مصر من الجانب المشرق

فى يوم شم النسيم ... طيب ايه علاقة شم النسيم بالعنوان ... استنوا بقى جايلكو فى الكلام اهوه
صحيت من نومى بدرى ساعه .... اتقابلنا انا وصحابى وانطلقنا ... لاء مش روحنا الجونينة ...
روحنا الاول القاهره الجديدة علشان نخطف آبى من هناك لأننا اساسا كلنا مكناش مرتبين هنعمل ايه او نروح فين كنا كلنا بنقول هنقضيها فى جنينة القطن الا وهو السرير يعنى ... لبست آبى سريعا سريعا ... وفضلنا ماشيين فى طريق طوويل طويل يعنى طول دكتور علام كدا هههههه ... لحد ما وصلنا ... سالنا فى كام هوتيل لاقينا كله كومبليت ... واللى مش كومبليت لازم يكون معاك حجز قبلها واحنا اساسا مكناش متربين زى ما قولت فى الاول ... اشطة طيب احنا هنعمل ايه .... لا تراجع ولا استسلام لن نيأس احنا لازم نقضى اليوم ملناش دعوة ... وكملنا المشوار والحمد لله لاقينا هوتيل ينفع ندخله من غير حجز ... اسيبكوا بقى مع الصور
علشان نتفرج كلنا على جمال طبيعة مصر
اول ما دخلنا انا وابى فضلنا نتصور تحت النخلة دى ههههههه


ششششش اوعوا حد يقول ان اللى ماشية ترغى فى الموبايل دى قطة الصحراء اصل فى ناس هتعملها قضية مش يبقى بيانات وصور كمان نياهاهاهاها والله انا منزلاها مخصوص علشانها هههههههههه
كنت قاعده اتخيل البحر يتغازل فى جمال البيسين والسماء تعانق كليهما يا بختهم


لحظة تأمل ساعه الغروب ... تناغم الشمس والبحر فى منظر بديع


لقاء السماء بالبحر بالجبال وما اروعه من منظر


روعة المنظر بالليل

نيجى بقى للسبب اللى انا منزله البوست علشانه

واحنا ماشين فى الطريق منظر الجبال حوالينا مرسومة بشكل لا يستطيع رسمه اعظم فنان

فى كل مكان بشوف جمال طبيعة بشكل مختلف عن المكان التانى

كل مكان بروحه وفى اى وقت بكتشف حاجه جديدة وجميلة ان بلدنا فعلا مفيهاش مكان مش حلو

ليه بقى احنا بنشوهها ... ليه احنا بنقتل اى حاجه حلوة موجودة فيها ... الأرض وبنبيعها ... نهر النيل وبنلوثه ... شوراع ومتبهدلة ....اثار وتايهه ومشتتة فى البلاد مش لاقيه اللى يلمها اه وحياة راس خالتى نفرتيتى ...

انا بوستى ده نداء لكل واحدة بتاخد العيلة وتروح على البلاج فارشة الملاية الكاروهات وحلة المحشى واخر النهار ترمى كل حاجه تحت رجليها وتروح ... ابقى اعملى لهم سندوتشات يا طنط هما مش هيموتوا من الجوع لو ماكلوش محشى فى اليوم ده .... اعتبريه بيتك وحافظى على الاقل على منظرة الجمالى

لكل واحد بيمسك فى ايده ورقة او منديل يرميه فى الشارع

لكل واحد يقطع شجرة او وردة او حتى ورقة من شجرة

واخيرا للسادة المسؤلين ارحمونا من بيع البلد بالمتر

والله بلدنا جميلة بس محتاجه نحافظ عليها

انا مش هقول احنا كنا فين ... لاء هو مش سر ولا حاجه بس انا عايزاكو انتوا تفكروا اصل اللى هيعرف ليه جايزة قيمة ولو عرفت الاجابة اتصل على 0900

