سياســـة القهر

كلنا متفقين إن المجتمع كله عايش فى قهر بسبب الجمايل التى لا تعد ولا تحصى من حكومتنا الرشيدة واللى كل يوم تغرقنا بيها فى صور مختلفه
لكن لما يبقى القهر مننا لبعض .... لما نكون عايشين فى مجتمع واحد واللى بيحصلى هو نفسه اللى بيحصلك ..... يبقى كدا محدش يستغرب من حالة الحقد والكره اللى غزت المجتمع من حوالينا ... حاضر هقولكوا انا بقول الكلام ده ليه
الصبح توجهت لإحدى المصالح الحكومية أخلص أوراق خاصة بالسيد الوالد .... طبعا الأوراق دى المفروض هو اللى يخلصها بنفسه ... لكن لاسباب صحية مينفعش وبما إن انا الوحيدة اللى قاعده له فى البيت فانا الوحيدة برضه اللى معايا توكيل بالتصرف فى الاوراق محدش يفهم غلط ... اوراق بس .... وبناء على هذا التوكيل قمت بالذهاب الى المكان المنشود وهنا تفضل الموظف المختص وسألنى على بطاقتى ... اتفضل ... مسك البطاقة وفضل يبص فيها ... انا شكيت ان البطاقة مزورة بصراحة ... وبعد ما ظنونى قعدت تودى وتجيب ... لاقيته بيقولى يعنى ايه مساحة جوية ... قولت له ده تخصصى يا فندم ... راح قالى وبتشتغلى فين بتخصصك ده .. قولت له فى حالة لو هشتغل بتخصصى ده يبقى اولى بيا موطنى الاصلى وهو الهيئة العامة المصرية للمساحة ... راح قالى يعنى انا دلوقتى اكتب مهنتك ايه فى الورق اللى قدامى ده ... قولت له اكتب اللى قدامك فى البطاقة ... يعنى انتى بتشتغلى كدا فعلا ... هو مكتوب فى الورق بشتغل ولا حاصله ؟؟؟ ... امال بتشتغلى ايه ... انا صاحبة كوفى نت .. راح راكن الورق فى جنب وابتسم ابتسامة عريضة ..... خير يا فندم فى حاجه ؟؟؟ لاء .. بس ايه علاقة دة باللى مكتوب فى البطاقة مش بتشتغلى فى تخصصك ليه ... بطر بعيد عنك .... هو فى حد فى البلد دى بيشتغل فى تخصصه ... عمرك ما شوفت خريج تجارة بيشتغل مهندس ولا خريج هندسة بيشتغل مندوب ... اه على رايك ... فى الوقت ده دخل واحد ولسه الراجل بيقوله صباح الخير ... لاقيت الموظف اللى كان قاعد منشكح وضحكته من الودن للودن قلب على شكل ديناصور ويقوله انا مش قولت لك لما ورقك يجى هبقى ابعتلك ... انت ايه اللى جابك اتفضل من هنا ... الراجل بمنتهى الاستكانة حقك على راسى من فوق يابنى ولف بضهره ورجع .... مهما وصفت مستحيل اقدر اعبر عن حالة الذل والانكسار اللى الراجل خرج بيها ... وبعد ماخرج قعد يكلم نفسه ويقول الواحد هيلاقيها منين ولا منين ... كل شوية دوشة وورقى جه من الوزارة ومجاش ... قولت له اللى انا اعرفه ان الشخص المضغوط هو اللى بيتعامل مع الناس بالطريقة دى بعنى مثلا عنده زحمة شغل وكل واحد بيساله من ناحية وهو مش ملاحق على طلباتهم يعنى عنده ضغط شغل مع ان برضه مش مبرر انه يعامل الناس كانهم جايين يشحتوا منه مش جايين مصلحة حكومية المفروض انها محترمة .... قالى وانتى ايه عرفك انتى شايفه الاوراق دى كلها مطلوب تخلص النهارده ... وراح واخد بطاقتى والتوكيل وقالى انتظرينى دقيقتين وجاى ... وانا قاعده مؤشرات عقلى كلها عمال تعمل حوادث مع بعضها .... هو مش المفروض ان ده المكان المخصص لخدمة المواطنين ... والمفروض انه له حق عندهم .. حتى لو توقيع على ورقه اسمه حقه لان الموظف ده قاعد هنا لخدمته وخدمة غيره .... هو بياخد مرتب من جيب الشعب كله ... مش علشان يخلص لهم خدماتهم ولا علشان يطلع عليهم حالة الحقد والكره اللى اتولدت عند الغالبية بسبب الاحساس بالخيبة والعجز من تغير واقع مستبد او نابعه من التربية نفسها كاحساسه بالدونية او نسب وضيع او تحصيل علمى دون المستوى ايا كان بقى الشخص سواء كان موظف او حتى مدير مراجيح مولد النبى ... بتتولد جواه حالة من الحقد والكره تخليه يمارس سياسة القهر على اى حد لأنه دايما حاسس ان الشخص اللى قدامه احسن منه ... واثناء وانا قاعده اصلح الحوادث اللى حصلت من رد الفعل اللى حصل قدامى دخل الموظف ولاقيته بيقولى وقعى هنا ... خلصت الاوراق وخلاص همشى لاقيته بيقولى مش قولت لى مش بتشتغلى فى مجالك ليه ... قلت له لما الاقى نظرية " انطونينى اتمحت من المجتمع ... قالى نعم مين ده ... قولت له ابدا ده واحد كنت قريت له مقولة جميله جدا زمان بيقول فيها
" يوجد في كل الحالات تقريباً جهداً لطرد العدوانية إلى خارج الذات بغرض نفيها والتعامي عنها وعدم بقاءها في الذات. فاكتشاف الحقد الكامن فى ذات الشخص يسبب حالة من القلق والبحث عن الشر عند الآخرين كمحاولة لنفي الشر عنه "

