تم حذف كلمة كرامة من القاموس

كان يا مكان فى سالف العصر والأوان كان فى بلد اسمها مصر وكان الصغير قبل الكبير فيها كرامته متصانة وبيتعمل لهم الف حساب حيث كانت جامعة القاهره والتى اصبحت الان كازينو مشهور يتخرج منها الملوك والامراء العرب
ومع التطور الطبيعى للحاجه الساقعة تفننت حكومتهم الالكترونية الذكية والتى لا تعمل الا باللاب توب وواخدين وصلة من ايجى نت فى الشهر بـ 20 جنيه علشان يتابعوا اخبار الشعب من خلالها
ضاعت كرامة المصرى جوا بلده الشاب يبقى طول بعرض وزى الفل واهله صارفين عليه دم قلبهم وقبل ما يتخرج يكون حاجز مكان استرتيجى على القهوة اللى على ناصية شارعهم
وبخلاف الغلاء اللى جعل الشعب كله تحت خط الفقر
ومع تشبس الناس بأى بارقة أمل فقد كثر النصب وانتشر الفساد
فى البر والبحر
فى البر انتشار الرشاوى وفتح عينيك تاكل ملبن الموظف يقعد على المكتب فاتح لك الدرج ولازم تحط له الى فيه النصيب والا فوت علينا بكره يا سيد
فى البحر حيث يغامر الشباب ويسافرون ليموتوا غرقا ويكونوا وجبة شهيه لسمك القرش ويا حرقة قلب امك عليك يا ضنايا
وما زال مسلسل الاهانات مستمرا بدءا من تسفير بناتنا للعمل كخادمات إلى السعودية مروراً
بالصحفى الكويتى الشرشوح بعمل وصلة ردح للمصريين فتارة يشبههم بالدمامل وتارة اخرى مواسير المجارى اللى انفجرت واخيرا حدد لنا تسعيرة واننا لا نتعدى سعر الغسالة الكورية اللى كانت مامته بتغسل عليها فى بلدنا ايام ما كان لينا كرامة اييييييييييه
كانت اياااااااااام وعلى راى الست عايزنا نرجع زى زمان قول للزمان ارجع يا زمان
واليوم إبان تناولى شاى الصباح المظبوط قولت اتمشى شوية على النت ده حتى الكسل وحش وبيزود الوزن ولسه بدخل مصرواى والاقى ايه دهههههه
السودااااااااااااان
اغمض عنيا وافتحها مين دول تانى السوداااااااااااااااااااااان ياربى انا نسيت القراءة ولا اييييييه
ده ايه نحو الامية الى انا فيه ده ... اجيب حد محايد يقرى الخبر والاقيه برضه بيقولى السودااااااااااااااان
قال ايه مسلحون سودانييون خطفوا تسع مصرييييييييين
الخبر اهوووووه
مسلحون يخطفون 9 مصريين من مناطق حقول النفط بالسودان
حتى أنت يا بروتوس ..... مش دول اللى كانوا جايين لاجئين عندنا فى المهندسين باين ومش هما اللى كانوا عاملين الجناين خمارات ولما الامن واجههم عملوا مشاكل ده حتى لو هما على حق كانوا احترمونا فى بلدنا على اساس انهم لاجئين يعنى مش اصحاب بيت ماعلينا مش موضوعنا دلوقتى مش وقت المعايرة
انا نفسى افهم السادة المسؤلين مجودين فى الحكومة علشان ميييين ؟؟؟؟ هو فى شعب تانى غيرنا بيحكموه إذا كان بيحصل كل مصيبة ومصيبة ولا حد بيتحرك ولا حس ولا خبر ... طفلة اتقتلت وهى بتلعب قدام بيتها عادى مافى ستين داهيه حد قالها تلعب وبعدين تروح سماح فى الف سماح غيرها ....
بمبوطية انضرب عليهم نار ... والموضوع اتكتم عليه وكانهم ارتكبوا فعل فاحش فى الطريق العام
سودانييييين يخطفوا ولادنا طيب ايه ؟؟؟؟؟
السيد ابو الغيط مش محرج حضرتك من اللى بيحصل ده
جميع السادة المسؤلين ... مش مكسوفين من المرمطة اللى شعبكوا فيها
اما آن الأوان تحفظوا ماء وجهكوا وتعملوا اى حاجه لاودكو ولا مش فاضيين لنااااااا
لو مش فاضيين لنا مش عايزين نتقل عليكو خليكوا فى مصالحكو واحنا نشوف حكومة تانية تعرف تحترمنا علشان غيرنا يعرف يحترمنا فى بلدهم
وعلى راى الفنانة الشابة الصاعدة الموهوبة خيرية احمد اللى جوزها يقولها يا عورة الناس يلعبوا بيها الكورة
اهو ده بالظبط اللى بيجرى لنا كل واحد يلطش فينا شوية وبيلعبوا بينا كورة شراب كل واحد يشوط فيها شوية

