سياســـة القهر

كلنا متفقين إن المجتمع كله عايش فى قهر بسبب الجمايل التى لا تعد ولا تحصى من حكومتنا الرشيدة واللى كل يوم تغرقنا بيها فى صور مختلفه
لكن لما يبقى القهر مننا لبعض .... لما نكون عايشين فى مجتمع واحد واللى بيحصلى هو نفسه اللى بيحصلك ..... يبقى كدا محدش يستغرب من حالة الحقد والكره اللى غزت المجتمع من حوالينا ... حاضر هقولكوا انا بقول الكلام ده ليه
الصبح توجهت لإحدى المصالح الحكومية أخلص أوراق خاصة بالسيد الوالد .... طبعا الأوراق دى المفروض هو اللى يخلصها بنفسه ... لكن لاسباب صحية مينفعش وبما إن انا الوحيدة اللى قاعده له فى البيت فانا الوحيدة برضه اللى معايا توكيل بالتصرف فى الاوراق محدش يفهم غلط ... اوراق بس .... وبناء على هذا التوكيل قمت بالذهاب الى المكان المنشود وهنا تفضل الموظف المختص وسألنى على بطاقتى ... اتفضل ... مسك البطاقة وفضل يبص فيها ... انا شكيت ان البطاقة مزورة بصراحة ... وبعد ما ظنونى قعدت تودى وتجيب ... لاقيته بيقولى يعنى ايه مساحة جوية ... قولت له ده تخصصى يا فندم ... راح قالى وبتشتغلى فين بتخصصك ده .. قولت له فى حالة لو هشتغل بتخصصى ده يبقى اولى بيا موطنى الاصلى وهو الهيئة العامة المصرية للمساحة ... راح قالى يعنى انا دلوقتى اكتب مهنتك ايه فى الورق اللى قدامى ده ... قولت له اكتب اللى قدامك فى البطاقة ... يعنى انتى بتشتغلى كدا فعلا ... هو مكتوب فى الورق بشتغل ولا حاصله ؟؟؟ ... امال بتشتغلى ايه ... انا صاحبة كوفى نت .. راح راكن الورق فى جنب وابتسم ابتسامة عريضة ..... خير يا فندم فى حاجه ؟؟؟ لاء .. بس ايه علاقة دة باللى مكتوب فى البطاقة مش بتشتغلى فى تخصصك ليه ... بطر بعيد عنك .... هو فى حد فى البلد دى بيشتغل فى تخصصه ... عمرك ما شوفت خريج تجارة بيشتغل مهندس ولا خريج هندسة بيشتغل مندوب ... اه على رايك ... فى الوقت ده دخل واحد ولسه الراجل بيقوله صباح الخير ... لاقيت الموظف اللى كان قاعد منشكح وضحكته من الودن للودن قلب على شكل ديناصور ويقوله انا مش قولت لك لما ورقك يجى هبقى ابعتلك ... انت ايه اللى جابك اتفضل من هنا ... الراجل بمنتهى الاستكانة حقك على راسى من فوق يابنى ولف بضهره ورجع .... مهما وصفت مستحيل اقدر اعبر عن حالة الذل والانكسار اللى الراجل خرج بيها ... وبعد ماخرج قعد يكلم نفسه ويقول الواحد هيلاقيها منين ولا منين ... كل شوية دوشة وورقى جه من الوزارة ومجاش ... قولت له اللى انا اعرفه ان الشخص المضغوط هو اللى بيتعامل مع الناس بالطريقة دى بعنى مثلا عنده زحمة شغل وكل واحد بيساله من ناحية وهو مش ملاحق على طلباتهم يعنى عنده ضغط شغل مع ان برضه مش مبرر انه يعامل الناس كانهم جايين يشحتوا منه مش جايين مصلحة حكومية المفروض انها محترمة .... قالى وانتى ايه عرفك انتى شايفه الاوراق دى كلها مطلوب تخلص النهارده ... وراح واخد بطاقتى والتوكيل وقالى انتظرينى دقيقتين وجاى ... وانا قاعده مؤشرات عقلى كلها عمال تعمل حوادث مع بعضها .... هو مش المفروض ان ده المكان المخصص لخدمة المواطنين ... والمفروض انه له حق عندهم .. حتى لو توقيع على ورقه اسمه حقه لان الموظف ده قاعد هنا لخدمته وخدمة غيره .... هو بياخد مرتب من جيب الشعب كله ... مش علشان يخلص لهم خدماتهم ولا علشان يطلع عليهم حالة الحقد والكره اللى اتولدت عند الغالبية بسبب الاحساس بالخيبة والعجز من تغير واقع مستبد او نابعه من التربية نفسها كاحساسه بالدونية او نسب وضيع او تحصيل علمى دون المستوى ايا كان بقى الشخص سواء كان موظف او حتى مدير مراجيح مولد النبى ... بتتولد جواه حالة من الحقد والكره تخليه يمارس سياسة القهر على اى حد لأنه دايما حاسس ان الشخص اللى قدامه احسن منه ... واثناء وانا قاعده اصلح الحوادث اللى حصلت من رد الفعل اللى حصل قدامى دخل الموظف ولاقيته بيقولى وقعى هنا ... خلصت الاوراق وخلاص همشى لاقيته بيقولى مش قولت لى مش بتشتغلى فى مجالك ليه ... قلت له لما الاقى نظرية " انطونينى اتمحت من المجتمع ... قالى نعم مين ده ... قولت له ابدا ده واحد كنت قريت له مقولة جميله جدا زمان بيقول فيها
" يوجد في كل الحالات تقريباً جهداً لطرد العدوانية إلى خارج الذات بغرض نفيها والتعامي عنها وعدم بقاءها في الذات. فاكتشاف الحقد الكامن فى ذات الشخص يسبب حالة من القلق والبحث عن الشر عند الآخرين كمحاولة لنفي الشر عنه "