لاقيته بيقولى يعنى ايه
قولت له من فضلك البطاقة

تعليقات

‏قال غير معرف…
قطتنا العسل صاحبه أجرأ المواضيع
:)
شوفي ياجميل للاسف هو ده اللي بيحصل يعني مثلا تلاقينا في الشغل المريض من دول بيجي يدفع الجنيه تمن التذكره عشان يكشف و الجنيه ده للعلم مابيروحش في جيوبنا لكن يحسسك كأنه اشتراكي بالجنيه ده و يزعق و كأنك بتشتغلي عنده
لو المريض ده في عياده خاصه صدقيني اتحدي انه يكون بقله ادبه دي حيقعد طبعا بأدبه و في دوره زي الألف
عارفه ياقطه الناس بتطلع غلبها علي بعض طالما مش قادره تفتح بقها في وش النظام الحاكم تلاقي كل واحد ماسك مصالح الناس بيتحكم فيهم و كأنهم بيشتغلوا عنده و هكذا يعني
المهم ياقمر ربنا يسهل و الورق يخلص و ماتروحيش كتير المكان ده عشان ماتتعبيش
تحياتي ليكي ياجميله
‏قال Desert cat
اجندا حمرا
ارق واجمل اجندة فى الدنيا
ماهو للاسف يا قلبى لو كل واحد اتعامل مع الناس بما يرضى الله
يعنى المواطن يتعامل بادب والموظف يتعامل بذوق والكبير يعامل الصغير برفق والصغير يحترم الكبير ده احنا نبقى مفيش احسن من كدا لكن ازاى
لازم تقابلى فى حياتك مرضى نفسيين
وفى الحاله دى دورى وشك عنهم
محبتى ليكى يا جميلة
ويارب دايما منورانى
‏قال Mafrousa
قطقوطه...انتى حطيتى صباعك على النقطه المفيده
هوه ده بالظبط اللى جايبنا ورااااااااااا
و لعلمك المشكله فينا احنا ياقطه...احنا بجد بقينا و حشين
فبندى الفرصه لاى حد يعمل فينا اللى هوه عاوزه
احنا الاخلاق و الادب و الكياسه فى التعامل و الضمير
حطناعم تحت رجلينا
انا مش باتكلم عنى و عنك و عن كتير من الناس انا باتكلم على الاغلبيه
احنا بقينا نتفنن فى زل بعضنا و التحكم فى بعضنا و فى سرقة بعضنا و كل حاجه و حشه مع بعضنا
و ماتقوليش الحكومه
الراجل الموظف اللى كنتى عندخ مش بيراعى ربنا فى اكل عيشه
و بالتالى اكيد ربنا مش مباركله و اكيد مرتبه مش بيكفى
فلو سالتيه حيلعلنك سلسفيل الحكومه و الدنيا و الناس

و لن الحقيقه الغلط عنده

فهمتى حاجه؟
للاسف هى دى مصالحنا الحكومية والموظف اللى شغلتة يخدم الشعب يقوم بالعكس
انا عندى موقف وانا راحة اخد الشهادة المؤقتة قابلت موظفة رهيبة بل شنيعة دخلت المكتب وقولت لها عاوزة الشهادة المؤقتة موعد استلامها النهاردة وبعيد عنك وعن السماعين والنايمين كانت حبة حبة هتضربن وبعيد عنك دمى فار على الاخر وبقت عنيا تتطق شرار وهى هادية ذى مايكون معلمنهم كيفيه تزهيق المواطنين
المهم قلت اشوف حد تانى غير اللعنة دى وجاى اكلم موظفة تانية راحت المزغودة قالت لى بكل الاطة هو انا قلتلك روحى لحد تانى
المهم نظرة منها على نظرة منى طلعت الشهادات وقالت لى خدى شهادتك المهم خدتها ورحت رازعة الباب فى وشها يااااااااااااة حاجة تغيظ اليوم دة انا كنت عايزة اروحلها واضربها وحسيت العدوانية بتجرى فى عروقى
تحياتى واسفة على التطويل بس موضوعك فتح ذكريات اليمة جوايا
‏قال غير معرف…
قطة الصحراء الجميلة