Comments

appy said…
هههه الكرامه جايه من كلمة كرم اللى هو العنب هههههههههه
يا بنتى احنا بقينا ملطشه بره وجوه اذا كان احنا بنبهدل فى بعض جوه يبقى مش هنبهدل بره
ومش قولت لكى اقعدى جنبى وبطلى لف فى المواقع ادى اخرتها حتى بتوع السودان البلد الشكيكه
اللى قرفونا فى المهندسين والحاج مصطفى محمود يشهد
والله احنا شعب طيب
فاتيما said…
من هانت عليه نفسه هان على الناس
أولى الأمر اللى فى إيديهم
يحلو و يربطو عايزين الشعب ينقص و يحل عن كتافهم أصلاً
تيجى تقولوليهم إنتو فين ؟؟
يا قطقطوة قلبك أبيض
أنا حر said…
كرامة كرامة كرامة ممممم.....انا سمعتها فين الكلمة دي قبل كده
ااااه افتكرت في المشمش
الكرامة دي كلمة نسيناها كلنا او تقدري تقولي هما الي اجبرونا اننا ننساها يعني من وقت ما خرجنا على الدنيا ولقينا رئيسنا ده وحكومتنا دي عرفنا على طول انهم شالوا من حياتنا كلمة كرامة
تحياتي
الكرامة ضاعت من زمان لما اللى جوه هان عليهم اهلهم وبهدلوهم
امال اللى بره يعملوا ايه
تحياتى
cenotaph said…
نياو نياو هيه أحسن كلمة تتآل عشان الكرامه تفضل متصانه.متسدأيش كلامي بهزر انتي صح و الأحسن اننا نغير ولو بكلمه زي ما انتي عملتي
لا كرامة لنبى فى وطنه
طب ده نبى ومرسل بشريعة من السماء
اما نحن المصريين ولا رسل ولا غيره
احنا مجرد شوية مواطنين غلابة ما فيش كرامة فى بلدنا قلنا ماشى مش عيب
اما كل من هب ودب يلطش فينا دى صعبة قوى قوى بجد
يعنى نبدا باستنكار وشجب للحكومة الذكية
وتنتهى بنكفى على الخبر ماجور ويا دار ما دخلك شر وكان الدم اللى بيجرى فى عروقنا بقى ميه ولا ايه
هو اللتر بكام النهاردة
تحياتى والضغط على تانى

هو لتر ال
لا انا مش مستنى اتخرج انا فتحت قهوة لى عشان اقعد فيها براحتى

انتى عارفة ان الجينية السودانى
اعلى من الجنية المصرى
يعمل حوالى اربعة جنية مصرى
يعنى مصر رخصت
اه و الله رخصت فى عيون كل العالم
حتى السودانيين
على الرغم من ان السودانيين بيبانوا انهم شعب طيب و منكسر الجناح
لكن بيكرهوا المصريين مووووووت
يالا هى جت عليهم
سلامى ليكى و لخيرية احمد
يخربيتك ده انتي تحفه محصلتيش موضوع بجد جامد اوووووووووووووووووي
كلامك بجد عجبني
بس بيتهيئلي يا قطه احنا اتكلمنا كتير كل الناس اتكلمت ولا حياة لمن تنادي
مش عارف اقول ايه
بس بجد عجبني كلامك اووووووي
تحياتي ليكي
سمراء said…
لا يضيع حق وراءه مطالب
هناك توأمه بين المازوكية والسادية
احييك
سمراء
سمراء said…
This comment has been removed by the author.
حكومة معندهاش دم
هتعمليلهم ايه
مش هيحوء فيهم اى حاجة
حذفنا كلمة كرامة
ولا محذفنهاش
الكلام ده مش بيأثر فى جتتهم

جتهم الغم والقرف
وتيجى نيلة وتتحط فوق دماغهم

هما متحركوش لما جنود اتقتلوا على الحدود
هيتحركوا علشان السودااااااااااان خطفولهم كام واحد مصرى
هما شايفين ان احنا لو راح مننا واحد هيتولد بداله اتنين
فبالتالى احنا مش فارقين معاهم