الا الناس اللى اتصلت بينا علشان تطمن علينا لما مش شافونا اون لاين

هما عارفين نفسهم كويس بقى اللى هيقول فيهم هيتخحبط بقلة فى دماغه من قلل آآبى

كل سنة والجميع بخير

تعليقات

‏قال غير معرف…
ياسيدي علي الصور
فنانه و الله
المهم انك قضيتي انتي و ابي يوم جميل مايتنسيش صح؟

كلامك و الله صح ياقطه بلاش يعني حلل المحشي في الجونينه و نحافظ شويه علي نضافه المكان

و بلاش بيع ارضنا حته حته كده لحد ماحنلاقي نفسنا بره البلد و التانيين ماسكينها ماهما خلاص حيتشروها بفلوسهم و ماعتقدتش حيخدونا علي البيعه و لا ايه رأيك ياقمر؟

الصور جنان ياقطه
مصر فعلا كل حته فيها ليها طعم و حلاوه و جمال و للأسف بنضيع وقتنا من غير مانكتشف الجمال ده كلو

كل اجازه و انتي بخير و دايما موريانا اللي ساعات مابنقدرش نشوفه من حلاوه مصر
:)))))
مش كنت عزمتونا
وكل سنة وانتم طيبن
طول عمري بقول مصر جميلة
اي بلد ممكن تكون جميلة بأهلها
لو لستنانى لحد ماالناس تفهم انها كده بتبوض البلد يبقى هنموت قبل مانشوف مصر جميلة وبس
لو جت على حلة المحشي في شم النسيم كنت هقول عادي
لاكن للأسف احنى كل يوم بنبهدل مصر
احنا محتاجين قوانين تتنفذ بجد
انا قضيت شم النسيم في اسماعلية لان ليا بيت هناك حقيقي كلها جناين
بسس ذعلت في عدم العدل في توزيع الجناين وأماكن الخروج على بقية المحافظات
تحياتي
الصور حلوه قوى فكرتينى بالغردقه وجمالها اصلى بعزها قوى
‏قال Happy Hope
صور جميلة و بوست جميل

مصر حلوة اوى بجد بس اللى يفهم و يقدر
بس فى مشكلة فى النظافة عند فئة كبيرة من الشعب المصرى
تلاقى الواحد من دول ماشى و سلة المهملات و الله جنبو وبرضو يرمى الورقة او الشئ اللى بيرميه فى الشارع
والمهم تلاقيهم كلهم بيقولو النظافة من الإيمان

المهم يا جميل اتمنى تكونى قضيتى وقت حلو

خالص تحياتى
دى راس سدر دي

:D

hope u always enjoying ur time ya m3allem :)
‏قال هوندا
حلوة اوى صور الغروب جميله جدا سبحان الله فعلا مصر جميله امال الاجانب بيجوها ليييييييييييه
‏قال مدحت محمد
العين السخنة
لما نشوووووووف
المهم
من حيث المناظر الطبيعية فى مصر
ففعلا بلدنا فيها اجمل اماكن سياحية طبيعية فى العالم خاصة البحر الاحمر
حاجة فوق الخيال
تحياتى وتقديرى
‏قال Eldebug
واللهى بما انى فى الحالات اللى زى دى بتقمص دور المحقق كونان ...فانالقيت كام خيط كده ممكن يعرفونى انتوا كنتوا فين وهم كالتالى:
1- كان فى بحر وجبال يعنى اكيد كنتوا ناحية الشرق فى الخريطة طبعا ...سينا والحتت دى يعنى ...او ناحية الغرب مش مشكلتنا دلوقتى دى

2-فى الصورة الاولى كان علم مصر متعلق ...يبقى اكيد كنتوا فى مصر ودى مش عاوزة فقاقة يعنى...الجديد بقى ان كان متعلق جنبها علم ...وطبعا بذكاء شديد ....جداااااا...عرفت انه يبقى علم المحافظة
وبقالى ساعة بدور على المحافظة دى مش لاقيها

3- بقى وده الاهم اسم الهوتيل اللى انتى مصورة الصورة الاولى ادامه وبرضه بدور عليه بقالى ساعة على النت مش لاقيه

