اتبــرع ولـــو بكوبايـــة ميـــة


من امبارح عايشة فى صحراء ليست جرداء فيها بيوت وبنى ادمين ووسائل مواصلات ومفيهاش ماء
المية مقطوعة من 36 ساعه مش من بيتنا ولا من شارعنا ولا من منطقتنا إنما من البلد كلها بضواحيها الكرام ... والله انا ساكنة فى مدينة محترمة ومعروف انها اكبر مدينة على مستوى المحافظة من حيث المساحة وعدد السكان كمان ... يبقى ازاى عدد السكان فى المساحة الكبيرة دى يتقطع عنهم المية بقى .. امال لو ساكنة فى نجع كنتوا عملتوا فينا ايه ؟؟؟؟... طيب مش المفروض قبل مايقطعوها السادة المسؤلين عن الميه وما شابهها من وسائل الصرف الصحى الفترة دى كلها يدولنا خبر حتى يبعتوا لنا انذار على يد محضر علشان نعمل حسابنا ... طيب اعمل ايه بقى دلوقتى انا متعودة انى قبل ما انزل من البيت الصبح لازم اخد شاور... وبعد ما ارجع البيت بالليل شرحه .. من امبارح الصبح ما اخدتش الشاور بتاعى ... حاسة انى قرفانة من نفسى ومن العالم كله واللى بيدخل يقولى سلامو عليكو بكون عايزه اضربه ... امبارح طول اليوم مقضياها مية معدنية فى الشغل ... روحت البيت لاقيت شوية صغيرين عملت بيهم شاى وقعدت طول الليل اغنى ظلموه .... الساعه 4 الفجر هموت من العطش ومش لاقيت عندنا اى سوائل غير اللبن .. وانا اتفطمت من زمان ... صحيت الصبح لاقيت ازازة مية فى المطبخ غسلت وشى منها ومش عرفت اشرب حاجه .. طيب فين بقى البهوات اللى مسؤلين علي الشعب وعمال يتحفونا كل شوية بتحسين الخدمات هى فين بقى الخدمات ؟؟؟ هو مش المفروض اننا فى مصر يعنى السد العالى و نهر النيل .. هو اينعم مقلوب فيه باكبورتات وراضيين .... وبيرموا فيه زبالة وحمير ميتة وشاربين وطافحين وساكتين .... حتى ده كمان مستخسرينه فينا كمان ... يعنى لا اكل نضيف ولا هوا نضيف ولا مية نضيفه وكمان مش لاقيينها .... طيب انا فلوسى خلصت بقى ومعدش معايا فلوس اشترى مية معدنية كل واحد يدخل البلوج يجيب لى فى ايده كوباية مية .. ينوبكو ثواب اصل انا خلاص جالى جفاف

تعليقات

احنا عندنا لو كانوا قطعوها احسن من اللى حصل
الميه كان لونها لون الشاى
او افتح شوية
طوووووووول اليوم
و انا صورت المنظر بتاع المية عشان انزله بوست
بس مكنتش فاضى
الكلام ده من اربع ايام
امبارح لقيت البيت بيتك جايب منظر زى اللى انا مصورة
يعنى لو كنت نزلت البوست كان حيبقى سبق صحفى
ههههههههههههههه
تحياتى ليكى
يدوكوا خبر؟

انتي بتحلمي فاكرة نفسك في فرنسا؟

انتي مين انت وكل جيرانك عشان الحاكومة بجلاجة قدرها تستعناكوا وتديكوا خبر هم جايين لكوا على العشا؟

بصي يا بنتي انت حطيتيها في مدونتك غنوة حكمة: ولا غنا ولا سيط دولا جنس غويط وكتابنا يبان من عنوانه بانوا ايوة بااااااانواااا

الا دي
قال عايزة الحكومة تعبرها قال

اسم محافظتك ايه والمدينة وانا اعمل لك هيصة وبوليكة وظمبليطة في الصالون

وياريت تاخدي لنا كام صورة بالموبايل كده اذا كان فيه اي مظاهر للناس العشطانة

ناس بيملوا من حتة مش قد كده او اي حاجة

تفاصيل تفاصيل

ماهو امثالنا يا حبيبتي من الغوغاء والدهماء اللي حكومة الاكصلانصات مش بتستعناهم
مالهمش غير انهم يفتحوا الشباك ويرقعوا بالصوت
‏قال Tamer Nabil Moussa
لابقى