:)))) من فضلك .. البطاقة
‏قال شـمو نشـادر
كويس يا ستى اهو انطونينك خدلك حقك منه ولا تزعلى ..
بصى انا شايف انه هو او غيره بيعملو كده كرد فعل طبيعي للى بيحصللهم ..
السلطه والحكومه مطلعه عنيه .. فى الشغل و فى المواصلات وفى طوابير العيش وحتى فى الحمام ..
بالتالى هو اول ما يحس انه مسك فى ايده اى نوع من انواع السلطه على خلق الله بيطلع كل اللى القهر والكبت اللى جواه ع الناس ..
المشكله انه بينسى ان الناس دى برده طلعان عينين اهليها زيه واكتر منه ومش نقصاه هو كمان ..
واسأليني انا عن تعسف مشرفى المدينة الجامعية معانا وبتوع شئون الطلبه فى الكليه وكأنهم بيصرفو علينا من جيوبهم ..
مش عارف احكيلك ايه ولا اييييييييه ده انا طلعان عيني ..
ومبعرفش اخد حقى منهم غير لما اعلى صوتى واقل ادبى واتخانق وافرج الناس عليهم ..
هى دى بلدنا يا صديقتى العزيزه .. معلش ..
تحياتى ..
أسامة أمين
‏قال سمراء
المقولة جميلة فعلا وتفسر لماذا يقوم هؤلاء بقهر الاخرين
اذا كان لديك فرصة اقرأي موضوعي مكتب شئون الطلبة بالجامعة - في تصنيف مواقع مصرية
تحياتي
سمراء
‏قال Zika
اسمه في علم النفس
الاسقاط
(سواء كان حقد غل غباء جهل فقر )
او اي صفه وحشه في البني ادم وهو مش عايزها تبقي فيه
فابالتالي بيلاقيلها مخرج انه ينسبها لواحد غيره
بتحصل كتير
وبالذات في ظباط الشرطه وطبعا موظفين المصالح الحكوميه زي الموقف اللي حصلك كده
وبالنسبه كمان لناس تانيه كتير
في مواقف اكتر
وده طبعا نتيجة للي بتعمله الحكومه في الناس
تقوم الناس تفرغ طاقتها المكبوته في بعض
المصالح الحكوميه في مصر من زمان وهي كده
من ايام فيلم الورده البيضا
واضح ان كمان دي حاجه موجوده في الشعب المصري اي حد بياخد اي سلطه بيطلع اللي شافوا في حياته علي الناس اللي قدامه
ربنا يعيننا
....
احلي حاجه انك قولتيله الكلمتين دول بعد ما خلصتي ورقك والا كان دخل في التلاجه زي الراجل اللي بتقولي عليه
‏قال مواطن مصري
ازايك يا قطة
انا عشان اطلع الرخصة
رحت
اعمل روشتة باطنة و رمد الاول روحت مستشفى رابعة اكيد عارفها هناك الكشف ب 12 جنية و نص
و انا بدفع فلوس مطمن انها هتروح
لعمل خير و غير كدة مش معني ان الفلوس قليلة يبقى المستفشى وحشة لا على احدث المستوى و الدكاترة شغلين تمام
و بما يرضى ربنا
طبعا مطلعتش الرخصة بعديها
عشان امتحنات و راحت فترة السماح
جيت اطلعها تاني روحت في نفس اليوم الي هعمل الرخصة فية الصبح في مستفشى في منطقة الماظة
ه مش مستشفى بمعنى الستشفى هي اقل من المستشفى بكتييييير
روحت العيادة كنت مستعجل لقيت ممرضة و شاكك انها ممرضة اساسا
او دارسة طب كتبت الكشف من غير ما تكشف ل العلم في رابعة كشفو على نظر
المهم و انا بحاسب قلتلها كم متوقع بكتيرة اوي 15 جنية لو نصب 20
قالتلي ب 50 جنية قولتلها نعم لية هو انا في القوات المسلحة قالتلي دي اسعار الدكتور قلتها اخري 12 قعدت تفاصل معايا ل 30 جنية
طبعا انا متاكد ان نصهم داخل جبها
‏قال .:.-=- ELGaZaLy-=-.:.
" يوجد في كل الحالات تقريباً جهداً لطرد العدوانية إلى خارج الذات بغرض نفيها والتعامي عنها وعدم بقاءها في الذات. فاكتشاف الحقد الكامن فى ذات الشخص يسبب حالة من القلق والبحث عن الشر عند الآخرين كمحاولة لنفي الشر عنه

-------------------------------------
بصى يا ستى م علميا بس معمليا كمان الناس لما بتتكبت بتطلع الكبت على الاخرين هي دى الحياة....