لاقيته بيقولى يعنى ايه
قولت له من فضلك البطاقة

Comments

قطتنا العسل صاحبه أجرأ المواضيع
:)
شوفي ياجميل للاسف هو ده اللي بيحصل يعني مثلا تلاقينا في الشغل المريض من دول بيجي يدفع الجنيه تمن التذكره عشان يكشف و الجنيه ده للعلم مابيروحش في جيوبنا لكن يحسسك كأنه اشتراكي بالجنيه ده و يزعق و كأنك بتشتغلي عنده
لو المريض ده في عياده خاصه صدقيني اتحدي انه يكون بقله ادبه دي حيقعد طبعا بأدبه و في دوره زي الألف
عارفه ياقطه الناس بتطلع غلبها علي بعض طالما مش قادره تفتح بقها في وش النظام الحاكم تلاقي كل واحد ماسك مصالح الناس بيتحكم فيهم و كأنهم بيشتغلوا عنده و هكذا يعني
المهم ياقمر ربنا يسهل و الورق يخلص و ماتروحيش كتير المكان ده عشان ماتتعبيش
تحياتي ليكي ياجميله
Desert cat said…
اجندا حمرا
ارق واجمل اجندة فى الدنيا
ماهو للاسف يا قلبى لو كل واحد اتعامل مع الناس بما يرضى الله
يعنى المواطن يتعامل بادب والموظف يتعامل بذوق والكبير يعامل الصغير برفق والصغير يحترم الكبير ده احنا نبقى مفيش احسن من كدا لكن ازاى
لازم تقابلى فى حياتك مرضى نفسيين
وفى الحاله دى دورى وشك عنهم
محبتى ليكى يا جميلة
ويارب دايما منورانى
قطقوطه...انتى حطيتى صباعك على النقطه المفيده
هوه ده بالظبط اللى جايبنا ورااااااااااا
و لعلمك المشكله فينا احنا ياقطه...احنا بجد بقينا و حشين
فبندى الفرصه لاى حد يعمل فينا اللى هوه عاوزه
احنا الاخلاق و الادب و الكياسه فى التعامل و الضمير
حطناعم تحت رجلينا
انا مش باتكلم عنى و عنك و عن كتير من الناس انا باتكلم على الاغلبيه
احنا بقينا نتفنن فى زل بعضنا و التحكم فى بعضنا و فى سرقة بعضنا و كل حاجه و حشه مع بعضنا
و ماتقوليش الحكومه
الراجل الموظف اللى كنتى عندخ مش بيراعى ربنا فى اكل عيشه
و بالتالى اكيد ربنا مش مباركله و اكيد مرتبه مش بيكفى
فلو سالتيه حيلعلنك سلسفيل الحكومه و الدنيا و الناس

و لن الحقيقه الغلط عنده

فهمتى حاجه؟
للاسف هى دى مصالحنا الحكومية والموظف اللى شغلتة يخدم الشعب يقوم بالعكس
انا عندى موقف وانا راحة اخد الشهادة المؤقتة قابلت موظفة رهيبة بل شنيعة دخلت المكتب وقولت لها عاوزة الشهادة المؤقتة موعد استلامها النهاردة وبعيد عنك وعن السماعين والنايمين كانت حبة حبة هتضربن وبعيد عنك دمى فار على الاخر وبقت عنيا تتطق شرار وهى هادية ذى مايكون معلمنهم كيفيه تزهيق المواطنين
المهم قلت اشوف حد تانى غير اللعنة دى وجاى اكلم موظفة تانية راحت المزغودة قالت لى بكل الاطة هو انا قلتلك روحى لحد تانى
المهم نظرة منها على نظرة منى طلعت الشهادات وقالت لى خدى شهادتك المهم خدتها ورحت رازعة الباب فى وشها يااااااااااااة حاجة تغيظ اليوم دة انا كنت عايزة اروحلها واضربها وحسيت العدوانية بتجرى فى عروقى
تحياتى واسفة على التطويل بس موضوعك فتح ذكريات اليمة جوايا
Sherif said…
قطة الصحراء الجميلة

