من فضلكو سيبوا الجميع ياخد فرصته

أعتدت يومياً فى الصباح وانا فى طريقى الى عملى شراء جريدتى المفضلة الدستور .. ولكن منذ أيام قليلة بدأت تصدر على النت فأكتفيت بمطالعتها كمثيلتها .. ولكن اليوم مينفعش أطالعها على النت كان لازم اشتريها مش لان معنديش نت .. لكن اليوم محمد سيعود لعمله وهذه جريدتنا المفضلة سويا ... اعتدت يوم سفره لازم انا اللى اجيبها له ... كما يفعل هو نفس الشيئ .... ولكنى لا اشتريها من أى بائع فهو فقط بائعى المفضل ... شاب فى بداية العشرينات ... يعمل بائع جرائد وطالب جامعى فى نفس الوقت ... ذهبت الى مكانه ولم اجده انتابتنى حيرة مذهله .. توجهت للسوبر ماركت الذى كان يجلس بجواره وسالت الشخص الموجود عليه فأجابنى أمشى قدام شوية حتلاقيه فى الميدان ... مشيت وعينى بتدور عليه فى جميع الاتجاهات . فرحت جدا لما عينى وقعت عليه ... وتوجهت اليه مسرعه .. ازيك يا احمد ؟؟ هو انا اغيب يومين ارجع الاقيك مغير مكانك ... امال لو غبت شهر هتعمل ايه ؟؟؟ حأهاجر يا بشمهندسه ... يا ساتر يارب .. ليه كدا وبعدين هى الهجرة سهله كدا ... إنت ليه غيرت مكانك يا احمد ؟؟؟؟ أجابنى بإنكسار .. والله غصب عنى زى ما حضرتك عارفه مكانى هناك من زمان وكل زباينى عارفين المكان ده ... لكن أعمل ايه بتوع البلدية منهم لله ... بيضايقوك ؟؟؟ دول بيقرفونى مش بيضايقونى بس ... طيب ما انت هناك من زمان إشمعنا الايام دى ... لأ هما كدا على طول انا بقسم معاهم الرزق اللى ربنا بيبعتهولى بالنص علشان يسيبونى فى حالى والايام دى انا داخل على امتحانات ومحتاج لكل جنيه وعلشان فى يوم مش اديتهم رموا لى الجرايد فى الشارع ... وبنعيب على الحكومة لما ناس مننا فينا وعايشين نفس الحياة اللى عايشينها وبيعملوا فينا كدا هى البلد دى مش ناوية تنضف بقى ... طيب خلينا منطقيين ... ماهو الجنب اللى انت كنت بتقعد فيه صاحب السوبر ماركت عارض فيه كراتين شيبسى يعنى كدا كدا مشغول .... هل بيعملو معاه كدا ؟؟؟ مش عارف والله بس بجد انا زهقت من كل حاجه مبقتش قادر أواصل ... انا كتير بقعد اقول يارب خدنى علشان استريح ... يا احمد عيب انت شاب مثقف واصبر ان شاء الله خير ... الا قولى مفكرتش تأجر محل صغير كدا تبتدى فيه ... ضحك ضحكة كلها مرار ولاقيته بيقولى انا مش عارف اعمل كشك حتى .. ليه يعنى ... إجراءات معقدة وكل مكان ادخله لازم ادفع .. لحد والله كنت بستلف وانا رايح اعمل الترخيص وفى الاخر السيد المسؤل فى المجلس حط الورق فى الدرج وقالى فوت علينا بكره ... الكلام ده فات عليه شهور وكل لما اسال بكره لحد ما بقيت حاسس مفيش حاجه اسمها بكره .. لاء والنبى بلاش نبرة اليأس دى احنا مش هنفضل فى ليل على طول وباذن الله الشمس هتشرق قريب اوى بس انت اتحمل شوية ... مش عارف ارد اقول لحضرتك أيه بس انا حاسس إن الدنيا كلها متقفلة فى وشى حاسس انى مش قادر اتنفس من الجبال اللى كاتمه نفسى ... وقتها أنا اللى معرفتش أرد عليه ... حسيت بثورة جوايا لكن للاسف ثورة عاجز لا يملك الطاقة ولا السهولة لتفجيرها ... حسيت بتأنيب ضمير طيب إزاى اللى بيدمر بنى ادم بالشكل ده علشان جرة قلم بيعرف ينام ويستريح .... حسيت بالتمرد على كل قوانين العالم وتجاوزها حسيت انى محتاجه اصرخ واعلن باعلى صوتى يا قوة الزمن لن تكسرينا أو تثنينا على أهدافنا او تقتلى امانينا ... قطع احمد شرودى ولاقيته بيقولى انا اسف يابشمهندسه والله اسف ... اسف على ايه بس يا احمد انت عملت لى حاجه ؟؟ لاء اصلى لاحظت انك سرحتى وملامحك أتغيرت ... لا ابدا مفيش حاجه .. ادينى الدستور لو سمحت .. اخدت الجريدة ومشيت مش شايفه اى حاجه من الشارع كل لما ابص على حاجه قدامى اجدها ما هى الا اضافه سرياليه للفنان البوهيمى .. ادخل بخيالى لاى مصلحة حكومية ... لأرى ذلك المسؤل الجالس على كرسى والجميع من حوله ينادونه بالقاب مختلفه لينالوا توقيعه الكريم ... وعندما يأتى له شاب دون ان يكلف ذلك المسؤل خاطره بعمل معاينه للمكان المحتاج ترخيص من عدمه يرمى الاوراق فى الدرج حتى تهترئ ... حينها فقط اراه شيطان فى ثوب رجل ... واعود بفكرى لواقع المجتمع فالدكتور يريد ان يصبح ابنه دكتور والمهندس يريد ان يكون ابنه مهندس واستاذ الجامعه كذلك ... ويبذل قصارى جهده للترقى بابنه فى اعلى الدرجات حتى ولو كان يفتقر الى ما يؤهله لهذه الدرجة ... ونفس الدكتور او المهندس او استاذ الجامعه حينما يتقدم له شاب من الطبقه المتوسطة يتغاضى عن مستوى ذكائه وتقديره العلمى لياخذ ورقه ويرميه جانباً حتى يهترأ ... ألهذا الحد نعود بأيدينا للطبقية .. ألهذا الحد اصبحت البلد وسية لمن يملك المال والنفوذ اما العامة فلا يحلمون بالوصول اليهم ... فابن البواب محكوم عليه ان يظل بواب حتى لو كان حاصل على درجة الامتياز ... اى بلد محترم بتستغل طاقات الشباب وتوفر لهم الدعم حتى تساعدهم على الاستثمار ... شباب مصر مش عاله عليكو يا سادة .. دى بلدنا ولينا حق فيها زى ما ليكو .... من فضلكو سيبوا الجميع ياخد فرصته.