بس جميل اوى كتابتك عادة بتعجبنى بجد
‏قال مواطن مصري
دة دليل ان بلدنا بتتقم بينا
و شعبنا لسة بخير
‏قال WhItE HeArT
قطة

وحياة غلاوتي عندك

بلاش غلاوتي دي انا لسه اعرف بلوجتك مش من كتير

وحياة غباء الراجل اللي 'طرد الراجل ده تكبري الخط شوية

والله انا كان هيجيلي عمى بجد وكل مااجي اكبر الشاشه واعمل زوم ميرضاش فااضطريت اقرى كده


المهم بأه

الموقف ده حصل كتير جدا وحصل قدامي كمان

طيب انا هحكيلك موقف حكاهولي والدي

هوه قاعد في كلية الهندسة والمحاضرة هتبدأ دخل الدكتور وطبعا الكلام ده سنة 1971 او 72 دخل الدكتور وكان هوه نفسه وزير الكهربا بايين او وزير حاجة المهم دخل لقى السبورة مش ممسوحه وطبعا ده غلط الداده او الفراش المهم نادى عليه فالراجل كان بااين انه عيان فجه مش قادر يقف حتى

قام الراجل الدكتور ده ناتشه حتة قلم على وشه قدام الدفعه كلها

الراجل راح ماسك البتاعه اللي بتمسح دي ومسح السبورة وقام واخد بعضه وروح بيته ونام على السرير ومات

اللي انا عايز اقوله ان مش اي حد عنده سلطة لازم يعمل كده حتى ولو كانت ضغوط الدنيا كلها فيه ده احنا مسلمين ياناس حرام

دول الكفرة مبيعملوش كده

بجد حسبي الله ونعم الوكيل في اي انسان اتخذ من منصبه مجال انه يهين اي حد او يذل حد

تحياتي
‏قال وجهة نظري
كل واحد عنده أخلاق الوضاعه بيطلع حقده وغلبه علي إلي أضعف منه. سواق الميكروباص بيبلطج علي الركاب وسواقين العربيات علشان بياخد علي قفاه من أمناء الشرطه، وموظفين الحكومه بيبلطجوا علي المواطنين علشان بياخدوا علي قفاهم من سواق الميكروباص وأصحاب الفرن.... وخدي عندك كل فئات الشعب المقهوره من السلطه نفسهم يطلعوا غلبهم في حد إنشالله ولادهم

إلا إيه مساحه جويه دي؟
‏قال الميكروباص
من الصفات المميزه للناس في بلدنا هو حب التسلط على الآخرين
وياويلك من اللي بتقول عليه غلبان لو اتحكم فيك
يبقى الله يرحمك
‏قال Unknown
والله يا قطة
الناس بقت صعبة برضة مع بعض زى ميكونوا مش قادرين على الحكومة فبيطلعوا الى فيهم على بعض وخدى من دة فى المصالح الحكومية كتير
وخصوصا ربنا لا يوريكى التامين الصحى وخصوصا فى تعاملهم مع اصحاب المعاشات مش بس موضوع انهم مش بيدوهم كل الدواء الى هما محتاجينة لا المعاملة دول ناس كيرة فى السن المفروض انهم يراعوا انهم ميقدروش ينتظروا كتير لا على ما يجيى الدكتور والممرضات ومعاملتهم السيئة
ربنا يرحمنا
‏قال tamer.sala7
هههههههههههههههههههههه

يوجد في كل الحالات تقريباً جهداً لطرد العدوانية إلى خارج الذات بغرض نفيها والتعامي عنها وعدم بقاءها في الذات. فاكتشاف الحقد الكامن فى ذات الشخص يسبب حالة من القلق والبحث عن الشر عند الآخرين كمحاولة لنفي الشر عنه

بعد ازن حضرتك يعني اصل انا تعليم
مجاني
اقسم بالله انا لو مكانه كنت اخدت منك الورق وقولتلك تعالي بكرة خديه
هو انا قاعد علشان المدير يتعوج عليا وكمان الناس تيجي تتعوج عليا
يا بنتي الموضع كله ان المأمور بيذ الظابط والظابط بيذل الامين والامين بيذل المواطن وكل مواطن بيحاول ياخد حقه من المواطن اللي زيه
وده اللي الحكومة عايزاه يعني تخلي الناس تاكل في بعض علشان تشغلهم عن امور تانية اهم بكتير
‏قال Desert cat
واحدة مفروسة
للاسف الاخلاق فى المجتمع اصبحت كلمة تردد فقط لا غير
تيجى تدورى علي التعامل بيها متلاقيهاش وبالتالى انتشر القهر ومبقيناش نشوف الصغير اللى بيحترم الكبير ولا عطف الكبير على الصغير
كانها شعارات كدابة فى الكتب
نورتينى يا جميله
‏قال Desert cat
رئـــــيسـة حزب الأحلام
للاسف نموذج الموظفة دى منتشر على المكاتب ولما تتعاملى معاها تحسى انها لسه واخده لها بوكسين فى عنيها وبتطلع العفاريت على اللى قدامها
انتى طولى فى الردود براحتك ولا يهمك المدونة مدونتك يا جميله
تحياتى
‏قال Desert cat
Sherif
ماهى كانت حاجه تفرس يا شريف
اعمل ايه بس
تحياتى
‏قال Desert cat
شـمو نشـادر
من غير ما اسالك يا اسامه عن تعسف مشرفى الجامعات
انا اصلا من الشرقية ودراستى كانت فى القاهره وكنت مقيمة فى دار للطالبات
وشوفت وجربت
ايييييييييييه
اهى ايام راحت ببلاويها
هههههههههه
تحياتى
‏قال Desert cat
سمراء
ميرسى يا سمراء
وانا لو مش فاضيه افضى نفسى طبعا هدخل اشوف الموضوع
شرفتينى
‏قال Desert cat
Zika
لاء فى فرق بين القهر والاسقاط
الاسقاط زى ما حضرتك تفضلت وذكرته
لكن القهر انى احس دايما اللى بيكلمنى احس منى وبالتالى ما ان بتكون ليا سلطة عليه بقلل من قيمته باى شكل من الاشكال
‏قال الربان
تحياتي

لو كل منا علم انه مستخدم من الله لخدمة خلق الله...لخدم الخلق علي احسن
ما يكون...
المشكلة ان البعض يظن ن الكرسي يدوم
و السلطة تدوم...و الصحة تدوم و العمر لا ينتهي...و الموت لن يأتي...
و اننا لن نقف امام الله نسأل...