جتهم القرف بجد

تحياتى ليكى يا قطة
وشكرا علشان احترمتى رغبتى فى عدم نشر تعليقى على البوست اللى فات


اختك خيخة
الكرامة كلمة بقالى كتير ماسمعتهاش الصرى متهان فى كل حتة وداخل بلادة وبالذات داخل بلاده بقى شوفتى بلد عندها المقدرة الفولاذية انها تزل مواطنبها مثلما يفعل بنا نحن ابناء الوطن يس اكيد مصر بتحبنا بس الخونة اللى فتحنها تكية هما الى عاملين فينا كدة
وتلاقى الصرى متهان فى كل حتة حتى فى عقر دارة وتحياتى لك واسفة على التطويل بس الموضوع كبير دى كرامة الانسان وكرامة الميت دفنة
إذا كانت كرامتنا مهدرة في بلدنا يبقي مش غريبة انها تتهدر في أي حتة تانية ده طبيعي لامؤاخذة

فاكرة ياقطة لما أتشتمت في مدونتي ... عارفة أكتر حاجة ضايقتني أيه ؟
لما قال علي المصرييين بياكلوا حمير ورغم اني مش باكل حمير ولا حاجة بس زعلت علي منظرنا قدام العالم وعلي الإهانة الموجهة لنا من كل من هب ودب
almasry said…
احنا فعلا معدش فيه لينا لازمه مش أحنا المصريين بس لكن كل البنى آدمين .... لكن بكره انشاء الله أحسن


تحيــــاتى
المصــــــــرى
Heart Beat said…
Dear Desert Cat

الحكومة المصرية النظيفة هي اخر من يقدر المواطن المصري و كرامته

يعني اذا كانت الحكومة النظيفة هي اللي بتهين المواطن يبى مش هاتدور على كرامة المصريين دي ابدا

مستحيل لو عملنا المستحيل على راي وردة

من اسباب الاهانة الدولية لمصر و لشعبها هو تعرض الشعب داخل حدود مصر لاهانات اكتر بكتير من الخطف او الشتيمة على السنة اباطرة الخليج و موظفيها

يعني لو حد في الكويت شتم المصريين و احنا جينا نقول عيب اللي انت بتعمله ده

هايموت من الضحك الاول و بعدين يقول لنا و النبي اجروا اتشطروا على اللي زي اسلام و سرور و سليمان و القائمة تطول كمان و بعدين تعالوا اسالوني انا بهزئكم ليه

في ناس ممكن تتكسف و تسكت و داري على بلوتك ياللي ابتليت داري

و في ناس هاترد على محدثي النعمة دول و تقول و الله دي حكومتنا و هي حرة فينا لكن مايجيش حفاة عراة زيكم يشتمونا

لكن في كلتا الحالتين برضه كرامتنا اهدرت في البر و في البحر و في الجو - محمد عطا و هجات سبتمبر الشهيرة- و لازالت الحكومة مستمرة في اهانة الشعب امعان في دحر كرامته امام العالم و لا زال الشعب ساكت على الاهانة دي لانه مش عارف يرد على مين و لا مين
هو احنا لسه شفنا حاجه من السودان ؟
السودان العملاق القادم
هههههه
ياما مر عليكى يا مصر عمالقه وانتى مش عايزه تكبرى ابدا
حلو قوى موضوع الغساله
الله يرحمه اللي قال من لا يملك قوت يومه لا يملك حريته .......واحب ان اضيف ايضا ...(و لا يملك كرامته )احنا شعب مصر العظيم اللي كانوا بيقولوا عليه سلة غلال العالم بقينا عايشين عالة ع العالم كله
بقينا بنستورد اكلنا ولبسنا وكل متطلبات حياتنا الضرورية و غير الضرورية من كل شبر علي وجه الأرض

عشان كده طبيعي جدا ان كلمة كرامة تتلغي من قاموسنا و طبيعي جدا ان كلاب الأرض تنهش في جثتنا اللي عفنت
قطه

لاء الحكومه مش فاضه

دول عالم تييييييييييت مع اني اموت واعرف يعني ايه تييييت

علي فكره انا بدفع نت 30 جنيه ما تجيبيلي خط من عندك اوفر

سلامووووووووووز

وزة
مواطن مصري نايم علق عندك إن الجنيه السوداني أعلي من الجنيه المصري، قلي انفسي: إيه يا عم، حنخرف بقي ونقول كلام يعمل بلبله في البلد؟؟

قووووم إييييه رحت داخل علي موقع بيحول العملات بأسعارها.... كان حيغمي عليا.... يغمي إيه.... أنا قعدت أتزحلق من علي الكنبه لحد ما وصلت الأرض وانا فاتح بقي

1.00 SDG = 2.62313 EGP
1.00 EGP = 0.381224 SDG

دا الرسمي، السوق السوده تلاقيها أعلي!!!

