انتــى مرتبطــة ؟؟؟


اول سؤال بعد الاسم يطرأ على بال أى واحد لسه بيتعرف على واحده اسمك ايه ؟؟ انتى مرتبطة ؟؟ فى النت فى الشارع فى الشغل المهم السؤال اللولبى اللى لازم يتسال وكانها لو مرتبطة يقولها طيب معطلكيش يا حلوة انا عايز واحدة مش مرتبطة ... خلاص بقى من كتر ما اتسالناه اتعودنا عليه ... انا شخصيا بقيت لما حد بيساله لى بقوله وانت مال اهل حضرتك ؟؟؟ انما يبقى قاعد عندك فى البيت واول ما يفكر يكلمك يقولك انتى مرتبطة ؟؟؟ نعم يعنى لو مرتبطة حضرتك جاى هنا تعمل ايه دلوقتى ؟؟؟ يعنى لو متجوزة هتطلق واتجوزك انت ولا لو مخطوبة هتصل بيه اقوله معطلكش اصل جالى سيد سيدك ؟؟؟ مش المفروض الناس قبل ما بتدخل البيوت بتكون سائله وعارفه كل حاجه ؟؟؟ قصدى يعنى مرتبطة عاطفياً ؟؟؟ وانت مالك ... هو مش المفروض الناس بتتعرف ولو فى قابليه وحصل موافقه ده لو فى اساسا وقتها يبقى تسال فى اللى انت عايزه ... طيب انتى اتضايقتى كدا ليه ... مش قصدى ازعلك انا بس مش لاقيت حوار مناسب ... اه وعقلك الفذ صورلك السؤال ده فى صورة الحوار المناسب .. طيب تحبى نتكلم فى ايه ؟؟؟ ممكن تتكلم فى الرياضة كمال الاجسام مثلا ... مالها كرة السله على الاقل انا قصيرة وانت مش اطول منى بكتير .... ماله الكونغفو يعنى ... وانت باين عليك جاى وسايب نص جسمك فى فيينا خايف من الحسد تقريبا ... اه نسيت اقول ان الاستاذ العريس لسه راجع من فيينا بعد غياب 8 سنوات دراسة وشغل وخلاص بقى لازم يتجوز من مصراوية ويسحبها فى ايده وهو راجع وكل الكروتة دى فى شهر ... يعنى مش المفروض يكون فى فترة خطوبة كفاية علشان يعرفوا بعض يمكن يكون حد في الاتنين فيه حاجه مش كويسه ... مش نيجى بعد ما يكونوا اتدبسوا وبعدها باسبوع نرجع اللى فيه العيب للشركة .. الشركة ترد تقول ده عيب يوزر احنا ملناش فيه وساعتها اللى هيتبهدل فى النص احد الطرفين ده ان مش كان اصلا نتج اطفال ... انما سيادته جاى مستعجل ومش مهم بقى اى حاجه يعنى هيخطب ويتجوز ويسافر فى شهر وبعدين العرورة بقى تبقى تحصله لما يتكرم ويبعت لها يعنى برضه شهر بالكتير تكون سافرت له ويقضوا ليالى الأنس فى فيينا قصدى شهر العسل والبصل وكل انواع الخضار هناك ؟؟؟؟ وكان سؤالى اللولبى وانت مش اتجوزت هناك ؟؟؟ قال لالالا انا مش اتجوز غير مرة واحده بس ولازم تكون مصرية ... اصيل يا ابو اسماعيل والله ... واللى مالوش خير فى بنات بلدة مالوش خير فى بنات المانيا القمح .... طيب خلاص انا والله استريحت لك نفسيا جدا وعجبنى عقلك ... ايه ده هو انت شايفه ؟؟؟ يعنى واضح اوى كدا ... ها ها ها ... زى ضحكة عبدالوهاب فى الوردة البيضا ... لالالالا خلاص انتى اللى وقع عليكى الاختيار .... وانت قررت كدا من نفسك ... اصل انا مش اترفض ده انا فرصه يا بنتى ... على اساس ايه حضرتك زويل مثلا ... حتى لو زويل انت جاى تشترى قميص وخلاص وقع عليه الاختيار مالوش رأى ... انتى مناكفه كدا ليه ... هو كدا عاجبك ولا مش عاجبك ولو عاجبك انت مش عاجبنى انا بلا فقعة مرارة .

تعليقات

والنبى صحيح قاللك انتى مرتبطة
يعنى جاى يخطب واحدة ودخل البيت ولسة هيسال انتى مرتبطة

لا واللى يغيظ اكتر ان البعيد شايف نفسه لقطة

على رايك
بلا فقعة مرارة
‏قال .:.-=- ELGaZaLy-=-.:.
ههههههههههههههههههههههه

لا والله راجل هايل يعنى...حقيقى يعنى

دة مودرن يعنى خالص زى ما الكتاب بيقول...