ربنا يهدينا جميعا...و ينظف قلوبنا
من التعالي و التكبر... و يطهر انفسنا و لساننا من لهو الحديث و الجدال..

ربنا يقضي لك مصالحك...و ييسر لك امورك.

تحياتي
‏قال Heart Beat
الصديقة العزيزة جدا

desert cat

الجملة اللي ختمتي بيها دي جميلة جدا و بتعبر عن حاجات كتير اوي المهم اننا نفهمها و ناخد الحكمة منها

لسه امبارح كان في مواطن عايز يقابلني عشان عايزني اوقع على جواب توصية لانه عمل مخالفة متعمد مش غصب عنه و لا حاجه و المخالفة دي هاتكلفه حوالي خمستاشر الف جنيه كده

المهم اما السكرتيرة قالت لي عليه قلت لها انا مابوقعش على النوعية دي من التوصيات اللي يغلط لازم يتحمل غلطه خصوصا انه تعمد الغلط عشان كده جت على دماغه بالمخالفة دي

لما السكرتيرة قالت له فضب يزعق فيها و يقول اننا هنا بسببه هو غيره و بفلوسهم

فخرجت من مكتبي و قلت له طيب انا متنازلة عن الفلوس اللي بتصرفها علينا دي و روح ادفع بيها المخالفة اللي عليك و طردته

شوية و جاني موظف من المرتشين اللي عندنا و معاه نفس جواب التوصية فطبعا اتعصبت و رميت الورقة في وشه

الموظف المرتشي ده بقى يجي الشغل براحته بعد بداية الشغل بحوالي ساعة و نص و يقعد يفطر و يشرب سجاير و بعدين يقعد على مكتبه قرب نص اليوم

و اما يجي له شغل مهم مايعملوش و يديه لموظف تاني

و ماتلاقيهوش على مكتبه غير في حالات نادرة جدا

و طبعا مصالح كتير بتتعطل بسببه و مايعملش شغل الا اذا وراه مصلحة شخصية غير كده مافيش شغل خالص

في المقابل بيكون في موظفين شايفين شغلهم صح و بيعملوا اللي عليهم عشان يرضوا ضميرهم و يرضوا ربنا طبعا

بس للاسف السيئة بتعم زي ما بيقولوا

فيبقى بسبب الموظف السيء ده و اللي زيه المصالح تتعطل و كمان بناخد صورة سيئة

الاهمال و عدم تحمل المسئولية و خيانة الامانة اللي اتحطت بين ايدينا اللي هي شغلنا من اسباب التدهور اللي احنا فيه

يمكن عشان كده احنا لسه عالم تالت و لا يمكن رابع

و عمرنا ماهنتقدم ابدا

المهم بقى يعني ... خلصتي ورقك اللي عند الموظف ده و لا لسه برضه

تحياتي يا جميلة
‏قال Zika
انا متهيالي ان القهر ده نوع من الاسقاط
او يمكن يكون نتيجة ليه
هم الاتنين مرتبطين ببعض بطريقة ما
‏قال wanna b a physician
الا مين انطونينى ده
ههههههههههههههههههه
طبعا مدونتك اكثر من رائعة
وانا وقفت كتير جدا امام كلماتك التى تحمل العمق فى بساطتها
ولكن لى تعليق انتى متحاملة جدا على بعض التيارات وبالمناسبة والله انا لا انتمى الى اى منها ولكنى احب الحيادية دائما
دعينا نكن يدا واحدة على الجزم االمتدة فوق رقابنا
واتمنى ان ياتى يوم نرى فيه واقعا مختلفا
واحسبه قريبا
اشكرك دام قلمك
...........
نور الدين محمود
‏قال أحمد بكر
لا صحيح مبتشتغليش بمؤهلك ليه
قطتي الجميلة
المصريين عموما و خصوصا البسطاء منهم بيطلعوا غلبهم علي بعض
يعني اللي مش قادرين يعملو في الحكومة اللي خربت بيوتهم و جوعتم بيطلعوه علي بعض ود اللي بيسموه انتقام المستضعفين و بعيد عنك بيبقي انتقام غبي و كري جدا
‏قال محمد صالح
دايما مواضيعك جريئه ودائما تحتوى على هدف ومغزى كبير الا اننى معجب اوى بالطريقة اللى انتى انسحبتى بيها بعد المقاوله الجميله دى
ولكن على ما اظن ان الموظ دا مش حاسس انه بياخد من الشعب لان الشعب عاوز اللى يديله وكمان ان ى بعض الاشخاص لو فى ايديه سلطة ولو بسيطه يحب التحكم بلاخرين
هذا والله اعلم
‏قال عروسة ننوسة
هى دى مصر يا عبلة
الاستاذة قطة الصحراء
لا تعجبين إذا اصبح هذا الموظف مديرا أو مسئولا كبيرا أو حتي وزيرا أو ربما أكبير من ذلك