سوق سودة للجنيه السوداني .... زغروطه حلوه رنة في بيتنا.... مش محتاج أعلق، اظن وصل إلي عايز اقوله

حكاية الخطف نقول بره حدودنا والتدخل الديبلوماسي بياخد وقت، والتدخل العسكري مستحيل (الله يرحمك يا سادات لما جريت الليبيين لحد بني غازي)، إنما تقولي إيه علي الذل إلي الناس شايفاه في البلد من مصريين زينا، مش من سودانيين أحسن مننا؟؟
somaa mahaba said…
فى زات المرات كان فى ندوه دينيه مع احد علماء الازهر فبيتكلم عن الكرامه والنخوه
فرد ولد
يعنى ايه نخوه
الناس اششششش حنفهمك بعدين
انا بقى بقول النخوه هى الدم اللى بيجرى فى عروقنا لما نغير على اهل بيتنا وبنات حتتنا وامهاتنا واخواتنا وبنات بلدنا لما نغير على كرامتنا
اللى هى متبعتره خلقه
ونصيحه شوفى يا بننتى احنا نهاجر لصحراء هى ماوانا
تحياتى ليكى سومه_87
بصى ياقطة استخبى انتى اليومين دول ليجى اى بنى ادم من الصومال ولا حاجة يخطفك ولا يقتلك مش ناقصين ياما هنجيب حقك ازاى
والسلام ختام
يعنى ايه كرامه ويعنى ايه انسانيه ويعنى ايه وطن من اساسه
وهنلاقى فين كرامتنا واحنا اصلا عايشين هنا اغراب
ده حتى الغريب بيعرف ياخد حقه فى البلد دى اكتر من المصرى يبقى منين نجيب الكرامه دى
وطبعا عرفتى اخبار امبارح
ايشي علاوة على ايشي بنزين


ده احنا هنونو نونوه
لحد اما يبانلنا صحاب

:)
Migo Mishmish said…
صباح الخير يا قطوطة
انتي اصلك مش فاهمه ازمة الغذاء بقئت ازمة عالمية والمصريين اللي اتخطفوا دول الفدية بتاعهم هتكون بـ2 جنيه عيش مدعم. ومفيش غير ان الحكومة بتاعتنا تفتح باب التبرعات لإخوانا المصريين - اسوة بإخوانهم بتوع غزة - ونلم من بعض 2 جنيه او 175 قرش وبعدين ندور على فرن نجيب منه العيش بس نخش واحد واحد كل واحد يشتري بـ 50 قرش علشان يرضوا يدوله عيش. وبعدين نبعتهم السودان على جمل
يا بنتي لما تقري الخبر اتأكدي من مصاردة وتبعياته. اهو محدش من الناس هنا جاب سيرة الفدية. حلو كدة! نرجع الناس ديه إزاي بقه
يالا يا مصريين تعاطفك لوحدة مش كفاية اتبرع ولو برغيف. والجمل هناجرة من جنينة الحيوانات
Love,
MishMish
الربان said…
تحياتي

يبدو ان الجماعة فهموا ان معني الكرامة مشتق من الكرم...يعني اكرموا الاشقاء العرب و غير العرب...و تحت شعار السياحة و الليالي السياحية..غضوا النظر...

في رأيي ان الاستثمار الزراعي في السودان خاطيء...و لا تنسوا انهم صادروا استراحات الري المصرية في السودان...و مباني جامعة القاهرة
الافضل الاستثمار الزراعي في كندا..

نسأل الله ان يرد الينا كرامتنا و عزتنا...