Comments

dr.Roufy said…
يا الله
كلماتك أوجعت روحي
ونكأت جرحي المسمى بمصر
:(
هذا الشاب ليس الا نموذج للأسف وأمثاله كثيرون
أحيانا أفكر ..اين يذهب بنا وهذا الوطن
على رأي الحزب الوثني: مصر بتتقدم بينا
لكن بتتقدم نحو الهاوية
أنا أتفق معكى فى أن الجميع لابد أن يأخذ فرصته ولكن لى إضافة بسييييييطة جدا على الجملة عنوان البوست حتى يتسنى لمن يقرئها أن يعى الباقى ..
لابد أن يكون عنوان البوست..
(سيبوا الجميع ياخد فرصته فى الهروب)
على أساس أن البلد لن ينصلح حالها أبدا
دام قلمك حساسا..
تحياتى لكى
mohager said…
وأكتر من الدرجة دي شوية كمان
وكل يومين تلاته واحد يطلع في التلفزيون ولا علي الجرايد الحكومية ويقول أنهم بيشجعوا الشباب علي المشروعات الخاصة ، بيشجعوا الشباب علي العمل .
وحياتك كله كدب
أنا كنت فاتح مشروع صغير لخدمات الكومبيوتر في مصر وبعد ما عملت المستحيل عشان أخد الرخصة ... وأخدتها بعد سنه ونص
بقي فيه استدعاء شيه شهري لأمن الدولة ... وبعد ما اتلطع هناك ساعتين علي الاقل ... الباشا الضابط يقولي لو لقيت حد بيدخل علي مواقع مشبوهه اتصل بينا .
أول مره حبيت استعبط قولتله يعني مواقع اباحية ؟
قالي لأ الاباحية دي اختصاص الأداب