يرتقي في المناصب لكنه لا يرتقي في الاخلاق
والنتيجة ما نعانيه كلنا من كلنا
البلاء عام

الحكومة والشعب شئ واحد
نفس الثقافة وذات القيم
وهو المطلوب تغييره
تحياتي لك يا بلدياتنا
‏قال Rania Lelah
مش قلتهالك قبل كدة يا قطه
ساعات بحس اننا نستاهل الى بيتعمل فينا
علشان احنا اصلا من جاوانا مش مظبوطين
للاسف الى قلتيه بيتكرر كل يوم
هقولك سر اوعى تقوليه لحد
اما بروح لبابا فى الشغل بعدى عليه يعنى
و انا بكلمه اى واحد يجى يكلمه يقوم قايله اتفضل يا فندم روح للموظف التانى
و بصوت عالى شوية
بصراحة اضايقت جدا
و قلتله ليه كدة دة شغلك
و بتاخد مرتب عليه و و و و
قالى لو متعملتش معاهم كدة بييجوا يتنطووا و يطولوا لسانهم اكننا بنشتغل عندهم
؟؟؟؟؟؟؟؟؟؟؟؟؟؟؟؟
فتحسى ان كل واحد عايز يقوى على التانى
كل واحد فاكر انه بصوته العالى دة او انه داخل معركة مع اخوة و هيكسبها
اوعى تقولى الكلام دة لبابا
:)
تحياتى لاحلى قطة
‏قال Abo 7anf
السلام عليكم
مش قلتلك قبل كدا يقطه
أننا عايشين فى مجتمع للاسف بقى بيقتل نفسوا
وان كتير قوى لما بتمنح ليهم اى سلطه ولو موظف بيحس انوا قاعد فى ملكوا
وان المواطنين بيشتغلوا عندوا
وبيتحكم ويامر وينهى على ايه انا مش فاهم
دا طبعا خلاف العقد المتراكمه اشمعنا انا بقيت موظف و غيري بقى وبقى
ناس غريبه
‏قال arsenalwy
ياقطة

لما الموظف دة يتعامل مع الناس زى ما انتى عايزه ولما حكومتنا تحترمنا يبقى انتى اكيد اكيد مش فى مصر

موضوع رائع وتسلسل افكار اروع
‏قال blackcairorose
معنديش اى استغراب يا قطة من موقف الموظف فيه زيه كتير واقل سوءا منه اكتر و وقلة قليلة من الملتزمين فى عملهم من واقع احتكاكى الذى لم يكن قليلا فى الماضى بموظفى الحكومة

بس احب اقول لك نصيحةزغيرة قوى يا جميله اللى يخليكى

لو حصل بعد الشر واتخانقتى مع موظف حكومة اوعى تقوليله زى ما كتبتى انت بتاخد مرتبك علشان تأدى وظيفتك، لان الكلمة دى هتزعله قوى واول حاجة هيقولها أو هتقولها الموظفة زى ما حصل معايا مرة فى السجل المدنى الموجود فى منطقة المساحة فى الدقى

مرتب ايه؟ هو اللى بناخده ده مرتب، ادينا بنشتغل على قد الكام ملطوش اللى بنقبضهم

هييييييييييييه ذكريات
للأسف أنا عرفت طعم القهر ده و حكيت عنه في موضوع ( أنا اللولبي كريم العنصرين ) و اللي ما حكيتش فيه اللي حصل كله طبعا

دي دولتنا بصفه عامه

شكرا على إتاحة الفرصه للنونوه معاكي

أتمنى المزيد

سلام عليكم
‏قال Tamer Nabil Moussa
القهر واللى بيحصل من بعض الناس شىء يحزن ويرفع الضغط

بحس انهم ناس فقدت الشعور والاحساس

تحياتى
‏قال Desert cat
مواطن مصري
طبعا الممرضة دى نموذج منتشر جدا
ويا سلام لما يكون فى حد تعبان ومقيم عندهم فى المستشفى تلاقيها رايحه جاية تقوله الف سلامة يابيه ولو دور وشه عنها يعنى مش دفع لها الاتاوة الواجبة عليه تجاهها تلاقيها تسيب سريره يضرب يقلب ولا تغير له الملايات ولا اى حاجه
والمفروض انهم اسمهم ملائكة الحرام
دى بافعالهم دى بيثبتوا انهم شياطين العذاب مش ملائكة رحمة ولا غيره
يارب تكون خلصت الرخصة على خير
تحياتى
‏قال Desert cat
.:.-=- ELGaZaLy-=-.:.
تقريبا فعلا زى ما قولت الناس من شدة الضغط عليها بتطلعه على الاخرين