انتظرونا فى الحلقة القادمة بقى على اما اكون عرفت انتوا كنتوا فين

سؤال محيرنى:
س.فنادق ايه اللى كومبليت ...الصور يابنتى مفيهاش حد خااااااااااالص ... ده انا حاسس انكوا كنتوا فى فيلم رعب
بصراحة انا معرفش انتى كنتى فين بس يكفينى انى استمتعت قوى بالمناظر اللى انتى مصورها .... أمال بقى المنظر على الطبيعه يبقى ازاى بقى
تحياتى ليكى
سلام
انا عارف بس مش حنطق ولا اتكلم بس الصور روعه بجد
اتمنى انك تكونى قضيتى يوم سعيد انتى وابى
‏قال dina
عمااااااااااار يا مصر
و بلدى بحبها كل حتة فى بلدى
و الله العظيم انا لسانى تعب من كتر ما قلت يا جدعان كل واحد يبدأ بنفسه يا جماعة فى حاجات صغيرة اوى لو عملناها بجد حتفرق
يا جماعة و النبى عشان صحتى انا و البنية الغلبانة صاحبة المدونة دى..كل واحد يخليه فى حاله و يعمل اللى يرضى ضميره و مالوش دعوة بجد دا حتى النظافة من الايمان يعنى
‏قال غير معرف…
أعتقد ياقطتنا ان ده
dome marina hotel
اللي في العين السخنه
دورت و لاقيت انه ممكن يكون هو
ها فوزنا و لا لأ؟؟
‏قال Empress appy
طيب اقول انا وتدفعي كام ههههههه فعلا بلدنا هايله بس اللى يشزفها من غير غباء وغل وحقد والنظافه اصلا من الايمان مش عارفه اللى بيبهدلوها مؤمنين ازاي شوفتنى وانا بلم المناديل من على البيتش لما طارت هههههه
ولا اجدع زبال ههههههه لا بجد راحه نفسيه هايله على البيتش وكمان فيه مشاريع جديده تحفه شكلى هقول على المكان ههههههههه
‏قال Empress appy
الله مش قولنا مفيش دخول النت والله الواد هيطلقنى من قبل ما نتجوز هو مش قال متدخليش اليومين دول وارتاحي ابعته لكي يعنى بطلى تنادي عليا اصل انتى عارفه ههههههههههههه
هبعته لكي على بلوج سبوت والله لاقوله انتي اللي ماسكع فيه بقى وانتى حره يجي يقف لكي على باب المدونه ولا يقول الفرق بينى وبينك ههههه للناس اللى عندهم عمي الوان فى تفرقتنا من بعض مش شايفين انتى قصيره اوزعه وانا نخله ازاي اقول لك ننزل صورنا ونقول طلع 1000 فرق والله هيبقوا اكتر هههههههههههههههه
‏قال Desert cat
اجندا حمرا
حبيبتى اجندة اليوم فعلا كان جميل جدا
الجو هايل والمناظر روعة
انا كنت بفتكر لما كل واحد بيكون جاية له ضيوف بيروق بيته وينضفه فى انتظارهم واحنا بنروح نشوه الشواطئ والجناين والاماكن الجميلة اللى فى بلدنا طيب ما كل واحد يعتبر انه جاى ضيف بعد شوية ويحافظ على نظافة المكان اللى هو قاعد فيه وساعتها هنقدر نستمتع جدا بجمال بلدنا حتى لو كان شط ترعة مش بلاج
نورتينى يا قلبى ودمتى بكل حب
‏قال Desert cat
رئـــــيسـة حزب الأحلام
لو اعرف كنت جيت اخدتك من البيت كمان
تتعوض فى المرة الجاية يا جميل
كل سنة وانتى بكل بخير
‏قال بنوته مصرية
الله يا نونو الصور جميلة ربنا يسعدكم كمان وكمان