احنا قولنا وعدنا من اربع خمس ايام

وقولنا ان المية هتقطع

عشان اعمال صيانة

يس انتى كنتى نايمة

لامحدش قال ليكى

او افتكرتى ان الموضوع هزار
يعنى احنا عملنا اللى علينا

والغلط عليكى

تحياتى
‏قال غير معرف…
ابصتي يا حاجة اهو زعيمة التهييس بجلالة قدرها الاخت المبجلة نوارة نجم هتسيحلك وتفضحك وتقول عليكي مش بتستحمي علشان معندكيش مية :p
‏قال wade7
طب مش عيب قطة زيك تقول بكابورتات؟ بقى بعد الشاور الصبح و الشاور بلليل .. تقوليلي بكابورتات!! بكابورتات يا قطة هههههه كدابين قوي آل شاور الصبح و شاور بلليل. هما قطعوا الميه عليكو من شوية ماهو من كدبكوا. انا مش هديلك كوباية ميه من عندي و ابقي روحي البكابورتات استحمي فيها.آل شاور آل ..
‏قال Eldebug
ههههههههههههههههههههههه
حلوة اوى حكاية خديلنا كام صورة اذا كان اى مظاهر للناس العطشانة

الا احنا ليه مش بنجرب نروح على طول للمسئول المباشر ...يعنى لو المياه قطعت نروح لبتوع المياه ولو الكهربا قطعت نتصل بشركة الكهربا ...ولا هيه العملية عملية صوت عالى ودى ناس تخاف ماتختشيش

معلش ممكن تجربى تبعتى باهبهاكى انتى وكمان كام واحد ولا واحدة من جيرانك لبتوع المياة عندكم جايز يعرفوا يحلوا الموضوع وياريت تبقى تقوليلنا عملوا ايه
‏قال صحفية روشة
والله موضوع الميه ده اكتر من محافظة بتشتكى منه
مش انتى لوحدك ومش عارفين ايه السبب يمكن فعلا بيصلحو السباكه ولا يمكن الكارثة اللى بيحذرونا منها من سنين حصلت وان حصة الفرد فى ميه النيل قلت
انا عن نفسى متبعة حمله ترشيد المياه
____________________________
اول مرة هطلب زيارة محتاجه جدا جدا اجابات على البوست الاخير بمدونتى
شكرا
بس كدة انتى تأمرى يا قطقوطة
انا بعتلك جركن مية بحاله مع التعليق

بس انتى متطلبة اوى يا قطة
انتى عايزة الحكومة تبلغكوا ؟؟؟؟؟؟
ويحرموكوا من المفجأة دى
معقول ده كلام يا قطة

ربنا يكون فى عونكم

تحياتى ليكى
اختك خيخة
‏قال Heart Beat
Dear Desert cat

يا فندم كوباية ميه واحدة بس

احنا نخلي العيال اللي بيجوا عندك هنا و يطولوا لسانهم ينزلوا ينضفوا النيل من كل اللي قولتي عليه ده في ظرف ساعة واحدة بس

و بعدين تلاقي ميه نضيفة من النيل مباشرة لحنفية سيادتكم في البيت و لا تزعلي نفسك ابدا

و اهو يبقوا عملوا حاجه كويسه في حياتهم
‏قال عبده الرايق
يافندم انتى تأمرى
كوبايه كوبايتين
ولو ان الداخله بتاعتك بتاعه التبرع عامله زى الداخله بتاعتى اللى مش عجابتك وقولتى انا مش عجبانى الداخله دى
يلا حصل خير
لو عندكم مطار فى المدينه قوليلى وانا ابعت الهليوكبتر الخاصه بتاعتى بمعونه ميه من الرايق..هو انا اقدر انسى ال خمسه جند اللى اتبرعتى بيهم للعبد لله
مأساه والله
احنا بقى الكهربا تشتغل الميا تطع والعكس
يعنى زى ما تقولى مستخسرين فينا الاتنين معا بعض
‏قال Mafrousa
يا عينى يا قطه...و انا بقول برضه مشمشمه ريحه مش ظريفه اتاريها من قلة الحمى يا حبيبتى.......يابنتى انتى تؤمورى قوليلى انتى ساكنه فين و انا امدلك الخرطوم.. انتى جيتى فى جمل....
يعنى ده انا عنيا ليكى
‏قال karakib
انت ساكنه فين ؟
‏قال فرنسا هانم
لو ميه السويس تنفع او صالحه للاستخدام الادمى
كنت شلت على دماغى جركن مخصوص وجبتهولك
‏قال Asmaa mahaba
امال تقولى ايه فى االى قدامه النيل بجلاله قدره والميه تقطع ميعرفش يشرب يعنى تشوفى الميه ومتشربيش
ربنا يفرجها عليكى وعلينا
تحياتى ليكى سومه_87
‏قال د/اجدع بنوته
ياعينىىىىىىى

