ألف مبروك ياباشا على البراءة !!!

من كل قلبى وكليتى وكبدتى وجميع اعضائى صدقنى ببارك لك على البراءة
انت اتظلمت معانا كام سنة والناس بتقطع فى فروتك وانت هربان بره البلد
ويقولوا ممدوح اسماعيل
قصدى ممدوح باشا اسماعيل قاتل اكتر من الف واحد
انا شايفه انك طالما اخدت براءة
ترفع عليهم قضية رد شرف لانهم شهروا بيك وسوأو سمعتك
شايفه طالما انك اخدت براءة
ترفع قضية وتطالب فيها بتعويض للسفينة اللى بوظها الرعاع وغرقوا فيها
وتطالب اهاليهم بدفع تعويض مادى وادبى عن قلة ادبهم وموتهم فى عبارتك اللى بسببه اتأذيت نفسيا وماديا





لما يموت اكتر من الف بنى ادم فى عرض البحر واللى تسبب فى موتهم ياخد براءة
يبقى اسمه اييييييه ؟؟؟؟
اه الف هنا وشفا للسمك





لما تكون دى مناظر ناس بدل ما تستقبل اولادها بالاحضان
رايحه تستقبلهم فى صناديق .... وفى النهاية القاتل ياخد براءة
لما الناس اللى نجيت من الغرق يتهربوا من مستشفيات الغردقة وسفاجا واهاليهم مش يعرفوا عنهم حاجه يبقى اسمه ايه ؟؟؟؟
لما طبيب يفقد اسرته قدام عينيه زوجته واولاده وفى الاخر القاتل ياخد براءه يبقى ده اسمه ايه ؟؟؟؟
لما مصرى يتهان بره بلده مش يشتكى لانه فى بلده مش ليه تمن
لما مصرى يغرق وهو هربان من بلده يدور على شغل اهله مش يشتكو ؟؟؟ لانه طماع رايح يدور على لقمة عيش حلال
لما مصرى يتسجن فى بلد تانية وحقوقه تضيع مش يشتكى ... ماهو فى بلده وجبه شهيه لسمك القرش ومالوش تمن ..
فى ستين داهيه دم المصريين الجرابيع اللى مالهومش تمن
المهم البهوات الكبار يعيشوا
مش مهم اطفال اتيتمت وستات اترملت وامهات اتحرق قلبها ... المهم براءه البهوات الكبار
اتكتموا يا مصريين مش حد يفتح بؤه
لاننا فى نظر حكومتنا ولا حاجه ... فى نظر قضاءنا ولا حاجه
لما اسرائيل تسلم اسرى قصاد رفات يبقى احنا حقيقى كلالالالالالاب ولا حاجه
الف مبروك يا ممدوح باشا
والف اهلا وسهلا بالقضاء الشريف النظيف العفيف
اللى بيدين القتيل ويبرء القاتل
مرحبا بقانون سكسونيا فى بلدنا ام الدنيا

تعليقات

‏قال غمض عينيك
احنا في بلد البطاطس
‏قال الامبراطور
ازيك يا قطه الحراء
مدونتك حلوه جدا
وياريت تنروينى بالزياره

تحياتى
‏قال dr.lecter
يلعن ابو دي بلد

يلعن ابو دي بلد

يلعن ابو دي بلد

باقولها اهو حسبي الله ونعم الوكيل حسبي الله ونعم الوكيل

والله البلد دي عمر مهايبقي فيها خير اقسم بالله العظيم البلد دي اللي بيحصل لها حلال فيها