وكل سنه وانتي طيبه يا قمر

والله لو كنت اعرف كنت جيت ليكي انا ونور بنتي نقولك هابي بيرزدي

ملحوقه ان شاء الله

المكان يا العين السخنه يا راس سد

مشوف اجابتي صح ولا لاء

كل سنه وانتم طيبين

تحياتي
رودي
‏قال Desert cat
dr_mody4ever رصيف نمرة خمسة
والله اى مكان فى بلدنا مهما كان بسيط بحس انه جميل بس المهم يبقى نضيف
تعرف يا دكتور انا لما بدخل اماكن شعبية بحس ليها بريحة مميزة كلها اصالة وبحس فيها بالزمن الجميل
ربنا يبارك فى بلدنا وياخد حكومتها
قول يارب يا دكتور علشان نروح مارينا سوا ما اروحش لوحدى
هههههههههههه
تحياتى
‏قال Desert cat
اميره الصعيد
لاء مش الغردقة يا رانيا
محمود عارف
ههههههههههه
‏قال Desert cat
Happy Hope
انا لما بشوف المنظر ده بتخنق وتلاقينى ماسكة فى خناق اللى بيعمل كدا حتى لو مش عارفاه
افضل اقوله ده منظر غير حضارى من فضلك شيل الورقه وارميها الباسكت
ودائما تبوء محاولاتى بالفشل
بس اهو ادينا بنحاول لعل وعسى ربنا يهديهم
تحياتى ليكى يا جميلة
‏قال Tamer Nabil Moussa
اماكن جميلة

وتصوير رائع


اهم حاجة ان اليوم كان جميل

وانكم قضيتة يوم حلو


المكان مش خقول بقى

الا لما اعرف مين هيقول

واعرف منة ههههههه

تحياتى
‏قال Desert cat
كفايـة طيبـة
مش راس سدر يا مونى
ان شاء الله نقضى اوقات احلى لما تيجى بالسلامة يا قمرى
تحياتى
‏قال Desert cat
هوندا
ااااااه
منظر الغروب ده ساحر بجد
والله زوقك عالى فعلا يا هوندا
تحياتى ليكى يا جميلة
‏قال Desert cat
مدحت محمد
برافو عليك
كسبت معانا جايزة وهى لما تروح اى مكان فيه مناظر طبيعية تصورها وتنشرها لنا فى البلوج بتاعك ويبقى كدا بنتفرج كلنا على معالم مصر من خلال عيونا احنا وفى نفس الوقت بنعرف عليها غيرنا
ايدك بقى على 2 جنيه فكه
ههههههههه
تحياتى
‏قال micheal
يا رب نقدر قيمه هذا الجمال و نحافظ عليه
تحياتي
‏قال وجهة نظري
طبعا دي العين السخنه، والمنطقه دي روعه في جمالها، وسبحان الله جبال حجر بس مناظرها عجب بجد، وكفايه الهدوء وقت الغروب

تتخيلي كمان الصحراء إلي هيا رمل وحجاره بس ليها جمال خلاب، وش ممكن تلاقي الجمال دا في أي حتة تانيه

كل واحد مش بس لازم يحافظ علي النظافه في الأماكن السياحية بس، النظافه بتبداء من جوه البيت وقدام البيت والشارع إلي ساكنين فيه والشوارع كلها، وفي السينما والمول والنادي وكل حاجه. لازم الواحد يعرف غن الورقه إلي بتترمي في أي حته ولو صحره ليها تأثير ضار علي البيئه والبلد كلها، لو مكانش النهارده حيبقي بعد 10 والا 20 سنه