:)))) من فضلك .. البطاقة
كويس يا ستى اهو انطونينك خدلك حقك منه ولا تزعلى ..
بصى انا شايف انه هو او غيره بيعملو كده كرد فعل طبيعي للى بيحصللهم ..
السلطه والحكومه مطلعه عنيه .. فى الشغل و فى المواصلات وفى طوابير العيش وحتى فى الحمام ..
بالتالى هو اول ما يحس انه مسك فى ايده اى نوع من انواع السلطه على خلق الله بيطلع كل اللى القهر والكبت اللى جواه ع الناس ..
المشكله انه بينسى ان الناس دى برده طلعان عينين اهليها زيه واكتر منه ومش نقصاه هو كمان ..
واسأليني انا عن تعسف مشرفى المدينة الجامعية معانا وبتوع شئون الطلبه فى الكليه وكأنهم بيصرفو علينا من جيوبهم ..
مش عارف احكيلك ايه ولا اييييييييه ده انا طلعان عيني ..
ومبعرفش اخد حقى منهم غير لما اعلى صوتى واقل ادبى واتخانق وافرج الناس عليهم ..
هى دى بلدنا يا صديقتى العزيزه .. معلش ..
تحياتى ..
أسامة أمين
سمراء said…
المقولة جميلة فعلا وتفسر لماذا يقوم هؤلاء بقهر الاخرين
اذا كان لديك فرصة اقرأي موضوعي مكتب شئون الطلبة بالجامعة - في تصنيف مواقع مصرية
تحياتي
سمراء
Zika said…
اسمه في علم النفس
الاسقاط
(سواء كان حقد غل غباء جهل فقر )
او اي صفه وحشه في البني ادم وهو مش عايزها تبقي فيه
فابالتالي بيلاقيلها مخرج انه ينسبها لواحد غيره
بتحصل كتير
وبالذات في ظباط الشرطه وطبعا موظفين المصالح الحكوميه زي الموقف اللي حصلك كده
وبالنسبه كمان لناس تانيه كتير
في مواقف اكتر
وده طبعا نتيجة للي بتعمله الحكومه في الناس
تقوم الناس تفرغ طاقتها المكبوته في بعض
المصالح الحكوميه في مصر من زمان وهي كده
من ايام فيلم الورده البيضا
واضح ان كمان دي حاجه موجوده في الشعب المصري اي حد بياخد اي سلطه بيطلع اللي شافوا في حياته علي الناس اللي قدامه
ربنا يعيننا
....
احلي حاجه انك قولتيله الكلمتين دول بعد ما خلصتي ورقك والا كان دخل في التلاجه زي الراجل اللي بتقولي عليه
ازايك يا قطة
انا عشان اطلع الرخصة
رحت
اعمل روشتة باطنة و رمد الاول روحت مستشفى رابعة اكيد عارفها هناك الكشف ب 12 جنية و نص
و انا بدفع فلوس مطمن انها هتروح
لعمل خير و غير كدة مش معني ان الفلوس قليلة يبقى المستفشى وحشة لا على احدث المستوى و الدكاترة شغلين تمام
و بما يرضى ربنا
طبعا مطلعتش الرخصة بعديها
عشان امتحنات و راحت فترة السماح
جيت اطلعها تاني روحت في نفس اليوم الي هعمل الرخصة فية الصبح في مستفشى في منطقة الماظة
ه مش مستشفى بمعنى الستشفى هي اقل من المستشفى بكتييييير
روحت العيادة كنت مستعجل لقيت ممرضة و شاكك انها ممرضة اساسا
او دارسة طب كتبت الكشف من غير ما تكشف ل العلم في رابعة كشفو على نظر
المهم و انا بحاسب قلتلها كم متوقع بكتيرة اوي 15 جنية لو نصب 20
قالتلي ب 50 جنية قولتلها نعم لية هو انا في القوات المسلحة قالتلي دي اسعار الدكتور قلتها اخري 12 قعدت تفاصل معايا ل 30 جنية
طبعا انا متاكد ان نصهم داخل جبها
" يوجد في كل الحالات تقريباً جهداً لطرد العدوانية إلى خارج الذات بغرض نفيها والتعامي عنها وعدم بقاءها في الذات. فاكتشاف الحقد الكامن فى ذات الشخص يسبب حالة من القلق والبحث عن الشر عند الآخرين كمحاولة لنفي الشر عنه

-------------------------------------
بصى يا ستى م علميا بس معمليا كمان الناس لما بتتكبت بتطلع الكبت على الاخرين هي دى الحياة....