لا ده انا امليلك العربيه ميه واجيلك فوررم

ربنا يكون ف عونكم

وتجيلكم الميه بسورعه

ليكون الحركه دى معموله

علشان احد رجال الاعمال الكبار

واحد المسئومين

فاتح شركة ميه معدنيه جديده

وعايزين يمشوا كل الميه اللى ف السوق

علشان ينزل هو بتقله بقى

ههههههههههههه
‏قال nody
لا دا انتى بقيتى غريبه بجد
عاوزه يعرفوكى انهم ها يقطعوا الميه ؟
شويه وشيه تقولى يجيبوا لكى عربيات ميه علشان تكفى بيها احتياجاتك
وكمان بقيتى بتشربى ميه معدنيه
والله عال
ادعى لحسنى وحكومته شربوكى الغالى
شعب يخاف ما يختشيش
‏قال وجهة نظري
مش عارف أقولك إية بجد، الشعب دا بيبص لحاجات غريبة... مية وشاور.... إلا إية شاور دي لا مؤاخذة؟؟

إحمدي ربنا إنتوا بقالكم يومين بس، دا في مدينة نصر في القاهرة قعدت مقطوعة شهر، والناس كانوا بيستحموا عند قرايبهم

بس برضة أرجع وأشدد علي إن مش كل حاجة حموم ومية وعيش ومواصلات تعليم وصحة وأسعار الحاجات إلي بقت نار وبس، في مشاكل تانية في البلد أهم من الكلام الفارغ دا كلة... أهم حاجة أمن مصر، مش مهم الشعب المصري كله في ستين داهية، المهم أمن مصر
‏قال ftafeet
ياخرااااااابى ربنا يكون فى عنكوا يانانا
بجد
ادايقت اوى عشانكو والله
معلش استحملى ابعتلك خرطوم ميه من عندنا


نوناااا
صباح الفل يا قطة والله ليكى وحشة
معلش بقالى فترة مزرتكيش بس والله مفروم فى الشغل
انتى عارفة واحد ذيى بيقبض 1500 جنية
فى اليوم لازم يتعب شوية

ولا يهمك من موضوع المية ساعة زمن وتلاقى خرطوم مية معدنية اوله من عندنا فى اسكندرية واخرة عندك
احنا عندنا كام قطة يعنى
وبعدين بالنسبة للشور اللى كنتى بتخديه قوليلى بيتباع فين وانا اجيبلك واحد مكانه
انتى تأمرى بس
سلالالالالالالالالالالالالالالالالالام
‏قال Unknown
يعنى بالذمة مش فيه أولويات؟
يعنى الحكومة توفر لكم رغيف العيش ولا توفر لكم الشاور؟

( ملحوظة : هى شاور يعنى دش بس عيب نقول دش طبعا...مش كده صح؟ )
‏قال wanna b a physician
كان على عينى ياضنايا بس انا جيت امبارح لقيت الميه مقطوعه تصليحات
المتسفذ ؤفى موضوع قطع الميه ده انك تكلم الشركة تقولك الشركة الام
تكلمى الام تقولك بنتها
نفسى اطول ابوهم اقطم رقبته
بس يمكن عايزين يعودوكوا على المرحلة الجاية
قطرة ماء يوميا لكل مواطن
‏قال صوت من مصر
اجرى بسرعه ياواد يا حسين قب واغطس فى دقيقتين هاتلنا ميه هاتلنا ميه عايز\ين نشرب بصراحه الله يكون فى العون احساس صعب تخيلى بقه الواقع
مفروض السيد احمد نظيف بتاع الحكومة الاكترونية يشوف حل لمشكلة الميه دي ,يعني توصيل المياه اكترونيا للمنازل ,يعني الواحد يفتح الكمبيوتر فتتدفق المياه عبر الشبكة العنكبوتية ....

