من الثانـــوية للكليــة .. على الشارع حدف


أولاً وقبل اى حاجه ألف مبروك لكل الناجحين النهاردة فى شهادة الثانوية العامة
سواء مدونين او ابناء مدونين او قرايب مدونين او جيران مدونين او محدش من اللى مش يعرفهم المدونين خالص بتاتا نوهائى
باركنا والحمد لله نيجى للكلمتين اللى واقفين فى زورى وداخله علشان اقولهم
طول ايام الامتحانات عمال اسمع عياط وصريخ وناس بتنتحر ومراقبين عربياتهم بتتكسر ومدارس بتدمر
والامتحان فوق مستوى الطالب الممتاز مش الشاطر وبس
والامتحان من خارج المنهج
واللى حاطط الامتحان راجل عقد وابن ستين فى سبعين
طيب يا جماعه انا النهارده طلعت نتيجة الثانوية عندى فى النت كافيه
مش عايزة قر قل أعوذ برب الفلق
ما علينا مش دى قضيتنا
اقل مجموع طلع ما شاء الله اللهم مالا حسد كان 87 % ده اقل مجموع
والله فى ناس جايت 98% وبرضه كانت ماشية تعيط هى العيال دى اييييييييييه جاية تغيظنى مستقصدانى
انا كنت عايزة اقوم ادى الواد اللى جاب 98% وقاعد يعيط ده جوز قلام
الناس قعدت تهديه وده ابدا انا اتظلمت ده مش مجموعى ... حد يشيل الواد ده من هنا احسن اقوم له .. طبعا ده يبقى انا اكيد
من المواقف المؤثرة جدة جاية تشوف نتيجة حفيدها
والناس فوق دماغى ما شاء الله الله اكبر عارف كدا لما تكون قاعد موطى على كيبورد لمدة نص ساعه مثلا وفجأة ترفع راسك تلاقى ضلمه .. مش ضلمة النور مقطوع .. ضلمة فى روس كتير كدا فوقك وانت مش مميز اللى فى مواجهتك مباشرة ده عين ولا مناخير ولا رجل حتى ... المهم لما طلعت للجدة دى نتيجة حفيدها كان جايب 91.5 % وموصرة لازم تبوسنى ... والناس يقولوا لها بعدين يا حاجه ابقى تعالى بعدين وهى تقول والله ما انا ماشية غير لما ابوسك ... وانا قاعدة فرحانة فيها تبقى جدعه لو قدرتى توصلى لى ... مش عرفت توصل لى قولت لها ابقى تعالى بكره بوسنى واحضنينى براحتك ... ومش رضيت تمشى ولن تتنازل غير لما تبوسنى والله
ونولتها غرضها وجت اخدتنى حضن جامد كله حنية وباستنى ....
موقف اخر جميل جمال مالوش مثال
احمد بيطلع النتيجة لواحدة ست برضه مش عارفه انا ايه موضوع الستات ده .. مش حد يفهم غلط مش طلبت تبوسه ... المهم بنتها جابت مادتين ... بانفعال شديد .. راحت بتقوله ربنا ينتقم منك دى يتيمه ... طبعا احمد قعد مبرق من رد الفعل ومش نطق .. وانا قاعدة شاورت لها تعالى هنا .. هو ماله بتشتميه كدا ليه ... مش بنتك اللى بتلف طول السنة ومش بتذاكر ... يعنى انتوا تهملوا فى عيالكو وتيجو تشتمونا احنا .... لاقيتها بتقولى حقكوا عليا كلكوا والله بس غصب عنى وقعدت تحكى لى مصاريف الدروس وانا بعد ما قالت حقكوا عليا كدا استريحت واخدت نفس عميق ودول الموقفين اللى حصلوا يعتبروا من نوادر النتيجة ... اما بقى مشاعر الاهالى بنجاح اولادهم طبعا شيئ لا يوصف .. وعلشان لا يوصف فانا من الطبيعى مش هوصفه .... وهسيبكو تتخيلوا
قولت الكلمتين اللى كانو واقفين فى زورى مشاعر النتيجة والفرح والزعل ولحظات الهلع اللى كانت بتنتابنى والله اول ما كنت ادخل رقم الجلوس كان قلبى يقف ... واول ما اشوف الدرجات هييييييييييييييه اعمل فرح مبروك يا جدعان والله وعملوها الرجالة ... وكل سنة والجميع فى نجاح بس والنبى بلاش حوارات كل سنة فى الامتحانات والعياط والامتحان مش عارفه ماله احسن بيجيب لى استبحس علشان فى النهاية النتيجة بتكون كويسة ... يلا تصبحوا على خير لازم اروح انام منمتش من يجى اد ايه لاء كتيييييييييير
تصبحو على خير