ايها المصريين البلد دي هتبقي مقبره لكم اطفشوا منها والله اطفشوا

انا مش عاوزز اموت في البلد دي ودمي يروح هدر

حرام عليكم ياناس بجد

1032 بني ادم ماتوا بسبب التستر

هتروحوا من ربنا فين

جفت الاقلام وطويت الصحف

لا حول ولا قوه الا بالله
يا ستميت اتوبيس ماشي
شايلين انفار
ايه يعني حتي يموت مليون
او كل الكون
ده العمر اصلا مش مضمون
والناس اعمار
احمد فؤاد نجم
الحمد لله خبطنا
‏قال غير معرف…
طيب وانتى زعلانه ليه الى خد براءه باشا من ضمن البشوات اللى انت بتدافعى عنهم واللى ماتوا من الرعاع اللى انتى بتهجميهم يا سمو البرنسيسه
‏قال micheal
تحيا جمهورية المهلبية الشعبية
أعتقد اننا من الأفضل أن نناقش أحوال نادي الزمالك و الانتخابات فيه لان ده أكيد أهم من موضوع العبارة
تحياتي
‏قال Mafrousa
لا حول و لا قوة الا بلله
ربنا اكبر من الكل...
هو العادل
يمهل ولا يهمل
افوض امري الى الله ان الله بصير بالعباد
مدونتك هايلة جدا
اما بخصوص براءة ممدوح اسماعيل فدا طبيعى انتى كنتى متخيلة انه هياخد حكم كان هانى سرور خد حكم البلد دى بتاع عز وسرور ومبارك وابنه وعائلتة بالكامل وطظ فى الشعب المصرى هو دا قانون عائلة مبارك لا تحزنى كثيرا
وعلى فكرة الغريبة ان لقيت معلقين مدونتك زعلانيين اوى هما لية كانوا متخيلين انه ممكن ياخد حكم وهو محمى فى عهد مبارك
تحياتى لكى مرة اخرى على مدونتك اللطيفة والجميلة
‏قال فى القلب
حقيقى أتخنقت عايزه حل
‏قال Blue Nile
بجد اكتئبت
رواح الابرياء مالهاش تمن في بدنا
‏قال خالد كامل
الله يرحهمهم و يكون فى عون أهاليهم
و يكون فى عوننا احنا كمان
انا ساعات بقعد و أقول لنفسى
طالما احنا كدة كدة محدش شايفنا
و محدش حاسس بينا
و قيمتنا كل يوم بتقل عن اليوم اللى قبله
يبقى الناس ازاى تخلف عيال علشان يتعاملوا كدة ؟
عامة انا من دلوقت و انا عامل حسابى انى لو مسافرتش برة البلد ... مش هتجوز
تحياتى
‏قال Unknown
البلد دي كوسة يعني مش شيئ جديد يا رب لو الشعب كلو مات بردو الي اتسبب في كده هياخد براءة..
أصلهم كلهم عصابة واحدة هو في حد بيحاسب ويسجن أخوه أهو دول كلهم اجتمعوا وتآخوا على الكوسة والسلطة..يسرقوا البلد وكلوا يشيل من على كلو ويغطوا على بعض ..والشعب يا عيني مسكين..لأا فيه حيل لا يجي شمال ولا يمين..
كل ودي لكِ
‏قال Misrdream
لا لا لا
هدي نفسك يا قطه
ارجعي معايا بالزمن لورا كده
وتصوري المشهد بتاع العباره ده
فى زمن ناصر بتاع الانقلاب
ايام مكان لينا كرامه ومكناش كلاب
كان عمل ايه فى ممدوح اسماعيل
متزعليش نفسك قوي وممكن تكون خطه حلزونيه من حكومتنا الرشيده علشان يرجع ممدوح ويحس بالامان وبعدين يقفشوه زي فيلم بوند الاخير
اقعدوا بالعافيه
‏قال Unknown
صديقتى قطة الصحراء
ليس لى تعليق الا ان اقول لا حول ولا قوة الا باللة و حسبنا اللة ونعم الوكيل
الاغنية معبرة جدا جدا ومتناسبة مع الموقف اشعر اننى انسان احب مصر جدا زى كل المصريين لكن مش فاهم كل اللى بيحصل دا لية؟؟ ولمصلحة مين؟؟ حاجات كتير فى حياتنا اتسببت فى حيرتنا.. وادينا عايشن راضيين جايين ورايحين.. وتستمر الحياة والمعاناة
نحتاج للحظات مراجعة مع النفس
ومازال الامل موجود فلا يأس لان اليأس يعنى الموت ونحن مازلنا احياء
‏قال غير معرف…
ده لنك مدونة واحد ملحد اسمها الباحث عن الله
www.elbahesofgod.blogspot.com
تم اختراقها وحذفها خالص من النت حتى جربى ادخليها
فاحذرى
قريبا سيتم اختراق مدونتك
‏قال ... amr
النائب العام طعن ياستي.... ادعي ان ربنا يحاسب اللي كان السبب...... في امل في ربنا
‏قال Desert cat
غمض عينيك
هى خلصت مرحلة البطاطس وبتحلى بالكوسة دلوقتى
‏قال Desert cat
الامبراطور
انا الحمد لله كويسه
يشرفنى يافندم ازور مدونتك
تحياتى
‏قال Desert cat
dr.lecter
النائب العام طعن فى الحكم يا دكتور
دعواتك يحصل حاجه تنصف الاهالى
والشعب كله
‏قال Desert cat
محمد حلمي مخلوف
والله معبرة على الوضع الحالى فعلا
‏قال Desert cat
Anonymous
اه تصدق نسيت
انا اعتذر لبلشوات
وفى داهيه الرعاع
مبسوط كدا
اكيد مبسوط
‏قال Desert cat
micheal
عبارة مين وميتين ايه
خلينا فى الاهلى
فاز امبارح 2/0
اشمعنا الاهلى والزمالك مش لعب غير امبارح
ليه مش كان اول امبارح
او النهارده مثلا
‏قال Desert cat
واحدة مفروسة
الجميع بيغلى من جوا
طيب والحل
ماتش الاهلى والزمالك
ممكن يهدى الناس شوية
لا املك سوى ترديد دعائك
افوض امرى لله انه بصير بالعباد
‏قال Desert cat
كريم البحيرى
ابتسم يا اخى فنحن فى عصر الاستهبال
القاتل ياخد براءة
والقتيل اهله ياخدوا اعدام

