مش مهم المؤهل

مش مهم انت مؤهلك الدراسى ايه ؟؟؟
مش مهم كفائتك ؟؟؟
مش مهم عدد سنوات خبرتك كام ؟؟؟
المهم انك عندك واااااااااااااااااااااااااااااو
الواسطة .....هى المؤهل الأساسي لشغل اى وظيفة
تحولت هذه الظاهرة السيئة إلى عادة و مرض اجتماعي انتشر في مجتمعنا
بل انها اصبحت عائق كبير امام كل صاحب كفائه وخبرة .... اصبح كارت التوصية هو جواز المرور لاى مكان لك واااااو فيه
عندك وااااو .. تقدر تتجاوز النظام والقوانين وتحقق مصالحك الشخصية اللى بالطبع بتكون على حساب الغير .. تتعين فى مكان اكبر حاجه بتعملها انك بتوقع حضور وانصراف ولو مش جيت مش مهم المهم انك ابن اخت المدير او حد من عيلته وده لوحده كفاية اوى ... فى الوقت نفسه فى غيرك كفء يستحق المكان ده وهيعمل شيئ اجابى فى المجتمع لكن معندهوش كارت توصية ولا حد قريبه فى منصب مرموق يعينه فيه وفى الحالة دى القهوة اولى بيه ...
بسبب الواو اتلغت الكفائه واتلغى النظام واتلغى الالتزام وحل مكانهم
الاتكالية و الجهل و انعدام المبادئ والقيم و انعدام الانتماء والوطنية و انعدام العدل والمساواة و الانانية و انعدام الأخلاق
وتنتشر الواو فى المجتمع من حوالينا بصور مختلفة وفى الادارات الحكومية والخاصة ... لو ليك ورقة عايزها تخلص يبقى عليك بالواسطة لو عايز تتعين او طالب ترقيه يبقى مفيش غيرها الواسطة ... لو بتشتغل فى مكان مش عاجبك وعايز تتنقل فى مكان تانى ما خلاص عرفنا الحل السحرى هو الواسطة .... حتى فى المتشفيات لو عندك مريض وعايز حد يتابعه لازم واسطة ... ياترى مين السبب الاساسى فى انتشار الواسطة والرشوة ... طيب هو مش ينفع نعالج نفسنا ولا فى دى كمان لازم واسطة ؟؟!!
***********************************************************
سؤال جديد على مدونة برنامج انت تسال والكمبيوتر يجيب
الذى يذاع يوميا الساعه 9.10 صباحاً على اذاعه البرنامج العام ما عدا يوم الجمعه والسؤال هو
كلنا نعرف ان الشغل الشاغل لصناع الكمبيوتر هو مايحدث للميكروبروسيسور من سخونه وتستحدم المراوح لتبريده ولكن شركة.... آى بى إم .... توصلت الى حل آخر جديد للتبريد ...اختار واحد من ثلاثه اشعة الليزر غاز الفريون المستخدم فى الثلاجات الماء مستنياكو هناك فى انتظار اراء الجميع

تعليقات

اه يااااني حنقول ايه بس
‏قال Mafrousa
لأ مش ينفع يا قطقوطه لاااازم واسطه
و مش ينفع تحلى أي مشكله
لاااازم واسطه
احنا مش بقينا بلد شهدات
احنا بقينا بلد وسااااايط
السلام عليكم
...........
حتى العيش بقى بالوسطة !

تحياتى
‏قال غير معرف…


انا خايف بعد كدا اللي معاه واسطه
يروح يثبت انه ينت مش ولد عشان ميدخلش الجيش


‏قال nody
ايه ياقطه
اغيب شهر الامتحانات ارجع الاقيكى بتكلمى فى كلام غريب
واسطه ايه الى انتى بتكلمى عنها
دى الهرم الرابع فى مصر
فى واسطه فى مصر
مافيش واسطه مافيش مصر
‏قال محمد صالح
عزيزتى الجميله
انا والله لسانى دلدل من كتر الكلام فى الموضوع دا ان بلدنا دى مبتمشيش غير لما حد يزق لك الموضوع بتاعك ودا تعبير غير مباشر عن معنى كلمة وسطااا فى الكوره وسطه حتى لو مش بتعرف تلعب كوره مش مهم الهم انك تكون تبع حد يعرفه المدرب فى الاكل فى المياه فى اى مصلحه حتى انك تشتغل فى جريده بالوسطاء فين وفين لما تلاقى حد بيشجع الشباب بجد
وانا عارف السبب فى انتشار الوسطاء
ان مفيش التعبير اللى بتقال دايما
شــفـــافــيــه
وان كل واحد بيجرى وراء مصلحه الاول
نفسى ثم نفسى ثم الاخرين
كل بيفضل نفسه عن البلد ويتحرق الاخرين
تحياتى
‏قال Unknown
والنبى يا قطة معندكيش كارت توصية كدة لدكتور كويس يمكن يعالجنا من الواسطة
‏قال Unknown
زى ما قالوا فى المثل الوسطة بسطة وهى بسطة فعلا للى بيستخدمها ودلوقتى ناقص نسمى اولادنا وسطة عشان يعدوا فى أى حاجة
تحياتى
‏قال R-H-S
اعوذ بالله من دى كله

انا قريت في كتاب البحث عن الذات بتاع انور السادات انهم كانوا بيندهوا الواحد في الحربيه بالواسطه بتاعته
فلان بن فلان والواسطه بتاعته فلان
هكذا يعني