Comments

mohamed hesham said…
موال كل سنة ... اثانوية العامة ... كلاكيت للمرة المليون ...

مبروك للجميع ...

والسـ ختام ــلام
سمراء said…
زمان وضع الثانوية العامة كان اصعب كثير من دلوقت
كان تحديد مصير اما ان يبقي معاك شهادة قمة او معاك شهادة قاع
اما دلوقت فالجامعات الخاصة بقت بدتي الطالب واهلة الشهادة اللي هم عيزنها
اللي بيزعل هم الغلابة اللي ميقدروش يدخلوا الجامعات الخاصة

انا ماسكة الخشب وربنا يبارك لك
سمراء
Hook said…
الناس مش عارفة ان لما الامتحانات تصعب بتصعب على الكل...عندهم اعتقاد ان الواحد بيتنافس مع الدرجة النهائية مش مع الطلبة التانيين اللي هياخدو مكان في الكليات...
كنتي سيبيها تبوسك يافوزيه
ههههههههههه
موضوعك زي العسل ياقطتنا

يوم نتيجه الثانويه العامه ده و لا يوم الحشر الناس امم امم وياصابت ياخابت
عارفه انا خوفت عليكي و انتي بتردي علي الوليه اللي دعت علي احمد انتي عارفه دول متهورين ياقمر و دي ثانويه عامه مش لعب

انتي عارفه ياقمرايه اللي بيجيب 99 في الميه و بيكون متشحتف من العياط متشحتف ليه؟عشان ياولداه ممكن مايعرفش يخش اي كليه من كليات القمه فمتضايق
ربنا ينجح كل الطلبه في الثانويه العامه و الجامعات و غيرها و احب اسمع اغنيه الناجح يرفع ايده
:)

ربنا يكون في عونك ياقمر
نامي كويس بقه و ارجعلنا بسلامه
تحياتي ليكي ياعسل
Misrdream said…
انا اعصابي اتدمرت وانا بجيب نتيجة الثانويه امبارح فعلا عذاب
الساعه 12.43
رقم قياسي جديد يضاف لانجازاتي فى الحصول على النتيجه
;pppp
بجد انا موت ضحك من موقف الست اللى بتقول لصاحبنا ربنا ينتقم منك دي يتيمه فعلا الناس ربنا يلطف بيها
اقعدوا بالعافيه
Migo Mishmish said…
صباح الخير يا قطوطة
جميل قوي ان الواحد يكون سبب وصول خبر حلو للناس. يا بختك يا ستي بالبوسة . بوسه زي ديه ادفع فيها اي تمن لانها صادقه وطعمها اكيد جنان علشان خارجه من قلب فرحان
ان شالله دايماً تكوني سبب فرح للكل
ولبتوع الثانوية العامة بقول "السجن للجدعان يا معلمين وكفارة وربنا ما يعودها تاني"
love,
MishMish
WhItE HeArT said…
مش عارف اول تعليق وله لا

لو اول تعليق يبأه عايز حلاوة النجاح

احم

قصدي اول تعليق


بجد شعور جميل انك تجيبي النتيجه للناس الحمد لله ان ربنا حرمني منه علشان كنت بتشل

والناس يقعدو يقولوا للواحد ماتخلص ياعم انته بتحضر عفريت ال يعني الموضوع بمزاجي

اما بالنسبه للامتحانات والامتحان صعب ومش عارف ايه ده استهبال بجد ده اقل مايقال عنه