تحياتي ليكي، وأرجو إنك تكوني إستمتعتي بالطبيعه
‏قال Desert cat
Eldebug
خلاص بقى متتعبش نفسك
الاجابة وصلت
الفنادق كانت كومبليت اللى سالنا فيها
وبعدين انا كنت بختار الاماكان اللى مفيهاش ناس
هصور الناس ليه انا عايزه اماكن مش بشر
دور براحتك يا سيادة المحقق
ونحن فى الانتظار بس مش تغش من الاجابات الصحيحة
تحياتى
‏قال Desert cat
تــــــــــ(حـنة)ـــــــر
المنظر على الطبيعة اجمل من الصور طبعا بكتير
وسعيدة جدا انكم استمتعتى بالصور
محبتى يا جميلة
‏قال Desert cat
رئيس جمهوريه نفسى
انت لو اتكلمت اغتالك
انت بالذات غير مسموح لك بالحديث فى هذا الموضوع
‏قال Desert cat
dina
الهى ربنا يكرمك ويخليكى يا دينا انتى اللى حاسه بيا
الواحد يا اختى لسانه ورم من المهاتية فى الكلام ده
ومحدش بيسمع الكلام
مش بيحبوا يرموا الورق غير فى الشارع
عايزين نحافظ على بلدنا شوية بقى
محبتى ليكى يا قمراية
‏قال Desert cat
اجندا حمرا
طبعا فوزتى باكتساح
هى فعلا العين السخنة
يلسم لى عقلك وتفكيرك
محبتى يا قمراية
‏قال Desert cat
appy
مش ينفع يا هانم الناس الىل كانت موجودة تقول ولا تتصلى بصديق لان برضه الاصدقاء اللى اتصلوا عارفين
احنا محتاجين الجمهور
هههههههههههه
انتى منظرك وانتى بتلمى المناديل من على البيتش كان محتاجه صورة كبيييييييرة وتتحط فى ميدان التحرير علشان كل واحد يفكر يرمى حاجه فى الارض نقوله روح شوف ابى فى ميدان المعركة قصدى التحرير يعنى وتبقى قدوة بقى لكل واحد تسول له نفسه يشوه منظر البلد باى وسيلة من الوسائل
‏قال Desert cat
appy
ابعتيه يا حبيبتى ده يشرف ويانس وينورالناس اللى عندها عمى الوان دى خيالها مريض بيهيأ لها حاجات غريبة اوى بصراحة
ده ناقص يتقال كل الناس اللى عاملة مدونات تبقى انا وطول النهار اكتب مواضيع وارد على نفسى بقى وحاجات كدا
ربنا يشفى
الحمد لله ان فى ناس عارفانا شخصيا احنا الاتنين
نفضى يا حبى ده اللى بيتقال ده كله هراء
‏قال Desert cat
بنوته مصرية
يا حبيبتى احنا لسه فى شهر 4 يعنى ممكن تشرفينى فى اى وقت وكمان نفسى اتعرف على الانسة نور خطيبة اخويا وحبيبى سووو
والمكان يا حبيبتى يبقى العين السخنة
كل سنة وانتى ونور وكل اسرتك باسعد حال
‏قال almasry
تاج من المصـــــــرى لأجمل قطه اتمنى تجاوبى عليه بالمناسبه الصوره جميله




