض على الاقل مش بيحترموا بعض
بس خلاص علشان انا تعبت
love,
MishMish
Misrdream said…
بصي ياقطه انا ممكن اكون موش من المؤيدين لافكارك وبتعارض معاكي فى الكتير من اللى بتقوليه وسعات فى كلام كتير موش بيعجبني
بس لازم الانسان يعبر عن ده بطريقه محترمه
موش لازم يكون سافل وقليل ادب
ومنحط ويقول اشنع الالفاظ

>>>>>>>>>حلوه اشنع دي

علشان يدافع عن افكاره ده بس بيثبت
ضعف موقفه
بجد دي رساله بوجهها لكل مختلف فى الرأي اعرض اسلوبك بعقلانيه
وباحترام او اصمت

اقعدي بالعافيه
nonni said…
ربنا يرحمها من الراجل ده انتى تعرفى انا برضه شوفت موقف شبه ده بس انوا فى عربية بس قد ايه الموقف كان محرج ليهالكل الناس اللى بتتفرج عليهم كمان

"تحياتى"
Diyaa' said…
توقعي كان صح :))
Desert cat said…
Diyaa'
هههههههههههههه
اللى هو ايه سيادتك
الجماعة فى تونس بيسلموا على الجامعه فى ماليزيا وبيقولوا لك محتاجين توضيح بس
Desert cat said…
تايه في وسط البلد
للاسف انا مش قعدت جنبهم كتير
حظى العاثر اللى دخلنى قعدت فى نفس المكان اللى هما فيه
تحياتى
Desert cat said…
بنت سيناء
اعتقد ان فى جملة شهيرة فى المجتمع اسمها البيوت اسرار
لكن فى الحالة دى الاماكن العامة بقت فضايح
عموما ربنا يهدى الجميع
تحياتى
Desert cat said…
HANY YASSIN
هى اللى صمتت من الاول على الذل والهوان
وهى اللى اعتطته الحق فى اهانتاه
يبقى المفروض انها تستحمل
حقيقى مش قادرة اتعاطف معاها مش عارفه ليه
تحياتى
Desert cat said…
ستاذى العزيز
الربان
حمد الله على سلامة حضرتك
نورت الدنيا من تانى
بالنسبة للمنظر البشع من انتهاك لكرامة هذه السيدة فانا اعتقد انه كان من البداية لم تتهاون فى اهانة كرامتها حتى يستفحل الموضوع ويصل لهذه الطريقة
لانى اعتقد ان هذه ليست البداية
بالنسبة لقبولها هذه الاهانة وصمتها فكرت فعلا فى هذا السبب
انها ليس لها اى عائل اخر
لكن حتى هذا السبب لم اقتنع انا به
معلشى قلبى اسود فى المسائل دى شوية
:)
بالنسبة لاجابة شؤال الشبكة فده على مدونة البرنامج
وانا هنقل الرد هناك
اشكرك جدا
احترامى وتقديرى
Desert cat said…
Migo Mishmish
صباح الفل يا مشموشة
اخبارك ايه
واخبار النونو
يارب يجى بالسلامة
بصى يا ستى للاسف المجتمع بتاعنا ككل بيتعامل مع البنت على اساس انها شيئ لتكملة الحياة
حاجه علشان تتجوز وتخلف يعنى ماهى الا مجرد وسيلة للحفاظ على النوع
حقوق ايه بقى اللى ممكن تتكلم فيها
او كرامة ايه اللى عايزة تحافظ عليها
القصة اللى اسردتيها جميلة وفيها معانى رائعة
لكن عند التنفيذ علشان هى بنت مش تفتح بؤها
علشان هى بنت تنفذ وبس
علشان هى بنت تغسل شرابات اخوها الصغير وتغسله رجله كمان وان طلب منها تاخده توديه التواليت مفيش مانع
شرفتينى يا جميله
Desert cat said…
Misrdream
جميلة اشنع دى
بصراحة
كنت مخبيها فين طول السنين اللى فاتت دى
والقصد من كلامك وصل يا باشا
بس حاسه فيه جزئية كدا
طب ايه رايك فى كدا
تحياتى
Desert cat said…
nonni
والله احنا عايشين فى ارض العجايب
ربنا يرحمنا
تحياتى
ADAM said…
لعل حواء تقدر على جعل الآدمي يحترمها

حين تكون ذات شخصية قوية

ولا تجعل لأحد عليها تصرف أو تحكم

ولكنها هانت عليها نفسها

وقديما قالوا

ومن يهن يسهل الهوان عليه


تحياتي للقطة الجميلة


آدم
Desert cat said…
ADAM
والله انت جاى فى وقتك يا ادم
هههههههههه
بقالى كام يوم عمال اقول ادم بيعمل وبيطحن فى حواء
ولا حياة لادم خالص
هى عموما حواء المفروض انه االسكن والمودة
يعنى مش تستاهل الاسية دى كلها لانها مهما عملت صعب يكون عقابها الضرب
اشكرك جدا
حقيقى شرفتنى
أحمد علي said…
مش عارف، أنا شفت الحوار ده قبل كده كذا مرة، لدرجة خلتني أعتقد إنه الموضوع فيه نوع من النصب أو حاجة

الأولي كانت في شارع فيصل الصبح بدري، واحد مسك ست بهدلها، وفي الآخر وقف تاكسي وركبها فيه

والتانية كانت في ميدان الجيزة

وأعتقد كان فيه مرة كمان بس مش فاكر فين

أنا الحاجات دي بتفور دمي جدا، بس الصراحة اللي كان بيمنعني من التدخل حاجتين:
1- دايما كان الراجل والست شكلهم مش مظبوطين أساسا
2- دايما كان الراجل جسمه عامل زي الثور، يعني نتيجة المعركة محسومة مسبقا

والسببين دول برضه هم اللي خلوني أعتقد إن الموضوع فيه حاجة غلط، ومش مجرد راجل "بيأدب" مراته
Desert cat said…
أحمد علي
انا برضه شوفت الموضوع ده مرة من زمان اوى قدام جريدة الاهرام
وبارغم من ان الناس وقفت فى تتفرج انا جريت وقتها مش عارفه ليه
بس لاقيت نفسى بمشى بسرعه ومش عايزة حتى ابص ورايا
لكن اللى اثار حفيظتى فى الحوار ده هو انى تابعت الموضوع من اوله والحمد لله
تقريبا الناس انعدم من عندها الزوق
تحياتى

Popular posts from this blog

قميص دهشور

كل تحرش وانتوا طيبين