ياريتنى كنت معاهم

فى خطاب السيد رئيس الجمهورية اليوم صرح معاليه أنه تمت زيادة العلاوة الإجتماعية 30 % الف الف شكر لجنابك ياريس
طيب هو حضرتك بس علشان مش نتفاجأ بزيادة فى الاسعار لتعويض الـ 30 % الزيادة دى
هو الزيادة بتكون على القطاع العام بس
طيب وباقى فئات الشعب فين من كرم معاليك
والعواطلية المرميين فى الشوارع من سنة 84 من اول ما اتلغى التكليف مالهومش اى نصيب فى الكرم ده
هو الشعب كله قطاع عام دلوقتى ولا ايه ؟؟؟؟
طيب والعيال الغلابة اللى تحت رحمة القطاع الخاص وتحكماتهم وميقدروش يحكوا حتى مع الاوفيس بوى اللى فى الشركة علشان ميترفدش ويطلع بره يتساوى بباقى العواطلية
وبعدين ياريسنا حضرتك متخيل ان 30 % يعملوا ايه
يعنى موظف مرتبه 300 جنيه مع الزيادة اصبح 390 جنيه هااااااايل والله
(خلى عنك دم يا قطة وقولى فضل ونعمة من الله )
طيب انا وامثالى من اللى عندهم مشاريع خاصة متأكد إن مش هيطلع لنا قوانين جديدة ندفع فيها الباقى فى جيوبنا من مصروف يومنا
يعنى مفيش قرار جديد غير
الضرايب والتامينات ورسوم النظافة 120 جنيه
ده بخلاف الايجار والكهربا وما شابههم
طيب معلشى يا جماعه ومحدش يقول عليا حقودة بس انتوا عارفين انى موسوسة
هل الزيادة الفاجرة دى كلها لموظفين القطاع العام لان فى اضراب يوم عيد ميلاد معاليك وهو الرابع من مايو
فقولت تلحق نفسك وتلهى رجالتك بالزيادة دى
اصل لو كدا يبقى حضرتك حققت ما تتنمى لان الموظفين فى جميع محافظات مصر يرقصون
يهيصون - يظأططون - ولو حد قالهم فى الوقت الحالى كلمة اضراب ففى عنق رقبته سيمسكون
حقيقى غريبة ناس عمال تكح تراب طول السنة ولما زادوا 30 % عاملين افراح وليالى ملاح اه يا شعب ماشى مع الماشى
ولو الاضرابات بترفع المرتبات يا فندم انا هلم كل أصحابى ومعارفى من العواطلية امثالى ونعمل اضراب علشان الرسوم والقوانين اللى كل يوم تخترعوها لنا لاخذ مصروف يومنا واصراركو اننا لازم نمشى مطلعين جيوبنا بره دليل على النظافة اصل مامى مش بتغسل ببرسيل

ملحوسة ملحوسة
الاخوان هاااااااا خليكو فاكرين الاخواااااااان ماشى
اعلنوا انهم هيشاركو فى الاضراب
النهارده خليكو فاكرين التاريخ 30/4
لو رجعوا فى كلامهم زى المرة اللى فاتت مش هيكفينى فيهم شهر بوستات
والجميع عارف انى فى المواضيع دى بالذااااااااات مبصدق جنازة واشبع فيها لطم
قول ان شاء الله يا سووووو
وادى التصريح
الإخوان» يعلنون تأييدهم لإضراب ٤ مايو.. ويدعون المواطنين لالتزام بيوتهم

تعليقات

‏قال Soooo
خبر ايه ياقطه
خبر اييييييييييه
جايبه سيرتي ليه في الكلام عن الاخوان؟؟؟
وبعدين انا صحيح الناس كلها اخواني واخواتي
لكن مش اخوان
----
ملحوظه بقى بخصوص حوار الحلاوة .. قصدي العلاوة
عارفه اصل مثل اطعم الفم تستحتي العين
؟؟؟
المشكله انه دلوقتي حتى اطعام الفم مابيعملش حاجه
لان العين فتحت وشافت وفنجلت وعرفت
عرفت ان الفلوس دي اصلا فلوسنا
عرفت ان الفلوس دي مش منحة ولا كرم من الوالي

بقولك اييييييه
خليني ساكت




سلاموووووووووووز
‏قال DoctorAllam
أنا معاكي إن الناس كلها فرحانة وأولهم أمي لإن الناس بتفكر بمبدأ اللي نطوله من الحكومة خير وبركة
بس فعلاً ربنا يستر والأسعار مش تزيد تاني لإننا في مصر الدولة الوحيدة في العالم اللي ماشية بنظام ندي باليمين وناخد قد اللي إدناه ميت مرة بالشمال
تخيلي إني كل ما أروح للبقال ألاقيه بيرفع السعر مع نفسه !! وآخر مرة قولتله لأ خليلهالك بقى الحاجة دي ، أنا أجيبها من عند فتح الله ماركت أنضف ألف مرة وبسعر أرخص
سبب بلاء الشعب المصري هو الشعب المصري لإن كل واحد شغال بمبدأ يلا نفسي
يعني التاجر اللي هو من الشعب بيرفع السعر بمزاجه ويقولك أصل مش عارف المواصلات والبنزين زاد ويشتغلنا
سواقين الميكروباصات نفس النظام ودول حأروح فيهم في داهية في يوم
على أي حال من الأحوال البلد حالها ماااااااااااااايل ولا برج بيزا المائل ، وربنا يسهل وأخلص الكلية دي على خير وخلعون على برا
الحمد لله فقدت الأمل نهائياً في مصر
‏قال انين الحزن
قطه

ازيك وعامله ايه ليك واحشه جامده اوي

وكل سنه وانتي طيبه وعقبال مليون سنه بس معلش متاخره طبعا انا قلت لخالد يوصلها مش عارفه قال ولا لاءه

قولي بقه يارب ياوزة يكون ليه نصيب في الــ 30 جنيه اللي الريس هيدهوملي اصل انا شغاله عند الحكومه
وبلاش اقول مرتبي كام علشان الحسد وبتاع
سلامووووووووووز

وزة
‏قال Unknown
مش هاتهدي غير لما تتخطفي و مهدي عاكف يعلنك من الاعداء و دمك حلال
بس متخافيش وراكي رجاله و انتي عارفا مبدأي الجري نص الجدعنه