يبقي احنا عندنا الناس اتلموا شويه وبقت في الخباثه

الواسطه بقت حاجه اساسيه في البلد
لو مش عندك واسطه ممكن دلوقتي تشتري واسطه

تحياتي
‏قال بنوته مصرية
فعلا عندك حق كل شئ بقي بلوسطه


حتي تخليص الاوراق علشان تروحي تخلصي ورق لازم يكون معاكي يا كارت او تعرفي حد في المصلحه او تدفعي رشوه

تسلم ايدك يا قطيتي
‏قال blue-wave
يا بنتى انتى ليه ضد التقدم؟ العالم دلوقت )
بيستخدم (الوسائط المتعددة
مشكله مالهاش حل وهاتخرب بيت البلد انشاء الله
تحياتى
اتاثرت جدا بكلامك الواسطة والمحسوبية والرشوه والتوريث وتفتيح المخ والتظبيط والتصرفات الغريبه على مجتمعنا ودينا كلها مرفوضه اولها فساد واخرها هلاك
جزاكى الله كل خير على كل كلمة وكل حرف
بالتوفيق يارب دايما
‏قال ادم المصرى
والله انا بدعى ربنا يفك اسر الحصار الرئاسى الى عملو الى ميتسماش والناس دى ربنا يهديهم ويحولو يصححو الى خربوه اتمنالك المزيد

على فكره انا نزلت الجزاء التالت من اميره بكل النساء يارب يعجبك
‏قال Asmaa mahaba
و=كوسه=قرع=واحد عاوز ياخد حق غيره
تحياتى ليكى سومه_87
‏قال RaRa
مساء الخير

والله معاكى حق دلوقتى اى حاجة بقت بالوسطة ولو مفيش وسايط يبقى مفيش شغل ربنا يتولنا برحمته

تقبلى مرورى
‏قال Unknown
متهيألى من كتر وجود الكوسة فى حياتنا
هنحتاجها فى علاج نفسنا
مهو الدواء لا يأتى الا من الداء
‏قال """""
مشكلة الوسايط دى مشكله بجد
جميل الموضوع اللى اتكلمتى فيه
انا عجبتنى مدونتك
جميله فعلا
وحلو اوى المثل بتاع رب قطه خير من الف اسد
‏قال rovy
السلام عليكم
ازيك يا قطه ..
الحقيقه الواوووو اللى بتقولى عليه ده هو المصيبه الكبرى فى مجتمعنا وهو السبب الرئيسى لكل المشاكل بعد كده من اول التعليم و الدروس الخصوصيه اللى بتكون وسطة التلميذ للنجاح ولغاية التوظيف و كل حاجه بقى تتخيليها ..
حتى الموظفين مش متعودين يتعبوا لوجه الله ولا علشان ده حقك عليهم لا لا
المهم وسطتك ايه ..
يااارب يجى اليوم اللى كل واحد يعامل فيه ربنا ويحكم ضميره فى معاملة وتخليص مصالح الناس ..
دمتى بخير
خالص تقديرى وتحياتى
rovy
‏قال شـمو نشـادر
كارثه ..
طول ما فى واسطه ومحسوبيه فى البلد ى عمرها ما هتنفع ابدا ..
تحياتى ..
أسامة أمين
‏قال غير معرف…
قطتنا العسل

صباح الفل ياجميله

تخيلي ياقطه اني كنت مفكره ان الواسطه دي بس عندنا طلعت موجوده برضه في بلاد بره
اصل خالي كان لسه راجع من امريكا و في وسط كلامه معايا بيقولي علي الجامعات هناك و شغل من تحت الترابيزه قلتله هناك كمان قاللي اه
الظاهر انها بقت ظاهره عالميه زي ارتفاع الأسعار

للأسف وجوده فئات غير مؤهله لا علميا و لا عمليا و كل مؤهلاتها ان واسطتها جامده ده كله بيؤدي لأنهيار في مستوي تقديم اي خدمه
زي قبل كده واحد زميلي كان بيحكيلي انه دخل امتحان الشفوي عند دكتور و جاوب كويس و بعد كده اتفاجأ ان الدكتور مادالوش النمره النهائيه في الشفوي مع انه جاوب علي كل حاجه صح زي ماقاله الأستاذ المهم واحد تاني معاه مادخلش الامتحان اصلا و خد الدرجه النهائيه و تفوت السنين و يقابل زميلي الدكتور ده في عمره و سأله عن الموقف ده فرد بكل برود و قاله اصل الولد ده ابن استاذ زميلنا وفيه بروتوكول متبع ان ولاد الأساتذه لازم ياخده الفوول مارك حتي و لو ماحضروش شوفتي المهزله

:(

موضوع مميز ياقطتنا
تحياتي و محبتي ليكي ياقمرايه
‏قال سنووايت
حلوة مش ينفع نعالج نفسنا ولا في دي كمان واسطة
ههههههه
السبب الانانية اللي بقينا فيها ومصلحتك اولا الشعار اللي كل الناس دلوقتي بتطبقه
مش مهم المؤهل المهم انت ابن مين
كل شيء بقي بالواسطة
‏قال واحد مصرى
فين بقا مبدأ تكافؤ الفرص اللي الثورة الميمونة رفعته كشعار....طبعا كل الكلام بتاع الضباط الاخيار اتلحس لانهم عمرهم ما امنوا به و بالتالي سادت الواسطة و المحسوبية و شيلني و اشيلك و ابجني تجدني و ما الى ذلك من صور الفساد. المحصلة ان الثورة لا كانت ميمونة و لا عبد الصبور..احنا اللي بقينا زي القرد ميمون و هو بيتنطط علشان اكل عيشه...صباح التكافؤ و مساء الوطن