تحياتي و تقديري
Desert cat said…
appy
عاملة ايه يا حبيبتى وايه اخبارك دلوقتى بعد ما اسعار البنزين بقت الضعف
بيعى بطوط واجرى عجلة من فرنسا ايه رايك
ااااااه يا بلد
مشت المواطنين حافيين
Desert cat said…
فاتيما
اولى الامر ياا م يوسف شربونا المر
الله يريحنا منهم
Desert cat said…
انا حر
انت عارف يا احمد انا مش بيغيظنى غير انهم قارفينا طول النهار والليل واخترناه اخترناه انا عن نفسى اقسم بالله العظيم ما اخترته
ولما جربت اختار غيره سجنوه
اعاااااااااا
لنا الله
Desert cat said…
هيثم الدهشان
اللى بره يتخطف من مسلحين ويبقى يقابلونى على المحور لو حد عبرهم وقالهم انتوا فين
Desert cat said…
cenotaph
انا عمال اقول نياوو من سنة بالظبط ولا حد قالى بسبس حتى
ربنا يتولانا
Desert cat said…
همس الاحباب
دم مين يا خالد انت لسه فاكر الكلمة دى
ده كمان هانى سرور نزل بكمية اكياس فاسدة علشان الناس اللى بقاى عندها نقطة دم يخلصوا منهم
Desert cat said…
مواطن مصرى نايم
اه ما انا بدخل عندك اشرب المشاريب واظبط التظابيط
احنا مستوانا منحدر فى كل حاجه مش فى الجنبة بس
الله يرحم ايام ماكان الدولار بخمسين قرش
مفيش بلد مبتكرهناش مش عارفه شومعنا ولييييييه
مش بقولك خد بالك من المثل الشهير وانت تعرف
Desert cat said…
أحلام عمرنا
وتخرب بيتى ليه بس
ههههههههههه
هو فين اصلا
احنا اتكلمنا كتير مش المفروض نعمل حاجه ولا ايييييييه ؟؟؟
نكح حتى
Desert cat said…
سمراء
ماهو للاسف احنا عارفين انه حقنا وكل حاجه لكن مش بنطالب على طول مططايين
وطاطى راسك طاطى طاطى
Desert cat said…
بت خيخة وأى كلام
ام شيكو
هما الود ودهم الشعب كله يتخطف علشان يبعوا بيوتنا بالمتر
اه يا بلد عايزة ولد بس انا لو كنت ولد كنت افضى لهم نفسى ساعتين زمن واعلمهم الادب
بتشكرينى على ايه يا نونو
عيييب احنا اخوات
تحياتى ليكى وبوسة كبيرة اوى لحبيبى شيكو
Desert cat said…
رئـــــيسـة حزب الأحلام
طولى براحتك يا ريسة انتى بتقولى كلام زى الفل
حقيقة واضحة وضوح الشمس المصرى المواطن الوحيد اللى متهان جوا بلده وبره بلده
امتا بس ربنا يكرمنا ويخلصنا
منه له
منه له
Desert cat said…
مفقوعة مرارتي من حماتــــــــــــي
اااااااااااه فاكرة يا سوسو
كل من هب ودب بيجى يشتمنا ويمشى وهما مش غلطانين اصلا لانهم بيشتمونا بواقع بيحصل عندنا فعلا
منهم لله اللى كانوا السبب
Desert cat said…
almasry
المصريين والبنى ادمين
اه ان شاء الله احسن
Desert cat said…
Heart Beat

بالظبط يا حبيبتى هو ده اللى حصل فعلا لما فؤاد الهاشم قل ادبه وشتمنا فى الجريدة الكويتية قال هما اكتشفوا فاجأة إن ليهم كرامة ما هم متبهدلين فى بلدهم
وده الكلام اللى اى حد فى مكانه بيقوله عموما احنا خلاص بيقينا مسخة بين الدول
وحسبنا الله ونعم الوكيل
Desert cat said…
عبده الرايق
الصين العملاقة اللى غزتنا فى كل بيوتنا من الابرة للصاروخ
ودولقتى السوادن العملاقة اللى خطفت رجالتنا
هنيالك يا مصر بحكومتك
Desert cat said…
جيفارا المصري
طيب ما هو الدوا موجود بس احنا اللى الجبن خارس السنتنا
يبقى معلشى نستاهل اى حاجه تجرى لنا
تحياتى يا جيفارا
Desert cat said…
انين الحزن
لاء يا اختى انتى من بلد الغالى
انتى بس روحى ايجى نت وقولى لهم انك من بلده وانا هوصى عليكى الاكونت مانجر يفصل عنكو الخدمة خالص
Desert cat said…
وجهة نظري
الجنية السودانى يبتاع فى السوق السودة والغاز يتصدر لاسرائيل
وان ماكنتش انت تقلبنى مين هيقلبنى اهداء للحكومة بتاعتنا
تحياتى
Desert cat said…
somaa mahaba
هو يعنى ايه كرامة ونخوه يا سومة
خلاص احنا نلغيهم من القاموس علشان الاجيال اللى جاية تطلع بليدة ومش عارفه حاجه عن اى حاجه
قولى لى بقى ايه اخر اخبارك مع كليك هير
تحياتى
Desert cat said…
اهو ده عيبه نجيبها من ماكدونالدز يا داليا
اه حنستورد الكرامة كمان بعد كدا