الزياده مش متناسبه ابدا مع الاحوال يعني كان اقلها 50 %

بس مش مهم اهو احسن من مافيش

احنا هانستني و نتفرج و نشوف الاخوان هايعملوا ايه

و الميا تكدب الغطاس

تحياتي يا قمر
‏قال Unknown
يا قطة

ده مازودش حاجة..ده "اقترح" الزيادة...بشرط الحكومة تدبر الموارد

حاجة كده زى اليويو اللى مربوط باستك فى كف الأيد...الاسم حدفه بس هو رجع له تانى

اقرى هنا
http://www.masrawy.com/News/Economy/Reuters/2008/April/30/485302.aspx
‏قال فاتيما
موش عارفة يا قطة أنا موش حاسة بالفرحة اللى بتقولى عليها دى أصلى مشغولة حاليا فى الوقوف فى طابور العاطلين
و دا بقى له ثقافة كدا زى ثقافة الوقوف فى البلكونة بتاع فرنسا حبيبتشى ما عرفتنا كتر خيرها
موش حاسة بحاجة لكن لو فرحانين فالسبب زى ما بيقول دكتور علام قبل منى
و زى ما الحكمة الصينية بتقول إن شعرة من جلد الخنزير مكسب
فالناس بتقول أهو أى حاجة و خلاص إحنا طايلين ...
و عن حكاية الاخوان دى ...
كل حاجة معروفة و الناس اللى بتميز عارفة مهما إتقال كلام
و الحقيقة واضحة و محدش بقى بينضحك عليه فى الأيام الغبرا دى
و تحياتى ليكى يا قطتى الحلوة
‏قال وجهة نظري
هوا قال إن الزياده دي مرتبطه بوجود موارد، وبعدين رجع حدد ميعاد الزياده من أول مايو يعني بعد كام يوم، طب في موارد والا مفيش؟؟ لو في موارد طيب كانت فين يا أمور من زمان؟؟ طب لو مفيش يبقي لازم نحضر نفسنا علشان حنبيع هدومنا وهدوم عيالنا.... لأن الموارد دي حتكون فرض ضرايب جديده علي بشر مش لاقيين ياكلوا أساسا

وبعدين من التجربه قبل كده: زيادة المرتبات 10% علطول وراها إرتفاع في الأسعار 50% يعني زيادة المرتبات 30% وراها إرتفاع الأسعار 150% ومعاها إرتفاع الضرايب.... مش حنلاقي حتي الحديده نبيعها

الموضوع مش سلق بيض، في اجدعها بلد أوروبي زيادة المرتبات معاها عصاية الحكومة نازله تلويش علي قفا المنتجين علشان ميزودوش السعر من غير مبرر، مش بمزاج المنتجين، لو عايزين يزودوا السعر سنت لازم يقدموا عريضه طويله للحكومة بأسباب الزياده، وأهي دي دول إقتصاد حر، بس مش معناها إستعباط حر

فلو الحكومه عندنا زودت المرتبات من غير ما تظبط أسعار السوق، فأحسن ليهم يقولونا: أرفعوا إيدكم فوق يا شعب كلاب، المكان كله محاصر، كل واحد يقلع هدومه من سكات والبيه الظابط حيعدي يمدكوا علي رجليكم

المصيبه الكبري أصحاب المعاشات وموظفي القطاع الخاص والأعمال الحره، دول إلي حيدفعوا الضرايب إلي حتمول الزياده في المرتبات، دا حتي الظابط مش حيلاقي هدوم يقلعهلهم
موضوع العلاوة زى كل سنه نفرح بيها والناس تسكت شوية و بعيد ترجع كل حاله لطبيعتها

===============

أعتب عليك فى الهجوم على الاخوان
اولا انهم اناس مصريون ولهم وجهات نظر نختلف او نتفق معهم شىء والهجوم عليهم شىء أخر

وهل لو قام اى أحد باعلان انه مع الاضراب ثم رجع فى كلامة يكون الامر عادى

لا نملك الا انفسنا التى بين جنبينا وهذه ايضا أحيانا لا نملكها

بارك الله فيكم
‏قال wanna b a physician
بصى اصلا مين ده اللى اساسيه 300 جنية ال30% دى على الاساسى يعنى قولى متوسط 30 جنية وطبعا فى ناس جنيهات وباقى الكلام زى سوووو بالظبط
‏قال فرنسا هانم
برضه 30 فى الميه احسن من مفيش خالص
وبعدين كده كده الاسعار بتزيد
هو فى رقيب ؟؟؟؟؟؟؟؟؟؟؟
‏قال إنسان || Human
هو فعلاً ..أنا شايف ان الموضوع ده مرتبط ارتباط وثيق ..بالإضراب ...ودي حاجه كويسه
معناها ان جاب فايض ..وحبة العيال اللي بيقولوا عليهم قاعدين على الكيبوردات ..عملوا حاجه
............
على العموم أتمنى اضرابا ناجحا بدوم عبث ولافوضى تشار ك فيه كل تيارات المعارضه وليس الإخوان
لا يا قطه
انتى عارفه ايه اللى ممكن يحصل
و ده كالعاده
ان الاسعار حتزيد بنسبة اعلى من كده
و حيلوص فيها الموضف و اللى مش موظف
و تبقى خيبة و النبى خيبة
و كمان ال 30 فى الميه دول
عليهم ضرايب يعنى دول مش صافى
و كمان قيمة الجنية حتقل
لان تمويل الزيادة فى المرتب
اما حتكون من قرض
او
على حساب العجز فى خزينة الدوله
يعنى خيبة و وكسة كمان
سلامى ليكى
‏قال صوت من مصر
لذيذ جدا بجددفاع عنا كلنامش عن الناس الى معاها فلوس الى انا فعلا حاقد عليهم بجد
‏قال Eldebug
عارفة انتى لما واحد يدخل بيت ويقعد يزعق ويخبط ويصقف ويشتم فى الناس اللى مبتردش عليه ولما واحد يطلع يرد عليه يقوله ايوة ياعم انت عاوز ايه يقف يبلم ويلاقى انه هوه اصلا مش عاوز حاجة