دمت بخير يا صديقتي العزيزة
هذه سمة مجتمع ما قبل المجتمع الحديث ...بعباره اسهل هى احدى سمات الرجوع عن المجتمع الحديث الذى تحقق فى مصر منذ محمد على...فى المجتمع الحديث الكفاءه هى المعيار فى المجتمع العشائرى القرابه او التبعيه لشخص مهم ...لتسهيل الأمور
وكنا اثناء الدراسه فى الولايات المتحده نطلق على هذه الظاهره طاهرة الراعى والتابع
كل واحد يبحث عن سند لتسهيل اموره
والمصطلح هو
PATRON-CLIENT
وليست هذه للأسف السمه الوحيده للرجوع الى الوراء
والتشبه بمجتمعات لم تمر بمراحل التطور الذى مر بها المجتمع المصرى
وكاننا مثل سياره مرسيدس مربوطه بعربه كارو
برنامج الأذاعه انت تسال والكمبيوتر يجيب
http://dear.to/cairo
عادل امام كان بيقول زمان
فى مسرحية جملة
بلد شهادات صحيح

دلوقت بقت
بلد واسطات صحيح

حتى العلاج ياقطقوطة
لازم له واسطة

واسطة تكون ضمير
واسطة تكون ارادة قوية
واسطة جماعية
عشان مش ينفع واحد لوحده
يقول مش هاستعمل الواسطة

بس احنا اللي عملنا فى نفسنا كده
يعنى لما يكون واحد فى منصب كبير
يقول لكل اللى يعرفهم
ابقى تعالى لى وانا اعملك اللى انت عايزه
نوع من التباهى والمنظرة
قلب بمرض
وتفشت الواسطة


تحياتى لارق قطة
‏قال Misrdream
فعلا ظاهرة مقززة منتهي الظلم
بيتفرض علينا لمجرد اننا من غير واسطه
بس ارجع واقولك احنا السبب
احنا فى ابسط امور حياتنا بقينا بندور على الواسطه علشان نخلص مصلحتنا
احنا السبب
‏قال Desert cat
اسكندراني اوي
استاذ اسكندرانى عندنا
يا مرحبا يا مرحبا
هنقول ربنا يهدى الناس
تحياتى يا فندم
‏قال Desert cat
واحدة مفروسة
شهارادات ايه بقى يا مفروسة يا حبيبتى
انتى دلوقتى تلاقى خريج ثانوية رئيس لواحد خريج كلية من كليات القمة
تحياتى
‏قال Desert cat
YHYيــوســف الـمصـرى
ده العيش بالذات لازم يكون بالواطسة هو حد لاقيه اصلا
ده المخدرات متوفرة والعيش لاء
تحياتى
‏قال Desert cat
ketchup
لاء يا كيشو الله معاه واسطة مش محتاج يثبت انه بنت ولا ولد ولا حتى متوفى
هو مجرد ما الكارت بيظهر بقولوا اعفاء يابنى روح
شرفتنى يا كيشو
‏قال Desert cat
nody_1987
انتى فين يا بنوتة من زمان
على فكرة وحشانى جدا
طمنينى بقى اخبار امتحناتك ايه
طيب مش عندك واسطة ترفع لك الدرجات وتجيبى امتياز
هههههههههههه
وحياتك بتحصل
تعرفى انا جوز خالتى دكتور فى جامعه لالالالا بلاش اسم الجامعه
المهم كنت عندهم من قريب جدا والاقى موبايله عمال كل شوية يرن وياخد بيانات على ارقام جلوس .... الوضع مريب سالته فى ايه يا عمو الاقيه بيقولى ده صاحبى وبنت اخته عندنا فى الكلية وبيوصينى عليها اصل البنت مسواتها مش اد كدا
الله يسامحك يا نود خليتنى افتن على قرايبى ولو شاف الكومنت ده مش بعيد خالتى تتطلق فيها والاقيه عاملى زى حسن حسنى فى غبى منه فيه وجاى يقولى وخالتك طالق يا اختى
‏قال Desert cat
ده كان تعليق بلال عندى فى جروب أخلاق للبيع على الفيسبوك
http://www.facebook.com/group.php?gid=16124942799
الواسطه او الكوسه بالمعنى المنتشر ده نوع من انواع اغتصاب حقوق الناس
الكوسه اللى دمرت مجتمعنا ودنينا
اللى ممكن تخلى واحد ملتزم على انه يدفع رشوه علشان يشغل اابنه او يخلص مصلحه
الواسطه اللى قديت انى نسبة البطاله اصبحت نسبه عاليه فى مجتمعنا سواء انى ابن البيه يشتغل او البيه الكبير ما يثبشى منصبه والكرسى غير لما يموت وسن المعاش ده للناس العاديه الناس اللى بيعيطوا لما يشوفوا ابنهم اللى ذاكر وتعبوا فيه قاعد على القهوه وابنه الجزار او ابن رئيس الحى اللى معا دبلوم بقى مدير فى كذا
ده حتى كليات الشرطه والحربيه والحاجات ديه بالواسطه والرشوه
حاجات غريبه
ده شكلنا كمان اللى هيمسكنا بعد السيد الحاكم هيبقى ابنه بالكوسه برضه
عاوز اسال سوال بقى