ربنا يتولانا
Desert cat said…
بنوتة من وسط البلد
عرفت يا حبيبتى واتصدمت
اعاااااااااااا
Desert cat said…
wanna b a physician
ابقوا جيبوا كيلو سمك يا دكتور او فسيخ يمكن يكون مش بيحبه وهو هيسيبنى على طول
Desert cat said…
Migo Mishmish
صباح الفل يا مشموشه
هما يا قلبى مبقوش محتاجين مننا باتنين جنيه عيش ولا بعشرين جنيه
ده الجنيه بتاعهم بقى اضعاف اضعفا الجنية بتاعنا
ويا حسرة عليها يا حسرة عليها
Desert cat said…
الربان
استاذى العزيز
طالما الاهانة نابعة من الداخل فلا ننتظر يد حانية من الخارج
وعلى راى حضرتك من الافضل الاستثمار الزراعى فى كندا فى البراازيل فى تركيا انما مصر خسارة فيها اى ساتثمار ده حتى لو ولادها فكروا يستثمروا فيها بيبهدلوهم ويخلوهم يقولوا حقنا برقابتنا
احترامى وتقديرى
nody_1987 said…
ايه يا قطه
انتى الظاهر غلاء الاسعار اثر عليكى
احنا قفانا ورم من الضرب عليه من جوه
ما جاتش على باره
وبعدين هما السودان كده بيحققوا امنيه الحكومه وهى اباده الشعب
دى سياسه عليا الطبقات الدنيا الى زينا ما يعرفوهاش
Desert cat said…
nody_1987
انتى كدا وضحتى لى نقطة كانت غايبة عنى يا نودى
انها فعلا ممكن تكون سياسية خارجية
ده لو كدا فعلا يبقى حكومة ذكية ذكية فعلا
كرامه؟؟
كلمه فعلا زي ماقلتي ياقطه اتمحت بأستيكه صنع الصين من قاموسنا
بقه اللي رايح و اللي جاي بيدينا علي قفانا
ماهو اذا كان اللي حاكمنا بيعاملونا كده تفتكري حيحترمنا اي حد في العالم؟ماهما شايفين الذل اللي المصري شايفه
زي لسه قاريه في الدستور او المصري اليوم مش فاكره عن شاب بيحكي و بيقول انه سافر السعوديه زي شباب كتيره عشان لقمه العيش فالكفيل بتاعه حاكم عليه عشان يشغله عنده انه يطلق لحيته
شوفتي الذل؟
يعني حتي مصير الشباب بقه فيايد الكفيل و اللحيه هي اللي حتحدد اذا كانوا يشغلوهم و لا لأ

:(

كمان الجنيه السوداني ياقمر اعلي من الجنيه المصري يعني مجاعات و بلاوي سودا بس برضه عملتهم لسه محتفظي بقوتها في الأسواق
و بيخطفوا كمان مصريين؟بنرجع تاني لنفس الحكايه المصري اساسا في بلده مش بيحترموه تفتكري حيحترمونا بره بلدنا؟
قريت مش فاكره فين ان واحد بيقول لو ادوني 10 جنيه عشان افجر البلد دي مش حتأخر
شوفتي وصلوا الشعب لفين؟
الله يكون في عونك يامصر انتي و المصريين
:(
Desert cat said…
اجندا حمرا
يا حببتى اقل بلد فى العالم بقى لها قيمة عننا حتى لو فيها مجاعات
حتى لو لاجئين عندنا
للاسف بقينا مسخة فى العالم كله
والبركة فى الكبار
نورتينى يارق اجندة
ken kemp said…
ا ل ض م ى ر



ض م ى ر




ض م ر
عفوا لقد نفذ كرامتكم من القاموس رجاء اعادة الشحت
حبيبتي قطة

الكرامة موجودة .. بوجود الناس الاحرار .. الي بيرفضوا الظلم زيي وزيك وكثيرين كمان (اعذريني على لغة المصرية
)
بس حبيت اوضح ان مدام يوجد أناس أحرار بقفون بوجة الجبروت .. فهناك كرامة

تحياتي ....

Popular posts from this blog

قميص دهشور

كل تحرش وانتوا طيبين