خلـــف أســـوار الأمـــــل


يتهادى الوقت متثاقلاً .. كم من الدقائق مضى لا أدرى
أريد أن أفعل شيئ غير المألوف .. أود الخروج عن العادة ... أريد أن أغرس سكينى فى قلب العصر فى الجهر لا فى السر ....
كم الوقت الآن ؟؟؟ ولكن فى ماذا يعنينى الوقت .. ماذا سأفعل به ... يتسلل إلى أعماقى صوت ماجدة الرومى ... أحتاج إليك وأهرب منك وأرحل بعدك من نفسى
.... أحقاً يمكن ان يحدث ذلك ... ولما لا وانا منذ تركته وانا تائهه .. تائهه وأنا جالسة بين أصدقائى .. تائهه وأنا أسير فى الشارع وحدى .. تائهه عن نفسى ... أحاول الهروب من إتخاذ قرار ... أخشى أن يسقط القرار من بين يدى رغماً عنى ... تخوننى ذاكرتى وتأخذنى إلى ذلك المقهى الذى كانت تستقبلنا فيه طاولتنا المفضلة بابتسامة هادئة ... اشعر بها وبسعادتها البالغة وهى تشاركنا كل احاديثنا وضحكاتنا حتى لحظات غضبنا ... اتذكر ذلك اليوم البعيد ... منذ ان جلسنا لم يحول نظره عنى .. واسأله .. أنت بتبص لى اوى كدا ليه ؟؟؟؟ حاسس إنى مبسوط اوى بيكى مش عايزك تغيبى عن عينى لحظة ... وعلشان كدا عايز اخطفك جوا عيونى واقفل برموشى عليكى .... لم أقوى على الرد .. أشعر بكيانى وكأنه مفكك .. أوصالى مبعثرة ... ياربى ماذا أفعل ... اممممممم انت ليه مش بتخلينى اسوق عربيتك بالليل ... يضحك ضحكة عاليه وكأنه فهم مغزى سؤالى ... ثم يعود الى اتزانه ... انتى عارفه بالنهار بسيبك تعملى اللى انتى عايزاه .. لكن اى وقت احس فيه بخطر عليكى انا فداكى ... لحظة صمت ثم يتسائل هربتى ليه ؟؟؟؟ لاء مش هروب ده سؤال خطر فى بالى ... اااااااااه بدأنا فى شغل العيال.... اعود ثانية لكلمات الأغنية ... هل بالفعل أحتاج إليه وأهرب منه .. أم أنى أود الهروب إليه ؟؟؟؟؟ أرنو إلى هاتفى واطلب رقمه ... يأتينى صوته .. بتعملى ايه لحد دلوقتى .. بكلمك .. طيب و ياترى كنتى بتقولى لى ايه .؟؟؟؟ امممممممم كتير .. مالك حاسس بضعف فى صوتك ... لاء مش تقول كدا تانى انا عمرى ما اكون ضعيفه ... انا قوية جدا بيك .... مش بهتم بحد وانت جنبى ... بحطم كل القيود من عادات وتقاليد بعيش معاك فى دنيا بتاعتنا لوحدنا ... فيها عقليات جديدة .. وتفكير جديد .. وتفتكرى هنقدر نعيش فى دنيا بتاعتنا احنا بس ... اذا كان واضعى القوانين نفسهم بيراعوا العادات والتقاليد لدرجة انك بتلاقى القانون احيانا بيتطبق فى صرامة لمجرد انه اصبح عادة ... ماهو مش تنسى انت كمان بعض العادات السلبية اللى كانت فى العصر الماضى دلوقتى بقت قمة الايجابية ... زى مثلاً التعليم زمان كان عيب للبنت بدعوى انه مش من الاسلام وانه حرام ... دلوقتى البنات موجودة فى جميع الجامعات ... وده معناه ان الاسلام مش اتغير لكن العادات اللى اتغيرت لان المنهج اللاسلامى واضح وصريح وعمره ما يتغير على مر التاريخ ... انا موافقك على كلامك لأنه فعلا يثبت صحة نظرية ان التطور تدريجي وشمولي ... ماشى ياعم هيجل ... يعود ليسالنى .. مش قولتى كنتى بتعملى ايه قبل ما تكلمينى ؟؟؟ كنت بسمع ماجدة الرومى ... وخنتى حبيبتك فيروز .. . ههههههه لاء ماهو انا قولت لك انا عايزة اخرج عن المألوف ... طيب بتسمعى لها ايه ... امممممم احبك وبعد ... يردد هو احتاج إليكى وأهرب منكى وأرحل بعدكى من نفسى ..... يغلق كلانا هاتفه ... لينبعث من الخارج صوت آذان الفجر .. إنه إعلان بمولد يوم جديد ... فيه النور وفيه النار .. كما أعشق ذلك الفجر واسعد بالنور .. ولكنى أثور على النار