ههههههههههههههههههههه

طيب السؤال الى بيطرح نفسة هنا بقى لو كان عرف انك فرضا مرتبطة عاطفيا كان اية موقفة يعنى هايكمل عادى

بس لقطة بجد والله
ههههههههههههههههههههههههههه

ربنا يعينك
‏قال سمراء
هو لسة في حد بيتجوز بالطريقة التقليدية دي انا اتعرضت لها كثيرا ولكن ولا مرة فلحت غالبا دلوقت لما بوافق اقابل حد بيبقي مجاملة للي جايبهولى
لكن دايما يدور جوالى سؤال هم لية مبطلوش الطريقة دي لحد دلوقت خصوصا بعد اثبات فشلها ؟
اشكرك
سمراء
‏قال صفا سارة
لا فعلا لقطة ومش اى لقطة ده لقطة من فيلم عربى قديم وبايخ
مدونتك جميله اوى
تقبلى مرورى
‏قال Wael Salem
لا بجد الناس بقيت تسأل اسئلة سخيفة جداً .
طبعاً انتي مرتبطه بتتسأل كتير وبرضه انت مرتبط بتتسأل كتير علي فكره
وكمان ... السؤال عن الدين ... بقي يتسأل كتير الأيام دي
انت مسلم؟
أو انت دينك ايه؟
طيب لو كان واحد مسيحي يعني مش هنكلمه ؟
وتلاقي اللي بيسأل مش بيصلي ولا يعرف حاجه عن الدين
حاجات غبيه كتير بتحصل
شاطرة ياقطة
عرسان اليومين دول الصراحة طالعين فيها حتى لو واحد لمؤاخذة
يلا خلينا ساكتين جيتى على الجرح ولوقلت هقول قوالة يااختى
تخيلى ام العريس تيجى وتعاين
جواز الصالونات انا قرفت واتقهرت منه كله جاى طالع فيها كانة هيتكرم ويشيل وعجبى عليك يازمن
تحياتى لكى
‏قال basma saghir
خد الشر وراح..

اعتبريه طبق ميلامين اتكسر وخلاص

صلي على النبي كدة
‏قال HANY YASSIN
السلام عليكم
الحوار مستفز جداً من الطرفين صراحة وان كان العريس يستحق
لان طريقة الزواج فى منتهى التخلف
فاساس الزواج المفترض ان يكون الحب
اما بخصوص سؤال الارتباط فلا اعتقد ان الجميع يفعل هذا و اعتقد ان هناك كثيرين لا يعبأون بهذه المسائل
خالص تحياتى
هانى يس
‏قال wanna b a physician
الحقيقة جواز الكروتة ده غلط جدا طبعا لانه محدش لسه عرف التانى كويس
لا واية بيقولك انتى مرتبطه وهو جاى يتقدملك يا ماشاء الله على الدماغ
صحيح سيب دماغك فى فيينا
اقصد متع عينيك فى فيينا
‏قال وجهة نظري
دي غلطتك من الأول تقعدي مع واحد جاي يتعرف ويخطب ويتجوز في شهر

الجواز بالطريقه دي ممكن مع واحده فلاحه مش متعلمه، وأهو حيمدنها وياخدها فيننا، وأي عيشه وخلاص أحسن من الغيط

إنما واحده متعلمه، مهم جدا بالنسبالها جوزها شكله إيه وتفكيره إزاي وحيربي عيالهم علي إيه وحيشرفها قدام عيليتها وصحابها والا لأ ...... الخ. والكلام دا في الزمن إلي إحنا فيه مابيبانش في الناس غير بعد معاشره فتره مش قصيره وتحاور مستمر

خيرها في غيرها، ونصيحه متتسرعيش في الجواز ومتخليش حد يزن عليكي وإلا حتندمي كتير أوي بعد كده
‏قال شـمو نشـادر
ههههههههههههههههه
انتى بس مضايقه نفسك اوى ليه كده ..
ايزي ايزي مفيش حاجه تستاهل ..
الراجل معجب .. عادى يعنى طبيعي ما هو لازم يعجب ..
على فكره يا جميل انت ليك تاج عندى ..
متنسيش تعدى تاخديه بسرعه بقى ..
سلام
‏قال Unknown
بصى مالاخر

