اثبـــت ثبتـــك الله

محدش يتفاجأ محدش يستغرب خلاص اتعودنا من المهدى عاكف صاحب أقوى تصريحات متناقضة فى التاريخ ... فمنذ فترة ليست بالبعيدة أصدر تصريح قوى البنيان شديد البيان بأن تنظيم القاعدة صناعة أمريكية ... ولأن الأرض قروية وتجيد فن اللف والدوران قام بنقض هذا التصريح وبين يوم وليلة اصبح اسامة بن لادن مجاهد ... والمجاهد مهدى عاكف يرسل تحية للمجاهد اسامة بن لادن ... اللى تسبب فى قتل 3000 مدنى فى برج التجارة ... واكيد كان منهم مسلمين ... ماهو مش كل امريكا كفار وفاسقين خارجين عن الملة .. يعنى لو حد من عيلتك كان فى البرج وقت ما اتفجر كنت هتقول ايه على بن لادن مجاهد برضه ؟ ... المجاهد بن لادن اللى اتربى فى حضن الامريكان وجاهد ضد السوفييت ... اه ماهو القتل والخراب دلوقتى جهاد حتى لو علشان اكسب الود ... وانتوا انصار المجاهدين والتاريخ على مر العصور شاهد ابتداء من مقتل النقراشى مرورا بالخازندار ومحاولة قتل جمال عبدالناصر ... واخيرا وليس اخرا ارهاب طلبة واساتذة الازهر .. وطبعا رايك فى بن لادن اللى قولت عنه صناعة امريكية ورجعت نقضت التصريح تانى بانه مجاهد .. ومش قولت رايك فى الظواهرى ... بحكم انه الرجل الثانى فى تنظيم القاعده .. مجاهد برضه ولا ايه ... اللى يدعو لتوجيه الضربات داخل الكيان الصهيونى فى الذكرى الستين للنكبة مجاهد من وجهة نظر سيادتك ؟؟ ...
المثير للتساؤل هو ليه دايما مفيش تصريح بترسى فيه على بر يعنى بتقول كلام وبعد كام يوم ترجع تعكسه .. هل هو عامل السن مثلا .. ام بيتجدد فى الأمور السياسية أمور ؟؟؟ فايام التعديلات الدستورية اعلن نواب الجماعه انسحابهم من مجلس الشعب علشان رافضينها ... وقرار الانسحاب كان بالليل طلعت الشمس على القرار ساح ... ولاقيناهم تانى يوم بيتنططوا فى المجلس .. واظن ان الجميع مازال حاضر فى ذهنه التصريح الطويل العريض فى 2 ابريل للحث على الاضراب ويا سبحان الله يوم 4 ابريل طلع محمود عزت يتبرأ من الاضراب ومن التصريح كمان ... تضارب التصريحات بتاعتك كترت وذلات لسانك بقت اكتر ... المعارض بالجزمة وطز فى مصر وشعب مصر وكل ده ولسه محكمتش امال لما تحكم ايه اللى هيحصل ... لو حضرتك عندك زهايمر ماهو السن برضه احنا مقدرين ... ممكن تعين لك نائب ينسق لك التصريحات المتناقضه ويتكلم هو فى الصحافة منعا لذلات اللسان
تحديـــــــــــــث
فى أحد الكومنتات وصلنى هذا اللنك من الاستاذ محمد حسن
وبعدما طالعته لا أدرى أهو رجل دين أم بلطجى
اتهام مرشد الإخوان بالتهجم علي جارته الإيطالية

تعليقات

‏قال Alkomi
هو مش ده برضه النطع بتاع طز في مصر

و على فكرة التصريحات مش لله و الوطن دي رد على تصريحات ايمن الظواهري بان تنظيم الاخوان المسلمين اصبح يعمل بلا منهج او خريطة

و بعدين احسنله يخليه في خيبته هو و جماعته المبروكة

اليس الاخوان هم من عقدوا صفقة لصالحهم فقط بان يفرج عن معتقليهم و ياخذوا بعض فتات الحرية
في مقابل اعطاء اصواتهم لمبارك في استفتاء 1987