الواحد بس يقول ايه الحكومة بتاعتنا دي بتفكرني بواحد شحات وماسك موبيل

وعجبي

عموما ابقي ادعيلك ان الميه تحن عليكي وتجي

سلام يا قطة
انا جيت نورت البيت ومعايا طشت ... عشان تستحمي بيه
الدنيا بقت حر والحما مابقاش من الكماليات
وبعدينمين قالك ان اللي ماعندهمش مية هما اللي ساكنين في الضواحي بس
المشكلة عامة والمية بتقطع في كل حتة
ماتخافيش بكرة تيييجي
وابقي بعد كدة حوشي مية
‏قال الميكروباص
الحمد لله ان المياه انقطعت بس- انا مره رحت منيل شيحه و دخلت الجامع، رحت عشان أتوضأ وانا بتمضمض كنت هارجع اللي في بطني، لأن المياه هناك تقريا مخلوطه بالمجاري، بردو رحت محافظات تانيه ولقيت طعم المياه غريب جدا فيها، المهم ان المياه جت عندك و الحمد لله،
‏قال Desert cat
مواطن مصرى نايم
المية لونها لون الشاى
طيب ما كتر خيرهم بيوفروا عليكو الشاى انت تاخدها تسخنها وبالهنا والشفان على المستشفى تعمل غسيل معدة وترجع
طبعا بعد الشر عليك
بالنسبة للصورة انت مكنتش فاضى كنت ابعتها لى وانا انشرها
اهو البيت بيتك سبقنا عاجبك كدا
‏قال Desert cat
جبهة التهييس الشعبية
ما هو احنا لو بلد محترمة وبتعرف تحترم المواطن كانوا ادونا خبر
ده احنا لو خدامين عندهم مش هعملوا معانا كدا
اااااااه
انارقعت بالصوت لما صوتى اتنبح
انتى تلاقى الواحد ماشى زى الحيطة فاتح بؤه ومطلع لسانه بره
فما بالك بينا احنا الستات الفاتنات
‏قال Desert cat
Tamer Nabil
ايوا هما قالوا بس برضه قالوا ده سر اوعو حد يطلعوا بره
والناس علشان محترمين حافظوا على اسرار الحكومة ومطلعوهاش بره علشان كدا احنا حالتنا زفت دلوقتى
ما تجيب بؤ مية ينوبك ثواب
‏قال Desert cat
tamer.sala7
يا سيدى تفضحنى وتشرد لى وتشرد لمحافظتى كلها براحتها
بس المية تيجى واستحمى اصل تقريبا من غير ما توارة تشرد احنا ريحتنا طلعت وملت كل المحافظات ... انت مش شامم حاجه ؟
‏قال Desert cat
wade7
ههههههههههه
ما هو انا بهيس من شوية
ما هو من اللى انا فيه
شوية رقيقه وبتهرى زى البسكويت وشوية تانية بقلب على غضنفر وهكذا
‏قال Desert cat
Eldebug
يعنى تفتكر هتبقى حالتنا تصعب على الكلب الجربان ومش نتصل ولا نروح ولا نيجى
ده احنا كل لما نتصل يقولك عطل فى المواسير
تخيل عطل فى المواسير على اساس انها بتشتغل بزرار وبيدورا على الزرار ده فين
وبناء عليه فصلوها علينا جمعاااااء
يا فندم والله احنا مش جهله اوى كدا علشان منتصلش ولا نروح لهم حتى
بس نقعد نشتكى
الشكوى لغير الله مذله
‏قال Desert cat
صحفية روشة
طيب ما هما مش رشدوا المية دول قطعوها خالص
‏قال Desert cat
بت خيخة وأى كلام
هى مفاجعة بشكل يا نوران