تحياتى
‏قال Desert cat
مواطن مصري
هى من ناحية بتتقدم فهى فعلا بتتقدم بس بالمقلوب
تحياتى
‏قال Desert cat
WhItE HeArT
حاضر وحياة غلاوتك لاكبر الخط بعد كدا
طبعا الموقف ده ممكن يتكرر كتير
لان ممكن الشخص اللى بزعق فيه يكون عنده ضغط ولا قلب وهو حساس تلاقيها راح بسبب زعله
وساعتها ربنا وحده هو المنتقم الجبار
نورتى البلوج
احترامى وتقديرى
‏قال Desert cat
وجهة نظري
بالظبط كل واحد مقهور بيطلع قهره على اضعف منه
وكأننا منعرفش كلمة إحترام ولا سمعنا عن كلمة آدمية
تحياتى
‏قال Desert cat
لورنس العرب
ماهى بتيجى بالتدرج يا لورانس
يعنى المدير يطلع قهره على الموظف والموظف على الموظان والمواظن على زوجته وولاده
يعنى تقريبا اصبح القهر سمة مميزة
تحياتى
‏قال Desert cat
ايوية
اهو التأمين الصحى ده لوحده يا ايوية مصيبة تانية
يعنى بدل ما المريض يكون رايح يتعالج يروح يشيل الهم بسبب معاملة قساة القلوب ومن انتزعت من قلوبهم الرحمة وليسوا ملائكة الرحمة
ربنا ما يوقع حد فى طريق التامين الصحى ده
نورتينى يا ريحانه
:)
‏قال Desert cat
tamer.sala7
ماهو انا مقلتهاش يا تامر غير بعد ما ضمنت ان الورق فى ايدى وخلصان وعليه كل التوقيعات والاختام
بس بطاقتى هى اللى كانت فى ايده ولو كان قالى مش هتاخديها كنت هروح اعمله محضر انه سرق البطاقة ويبقى هو اللى جابه لنفسه
تحياتى
‏قال Desert cat
الربان
استاذى العزيز
للأسف كل واحد فى ايده سلطة مهما كانت حتى وهو من عامة الناس وعايش نفس عيشتهم مش بيفكر فيهم
المهم انه يمارس سلطته بالزعيق وطول اللسان ...
الحمد لله انا مشاورى خلص على خير
اشكر حضرتك جدا
احترامى وتقديرى
‏قال Desert cat
Heart Beat
صديقتى الجميلة هارت بيت
انا معنديش شك ولو ذرة فى مدى تفهمك للأمور وكمان حزمك فى الوقت المناسب
وده دليل على نبل اخلاقك ومعدنك الطيب انا الحمد لله يا قلبى خلصت الورق بخير
نورتينى يا جميله
‏قال Desert cat
Zika
هو عموما اى حاجه مرتبطة بالنفس البشرية بيبقى لها علاقة مباشره ببعضها
تحياتى
‏قال Desert cat
wanna b a physician
ده واحد فاهم المجتمع كويس
‏قال Desert cat
Nour
اولا شرفتينى حضرتك
ثانيا انا مش بتحامل على حد انا بدى كل واحد حجمه الطبيعى
وعلشان الاخوان مينبوش لنفسهم مجد زائف لازم برضه ياخدو حجمهم الطبيعى
شرفتى
‏قال Desert cat
Baker
ده موضوع كبير اوى ويطول شرحه
بس مين عارف
نورتينى
‏قال Desert cat
العزيز جيفارا المصرى
طبعا وجهة نظرك صحيحة جدا
كل واحد بيطلع كره وضعفه على اللى قدامه
واهى ماشية
تحياتى
‏قال Desert cat
محمد صالح
انا مش شايفه فيها حاجه لما الموظف اللى فى ايدة سلطة يتعامل مع الناس بذوق لان المناصب ائما تزول ومش بيبقى غير قلوب الناس الطيبة
عموما هو نموذج منتشر جدا فى مجتمعنا
اشكرك جدا على ذوقك
احترامى وتقديرى
‏قال tarek alghnam
اختى الرائعة
القهر سيظل لان الضمير فى اجازة
مشكلتنا مشكلة ضمير
فى كل المجالات هناك فساد
اتمنى ان تعود مصر الى بلد العلم والايمان كما كانت تسمى يوما
تقبلى تحياتى
ومتعك الله بالحب والصحة
ودمتى بود
اتمنى تشريفى بمدونتى المتواضعة
‏قال Desert cat
gannah
للاسف يا جنة هى دى فعلا مصر
شرفتينى يا عروسه
‏قال Desert cat
فليعد للدين مجده
صح انا بشوف ناس بترتقى فى المناصب ولا لا ترتقى للاخلاق
وفى البعض مهما علا منصبه فخلقه دائما كريم
بس للاسف نادرا بنشوف النموذج ده
وبما اننا بلديات بقى
حضرتك شرفتنى جدا
احترامى وتقديرى
‏قال Desert cat
Rania
هههههههههههههه
عسوله يا ارنيا ربنا يخليكى ويخلى لك بابا
برضه اجندة تفضلت مشكورة وحكت لنا نموذج من اللى بيحصل عندها فى الشغل
للأسف إحنا محتاجين ازاى نعرف نحترم بعض
علشان نعرف نعامل بعض
يعنى العميل او المواطن يتكلم بذوق
وكمان الموظف
بس الموقف اللى انا شوفته الراجل كان ضعيف جدا حتى رده حسيت فيه بذل واهانة علشان كدا انا اتاثرت بيه بصراحة
نورتينى يا جميله
‏قال Desert cat
Abo 7anf
طيب الموظف اللى بيقول اشمعنا ان بقيت موظف وغيرى بقى كذا وكذا المواطن اللى واقف قدامه ده ماله
هو كان حدد له مسقبله
لكن بيحصل بالفعل
تخيل لو اتنين زمايل دفعه واحده وواحد موظف والتانى رجل اعمال تلاقى الموظف فى الراحة والجاية يقر عليه ويطلع كلاكيعه على الناس
ربنا يرحمنا ويهدى الجميع
تحياتى
‏قال Desert cat
arsenalwy
طيب احنا ليه دايما بناخد من الغرب الحاجه الوحشة
ونسيب لهم الحلو عندهم احترام ادمية وانسانية
واحنا بنقلدهم فى الموضة وتقليد اعمى هما نفسهم مش بيعملوه
شرفتنى جدا
احترامى وتقديرى
‏قال Desert cat
blackcairorose
انا للأسف كل لما اكرر مش اتعامل مع موظفين حكومة اساسا الظروف السيئة بتلغى القرار غصب عنى
سواء فى شغلى او فى اى حاجه خاصة بابا او ماما انا مش قولت له بتقبض علشان خدماتنا انا قولت له فيما معناه انك انسان مقهور
وكويس انه مفهماش والا كان زمانه عاملى محضر تعدى على موظف اثناء تادية وظيفته
ربنا يبعد عنك وعننا جميعا الموظفين المقهورين
نورتينى يا احلى روزا
‏قال Desert cat
الإتربي اللولبي
كويس انك لفت نظرى للموضوع اللى كتبت عنه
هدخل اشوفه
طبعا حضرتك شرفتنى
‏قال Desert cat
Tamer Nabil
هما ناس فاقدة الاحساس فعلا بس تملك احساس واحد بس واللى هو القهر مع سبق الاصرار والترصد
تحياتى
‏قال Desert cat
طارق الغنام
صح يا طارق لو الناس تملك الضمير وتقدر تحس ببعضها
هيعرفوا يحترموا بعض كويس
يشرفنى جدا زيارتك
احترامى وتقديرى
‏قال اسامة يس
ههههههههههههههههه
والله معاك حق ...
وشر البلية ما يضحك...
هات البطاقة ...