وكان كله مره فيها استدعاء يبعتولي مخبر يلهف 100 جنيه علي الاقل

مشكله والله



تحياتي
هلا البلد لسه فيها فرص علشان الناس تاخدها الفرصه انتهت او اتحصرت فى ابناء الكبار وابن المستشار وكيل نيابه وابن الممثل ممثل وابن دكتور الجماعه معيد وابن الرئيس رئيس
لا حول ولا قوة الا بالله
بجد حالة الشباب المكافح بقت تصعب علي الواحد
ربنا علي الظالم والمفتري
المشكله يا قطقوطه فيه مليون احمد فى البلد
و عاوزين يشتغلوا
بس تقولى ايه ابجنى تجدنى
يعنى لما كان بيديهم كانوا ساكتين عليه....لاحول و لاقوة الا بالله
Tamer Nabil said…
كل حاجة بقت ماشية كدة بالدفع اللى هو الرشوة

عشان الحال يمشى

شاب بيحاول يساعد نفسة على قد ما يقدر مش يسبوة فى حالة لا لازم يدفع ويدفع لية وهو بيكسب كم عشان يدفع

محدش بقى يرحم حد
وبتوع البلدية وغيرهم طول ما حدش بيقف ليهم ويحاسبهم

هيفضل حال البلد كلة كدة ماشى بالمقلوب

تحياتى
Heart Beat said…
Dear Desert Cat

معلش انا هاسأل سؤال مهم بالنسبة لي و بعدين اجي اعلق على الموضوع براحتي

ممكن تقولي ايه موقع جريدة الدستور اونلاين عشان انا دايما الاقي الدستور بتاعت الاردن

اشكرك مقدما
Abo 7anf said…
مهو دا بيحصل كل يوم
فرص بتضيع
وللاسف ان كتير بقى بيحللها لنفسه
بمبدأ أشمعنى أنا
ما غيرى بيعمل
ومش على مستوى السلطه بس
لكن للأسف مبينا
ومبدأ الوسطه
كل أب فى ايده سلطه بيحاول يورثها لأبنه
من دكتور فى جامعه
لرئيس مجلس إداره
لأى حد على اساس انوا حقه
فرص ايه فى البلد دى
أى واحد بيجيلوا فرصه يخلع
بيخلع
ومش بيرجع
خلاص بقى
وحكايه البلديه بقت تقريبا فى كل حته
Desert cat said…
مع احترامى وتقديرى للجميع انا هرد دلوقتى على سؤال هارت
وليا عودة للتعليق على باقى الكومنتات اعذورنى لانى مشغولة حاليا
http://www.eldostoor.com/
ده موقع الجريدة يا حبيبتى
Heart Beat said…
Dear Desert Cat

الشاب ده زي غيره ملايين من الشباب المصري عندهم الشعور بالاحتقان الرهيب ده لدرجة تمني الموت على الحياة و مواجهة الضغوط اليومية دي

يعني شباب سنهم صغير لسه ماشافوش من الدنيا حاجه تيجي الحكومة و زبانيتها من مسئولين يحطوا اودام الشباب مليون حائط عالي لدرجة ان الشباب ييأسوا و يتمنوا الموت

و بعدين نرجع نقول ليه الشباب بيهرب من البلد و بيكرهها

ما هو من اللي بيحصل ده

المفروض ان السادة المسئولين يفرحوا لما يلاقوا ان في شباب واعي عايز يشتغل و ينمي نفسه و يخدم البلد

لكن السادة المسئولين ولادهم عندهم احسن من اي شاب مصري مكافح حتى لو اولادهم دول كانوا حمير و مابيفهموش حاجه

ايام الدراسة كان اولاد المدرسين بياخدوا درجات عاليا و ينجحوا و ايام الجامعة كانوا اولاد الدكاترة بيجيبوا 19 و نص من عشرين و هي الدرجة النهائية

و كنا مانستغربش اما نشوف النتيجة بالشكل ده لان الحكاية مابقتش بالاجتهاد العلمي بقت بفلان ابن الدكتور علان

السادة المسئولين مش بيهمهم الشباب اللي راح في البحر في ايطاليا و تركيا طالما دول مش ولادهم