بس جميل اوى كتابتك عادة بتعجبنى بجد
دة دليل ان بلدنا بتتقم بينا
و شعبنا لسة بخير
WhItE HeArT said…
قطة

وحياة غلاوتي عندك

بلاش غلاوتي دي انا لسه اعرف بلوجتك مش من كتير

وحياة غباء الراجل اللي 'طرد الراجل ده تكبري الخط شوية

والله انا كان هيجيلي عمى بجد وكل مااجي اكبر الشاشه واعمل زوم ميرضاش فااضطريت اقرى كده


المهم بأه

الموقف ده حصل كتير جدا وحصل قدامي كمان

طيب انا هحكيلك موقف حكاهولي والدي

هوه قاعد في كلية الهندسة والمحاضرة هتبدأ دخل الدكتور وطبعا الكلام ده سنة 1971 او 72 دخل الدكتور وكان هوه نفسه وزير الكهربا بايين او وزير حاجة المهم دخل لقى السبورة مش ممسوحه وطبعا ده غلط الداده او الفراش المهم نادى عليه فالراجل كان بااين انه عيان فجه مش قادر يقف حتى

قام الراجل الدكتور ده ناتشه حتة قلم على وشه قدام الدفعه كلها

الراجل راح ماسك البتاعه اللي بتمسح دي ومسح السبورة وقام واخد بعضه وروح بيته ونام على السرير ومات

اللي انا عايز اقوله ان مش اي حد عنده سلطة لازم يعمل كده حتى ولو كانت ضغوط الدنيا كلها فيه ده احنا مسلمين ياناس حرام

دول الكفرة مبيعملوش كده

بجد حسبي الله ونعم الوكيل في اي انسان اتخذ من منصبه مجال انه يهين اي حد او يذل حد

تحياتي
كل واحد عنده أخلاق الوضاعه بيطلع حقده وغلبه علي إلي أضعف منه. سواق الميكروباص بيبلطج علي الركاب وسواقين العربيات علشان بياخد علي قفاه من أمناء الشرطه، وموظفين الحكومه بيبلطجوا علي المواطنين علشان بياخدوا علي قفاهم من سواق الميكروباص وأصحاب الفرن.... وخدي عندك كل فئات الشعب المقهوره من السلطه نفسهم يطلعوا غلبهم في حد إنشالله ولادهم

إلا إيه مساحه جويه دي؟
من الصفات المميزه للناس في بلدنا هو حب التسلط على الآخرين
وياويلك من اللي بتقول عليه غلبان لو اتحكم فيك
يبقى الله يرحمك
ايوية said…
والله يا قطة
الناس بقت صعبة برضة مع بعض زى ميكونوا مش قادرين على الحكومة فبيطلعوا الى فيهم على بعض وخدى من دة فى المصالح الحكومية كتير
وخصوصا ربنا لا يوريكى التامين الصحى وخصوصا فى تعاملهم مع اصحاب المعاشات مش بس موضوع انهم مش بيدوهم كل الدواء الى هما محتاجينة لا المعاملة دول ناس كيرة فى السن المفروض انهم يراعوا انهم ميقدروش ينتظروا كتير لا على ما يجيى الدكتور والممرضات ومعاملتهم السيئة
ربنا يرحمنا
tamer.sala7 said…
هههههههههههههههههههههه

يوجد في كل الحالات تقريباً جهداً لطرد العدوانية إلى خارج الذات بغرض نفيها والتعامي عنها وعدم بقاءها في الذات. فاكتشاف الحقد الكامن فى ذات الشخص يسبب حالة من القلق والبحث عن الشر عند الآخرين كمحاولة لنفي الشر عنه

بعد ازن حضرتك يعني اصل انا تعليم
مجاني
اقسم بالله انا لو مكانه كنت اخدت منك الورق وقولتلك تعالي بكرة خديه
هو انا قاعد علشان المدير يتعوج عليا وكمان الناس تيجي تتعوج عليا
يا بنتي الموضع كله ان المأمور بيذ الظابط والظابط بيذل الامين والامين بيذل المواطن وكل مواطن بيحاول ياخد حقه من المواطن اللي زيه
وده اللي الحكومة عايزاه يعني تخلي الناس تاكل في بعض علشان تشغلهم عن امور تانية اهم بكتير
Desert cat said…
واحدة مفروسة
للاسف الاخلاق فى المجتمع اصبحت كلمة تردد فقط لا غير
تيجى تدورى علي التعامل بيها متلاقيهاش وبالتالى انتشر القهر ومبقيناش نشوف الصغير اللى بيحترم الكبير ولا عطف الكبير على الصغير
كانها شعارات كدابة فى الكتب
نورتينى يا جميله
Desert cat said…
رئـــــيسـة حزب الأحلام
للاسف نموذج الموظفة دى منتشر على المكاتب ولما تتعاملى معاها تحسى انها لسه واخده لها بوكسين فى عنيها وبتطلع العفاريت على اللى قدامها
انتى طولى فى الردود براحتك ولا يهمك المدونة مدونتك يا جميله
تحياتى
Desert cat said…
Sherif
ماهى كانت حاجه تفرس يا شريف
اعمل ايه بس
تحياتى
Desert cat said…
شـمو نشـادر
من غير ما اسالك يا اسامه عن تعسف مشرفى الجامعات
انا اصلا من الشرقية ودراستى كانت فى القاهره وكنت مقيمة فى دار للطالبات
وشوفت وجربت
ايييييييييييه
اهى ايام راحت ببلاويها
هههههههههه
تحياتى
Desert cat said…
سمراء
ميرسى يا سمراء
وانا لو مش فاضيه افضى نفسى طبعا هدخل اشوف الموضوع
شرفتينى
Desert cat said…
Zika
لاء فى فرق بين القهر والاسقاط
الاسقاط زى ما حضرتك تفضلت وذكرته
لكن القهر انى احس دايما اللى بيكلمنى احس منى وبالتالى ما ان بتكون ليا سلطة عليه بقلل من قيمته باى شكل من الاشكال
الربان said…
تحياتي