**************************************************************
غداً الاثنين 21/7/2008 حلقة خاصة ببوست مولد سيدى بلوج
فى البرنامج الإذاعى
أنت تسأل والكمبيوتر يجيب
http://netonradio.blogspot.com
الذى يذاع يوميا الساعه 9.10 صباحا على اذاعة البرنامج العام ما عدا يوم الجمعه
ابقوا اسمعوها

تعليقات

‏قال Fatma
الله على الاحاسيس الجميلة :)

واغنية ماجدة الرومي ولا اروع بصراحة

حبيت احساسك جدا في الموضوع بجد

واتفق معاكي الاسلام ثابت لا يتغير

فقط يجب ان نكون نحن اكتر فهما لروح الاسلام

تقبلي مروري:)
‏قال دعوة للأمل
احساسك رائع و جميل و دومتى بألف خير
‏قال غير معرف…
انا شوفت بوست جديد قولت اكيد سلخ من نوع اخر فى المنقبات والملتحين
اول سطر مصدقتش
تانى سطر حصلى زهول
تالت سطر رجعتى دخلتى فى دايرة الاسلام من تانى
ارحمى بواسيرك يا شابه
لاء وبتسمعى ادان الفجر كمان وبعدها بتعملى ايه يا قطة
بتصلى ولا بتدخلى تحت البطانية
‏قال محمد حمدي
جميل البوست بجد .. مشاعر الحب الى فيه جميله اوى بس انا بحسب انكم فى كافيه لحد ما قولتى قفل كل واحد موبايله

تحياتى
‏قال zOzO
احساسك عالي
تسلم ايديكي
وميرسي لمروك وخصوصا ف الظروف الحلوه
نجاحي يعني
ربنا يوفقك
انتي كمان
‏قال سمراء
لية خلف اسوار الامل
لية البداية خوف وهروب
لية الطريق مش واضح
مع ان المشاعر في الاخر جميلة وقوية
الحب يملئ المحب بالقوة

اتمني لك حياة سعيدة
سمراء
‏قال غير معرف…
اتعودت كل يوم اصبح وامسى عليكى من خلال مدونتك
بل اكثر الاحيان بدخل نت من الموبايل وانا فى الشغل لمتابعه ردودك
بيعجبنى طريقتك فى عرض المواضيع
وجرأتك وصمودك وقوة التحدى اللى لمستها فيكى من اول ما شوفت صورتك فى الفيس بوك
لكن البوست ده مختلف
حسيتك بتحكى عنى انا وعن ماضيا انا
بقالى ساعه قاعده قدام كلامك ومش قادرة اوقف دموعى
الله يخليكى بلاش الاحاسيس العالية دى وبلاش تدخلى جوانا اكتر من كدا
مش كل الناس عايشة فى سعادتك اللى اتمنى انها تدوم عليكى كل واحد جواه جرح ومبيصدق انه يلم شوية
اتمنى لو اعرفك معرفه شخصية
بحبك من كل قلبى

ريهام
‏قال سبهللة
هو دة حوار العشاق
يا سلام على الحب وحلاوته
سلمت يداكى
‏قال Desert cat
ريهام
انا اترددت كتير انشر الكومنت بتاعك
اولا حسيت بالاسف والازعاج والضيق للاحساس اللى اتسببت لك فيه
ثانيا : اخجلتينى جدا بكلامك عنى
وحقيقى مش عارفه اعملك ايه
لو حذف البوست يرضيكى قولى لى
‏قال غير معرف…
لا يا كات متحذفيهوش
انا مش بنقلك احساسى علشان تحذفيه
بالعكس البوست دافى جدا
ورائع جدا وانا اسفه على اى ازعاج حصلك
بس كل اللى يهمنى دلوقتى انى اتواصل معاكى
هبعتلك رقمى فى رد منفصل ومش للنشر
‏قال WhItE HeArT
ياسلااام على الحب

احساس بروعه الحب في البوست ده

دمت بخير

تحياتي
ايه الجمال ده
احساس بجد رائع يا قطة
بجد البوست جميل جدا
و الاغينة كمان جميلة
بجد بوست عاااااااالى جدا
عالم لوحده
تحياتى

اسلام
جميل

بوست مدته الزمنية دقائق , هى طول مدة المكالمة, ولكنك حوليته لمساحة طوبلة من الأحاسيس تعطى انطباعا بطول الوقت....