دول ولاد الناس الغلابة اللي مالهمش تمن في نظر السادة المسئولين دول

البلد هاتنضف لما المسئولين دول يمشوا و يحلوا عن سمانا بقى

ربنا يستر
Heart Beat said…
Dear Desert Cat

ميرسي يا جميلة على اللينك

ربنا يخليكي يارب
أنونيمس said…
لم يعد هناك مجال في الصدر لمزيد من زفرات الاختناق


أففففففففففففففففف

عذرا
فاتيما said…
قطقوطة فكرتينى بكلامك بجملة كريم عبدالعزيز فى الفيلم
إبن ظابط البوليس هيطلع ظابط بوليس و إبن تاجر المخدرات لازم يطلع تاجر مخدرات !!!
و عجبى على الدنيا الغريبة دى
كلماتك اوجعتنى للغاية

البلد دى عايزة طوفان نوح بجد....
تصدقى يا قطقوطة
وانت كاتبة فى اخر كام سطر المهندس عايز ابنه مهندس
والدكتور عايز ابنه دكتور
وده فعلا واقع وبيحصل
وساعات احنا كأفراد شايفين ان ده عادى وان من حق الاب الدكتور مثلا انه يطلع عيل من عياله على الاقل دكتور زيه

طب ليه بقى زعلانين اوى اوى ومقمصوين ان الريس عايز ابنه يبقى ريس زيه
هو ده مش اب زى باقى البهبهات


المهم سيبك من التهيس بتاعى ده وقوليلى مين محمد ده
الى كلفتى نفسك واشتريت الدستور علشانه
؟؟؟؟؟؟؟؟؟؟؟؟؟؟
سؤال بايخ مش كدة

طب خلاص يا قطة متزفيش
يا بنتى خلاص بلاش البصة دى انا هامشى اهه بكرامتى خلاص

تحياتى
اختك خيخة
tamer.sala7 said…
ههههههههههههههه
شر البلية ما يضحك
طيب انتي بتقولي عاجزة ومش قادرة
تعملي اي حاجة
بمناسبة العجز
انا دخل عندي عميل يوم الخميس في الشركة وجايب معاه شخصين زي البقر كدة جاي بيشتكي من ان النت عنده مش شغال قعدت اهدي فيه وقوله حضرتك وسيادتك لغاية ما توصلت معاه لحل اني حكلم ادارة الشركة في القاهرة علشان النت يشتغل عنده
بدأت اعمل تليفونات للأدارة ومحدش بيرد عليا خالص طبعا الراجل بدأ يتعصب تاني لدرجة انه مسك فيا وبدأ يخبط ويرزع في الشركة وخلاص حيكسر المكتب علي دماغي ومفيش حد معايا في الفرع كله غير بنتين سكرتارية معرفتش اعمل اي حاجة غير اني اتصل بالنجدة عملت المحضر الساعة 3.12 م بعد ما اخد اسمي ورقم البطاقة ورقم الموبايل وقالي حبعتلك حد مجاش
الراجل اللي كان بيكسر ويخبط في المكتب
قالي علشان تبقي عارف انا ظابط شرطة
ودول امناء شرطة معايا يعني حنكسرلك الدنيا وبرده
كل اللي بتعمله ده ملهوش لزمة وعلي العموم انا معاك لأي مكان نروحه فضل معايا لغاية الساعة 4 قالي النجدة اللي انت طلبتها اتأخرت انا مش فاضي لما النجد تيجي ابقي اديهم الورقة دي وعطالي ورقة فيها اسمه ورقم تليفونه ورقم بطاقته ومشي بعديها بساعة يعني الساعة 5 لقيت عسكري جاي لوحده يقولي انتو عملتو بلاغ من شوية
قولتله انت لسة فاكر تيجي ده كان فيه حيوان هنا بيخبط ويرزع واتهجم عليا انا والبنات قالي طيب فين الاصابات قولتله مفيش قالي طيب في التلفيات قولتله مفيش قالي طيب انت جايبني ليه
طبعا انا انفجرت فيه وقولتله هو لازم حد يموت علشان تتصرفوا
قالي امال انت عايز ايه انا مضطر اخدك معايا اتصلت بالشئون القانونية عندنا بعتولي محامي روحت انا وهو والمحامي الامين اللي في القسم بيقولي يعني انت عايز تشتكي ظابط قولتله ايوة
قالي طيب راجع نفسك تاني وبيقنعني اني امشي المحامي قاله لو سمحت اعمل محضر قالو طيب
عمل محضر واخدت الرقم بتاع المحضر ومشيت
لغاية دلوقتي كل عشر دقايق يتصل بيا واحد يقولي خلي بالك احنا حنعمل ونسوي وحنطلع ونزل وكل ده علشان النجدة مجتش غير بعد ساعتين من البلاغ اللي انا عملته
يبقي ليه مش عايزينهم يبيعو ويشترو فينا ؟؟؟؟؟
gehad_fci said…
هي ام الدنيا مصر ""هي ورده كل عصر
بجد انا اتأثرت باللي انتي قولتيله يعني شاب زيه المفروض البلد البلد تساعده بأي حاجه
منهم لله المسئولين
بتفكريني بهمسه عتاب اللي في الراديو
راجل غتيت اوي
ربنا يوفق كل الشباب
ويارب البلد حالها يبقي ا حسن من كدا
او ينقلب حالها
الساده المسئولين عاوزين اللي يدفع لهم عشان الأمور تمشي