امتى هيتغير القانون ويستطيع الفرد انى يعيش بسلام ويرجع له حقه بعيدا عن المحسوبيات والاعتبارات الاخرى
ياترى هنعيش لما نشوف اليوم ده
ولا احاول ادور على وسطه علشان اعرف امتى هيتغير القانون اللى مشين بقى ده؟
تعالو نحلل ليه الواسطه
ممكن تكون لأسراع حركة اوراق فى مصلحه ودى اهون الشكال لأن هنا المشكله خلل ادارى قد يرجع الى الموظف او تعقيد اللوائح او الأثنين معا
ثانيا
محاولة اخذ ماليس لنا فيه حق او تخطى صاحب الحق
وهذا اخطر الأشكال
وهو نوع من البلطجه وينمو طبعا مع سيادة البلطجه فى المجتمع على مختلف المستويات وعدم احترام القانون حتى ممن يعهد اليهم بالمحافظه والسهر على تطبيقه
وهو ما يعرف بالتحايل على القانون حتى من موظفى الدوله الخاضعين للقانون والمكلفين بتطبيقه
واذا لم يخترم المسؤول القانون عمت البلطجه والفوضى واضطر المواطن للبحث عمن يعطيه خقه
كل هذه الظاهر تختفى لو طبق القانون على الكل
وشاهدنا كيف ان رجال اعمال كبار يقبض عليهم ويحاكمون والحديد فى ايديهم على التيلفزيون عندما تلاعبوا فى ميزانيات شركاتهم ...هذا فى اميركا لأن الراسماليه اذا لم تطبق فغيها القوانين على الكل تحول المجتمع الى غابه ياكل فيها القوى بالمال الضعيف
يجب الا نخلط بين الواسطه فى مجتمعنا وما يسمى خطابات التوصيه فى مجتمع مثل المجتمع الأميركى مثلا لدخول الجامعه
فهذه الخطابات مطلوبه من اشخاص عرفوا المتقدم عن قرب ويزكوه للألتحاق
مثل مدرسين فى المرحله الثانويه او رئيس عمل سابق....الخ
خطابات التوصيه بالمناسبه هى ما يسمىletters of recommendation
وتقدم هذه الخطابات طبعا بالأضافه لكشف الدرجات
مع إنى زعلان منك لأنك ماسألتيش عنى..
بس ما اقدرش اكون جنبكم وما افوتش على بوستكم..
عموما فيه مؤهلات تانية غير الواسطة..
وده مش بس مع البنات...أبدا....ده مع الولاد برضه..
يعنى مثلا فى السياحة والفنادق..
طالما الواد وسيم و مسبسب وشبه ليوناردو دى كابريو..
لو حتى معاه إعدادية مش مشكلة المهم إنه يعرف أصناف الأكل كويس و يعرف الفرق بين الأسكالوب بانيه و الأسكالوب ناتيور و الأسكالوب ميزون..
وبعد كده الشهادة مش مهم..
عارفة ليه..؟؟
علشان المفتش بتاع وزارة السياحة لما بييجى يفتش على الفندق و بيسأل عن سجلات الموظفيين..
بياخد المعلوم برضه..
شفتى بقى ..دى منظومة يا قطة ..
وللأسف هى منظومة متينة جدا و يصعب تفكيكها..
ربنا يوعدهم بهيروشيما أو نجازاكى تاخد أجلهم المرتشين دوول..
قولى معايا يالا
آمين آمين
تحياتى ليكى
‏قال -_-
انا اترفضت في شغل عشان مفيش واسطة
و اتسألت بصراحة عنها و مجاوبتش مع ان والله عندي واسطتين

اهو درس و اتعلمته
‏قال alexandrany
متهيألي ان كان كلامك الاساسي عن الواسطه بالنسبة للشغل
انا شايف ان الشغل دلوقتي في مصر فعلا في شركات كتير اجنبية او الخاص عموما يعني واقصد بالخاص الخاص النضيف يعني ولما بتعين حد فعلا بتعينه عشان كفائته

الا طبعا اللي بيدور عن الشغل الحكومي فده هو اللي لازمله واسطه
بس الشغل الحكومي دلوقتي مش بياكل عيش
لكن فعلا بالنسبة لاي حاجه في البلد لازم تكوني تعرفي ح جوه عشان يمشيلك الموضوع وفتح عينيك تاكل ملبن
اول زيارة تحياتي
‏قال فى حب الله
عندك حق الوسطه مضيعه حقوق شباب كتير فى وظائف هما ممكن يكونوا احق بيها وده لو هنتكلم على الوظائف فقط لكن الوسطه دلوقت بقت فى كل حاجه بقت زى المياه والهواء بنتنفسها كل يوم مع أى حاجه بنعملها بس ارجع واقول احنا السبب احنا إلى وافقنا على ده ورضينا بيه مع اننا رافضينه بس بنتعامل به ربنا يرحمنا برحمته علشان نقدر نعيش
يااااااااااااااااه
بجد انتى نازله مواضيع سخنة جدا
ورا بعض

الوساطة دى اسوء شئ فى الوجود
انتى عارفة انها مش فى مصر بس

مثلا امريكا

عشان الرئيس ينجح فى الانتخابات
لازم لازم يثبت ولاءه لاسرائيل
عشان اللوبى الصهيونى يتوسط له
و يساعده انه ينجح
زى باراك اوباما كده ما عمل
و حينجح
بالطريقة دى