اهو ده اللى انا حاسس انه هيحصل الاضراب الجاى

اضراب 6 ابريل كان فى مطالب محددة ... وناس اعلنت مسئوليتها ... والشعب كله كان ايد واحدة ... مش كله اوى يعنى
اما بالنسبة للاضراب بتاع 5 مايو فده اضراب بلا هوية ... لو فكرتى شوية هتلاقى ان فكرة انك تعملى اضراب يوم عيد ميلا الريس فكرة جامدة جداااااااااا

وهيه دى بالظبط المشكلة ... ان احنا عجبتنا الفكرة من غير مانفكر وراها ايه ... وانا لو شاركت فى الاضراب الجاى ده يبقى علشان مطلب واحد بس وهوه الافراج عن المعتقلين من المحلة ... اللى هما مرميين فى برج العرب دلوقتى وياعالم بيحصلهم ايه ... لان ببساطة مفيش مطلب غيره ... وصدقينى قبل ما تقولى مطالب فكرى فيها شوية الاول ... هتلاقيها بتتبخر لوحدها
‏قال ملك الكبدة
هيييييييييييييييييييييييييييييييييييييه

الزيادة دي مش هتنزل عالتقدير في المواد ولا ايه النظام

يا ريت لو مش هينزلوها عالتقديرات

ينزلوها على كل ليتر بيبسي

عشان نبلع كويس الهجس بتاعهم
‏قال الربان
تحياتي

حقيقي بوست جميل...لكن نقول جزء من الشعب انصفوه بـ 30 % ، و بالتأكيد
جزء أخر سينصفوه و هو العاملين بالقطاع الخاص...الذي نوهتي اليه حضرتك مشكورة.

في رأيي ، ان الدولة يجب أن تفكر في صرف
إعانة بطالة ...و أن تعيد تأهيل الشباب العاطل عن العمل...

دعونا نأمل خيرا...و لعل هذه تكون بداية الخير للجميع...

كما أنني أدعو الي النظر في إعفاء مشروعات الشباب من المشروعات الصغيرة
من كافة انواع الضرائب و الرسوم، حتي رسوم النظافة لمدة لا تقل عن 10 سنوات.


تحياتي و تقديري...و ان شاء الله يعم الخير كل المصريين.
‏قال Rania Lelah
بصى يا احلى قطه فى الدنيا
اهو احسن من مفيش
عارفة انها جمله رخمة
و بجد بتقلل مننا قوى
بس ارجع و اقول فى ناس كانوا محتاجين العلاوة دى قوووووووى

لنا الله يا سكرة
و اما الاخوان
فهقعد و ساتنى هيعملوا ايه
تحياتى
معقولة الأخوان هايشتركوا في الإضراب القادم ... يعني ماأشتركوش في الأولاني طب أتحبسوا ليه ؟
طب بجد ورغم اني مش اخوانجية... بس الناس دي بتتظلم
الحقيقة انا ضد الإضراب الجديد
الإضراب القديملسة دمه مابردش ..
‏قال Unknown
أنا كنت سبت تعليق امبارح ياقطة ومش لاقيه؟ انتى فطرتى بيه ولا حاجة؟
‏قال Abo 7anf
ازيك يقطه
انا بس بستغرب
ليه مره واحده العيش بيظهر
والرز بيرخص
والعلاوه بتزيد
مدا معناه انوا ممكن يحصل من زمان
‏قال بحبك يامصر
يلقطه هما اكيد هيزودوا الاسعار تانى هما متعودين على كده اللى بيدوهولنا باليمين بيخدوه بالشمال

اما بخصوص الاخوان انا رغم حبى ليهم وتعاطفى معاهم الا انى واخد موقف من عدم اشتراكهم فى الاضراب السابق لانه كان من الواجب مشاركة الناس اوجاعهم ومشاكلهم
الا انهم اعلنوا مشاركتهم ودعوا للاضراب القادم ممكن يكون تعديل موقفهم وده فى حد ذاته شئ كويس
تحياتى
صباح الضحك على الذقون الناس الى مش عارفاه انى العلاوه حتتدبر مواردها عن طريق بيع اصول بعض الشركات زى المصريه للاتصالات حتتباع نسبه 12% من نسبه الحكومه المصريه وبيع شويه اراضى على جنب علشان يدبروها
موضوع مشاركه الاخوان لقيو انى التخهدئه مع الحكومه مجبتش نتيجه قالو نكسب الشعب ما هو لعب على الحبلين بس اخرته الواقع على جدور الرقبه وتتكسر
بصي يا قطة
انت شفتي فين موظفين القطاع العام اللي بيرقصوا؟
اصل انا شايفة الموظفين اللي اخدوا علاوة حاطين ايديهم على قلبهم وبيقولوا الاسعار ح تضرب في السما
ماشفتش ولا موظف فرحان
يمكن عندكوا في الشرقية طيبين
اصل انا شرقاوية انا كمان وعارفة احنا اللي عزمنا القطر وبنرضى بقليلنا
وشوفي انت بقى
شوفي
لما شرقاوي يحكمه منوفي تبقى العيشة عاملة ازاي

بخصوص الاخوان ما اعتقدش انهم ح يرجعوا في كلامهم
يعني هم مش بالغباوة دي
خصوصا ان العيال الصغيرة بتوع الاخوان واللي كانوا سلخوا الحركة على اللي عملته في ستة ابريل قلبهم ح يقف من الفرحة
مش ممكن بعد ده كله يرجعوا في كلامهم

إيه ده؟
ممكن؟
لا لا لا لا يا شيخة لا
تفي من بقك

الا صحيح انا لمحت كلمة قبيحة كده في وسط كلامك
بتقولي قطاع عام؟
قطاااع عام؟
قطاااااااااااااع عااااااااام؟
وانا اللي باقول عليكي مؤدبة
‏قال Heart Beat
Dear Desert Cat