متشكرة جدا على الاطراء
وسعيدة ان مدونتى نالت اعجابك
تحياتى
‏قال Desert cat
فى القلب
ماهما حلوها على طول يا جميله
فى نفس يوم الحكم
ماتش للاهلى والزمالك
وبلاها خنقة
‏قال Desert cat
Blue Nile
ولاحد فى البلد دى ليه تمن
احنا اللى نستاهل
‏قال Desert cat
مهيج الجماهير
عيال ايه بقى اللى نفكر نجيبهم
اذا كان الكبار بياكلهم السمك ولا حد بيسال فيهم
‏قال Desert cat
كاتب مصري
اصلا الموضوع باين من اوله
علشان ايه قضية جنايات تتحول جنح
وتنظر كمان فى محكمة سفاجا
علشان معظم اهالى الغرقانين صعايده وهيكون المسافه عليهم بعيده
ومش حد هيروح
وبالتالى من حق ممدوح اسماعيل ياخد براءة مش ياخد ليه
هو المدعين موجودين اساسا
‏قال Desert cat
Misrdream
مين اللى قالك ان اللى حصل ده ومازال بيحصل مش تبعات لانقلاب ناصر
لو كان حصل فى عهده كان زمان اهالى الغرقى اللى كسروا المحكمة امبارح مرميين فى المعتقلات وحمزة وصلاح نصر طالقين عليهم الكلاب البوليسيه
‏قال Desert cat
Dear MEDUS
انا كمان اتسائل نفس الاسئلة
بس ياترى هنلاقى حد يجاوب
طيب يغششنا الاجابه
تحياتى
‏قال Desert cat
amr
قريت خبر الطعن امبارح يا عمرو
ربنا يساعده

المشاركات الشائعة