سلامى ليكى
‏قال funckydoctor
فعلا
بلدنا ده نزرع القمح فى سنين تتطلع الكوسة فى ثوانى
‏قال صلطح
السلام عليكم
===============
على راى واحد بلدياتنا يقولك ايه


معاك وسطه خش وسلم معكش وسطه حتبات على السلم

\\\\\\\\\\\\\\\\\\\\\\\\\\\\\\\
وصلطح صلطح ياعم الحاج
‏قال Unknown
مين السبب فى انتشار الرشوة والواسطة؟؟؟ مش عارفة بس اكيد الظروف هى اللى خلت شعارنا طريها الناس لبعضيها
‏قال غادة
اه يا قطه ما تفكرنيش بالواسطه وسنينها
بقت فى كل حته دا بعد كده الواحد هياخد واسطه معاه عشان يكلم ابوه ولا كمان عشان يكلم نفسه
دى حاجه بقت تقرف
انا نفسى بس اشتغل خلينى اخلع من هنا بس اعمل ايه محتاجه واسطه على التقدير اللى معايا الله المستعان بقى
تحياتى ليكى يا قمر
‏قال Unknown
هى دى مصر يا قطة
للاسف هى كدة بلدنا حتى نحن فينا
شوية كوسة كمان احيانا تظهر فى المواقف وانتى عارفة بتنونوى فى وش مين ؟

الله يرحمنا من الواسطة وسنينها
كل الاحترام
‏قال Desert cat
محمد صالح
وطبعا كل الكلام اللى بتقوله ده يا محمد يتلخص فى الانانية
اللى هى انا ومن بعدى الطوفان
مش مهم غيرى ياخد ياخد فرصته ما يخدش المهم انا واولادى نوصل لمناصب ونحقق اهدافنا الشخصية
حتى لو احنا اقل فى الكفاءة
تحياتى
‏قال Desert cat
ايوية
تقريبا احنا الاتنين هدفنا واحد يا يويو يبقى احنا الاتنين ندور واللى توصل لكارت دكتور الاول تبلغ التانية
‏قال Desert cat
ayman badr
الواسطة بسطة وكلمة السر والحل السحرى لكل حاجه متقفله
تحياتى
‏قال Desert cat
GeHaD-----(male)
تعرف يا جهاد ان الموضوع ده لسه موجود فى وقتنا هذا
يعنى واحدة صحبتى كانت رايحه تقدم فى شغل تعاقد والله مش تعيين كمان المهم بعد ما قدمت اوراقها اتصلوا بيها ولما راحت شافت الكشف بتاع اللى اور اقخم اتقبلت فكان كل واحد مكتوب اسمه وقصاده الواسطة بتاعته
ولا عزاء للكفاءات
تحياتى
‏قال Desert cat
بنوته مصرية
اااااه يا رودى موضوع تخليص الاوراق ده اسالينى انا عليه ده انا قبل لما بدخل اى مصلحة لازم ادور على واسطه هناك الاول
ههههههههه
نورتينى يا جميله
‏قال Desert cat
blue-wave
هى لسه البلد هتخرب
ده من كتر السلبيات اللى فيها بقى الشخص الايجابى مش عارف يعيش
تحياتى
‏قال Desert cat
المستنصر بالله
اشكرك جدا عى التعقيب
وربنا يسترها علينا وعلى الاجيال اللى جاية
تحياتى
‏قال Desert cat
ادم المصرى
المشكلة لا تكمن فى الحصار الرئاسى المشكلة كمان تكمن فينا احنا
لان فى حاجات الحكومة لهاش علاقة بيها دى بتكون نابعه من البنى ادم نفسه
تحياتى
‏قال Desert cat
سومه...مجنونه فى بلد عاقل
ماهو سكوت غيره على حق هو اللى خلا الدنيا تخرب كدا
وكل واحد ياخد حق التانى
" ما ضاع حق وراءه مطالب "
تحياتى
‏قال Desert cat
rara
مفيش وسايط
مفيش شغل
مفيش اكل
مفيش حتى عيش
تحياتى
‏قال Desert cat
هيثم الدهشان
اه على ر اى ابو نواس
وداوينى بالتى كانت هى الداء
طبعا هنا القصد مختلف تماما
‏قال Desert cat
amal
اهلا وسهلا بيكى يا امل
شرفتى المدونة
وسعيدة اوى انها عجبتك
اتمنى دوام التواصل
تحياتى
‏قال كوارث
والله العلاج كمان بقه بالواسطه فعلاً
بقت حاجه تشل
ناس مستنية عند دكتور بالساعتين والتلاته البيه ييجي ويدخل
عادي يعني
بالمناسبة
لغة البلاد الرسمية بقت الواسطة
البلد ما بتقبلش اللي من غير وسايط دلوقتي
خالص !
ربنا عالظلمة !
‏قال بنت مصريه
والله عندك حق يا قطه
انتى عارفه ساعات كمان الواسطه ف بلدنا ممكن تنقذ واحد نصاب من السجن
هنقول ايه بس
ياللا لنا الله
بوست جميل يا بوسى احييكى
‏قال Desert cat
rovy
ماهو بسبب الواوا دى يا روفى
ممكن تلاقى واحد اهله صارفين عليه دم قلبهم وناجح وبتقدير وقاعد جنبهم فى البيت وواحد تانى طالع بماده ومتعين فى منصب مرموق ماهو داخل بواسطة بقى حد يعرف يكلمه
ربنا يسمع منك ويجى اليوم اللى تنتهى فيه الواسطة
تحياتى
‏قال Desert cat
شـمو نشـادر
طيب هو مش المفروض يكون لينا دور إيجابى علشان نخليها تنفع
‏قال Desert cat
اجندا حمرا
صديقتى الجميلة ارق اجندة
الواسطة شكلها آفه منتشرة زى الغلاء كدا فى كل الامكان
بس اللى ضايقنى بجد موقف الدكتور اللى ادى طالب الدرجة النهائية وكل مؤلاته انه ابن زميله ايه المواقف دى اللى بتولد الحقد والكره فى المجتمع
ربنا يتولانا
محبتى يا جميله
‏قال Desert cat
سنووايت
الجمي يا دكتور ة انك شرفتينى بالرد
فعلا دلوقتى معاك كارت واسطة يبقى اضمن ان مصالحك هتتقضى ومش مهم ده مكان مين او دور مين المهم انا ومن بعدى الطوفان
منتهى الانانية
نورتينى يا جميله
‏قال Desert cat
واحد مصرى
صديقى العزيز ايهاب
الثورة الميمونة بهدلت الشعب وعملت فوارق اجتماعية اكتر من اللى كانت موجودة قبلها
الظباط الاخيار كان همهم مصلحتهم مش مصلحة حالشعب زى ما البعض كان يتغنى
بدليل الانقسام اللى حصل بينهم لما ناصر مسك الحكم
وادينا لحد النهارده بندفع التمن
الله يرحمه بقى البيكباشى ناصر
تحياتى يا صديقى العزيز
‏قال Desert cat
CAIROCOMPUTER
استاذى العزيز
اولا اشكر حضرتك جدا على تشريفك البلوج
بالنسبة لما حضرتك ذكرت اننا بنعود للخلف ففعلا هذا ما يحدث وخصوصا فى هذه الايام
فنلاحظ ان الشخص مجرد ما يدخل للمكان لقضاء مصلحة خاصه به وبمجرد ابراز كارت التوصية او ذكر اسم المتوسط له تلبى طلباته
وزمان فى العشائر كان لا يقال الا فلان ابن فلان من سلالة علان
ومن يوجد به الكفائه ولكن ليس له نسب ينحى جانبا وكانه مخلوق شيطانى مهما كانت كفائته
ويكفى المهازل التى نراها فى يومنا هذا عندما نرى اثنين مختلفين على اى شيئ يسارع احدهم بالكلمة المعتاده انت مش عارف انا ابن ؟؟؟؟؟ ويكفى ذكر تلك الكلمة حتى يغفر له خطأه مهما كانت فداحته والطرف الاخر يبقى هو الغلطان حتى وان كان مظلوما