في حد علق عندي بخصوص موضوع كده عند شخص كده

معرفش التعليق برضه جالك و لا لأ قلت اجيبه لغايو عندك عشان الامانة يعني

التعليق اللي عندي اهو

رهف said...
السلام عليكم
فى البداية اعتذر منك اختى لان ردى خارج عن الموضوع
انا اسمى رهف
كنت شوفت تعليق لشخص يدعى مش موافق عند المدونة كامليا وبيقول انه هيكشف فيه حقيقة قطة الصحراء وفى شخص أتى له بلنك مدونته ورد بيه كمان وقاله عرفت ان الطريقة سهله وانى ممكن ارد فى اى مكان واعمل اللى انا عايزه بلنك مدونتك
والحوار ده استفزنى انى ادخل اشوف ايه قطة الصحراء اللى عاملة كل الانقلاب ده ومن قبل ما اكتب حرف عنده دخلت المدونة بتاعتها وشوفت كل بوستاتها لا بتشير ليه لا من قريب ولا من بعيد وكلامها معظمه متعلق بمشاكل سياسية الجميع عايش داخلها ودخلت اوضح له النقطة دى واستفسر منه على الهجوم ده وهى ولا فى بالها حجب تعليقاتى فمن الواضح سيدتى ان بيحجب اى تعليق يجى فى صالح قطة الصحراء مع انى لا كنت كاتبه فيها شعر ولامدياها زيادة عن حقها وشوفت وقولت له لو ما نشرت كومنتاتى هعمل زيك والف على المدونين واقولهم ان انت انسان مدعى كذب وتحجب اى تعليق فى صالح قطة الصحراء
ارجو الا اكون ازعجتك
والله ما بلغت الله فاشهد

بس يا فندم كده خلص التعليق انا قلت بس اوصل الحق لاصحابه

هاروح بقى اعلق على الزيادة التلاتينية دي
‏قال Heart Beat
Dear Desert Cat

كنت قريت قبل كده في حديث للرئيس نوه فيه عن الزيادة دي و قال ان عشان يحصل زيادة لازم ده هاياثر على الاقتصاد و المديونية و حاجات كده

و كنت كمان اتكلمت عن الزيادة اللي جيه للشعب الغلبان و العين فيها كده

زي مثلا اما واحد غني و بخيل يشتري هدية لجاره الفقير و يقول خد الهدية دي اشترتها لك بروووووووبع جنيه

يغني خلاص قيمة الهدية و الهدية نفسها بتروح

فما بالك بقى من شخص مش بيدي هدية ده المفروض حق الشعب و في نفس الوقت بيقول يا جماعة الزيادة اللي بفكر فيها دي هاتكلفنا كتير ... ديون و خصخصة شركات و بيع اسهم شركات و حاجات كتير ياما

يعني لما الغلابة اللي مستنين الزيادة دي يسمعوا حاجه زي كده

ممكن يقولوا لا و على ايه بقى ما هو لما يحصل ديون و خصخصة و بيع يبقى هاتيجي على دماغنا و تخترعوا لنا اي حاجه تاخدوا بيها الزيادة دي تاني خلاص بقى خلينا زي ما احنا و يا دار ما دخلك شر

تيجي الحكومة اللئيمة و تقول شوفتوا ادينا كنا هانديكم زيادة تلاتين في الميه و انتوا اللي مش عايزين

يعني فى كلا الحالتين احنا اللي غلطانين

و لسه يا ما هانشوف
---------------

ايه ده هم الاخوان رجعوا تاني يقولوا هانشارك في الاضراب

انا عندي فكرة تيجي نعمل مسابقة للي يحدد تاريخ و ساعة اليوم اللي الاخوان هايرجعوا في كلامهم فيه و يقولوا مش هانشارك في الاضراب زي قبل كده

على اساس اننا متأكدين انهم هايستخبوا زي قبل كده لكن امتى الهروب الكبير ده هايحصل مش عارفين لسه

على غرار فكر ثواني و كسب دقايق

و اذا كسبنا الدقايق ندعي فيهم و نقول

يارب اكفينا شر اتنين ... حكومة فاسدة و اخوان منافقين...آمين
السلام عليكم
ناس كتير فرحت بخطاب الريس خصوصاحكاية
الزياده 30% لأنها شايفه انها احسن من مفيش.......
اصل كده كده الاسعار هتفضل تزيد لأن مفيش رقيب بس احنا بنتعشم خير بردو لأن الاكيد ان بلدنا مليانه خير كتير اوي بس احنا مش قادرين نحس بيه
اما بقى حكاية الاضراب دي ولا ليها لازمه.. ولو اني مش ضدالتعبير عن الرأي
لكن لازم الناس ترتب افكارها وتفهم ايه واجباتها قبل حقوقها
مش اي حركه بتتعمل ضد الحكومه الناس تجري وراها عشان تفش غلها فيها والسلام بدون وعي ولا ادراك
ومتقوليش ان الناس فاهمه لأن اغلب الناس ولا عارفه حاجه واللي يهمها هي ازاي تاكل وتشرب وبس
لو مكنش فيه وعي قبل اي عمل مش هيجيب نتيجه ويبقى قلتها احسن

لكي تحياتي ياقطه
‏قال Desert cat
Soooo
يا فندم هو انا قولت حاجه
اان لا قعدت فى ميكروباص اخطب ولا حطيت ودنى على موبايل غيرى وقعدت اقوله قول ان شاء الله
ههههههههههههه
حد قالك تحكى لى اللى حصل اهو انا مش بعرف امسك لسانى بقى
...............
بالنسبة للزيادة فكان فى مثل قديم بيقول والعهدة على الراوى من دقنه وافتله
يعنى من فلوسنا وبيزود رواتب الموظفين ومن فلوس جميع الشعب مش الموظفين بس هيعوضهم الطاق طاقين
تحياتى يا سوووو
‏قال Desert cat
DoctorAllam
ماهى الحكومة مش بتجبى علينا يا دكتور
بانسبة للتجار والسواقين والناس اللى بترفع الاسعار منها لحالها دى برضه زيادة المرتبات فى صالحهم
يارتنى كنت بقال
‏قال Desert cat
انين الحزن
وزة ازيك يا جميل
وحمد الله على سلامتك وسلامة النت
يا بختك يا قمر الزيادة 30 %
مبرووووك
عقبال ما يبقوا 300 %
‏قال Desert cat
EmY
بقى ميميى الجدعنه كلها تيجى وقت الجد وتجرى
اوووووه
نوووووووه
يالا لعنة السماء
يا حبيبتى لو جرى لى حاجه ابقى ارفعى قضيه عليهم نفر نفر انا هتصل حالا بالا برئيس جمهورية نفسه واخليه يعملك توكيل
‏قال Desert cat
رئـــــيسـة حزب الأحلام
ده احنا حناكل على قفانا لحد ما نشبع
اكتر من كل مرة
‏قال Desert cat
m5m
انا دخلت اللنك
بس انا قريت امبارح الموضوع هنا
http://www.masrawy.com/News/Egypt/Politics/2008/april/30/rase.aspx
وبيقولك محافظات مصر يرقصون بسبب العلاوة
ولا عزاء للمطالبة بالحقوق
‏قال Desert cat
فاتيما
طيب ما هو يا حبيبتى اللى هيديه للموظفين باليمين هيتجمع اضعاف مضاعفة من جميع فئات الشعب بالشمال
يعنى الموظف هيزيد 30 % الملغ المهول ده
اللى مش موظف يرتفع عليه اسعار السلع والغاز وفرض ضرايب ورسوم الله اعلم بيها الفلوس دى بتروح فين ما علينا مش قضيتنا
عموما هنشوف الايام مخبيه لنا ايه
تحياتى يا ام يوسف
نورتينى يا جميله
‏قال Desert cat
وجهة نظري
انا متفقه مع حضرتك وللاسف العلاوة مش هى الحل
الحل فى خفض الاسعار
الحل فى خفض الضرايب اللى قطمت ضهور الناس
الحل فى حل ازمة البطالة
الحل فى رقابة شديدة على التجار وعلى كل واحد يفكر يرفع سعر اى سلعه من لحاله بدعوى ان العلاوات زادت
طيب زادت للموظفين وباقى الناس هتجيب منيييييييييييين
ما هى الحديدة اتباعت من زمان
‏قال Desert cat
الطائر الحزين
الناس تفرح بالعلاوة وبعد شوية كلنا ندفع من جيوبنا علشان تتعوض