بس كده
الربان said…
تحياتي

من فترة طلع الدكتور زكريا عزمي في مجلس الشعب و قال ان الفساد في المحليات
وصل للركب.... هذا كلام من رجل يعتبر من كبار المسؤولين بالدولة.

ازمة الضمير و ضياع القيم الاصيلة سهل تمرير الفساد الي قلوب الناس...و اصبحت
قلوبهم غليظة و ران عليها الفساد.

ربنا مع هذا الشاب المجتهد...و لن يخذله
و سينصره و لو بعد حين...المهم يستمر
في الصمود و العمل...

تحياتي و تقديري
Desert cat said…
dr.Roufy
اسفه جدا يا دكتورة لما اصابك من استياء
لكن للاسف ده حال الغالبية
الوطن بيذهب بينا نحو الهاوية
تحياتى
Desert cat said…
واحد من البلد دى
والله يا فندم انا دلوقتى اتاكدت انهم بيطفشوا الشعب بشتى الطرق علشان تفضل البلد ليهم يجروا براحتهم فيها
قال يعنى احنا كاتمين على نفسهم
ده اى لما اى مسؤل بيعدى فى الشارع الشوراع الجانبيه والمجاورة بتتقفل والدنيا كلها بتقف وكمان مش عاجبهم عايزين يطفشوا الشعب
ربنا يتولانا
تحياتى
Desert cat said…
mohager
انا كمان عندى نفس المشروع
وبالفعل امن الدولة بتعمل لجميع اصحاب كافيهات النت اجتماع دورى كل شهرين على الاقل بس مش بيكون كل فرد لوحده بيكون كله فى معاد واحد بس انا مش بروح لانى روحت مرة ووقتها قولت للظابط انا مينفعش كل شوية اجى امن الدولة طبعا تفهم الموقف وقال مين اقرب جار ليكى رد جارى الجنب وقاله انا .. قاله خلاص اى جديد يحصل فى الاجتماعات يبقى تبلغه ليها ... ومن بعدها مروحتش وبرضه الاجتماع زى ما انت قولت بيبقى ينص على الآتى اى حد داخل يفتح مواقع او يكلم حد بره مصر تاخد اسمه الخماسى ورقم بطاقته ... اذا كان انا صحابى الانتيم كلهم من بره مصر وكمان عندى 2 من اخواتى بره مصر ووسيلة الاتصال الدائمة بينا النت ... طبعا محدش بيعمل كدا هى بتكون مجرد إجراءات روتينية مش اكتر .. وكمان علشان يعرفوا مين اللى فتح نشاط جديد ولو مش ليه ملف عندهم بيفتحوا له ملف ... علشان وقت لما يكون فى منشورات فى البلد ولا اى حاجه بتحصل ابقى قول على نفسك يا رحمان يارحيم ... زى مثلا كان فى العيد الصغير الاخوانجية عملوا مشاكل فى بلد جنبنا وامن الدولة طلعت من بيوتهم كمية منشورات كبيرة اوى ... ووقتها اللى اتاخد فى الرجلين اصحاب كافيهات النت والمطابع ... لكن اللى كان بيثبت انه مالوش علاقه بالموضوع كان بيتعرض على نيابة امن الدولة ويخرج من هناك ... اللى متورط مع العالم دى يشرب بقى ... طبعا المفروض امن الدولة او اى جهاز اخر قبل ما يتركب الافعال دى وياخد العاطل فى الباطل ويكره الناس فى الشغل وفى الدنيا باللى فيها يعملوا تحرياتهم الاول .. لكن للاسف النظام معدوم فى جميع الاجهزة فى البلد يبقى مستنين من الناس ايه بقى
تحياتى
Desert cat said…
رئيس جمهوريه نفسى
اه
بالظبط
Desert cat said…
حماتــــــــــــي ملاااااااااااك
هما اساسا مش مديين فرصه لحد يكافح
اللى عايز يعيش بيجبروه يروح يرمى نفسه فى اقرب بحر
تحياتى