احترامى وتقديرى
لاسرة برنامج الكمبيوتر يجيب
‏قال Desert cat
مدحت محمد
مش انا سبقت وقولت لك بصرة بالكوسة كمان
ههههههههه
:)
‏قال Desert cat
كاميليا
لاء يا كامى مبقاش ينفع الشهادات
فى البلد اهم حاجه الواسطة دلوقتى
تعرفى يا كامى والدى كان فى مستشفى خاااص .... خاص يعنى بفلوسنا واليوم فيه بمبلغ وقدره والمفروض ان الرعاية متوفرة والنظافة وكل حاجه ... الممرضات كل شوية رايحين جايين الف سلامة ... واول ما يشوفوا اى حد من قرايبنا جاى يزوره ... نفس الموال ... الملايات مش تتغير الا لو ماما فتحت عنيها تاكل ملبن وحطت حاجه فى ايد الممرضة .... المفروض ان فى دوا فى مواعيد وحقن ومتابعه الحاجات دى كانت بتحصل لما احنا نتصل ونقلب عليهم الدنيا ... الكام يوم اللى والدى قعدهم هناك شوفنا فيهم العجب ربنا ما يكتبها على حد
تحياتى ليكى يا جميله والف مبروك يا عروستنا يا قمر
‏قال Desert cat
Misrdream
صح يا احمد احنا السبب
احنا اللى عملنا فى نفسنا كل ده
لو كل واحد اتمسك بحقه من غير ما يدور على واسطة او يدفع جنيه واحد لكل اللى يفتح له الدرج
مكناش وصلنا للحال اللى احنا فيه ده
ما ضاع حق وراءه مطالب
لكن احنا ضيعنا حقوقنا بتخاذلنا عن طلبها
تحياتى
‏قال Desert cat
CAIROCOMPUTER
طبعا وجهة نظر حضرتك صحيحة
وده اللى بيحصل فعلا فى المصالح الحكومية والخاصة كمان
وان مش كان فى واسطة يبقى بدفع الرشوة
بالنسبة ان المفروض حماة القانون نفسهم يكون عندهم مبدأ فى تطبيق القانون وعدم الاعتداد بالواسطة لكن للاسف فى المواقف الكتير والكتير على عكس ذلك تماما ولا داعى لذكرها لان جميعنا ان لم نكن راينا فاكيد سمعنا
سعيدة جدا باراء حضرتك
مودتى
‏قال Desert cat
CAIROCOMPUTER