بالنسبة للاخوان
معلشى يا فندم دول كتلة واحدة يعنى مش شخص قال انا مسافر الفيوم وبعدين رجع فى كلامه علشان نقول لا نملك الا انفسنا مش هما من يتباكو ويقولوا احنا بنعتقل من اجل مصلحة البلد ولما يجى الوقت المناسب لمصلحة البلد يقولوا مش نعطلكو ملناش فيه ... مش الاخوان الحلوين دول اللى مهديهم قال طز فى مصر وشعب مصر يبقى فين مصريتهم اساسا ووطنيتهم ... شئ فيه مصلحة شخصية بيكونوا اول ناس موجودين
مفيش تحقيق مصالح بيطلعوا لسانهم ويقولوا مش لاعبين
يبقى هما فين ان شاء الله كدا من مصر

احترامى وتقديرى
‏قال Desert cat
wanna b a physician
على رايك والله يا دكتور
ده الطبيب مرتبه 250 جنيه
ربنا يرحمنا
‏قال Desert cat
فرنسا هانم
ماهو مزودهم على الاساسى يا فرنسا
علشان الحوافز والبدلات مش تزيد
نياهاهاهاها
ده منوفى يا حبيبتشى
وبعدين بتزيد للموظفين واحنا
ده انا يا قلبى كل يومين تلاته ادفع اى فلوس تحت اى بند
مش عارفه ليه
وبدفع واقول حسبى الله ونعم الوكيل
وساعات ببلطج ومرضاش ادفع ولو جه موظف اقوله هو مفيش غيرى فى البلد دى ولا اييييييييييه
الموظفين يزيدوا وانا ادفع
حلو كدا
انا ماليش دعوة انا عايزة زيادة لو حتى 5 %
الحل ان يرجع قانون ضريبة المبيعات الاجبارى علشان التجار اللى بترفع اسعار من نفسها دى

نورتينى يا جميله
‏قال Desert cat
Human
انا برضه اول ما عرفت بالزيادة قولت والله العايل اللى بيقولوا عليهم فاضيين اللى بيقولوا عليهم قاعدين طول النهار على الفيسبوك والمدونات يتبادلوا صور سكس عملوا حاجه حلوة
ولو صور السكس اللى فضحوا الفسيسبوكيين والمدونيين عليها بتعمل النتيجة دى يبقى اهلا بالانحلال وليس الاحتلال
انا كمان اتمنى اضراب بدون خراب وكل فئات الشعب المصرى تشارك فيه كل الفئات ماعدا اللى قالوا طز فى مصر وفى شعب مصر
تحياتى
‏قال Desert cat
مواطن مصرى نايم
وماهو ده اللى تاعب اعصابى
انا بستنى قانون جديد للضرايب علشان اروح ادفع
انا دافع ضرايب على الدخل وجت لى على اليافطة برضه ضرايب
مستنية بقى ضرايب على استخدامى للشارع العام اه مش بمشى فيه ولا ايه
ماهو لازم الزيادة دى تتعوض
تحياتى يا اسلام وربنا يستر
‏قال Desert cat
صوت من مصر
شرفت يا فندم
‏قال Desert cat
Eldebug
اقولك انا يا سيدى لو دخلنا البيت اللى بتقول عليه ده وفضلنا نزعق وحد سالنا عايزين ايه هنرد عليه بالاتى

1- حد أدنى للأجور لكل الفئات و الوظائف و ربط الأجور بالأسعار كما يحدث فى جميع الدول التى تعانى من الغلاء


2- اجراءات حقيقيه لوقف ارتفاع الاسعار و منع الاحتكار


3- الافراج عن جميع المعتقلين

4- لا لانتهاك حقوق المواطن فى وطنه
‏قال Desert cat
ملك الكبدة
هههههههههههه
على كل مادة تقديرك فيها ض
هيرفعوعها لـ ض ج
اذا كان البيبسى يا ملك هو كمان اسعاره بترتفع
‏قال nody
قطه
مين الى فرحان
انا ماما موظفه واول ما سمعت
اتنكدت
حبيبتى الزياده دى بتكون مرتبطه بالحد الادنى والحد الاقصى للمرتب
يعنى بارضه المستفدسن بيها العتاوله
زى وكلاء الوزارات
وما شابهه
وحتى لما يستفادوا الموظفيت ها يستفادوا كام يعنى

كلها ملاليم
‏قال Desert cat
الربان
ربنا يسمع من حضرتك وتكون خطوة ايجابية نحو مستقبل افضل
انما موضوع انهم يعفوا مشاريع الشباب انا ممكن ادفع رايب واللى يطلبوه بس يبقى بفايده مش ادفع رسوم نظافة والشارع مقلب زبالة ومش ادفع ضرايب والاسعار كل يوم فى يادة والطرق مش مرصوفة
اتفائل برد حضرتك خير لعل وعسى
احترامى وتقديرى
‏قال Desert cat
Rania
بصى يا قلبى
هو احسن من مفيش فى حالة لو هيثبتوا مش هيقابل الزيادة فى العلاوات زيادة فى الاسعار
انا كمان مستنية لما نشوف الاخوان هيعملوا ايه
خدينى جنبك
نورتينى يا جميلة
‏قال Desert cat
مفقوعة مرارتي من حماتــــــــــــي
احنا مش عارفين هما قالوا حنشترك
بصى يا سوسو هما اللى ظالمين نفسهم يا قلبى لان فى برتيته بينهم وبين النظام