عموما التباين فى المشاعر هو من سمات الحب والمحبين..

كما أنك لم تغفلى ثورة المحب على باليات تقاليده ومعرقلات الحياة..فأعطيتى إشارة ذات مغزى كعادتك D:

عامة إن المشاعر الخاصة التى لا تحمل ثورة داخلها , أعتقد أنها تخرج تدريجيا من دائرة الحب.. (هكذا أرى)

ودمجك بين مشاعر الحب الخاصة, وبين نظرتك لمجتمعك المحيط , يجعلك مخلصة له حتى فى لحظاتك الخاصة والتى من المفترض أنها لكِ وحدك...

تدوينة جميلة يا ستى

تحياتى وإحترامى
ازاى يكون عندك منبع جميل اوى كدة للحب

وتقولى ان حياتك بقت كلها عادية ومفيش جديد

ياحبيبتى الحب مصدر كل جديد واكتر حاجة تساعد ع التغيير والقوة

تحياتى للكلمات الرقيقة الصافية

بييس
‏قال خالد كامل
دا ايه الحب ده كله ؟؟
لا بصراحة بوست مالهوش حل
و احساس حلو قوى
تحياتى ليكى
سلام
‏قال غير معرف…
صباح الورد ياقطقوطتنا العسل

عامله ايه ياجميله؟يارب تكوني بخير
عارفه ياقطه اللي بيعجبني في كتاباتك و مدونتك ايه؟انك متنوعه بتتكلمي و بتكتبي عن مختلف المواضيع
موضوعك الجديد بيلمس منطقه في شخصيتك في غايه الرقه والجمال
عارفه و انا بقري اللي كتبتيه سرحت في كل حاجه قولتيها لأني تقريبا بفكر بنفس الاسلوب عالم جديد متقبل لشتي الأفكار متعايش معاها عالم نقدر نحلم فيه و مانخافش من بكره نقدر نعيش فيه بأمان
ابدعتي كعادتك ياجميله
ربنا يوفقك دايما
كل الحب و التقدير ليكي ياقمرايه
‏قال غير معرف…
صحيت لك الصبح علشان اسمع البرنامج اللى هتتذاع فيه الدرر بتاعتك
من اول ما شوفت الاعلان اللى انتى عاملاه وانا قاعد اضرب اخماس فى اسداس واقول دى واحده لسانها بينقط جرابيع وتفافه واكياس زبالة هيتذاع لها ايه دى
لكن لما سمعت البوست وطريقة الالقاء نفسها الحق يقال
اشهدك لك بروعة قلمك فى كتابته
وعلشان متتنفخيش ويطق لك عرق من النفخة الكدابة
سبب نجاح البوست طريقة المذيع والمذيعه فى الالقاء
‏قال Desert cat
Founoon
ردك يوضح انك فهمتى قصدى تماما من البوست
ميرسى جدا ليكى
شرفتينى بزيارتك
‏قال Desert cat
دعوة للأمل
احساسك انتى اللى اجمل
علشان كدا حسيتى البوست بالشكل ده
تحياتى
‏قال Desert cat
واحد مفقوع منك
ولما انت مفقوع منى بتيجى هنا ليه
علشان تزيد فى فقعتك
اانا اعرف ان الشخص السادى هو اللى بيستلذ بعذاب الاخرين
انما اللى بيستلذ بعذاب نفسه ده يبقى اسمه ايه
كلام الهرتلة اللى فى الاخر ده مش حرد عليه
ياااااااى
سوفاااااااااج
‏قال Desert cat
Mohamed Hamdy
هى كلها حاجات حصلت وانتهت دى مجرد ذكريات علشان كدا حتلاقيها متفرقه يعنى شوية فى الكافيه وشوية فى التليفون وشوية تالته فى
اممممممم
مش مهم
المهم انك شرفت
تحياتى
‏قال Desert cat
zOzO
ميرسى اوى لذوقك
والف مبروك يا جميل مرة تانيه
تحياتى
‏قال Desert cat
سمراء
خلف اسوار الامل لان فى ايمان بوجود الامل فى الحياة ككل
البداية هروب وفى النهاية مشاعر جميلة لانها احداث تجمعت مع بعضها واتحدت فى كلمة ذكرى
تحياتى
‏قال Desert cat
سبهللة
ميرسى اوى لذوقك يا سبهلله
شرفتينى جدا
‏قال غير معرف…
دخلت لك باسمى اهوه يا قطة هانم
اصلك جاية فى جروب محمد البسيونى تقولى لى عرفتك وكانك جبتى الديب من ديله
وفيها ايه لما عرفتينى هتعملى لى ايه يعنى
وشوية ابسلوتلى وشوية سوفاج وسوهاج
هو انتى لسه كنتى بتاخدى درس وجاية تطبقيه عملى عليا
وبعدين المفروض انا بكتب رأى يعنى تردى عليا زى ما بكلمك
او مترديش خالص
‏قال Desert cat
WhItE HeArT
ميرسى جدا
دمت بالف خير
تحياتى
‏قال Desert cat
مواطن مصرى نايم
طبعا المفروض ان اغانى ماجدة الرومى لوحدها عالم تانى خاص منفرد بكل معانى الرقة والجمال
شرفت يا اسلام
تحياتى
قطتي الجميله وحشني كلامك الجميل وبوستاتك المطرقعه احيانا
المرة دي غير كل مرة
المرة دي فيه دعوة للامل موجوده في كلامك ولكن يغلب عليها الخوف
حسيت بيها خصوصا لما ذكرتي اغنيه ماجده اللي بعشقها