لو كل منا علم انه مستخدم من الله لخدمة خلق الله...لخدم الخلق علي احسن
ما يكون...
المشكلة ان البعض يظن ن الكرسي يدوم
و السلطة تدوم...و الصحة تدوم و العمر لا ينتهي...و الموت لن يأتي...
و اننا لن نقف امام الله نسأل...

ربنا يهدينا جميعا...و ينظف قلوبنا
من التعالي و التكبر... و يطهر انفسنا و لساننا من لهو الحديث و الجدال..

ربنا يقضي لك مصالحك...و ييسر لك امورك.

تحياتي
Heart Beat said…
الصديقة العزيزة جدا

desert cat

الجملة اللي ختمتي بيها دي جميلة جدا و بتعبر عن حاجات كتير اوي المهم اننا نفهمها و ناخد الحكمة منها

لسه امبارح كان في مواطن عايز يقابلني عشان عايزني اوقع على جواب توصية لانه عمل مخالفة متعمد مش غصب عنه و لا حاجه و المخالفة دي هاتكلفه حوالي خمستاشر الف جنيه كده

المهم اما السكرتيرة قالت لي عليه قلت لها انا مابوقعش على النوعية دي من التوصيات اللي يغلط لازم يتحمل غلطه خصوصا انه تعمد الغلط عشان كده جت على دماغه بالمخالفة دي

لما السكرتيرة قالت له فضب يزعق فيها و يقول اننا هنا بسببه هو غيره و بفلوسهم

فخرجت من مكتبي و قلت له طيب انا متنازلة عن الفلوس اللي بتصرفها علينا دي و روح ادفع بيها المخالفة اللي عليك و طردته

شوية و جاني موظف من المرتشين اللي عندنا و معاه نفس جواب التوصية فطبعا اتعصبت و رميت الورقة في وشه

الموظف المرتشي ده بقى يجي الشغل براحته بعد بداية الشغل بحوالي ساعة و نص و يقعد يفطر و يشرب سجاير و بعدين يقعد على مكتبه قرب نص اليوم

و اما يجي له شغل مهم مايعملوش و يديه لموظف تاني

و ماتلاقيهوش على مكتبه غير في حالات نادرة جدا

و طبعا مصالح كتير بتتعطل بسببه و مايعملش شغل الا اذا وراه مصلحة شخصية غير كده مافيش شغل خالص

في المقابل بيكون في موظفين شايفين شغلهم صح و بيعملوا اللي عليهم عشان يرضوا ضميرهم و يرضوا ربنا طبعا

بس للاسف السيئة بتعم زي ما بيقولوا

فيبقى بسبب الموظف السيء ده و اللي زيه المصالح تتعطل و كمان بناخد صورة سيئة

الاهمال و عدم تحمل المسئولية و خيانة الامانة اللي اتحطت بين ايدينا اللي هي شغلنا من اسباب التدهور اللي احنا فيه

يمكن عشان كده احنا لسه عالم تالت و لا يمكن رابع

و عمرنا ماهنتقدم ابدا

المهم بقى يعني ... خلصتي ورقك اللي عند الموظف ده و لا لسه برضه

تحياتي يا جميلة
Zika said…
انا متهيالي ان القهر ده نوع من الاسقاط
او يمكن يكون نتيجة ليه
هم الاتنين مرتبطين ببعض بطريقة ما
الا مين انطونينى ده
ههههههههههههههههههه
Nour said…
طبعا مدونتك اكثر من رائعة
وانا وقفت كتير جدا امام كلماتك التى تحمل العمق فى بساطتها
ولكن لى تعليق انتى متحاملة جدا على بعض التيارات وبالمناسبة والله انا لا انتمى الى اى منها ولكنى احب الحيادية دائما
دعينا نكن يدا واحدة على الجزم االمتدة فوق رقابنا
واتمنى ان ياتى يوم نرى فيه واقعا مختلفا
واحسبه قريبا
اشكرك دام قلمك
...........
نور الدين محمود
Baker said…
لا صحيح مبتشتغليش بمؤهلك ليه
قطتي الجميلة
المصريين عموما و خصوصا البسطاء منهم بيطلعوا غلبهم علي بعض
يعني اللي مش قادرين يعملو في الحكومة اللي خربت بيوتهم و جوعتم بيطلعوه علي بعض ود اللي بيسموه انتقام المستضعفين و بعيد عنك بيبقي انتقام غبي و كري جدا
دايما مواضيعك جريئه ودائما تحتوى على هدف ومغزى كبير الا اننى معجب اوى بالطريقة اللى انتى انسحبتى بيها بعد المقاوله الجميله دى
ولكن على ما اظن ان الموظ دا مش حاسس انه بياخد من الشعب لان الشعب عاوز اللى يديله وكمان ان ى بعض الاشخاص لو فى ايديه سلطة ولو بسيطه يحب التحكم بلاخرين
هذا والله اعلم
gannah said…
هى دى مصر يا عبلة
الاستاذة قطة الصحراء
لا تعجبين إذا اصبح هذا الموظف مديرا أو مسئولا كبيرا أو حتي وزيرا أو ربما أكبير من ذلك