تحياتى يا جميله
‏قال Desert cat
m5m
ههههههههههههه
معلشى اتاخرت فى نشرة على ما صحيت من النوم بقى
سورى يا محمد
‏قال Asmaa mahaba
هههههههههههه
انتى شكلك بتحبى الرشيدى الميزان
ثم ان العلاوه دا بقشيش من جيب اهلهم بيديهولنا مش حقنا مثلا كتر خيرهم
تحياتى ليكى سومه_87
‏قال mostafa rayan
تفتكري الحكومةهتتطلع
صادقة
ولاالأخوان هما كما هيصدقوا
مابقاش في حاجة تتصدق في البلد دي
‏قال Empress appy
طيب انا مليش فى الحلاوه مش بحبها ولا بحب احم احم الالكترونيات افضل هههههههههههخخخخخخ
وبعدين يا بنتى على راى نواره مرتبطه بالموارد والموارد طار فى الهوا شاشي وانت مترداشى ههههههه
والله عندنا موارد وقولنا عليها قبل كده بس مين يسمع هو بيلاعبنا زي القطط نجيب كوره وتربطها باستك ونرميها وناخدها بس افلح ان صدق
وبعدين الاخوان اتعشم با رب بدل ما يجيبوا ليه الضغط ونشوف النتيجه بقى ساعتها تعلني اسلامك بيهم ه وده واجب هههههههههههههههخخخخخخخخخخ
‏قال غير معرف…
قطتنا العسل عامله ايه؟

شوفي انا لاقيت الناس حتتجنن علي الخطاب و كل واحد عمال يسأل التاني انت ماسمعتش اللي الريس قاله
قلت ايه الناس دي
هو لسه فيه حد بيسمع خطابات الريس
انا حاسه انها لابقت بتقدم و لا تأخر
بس غصب عني سمعتها و لاقتلك الناس بتهلل و تقول ربنا يخاليك ياريس
علي ال30 في الميه اللي زودهم
جميل و الله بس ياتري ياهل تري الأسعار مش حتزيد؟يعني اللي حيدوهولنا باليمين ياتري مش حيرجعوا ياخدوه منا بالشمال؟
الصراحه استفزني اوي لما بيقول و الحكومه قالت 15 في الميه قلتلهم لأ 30 مفيش موارد ياريس اخلقوا موارد
يعني بيديهم اذن انهم ياخدوا حبابي عنينا يعني هي الموارد دي حتيجي منين الا من الشعب الغلبان بعد كده؟
عارفه ياقطه الزياده اللي الكل فرحان بيها دي مثلا حتكلم عن نفسي
اساسي المرتب بتاعي 180 جنيه حلو؟
نيجي بقه نقول حيزيد كام بعد الزياده الرهيبه دي حيزيدودوه حوالي 54 جنيه و طبعا فيه خصومات و ضرايب عشان احسن حد يفتكر انهم حيتاخدوا 54 جنيه عدا و نقدا
يعني في الاخر حاجه عبيطه
و ياتري برضه و علي عكس التوقعات الزياده حتتضاف علي مرتب مايو ده صدفه و لا عشان فيه اضراب 4 مايو؟اصل دايما الزياده بتكون في شهر 7
و سمعت كمان عن معرض للمواد الغذائيه في ارض المعارض لما لقي المسؤلين ان الاقبال كبير عليه ربنا يخاليهم مدوه لحد يوم 6 مايو
لاحظي التاريخ
ربنا يخاليلنا المسؤلين و يكترلنا خيرهم اكتر و اكتر

الصراحه ياقطه انا بتفقع لما بسمع عن ايراد حاجه زي قناه السويس و لا الضرايب و بيقولوا حوالي 50 مليار دخل الضرايب طب جميل ياتري بيعملوا بيها ايه؟مش هي دي الموارد؟

بخصوص الاخوان و مشاركتهم في الاضراب الجاي شوفي انا مش سياسيه بارعه اوي يعني علي ادي لكن اعتقد يعني ان لما الاخوان ماشاركوش في اضراب 6 ابريل كان عندهم امل انهم يزيدوا بنط عند الحكومه و تخرجلهم رجالتهم لكن لما لقوا ان مفيش فايده قالولك يعني حنخسر الشعب كمان نشارك
و ادي 4 مايو قريب و حنشوف الرجاله الأشاوس حيعملوا ايه

الا بالحق كنت بزور الاستاذ الربان و لاقيت تعليق من غير معرف عند محذوف و انتي بتعلقي عليه وواضح ان الغير معرف جاب سيرتي
الا ايه العباره؟قال ايه بسلامته؟هما مش حيتكتموا بقه و يخالوهم في روحهم؟

فعلا ال ياقاعدين يكفيكوا شر الجايين

بس براواه عليكي ياقمر انك خدتي بتاري و رديتي غيبتي ده العشم و الله ياقطه و مرس يعلي سؤالك ياقمر سلامك وصل من الغاليه
:))

و علي فكره زي ماهارت قالت علي الأخت رهف انها جت زارتنا و سابت تعليقها اللي هارت عملتلك كوبي و بيست له

عشان اللي مابيشوفش يشوف و يفوق كده و يصحصح ان فيه ناس تانيه برضه حقانيه و بتقول كلمه الحق

تحياتي ياقمرايه
‏قال دينا حامد
والله انا اول ماعرفت الموضوع ده
قولت يعني هو علشان يكتم الناس عمل لهم 30%
لكن مافكرش في الناس اللي مش لاقيه تاكل اصلا ممكن دول يقوموا بالاضراب
واظن ان عددهم كافي جدااااااااااااااا