Desert cat said…
واحدة مفروسة
بالظبط كدا يا قلبى
على رأى اللمبى الجنيه غلب الكارنيه
نورتينى
Desert cat said…
Tamer Nabil
تعرف يا تامر
انك لو فكرت تدخل المجلس لازم تكون فى جيبك اى فلوس فى بيتكو وفى بيت جيرانكو لانك من اول ما بتدخل بتدفع من اول عامل البوفيه لحد رئيس المجلس
انا فترة كنت كاتبة عن حالة رشوه تعرف مين المرتشى
رئيس المجلس نفسه
فما بالك بالموظفين
اذا كان رب البيت بالدف ضارب
تخيل بقى الباقيين
تحياتى
سمراء said…
لا اعلم هل هي زمم خربة ام انها تداعيات الفقر والظلم
احيييك
سمراء
الواحد دمه اتحرق
طيب ان بطلت اتفرج على نشرات الاخبار عشان اللى بشوفه فيها
وقلت خلينى عالنت
مافى مدونةادخلها الا ويتحرق دمى من
اللى بيتكتب فيها
ربنا يرحمنا
وتحياتى ليكى على اسلوبك الشيق
Nsreen Bsunee said…
عشان كده بأتردد قبل قرار الرجوع ألف مره
:(
قطتنا الشقيه صاحبه أحلي و اجرأ مواضيع
شوفي ياقمرايه بجد حاجه بقت توجع القلب لما شباب زي الورد يفكروا في الموت او الهجره عشان مش لاقيين اللي يكفيهوم في بلادهم و المصيبه ان البلد فيها خير بس منهوب
الوسطه المحسوبيه بقت حاجه فظيعه و مش يحطوا في عينهم حصوه ملح يعني زي مابنقول المساواه في الظلم عدل يعني اللي ابنه مش كفء لشغلانه معينه بيشغله و بياخد بالالوفات و اللي متخرج و جايب امتياز مثلا متبهدل و مش عايزه اقولك علي حال الدكاتره
يعني بجد اللي بيخدوه مايكفيش اي حاجه من اللي عمالين بيغلوها كل يوم
كل شويه يطلعوا يقولوا ارتفاع الأسعار ظاهره عالميه اوكي ماقولناش حاجه بس برضه بره ارتفاع الأسعار بيقابله ارتفاع في مستوي المعيشه مش بيقعدوا يرفعوا الأسعار عمال علي بطال و المرتبات هي هي
اللي بيستفزني الاعلانات اللي عمالين يعملوها و يقولولك البلد بتشجع الأعمال الحره و مشاريع الشباب و في نفس الوقت بيحطوا مليون حيطه و مليون قانون عشان يعقدوا الشباب و لازم كل حاجه تمشي بالمعلوم و الا تقف لوقت غير معلوم

عارفه لو حد من المسؤلين دول كان ابنه او بنته في حادثه زي العباره دي مثلا كانوا قوموا الدنيا و ماقعدوهاش لكن عشان ناس غلابه فيقولولك بسلامه و اهو نخف شويه

ربنا يكون في عوننا كلنا

تحياتي ليكي ياعسل
والله كلمك قطع قلبى
ولكن ليا تعليق بسيط اوى
لو احنا هنعود لطبقيه يقوللنا من دلوقت علشان نحشد الغضب اللى جوانا ونجهز الاسلحه ونعمل تطهير عرقى للطبقات الاعلى اللى هيا نسبه قليله ونريح البلد منهم
حل بسيط وسهل
Mohamed Hamdy said…
بوست حساس جدا

عارفه انا ايه اكتر حاجه بتغيظنى فى شرطه المرافق ؟

أنهم بييجوا على الغلابه وبيسيبوا اصحاب الكافتريات الكبيره والفخمه يهيصوا براحتهم
Sherif said…
لو أن القانون على كل الناس ماكانش يبقى فيه مشكلة

بالتالى كان هذا الشاب المكافح ماحتاجش للعمل لأن الدولة مغطية نفقاته كما فى الخارج .. الأغنياء موجودين بس بيدفعوا اللى عليهم للبلد .. بالتالى بتقدر تدعم بقية الناس .. سكن وعلاج وتعليم