بلا فقعة مرارة

الناس اللى كدة تتعزل فى كوكب لوحدهم

تعرفى ان الحدوتة دى

فكرتنى بحاجات حكوماتنا بتعملها
فكرة فيها كدة
‏قال Unknown
معلش اصل فى مستقبل بيضيع .... مع كامل احترامى لوجهة نظرك فى الجواز هو انت موافقة عادى على الطريقة دى؟؟ وللا انت كنت مستحلفة له؟ نفسى تقولى انك كنتى مستحلفة له عشان تعرفيه ان البنات مش كنب ييجى يتفرج ويعاين واحتمال يجرب..... يارب خد كل الاغبياء عشان العالم مش نااااااااااقص
‏قال mohamed
بجد وبما أنى راجل , أنا مش قادر أفهم البنات بيتجوزوا العرسان المتخلفين دول أزاى,يعنى جنابة جاى يشترى حاجة هو محتاجها, ط البنت بتوافق لية
هل لان لزم تتجوز
ولا لان مع المحروس فلوس
كمان انا عايز اقول حاجة
البنات دلوقتى بيقيموا الراجل بالامكانيات, صحيح مش كلهم, بس الاغلبية ودة نتج عنة أن فرص الجواز قلت وكمان الولد الى بيحترم نفسة
مبيحبش يخش مزاد الجواز,
والى بيفضل أمثال أخينا الى رايح سوق الجملة يشترى
يلا مفيش فايدة فى الكلام
سلام
‏قال غير معرف…
قطتنا السكر عامله ايه؟
صباحك عسل ياجميله

فعلا بتكون حاجه مستفزه للي جاي البيت مثلا و يسأل (انتي مرتبطه)مانت عارف و لا يمكن يقصد مرتبطه بس اهلها مش عارفين لووف ستوري يعني بينها و بين حد
بس ماعلينا يعني
انا بتضايق جدا من اسلوب المعاينه اللي علي الطبيعه اللي بيحصل في جواز الصالونات ده تحسي كأنهم جايين يعاينوا بضاعه حته صالون مصلا او اوضه سفره مش بني ادمه من لحم و دم و عارفه ياقمرايه فكره الجواز اللي بيتكروت ده مش سلميه لأنهم لسه ماتعرفوش علي بعض عشان كده انا بؤيد انهم يدوا نفسهم وقت يتعرفوا فيه علي بعض يعني انا لا مع الخطوبه الطويله اوي 5 سنين مثلا و لا انها تكون كام اسبوع لازم وقت كافي و هما الاتنين يحسوا انهم مستريحين لبعض و يتكلوا علي الله و يتأهلوا

لأن للأسف بتحصل حالات طلاق كتيره من الجواز السريع ده و كمان لما بيكون عايش بره و نازل مصر في اجازه و ماعندوش وقت عايز يعمل كل حاجه في الاجازه ممكن ماتتعرفش عليه كفايه و يكون فيه في شخصيته بعض الجوانب الخفيه اللي ممكن تأثر علي جوازهم

موضوعك هايل ياقطتنا و في الصميم
بحييكي عليه و بتمنالك مستقبل ناجح دايما علي كل الأصعده

تحياتي ليكي ياقمرايه
‏قال قيصر سابقاً
ههههههههههههههههه
لا والله عندك حق
بس عريس لقطة
اوعي تكونى فرطتي فيه
اللى زى ده هيكون تحفة في قفص 3×4
يابنتي اعذريه الراجل شافك لسانه اتعقد ولخبطتيه معرفش يبدأ منين ولا يقول ايه (حلو السبب دا )

طبعا انا ضد فكرة جواز الصالونات وشغل المعاينه والكلام دا
وضد الكروته في الجواز بالذات
خصوصا لو هيختم بسفر وغربه
لأن وقتها ممكن تحصل كارثه من العيار التقيل لو ماتمش التفاهم لاقدر الله

في التأني السلامه ولازم نحكم العقل هنا ونبعد عن اي عواطف .. دا لو فيه اساسا

بس انتي مقولتيش ياقطتي انتي مرتبطه ههههههههههههههه
انا عمري ما سئلت بنت (انتي مرتبطة؟؟ )
ويمكن عشان كده اغلب البنات الي بكلمهم علي النت بيقولولي -باي باي- مجرد ما ببدا اتكلم في الادب الانجليزي ووليم شكسبير
او اوريها رسمة من رسوماتي واقولها اية رآيك

بقلك ايه ... لو عندك عروسة تناسب طريقة تفكيري ابقي قوليلي ... عشان انا خلاص زهقت من البحث

:)
‏قال الربان
تحياتي

ارجو ان اوضح الاتي:

ـ حين يكون الزواج بالطريقة العائلية
التقليدية، مثل هذه الحاله ، أحيانا يخشي الشاب ان يكون في حياة الفتاه شخص ما ، لكن الاهل رافضين له...
لذلك هو بيسأل....

ارجو الا تأخذي مثل هذا السؤال بعصبيه.

اما الزواج خلال شهر...فأنا لست من مؤيديه....خاصة ان كان احد الاطراف يعمل بالخارج...لانه بالتأكيد سيكون قد تأثر الي حد ما بثقافة البلد الذي
يعيش به بالخارج...و يمكن هذا التاثر
يكون في غير مصلحة الفتاه او هي لا تحب
ان يكون زوجها متأثرا بمثل هذه الثقافات...