بس اللي انا مش فهماه ايه اللي مفرح الناس دي قوي كده
ده ماهنش عليه يضاعف المرتب او حتى يصرف لهم شهر او اتنين بمناسبه عيد العمال
لا 30%
بلاش خيبه والنبي والنعمه الناس مخها ضرب خلاص
بس اهو 0% من ففلوسنا اللي منهوبه ومتاكله في كروش ناس بتدعي انها بتعمل كل حاجه من اجل مصر وشعب مصر
اللي شويه شويه هيبيع هدومه علشان ياكل ويعيش
تحياتي
‏قال همس الاحباب
يابنتى انتى عايزة ايه بالظبط
ولا عاجبك الراجل يزود العلاوة ولا ما يزودش انتوا فعلا شعب مفترى
وبعدين الراجل خبرة برده وبيعرف يثبت الشعب حلو فى الازمات خبرة بقى 27 سنة فى الحكم و80 سنة بسم الله ماشاء الله
يعنى لسه قدامك كتير قوى لما تفهمى عقلية الريس يا قطة
بس بصراحة بوست جامد علشان كده ازودك فى العلاوة الجاية 1/2 %
برده الاخوان تانى مفيش فايدة فيهم بس على فكرة هو كده شكله مفيش اضراب
شعب بدا ينوم تنويم مغناطيسى تانى
تحياتى
خالد
السلام عليكم
ايه يا قطة متبطلوا الحقد اللى فيكوا بقى
سيبوا الناس تاكل عيش
ما انتوا مولعنها فى المشاريع بتاعتكوا
طلعوا من تحت البلاطة وبطلوا تبصوا لحد
انا مثلا شغال فى مكتب وباخد 150 جنية فى الشهر قصدى فى اليوم
احمد ربنا وابوس ايدى شعر ودقن وميهمنيش العلاوة دى كام لانى مش محتاجها اساسا
وبالمناسبة السعيدة دى احب اوجة تهنئة خاصة للريس واقوله كل عام وانت حاكم وعقبال 80 سنة
سلالالالالالالالالالالالالالام
‏قال secret-love
السلام عليكم
يمكن تكون ده اول زياره ليا
انا عارف ان الابتلاء شديد علينا شويه بس معلش اهى ازمه وتروح
‏قال Desert cat
Abo 7anf
ما هو من فلسونا يا ابو حنف
بيعملوا اللى هما عايزينه فلوسنا
وربنا يستر فى اجتماع الحكومة
ومش نتفاجأ بفرض ضرايب على الانفاس اللى بتنتفسها
‏قال Desert cat
بحبك يامصر
كلنا عارفين ان اللى بيدوه لينا باليمين بياخدوه بالشمال

بالنسبة للاخوان هما الحكومة كانوا فاكرين بعدم اشتراكهم هيكسبوا ود الحكومة لكن لما رجالتهم اخدوا احكام قالوا نرجع نكسب ود الشعب لكن هيهات
‏قال Desert cat
رئيس جمهوريه نفسى
هما هيعقدوا اجتماع ياريس علشام يخلقوا الموارد من تحت الارض اللى يعنى من بيعنا لهدومنا وما نملك من جزم وخلافه
بالنسبة للاخوان
بهديهم اغنية محمود عبعزيز يا حلو بانت لبتك
‏قال Desert cat
جبهة التهييس الشعبية
وااااااااااااو انتى شرقايوة يا نوارة
الشرقية اتشرفت بيكى يا جميلة
احنا عزمنا القطر والتريلا كمان
ده من الكرم الزيادة
ههههههههههه
بصى يا حبيبتى انا مشوفتش برضه الناس فرحانة انا قريت الخبر على مصراوى وبيقولك وكالة افراح وراصص محافظات مصر محافظة محافظة
القى نظرة هنا
http://www.masrawy.com/News/Egypt/Politics/2008/april/30/rase.aspx
بالنسبة للاخوان حنشوف ياترى ياهلترى
نورتينى يا جميلة
‏قال Desert cat
Heart Beat
الرسالة مش وصلتنى يا هارت لانى قافله الانونيمس
عموما انا بشكرك جدا على توصيل الامانة يا حبيبتى وبشكر الاستاذه رهف على مجهودها
احترامى وتقديرى
‏قال Desert cat
Heart Beat
الحكومة يا قلبى هتعمل اجتماع علشان يخلقوا الموارد اللى هيسدوا منها الزيادة واللى هى مص دمنا نفر نفر
من الشهر الجاى انتظروا زيادة فى فواتير الكهرباء والمياة
زيادة فى البنزين وما شابه
فرض ضرائب اجبارية على اى حاجه مش تدقق اوى
المهم الزيادة تتعوض وخلاص
الاخوان
ااااااااااااه
فى انتظار نتيجة الامتحانات
‏قال Desert cat
حبيبـــــــة القمـــــر
بصى يا جميل
الناس تعبت من تقل الحمل
تخيلى موظف مرتبه قولى 600 جنيه وعنده من الاولاد 2 مش هنقول اربعه ولا خمسة
فى ظل غول زيادة الاسعار دى هيعمل ايه
ياكلهم ويشربهم منين ويعلمهم ازاى بالمبلغ المهول ده
الناس مش طالبة حاجه غير ان الدخل يتساوى مع مستوى المعيشة لتوفير حياة كريمة كمان مش عايزين انتهاك لحقوقنا
محتاجين نعيش حياة ادمية
نورتينى
‏قال Desert cat
nody_1987
انا بصراحة يا نودى مش شوفت حد بس قريت الخبر هنا
http://www.masrawy.com/News/Egypt/Politics/2008/april/30/rase.aspx
وربنا يسترها علينا جميعا
تحياتى
‏قال Desert cat
somaa mahaba
انا مبحبهاش خالص مش تودينى فى داهيه
ههههههه
العلاوة من جيبنا وبرضه هيزودا الاسعار علشان يعوضها من جيبنا
تحياتى
‏قال Desert cat
mostafarayan
فكرتنى بالمقولة الشهيرة لحكيم عصره واونه محمد هنيدى فى فيلم صعيدى فى الجماعه الامريكية
ما تثقش فى اى بنت غير امك ولو ابوك طلقها ما تثقش فيها
اهو ده الحال بالظبط دلوقتى
تحياتى
‏قال Desert cat
appy
مالكيش فى الحلاوة وليكى فى الالكترونيات
اخبار زامبتيكا ايه
سلمى لى عليه
الموارد موجودة يا حبيبى
قناة الزويز فين
الزياحة فين
بيع القطاع العام فيييييييين
ومش عايزة حد يقولى فى سويسرا اصل انا بحب الحكومة
بكره نشوف المية تكدب الغنطاس
‏قال Desert cat
اجندا حمرا
الرقيقة اجندة
بصى يا حبيبى بلدنا فيها موارد تكفينا وتكفى بلد تانية جنبنا
احنا لو قعدنا نحسب دخل القناة على دخل السياحة
الضرايب
التامينات
الغرامات
والاختراعات اللى كل يوم يخترعوها من رسوم وخلافه
ده احنا اغنيا اوى بس السادة مستخسرينها فينا الظاهر
بيقولوا احنا نجوعهم علشان يتعلموا الادب اصل الفلوس الكتير بتفسد الاخلاق
بالنسبة للاخوان
رصيدهم قل فى 6 ابريل
ومالوش حاجه من الحكومة قالوا الشعب بقى غلبان وهيرجع لنا تانى ويسمع لنا
ميعرفوش ان الشعب اصلا مبقاش طايقهم