طبعا يا فندم خطاب التوصية او
letters of recommendation
معروف انه لمن يملك الكفاءة وكمان الرغبة والاستعداد الذاتى وبذلك خطاب التوصية بيكون من باب التذكية
اما الواسطة
او المجاملة فهى معروفة للجميع
واعتقد ان الاخيرة اى الواسطة هى السائدة فى مجتمعنا اسال الله ان تنقرض
دمت بكل خير
مودتى
‏قال صحفية روشة
ليه الواسطة اسمها كوسة
عشان الكوسه سهله الهضم
والوااااو اسهل طريق للشغل
__________________________________
ميفوتكش البوست الجديد (عدنا من الامتحانات)
__________________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية
‏قال Desert cat
واحد من البلد دى
ازاى بس يا فندم هو انا اقدر مش اعدى عندكو انا بعدى كتير بس حضرتك اللى من زمان مش نزلت جديد
عموما انا روحت عندكو وسبت كومنت كمان
هو للاسف كلنا عارفين الخطأ وعارفين ان اللى بيلجأ لواسطة بياخد حق حدتانى وبالرغم من كدا برضه بنعملها
المفروض نبدأ احنا نتغير من جوانا علشان لا ليوناردوا ولا جوليا روبرتس حتى ياخدوا مكان حد تانى
تحياتى يا فندم
‏قال Desert cat
Sharm
انا حصلت معايا مرة واحده
وبعدها قررت ما اشتغلش عند حد تانى
الف مبروك لنورة يا احمد
تحياتى
‏قال Desert cat
alexandrany
اولا اهلا وسهلا بحضرتك شرفت البلوج
ثانيا الواسطة مش مقصورة على الشغل الحكومى بس
للاسف القطاع الخاص كمان والشركات الاجنبية اللى حضرتك ذكرتها فيها واسطة كمان والكوسة فيها للركب
والمواقف كتير جدا
بتتقدم وتملا الابلكيشن والسكرتيرة الامورة تبلغك انهم هيتصلوا بيك وممكن تروح تدخل الاختبار وتجتازه
وفى النهاية معلشى حظ سعيد فى المرة الجاية ان شاء الله
تحياتى
‏قال Desert cat
فى حب الله
وعلشان الواسطة بقت الطريق الاسهل لاى حاجه اصبحت زى الميه والهوا
واحد داخل اى مكان بدال ما يقول انا اسمى كذا بيقول انا جاى من طرف فلان
تحياتى
‏قال Desert cat
مواطن مصرى نايم
الصيف بقى يا اسلام
ولازم نواكب الموجه الحارة علشان نعرف نعيش
هههههه
ده شكل امر يكا اتعدت مننا
هما برضه عندهم حزب وطنى علشان يكون جاهز وقت الانتخابات ولا ايه النظام ؟؟؟
تحياتى
‏قال Desert cat
funckydoctor
وعلشان الكوسة ملت البلد مبقاش فى طماطم ولا صلصه حتى
ربنا يستر
نورتنى يا دكتور
‏قال Desert cat
صلطح
ده حيبات على السلم وفى اشلارع كمان لو مش عرف يتصرف
تحياتى
‏قال Desert cat
enjy
واحنا برضه يا انجى السبب فى انتشارها لو كل واحد اتمسك بحقه من غير ما يستسهل الامور ويدور على واسطة او يدفع مكناش هنوصل للحال ده
مودتى يا جميله
‏قال Desert cat
نور
هما اهالينا يا نور فعلا هنبقى محتاجين واسطة بعد كدا علشان نعرف نكلمهم لانهم مطحونين فى دوامة الحياة
يمكن يلاقوا واسطة علشان يستريحوا ويعرفوا يقعدوا معانا شوية من الوقت
ربنا يكرمك وتشتغلى بسرعه يارب ومن غير واسطة
نورتينى يا جميل
‏قال Desert cat
نهر الحب
يا عزيزتى اللى بيظهر مش شوية كوسة بس ده بيظهر فدان من الكوسة وساعتها الواحد اللى اتظلم بيحس بخيبة الامل
وانا عن نفسى اتعرضت لموقف وبسبب الكوسة حقى ضاع ولحد النهارده لسه بدعى على اللى ظلمنى
حسبى الله ونعم الوكيل
تحياتى ليكى
‏قال Desert cat
كوارث
والله بتحصل انت بتقول فيها الواحد بيستنى عند الدكتور ب3 ساعات ولما يجى الدكتور اللى يدفع للمرضة فلوس علشان يدخل الاول وياخد دور حد ممكن يكون فى حالة حرجه مش مهم يموت المهم ان حد دفع لها او قريب الدكتور
تحياتى
‏قال Desert cat
بنت مصريه
اه يا انجى بتنقذ انصاب والمرتشى علشان يطلع يكمل على باقى الناس الغلابة
اشكرك جدا يا جميله
محبتى ليكى
‏قال Desert cat
صحفية رشوة
مبروك انك خلصتى الامتحانات على خير
عقبال التخرج
‏قال HANY YASSIN
الشلام عليكم
الموضوع جميل لكنه شائك فالواسطة فى بعض الاحوال تكون الطريق الوحيد
خاصة اذا كانت الاشياء الاخرى غير موجودة
وسؤالى كيف اعمل ويكون لي خبرات وانا بدون واسطة فى هذه البلد
تحياتى لك
هانى يس
‏قال secret-love
الواسطه والكوسه حاجه بجد سيئه
واهم حاجه والله والله ان الانسان تكون وسطته ربنا لانها وسطه جامده جدا
‏قال Geo Amr
الموضوع دة اصبح اساى فى حياتنا موضوع الوسطة مش فى الشغل بس لا دة اصبح فى كل مكان علشان تعمل اى حاجة لازم وسطة تصدقى انك علشان تروحى تجيبى عيش من الفرن لازم وسطة علشان تمشى بسرعة
وعلى فكرة احنا السبب فى وجود الرشوة مش حد تانى
واتمنى انك تزورينى فى مدونتى
‏قال أم فريده
لا ياقطة
صدقينى المؤهل والواسطة مع بعض ودة عن تجربة انا رحت مرة وانا معايا وسطة عشان اشتغل بس كان فى غيرى اعلى فى التقدير خدوة وانا لا.