هذه ليست دعوة لغير العمل .. العمل دائما والمحاولة المستمرة هى فى تقديرى الجهاد فى سبيل الله حتى يحقق هدفه

ليه باقول كده .. لأن البحث عن حل حتى من خلال بيع الجرائد مع كل المضايقات دى .. هى أبرك وأشرف من القعاد على القهوة وندب الحظ

تحياتى للبوست الساخن
Desert cat said…
Abo 7anf
تعرف يا محمود
انا ساعات بيجى عندى ناس تكتب طلبات وظائف مثلاً
وتلاقيى الطلب فى اوله وفى اخره حيث اننى من ابناء العاملين فى الدولة ووالدى او والدتى قضى فى الحكومة 20 سنة اشغال شاقه
وبالتالى من حقى اكمل المدة معاه
كانها ووراثه
تحياتى
Desert cat said…
Heart Beat
صديقتى واختى الجميلة هارت
اللى انا مش قادرة افهمه حالة الشيزوفرنيا اللى فى المجتمع
يعنى تلاقيهم نازلين اعلانات فى التى فى واحنا بنشجع الشباب واشتغل واعمل وسيب التعليم بلا تعليم بلا قلبه دماغ
ولما يسمع كلامهم ويفكر يشتغل
تلاقي القوانين ووقف الحال هبط عليه من كل ناحية
ادفع علشان نمشى لك الورق
وبعد ما يدفع دم قلبه معلشى يا حبيبى منعطلكش فوت علينا بكره
طيب يعنى لا بترحموا ولا بتسيبوا رحمة ربنا تنزل
ماهو يا تسيبوا لهم شغلانة يا تسيبوهم يشتغلوا
انما فى كل الاحوال بانيين حيطه سد
طيب ايه الهدف الاساسى من كدا
علشان ايه يعنى
مش قادرة افهم
تحياتى ليكى يا جميلة
شرفتينى وشرفتى صفحتى المتواضعه
محبتى
Desert cat said…
Heart Beat
لا شكر على واجب يا قلبى
انتى تؤمرى
Desert cat said…
أنونيمس
من غير عذراً
بضم صوتى لصوتك وبقول
افففففففففففف
تحياتى
Desert cat said…
فاتيما
ماهو ابن تارج المخدرات مبيكونش اغلب الوقت بمزاجه يطلع تاجر مخدرات
انما لما يلاقى الدنيا كلها متقفلة فى وشه
يبقى مفيش قدامه حل غير انه يبقى ابن تاجر مخدرات
نورتينى يا ام يوسف
Desert cat said…
.:.-=- ELGaZaLy-=-.:.
اعتذر جدا لاى الم بسبب كلماتى
بالنسبة للبلد فهى عايزه عملية طهارة لجميع الجهاز الادارى من اول هناااااااااااك طبعا انت عارف هناك دى تبقى فين
لحد بتوع البلدية
تحياتى
Desert cat said…
بت خيخة وأى كلام
لمحة ممتازة فعلا
احنا ليه متضايقين علشان التوريث اذا كان كل واحد عايز يورث ابنه منصبه
يمكن علشان كلنا مصريين فبنتفق فى بعض الحاجات بس هما مش بيتفقوا معانا فى زيادة الاسعار خالص
انا بشك اصلا انهم بيشيلوا فلوس

