شوية اخبار من الشرقية ومن اسكندرية

عندنا فى بلدنا عموما الجو هادى يعنى الشوارع فاضية حركة المرور فيها غير المعتاده
من الصبح الأمن المركزى مقفل شارع مجمع الشرطة وممنوع المرور من هناك
بالإضافه لبعض الشوارع الجانبية ..... وفى الزقازيق سمعت عن مظاهرة فى وسط البلد يعنى عند المحافظة اى حد من هناك ياريت ينزل لنا تغطية فى مدونته ويبعت لنا اللنك ...


نيجى بقى على اخبار اسكندرية ... واللى هيحكوا لكو عليها بنفسه ملك الكبدة

رحت الضهر كان في وقفة احتجاجية من القضاة و الامن المركزي بيلم عاطل مع باطل
و بعدين رحت الساعة 3
و اتثبتت من عسكري امن مركزي و لما رفضت رفع عليا اجزاء و جه ظابط و راح شاتمني و قاللي انت مالكش دية يابن الكلب قلتله ما كلب الا ابوك يابن الجزمة انت سايب الميدان كله و مش شايف غيري
سوري عالشتيمة بس اللي حصل
المهم قعدنا نزق في بعضنا شوية جه عميد شرطة و في ايه قلتله حضرتك انا طالب و بشتغل و معدي رايح شغلي راح حصل كذا كذا راح قايللي طيب روح ساعتها كان في شوية ستات و بنات بيهتفوا ادام الحقانية لا الاه الا الله و الغلاء عدو الله
الاهم ان كل الشركات الخاصة السياحة و الصرافات كانت قافلة
انا مثلا روحت شغلي ازاي
روحت رايح محطة سيدي بشر اللي جنب الجراج و ركبت اشهر اتوبيس في اليكس 244
و دفعت تذكرة نص جنيه عادية بسعر اليوم العادي
بس الاتوبيس فاضي
روحت الشغل الموظفين موجودين بس مافيش شغل
مواعيدي كلها اتاجلت

مش مهم المواعيد اللى اتاجلت المهم انك بخير يا ملك
حمد الله على سلامتك
دعواتكوا لاهل المحلة ربنا معاهم

Comments

EmY said…
ازيك يا قطه عملتي ايه في الاضراب خربشتي ولا ايه

انا مش مع الاضراب بس مانزلتش بسبب التراب لاسباب صحيه مش سياسيه خالص
بس الي سمعتو من اخويا و هو شرطه ان القاهره كانت هاديه
و علي العموم دي تعليمات بالتعامل بشده مع المواطنين اثناء اي مظاهره او تجمع النهارده

تحياتي يا قمر
لماضة said…
ههههههههه
ايون انا فكرت النهارده الجمعة
الدنيا فااااااااااااضية في اسكندريه بشكل مرعب
وحشتيني يا قطتي والله العظيم الشغل واخدني عن الناس الحلوة اللى زيك
وسلام كتيييييير لابي
واوصليلها اعتذاري مش بعرف ادخل مدونتهامن جهازي العقيم ده
وبوسيهالي لو شفتيها
عزيزتى