ودلوقتى انا معايا وسطة وتقديرى ينفع اشتغلت. واهى دنيا ولازم نعيشها.

وسلام ياقطة
‏قال ريمان
السلام عليكم

اهلا يا قطه يا مقطقطه

دى اول زياره ليا فى مدونتك

بجد جميله

استمرى

تحياتى

ريمان
‏قال أنا حر
الواسطة من رموز مصر زي الهرم ماينفعش نتخلى عنها
تحياتي
‏قال الربان
تحياتي


طبعا عندك حق في كل كلمة...و الادهي و الامر ان الواسطة اصبحت رسمية في بعض
الوزارات...يعني وزارة العدل مثلا...
التي يفترض من اسمها تحقيق العدالة...تعين
ابناء المستشارين و القضاة...بمعدل اقل
من الاخرين من المتقدمين...و طبعا المقابلات اولاد المستشارين ناجحين ناجحين.

الموضوع انتقل الي الخارجية...و يكفي ان
يعترف وزير التنمية الادارية بوجود
الواسطة في التعيين في بعض الجهات الحكومية....

رحم الله العدل و المساواة...و لعن الله
قوما ضاع الحق بينهم.

تحياتي و تقديري
‏قال Desert cat
HANY YASSIN
عليكم السلام ورحمة الله وبركاته
هو اجابة السؤال مش صعبة يا هانى بس هو مطلوب ان كدل واحد يقعد مع نفسه شوية ويعرف اد ايه هو بياذى ناس كفائه وبياخد مكانهم او بيدى حق لحد تانى اذا كان هو الوسيط وبالتالى لو كل واحد بدا من جواه بالتغيير فى انه لا يعاخد ولا يعطى حد حق مش حقه
مش هتكون صعبه
ان اله لا يغير ما بقوم حتى يغيروا ما بانفسهم
محتاجين فعلا شوية تغيير
تحياتى
‏قال Desert cat
secret-love
من توكل على الله فهو حسبه

للاسف كلنا عارفين ان مفيش احن علينا من ربنا وهو احسن واسطة لكن كل واحد عايز اسرع حل للتخليص حاجه ممكن تكون مش حقه
تحياتى
‏قال Desert cat
Geo Amr
ماهو طبعا احنا اللى السبب فى السلبيات دى
اصل محدش بياخد حد من ايده ويقوله يروح اتصل بحد يتوسط لك
طبعا يشرفنى زيارة مدونتك
تحياتى
‏قال Desert cat
دعوة للحب
طيب مش يمكن هو كمان كان معاه واسطة
دى مبقتش بلد شهادات يا جميل
دى بقت بلد اللى معاه واسطة اعلى من التانى
تحياتى
‏قال Desert cat
ريمان
ميرسى جدا يا ريمان
اسعدتنى زيارك
تحياتى
‏قال Desert cat
أنا حر
زيها زى سلبيات كتير منعرفش نتخلى عنها
لكن ربنا مقلب القلوب يمكن نقدر نعمل حاجه
تحياتى
‏قال Desert cat
الربان
استاذى العزيز
حضرتك فعلا ذكرت نموذج حى
نشاهده جميعنا على مراى ومسمع ولن يجرؤ احد للتصدى
ربنا يهدى الجميع للخير
احترامى وتقديرى
الواسطة والكوسة بقت سمة اساسية في بلدنا حاجة منقدرش نستغني عنها زي مابيقولوا بتمشي المراكب العطلانه ادينا اهه اعدنا ندح في الثانوي لما عيننا مققت في الكتب علشان ندخل اعلام ودحينا ايام الكلية ودخلنا شعبة صحافة وفي نهاية المطاف
منعرفناش نشتغل الا في جريدة معارضة صحيح هي جريدة يومية وليها اسمها بس الواسطة برضوا كانت واقفة حائل بينا وبين اننا نتشغل في اي جريدة قومية
لو عايزن بقي نشتغل في جريدة قومية ندفع 10الاف جنية رشوة يابلاش
انا اعرف واحد شغال في جريدة قومية اقسم بالله معهوش غير ثانوية عامة وكان طالع ب50% وعلشان خاطر عيون البيه الولد ابوه اشتغل بس ماعتقدتش ان في حل لان العيب في افكار الناس اللي بقت تدور علي اقصر الطرق وتلجأ للواسطة حتي في الجيش اللي بيقولوا عليه انضباط اللي معاه واسطة ينزل اجازة او يروح القسم المالي او يعد علي الكمبيوتر بدل بهدلة الجيش وحنقووووووول اييييييييييية
موضوعك هايل ياقطة تسلم ايديكي

تحياتنا الغالية لكي

المشاركات الشائعة