ان الانسان يسقط همومه على الآخرين في عملية من الاحلال والتبديل كحيل دفاعية.. ولان الحمل في المجتمع المصري زايد شويتين تلاته معدش حد قادر يتحمل حد...
والاحساس بالدونية زاد...
وان حق لي ان اقرأ السطور بنظرة غير تفصيلية ..
أظن ان السبب يعود
الى القهر البوليسي من قبل نظام مستبد ممتد من معاوية الى الآن
والتدين الأجوف او فوبيا الدين عبر عمائم تعد الناس بالنار والنار فقط

دمت بكل ود...
خالص تحياتي
‏قال Desert cat
بالظبط يا اسامه
انتشار الفساد
والضغط والقهر من يملك سلطة على من لا يملك
وشيخ بعمه وخلفيه اسلامية طول النهار يلقى خطب وفتاوى النار وبئس المصير والثعبان الاقرع
كلها ضغوط مجتمعية
محتاجين ثقافة جديده بس الاهم نلاقى عقول تتقبل
تحياتى
‏قال واحد مصرى
أنطونيني ....طيب بأمارة أيه ..بقى واحد زي الموظف ده كل اهتماماته تنحصر في توافه اهمها سندوتش فول الصبح و نص ساعة بتاعة يوم الخميس على نفسين مع واحد مقتدر شوية هايفهم حاجة من اللي قلتيه
أقزام الموظفين دول افراز متخلف لتراكمات الاشتراكية و ارفع رأسك يا عبد الصبور و أكم من تداعيات المنظومة الفاسدة فيما سمي يوما ما بوطن

دمت بخير
‏قال Desert cat
واحد مصرى
اهم بتوع ارفع راسك يا عبدالصبور دول اللى جابونا لورا
وانتهى عصر الاستعباد من الانجليز علشان احنا نستعبدكو ونطلع عينيكو
وعلشان مش فهم الجملة انا مشيت فى سلام
نورتنى يا ايهاب
مدونة ظريفة
بالفعل تسود حالة القهر وانعدام الامل كل الناس
اعتقد الصبر والالتزام بالاخلاق الحميدة سوف يؤدى الى تغير الوضع الى الافضل باذن الله
‏قال غير معرف…
buy viagra uk boots viagra price walgreens [url=http://fast-sildenafil.com/]Buy Viagra[/url] cheap online order viagra buy female viagra online Sildenafil Citrate viagra 100mg price costco effects of viagra on women http://fast-sildenafil.com/ - Sildenafil. alcohol viagra viagra at gnc

المشاركات الشائعة