تحياتي و تقديري
‏قال R-H-S
اتكلي علي الله
دي فيينا
وعلي رأي عبد الوهاب دي فينا روضه من الجنه وليالي انس وبتاع
بهزر طبعا
اهم حاجه انه خد الشر وراح
‏قال Zika
ده ايه الشخصيه الممله دي
لا بصراحه الراجل ما يتعوضش
ما شاء الله فاكر نفسه نازل من عالقمر
ولا هو فاكر يعني ان بنات مصر لما هيشوفوه هيغم عليهم ولا ايه يعني مش فاهم
ولا هو متفرج علي فيلم عربي قديم من اللي كانوا بيتجوزوا اول ما العريس يخبط عالباب
او يمكن فاكر ان لسه بنات مصر زي ما كانوا في الخمسينات كده
ماحصلهمش اي تطور طبيعي زي فيروز
لا والله حاجه تشل
يلا ماتاخديش في بالك .. ياما بنقابل بلاوي
تحياتي يا قطة
‏قال Alkomi
بالاساس يعني على اساس ان الواحدة لو ماطلعتش مرتبطة تبقى خلاص من حق اللي سالها

بصراحة سؤال غتيت و رزل

مثلا يعني واحد جه يخطب بنت عمتي فرفضته
فطلب يكلمها المهم كنت حاشر انا نفسي و قاعد لاقيته بيقولها هو انتي رفضتيني ليه انتي مرتبطة

لاقيت صاروخ سفالة طلع مني

و روحت قايله يعني هي ب .............

لو كانت مرتبطة سؤالك ده هو اللي هيخليها تسيب اللي مرتبطة بيه و يعني لو ماكانتش تبقى خلاص حلال عليك

يابني خللي عندك دم

واحدة رفضتك

اخلع بقى

بوست جميل اوي يا كات
‏قال فى حب الله
طب بذمتك ده عريس يترفض بردك ده لقته يا بنتي ده البنات هتتهبل عليه اكتر ما هو اهبل والله الواحد مبقاش عارف هو لسه فى ناس بالشكل ده والجهل ده ربنا يرحمنا برحمته
‏قال محظوظة
شباب وحش ههههه

سؤال يدخل الموسوعة اللحمية والعظمية هههه

سلاموزززززززززز
ازيك ياقطة

هههههه والله فكرتينى بنفس الحكاية اللى حصلت من 3 شهور مع واحدة اعرفها ايون واحد عامل نفسه لقطة والمهم اهلها وافقوا وهى كمان كان بالنسبالها الموضوع عادى او هى شايفاه نقطة اقصدى لقطة معرفش وسافرت ليه بعد شهر وبعدين رجعت بعد 3 ايام مطلقة
شوفتى الخيبة دى

شطورة ياقطة كنتى اديه ع قفاه هو لسه فيه حد بيجوز كده

تحياتى
‏قال tamer.sala7
الف الف الف مبروووووووووك


لا يا قطة انتي تستاهلي كل خير بصراحة عريس لقطة فعلا ودماغه دي عثل


ابن الهبلة رايح يخطب وبيسأل مرتبطة ولا لآ صحيح ويخلق ما لا تعلمون

عارفة احسن عقاب للعريس ده ايه ؟؟؟


انك توافقي عليه ويبقي هو اللي جابه لنفسه
‏قال Desert cat
بت خيخة وأى كلام
اه والنبى يا نورا شوفتى الناس اللى جايه تفرسنى وتمشى
‏قال Desert cat
.:.-=- ELGaZaLy-=-.:.