يرتقي في المناصب لكنه لا يرتقي في الاخلاق
والنتيجة ما نعانيه كلنا من كلنا
البلاء عام

الحكومة والشعب شئ واحد
نفس الثقافة وذات القيم
وهو المطلوب تغييره
تحياتي لك يا بلدياتنا
Rania said…
مش قلتهالك قبل كدة يا قطه
ساعات بحس اننا نستاهل الى بيتعمل فينا
علشان احنا اصلا من جاوانا مش مظبوطين
للاسف الى قلتيه بيتكرر كل يوم
هقولك سر اوعى تقوليه لحد
اما بروح لبابا فى الشغل بعدى عليه يعنى
و انا بكلمه اى واحد يجى يكلمه يقوم قايله اتفضل يا فندم روح للموظف التانى
و بصوت عالى شوية
بصراحة اضايقت جدا
و قلتله ليه كدة دة شغلك
و بتاخد مرتب عليه و و و و
قالى لو متعملتش معاهم كدة بييجوا يتنطووا و يطولوا لسانهم اكننا بنشتغل عندهم
؟؟؟؟؟؟؟؟؟؟؟؟؟؟؟؟
فتحسى ان كل واحد عايز يقوى على التانى
كل واحد فاكر انه بصوته العالى دة او انه داخل معركة مع اخوة و هيكسبها
اوعى تقولى الكلام دة لبابا
:)
تحياتى لاحلى قطة
Abo 7anf said…
السلام عليكم
مش قلتلك قبل كدا يقطه
أننا عايشين فى مجتمع للاسف بقى بيقتل نفسوا
وان كتير قوى لما بتمنح ليهم اى سلطه ولو موظف بيحس انوا قاعد فى ملكوا
وان المواطنين بيشتغلوا عندوا
وبيتحكم ويامر وينهى على ايه انا مش فاهم
دا طبعا خلاف العقد المتراكمه اشمعنا انا بقيت موظف و غيري بقى وبقى
ناس غريبه
arsenalwy said…
ياقطة

لما الموظف دة يتعامل مع الناس زى ما انتى عايزه ولما حكومتنا تحترمنا يبقى انتى اكيد اكيد مش فى مصر

موضوع رائع وتسلسل افكار اروع
blackcairorose said…
معنديش اى استغراب يا قطة من موقف الموظف فيه زيه كتير واقل سوءا منه اكتر و وقلة قليلة من الملتزمين فى عملهم من واقع احتكاكى الذى لم يكن قليلا فى الماضى بموظفى الحكومة

بس احب اقول لك نصيحةزغيرة قوى يا جميله اللى يخليكى

لو حصل بعد الشر واتخانقتى مع موظف حكومة اوعى تقوليله زى ما كتبتى انت بتاخد مرتبك علشان تأدى وظيفتك، لان الكلمة دى هتزعله قوى واول حاجة هيقولها أو هتقولها الموظفة زى ما حصل معايا مرة فى السجل المدنى الموجود فى منطقة المساحة فى الدقى

مرتب ايه؟ هو اللى بناخده ده مرتب، ادينا بنشتغل على قد الكام ملطوش اللى بنقبضهم

هييييييييييييه ذكريات
للأسف أنا عرفت طعم القهر ده و حكيت عنه في موضوع ( أنا اللولبي كريم العنصرين ) و اللي ما حكيتش فيه اللي حصل كله طبعا

دي دولتنا بصفه عامه

شكرا على إتاحة الفرصه للنونوه معاكي

أتمنى المزيد

سلام عليكم
Tamer Nabil said…
القهر واللى بيحصل من بعض الناس شىء يحزن ويرفع الضغط

بحس انهم ناس فقدت الشعور والاحساس

تحياتى
Desert cat said…
مواطن مصري
طبعا الممرضة دى نموذج منتشر جدا
ويا سلام لما يكون فى حد تعبان ومقيم عندهم فى المستشفى تلاقيها رايحه جاية تقوله الف سلامة يابيه ولو دور وشه عنها يعنى مش دفع لها الاتاوة الواجبة عليه تجاهها تلاقيها تسيب سريره يضرب يقلب ولا تغير له الملايات ولا اى حاجه
والمفروض انهم اسمهم ملائكة الحرام
دى بافعالهم دى بيثبتوا انهم شياطين العذاب مش ملائكة رحمة ولا غيره
يارب تكون خلصت الرخصة على خير
تحياتى
Desert cat said…
.:.-=- ELGaZaLy-=-.:.
تقريبا فعلا زى ما قولت الناس من شدة الضغط عليها بتطلعه على الاخرين