تخيل أنك أصبحت رئيسا للجمهوريه :
1_أول خمسة قرارات ستأخذها .
2-من هم أول خمسة وزراء ستعزلهم فور توليك مقاليد الحكم.
3_ما هى أول خمسة أماكن ستزورها عندما تصبح رئيسا للجمهوريه.
4_كون جمهوريه لنفسك ومن وزير الداخليه ومن وزير الخارجيه ومن وزير العدل ومن وزير التربيه والتعليم ومن وزير التعليم العالى (سواء من أصدقائك أو أقاربك).
5_من هم أول خمسة رؤساء ستقطع معهم العلاقات الدبلماسيه.
6_من هم أول خمسة دول ستنول عطفك واهتمامك ومساعدتك "باعتبارك دوله غنيه"
‏قال Desert cat
micheal
ان شاء اله يا مايكل
‏قال Desert cat
Tamer Nabil
اليوم كان جميل فعلا يا تامر والجو كان رائع
المكان خلاص اجندة ومدحت عرفوه
هههههههه
تحياتى
‏قال Desert cat
وجهة نظري
الجايزة رقم 3 معانا وحضرتك تصور لنا الاماكن اللى عندك الطبيعية وتوريهالنا وادينا بنتعرف على طبيعة البلاد التانية والطبيعى يكسب على راى الفيلسوفة الكبيرة يسرا
بالظبط كدا استاذنا النظافة بتبتدأ من داخل البيت
بلدنا بصحاريها بشوارعها بالامكان الساحلية كل حاجه فيها جميلة جدا لبس محتاجة مننا اهتمام شوية
احترامى وتقديرى
‏قال Desert cat
almasry
تاااااااايج وايه الاسئلة اللى تودى على لاظوغلى طوالى دى
تحاليلى يامامى
انا مش اقدر ارفض لك طلب ياباشا علشان كدا هجاوبه بس اوعدنى تجهز لى محامى من النهارده لاء دستة محامين
تحياتى
‏قال Desert cat
حسبي الله ونعم الوكيل
تصدقى اسم المدونة بتاعتك فيه كريزما خاصه كدا
ههههههههههه
نورتى
‏قال فرنسا هانم
جبل عتاقه وروعته
شواطىء السويس وجمالها
العين السخنه ومناظرها الجميله
وانا اقول بلدنا نورت ليه ؟
دا ايه الحلاوة دى
لا احلى و اخر روقان
خروجه مووووووز
مووووووز
مووووووز
الحمد لله ان اليوم كان جميل

اما بالنسبة للملاية الكاروهات
دا بسبب الشواطئ المجانية
احنا شعب مش بيجى الا بالعين الحمرا
و الله لو بقى الفرد مثلا ب 5 جنية
اراهن ان المحشى حينقرض
و الحلل حتختفى
لان اللى حيدفع 5 جنية للفرد مش حيستخسر يعمل سندوتشات

انا لما بروح البحر انا من اسكندرية
بشترى سندوتشات من عند جاد
مع ان البحر قريب من بيتى
حتى السندوتشات ولدتى مش بتعملها
بنشتريها
يا ريت الناس تقدر ان المنظر فى الاول و الاخر راجع لهم

موضوعك جميل
و بطلى رغى فى الموبايل
سلامى ليكى
‏قال فاتيما
يا ستى تعيشو و تتفسحوا و تنبسطوا و تشموا النسيم
و كلامك فيه كل الحقيقة ...إحنا بنبهدل الأماكن الساحرة دى طبقا لنظرية الفوضى و بقايا الهجمية المترسبة فى اعماق المصريين عموما عشان كدا فى أغلب الدول العربية طالع عليهم سمعة موش لطيفة خالص و دا ناتج عن العبثية و الهرجلة اللى بتعامل بيها المواطن المصرى عموما خارج وطنه فما بالك بداخلها
و ربنا يحرس البلد دى بجد عشان أهلها نصهم موش قادر و النص التانى موش عايز
تحياتى يا قطتى الحلوة
‏قال Zika
حلوه الصور والله
وبالذات الصور اللي في الاخر .
‏قال Heart Beat
Dear Desert Cat

كل ربيع و انت بألف خير

و تتفسحي كده كل سنة في انحاء مصر المختلفة و تصوري لنا الاماكن الجميلة دي

مرة برضه شوفت موقع بيتلكم عن الاماكن الجميلة في مصر برضه اتكلم عن المناطق بتاعت الملايات الكاروهات و حلل المحشي

بس الهدف منه انه يعرفنا على الاماكن الحلوة اللي في ناس مش عارفينها مع انها جنبهم ليل نهار

كان فيه للحديقة اليابانية و لا باينها الصينية مش فاكره اوي المهم ان فيها اماكن حلوة و الصور كانت رائعة فعلا

عارفه في ناس مهما قلتي لهم ان مصر فيها اماكن جميلة برضه مش هايغيروا رأيهم لان مخهم قفل على كده و ماعندهمش استعداد يشوفوا حاجه تانية غير السلبيات و بس

و مع المناشدات بتجنب النوعية دي من السلوكيات موجودة من زمان الا انها مستمرة لغاية دلوقتي و كأن الاجيال المختلفة بتتوراثها عن ابائهم و هكذا من غير نهاية