اقولك اسمعي كلامي ومتهربيش من الحب ............


اتاك حبا لا تملك فيه اختيار

حرت في وصفه ونفدت منك الاحبار

فإياك ثم اياك ان تحاول منه الفرار

أيا قلب لك الدنيا فانعم بها

ولا تبالي بكلام او ملام

دع النور يملأ جنبات قلبك

اما تعبت من الظلام..؟؟؟


لكي مني كل الحب
‏قال ابو احمد
جميله قوى ياقطه
لكن اسمحيلى بنقد صغير الجزء الأخير مقحم على النص اقحاما اسلوبك رائع تمنياتى بدوام التوفيق
قطة الصحراء

ازيك ياقطة وحشتنيي خالص اعذرينا عن عدم زيارتك الفترة اللي فاتت مشاء الله كل بوستاتك جميلة جدا والبوست دا رقيق اوي واختيارك لااغنية ماجدة الرومي احتاج اليك اختيار موفق بجد احساسك عالي جدا مشاء الله

تسلم ايديكي
‏قال tarek alghnam
ماشاء الله عليكى
استمتعت بما كتبنى
من مدة ونحن نفتقد الرومانسيه فى كتاباتنا وفى حياتنا احييكى
ودمتى متالقه
تحياتى لكى
‏قال Desert cat
عمرو (مواطن مصرى)

احيانا التباين فى المشاعر بيتفهم بشكل عكسى وبالتالى لابد من وجود مسحة من الغموض ... ولا اقصد مساحة لان كل لما زادت مساحة الغموض كلما تلاشى الحب داخلها

البوست كله وليد لتلك الاشارة
:)

رؤيتك صحيحه يا فندم فكلما كانت مياة الحب راكدة كلما فتر وقل عنفوانه حتى يصل الى الوهن

ميرسى جدا لردك
مودتى واحترامى
‏قال Desert cat
دعاء مواجهات
ميرسى جدا يا دعاء على كلماتك
شرفتينى جدا
تحياتى
‏قال Desert cat
مهيج الجماهير
ميرسى يا فندم
شرفت جدا
‏قال Desert cat
صديقتى الغالية اجندة
يا صباح الفل على عيون احلى بنوته فى الدنيا

انا الحمد لله يا جميل بخير طول ما انتى بخير

المدونة جميلة بوجودك فيها
انا معرفش ابقى على وتيرة واحده برضه التجديد مطلوب
:)
احيانا لما بقابل ناس عاقله عايزة تعيش حياة كريمة كويسة بدون اى ضغوط او خوف او ارهاب ... تعيش حياتها وافكارها هى بس دون تدخل اى اطراف تانية فى حياتهم ... بتمنى العقول دى تسود ... لكن بتفاجأ بوجود مختلين كل شغلتهم هى تحطيم المجاديف وقتل الافكار