اليسوا هم من وقفوا جميعا في المجلس يصفقون للمحروس اللي خربها و قاعد على تلها

يا ريت يريحوا و يقولوا انهم فصيل سياسي

انما الدين ده يسيبوه بين ربنا و عباده

طبعا انا ممكن اكون طولت
و لكن افعال الاخوان تنعكس على اقوالهم و ما قولهم عن فعلهم بغريب
‏قال سمراء
لا اعتقد ان السبب هو السن او الزهايمر ولكن اعتقد
انه بياخد راس الكبة ويطير وبعد ما يفهموه ياخد راس كبة تانية ويطير
تحياتي
سمراء
‏قال AHMED SAMIR
يعني يا ستي جت على مهدي عاكف؟
المنظومة كلها غلط في غلط
حكومة على معارضة على امن على احزاب
كله فساااااااااااااااد
الحل هو قنبلة نووية تنسف ونبتدي على نضافة
تحياتي
‏قال tamer.sala7
يا مثبت العقل والدين

مش يمكن احنا اللي اغبية ومش فاهمين ايه المقصود بكلام المجاهد مجدي
معلش معلش

حكم السن

دمتى جميلة

تحياتى
‏قال Heart Beat
الصديقة العزيزة جدا
Desert Cat

اعتقد انه لو ما غيرش كلامه كل شوية مش هايبقى المجاهد الاعظم مهدي عاكف و لا هايبقى مرشد الاخوان

اصل لو الحال اتعدل معاهم و بقوا يرسوا على كلمو واحدة مش هايبقوا اخوان خالص

طيب ما هو لازم يخلينا نضحك من وقت للتاني على تصريحاته

على اساس انها تكون فاكهة تصريحات المعارضة

صحيح في واحد غبي بيقول ان اللي بيقول طز في مصر مواطن بيحب مصر تخيلي الغباء بقى بالشكل ده

طيب لو كان بيكره مصر بقى كان قال ايه اذا كان بيحبها و بيقول طز فيها

معلش الغباء برضه له ناسه

يعني النهارده ضد الانتخابات بكرة الصبح مع الانتخابات و نظام ضحكنا عليكوا و هاندخل الانتخابات

النهارده مع الاضراب و اما عرفوا بأن هراوات عساكر الشرطة جاهزة في الشوارع جريوا استخبوا خافوا لياخدوا فوق دماغهم كالعادة

و بعدين الاضراب ده كان عشان الشعب المصري و مرتبات الغلابة بتوع مصانع المحلة

هم الاخوان بتوع طز في مصر يهمهم الناس دي في ايه

و ياريتهم يقولوا على بن لادن انه مجاهد و ان الظواهري سيد المجاهدين خلي ماما امريكا تزعل منهم و نخلص منهم بقى

الوصول للحكم ده هايفضل حلمهم اللي عمره ما هايتحقق ابدا

اصل نيتهم مش سليمة خالص و كلها مصالح شخصية

يعني لو بيضحكوا على الشعب المصري الغلبان مش هايضحكوا على ربنا سبحانه و تعالى

و من غير كلام الليل بتاعهم ده مش هانلاقي تصريحات نضحك عليها زي ما قلت

خليهم يقولوا و احنا نضحك و الدنيا كلها تقول ايه الغباء ده

ما يرسوا على بر هم بيحبوا مصر و لا بيقولوا طز فيها
‏قال وجهة نظري
شوفت الخبر إمبارح وقعدت أضحك مستني أشوف حتقولي إيه

علي فكره إنتي مقرتيش كل حواره المصيبه
http://www.elaph.com/ElaphWeb/AkhbarKhasa/2008/5/332823.htm

دا مجنون خالص ومينفعش حتي يرعي غنم
‏قال غير معرف…
قطتنا العسل صاحبه المواضيع الناريه
:)