تحياتى
Desert cat said…
مواطن مصري
هى من ناحية بتتقدم فهى فعلا بتتقدم بس بالمقلوب
تحياتى
Desert cat said…
WhItE HeArT
حاضر وحياة غلاوتك لاكبر الخط بعد كدا
طبعا الموقف ده ممكن يتكرر كتير
لان ممكن الشخص اللى بزعق فيه يكون عنده ضغط ولا قلب وهو حساس تلاقيها راح بسبب زعله
وساعتها ربنا وحده هو المنتقم الجبار
نورتى البلوج
احترامى وتقديرى
Desert cat said…
وجهة نظري
بالظبط كل واحد مقهور بيطلع قهره على اضعف منه
وكأننا منعرفش كلمة إحترام ولا سمعنا عن كلمة آدمية
تحياتى
Desert cat said…
لورنس العرب
ماهى بتيجى بالتدرج يا لورانس
يعنى المدير يطلع قهره على الموظف والموظف على الموظان والمواظن على زوجته وولاده
يعنى تقريبا اصبح القهر سمة مميزة
تحياتى
Desert cat said…
ايوية
اهو التأمين الصحى ده لوحده يا ايوية مصيبة تانية
يعنى بدل ما المريض يكون رايح يتعالج يروح يشيل الهم بسبب معاملة قساة القلوب ومن انتزعت من قلوبهم الرحمة وليسوا ملائكة الرحمة
ربنا ما يوقع حد فى طريق التامين الصحى ده
نورتينى يا ريحانه
:)
Desert cat said…
tamer.sala7
ماهو انا مقلتهاش يا تامر غير بعد ما ضمنت ان الورق فى ايدى وخلصان وعليه كل التوقيعات والاختام
بس بطاقتى هى اللى كانت فى ايده ولو كان قالى مش هتاخديها كنت هروح اعمله محضر انه سرق البطاقة ويبقى هو اللى جابه لنفسه
تحياتى
Desert cat said…
الربان
استاذى العزيز
للأسف كل واحد فى ايده سلطة مهما كانت حتى وهو من عامة الناس وعايش نفس عيشتهم مش بيفكر فيهم
المهم انه يمارس سلطته بالزعيق وطول اللسان ...
الحمد لله انا مشاورى خلص على خير
اشكر حضرتك جدا
احترامى وتقديرى
Desert cat said…
Heart Beat
صديقتى الجميلة هارت بيت
انا معنديش شك ولو ذرة فى مدى تفهمك للأمور وكمان حزمك فى الوقت المناسب
وده دليل على نبل اخلاقك ومعدنك الطيب انا الحمد لله يا قلبى خلصت الورق بخير
نورتينى يا جميله
Desert cat said…
Zika
هو عموما اى حاجه مرتبطة بالنفس البشرية بيبقى لها علاقة مباشره ببعضها
تحياتى
Desert cat said…
wanna b a physician
ده واحد فاهم المجتمع كويس
Desert cat said…
Nour
اولا شرفتينى حضرتك
ثانيا انا مش بتحامل على حد انا بدى كل واحد حجمه الطبيعى
وعلشان الاخوان مينبوش لنفسهم مجد زائف لازم برضه ياخدو حجمهم الطبيعى
شرفتى
Desert cat said…
Baker
ده موضوع كبير اوى ويطول شرحه
بس مين عارف
نورتينى
Desert cat said…
العزيز جيفارا المصرى
طبعا وجهة نظرك صحيحة جدا
كل واحد بيطلع كره وضعفه على اللى قدامه
واهى ماشية
تحياتى
Desert cat said…
محمد صالح
انا مش شايفه فيها حاجه لما الموظف اللى فى ايدة سلطة يتعامل مع الناس بذوق لان المناصب ائما تزول ومش بيبقى غير قلوب الناس الطيبة
عموما هو نموذج منتشر جدا فى مجتمعنا
اشكرك جدا على ذوقك
احترامى وتقديرى
اختى الرائعة
القهر سيظل لان الضمير فى اجازة
مشكلتنا مشكلة ضمير
فى كل المجالات هناك فساد
اتمنى ان تعود مصر الى بلد العلم والايمان كما كانت تسمى يوما
تقبلى تحياتى
ومتعك الله بالحب والصحة
ودمتى بود
اتمنى تشريفى بمدونتى المتواضعة
Desert cat said…
gannah
للاسف يا جنة هى دى فعلا مصر
شرفتينى يا عروسه
Desert cat said…
فليعد للدين مجده
صح انا بشوف ناس بترتقى فى المناصب ولا لا ترتقى للاخلاق
وفى البعض مهما علا منصبه فخلقه دائما كريم
بس للاسف نادرا بنشوف النموذج ده
وبما اننا بلديات بقى
حضرتك شرفتنى جدا
احترامى وتقديرى
Desert cat said…
Rania
هههههههههههههه
عسوله يا ارنيا ربنا يخليكى ويخلى لك بابا
برضه اجندة تفضلت مشكورة وحكت لنا نموذج من اللى بيحصل عندها فى الشغل
للأسف إحنا محتاجين ازاى نعرف نحترم بعض
علشان نعرف نعامل بعض
يعنى العميل او المواطن يتكلم بذوق
وكمان الموظف
بس الموقف اللى انا شوفته الراجل كان ضعيف جدا حتى رده حسيت فيه بذل واهانة علشان كدا انا اتاثرت بيه بصراحة
نورتينى يا جميله
Desert cat said…
Abo 7anf
طيب الموظف اللى بيقول اشمعنا ان بقيت موظف وغيرى بقى كذا وكذا المواطن اللى واقف قدامه ده ماله
هو كان حدد له مسقبله
لكن بيحصل بالفعل
تخيل لو اتنين زمايل دفعه واحده وواحد موظف والتانى رجل اعمال تلاقى الموظف فى الراحة والجاية يقر عليه ويطلع كلاكيعه على الناس
ربنا يرحمنا ويهدى الجميع
تحياتى
Desert cat said…
arsenalwy
طيب احنا ليه دايما بناخد من الغرب الحاجه الوحشة
ونسيب لهم الحلو عندهم احترام ادمية وانسانية
واحنا بنقلدهم فى الموضة وتقليد اعمى هما نفسهم مش بيعملوه
شرفتنى جدا
احترامى وتقديرى
Desert cat said…
blackcairorose
انا للأسف كل لما اكرر مش اتعامل مع موظفين حكومة اساسا الظروف السيئة بتلغى القرار غصب عنى
سواء فى شغلى او فى اى حاجه خاصة بابا او ماما انا مش قولت له بتقبض علشان خدماتنا انا قولت له فيما معناه انك انسان مقهور
وكويس انه مفهماش والا كان زمانه عاملى محضر تعدى على موظف اثناء تادية وظيفته
ربنا يبعد عنك وعننا جميعا الموظفين المقهورين
نورتينى يا احلى روزا
Desert cat said…
الإتربي اللولبي
كويس انك لفت نظرى للموضوع اللى كتبت عنه
هدخل اشوفه
طبعا حضرتك شرفتنى
Desert cat said…
Tamer Nabil
هما ناس فاقدة الاحساس فعلا بس تملك احساس واحد بس واللى هو القهر مع سبق الاصرار والترصد
تحياتى
Desert cat said…
طارق الغنام
صح يا طارق لو الناس تملك الضمير وتقدر تحس ببعضها
هيعرفوا يحترموا بعض كويس
يشرفنى جدا زيارتك
احترامى وتقديرى
osama said…
ههههههههههههههههه
والله معاك حق ...
وشر البلية ما يضحك...
هات البطاقة ...