شرفتي ونورتى البلوج يا جميله
دمتى بكل حب
‏قال Desert cat
واحد مفقوع منك
ههههههههههههههههههههه
وجاى على نفسك ليه يا جهاد وصاحى لى بدرى ... ده حتى نوم الظالم عبادة
كنت كملت على الاقل تتحرم من الدرر بتاعتى
فكرتنى بردك بالاستاذه منقبة سابقا لما دخلت تقولى قلعت النقاب علشان كلامك
وفى الاخر كانت بتدعى لى وبتدعى عليا
انت دلوقتى بتقولى اشهد لك بروعه قلمك ورجعت قولتى علشان مش تتنفخى على اساس ان سيادتك منفاخ يعنى

طبعا مقدرش انكر روعه اداء استاذ صلاح حجازى والاستاذه عبير صبرى
وطبعا ده شرف كبير ليا انهم يذيعوا كتاباتى
‏قال Desert cat
Gehad
بص يا جهاد قولت لك اعتقد الف مرة لما تحب توجه لى كلام احفظ ادبك شوية فى الكلام
واللى خلانى اقولك انا عرفتك عند البسيونى انك كنت لسه كاتب نفس الكلام هنا فى المدونة بغير معروف وبعدها باقل من نص ساعه لاقيتك كاتبه هناك باسمك فحبيت اعرفك انك كشفت نفسك يعنى يا اما تدخل على طول بغير معروف ياما مش تقول كلام انت مش اده
انما اعملك ايه انا اكبر من انى اعمل لحد حاجه او احط حد فى دماغى احسسه باهتمام لدرجة انى اعمله يعنى
لما تكون مش عايز حد يرد عليك متبقاش تتكلم انت عند حد تانى
نكتفى بهذا القدر
وقتك خلص
‏قال Desert cat
حبيبـــــــة القمـــــر
ايه ده اميرة الرومانسية عندنا
يا مرحبا يا مرحبا
والله يا حبيبتى انا مش بهرب ولا قاصده اهرب
بس هو لو خدتى بالك من
Lebal
حتلاقيه كان مجرد ذكرى

ميرسى جدا على كلماتك الرقيقه واحساسك الجميل
دمتى بالف حب
:)
‏قال Desert cat
العزيز ابو احمد
اولا سعيدة جدا بتشريف حضرتك المدونة
ثانيا النص كله معمول علشان الجزء المقحم فيه ده
انا عارفه انا طولت فيه شوية لدرجة ان فى حد قالى على الماسنجر انا كنت بقرى وانا فى قمة اندماجى وفجأة خرجت عن النص منك لله يا شيخه
:)
شرفتنى جدا
تحياتى
‏قال Desert cat
بنات صاحبة الجلالة
انا الحمد لله بخير يا جميل
والله انتى اللى وحشتينى جدا
وبعدين انا طبعا عارفه اللى فيها يعنى لازم التمس لك الف عذر مش عذر واحد
:)
دمتى بكل خير
‏قال Desert cat
استاذ طارق الغنام
سعيدة جدا ان البوست نال اعجابك
دمت بكل خير
‏قال Unknown
اتاخرت عليكى لظروف الكمبيوتر القهرية بس فى الاخر لقيت بوست حلو وتحفة الله ينور
‏قال Desert cat
enjy
مش اتاخرتى ولا حاجه تشرفى فى اى وقت
وحمد الله على سلامة الكمبيوتر
ربنا يجعلها اخر الاعطال
تحياتى
‏قال Blue Nile
جميل اوييييييييي
احساسك جميل و مشاعر رقيقة بجد
عجبني اسلوبك جدا
تحياتي ليكي وارجو التواصل دائما
‏قال Misrdream
اكتر حاجه شدتني عنوان البوست
"خلـــف أســـوار الأمـــــل"
اخدتني صورتك عن الامل على انه قلعه وليها اسوار بتمنع الامل انه يختلط بذكريات حيتنا واحدثها اى كانت نرجع للقلعه دي وقت ما نحب علشان نعيش باملنا من تانى
اروع ما كتبتي وشوفته هنا
تقبلي تحياتي
‏قال فى القلب
الحنين الحنين لكم يقتلنا الحنين

مودتى وأعتذاذى برومانسيتك
‏قال غير معرف…
Desert Cat

ربنا يخليكوا لبعض .. ليس أجمل من بنت وولد متحابان فى هذه الدنيا

هنا النور ..والفجر .. والحياة .. وحب كل شئ ..