بالنسبة للانونيمس فدى ناس مريضة موجودة فى النت علشان تعرض علينا قلة ادبهم وخلاص
وبعدين يا حبيبى انتوا اخواتى ان مش كنت ادر غيبتكو هرد غيبة مين
وانا حقيقى لحد دلوقتى بشكر الظروف اللى جمعتنى بالغالية
محبتى ليكو انتوا الاتنين
‏قال Desert cat
دينا حامد
بعض الناس بتقول اللى يجى من الحكومة فايدة
بس مش يعرفوا انه اللى هياخدوه باليمين هيتاخد اضعاف اضعاف بالشمال
ده احنا حنشوف ايام سودة
تحياتى
‏قال Desert cat
همس الاحباب
يا خالد كل اللى انا عايزاه نعيش محترمين وبكرامتنا زى باقى الناس
مجهودنا يبقى لينا مش للحكومة
الاخوان بقى ربنا معاهم
شوفت بدعلى لهم ازاى علشان تعرفوا ان قلبى طيب
نياهاهاها
تحياتى
‏قال Desert cat
حـــــدوتـــــة
واكلينها والعه اه
ده احنا واكلينها موحوحه يا حدوتة هو احنا جايبنا لورا غير العدسات المقعرة اللى بتبصوا علينا بيها دى
انت بتشتغل ب 150 جنيه فى الشهر قصدى فى الساعه واسيب حقك للحكومة بقشيش ما انت غنى بالمرتب المهول ده
تحياتى
‏قال Desert cat
secret-love
ربنا يسمع منك ويارب تروح قريب
نورتنى
أنا إتأخرت يا قطة غصب عنى..الولد الصغير كان تعبان شوية
المهم ..أنا نفسى والله الإضراب ده يكون أنجح من اللى قبله
وألا حتكون (لبانة)ماسخة بعد كده وحتعرف الحكومة دية الشعب..واللى تعرف ديته..إيييييييه..إقتله..
ربنا يفك سجننا ونطلع كلنا للحياة فى عفو من اللى جايين
قولى يا رب
ههههههههه

انتي بتنقي علي الموظفين عشان الزيادة المهوله اللي اياخدوه واللي اتحولهم من محدودي الدخل الي اصحاب القصور والفيلات وتخليهم يشتوا في شرم الشيخ ويصيفوا في اوربا .......

عموما اتحلت مشكلة الموظفين بعد ما عدوا خط الفقر ,عقبال بقية الشعب ..

وكل اضراب وانت بخير

تحياتي
محمد
‏قال عبده الرايق
العلاوه جايه وفى ديلها ريح جامده قوى هتاخدها وتطير
ونقعد نغنى ظلموه
بس المشكله انى مش حافظ باقى الاغنيه
‏قال rovy
ازيك يا احلى قطه
معلش اتأخرت فى التعليق مش عارفه ايه اللى كان حاصل كل ما اجى ادخل على التعليقات النت يعلق ..الحمد لله انه دخل . المهم انتى مش ناويه تبطلى خربشه
على كل حال بوست جامد وده مش غريب عليكى .. بس برضه خفى من الخربشه شويه
ربنا يحرصك ويحفظك
ودمت بخير
تحياتى

rovy
‏قال Unknown
أنا اناشده فى جواب قبل كده مسمعش يمكن يسمعك انتى
بس سألتى هو بيحب القطط و لا لا ؟ لا يكون بحب الكلام فيوديكى انتى ورا الشمس
‏قال Unknown
قطة فى رسالة وصلتنى بخصوصك من حد فى بوست أقبال بركة

ابقى روحى شوفيها عشان مهمة جدا و أثبتت كلامى
‏قال Desert cat
واحد من البلد دى
الف سلامة على ابن حضرتك
ان شاء الله يكون بخير
انا كمان نفسى الاضراب ينجح ويتحقق كل اللى احنا عايزينه علشان نقدر نعيش مش نتعايش
تحياتى
‏قال Desert cat
الفارس الملثم
ده انا مش بقر عليهم وبس
ده انا عينى هتطلع على المبلغ الجامد اوى ده
اصلهم محدش قدهم دلوقتى
هههههههههههه
والله احنا شعب غلبان
وجايين للحكومة على الطبطاب
ربنا يتولانا
تحياتى
‏قال Desert cat
عبده الرايق
الف مبروك يا عبده باشا على العلاوة لكن اخبار المحليات ايه
اكيد علاوتهم جامدة جامدة يعنى
ابو قسم بقى
ههههههههههه
تحياتى
‏قال Desert cat
rovy
حمد الله على سلامة النت
ونورتينى يا جميلة
معلشى اصلى متغاظة من ال30%
اشمعنا هما واحنا عامة الشعب مش لينا المبلغ العظيم ده كله ليه
تحياتى
‏قال Desert cat
عاليا حليم
اخ ربنا يستر
طيب انا هفكر ابعت له كلب مقطقط يمكن ننول الرضا
نورتينى يا جميله.
‏قال Desert cat
عاليا حليم
انا شوفت رد الاستاذه رهف
وبصراحة انا بشكرها جدا على تعبها وبشكرك انتى كمان يا حبيبتى
وربنا يهدى الناس ويعرفوا ان محدش ساذج للدرجة اللى هما متخيلينها
محبتى ليكى يا قلبى

المشاركات الشائعة