ان الانسان يسقط همومه على الآخرين في عملية من الاحلال والتبديل كحيل دفاعية.. ولان الحمل في المجتمع المصري زايد شويتين تلاته معدش حد قادر يتحمل حد...
والاحساس بالدونية زاد...
وان حق لي ان اقرأ السطور بنظرة غير تفصيلية ..
أظن ان السبب يعود
الى القهر البوليسي من قبل نظام مستبد ممتد من معاوية الى الآن
والتدين الأجوف او فوبيا الدين عبر عمائم تعد الناس بالنار والنار فقط

دمت بكل ود...
خالص تحياتي
Desert cat said…
بالظبط يا اسامه
انتشار الفساد
والضغط والقهر من يملك سلطة على من لا يملك
وشيخ بعمه وخلفيه اسلامية طول النهار يلقى خطب وفتاوى النار وبئس المصير والثعبان الاقرع
كلها ضغوط مجتمعية
محتاجين ثقافة جديده بس الاهم نلاقى عقول تتقبل
تحياتى
أنطونيني ....طيب بأمارة أيه ..بقى واحد زي الموظف ده كل اهتماماته تنحصر في توافه اهمها سندوتش فول الصبح و نص ساعة بتاعة يوم الخميس على نفسين مع واحد مقتدر شوية هايفهم حاجة من اللي قلتيه
أقزام الموظفين دول افراز متخلف لتراكمات الاشتراكية و ارفع رأسك يا عبد الصبور و أكم من تداعيات المنظومة الفاسدة فيما سمي يوما ما بوطن

دمت بخير
Desert cat said…
واحد مصرى
اهم بتوع ارفع راسك يا عبدالصبور دول اللى جابونا لورا
وانتهى عصر الاستعباد من الانجليز علشان احنا نستعبدكو ونطلع عينيكو
وعلشان مش فهم الجملة انا مشيت فى سلام
نورتنى يا ايهاب
مدونة ظريفة
بالفعل تسود حالة القهر وانعدام الامل كل الناس
اعتقد الصبر والالتزام بالاخلاق الحميدة سوف يؤدى الى تغير الوضع الى الافضل باذن الله

Popular posts from this blog

قميص دهشور

كل تحرش وانتوا طيبين