دى مفاجعه وفجعت مرارة بعيد عنك يا قلبى وعن السامعين
‏قال Desert cat
Heart Beat
حبيبة قلبى والله انا خايفة ينزلوا ينضفوا النيل تلاقى كل الناس ماشية تشتم فى نفسها
زى فيلم ارض النفاق كدا اصل ممكن السفالة تتسرب
تحياتى يا جميله
‏قال Desert cat
عبده الرايق
ما هو بص يا عبده باشا الدنيا يومان يوم لك ويوم عليك
انا اتريقت على دخلتك ربنا ردها لى بسرعه شكلك بركة جامدة اوى دعواتك كدا
الخمسة جند انا مش اتبرع تبيهم لسه لانك لسه مش جبت لى رقم التليفون
لما تجيبه هديلك الخمسة جند
‏قال Desert cat
تــــايه ومش تـــايه
ده ايه الطمع ده انت عايز الاتنين يشتغلوا مع بعض
لالالالا
ده انتوا شعب نمرود بصحيح
يابنى احنا فى بلد بتتفنن فى اهانة المواطنين وذلهم وحبس انفاسهم
تحياتى
‏قال Desert cat
واحدة مفروسة
هى الريحة لحقت توصل عندكو
يا فضيحتنا يا لهوووووى
انا ساكنة فى دولة الشرقية الشقيق
هينفع الخرطوم ولا اجى لك انا بنفسى واستحملى الريحة بقى
‏قال Desert cat
karakib
انا ساكنة فى دولة الشرقية
اللى جنب ولاية تكساس على طول
‏قال Desert cat
فرنسا هانم
تسلمى لى ويخليكى ليا يارب
معلشى بقى استحمل انا
‏قال Desert cat
somaa mahaba
خدى بعضك وانزلى اتدلعى على النيل واملى القلل ايوا اه
انتى قدامك نيل انا مش قدامى حتى نيله
‏قال Desert cat
د/اجدع بنوته
ميرسى يا دكتورة شايلينك لوقت عوزة يا جميل
‏قال Desert cat
nody_1987
اه شربونى مية معدنية لما خلصوا لى الميزانية
انا برضه بقول انى بنى ادمه معندهاش دم قال عايزة الحكومة تعبرنى وتقولى المية هتطع
‏قال Desert cat
وجهة نظري
انا فعلا سمعت عن موضوع مدينة نصر
ودلوقتى احنا وبعدين الدور على باقى المحافظات بقا ما هم بياخدونا واحدة وحادة وفى النهاية تتقطع على الجمهورية كلها مرة واحدة وموت يا شعب خلينا نخلص
طيب ما تكسب فيا ثواب وتبعت لى من عندك ازازة مية ومن قدم شئ بيداه التقاه
‏قال Desert cat
ftafeet
ابعتى لى انتى بس جركن مش خرطوم وانا هبوسك
‏قال Desert cat
حــدوتـــة
ربنا معاك ويوفقك
المهم انك بخير والحمد لله
وبعدين يكفينى الكلمتين الحلوين دول
الشاور ده يبقى دوا صداع
‏قال Desert cat
m5m
الحكومة توفر لنا اهو ده اللى ناقص كمان
الشاور ده يبقى كلمة ابيحة علشان كدا بقولها كتير
‏قال Desert cat
wanna b a physician
خلاص انا وانت ندور على حد يبعت لنا ازاة مية ونقسمها بالنص
‏قال Desert cat
صوت من مصر
انت داخل تعملى اعلانات
ليك يوم يا ظاااااااااالم
‏قال Desert cat
الفارس الملثم
ما هى فعلا دعواتك مستجابة
اصل المية جت
ههههههه
انا بعد كدا هبقى اتصل بيك لو حصل اى حاجه
‏قال الربان
تحياتي