وربنا يكون في عونك من الست اللي عايزة تبوسك دي

الا صحيح ابنها علمي وله ادبي

اصل لو علمي كانت المفروض تضربك مش تبوسك

تحياتي
ايه يا قطه
صباح الصدمات
ههههههههه
ناجحين ايه بس
دى النتايج زفت
و الله بجد قليل اوى اللى لقيت نتيجتة حلوة
و كده كده من طب لحقوق يا قلبى لا تحزن
بجد ربنا عالظالم
تجارة اسكندرية السنة اللى فاتت
واخده من
92.8
علمى
يعنى موووووووووووووز
مووووووووووووز
مووووووووووووووز
بوست جامد يا قطه
تحياتى
اسلام
Desert cat said…
mohamed hesham
اه والله نفس السيناريو لما الواحد حفظ
علشان كدا مكنتش متعاطفة مع العيال اللى بتطلع تعيط
تحياتى
Desert cat said…
سمراء
وعلشان كدا العيال مقضياها استهبال طول السنة ولما تتكلمى معاهم يقولوا لك ماهو بابا هيدخلنى جامعه خاصة علشان اطلع دكتور زيه
وفى الامتحان تساليهم عملتو ايه تلاقيهم الدمعتين نزلوا ويوقولوا لك الامتحان مش من المنهج
تحياتى
Desert cat said…
Hook
اصلا الملاحظ ان اللى بيعمل الشد العصبى ده كله اهالى الطلبة يعنى تلاقى الواحد فيهم عامل محموء المليجى والواد ولا فى باله نجح مش نجح جاب درجه مش جاب هو يعنى اخره هيعمل ايه هيحصل اصحابه وجيرانة وحبايبة اللى اتخرجوا وكل واحد حجز له موقع استراتيجى فى القهوة اللى على ناصية الشارع
يعنى مكان قريب من البوفيه فى مواجهة التى فى وفى نفس الوقت بيطل على الشارع علشان يشوف الناس كويس وخصوصا خصوصا البنات الطف الكائنات
تحياتى
Desert cat said…
اجندا حمرا
صديقتى الجميلة اجندة
اخبارك ايه
يارب تكونى بخير
ما انا فى الاخر خليتها تبوسنى يا ست الدكتورة وكانت بوستها بركة والله اصلها لما حضنتنى كنت حاسه انى هنام هنام يعنى واحدة مش نامت بقالها يومين وتقريبا دخلت فى التالت مستنية منها ايه
اللى جاب 98 وقعد يعيط ده انا اصلا مكنتش متخيلة النتيجة تكون كدا خالص ولا حتى يجيبوا 70 لان البلبلة كانت كتير اوى ايام الامتحانات لكن عدت على خير
وكل سنة والناس ناجحين واللى متخرجين فى الشارع مآنسين ومشرفين
نورتينى يا جميلة
محبتى
Desert cat said…
Misrdream
كنت بتجيب النتيجة لمين يا احمد
اعتقد ان جميع الاهل والصحاب والاحباب بخير وربنا شفاهم وعفاهم وعدوا من المرحلة دى واللى بقى دكتور واللى اشتغل فى النيابة الادارية واللى ساب لنا الدنيا وهج على الكويت وقاعد يجيب نتيجة مش عارفين مين الساعه 12.43 دقيقة مش عارفه انا ايه الدفة دى بالظبط
اعترف الانكار مش حيفيدك
Desert cat said…
Migo Mishmish
صباح الفل يا مشموشة
انا كنت سعيدة باصرارها انها لازم تبوسنى دى عاشت لما شافت حفيدها اخد الثانوية ياناس والله كمان ست زى العسل هما بتوع الزقازيق دول ناس كلهم عسل كدا
ربنا يوفق الجميع
تحياتى يا جميله
Desert cat said…
WhItE HeArT
نعتبره اول تعليق ايدك على شكولاتيه كادبورى
مش انت الاول بقى
اااااااااه
كله كوم وموضوع ما تخلص ده كوم والناس اصلا حابسه انفاسك
نظام انك هتمد ايدك تسحب النتيجة
هو موقع الوزارة عمل الواجب فى الاول طبعا كان بيطلع الرقم بعد عذاب ووقع
ولما وقع نمره واحد نزلها وكان سريع جدا على فكرة ابقى استخدمه بعد كدا
ده اعلان للموقع غير مدفوع الاجر
تحياتى
Desert cat said…
مواطن مصرى نايم
ايه ده يا اسلام النتايج فى اسكندرية زفت
ياااااااااى
وجاى تقولها فى مدونة موجودة فى محافظة كل اللى فيها متفوقين وجهابذة وعلماء ومبدعين دول بيألفوا كتب ومن وهما فى إعدادى يابنى بتتكلم فى ايه بس
انا كان قصدى يا اسلام ان النتيجة غير المتوقع من اللى كنا بنسمعه فى ايام الامتحانات
نظام الامتحان من خارج المنهج وفوق مستوى الشبهات قصدى الطلاب
والكلام الخزعبلى ده كله
تحياتى
M@RV3L said…
هي هي الثانوية العامة..ناس تفرح وناس تزعل..بس برضه بتبقى حلوة او بمعنى اصح مسلية