هو بما انه راجل مودرن يا محمد وفعلا زى ما الكتاب بيقول فكان ممكن يكمل وساعتها اللى انا مرتبطة بيه يعرفه ازاى يغنى ظلموه بعد نص الليل
‏قال Desert cat
سمراء
ماهو انا برضه اتعرضت للطريقة الغبية دى كذا مرة بس الاخ يبقى اخته جارتنا وجاى بناءاً على كلامها دى قطة الصحراء دى اسد مش بتكلم حد خالص .. ميعرفوش انى مقضياها مدونات وفيسبوكات علشان كدا ماليش علاقة بالعالم الخارجى اصلا
‏قال Desert cat
صفا
تعرفى اول ما تشوفيه للوهلة الاولى تنبهرى بالشكل والمنظر لكن على راى اللى قال اوعدى المظاهر تخدعك
نورتينى
وشرفتى البلوج
‏قال Desert cat
mohager
فعلا برضه من الحاجات المستفزة السؤال عن الدين احيانا زمان كان فى واحد بيقولى انا مش بحب اعرف حد غير مسلم اى ديانه تانية مش بعرف اتعامل معاها قولت له مش المفروض ان الرسول قدوتنا قالى اه قولت له الرسول صلى الله عليه وسلم كان بيبع وبيشترى من يهود وتوفى وهو راهن درعه عند كافر رد قالى انا مش بحب اى حد غير المسلمين وتشوف افعاله يتكسف منها اساسا المسلمين وغير المسلمين
تحياتى لحضرتك
‏قال Desert cat
رئـــــيسـة حزب الأحلام
انا اتعرضت مرة لموضوع ام العريس دى وجت لى لحد عندى فى الشغل اصلهم ساكنين جنب السيبر بتاعى ... لاقيت واحدة داخله تقولى انا ام المهندس فلان قولت لها تشرفنا يا طنط مع انى مش عارفاه .. شهقت بصوت جاب من اخر الشارع وقالت لى ابنى حارسه وصاينه مهندس فى شركة مش عارفه ايه كدا ومرتبه اد كدا وعنده شقه فى عمارتنا وقعدت تعدد لى فى مواصفات ومزايا ابنها وانا قاعده متنحة فى الاخر قولت لها ايوه الخلاصه المفروض اعمل ايه .. المهم دخلت فى تفاصيل كتير واثناء التفاصيل دى منسيتش الفحص تشوف الشعر باروكة ولا طبيعى .. وكان ناقص تجيب لى بندق اكسره لها ... قولت ياربى لما مامته كدا امال هو هيكون ايه معطلكيش يا طنط انا متكلمين عليا ...
‏قال Desert cat
بيسوو
عليه الصلاة والسلام يا بيسوو
خسارة طبق الميلامين انا هعتبره فنجان قهوة واتدلق
نورتينى يا جميل
‏قال Desert cat
HANY YASSIN
هو على اساس انه كان بره مصر من فترة فمتخيل ان البنات هنا بقت حاجه يااااى كلهم على حل شعرهم فطلب من اخته تشوف له العرورة المناسبة وهى مكدبتش خبر المهم انها شكلها قطعت علاقتها بينا لانها جارتنا
‏قال Desert cat
wanna b a physician
اه الكابتن مستعجل بقى اصل ممكن يروح يلاقى فيينا بقت ميونخ لو اتاخر يومين ولا حاجه ربنا يهدى
تحياتى
‏قال Unknown
هاهاهااهىىىىىى

ضحكتينى يا بنتى

بالذات فى طريقتك الحالية فى استقبال السؤال
( و انت مال اهل حضرتك ) ههههههه

حنعمل ايه طيب نروح من الحاجات فين بس قوليلى

معلش انا اتاخرت و يظخر ان فاتنى حدث مهم و لقاء قطتنا الشهيرة اللامعة فى برنامج اسال و الكوبيوتر يجيب انتى تستاهل تطلعى فى التايمز

اكيد حسمعه و اقولك راى ان شاء الله
‏قال Desert cat
وجهة نظري
والله يا فندم انا قعدت مجاملة لان اخته جارتنا وماما قعدت تقولى خمس دقايق وخلاص مش هتخسرى حاجه اقولها ياستى ما انتى عارفه اللى فيها تقولى مش مهم خلى اللى فيها فيها زى ماهو بس علشان مش تزعل مننا اصلها كل لما تكلمنى تقولى هو احنا مش اد المقام وبصراحة بتحرجنى قولت ماااشى خليه يجى وروحت متشمرة وراصاهم اول ما فتح بؤه
وبعدين فلاحة ايه ومتعلمة مين يا فندم هى مصر لسه فيها الحاجت دى .... الفلاحة اللى ما بتصدق جوازة علشان ترحمها من الغيط مش تشوفها غير فى التى فى بس ... دلوقتى خلاص الدنيا اتنورت ومصر بتتقدم بينا ... لاء انا مش بشتغل فى حديد عز بس مبقاش فى فعلا الصورة الراسخة فى الاذهان دى عموما
التعليم عمر ه ما كان مقياس للبنت او غيرها .. ياما متعلمين من الكتب لكن فى الدنيا اجهل من الجهل و ميعرفوش فى الحياة غير السطحية والتفاهه
ربنا يرزقه باللى احسن منى الف مرة
تحياتى
‏قال Desert cat
شـمو نشـادر
لاء انا مش متضايقه بس بحكى موقف لانه مينفعش فعلا جواز الكروته اللى فى شهر ده لازم ا يكون فى فترة خطوبة كبيرة علشان ميحصلش مشاكل فيما بعد ... ها اجى حالا اشوف التاج وربنا يستر يابشمهندس اصل انا بقلق م نالتاجات دى
تحياتى
‏قال Desert cat
واحد مش فاهم حاجة
انا فكرتنى بحاجه واحدة بس لما قالى انه ميترفضش ومفيش منه .. زى حكومتنا محسسانا انها بتجبى علينا وهما بينهبونا وعايشين من خيرنا ..
اخبار امتحاناتك ايه ؟؟
‏قال Desert cat
enjy
بصى يا جميل احننا مننكرش ان فى جواز صالونات بيكون ناجح وبعدين انت ايه رايك الطريقة دى ولا طريقه اخده واتمشى بيه على الكورنيش ؟؟ يعنى يشوفنى فى بيتنا ووسط اهلى ولا يقابلنى فى اخر الشارع الضلمه ؟؟؟ وبعدن فى سؤال بسيط بس محتاجه تجاوبينى عليه .. يعنى ايه ممكن يجرب كمان ؟؟ مش فاهمها دى
‏قال Desert cat
mohamed
بص يا محمد الطريقة مش غلط هو الراجل داخل الباب من بيته ... يعنى الافضل انى الف معاه شوية فى الاماكن العامة وبعدين يقرر يتقدم لى ولا لاء .. ولا انه يجى البيت وفى وسط اهلى ... اظن الحق احق ان يتبع .. لكن انا معجبنيش غروره .. معجبنيش انه لاغى كينونة الانسانة اللى ممكن تكون ام ولاده .. متخيل نفسه هو الحاكم بامره يمكن علشان شكلا وسيم ويمكن علشان ماديا كويس زى ما قولت ويمكن علشان دارس فى مجال كويس وفى
بلد اوربي وغاب عن مصر فترة طويلة منزلش خلالها ولا مرة ولما رجع لاقى الدنيا اتغيرت وعلشان كدا حس انه فرصه متتعوضش .. نسبة العنوسة فى ازدياد والحالة المادية بتنزل للصفر وهو متوفر فيه صفات متخيل انها جواز المرور لاحسن بنت فى الدنيا وانه لما يدخل بيت اى واحده كدا حن واتكرم عليها وهيعمل فيها جميله ويمنحها لقب حرمه المصون ... وزى ما فى الولاد ناس محترمة ومش بتحب تدخل المزاد فى برضه بنات محترمة ومش
بتقبل باللى يدفع اكتر
سعيدة اوى برأيك
تحياتى
‏قال Desert cat
اجندا حمرا
صديقتى الجميلة على فكرة وحشانى جدا .. بصى يا قلبى موضوع المعاينة ده اعتقد انه شر لابد منه لانه اتنين مشافوش بعض قبل كدا مش معقول يتجوزوا على العماوى يعنى ما هو لازم يشوفوا بعض .. حصل اتفاق كان بها محصلش يبقى يادار ما دخلك شر ... انما فعلا انتى عندك حق فى كل كلامك من جواز الكروتة ده لانه مش بيجى من وراه غير المشاكل ماهو الاتنين مبيكونوش فاهمين بعض ولا عارفين بعض بالقدر الكافى وبالتالى كل واحد
بيكتشف فى التانى حاجات مكانش يعرفها وهنا بيحدث الصدام ... واللى يغيظك اكتر انه مش جواز كروته وبس لاء ده والى يغظيك انه كمان يكون فاكر نفسه الفارس المنتظر لاى واحده مهما كانت هى مين ..
نورتينى يا جميله
‏قال Desert cat
قيصر سابقاً
هههههههههه بس كدا القفص هيكون حاجه كبير وانا عايزة حاجه صغنونة وتخنق على الاقل اخد حقى من الخنقة الىل خنقها لى بكلامه
تحياتى
‏قال Desert cat
حبيبـــــــة القمـــــر
حبيب قلبى .. اول سطرين دول بجد ولا ايه النظام اصلى شامه ريحه كدا مش ولابد المهم يا حبيبى انا متفقه معاكى فى كل كلامك .. وبعدين ايه انتى مرتبطة دى ؟؟؟ بتغيظينى يعنى على فكرة فودافون شغاله تمام وزى الفل :)
نورتينى
‏قال Desert cat
ناجي العلي 2000
هههههههههه ابقى اسالهم يا ناجى بعد كدا علشان يدوم التواصل ... لو وقعت تحت ايدى المواصفات اللى انت عايزها هبعتها لك فى ميل
نورتنى
‏قال Desert cat
الربان
استاذى العزيز الربان انا اللى ضايقنى انه قاعد فى البيت وبيسال ومن اول زيارة يعنى كان ممكن يستنى لما يعرف اصلا رئيى ايه موافقه ولا لاء وقتها يبقى يسال وطبعا موضوع الجواز السريع ده انا متفقه مع حضرتك فيه
شرقتنى جدا
احترامى وتقديرى
‏قال Desert cat
GeHaD
انا فعلا اتوكلت على الله يا جهاد بس اتوكلت على الله وقومت نمت اصلى انا ضغطى بينخفض بسرعه ههههههه
تحياتى
‏قال Desert cat
Zika
ماهو ده بقى اللى بيضايقنى يا زيكا ... انك تلاقى شخصيات داخله بيوت الناس مفكره انها نازلة من السما فرصه ومش هتتكرر .. وبعدين خمسينات ايه وبنات مصر مين الله يرحمها صاحبة اجمل حكمة اللى بتقول البنت زى الولد وكمان احسن ههههههههه تحياتى
‏قال Desert cat
محمد الكومي
طب كنت اعتبرنى بنت عمك وتعالى سمعه البؤين دول كان ينوبك ثواب
‏قال Desert cat
فى حب الله
اااااااه شوفتى احنا فى 2008 والناس لسه بتفكر ازاى ؟؟
نورتينى
‏قال Desert cat
محظوظة
ده سؤ ال هيدخل موسوعه جيمس بوند اللعبة اللى عندى على الجهاز وبموت فيها
شرفتينى
‏قال Desert cat
رصيف نمرة خمسة
يانهار مش فايت الحمد لله انى مش اتدبست كان زمانى روحت فيينا يومين ورجعت مطلقه ويبقى لا لحقت اقضى ليالى الانس ولا ليالى الحزن حتى ...
عامله ايه فى الامتحانات يا ميمى ؟؟ ابقى طمنينى عنك
‏قال Eldebug
حلوة واللهى هتنفعنا انتى مرتبطة دى مادام بتجيب مفعول جامد كده ...
وبصفتى راجل شوقى فانا معاكى ان جواز الصوالين هوه الحل لرجوع الاستقرار فى الحياة العائلية تانى عندنا فى ايجيبت ... بس لازم يكون بنفس راضية من الطرفين واستعداد للحوار ... ده بعد مايكون الواد والبت مشوا مع طوب الارض قبل كده ... اصل المشكلة ان البنت زمان كانت قطة مغمضة ..لامؤاخذة يعنى ... انما دلوقتى فى بنات تحبى تقفى تتحدتى معاهم احسن من ميت راجل ... لو زنقتى واحدة من دول مع لطع من ايام سى محسن هتبقى مصيبة ... وبرضه لو البنية فضلت ترفض العرسان اللى داخلالها وطالعالها اهلها هيخافوا عليها وهيضغطوا عليها علشان تقبل باى عرير ييجى بعد كده ... على العموم ربنا يوفقك يا قطة وتلاقى ابن الحلال المناسب
‏قال عبده الرايق
ولا يهمك بكره يجى لك سيد سيده
وفيينا ايه دى كمان اللى بيدرسوا فيها ؟؟؟؟؟؟
ابعدى عن دول استراليا كلها
قال فيينا قال ؟
بلا فقع مراره
‏قال محمد صالح
حوار جريئ جدا
انا متغاظ اوى من الراجل دا راجع من اوربا فاكر بقى انه مفيش زيه اتنين
فاكر ان البنت هتقول دا سايب بنات اوربا كلهم وجاى يخطبنى انا انا م حد غيرى
ولكن اللى يغيظك الاسئله المستفزه بتاعته ولكن عجبنى اوى الحوار والرد وانت مال اهلك والمفروض ان مامة العريس بتبقى عارفه كل كبيره وصغيره قبل ما تروح
دا ايه الغباء دا
تحياتى يا قطتى الجميله
‏قال Unknown
انا لا مع الشارع الضلمة ولا مع الصالونات بس انا شايفة ان المقابلات دى الطرفين بيكونوا عاملين حسابهم انهم يظهروا فى احسن صورة يعنى من الاخر بتكون مقابلات مش مفيدة ..... وبعدين انا كان قصدى ان الكنبة هى اللى تتجرب مش قصدى حاجة بايخة يعنى بس يمكن التعبير خاننى اسفة
‏قال Tamer Nabil Moussa
النت عالم كبير بحر واسع والناس كلها مش زى بعضها

واى علاقة لو مفيش فيها صدق تبقى بايظة من قبل ما تبتدى


تحياتى
‏قال واحد مصرى
طيب و يكتب ليه و بعدين يسافر...ما يدي توكيل لابوه و الا عمه..أو حد من جيرانه ...و تركبي الطيارة بفستان الفرح و يبقى يعملك زفة في المطار:)))))))))).....بس سيبك انتي الواد واثق في نفسه و على درجة عالية من الفتاكة المدمرة ده مفخرة لمصر في بلاد الخواجات...يا بخت اللي هاتتجوز دكر البط ده

تعليق على الموضوع اللي فات:مبروك على
الاذاعة

دمت بخير يا صديقتي العزيزة
هههههههههههههههههههه

والله ضحككتينى بعد كا دخل البيت بيسأل مرتبطة أمال جاى لية شفقة يعنى هههههههههههه

معلش يا بنتى كلنا أتعرضنا لمواقف أنيل من كده عادى عادى كبرى دماغك
‏قال rovy
ازيك يا قطتى انا بس عاوزه اسألك فين الخربشه يعنى انتى عديتها كده ونزل من غير ما يتخربش ..
بالنسبه للسؤال العبيط ده زى ما تقولى كده اصبح لازمه وكأنه الغبى بيقولك انا مهتم بيكى بس بطريقه متخلفه .
الحمد لله انها عديت على خير
انا ضد جواز الصالونات خصوصا لما العريس يبقى عاوز يتجوز ويسافر على طول واللى دايما بتدفع نتيجه التسرع هى البنت .. ربنا يوفقك لما فيه اسعادك .
دمتى بخر وسعاده
تحياتى
rovy
‏قال Asmaa mahaba
هههههههههه
هم الرجاله كلهم كدا وساعات بينطلهم عرق لا مؤاخذه غبا ومخبيش عليكى الستات عرق الغبا دا موجود على طول
ولعلمك قطه فى ناس متفرقش معاها مرتبطه ولا مش مرتبطه السؤال الارجح تقدرى تمشى معايا حتى لو مرتبطه معلش هى صعبه شويه بس انا شوفت من دول كتير مع صديقاتى
تحياتى ليكى سومه_87
‏قال Asmaa mahaba
نسيت اقولك اكسرى وراه زير وريح والله
‏قال wael
ههههههههههههههههههههههههههههه
يعني الراجل بيحب يتأكد مش تسبيه يتأكد
بجد مسخره هو ياعبيط يا متخلف
على العموم بجد مسخره
بوست هايل
‏قال Desert cat
tamer.sala7
ماهو ده شيئ يدعو للاستغراب يا تامر واحد رايح يخطب يقوم يسال العرورة انتى مرتبطة يا فرحتى بيك وبعدين تعالى هنا هو انا بقيت عقاب شديد اوى كدا ده ده انا لحد دلوقتى الملاك البريئ هههه
تحياتى
‏قال Desert cat
عاليا حليم
اه والله يا عاليا ربنا يرحمنا من الحاجات دى .. مستنية رايك يا جميله نورتينى
‏قال Desert cat
Eldebug
يعنى انت عايز لما تروح تتقدم لواحدة تقولها انتى مرتبطة ولا لالالالالالالالالالالاء الافضل مش تروح اصلا ... وبعدين اشمعنا كل الناس لازم تمشى مع بعضها ما فى بنات مش بيمشوا مع حد وولاد برضه بس بامانة مش كتير يعنى ممكن 1%
‏قال Desert cat
عبده الرايق
انا برضه عملت بنصيحة حضرتك وبعدت عن الصين واليابان خالص قال فيينا قال هو ده اللى ناقص
‏قال Desert cat
محمد صالح
ماهو اخته جارتنا يا محمد يعنى فعلا عارفين كل حاجه عننا بس تعمل ايه فى الغباء لما بيسيطر على عقول الناس تحياتى ليك ونورتنى
‏قال Desert cat
enjy
ماهو فى حالة يا انجى لما ميكونوش مثلا زملا فى جامعه ولا شغل ولا اى حاجه مينفعش غير الطريقة دى على الاقل محترمة انتى مقريتيش عمر وسارة ولا ايه يا جميييل دى كانت عامله ضجه جامده .. عموما مفيش اسف ولا حاجه وانا تفهمت وجهة نظرك شرفتينى جدا يا جميله
‏قال Desert cat
Tamer Nabil
بالظبط يا تامر الصدق لازم يكون موجود فى اى وقت واى مكان مش فى النت بس
تحياتى
‏قال Desert cat
واحد مصرى
هما دول المصريين اللى رافعين راسنا فى بلاد الفرنجة ... الله يبارك فيك يا صديقى العزيز
شرفتنى جدا يا ايهاب
‏قال Desert cat
bos bos
بوسى هنا عندنا يا مرحبا يا مرحبا كان جاى يعمل فيا جميلة ويمنحنى لقب حرمه وهو يبقى بعلى .. بس انا طلعت ناكره للجميل هههههههه
نورتينى يا بوس بوس
‏قال Desert cat
rovy
ماهو كان فى بيتنا يا روفى وانا لو عدوى دخل بيتى لازم غصب عنى احترمه ... بالنسبة لجواز الصالونات انا برضه مش بايده لكن فى حالة زى دى مينفعش الا كدا ... لانه لا زميلى ولا جارى ولا اى حاجه خالص ... وبعدين عادى بقى اهو خد الشر وراح شرفتينى يا قمراية
‏قال Desert cat
سومه...مجنونه فى بلد عاقل
انتى تعرفى يا سومة ايه اللى ينر فز ان اللى قدامك يبقى غبى وكمان بيتفزلك فاكر نفسه سبع رجاله فى بعض ... وانه اللى مجابتوش ولاده ... وفى فعلا ناس متخلفه مش بتفرق معاها مرتبطة ولا مش مرتبطة بس ده فى حالة لو اتنين هيتصاحبوا على بع مش يتجوزوا بعض ... نورتينى يا جميله
‏قال Desert cat
سومه...مجنونه فى بلد عاقل
ما انا وقتها مش لاقيت زير كسرت وراه فنجان قهوة
‏قال Desert cat
wael
يعنى يا وائل كان جاى يخطبنى ولا يشوفنى مر تبطة ولا لاء ... ده هو العبط بعينه نورتنى يا دكتور
‏قال Mafrousa
قطه انا اتفرست
والفرسه اللى عندك اكبر كتير من الفرسه اللى عندى

تصدقى أ،ا لو واحد جاى يخطبنى و سسألنى انتى مرتبطه؟
حقوله أه و انقطه بس

هههههههههههههههههه
ده أهبل باين يالله ما أهو انا ناقصه كمان الخطاب.......
يالله فرسنى و فقعلى مرارتى زى اختى مفقوعه

المشاركات الشائعة