اثار مصر اللي بره دي انا بدأت احس اني مش هاشوفها على ارض مصر تاني خلاص

لان متابعتنا لمطالبنا بإسترجاع الاثار دي ضعيفة جدا و التمثيل سيء في المطالبة دي

مش معقول تبقى الدنيا كلها عارفه ان دي اثار مصرية يعني ملك لمصر و برضه مش قادرين اننا نرجعها مع انها حقنا

لدرجة اني بدأت افكر ان ممكن اللي بالي بالك بيأجروا الاثار دي للبلاد اياها و بياخدوا الفلوس في كروشهم

يعني اودام البيت الابيض موجود مسلة مصرية بيقول عليها هناك ابرة كليوباترا و مع ذلك مارجعنهاش تاني هنا

يعني المسلة دي علم من اعلام واشنطن و اما تشوفيها في الشارع من بعيد تعرفي ان الناصية الجاية البيت الابيض و برضه ماطلبناش بيها حتى

قلت يمكن مش بتاعتنا بقى و هم اللي بنوها هناك

لكن ارجع و اقول ان تمثيلنا في مطالبتنا بحقوقنا في استرجاع الاثار دي ضعيف جدا

المهم بقى انك تكوني استمتعتي برحلتك الجميلة سواء مع الصحبة الحلوة او الاماكن الجميلة دي

ممممطيب ممكن اقول ان المكان ده في العين السخنة

كل سنة و انتي طيبة
‏قال الربان
تحياتي

اولا كل سنة و انتم جميعا طيبين...

ثانيا: متهيألي ، و الله أعلم ، ان المنظر و الفندق في العين السخنة.

ثالثا... اضم صوتي الي صوت حضرتك بأننا يجب ان نحافظ علي نظافة بلدنا
و جمالها.

أخيرا...اشكرك انك أشركتينا معاك في
رؤية جمال الطبيعة...المصحوبة بتعليقاتك المرحة الجميلة


تحياتي و عقبال المرة القادمة ان شاء الله.

دمت بالف خير
‏قال أسير الجراح
الصور بجد اكتر من رائعة تحياتى وتقديرى لصاحبة التصميم الجميل والكلام اللى اكثر من رائع تحياتى اليكى
(اسير الجراح)
‏قال همس الاحباب
هههههههههه
كل سنة وانتو طيبين وشم نسيم سعيد
وطبعا بلدنا جميلة قوى
وفيها اماكن خلابة
المهم مش كان يوم جميل
وايه رايك فى المحشى كان جميل
ههههههه
0900 مش بيرد
هو انتو كنتم فين
بلاش يا ستى القلل بتاعت ابى جامدة
وخالتى فرنسا قامت بالواجب
هههه
تحياتى
‏قال rovy
اول مره ازورك الاقيكى بتتفسحى .. على كل حال كل سنه وانتى طيبه
الصور جميله وكلامك اجمل
ياريت يوصل لكل واحد مش واخد باله انه بحسن نيه او جهل بيشوه اجمل بلاد العالم .
اما عن سؤالك بيتهيألى انك كنتى فى العين السخنه ولو ان برضه فيه كام صوره فكرونى بالغردقه بس الارجح العين السخنه . دمتى بخير
خالص تقديرى وتحياتى