اممممممممم
محمد يا احلى ام شرى يبقى
الله ايه يا نور هو انا مش بصيت لك مش تسكتى بقى
ايون يا ستى هو ده
ههههههههههه
نورتينى يا جميله بوسه كبيرة اوى لشيرى
Desert cat said…
tamer.sala7
هههههههههههه فكرتنى بواقعه من وقت قريب اوى يا تامر كانت عندنا هنا فى الشارع خناقه وسكاكين وسنج ومطاوى ودم للركب
اتصل واحد محامى بالنجده قالوا له جايين ومحدش جه
بعد شوية انا اتصلت قالوا خلاص احنا عارفين وفى عربية شرطة فى الطريق دلوقتى
المهم فعلا وصلوا واخدوا افراد الخناقه على اللى واقفين يترفجوا على اى حد معدى صدفه فى الشارع ... المهم طلعت اشاعات ان فى واحده هى اللى اتصلت بالنجده وفضل صاحب المحل اللى كان فيه الخناقه يدور على الواحدة دى وطبعا اختك فى الحاجات دى لا قطه ولا فار حتى غيرت طريقى خالص قولت يمكن ينجموا ولا حاجه .... انا مش عارفه امتا هينصلح حالنا لو 10% حتى
المهم انت دلوقتى وصلت لايه ابقى طمنا على اخبارك
تحياتى
Desert cat said…
gehad_fci
انت عارف لو البلد انقلب حالها يا جهاد هتبقى حلوة اوى
ونبقى ناس كويسين
لاننا دلوقتى فى اسوء مرحلة من الوحاشه وقلة الضمير
تحياتى
Desert cat said…
لورنس العرب
ده المسؤلين وغير المسؤلين
كله عايز ياخد
طيب الناس هتجيب منين علشان تديلهم
يارب كل واحد يأذى حد يجرب اللى بيعمله فيه
تحياتى
Desert cat said…
الربان
طيب لما سيادته عارف كدا
مش يتصرف
ويتفضل ويتكرم ويبلغ اصحاب السلطة ويبقى فى رقابه على المحليات واى جهاز ادارى فاسد
ربنا معاه ومع كل اللى يبحث عن لقمة عيش من عمل حلال
احترامى وتقديرى
Desert cat said…
سمراء
اعتقد يا سمراء انهم متحدين مع بعض
علشان يطلع الناتج اللى الشباب فيه
تحياتى
Desert cat said…
سبهللة عالآخر
سلامتك يا حبيبتى
ربنا يحرق دمهم هما نفر نفر
اصل الناس خلاص مبقتش ناقصه
كل واحد فاض بيه الكيل وطفح
شرفتينى
Desert cat said…
Nsreen Bsunee
خليكى يا رينا
شكلنا احنا الى جايين لك
Desert cat said…
اجندا حمرا
حبيبة قلبى الغالية
تعرفى يا قلبى احنا مش خلانا فى ديل الدول غير نظرية انا ومن بعدى الطوفان يعنى تدخلى المصلحة الحكومية تلاقى الموظف قاعد ووقاف قدامه واحد غلبان وممكن يكون جاى من بيته ماشى ساعه علشان يوفر اجرة الميكروباص ومش يعبره الا لما يحط له حاجه فى الدرج اللى مفتوح وبيتقفلش
طيب ما هو نفس الشخص ده بيدفع ضرايب وتامينات ورسوم مخترعه كل يوم من الحكومة علشن ياخد مرتبه
مش مشكلتى ولا مشكلة اى مواطن ان مرتبه مش بيكفيه انا بكون رايحه اخلص ورق مش رايحه اساهم معاه فى دفع ايجار الشقه
بالنسبة للدكارته حدث ولا حرج يا دكتورة
مذاكرة وتعب اعصاب وسهر لمدة 7 سنين وفى الاخر المرتب 250 جنيه
دى بلدنا بتشجع ولادها اوى
بس على الهروب منها
نورتينى يا جميلة
دمتى بكل حب وخير
Desert cat said…
محمد صالح
سورى يا محمد سلامة قلبك
بس تفتكر احنا مستعدين نعمل حاجه علشان نطهر البلد
طيب ما الفساد منتشر فيها ودخلت فى مرحلة الانهيار
معملناش ليه لحد دلوقتى

تحياتى
Desert cat said…
Mohamed Hamdy
ماهو علشان الغلبان لا يملك لا مال ولا نفوذ
انما صاحب الكافتريا الكبيره يعطى بدون حساب
وبعدين ياباشا متنساش الجنيه غلب الكارنيه
احترامى وتقديرى
Desert cat said…
Sherif
والله يا شريف كلامك منطقى
والمسؤلين بالفعل لو يهمهم يساعدوا الشباب
مكانوش سد كل الطق الممكنة واللاممكنة فى وشهم
تحياتى
اعود واجوب
ما احنا لو كنا قدرين كنا عاملنا من زمان ولكن احنا محاصرين فى كل حاجه شغل ودراسه وحرية وفى كل شئ
وبرده بنقول عايشين بالبركه
انا عاوز اعرف امته البركه دى هتخذل المصريين علشان يفوقم ويتخذوم موقف
ولكن اقول هيحصل دل بعد فوات الاوان

Popular posts from this blog

قميص دهشور

كل تحرش وانتوا طيبين