شوفي ياجميل بكل بساطه هما دول الأخوان كالحرباء اللي بتغير لونها مع تغير الفصول
يقول حاجه و يرجع فيها تاني يوم او تالت يوم مش فارقه المهم انهم مايرسوش علي بر
انتي جبتي من الاخر لو البرجين كان فيهم امريكان برضه اكيد كان فيهم مسلمين و لا ياتري طلعوا قبل مايتفجر البرجين؟اكيد كان تصريحاته اختلفت لو سمع بس مجرد سماع ان كان في البرجين مسلمين لكن تقولي ايه
مابنخدش من الاخوان غير كلام كلام و بس
تحياتي ياقمرايه
‏قال محمد صالح
والله على رائ بعض الاشخاص اللى ردوم المنظومه كلها غلط الاحزاب اللى هما اقليه بيعقدوم يجملوم الحزب الوطنى علشان يسيب لهم فرفوته من اللحمه وكمان انا اعتقد ان لو الاخوان متعرضوش مش هيبقوم اخوان لان لو الجماعه اجتمعت على راى واحد ممكن ان مهدى عاكف يفضل قاعد لحد ما يموت ودا ناس كتير جوا الجماعه مش عاوزاه كله عاوز يمشى بدماغه وتوجهاته
ومن الاخر انا اتبع الرائى اللى بيقول نبيدهم بقنبله نوويه ونتغل على نظافه
ودمتم
تحياتى
يا قطة أحب أقولك إن الإخوان كلهم إخوان فعلا..لكن..إخوان بعض..
يعنى يحصلوا على حقوقهم و يحققوا مصالحهم و طز أو طزين أو تلاتين طز فى الباقى..
وبعدين أى حد من هواة الأضواء عندما يجد أن الأضواء ستنحسر عنه لابد أن يلفت إليه الأنظار بأى شكل من الأشكال..
سواء بقى كان بتصريحات غلط أو أراء مضادة أو مناهضة لما شجب من قبل..
ربنا يرحمنا
ويثبتنا
و آخيرا.....
لله الأمر من قبل ومن بعد
‏قال .:.-=- ELGaZaLy-=-.:.
همممممممممممممممممممممممم

مش هارد دلوقتى بس بسجل حضور يا افندم
نقدر نقول حكم سن بس المفروض يجي نعمله حبة جلسات يبقي ززي الفل بس هو يجي.
‏قال mohamed hassan
http://elfagr.org//TestAjaxNews.aspx?nwsId=9364&secid=2557
‏قال mohamed
يا بنتي لو خدتي بالك من كلام الناس دي هتتعبي اوي
‏قال Desert cat
محمد الكومي
والله يا محمد احنا لو هنقد نعدد فى مساؤهم فمش هنلاقى لها مكان كافى
تحياتى
‏قال Desert cat
سمراء
انا اعتقد يا سمراء ان ده تخبط بعد ازالة القناع وسقوط عباية الدين عن عمد
تحياتى
‏قال Desert cat
A.SAMIR
والله يا احمد انا موفقاك فى كل كلامك
عايزين ننضف البلد من الاخوان والوطنى والمعارضة بس انا حبيت اعرف ايه سر تضارب التصاريح بتاعة المهدى دى
تحياتى
‏قال Desert cat
tamer.sala7
والله يا تامر المجاهد مجدى
مش مرسينا على بر لا احنا عارفين هو معاهم ولا عليهم
‏قال Desert cat
كاميليا
ما انا برجح كدا برضه يا كامى
دمتى رقيقه
‏قال Desert cat
Heart Beat
صديقتى الجميلة هارت
ماهو فعلا بيضحكنا بتصريحاته
يعنى بعد ما كان بن لادن صناعة امريكية اصبح مجاهد
بالظبط كانه بيقول فيفى عبده دى رجس من عمل الشيطان لكن رقاصه مبدعه
اللى بيقول طز فى مصر بيحب مصر ده مين الغبى اللى قال الكلام ده قلبى حاسس انه هو مش عارفه ليه
اصل مفيش اغبى منه وممكن يخربط بكلام زى ده
نورتينى يا جميله
دمتى بكل خير
‏قال Desert cat
وجهة نظري
اهم حاجه ان حضرتك اول ما شوفت الخبر افتكرتنى وده شيئ يشرفنى طبعا
انا بصراحة كل لما اشوف سطر زيادة فى المقال احس باغماء فى الاخر قولت ربنا يسد نفسه البعيد وقمت شربت نسكافيه