rovy
‏قال Desert cat
فرنسا هانم
بلدكو منورة باهلها يا جميل
السويس فعلا بلد جميلة
والشواطئ عندو هايلة
ايه رايك بقى تيجى نبدل نعيش مكان بعض يومين بس
هههههههه
نورتينى
منك لله يا قطة..فتحتى نفسى على المصيف
مع أنى مش باقدر أصيف غير أواخر الصيف علشان شغلى
إيه المناظر التحفة دى
دا انتى طلعتى فنانة كبيرة
إدعيلى بقى أصيف بدرى السنة دى
سلام يا جميل
‏قال Desert cat
مواطن مصرى نايم
هههههههههههههه
بص يا اسلام احنا اى مكان غريب بنحترمه وبنحافظ عليه لان فى قوانين هناك بتطبق على الوزير والغفير
انما بنيجى عند بلدنا ونتفنن فى الاذية
ان شاء الله صيف سعيد عليك ياباشا
كل سنة وانت بخير
‏قال Desert cat
فاتيما
اللهم امين يا ام يوسف بنا يحفظ بلدنا ويرحمها من اللى بيشوهها سواء من الناس الكبااااار
ولا مننا احنا
تحياتى يا جيملة
‏قال Desert cat
Zika
ميرسى يا زيكا
نورت
‏قال Desert cat
Heart Beat
يا قلبى بلدنا انا بحس فى شوارعها بالفة وبحس ان ليها ريحة مميزة فى اى مكان فى الجمهورية عمرى ما حسيت انى بعيدة وممكن اروح اى مكان فيها لوحدى والف براحتى وبحب اوى استكشف الاماكن ولو حاجه لفتت انتباهى لازم اصورها مش عارفه ليه ... بالنسبة للمسلة احنا منقدرش نقول حتى دى بتاعتنا دى عند ماما امريكا وانتى عارفه ماما بقى راس خالتى نفرتيتى كنا بنقول عايزينها تادية واجب ... يعنى علشان يبقى اسمنا طالبنا بيها وخلاص حاجه كدا تحصيل حاصل
البلد فعلا العين السخنة
واليوم كان رائع ... وان شاء الله لما تيجى مصر بالسلامة نعمل يوم لاى مكان انا وانتى واجندة وابى وكل صحبنا
نورتينى يا صاحبة اجمل عقل فى الدنيا
محبتى
‏قال Desert cat
الربان
فعلا يا فندم المكان العين السخنة
انا اكتر ما لفت انتباهى الجبال
منظرها بديع حقيقى
دمت بكل خير
وكل عام وحضرتك بالف خير
احترامى وتقديرى
‏قال Mafrousa
بلدنا جميله يا قطة و جميله جدا كمان
بس انتى عارفه احنا عاملين زى العيله اللى ساكنه فى بيت جميل و شيك و متكلف و اهل البيت مش بيحافظوا على نضافته ..فالزوار يالتالى همه كمان مش بيحافظوا...فالبيت بيبقى مزبله بعيد عنك....
‏قال Desert cat
أسير الجراح
اشكرك جدا اسير الحزن
نورت البلوج
تحياتى
‏قال Desert cat
همس الاحباب
محشى يا خاااااااااالد
يبقى انا بتكلم على حلل المحشى تقولى المحشى كان حلو
حد يشيله من قدامى
‏قال Desert cat
rovy
هى فعلا العين السخنة
اشكرك جدا
تحياتى
‏قال Desert cat
واحد من البلد دى
اى خدمة يا باشا انا قولت لازم اغيظك علشان تروح تصيف تنفض لكل حاجه وتترفد من الشغل
هههههههههههه
بهزر طبعا
انت حاول تاخد اجازة سريعه وتروح تصيف وابقى قولى مكانك فين بالظبط علشان ابعتلك القطط بتاعتى
تحياتى
‏قال Desert cat
واحدة مفروسة
بالظبط كدا ده اللى بيحصل
احنا محتاجين شوية وعى علشان نقدر
نحافظ على منظر بلدنا
تحياتى
‏قال Asmaa mahaba
يا جامد
معلش بقالى فتره مبدخلش بس دخلت اهو
تسلم ايدك
تحياتى ليكى سومه_87
‏قال Desert cat
somaa mahaba
جيتى نورتينى يا قمر
تحياتى
‏قال Dr. Diaa Elnaggar
على رأي رأفت الهجان في نهاية المسلسل: 0


بلدنا حلوة أوي يا سيد عادل، صدقوني يا جماعة، بلدنا حلوة وتستحق !!!!!0


وهي فعلا حلوة وتستحق !!!! 0

عميق تحيتي وخالص مودتي

المشاركات الشائعة