وفوقهم حب الله .. وحمده على هذه النعمة
‏قال أسماء علي
عارفة معنى غن يبقى الإحساس والأسلوب وكل حاجة خلتني احس شعور مختلف

حتى أسلوب تفكيرك

رائع

ليكي أسلوب مُختلف وخاص بيكي بس

صباحك سكر يا قطتي

ااااااااه صحيح

ليكي واجب عندي تعالي خوديه

النص كان هينسيني

دمتِ قوية وجميلة
‏قال momken
ياه ه ه
حوار ده ولا جوله فكريه فى حلبه صراعات الدنيا
حلوة اوى اوى
وجميل تناغم افكار ابطال قصتك القصيره جدا
ماجده الرومى...دى ست الدنيا
وصوتها هو صوت الحياه
انا المبادىء فى تتغير
ولكن ما يتغير هوة مدى استعابنا لهذه الثوابت والمبادىء

الموضوع طبعا عجبنى كالعاده
تحياتى
احبك وبعد
تلك هى التقاليد التى تقيدنا

===========
عارفة احساسك حلو جدا
وشكرا على زيارتك ليا
‏قال Desert cat
Blue Nile
اشكرك جدا على كلماتك الجميلة
واسعدنى ردك فى مدونتى
احترامى وتقديرى
‏قال Unknown
بوست جيد تهنئتى لك
وفعلا الاسلام مابيتغيرش لكن الناس فى كل عصر بتعمل لها اختراع وتلصقة فى الدين علشان العوام من الناس والدراويش ينساقو حولة وعشان كدة انتشر الحجاب والمصيبة الكبرى الاخرى اللى اسمها النقاب بعد ان ساد مصر فى الستينات والسبعينات التحرر فكانت الردة فى عصرنا الحالى تبعا لافكار مجموعة من الجهلة والمتعصبين
‏قال Desert cat
Misrdream
مش مهم يا احمد ان الامل خلف اسوار مهما كان علوها او ارتفاعها
المهم ان موجود بصيص من امل لتستمر الحياة
تحياتى
‏قال Desert cat
فى القلب
حمد الله على السلامة
الحنين + الشوق = احتياج
دمتى بود
‏قال Desert cat
Sherif
عزيزى شريف
الحب احساس جميل ورائع
ويكفى لهفه اللقاء
ولكن الاهم من الحب هو الحفاظ عليه من اى شائبه وكيف يقوى
دمت بالف خير
احترامى وتقديرى
‏قال Desert cat
د\أسماء علي
يا صباح الفل على احلى دكتورة فى الدنيا
ميرسى اوى على كلماتك الجميله
واللى حقيقى اسعدتنى جدا
وجايه حاااالا اشوف الواجب
:)
محبتى يا قمرايه
‏قال Desert cat
momken
يا الف اهلا وسهلا بحضرتك
فعلا المبادئ لا تتغير ولا تتجزأ
ولكن الافكار هى التى تتغير وليس افكار كل الناس كى لا اضع البيض كله فى سله واحده
بدليل ان فى ناس بتموت فى سبيل الدفاع عن افكارها ومبادئها ايضا
اشكرك جدا
مودتى
‏قال Desert cat
fire bird
ميرسى جدا يا جميل
وربنا يديم التواصل بينا ان شاء الله
تحياتى
‏قال Desert cat
MEDUS
اولا شرفت مدونتى جدا
ثانيا يا عزيزى هؤلاء منساقون
بمعنى انهم مثل الحمار يحمل اسفارا
يجلسون امام القنوات الفضائية السلفيه السفلية
فاتحين افواهمم قافلين عقولهم باقفال حديد صدئه لانهم رموا المفتاح عند اول شيخ بجبه وقفطان قاعد يرهبهم من الثعبان الاقرع
وكل شيئ فى هذه الحياة حرام حرام حرام
وكان الله خالقنا حرام والعياذ بالله
اتمنى بزوغ اول شعاع للضوء قريبا
مودتى واحترامى
‏قال قلوب بتغنى
قطتى الجميله
وحشتينى جدا
خلاص من هنا ورايح بقى فيه نت وزيارات بنظام
ايه كل الاحاسيس الجميله دى
ايه الحب النقى ده
بس ليه ضايعه يارب يهدى نفسك ويحقق الى فنفسك
تحياتى
‏قال Desert cat
قلوب بتغنى
انا اول ما شوفت اسمك مش صدقت نفسى ايه الغيبة الطويلة اوى دى
وحشانى
وحشانى
وحشانى
حمد الله على سلامتك
وسلامة النت
:)
نورتينى يا جميله
السلام عليكم ورحمة الله وبركاته
دى اول زياره لمدونته
جميله جدا
بوست مميز وكلماته عذبه رقيقه تهز القبل وتؤثر فى الوجدان

تحياتى

المشاركات الشائعة