ده مكانه الطبيعى مش مكتب الارشاد مكانه الطبيعى 1 عباسيه
تحياتى
‏قال Desert cat
اجندا حمرا
حبيبتى الرائعة اجندة
اساسا هو لا يهمه مسلمين ولا حتى كفار من عصر الجاهلية الاولى
لان اللى يقول على واحد اتسبب فى قتل الالاف من الابرياء اطفال ونساء وشيوخ مجاهد يبقى هنا الموضوع مش طبيعى
نورتينى يا جميله
تحياتى
‏قال HANY YASSIN
السلام عليكم
ما يفعله مهدى عاكف يدل على شيئين
انه ليس بقائد يجعلك تحترمه وتحترم حزبه
ويدل على انه شخص يتاجر بالدين وعلى الرغم من تعاطفى مع جماعة الاخوان المسلين الا انه بهذا الكلام يعطى الحق للحكومة فى الاستهانة به وبجماعته
دمتم بكل ود
خالص تحياتى
هانى يس
‏قال Zika
وده طبعا بيوضح سلوك الاخوان المتناقض
لان اللي بيعمل هالبني ادم في حياته الشخصيه
بيظهر عليه في حياته العمليه
ال بن لادن مجاهد ال
ربنا يهدي الجدع ده يحسن الموضوع زاد عن حده اوي
‏قال الميكروباص
ولله انا اتذكر انه من كام سنه كان طلع واحد منهم وتكلم عن حقوق الأقباط في مصر !!!!!!!!!!!!!!!
وهذا هوا لصيد في الماء العكر

يا اخوانا كله بيجري وراء مصلحته
كلهم زي بعض بس مع اختلاف المسميات
‏قال الدرعمي
الله يرحمك يا شيخ حسن يا بنا

يا كبيييييير

كان مرشد صح

دلوقتي بقوا بيعينوا عليهم

مضلل مش مرشد

وده ربما يكون لأن الإناء ينضح بما فيه

فلو كان الإخوان الآن على أخلاقيات

إخوان حسن البنا

مكانش مهدي عاكف بقى مرشدهم

أقصد مضللهم


تحياتي



آدم
‏قال الربان
تحياتي

سبحان من يغير و لا يتغير...و نفوس البشر ضعيفة...حتي لو كانت هذه النفس
لعالم كبير او شيخ جليل...

فكل ابن آدم خطاء و خير الخطائين التوابون...

و حضرتك قلتي حكمة " اثبت ثبتك الله "
فالتثبيت يأتي من عند الله....لان قلوبنا ضعيفة... و ارائنا متقلبه
و قلوبنا بين يدي الرحمن يقلبها كيفما يشاء...


تحياتي و تقديري
‏قال Desert cat
محمد صالح
والله يا محمد لا وطنى نافع ولا اخوان راسى له بر ولا حتى شعب عارف يعمل اى حاجه
البلد كلها محتاجه عملية تطهير من المنافقين وكدابين الزفة ومن اصحاب الاقوال لا الافعال
تحياتى
‏قال Desert cat
واحد من البلد دى
ماهو علشان تفضل الاضواء متسلطة عليه المفروض يكون عنده مصادقية فى كلامه
مش تخريف وكلام عكس بعضه
واحيانا كلام مالوش اى اساس من الصح
مبروك نجاح الاولاد
تحياتى
‏قال Desert cat
.:.-=- ELGaZaLy-=-.:.
تشرف فى اى وقت يا فندم
‏قال Desert cat
واحد بيدور علي قلبه
اه والله محتاج جلسات كهربا على المخ لعل تعيد التوازن من تانى
تحياتى
‏قال Desert cat
mohamed hassan
ميرسى جدا على الرابط
انا عملت تحدي وضفته فيه
تحياتى
‏قال Desert cat
mohamed
لاء ما انا مبقتش بركز اوى
لانى اساسا مبقتش فاضيه لا ليهم ولا لغيرهم
دعواتك بقى يا محمد
تحياتى
‏قال مدحت محمد
انا مش عارف ايه سر حبك الكبير ده لمهدى عاكف الصراحة

بتتكلمى عنه كتير

ماعلينا

تعرفى انا رغم انى بقول انى اسامة ابن لادن غلط وسياسته غلط فى غلط الا انى متعاطف معاه جدا

ده من نحية
من نحبة تانية هو ممكن مهدى عاكف قصد صناعة امريكية والله اعلم
من حيث ان لكل فعل رد فعل

بمعنى انى اسامة ابن لادن وجوده سبب ظلم امريكا للشعوب العربية

ممكن ده قصده

والله تعالى اعلم

بس فى العموم يعنى
البلد خربانة خربانة زى مالسادة الزملا قالو حكومة ومعارضة
لا حكومة عارفة تحكم
ولا معارضة عارفة تعارض
تحياتى
‏قال Unknown
عادي