عاملة زي ماتشات الكورة
:)))
Desert cat said…
M@RV3L
وفقت فى التشبيه يا مارفل
:)
تحياتى
النتايج عندنا مش قد كده عينى عليكوا بارده ده طبعا مش قر لالا ده حقد بس انتى عارفه بس بجد مبروك للجميع وربنا معاهم ويدخلو الكليه ميقولش ده احنا هنرتاح اسمعو منى عشان تعدو الثانويه دى اسهل مذكره واحلى ايام
وبعد الكليه يقعدو جنبنا الطابور مستنيهم انا بهزر بس
وش بيضحك
تحياتى
Anonymous said…
هاهاهااهااههه
والله معاكى حق يا قطه الصحرا

المشكله كمان ان فى غباء جمعى ان المهم المجموع ومش مهم التنسيق ولما المتحانات بتبقى صعبه التنسيق بيقل لكن الناس اتعودت تصوت
بغض النظر ايه الهدف او النتيجه
تحياتى العميقه
ماجد
المفروض اللى يجيب 92.8 % و يدخل كلية تجارة, لازم يتخرج منها وزير اقتصاد, و اللى يجيب 99% و ما فوق و يدخل كلية طب لازم يتخرج مجدى يعقوب مش بس دكتور عادى, أصل احنا بلد عباقرة بس يا خسارة عباقرة على الأرصفة و القهاوى
دروس خصوصية و جامعات خصوصية و مدارس خصوصية , و بعد ده كله عواطلية, بس عباقرة و الله العظيم عباقرة بنصرف على تعليم أولادنا دم قلبنا علشان يكبروا و يقعدوا جنبنا