مش عارف ايه المشكلة الضابط شتمه وقاله

انت مالكش دية يابن الكلب

وكمان رد الشتيمه

قلتله ما كلب الا ابوك يابن الجزمة

وجه العميد نصفه وقاله امشى

احنا هنقف للضباط على الشيمه بقه ولا ايه ما يمكن المواطن نرفزه برضوا

ولازم نراعى حساسية وضعهم كضباط

اقصد كبشوات

سلااام
Baker said…
ايه ده هو انا اول تعليق
هاى يا قطه على فكره انا كنت شايف الشوارع هاديه فى القاهره و افتكرت ان الناس طنشت بصراحه مش مصدق ان الناس ممكن يستجيبوا كده و يرجعوا يناغشوا الحكومه
طب زمان كنا بناغشهم على فلسطين و الحكومه مش فى ايدها حاجه و مش هيا اللى بتدبح فى الفلسطينيين انما من زمان اوى محدش احتج على الاحوال الاقتصاديه
و ده مع تحفظى طبعا على العنف بكل انواعه و كنت احب ان الاحتجاج يكون مثلا ان كل الشعب يعلق شريط اسود مثلا فى كتفه و متلاقيش حد فى مصر كلها ميستجبش لكده
و مين عارف يمكن بعد كده الناس يبقى عندها وعى و تختار مرشحينها من اول المجالس المحليه ......لحد الاخر
ربنا ييسر الحال للجميع
وان كان اللي حصل في القاهرة حصل على نطاق ضيق من تحركات الناس لن الأمن كان عامل شغل
إلا انه بادرة خير وشعاع امل ان احنا فعلا نقدر نتغير ونبقى ايجابين
appy said…
ايه يا بنتى الاخبار دى كلها انتى قاعده فى قناة الجزيرة
ربنا يشفيهم يا رب ويأخد باديهم مش عارفه ليه حصل كل ده لهم ربنا ينتقم من الناس الظلمه بجد
والقهر اللى بيحصل
بس مكنتش اتمنى توصل لكده ابدا ابدا
صباح الفل.
انا متوقعتش ان الموضوع ينجح كدا .بس بدايه كويسه.اننا نقول احنا هنا .
وكويس انو مسكتش للظابط ده لان اللى زيو لازم ياخد بالجزمه علشان يحترم الناس وكويس انو ما اتاخدش زى اللى اتاخدوو
Desert cat said…
EmY
ازيك انتى يا مامى يارب تكونى بخير
انا معملتش اى حاجه انا نزلت واتمشيت فى الشوارع براحتى خالص
بالنسبة للى حصل فى القاهره او فى البلاد التانية انا كنت بتابع الاحداث فى مدونة 6 ابريل
وسلامتك الف سلامة يا جميلة
ابقى طمنينى عليكى
محبتى
بصى يا كات
انا اسف انى اتاخرت فى التعليق بس زى ما انتى عارفه كنت بنقل الاخبار على البلوج عندى علشان الناس تعرف الى حصل بس هو عموما الاضراب كخطوه اولى نجح بشكل كبير والدليل رغم تهديدات الامن نسبه الغياب كبيره فى المصالح
الاضراب نجح رغم انى بعض القوى السياسيه المتقهقره والمتلمعه تحت الشعارات قالت محدش دعانا بس معاهم عزرهم ما هى حفله والدخول بالملابس الرسميه ولازم يكون معاك كارت الدعوه باسمك بس هى كل ما فى الامر انهم مش المنظمين ومش بيحبو تبع لازم يكونو متبوعين ويغور الشعب
الخطوه الاولى نجحت وربنا يسهل فى الباقى
Desert cat said…
لماضة
ازيك يا دوك انتى فين يا قمر وحشانا
هبلغ ابى اعتذراك وسلامك من عونيا الاربعة
وبالنسبة للبوسة هتوصل هتوصل
لا تقلقى
Desert cat said…
احساس لكل النساء
ربنا ما يحرمك من الهبل
Desert cat said…
Baker
انا كمان زعلت جدا علشان العنف اللى حصل

بس المفروض مكانش حصل اى شغب اصلا وكان الاضراب يبقى سلمى
عموما قدر الله وما شاء فعل
والحمد لله ان فى خطوة ايجابية حصلت
تحياتى
Desert cat said…
آلام وآمال
لاء هو فى القاهره الاضراب مكانش على نطاق ضيق خالص
بالعكس ده كان فى مظاهرات قدام نقابة الاطباء وفى ميدان التحرير
القاهره من المدن الكبرى يبقى ازاى هيكون فيها على نطاق ضيق
تحياتى
Desert cat said…
appy
انا قاعده فى السى ان ان
هههههههههه
انا كمان مكنتش اتمنى ان يحصل اى عنف
تحياتى يا جميله
Desert cat said…
تــــايه ومش تـــايه
اه
الحمد لله
الربان said…
تحياتي

اهنئك ...مراسلنا العسكري او الحربي
من موقع الحدث مباشرة....

الحمد لله ان الاخ مر بسلام...و علي فكرة
قلة الادب تصدر غالبا من ضابط صغير الرتبة...اما الاخرون فأعتقد انهم تجاوزوا هذه المرحلة...و لديهم استعداد
للتفاهم.

ربنا يستر و يكونوا قالوا الحقيقة للرئيس...لانهم ممكن يقولوا ان الشعب
كان ثائر لسبب ما بعيد كل البعد عن الحقيقة....مثلا ممكن يقولوا الشعب
كان ثائر علي عصام الحضري...


تحياتي و تقديري
انا بصراحة كنت قاعد على اعصابى امبارح
ومستنى النتيجة بفارغ الصبر
وعايز اعرف رد الفعل من الحكومة على الاضراب
بس الحمد لله على اى حال هى خطوة ايجابية والجاى ايكون احسن بس بشرط يكون هناك وعى وثقافة بما يجب ان يحدث
ونمى الوعى والحس السياسى لدى المواطنين
لعل وعسى
تحياتى
Desert cat said…
الربان
او امين شرطة وفى الحالات اللى زى امبارح افراد الامن المركزى
ودى ناس مش بتتفاهم
اما بالنسبة للاخبار اللى اتنقلت اعتقد ان كل الوزراء حازم
احترامى وتقديرى
Desert cat said…
همس الاحباب
الحمد لله جدا بالنسبة لاول مرة الشعب يفوق ويبتدى ياخد موقف
انا عن نفسى فى البداية مكنتش متوقع ان ممكن يحصل اى حاجه اصلا
الحمد لله
شوفى يا ستى الوضع فى الزقازيق كان مقرف جدا....محصلش أى شئ من أى نوع النهارده بس و انا رايحة الكورس الأمن المركزى الله يحرقو هو و الاغبيا اللى فيه كانو بيستعدو و عاملين كارت ارهاب للناس
مفيش أى تواجد امنى من أى نوع فى الجامعة....بيطلعولنا لسانهم ولا كأن فى حاجة
الحكومة خايفة لأن اللى شافته من المحلة كان جامد لأنهم رجالة بجد بس للأسف قمعوهم لأنهم حاولو يعبروا مش أكتر
ربنا يكتم نفسهم زى ماهما كاتمين نفسنا كده

Popular posts from this blog

قميص دهشور

كل تحرش وانتوا طيبين