اشمعنى يعني هو اللي هايحترم كلمته

اذا كان الانطاع اللي في الحكم كل يوم برأي وكل يوم في حال

الظاهر كل الناس بتوع السياسة دول عاوزين الحرق
‏قال Desert cat
HANY YASSIN ...
يا هانى تضارب تصاريح مهدى عاكف خلت الجميع يبطل يحترمه هو وجماعته مش الحكومة بس
الحكومة اساسا بطلت تاخد له على كلام
علشان كدا سايبينه براحته يقول كلام ويلغيه تانى يوم ولاحد بيقوله انت بتعمل ايه ..
تحياتى
‏قال Desert cat
Zika
طبعا تضارب تصاريحه دليل على هيكل الجماعه الداخلى
الراجل ده مش ناوى يجيبها لبر يازيكا
ربنا يهديه
‏قال Desert cat
لورنس العرب
تلاقى كانت امريكا راضيه عليهم اصلهم مرحبين بحكمهم بخلاف انهم الجماعه الوحيدة اللى مش مدرجة على قوائم الارهاب
تحياتى
‏قال Desert cat
ADAM
حسن البنا قالها
لكمة حكمة قبل وفاته
ليسوا اخوانا
وليسوا مسلمين
تحياتى
‏قال Desert cat
الربان
استاذى العزيز الربان
تضارب التصاريح من البديهى انه بيبن مدى العقلية اللى الناس بتتعامل معاها
ومعنى انه يقول كلام وينقضه تانى اذن هنا من الطبيعى انه بيفدق مصداقيته لدى الاخرين .. نفس الموضوع مع بروز كام موقف فى الفترة الاخيرة فقدوا تعاطف الناس معاهم وبالتالى محتاج ندعى له بالثبات ولأنفسنا
مودتى
إحترامى وتقديرى
‏قال Desert cat
مدحت محمد
هههههههههههههه
انت اخدت بالك من معزته وغلاوته عندى يا مدحت طيب كويس والله
هو اصلا كشخص لا يعنينى وإنما إختلافى فى أنه يكون واجهه للدين على اسم جماعته الاخوان المسلمين ولكن من الواضح هو لبس عباية الدين من اجل الوصول لهدف سياسى بحت
ثانيا تضارب التصاريح والاقوال وايضا الافعال ... ثالثا واحد عايز يحكمنا وبيقول طز فى مصر وشعبها والمعارض بالجزمة وهو لسه قاعد على كرسى الانتريه فى بيتهم ... واحد بيتعدى على جارته الله اعلم بالسبب الرئيسى .. كل ده وعايز يحكم شعب باكمله فمن الطبيعى اننا نعرف ايه الشخص اللى هيكمنا ده وبانهى منطق وافعاله كلها تدل على انه غير مؤهل لحراسة عقار ....
تحياتى
‏قال Desert cat
أنونيمس
والله يا دكتور انا شخصيا شايفه ان الاخوان الوجه الاخر للحزن الوطنى
يعنى ده عايز الحرق فى قطر والتانى عايز يغرق فى عباره ونخلص
تحياتى
‏قال واحد مصرى
الاخوان ....مهدي عاكف....طز في مصر.....بن لادن صناعة امريكية .....لأ...بن لادن مجاه

لو شفتي الكلام ده جنب بعضه كدة من غير أي اضافات ممكن تقوليلي ايه نوع السحلية اللي عدت على رقبته و هو صغير و لما كبر ابتدا يقرفنا...حد يقوله يركن في حتة ناشفة بلاش كدة يعني