تحياتى و تقديرى
قرفان من القطط said…
الى عفريته الصحراء
ياترى انتى معاكى ثانويه ولا ابتدائيه ولا الحكايه مهلبيه
ماتردى جاتك رزيه
وكل مره من ده
حتى لو مش هتنشرى بس غصب عنك هاتقريه
وباذن الله هتوصلى انتى واللى معاكى الى درجه الاختناق لدرجه انك مش هتعرفى تعملى زى الناس
ولا تلاقيكى بتعملى زى القطط
مش انتى قطه
ولا بومه
ولا حدايه
ولا عفريته
اكيد مش هاتخرجى عن حاجه من دول
اهداء من اللى هينغص عليكى مدونتك
Desert cat said…
ماء تشرين
انا اصلا مش كنت متخيلة حد ينجح اساسا لان ايام الامتحانات كان شد اعصاب للجميع حتى اللى مش بيته حد ثانوية عامة من اللى الناس كانت بتعمله اعصابه تعبت
لكن النتيجة كانت كويسة يعنى غير المتوقع تماما
ربنا يوفق الجميع
Desert cat said…
Anonymous
الناس فى ايام الامتحانات بتكون عايزة حاجه من الاتنين اما المراقبين ييدخلوا اولادهم بالكتب و ينقلوا منها او المصحيين يدوهم الدرجات النهائية وكان الدروس الخصوصية هى الشفيع ليهم
تحياتى ماجد
Desert cat said…
Capt. Haytham Harfoush
المشكلة يا كابتن هيثم ان الناس عارفه النهاية الحتمية
بعد ما يحرموا نفسهم من الاكل والشرب علشان يدفعوا فلوس المدرسين
حيتخرجوا يقعدوا على القهواى بس بشهادة جامعية
احترامى وتقديرى
Desert cat said…
قرفان من القطط
ميرسى جدا جدا على زوقك وادبك
وياريت تشكر لى والديك جدا انهم خرجوا للمجتمع فرد زيك بالسفالة دى
dr.lecter said…
والله المصرييين دول صعبانين عليا بجد بيتحرق دمهعم علشان ثانويه عامه وكليات قمه وفي الالخر النتيجه؟ هتطلع دكتور هتاخد 200 جنيه تشحت بيهم اخر الشهر هتطلع مهندس مافيش شغل اصلا

للاسف رغم ان الحقيقه باينه زي الشمس

الثانويه العامه هي سبب معظم امراض الشعب ومعاناته ورغم كده الناس برده بتجري وراها زي ماتكون الجنه يعني
nonni said…
عاوزة اققولك ان انتى سبب المجاميع الحلوة دى وشك حلو اووووووووى على الناس اللى جبتلهم النتيجةعاوزة اققولك انا عمرى ما بحب اجيب نتيجة لحد من على النت و يوم ما عملتها يادوبك طلعت نتيجة تلات بنات و التلات شالوا مواد.ههههههههههههههه
من يومها مككررتهاش
"تحياتى"
Desert cat said…
dr.lecter
لا يا دكتور
هيتخرج دكتور هياخد 251 جنيه فى اخر الشهر
خليك دقيق شوية
يعنى واحد يقعد يمقق عنيه فى المذاكرة حوالى عشرين سنة ومصاريف وروس وحرقه دم وفى الاخر يقبض المرتب المهول ده
لنا الله
تحياتى
Desert cat said…
nonni
الـ 3 شايلين مواد ده ايه الجمال ده ورد لفعل كان ايه
يعنى عدت على خير
ميرسى اوى لذوقك يا جميل
تحياتى
Zika said…
:D:D
بصي هو بالنسبه لموضوع النتايج ده انا شايف ان المجاميع ضايعه خالص
انا شايف الناس كلها ماشيه في الشارع علي وشها مرسوم واحد ماسك عصايا وجاهز انه يضرب اي حد يقف قدامه
اما بالنبه لموضوع الواد اللي جايب 98 وبيعيط ده انا لو كنت مكانك كنت ضربته القلمين فعلا
ال بيعيط ال
وهو في حد يجيب 98 اصلا
اللهم لا حسد يعني
العيال دي بتشلني
ياللا ربنا يديم الامتحانات
وانتي من اهل الخير
:D
Desert cat said…
Zika
هو انت ممكن تلاقى النقيضين
يعنى اللى ناجح جايب مجموع مش بطال
واللى ساقط ساقط بزمة
يعنى 4 او 5 مواد كدا
بالنسبة للى جايب 98 % ده
فربنا معاه بقى
اهو يوم وخلص
تحياتى
shasha said…
قطة الصحراء اول مرة ازور مدونتك وقريت كام بوست بس الحقيقة عجبنى جدا اسلوبك الساخر عموما الثانوية العامة بقيت مهذلة تحياتى ليكى ومدونة ممتازة

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز