أكــل لحـــم ميــــت

لاء مش قصدى الفراخ المصابة بأنفلونزا الطيور ... ولا لحم الحمير الميتة القضية الشهيرة فى الفترة الأخيرة
ولو أنها أخف وطأة من أكل لحوم البشر بعضهم لبعض .... ولا أقصد أيضاً بعض القبائل البدائية من آكلى لحوم البشر ولكن مقصدى هنا هو الغيبة والنميمة .... التى سادت وأنتشرت بشكل مقزز ... أثناء تواجدى فى أحد التجمعات العامة كان يجلس بجوارى رجلين يتكلمون بصوت مسموع .... فى البداية كان حديثاً عادياً وما لبث أحدهم ان ذكر اسم شخص فأخذ الآخر يعدد من سيئاته وينتقل بالحديث من شخص لشخص آخر والغريب أنه لا أحد ممن ذكرهم توجد به حسنة واحدة ترضى الله ... وكأنه هو الملاك ذو الأجنحة البيضاء الذى هبط لنا على الأرض فجأة .... عجبت حقاً ووجدت نفسى اتسائل إن الله سبحانه وتعالى نهى عن محاسبة البشر لبشر آخر فما بال من يجلس ويجمع حوله الآخرين ليغتاب هذا ويلعن ويسب هذا ويخوض فى عرض ذاك ... أهذا الشخص متناسى قول الله سبحانه وتعالى " ايحب أحدكم أن يأكل لحم أخيه ميتاً " ( صدق الله العظيم )
أهذا الشخص ومن هم على شاكلته من يخضون فى أعراض الناس متناسين " كما تدين تدان والديان لا يموت "
وهنا تذكرت مناقشه بينى وبين احد الاشخاص عندما سالته لماذا عندما يرى اسم شخص كان صديق ودود له او يتحين الفرص هو لذكر اسمه ليظل يسب ويلعن فيه فاجابنى لانه انسان كداب ... طيب كذب عليك فى ايه ؟؟ كان بيوصلنى كلام على لسانه من ناس قريبين ليه .... وبتصدق ليه انا مؤمنة بمبدأ إذا سمعت أذناك لابد أن ترى عيناك ... كان جوابه لاء هو كداب ومنافق والقاء العديد من السباب الى مالا نهاية فكان لابد من قفل النقاش قبل ما اصاب بهارت اتاك .... وفى النهاية اكتشفت الموضوع مكانش كدب قد ما هو كان موقف واختلاف لم يوافق هوى الشخص الذى كنت اتناقش معه ... الهذا الحد اصبح من يختلف مع رؤيتنا وهويتنا انسان كداب ومنافق و العديد من الاتهامات ؟؟؟؟
.... واعود بفكرى الى عالمنا الالكترونى لاتذكر البعض يجلس خلف شاشات الحاسب باسماء مستعارة ويظل يسب ويلعن وفى النهاية يستشهد بآية قرآنية قاصص منها ما يتناسب مع هواه ... وكأنه اثناء سبه والخوض فى عرض الناس يظن أنه يعمل عمل عظيم او كانه يجاهد فى سبيل الله ليختتم كلامه اللاعقلى بقول مأثور او آيه قرآنية وكأنه اثناء غيبته للآخرين كان متلذذ بطعم لحم أخيه الذى كان يغتابه ..... وهنا اذكر نفسى والجميع بحديث الرسول صلى الله عليه وسلم
( إن المفلس من أمتي يأتي يوم القيامة بصلاة وصيام وزكاة، ويأتي قد شتم هذا، وقذف هذا، وأكل مال هذا، وسفك دم هذا، وضرب هذا، فيعطى هذا من حسناته، وهذا من حسناته، فإن فنيت حسناته قبل أن يقضى ما عليه أخذ من خطاياهم فطرحت عليه، ثم طرح في النار! ) صحيح مسلم

Comments

tamer.sala7 said…
ربنا يهدي الجميع بس مش النميمة وبس اللي بيمتاز بيها الشعب المصري

ده حاجات كتير اوي ومشهورين بيها برة

وكلها حاجات مش كويسة ويا ريت كل واحد يبدأ بنفسه
EmY said…
ازيك يا قطة عامله ايه

بصي يا قمر انا معاكي في كل حرف انتي قولتيه

و للأسف في ناس بنتصب نفسها قاضي علي اخلاق و معتقدات غيرها و حتي علاقتهم بربهم و يعينوا نفسهم اوصياء علي الناس متفهميش مين اي اداهم الحق ده و ليه هما يعني

الغيبه و النميمه طبعآ منهي عنها في كل الكتب و الشرائع السماويه غير انها غير مقبوله اخلاقيآ


ده طبعآ غير الناس الي بتصدر احكام بالتكفير و فساد المله و حاجات كتير كده متعرفيش جابوها منين

تحياتي يا قطتنا
Abo 7anf said…
السلام عليكم
ازيك يقطه
اكيد الناس دى مش واخده بالها انها زى مبتشتم بتتشتم
وانها بثبت جبنها لان لو عندها جراءه كانت قالت الكلام دا فى وش الشخص التانى
ازيك ياقطتى

عايزة اقولك حاجة ان اللى يسمح لنفسه يكون وصى على حد وعلى كلامه وتصرفاته ده انسان مش طبيعى بمعنى انه لو ابوه او امه او ماشبه ذلك اكيد ليه حق ولكن عادة تلاقى ناس غريبة تدخل نفسها طويب وانت مااالك خليك فى نفسك واخلاقك انت
حاجة غريبة
ربنا يحمينا من الغيبة والنميمة


تحياتى
ربنا يكفيكى و يكفينى و يكفى الناس كلها شرها ...قولى آمين يا قطه
برافو عليكى يا قطة..
بس أقولك على حاجة..
لما تلاقى النوعية دى من الناس إعملى حاجة من إتنين ..
1-ما تشتركيش معاهم فى الغيبة أو النميمة و حسسيهم إنك مشمئزة من حديثهم..؟
2-لو وجهوا لكى الكلام بالسؤال مثلا عن أخلاق فلانة أو لبس علانة أو أخت ترتانة..سيبيهم و قومى و قوليلهم أنا ما باغتابش حد و ربنا يصلح حالها و حالنا..
ساعتها حيحصل حاجة من إتنين برضه
1-يحسوا قد إيه هما صغيرين قدام بعض و بيعملوا حاجة غلط فعلا
2- تكونى إنتى نفسك المادة التالية فى جلسة النميمة بتاعتهم و ساعتها تلاقى حد تاخدى من حسناته يوم الموقف العظيم..
دمتى بكل خير أختاه
ايوية said…
ابشع شى انك تتكلم على حد بكل صفة سية وبعد كدة لما تقابلة تكلمة بكل حب وكانك مقولتش اى شى
ربنا يرحمنا
النميمة من اسوا الاشياء فى المجتمعات ومن هنا ادعو الجميع ونفسى البعد عن النميمة والغيبة
كفانا الله شرهما
تحياتى
Sherif said…
على فكرة .. أجمل حاجة إن الانسان يكون مهذب .. يعنى عندك كلمة طيبة كان .. والا فالصمت أحلى

يقول الرسول عليه السلام

انكم لن تسعوا الناس بأموالكم .. فسعوهم ببسط الوجه والخلق الحسن

ماعلهش
سيرة الناس و الذم فيهم هي فاكهه الحديث في مجتمعنا
أما بالنسبة لمن يكتب موضوع فيه سب ولعن وفي النهايه يستشهد بحديث أو يضع آيه قرآنيه
فهذا من باب انه في نهاية الحديث يجب أن يذكرك بأنه رجل بردو بيعرف ربنا
وبالمرة يؤكد لك ان كلامه على فلان يدخل تحت طائلة الحلال وانه لا يفتري عليه
حيث أن العارفين بالله أمثاله رأيهم دائما صواب
نهر الحب said…
بصى اعتقد بالاضافة الى انها عادة
كمان عامل الفراغ والثقافة العامة يعنى الموروث العام والجهل بالدين سببا فى انتشار تلك العادة السيئة
كل الاحترام
عندك حق يا كات ..
اغلب الناس بقت كده اساسا والمشكله ان محدش حاسس ان فى مشكله ..
بقت حاجه طبيعيه يعنى ..
يشتم ده و يجيب فى سيرة ده ويشوه صورة ده ..
يا ريت كل واحد يراعى ربنا فى الكلام اللى بيقوله ..
و تحياتى ليك يا جميل ..
أسامة أمين
karim said…
تحياتى على الموضوع
NIDAAL PAL said…
بصى المشكلة انه فيه ناس كتير ماشيين بمبدأ امريكا فى الحوار ده
من ليس معنا فهو ضدنا
فدول ناس الى يعترض على كلامهم او يبقى ليه راى تانى يبقى مابيفهمش و غبى و كداب و كله كله بقى
شكلك عايزة توقعينى فى غلط ههههههههههههه
عموما ربنا يهدى الجميع
ً
سنووايت said…
انتي عارفة يا قطة
لما بأقرا ايات النهي عن الغيبة في القران بأقول سبحان خالق الانسان اللي عارف نفس الانسان وطباعه
شوفي اد ايه ديننا جميل لو بس اخدنا الاخلاقيات والسلوكيات من اوامره ونواهيه بس للاسف دلوقتي زي ما قلتي كل واحد بيجيب اية ويمسك في حاجة معينة وينصب نفسه حاكم علي الناس وعلاقتهم بربنا وفاكر انه هيصلح الكون وان ربنا بعته علشان يهدي الناس
ربنا يهدينا جميعا , بوست حلو اوي
هانى said…
دى عادة ومرض

والانسان المفروض يعرف ان مفيش حد كامل

وكمان لايصح ولايجوز ولا هو من الدين ان الواحد يجرح فى انسان غير موجود ويقول علية كلام

تحياتى
الربان said…
تحياتي

اشكرك انك فكرتينا و ذكرتينا...
الغيبة و النميمة من اخطر الامراض
التي تفتك بالمجتمعات....

المشكلة اننا كلنا أعين او عيون مفتوحة
علي الاخرين...و لا نتبصر او نبصر أخطاؤنا نحن...و ما أكثرها...

من اراد ان يعيش سعيدا فعلية ان ينظر
الي داخلة...يتفحص نفسه..يري عيوبه
فيعالجها...يستاصلها ان تمكن...

تعسا لعبد تتبع عورات الناس...اي عيوبهم....و هنيئا لعبد علم عيوبه
فعكف عليها يستأصلها ...فيهنأ براحة بال...

اللهم كف السنتنا عن القيل و القال
و الجدال...و ذكر نقائص الناس ..اشغلنا بأنفسنا عن الاخرين
ونقي صحائفنا...

بارك الله فيك
و لك كل التحية و التقدير....
قطتنا العسل

صباح الفل ياقمر

الغيبه و النميمه انتشرت اوي في الزمن اللي بنعيش فيه

كل واحد كمان بقه شايل سيفه في وش اللي بيعترض عليه

كل واحد فاكر نفسه صح دايما

المصيبه مش بس في النميمه و الغيبه ياقطه المصيبه في انهم مش حاسين انهم بيعملوا حاجه غلط مفكرين انهم بكده صح و علي الطريق القويم

للاسف الانترنت ساهم برضه في كده زي ماذكرتي تلاقي الواحد او الواحده من دول داخل بأسم مستعار و هاتك ياقله ادب و اسلوب غير راقي في الحوار بالمره و مطلوب مننا اننا نسكت عشان لو اتكلمنا نبقي زيهم و لو سكتنا يقول علينا جبناء

زمان كانوا بيتهموا الستات انهم هما اللي بدعوا النميمه دلوقتي صدقيني و من اللي بشوفه الرجاله بقت بتنم اكتر

ربنا يكفينا شر النميمه و الغيبه

تحياتي ياقمرايه علي البوست الواقعي و يارب الكل يفكر فيه
موضوع جرئ اخر
احب اقولك ان الغيبه والنميمه دى بقى شئ عادى فى مجتمعنا لان مينفع يوم يعدى الا ما شخص يتكلم عن التانى ويقولك دا بيعمل كذا ودا بيعمل كذا ويحقد عليه وممكن يوصل الامر ان يعطله عن شغله وخلافه لكن الاختلاف فى الرائ دا مبدء لسه مش منتشر اوى فى مصر بمعنى ان لو فى واحد مختلف معايا يبقى م بيحبنى وعاوز يضرنى ولازم اكون له بالمرصاد وارجو من المولى عزوجل ان يهدى البشر جميعا
ADAM said…
الإنسان اللي يتكلم على إنسان من وراه

يبقى جبان

وناقص

بس هنعمل ايه ؟

بنقول حسبي الله ونعم الوكيل

والمسيح عليه السلام بيقول

الرب يدافع عنكم وأنتم صامتون


تحياتي


آدم
عن معاذ بن جبل -رضي الله عنه- قال: قلت: يا رسول الله، أخبرني بعمل يدخلني الجنة، ويباعدني عن النار
قال: لقد سألت عن عظيم، وإنه ليسير على من يسره الله -تعالى- عليه
تعبد الله ولا تشرك به شيئا
وتقيم الصلاة، وتؤتي الزكاة، وتصوم رمضان، وتحج البيت
ثم قال رسول الله -صلى الله عليه وسلم-: ألا أدلك على أبواب الخير؟
الصوم جنة، والصدقة تطفئ الخطيئة كما يطفئ الماء النار، وصلاة الرجل في جوف الليل، ثم تلا قوله -تعالى-: تَتَجَافَى جُنُوبُهُمْ عَنِ الْمَضَاجِعِ حتى بلغ: يَعْمَلُونَ
ثم قال رسول الله -صلى الله عليه وسلم-: ألا أخبرك برأس الأمر وعموده وذروة سنامه؟ قلت: بلى يا رسول الله
قال: رأس الأمر الإسلام، وعموده الصلاة، وذروة سنامه الجهاد في سبيل الله،
ثم قال:
ألا أخبرك بملاك ذلك كله؟ قلت: بلى يا رسول الله. فأخذ بلسانه وقال: كف عليك هذا. قلت: يا نبي الله، وإنا لمؤاخذون بما نتكلم به؟
قال: ثكلتك أمك يا معاذ، وهل يكب الناس في النار على وجوههم، أو قال: على مناخرهم إلا حصائد ألسنتهم

عفانا الله وعفاكى من حصائد السنتنا السيئه
تياتى ليكى سومه_87
انا بقالى مدة كبيرة بفكر فى الموضوع ده والله فعلا

يمكن اللى بيتضايق من حد غصب عنه بيتكلم عنه بالرغم انه عارف ان كل الكلام ده حرام ...بس ساعات من غيظه يعنى بس وانه مش عارف يقول الكلام ده فى وشه

ربنا يهدينا كلنا يارب ويعافينا

بعتذر عن غيابي عن متابعة بلوجتك ياحبيبي
...
Desert cat said…
tamer.sala7
انا مش حددت فى الموضوع الشعب المصرى ولا اى شعب يا تامر هو عموما الكلام عام على كل حد بيتناسى انه بشر ومش من حقه الخوض فى حق الناس سواء بكلام او افعال
تحياتى
Desert cat said…
EmY
طبعا يا ميمى ردك لوحدة اضافه هايله للبوست
لخص الناس اللى معيين نفسهم اوصياء واللى بياسلموا ويكفروا فى غيرهم وكانهم ملايكة منزلين من السما
مع ان لو كل واحد بص لنفسه اكيد هينشغل عن عيوب الناس
نورتينى يا جميله
على فكرة ياقطه انا بقالي فترة معلقتش لكني متابعه كل بوست كتبتيه
وهقولك حاجه كتير بنقول الاختلاف في الرأي لايفسد للود قضيه
بس فيه امور مينفعش فيهااختلاف فيه امور مسلم بيها ونزل فيها حكم صريح من القران والسنه
زي بالزبط موضوع الغيبه والنميمه اللي ذكرتيه دا
مينفعش ابقى واخده الامور تهريج ومن باب المألسه على فلان وعلان ونقضي القعده تهريج ونقول ادينا بنفضفض ونهيس ونضيع وقت
حقيقي ناس كتير بتتفنن في الاكل دا وبطريقه تضحك
وعاااااااادي
نسيت اقولك اني عايزة اكلمك من فترة بجد وضروري ومش عارفه ازاي اوصلك
Desert cat said…
حبيبة القمر
ده ايميلى
nana_catofdesert@hotmail.com
طبعا يشرفنى ضاافتك فى اى وقت
وتنورى ايملى
Desert cat said…
Abo 7anf
الموضوع مش جرأة اد ما هو نفاق يا ابو حنف
يعنى اللى يقابل واحد يضحك فى وشه وياخده بالحضن وبعد ما يمشى يقعد يسب ويلعن فيه
ده اعتقد مينفعش نقول عليه محتاد جرأة انما ده محتاج طهارة ونقاء من جواه
تحياتى
Desert cat said…
رصيف نمرة خمسة
ازيك يا ايمى
وحشانى جدا
طمنينى على اخبار امتحناتك
تعرفى اللى بتقولى عليه ده بيعين نفسه وصى على الناس
المفروض يكون ردنا عليه
يا ابن ادم لا تنظر لعورة امرئ فللناس السن وعيون
تحياتى يا جميله
Desert cat said…
واحدة مفروسة
اللهمخ امين يا حبيبتى
ربنا يكفى الناس ئر بعضها
نورتينى
Desert cat said…
واحد من البلد دى
يا فندم والله انا مكنتش قاعده معاهم انا بس كنت راميه ودانى
هههههههههههه
وبعدين بصراحة كتمت نفسى بالعافيه لانى كنت خلاص شوية وهتدخل فى الحوار
بس رجعت قولت من تدخل فيما لا يعنيه نال مالايرضيه وكمان ناس مش عارفاهم يعنى هيكون فضول قاتل
انما لو حصل وقاعده مع حد وجه يتكلم على حد
اما بنسحب خالص من الحوار او مردش عليه اسيبه يكلم فى نفسه
تحياتى
Desert cat said…
ايوية
اهو النموذج ده بقى يا يويو بيكون محتاج ابادة من المجتمع
وللاسف انتشر جدا
يقابلك يضحك فى وشك ويبوسك وبالاحضان يا بلادنا يا حلاوة وبعد ما تمشى يعاديك على اللى بيتقال فى ضهرك
بس برضه ده معناه انه ان الحقد ما شاء الله مسيطر عليه وده هو اللى بيتعذب مش اللى بيغتابه
ربنا يشفيهم ويطهر قلوبهم
تحياتى يا جميله
Desert cat said…
رئـــــيسـة حزب الأحلام
ربنا يكفينا جميعا شر الغيبه والمغتابين
نورتينى يا سلوى
تحياتى
Desert cat said…
Sherif
صح يا شريف لو طبقنا المبدأ ده صدقنى المجتمع هيكون انقى ما يكون
لا خلافات ولا مشاكل لانه مش هيكون فى حقد من الاساس
الكلمة الطيبة صدقة
وتبسمك فى وجه اخيك صدقه
مش ابتسم فى وجهه دلوقتى واطعنه بخنجر فى ضهره اول ما يمشى
شرفتنى جدا
تحياتى
Desert cat said…
لورنس العرب
اه طبعا ناس دائما على صواب بدليل استشاهدهم بالقران الكريم واللى يرد عليه ويقوله حجتك بالطله يقوله انت ايش عرفك انت كافر اساسا
روح توب وارجع لربك
على اساس انه يملك صقوك الغفران
تحياتى
Desert cat said…
نهر الحب
طبعا وجهة نظرك صحيحة جدا
فالالتزام بالدين وتعاليمه والثقافه عنصر مهم جدا لرقى الانسان وبعده عن ارتكاب اى حماقه
تحياتى
Desert cat said…
شـمو نشـادر
والله انت جبت المفيد يا بشمهندس
كل واحد عمال يغلط ويخوض وحاسس ان بيعمل حاجه كويسه كدا هو مش بيغلط الغلطان دائما الطرف الاخر
ربنا يهدى الجميع
تحياتى
Desert cat said…
karim
تحياتى على التعقيب
WhItE HeArT said…
رأيم محترم جدا

تحياتي
والله يا قطتى الغيبة والنميمة بقت من اقذر الصفات اللى موجودة
وممكن يبقى الواحد بيغتاب حد ولسه واكل عيش وملح معاه

ربنا يبعدنا عن الناس دى ويهديهم
Tamer Nabil said…
تعرفى عزيزتى قطة

تعبير اللخم الميت تعبير صادق بجد

يحمل بداخلة معانى كنير للنميمة واصحابها

تحياتى
قرات مقالك اكثر من 3 مرات...وفيهم كلهم شعرت بانة برغم صغر كلماتة وقوة معانية ...قد مس اناس كثيرة..عارفة كان ليا صديقة عندها الداء دة وفى النهاية اذت نفسها جدا...

بجد تحياتى ربنا يجعل كلمك نقطة نور ..
الربان said…
تحياتي

يارب تكوني بخير...

حجزنا لك مكان معانا في رحلة نهاية الاسبوع....:)

تحياتي
Miso soup said…
سلامتك من الهارت اتاك
القافلة تسير و ال... تهوهو!!!! ١
Miso soup said…
سلامتك من الهارت اتاك
القافلة تسير و ال... تهوهو !!!!
bar2ash said…
ايوووووووووووووووه كده
هي دي المواضيع ولا بلاش
متعرفيش لو حد قرأ الموضوع ده واستفاد ربنا هيكافئك اد ايه
وبجد الموضوع هايل ربنا يوفقنا كلنا ويجنبنا الخوض في اعراض الناس

تحياتي يا احلي قطه
MATRIX said…
والله العظيم المدونة دى حلوة اوى
نونوة هههههههه
فكرة حلوة اوى
على فكرة انا بحب القطط اوى
نااااااااااااااو
Zika said…
اولا ازيك عامله ايه ؟
............
انا اكيد معاكي في اللي انتي بتقوليه
لازم قبل ما نتكلم علي حد تاني
نفكر يا تري هل انا فيا نفس العيب ولا لأ
وقبل ما اتكلم عن بني ادم حتي ولو كنا وحش
لازم اعرف انه كده هياخد حسنات علي حسابي
وكمان حتي لو هو فيه الصفات دي فعلا
انا كمان هاخد ذنوب عشان ده طبعا في حد ذاته حرام
والديليل الحديث اللي انتي قولتيه
برافو عليكي
تحياتي يا قطة
Desert cat said…
NIDAAL PAL
لاء هو انا مش بوقعك فى غلط لان انت اللى بتكتب من نفسك مش انا اللى بمليك
هههههههه
ثم موضوع مبدأ أمريكا ده من ليس معى فهو ضدى انا ببعد عن الناس دى مبحبش اتعامل معاها
وفى فرق يا نضال بين الاختلاف فى الراى وبين الغيبة والنميمة
تحياتى
Desert cat said…
سنووايت
ماهى المشكلة يا دكتورة فى اللى منصب نفسه الحاكم والجلاد
وكانه منزه عن الاخطاء
اذا كان هو بينقض خطأ فى الشخص اللى بيغتابه اساسا
نورتينى
Desert cat said…
هانى
دى المصيبة احيانا مش بتيجى غير من اللى بيدعى التدين يا هانى
تلاقيه عامل مجلس نميمة وفى الاخر يقول استغفر الله العظيم وكانه بكدا خلاص تاب واناب
تحياتى
Desert cat said…
الربان
استاذى العزيز لا شكر على واجب يا فندم
هو موقف حصل قدامى حبيت بس اتكلم عنه لان من الواضح ان القلوب محتاجه عملية تطهير علشان نعرف نعيش فى مجتمع سوى
وانا اكمان اتمنى زى حضرتك كل واحد قبل ما ينظر على غيرهه ينظر داخل نفسه
احترامى وتقديرى
Desert cat said…
اجندا حمرا
يا صباح الفل على عيون ارق بنوتة فى الدنيا
ما هو انا يا قلبى ملاحظة وكتير زينا ملاحظين ان اللى بينموا ويجيبوا فى سيرة الناس بيكونوا فاكرين انهم صح على طول مع ان سبحان الله مفيش حد دايما صح ومبيغطلش غير الملايكة وعلى ما اظان انهم بنى ادمن موجودين وسطنا يعنى بشر
اما اللى بيستخبى ورا شاشه ده ويشتم فده انسان جبان
ومعندوش اخلاق ...
نورتينى يا جميله
تحياتى ليكى
Desert cat said…
محمد صالح
مشكلة الاختلاف فى الرأى يا محمد دى مشكلة تانية للاسف فى ناس غير مؤهله لثقافه الاختلاف
ومش بتعرف تفصل بين اختلاف الرأى وشخصنة الآراء ودى فى حد ذاتها مشكله
بينتج عنها فعلا الغيبة والنميمة
اشكرك جدا على ذوقك
احترامى وتقديرى
Desert cat said…
ADAM
طبعا يا ادم ربنا موجود و " يمهل ولا يهمل "
فكل واحد بقى يعمل ما بداله لانه زى ما بياذى حد حتى لو بكلمه فى غيابه هيكون فى اللى ياذيه
تحياتى
Desert cat said…
سومه...مجنونه فى بلد عاقل
صدق رسول الله صلى الله عليه وسلم
ربنا يكفينا جميعا شر انفسنا
تحياتى
Desert cat said…
كفايـة طيبـة
حمد الله على سلامتك يا جميلة
وربنا يخفف الشغل ده شوية بقى خليكى تروقي لنا من تانى

بصى يا قلبى مش معنى ان اتنين اتخاصموا يبقوا يتكلموا على بعض دى اسمها قلة ادب وخسه قلة اصل
لان الخصام مش معناه مذمة الناس

المهم ابقى طمنينى عنك
تحياتى
Desert cat said…
حبيبـــــــة القمـــــر
حبيبى انت يا زومل
طبعا كلامك صح
محتاجين شوية توعية علشان كل واحد يعرف اللى ليه من اللى عليه
نورتينى يا جميله
Desert cat said…
WhItE HeArT
ميرسى جدا
تحياتى
Desert cat said…
اهو ده عيبه
هههههههه
على راى صديقتى الجميله
كانت بتقول الملح بيدوب والعيش بينهضم واخرته معروفه فين
تحياتى
Desert cat said…
Tamer Nabil
اشكرك جدا يا تامر
شرفتنى
Desert cat said…
.:.-=- ELGaZaLy-=-.:.
اشكرك جدا يا محمد على ذوقك
وربنا يهدى الجميع للخير
تحياتى
Desert cat said…
الربان
انا اسفه جدا والله على التاخير
بس مشغولة شوية وخلاص هانت
عموما انا خلاص روحت اكدت الحجز
:)
احترامى وتقديرى
Desert cat said…
Miso soup
ههههههه
الله يسلمك
انا برضه بقول زيك كدا
نورتنى
Desert cat said…
bar2ash
ميرسى جدا يا دكتور
تحياتى
Desert cat said…
MATRIX
والله انا متشكرة جدا يا ما تريكس
وطالما بتحب القطط بقى
اذن انت من اليوم عضو مهم جدا فى حزب القطط الصحراوية
نورتنى
Desert cat said…
Zika
انا الحمد لله كويسه يا زيكا
يارب انت كمان تكون بخير
ماهو لو كل الناس بتفكر بنفس طريقة تفكيرك مكنش بقى فى اى صدامات فى المجتمع حقيقى الادب والاخلاق عمرها ما كانت مرتبطة بسن
وانت ما شاء الله عليك بالرغم من صغر سنك الا ان عقلك كبير
احترامى وتقديرى يا زيكا
السلام عليكم في البداية مدونتك جميلة
جدا مشاء الله
للاسف ناس كتير تناست الحديث الشريف ايحب احدكم ان ياكل لحم اخيه ميتا ومش بقوا بياكلوا بس وكل يوم بيقطعوا في فروته زي مابيقولوا المحزن لما تلاقي الصديق يغتاب صديقه ومن قدامه يعمل نفسه حبيبه وصحبه

جزاكي الله كل خير عن موضوعك وجعله في ميزان حسناتك

تقبل مرورنا وزيارتنا الاولي ولن تكون الاخيرة باذن الله
تحياتنا
مدرس الانجليزي بتاعي الاستاذ عبد المحسن كامل من بلبيس كان منقول من بلدهم لعندنا عقاب..انا كنت باحبه جدا والوكيل بتاعنا ما كاننشي بيحبه واستقصده كذا مرة

وكنا في حصة في مرة والكلام اخدنا وجات سيرة الوكيل فلقيت اني (اوجب ) مع استاذي واقعد اشتم شوية في الوكيل

لكن لقيته راح موقفني وقال انه مبيحبش يسمع الكلام ده ابدا ولما قلتله ان الوكيل هو اللي جايبه لنفسه وان الواحد معذور

قال ان مفيش حاجة اسمها معذور وان الحديث صريح ( وهل يكب الناس علي وجوههم في النار الا حصائد السنتهم !) وانه هو نفسه كان كده لكن في مرة قرر انه يستجمع عزيمته وانه ميتكلمشي علي حد بعدها ابدا

وعمري ما لقيته بيتكلم علي حد ابدا

تحياتي
rovy said…
ازيك يا قطه وايه اخبار الخربشه
حتصدقينى لو قلتلك انى دخلت كثير قوى وكل مره بعد ما اقرأ البوست ما اعرفش اعلق والله بجد اول ما ادوس على التعليقات النت يعلق واضطر اقفل خالص الاكسبلورر وكل مره تتكرر نفس الحكايه المره دى مصدقتش لما دخل على كل حال الحمدلله
البوست ده هايل وفعلا ابشع شىء بيقززنى النميمه .. سبحان الله العلى العظيم لما صورها فى ابشع الصور ومع ذلك تناست الناس تلك الايه الكريمه
ربنا يهدينا جميعا وكل واحد فينا يتعلم ينقد نفسه قبل الغير
.
دمتى بخير

تحياتى

rovy
mohamed said…
تصدقى أن مجتمعنا بنسبة 99.99% مش شاغلهم الا شيئين
الرغى والكلام على الغير
السيد المسيح قال قبل أن تدين القذى التى فى عين غيرك أخرج الشجرة التى فى عينك------ القذى خشبة فى رفع أبرة الخياطة
وفى القرأن الكريم قال ربنا أن اللة لايحب الجهر بالسوء الا لمن ظلم) أظن من المفروض نشغل نفسنا بأمورنا , وأمور الاخرين تخصهم, كما قيل من تتبع عورات الناس تتبع الناس عوراتة
ومن منا ليس لدية عورات أو أخطاء

كما أن الستر حتى للمخطىء قيمة أسلامية وفى كل الاديان
ألم ينهر سيدى محمد علية الصلاة والسلام
الصحابى الذى قال للزانى أن يذهب للرسول ليتطهر ويقيم علية الحد
الم يقل لة (ألأ كنت داريت علية بثوبك) .هذا المجتمع بمنتهى الصراحة أصبح مريض ويحتاج لعلاج نفسى هم أصبحوا من أكلى لحوم البشر . اما أذا رأينا من يتعدى على حق المجتمع وحقوق الناس وكان هذا الشخص قوى أو عندة مال أو سلطة فالنفاق وأسلوب المداراة يتبع معة, بصراحة أنا قرفان
معلش أنا اسلوبى شديد بس الموضوع ذاد عن الاحتمال .
وجعت دماغك
تقبلى أعتذارى
سلام
Desert cat said…
بنات صاحبة الجلالة
للاسف النميمة آفة ومرض منتشر لابد من استئصاله بزيادة الوعى وكل واحد يحاسب نفسه قبل ما يحاسب الناس
شرفتينى
سعيدة بزيارتك
مع انتشار التكنولوجيا الحديثة انتشرت معها سيئات اخلاقية كثيرة

ربنا يرحمنا ويهدينا ونعرف نستخدم التطور صح

تقبلى تحياتى
Desert cat said…
تايه في وسط البلد
بالظبط زى ما استاذ حضتك عمل بالظبط هو الموضوع فى الاول وفى الاخر عزيمة ده طبعا بالنسبة للناس النمامة
المفروض يكونوا عارفين ان محدش معصوم من الخطأ ويقوفوا مع نفسهم وقفة صدق
تحياتى لحضرتك ولا ستاذك
Desert cat said…
rovy
الحمد لله ان فى النهاية الكومنت اتكتب
طبعا ربنا لم يخلقنا هباءاً هو وحده العالم بالنوايا ونفوس البشر
نورتينى
Desert cat said…
mohamed
الدين يا محمد واضح وصريح
والصفات السيئة اللى المفروض نبعد عنها من نفسنا مش محتاجه مفتى ولا محتاجه حد يعلمها لنا ... لكن الناس محتاجه تصفى مع بعضها
وكل واحد قبل ما ينظر لعورات الناس ينظر لنفسه
دمت بكل خير
احترامى وتقديرى
Desert cat said…
هيثم الدهشان
ماهى التكنولوجيا سلاح ذو حدين والنافع فعلا اللى يستخدم هذا السلاح استخدام صحيح
مودتى
ياقطة دى الحقيقة دلوقت
كل واحد فاكر نفسه ملاك يقولك انا وانا وفلان ده كذا وفيه كذا
ونسى انه مش المفروض ان حد يزكى نفسه
وكمان موضة انت مش عارف انا مين
ماهو ده معناه ان كل واحد برضوة شايف نفسه فوق والباقى تحت
Desert cat said…
wanna b a physician
اه يا دكتور كله كوم وموضوع انت مش عارف انا مين ده كوم تانى
ولو جبت اصله ممكن تلاقيه لا شيئ اساسا
ربنا يهدى الناس
تحياتى

Popular posts from this blog

قميص دهشور

كل تحرش وانتوا طيبين