دمت بخير يا صديقتي العزيزة جدا
‏قال شـمو نشـادر
ازيك يا كات ..
على فكرة مدونتك قيمة بجد ..
الراجل مهدى عاكف ده انا اساسا مبحبوش شخصيا كده لله فى لله ..
طول عمره بيقول كلام مش محسوب ولا موزون ..
مش جديده عليه ..
وبالنسبه لابن لادن طول عمرى رأيه فيه انه ممكن يكون نيته كويسه وفاكر انه كده بيجاهد وبيرفع الاسلام وبتاع .. انما هو فاهم غلط او اتوجه غلط من الاول ..
قتل المدنيين والعزل والامنين فى بيوتهم وبلدهم مش جهاد يا عم أس أس ..
بالعكس ده بيدي فكره مش كويسه عن الاسلام وبيدي مبرر لواحد زى بوش يقول علينا ارهابيين والحرب ضد الارهاب والكلام الجميل بتاعه ده ..
بوست جميل يا كات يا شديده ..
تحياتى ..
أسامة امين
‏قال mostafa rayan
شكلك مضايقةمنهم قوي
علي العموم هما ليهم حاجات كتير تضايق
اختى العزيزة انها المصالح ولغة الماال هى ما يحكم ويملك كل شئ

ولا شئ سوى ذلك

عافانا الله من ذلك

تحيااتى لكتابتك الجاامدة

نورينى
‏قال قلوب بتغنى
قطتى الجميله وحشتينى كتير بس ليه عتب عليكى الجماعه الى شاغله بالك بيهم دول ميستاهلوش كل الوقت ده منك ومن المدونين
تحياتى لاجمل قطه
انا ما كنتش باحب القطط بس الظاهر اني غيرت رأيي

اولا انا شاكر مرورك لدي

ثانياانت مدونتك جميلة وهادفة ونفسي اشوف بنات مصر كلهم زيك

ثالثاموضوع المرشد والاخوان ده احسن موضوع للقزقزة الكلامية اليومية ولكنه لايجوز ان يكون قضية مطروحة وتستأثر بالاهتمام

رابعا انا بصراحة اتعلمت اني اختصم من اختصم ولكن كفي بمعلوماتي وحججي التي اعرضها بديلا عن التجريح

دامت تدويناتك ودمت بخير

تحياتي
ناو
‏قال Desert cat
واحد مصرى
صديقى العزيز ايهاب
عندما وضعت الكلمات بجوار بعضها
فكونت جملة مفيده نفادها انها يا سيدى كانت سحلية جبلية تربت وترعرت على فضلات الثعابين

دمت بكل خير
‏قال Desert cat
شـمو نشـادر
اشكرك جدا يابشمهندس على زوقك
بالنسبة لرأيك فانا متفقه معاك فى ان اللى بيعمله اسامه بن لادن واللى على شاكلته ده اكبر تشويه للاسلام وليس دفاع عنه
والا كان فين هو من الاسلام لما راح حارب السوفييت علشان ينول الرضا السامى

تحياتى
‏قال Desert cat
mostafarayan
لاء يا مصطفى انا مش متضايقه منهم كاشخاص انا ماليش دعوة بيهم
انما ان اللى بيضايقنى تصرفاتهم ومينفعش اشوف فعل غلط واسيبهم مش هما برضه الاخوان المسلمين
تحياتى
‏قال Desert cat
دعاء مواجهات
بالظبط يا دعاء وده اللى واضح اوى المصالح الشخصية
اذن هنا المفروض انهم يسموا الاشياء باسمائها الحقيقية ويطلعوا من عباية الدين اللى بيلبسوها فى اى مناسبة
شرفتينى يا دعاء
ويرشفنى زيارة مدونتك
تحياتى يا جميله
‏قال Desert cat
قلوب بتغنى
حبيبة قلبى اللى غايبه عننا
عتابك على عينى وراسى من فوق
بس انا بستغرب من تسميتهم الاخوان المسلمين وفى نفس الوقت افعالهم متناقضه وملهاش اى علاقة لا بالاخوان ولا الاخوات حتى
متغيبيش عننا تانى بقى والله وحشتينى
تحياتى
‏قال Desert cat
تايه في وسط البلد
الحمد لله انك غيرت رايك وحبيت القطط
وطبعا انا اتشرفت بمعرفة مدونة حضرتك
بالنسبة للمرشد فانا كشخص ميهمنيش فى حاجه
انما كرجل سياسى لابس لباس الدين فده اللى المفروض نوقف عنده ونعرف بالظبط هو مين وليه وفين مش يقول النهارده كلام ويرجع فيه تانى بعد ساعه
ده راجل عايز يحكمنا
مش المفروض نعرف مين اللى هيحكمنا وازاى علشان نفكر يمكن ننتخبه
شرفت البلوج يا فندم
احترامى وتقديرى

المشاركات الشائعة