كان لازم يذيعوا انه سيتم قطع المياه
في التليفزيون و الاذاعة....الا اذا كان
عطل طاريء...

لكن بالله المستعان... و يمكن ربنا يسهل
وتكون المياه رجعت لمجاريها اثناء تعليقي عند حضرتك...

تحياتي و تقديري
‏قال Desert cat
مفقوعة مرارتي من حماتــــــــــــي
والله افلعظيم انا ما جبت سيرة ضواجى ولا غيره
ما انا عارفه ان المشكلة عامة وميرسى يا حبيبتى على الطشت ده انا هدعى لك لبكره
‏قال Desert cat
لورنس العرب
الحمد لله المية جت فعلا واخدت شاور وشربت وعملت كل حاجه
ربنا يديمها نعمة ويحفظها من الزوال
‏قال الربان
هل صحيح عيد ميلادك يوم 25 ابريل؟
اذا كان كدا....ممكن اعمل تهنئة علي البلوج عندي؟

تحياتي
‏قال همس الاحباب
عادى يا قطة
بتحصل فى احسن العائلات
قصدى فى احسن الاماكن
الميه تقطع بالايام
وبعدين تيجى كانها مية مجارى
زمان كانوا بيقولوا فى المدارس الماء لا لون ولا طعم ورائحة له
دلوقتى بقاله لون وطعم ورائحة
انجاز الحكومة الذكية
وعامة لو الميه ابعتلك كرتونة مياه
وخدى شاور واشربى شاى براحتك
معدنية مش خسارة فيكى
تحياتى خالد
‏قال Desert cat
الربان
طيب حتى يذيعو فى البلد بلاش التلفزيو لان المشكلة عندنا فى المدينة وضواحيها
بس الحمد لله المية جت من ساع وزى الهباب
بنقول يمكن تتظبط
الحمد لله على كل حال
احترامى وتقديرى
‏قال Desert cat
الربان
اه والله العظيم انا فعلا عيد ميلادى يوم 25/4
ده شرف كبير وعظيم ليا ان حضرتك تعملى تهنئة على بلوجك
والله العظيم انا فى قمة سعادتى
ربنا ما يحرمنا منك اجمل اخ واحلى استاذ فى الدنيا
‏قال Desert cat
همس الاحباب
يالهوى يا خالد ربنا يخليك ليا
هو ده الكرم ولا بلاش
هى المية فعلا جت من ساعه زى ما بتوصف كدا
مصحوبة بلون وطعم وريحة
لو استمرت بقى هتضطر تبعت للاسف
بس ده مالوش دعوة بهدية يوم الجمعه ولا ايه
ههههههههههههههههه
‏قال Empress appy
يا نهار انتم عايشين بقالكوا 36 ساعه من غير ميه طيب تعالى بقى اقعدى معايا
يا بنتى دا انا مرة الميه اتقطعت 5 ساعات عندنا جبت نمرة المحطه الرئيسيه واتصلت وقلبت عليهم الدنيا فى القاهرة الجديدة وقولت له هفضحكم فى الجرايد قالى والله يا فندم البتاعه عطلانه الا بتاعت ايه مش فاهمه ما علينا وقالى كلها ساعه وهتيجى تانى هى اتصلحت بس على ما الميه تمشى فى المواسير وفعلا جت بس كانت ضعيفه بس حمدت ربنا
والله حوكمه متخله طيب فيه اصلاحات ماشى بس مش وقت متواصل ما بالليل
ربنا ياخدهم ولا حاسين بحاجه
‏قال Desert cat
appy
36 ساعه دى كان لحد امبارح بالليل
انما النهارده اليوم الثالث بس جت
وجت ايييييييييييه
مقولكيش
انا جايه لك
جهزى لى الاوضة بتاعتى
طبعا انتى عارفاها
ولو سمحتى مش تدخلى تلبسى فيها وتعملى مكياجك فيها
اصل انا خلاص احتلتها من اخر مرة يا ماما
ايه عندك اعتراض
بحسب يعنى كنت احتليت الشقة كلها واستفضتك انا
‏قال بحبك يامصر
انا من نفس المنطقه اللى فيها تايه ومش تايه
وفعلا عندنا الكهربا تشتغل يققطعوا الميه وسعات الاتنين بيقطعوا وبنقعد زيك كده فى الصحراء
‏قال Abo 7anf
معلش بقى على تاخير الرد علشان ظروف الامتحان الاتاجل
ومالوا
مفيش مايه
شعب طماع
فى بينيه تحتيه
مواسير مصديه
والمايه البتيجى اصلا مضره فبيحافظوا علينا فمنوعها
شفتى القلب الطيب
قلب كبير ولا لا
يلا عقبال الكهرباء مهى السلوك بتقع لوحدها
وبيقولوا عصر الطاقه النوويه
ومالوا
‏قال Desert cat
بحبك يامصر
طيب ما تيجى نقرب الصحارى من بعضها وانا ابعت لكو كهربا لما تتقطع وانتوا تبعتوا لى مية
وبكدا يبقى تبادل مصالح
‏قال Desert cat
Abo 7anf
المهم اخبار امتحناتك ايه
ابقى طمنا عليك
هما قلبهم كبير فعلا بيوفروا لنا شوية من الامراض اللى بتيجى لنا خلال المية
تحياتى
‏قال semsema
عارفة لو كان موضوع المياه المقطوعة عندكم دى اتعرف وعملوا عليه مشكلة فى التليفزيون واستضافوا اى مسئول كان هايقول ان العيب منكم المياة تمام ومش قاطعه بس حنفيات المحافظة كلها بايظة او كل اللى فى المحافظه ناسيوا يفتحوا المحابس
انتى اللى ظلماهم
تحياتى
السلام عليكم
موضوع المية دة كبير اوى انا حاسة ان انتى فى نفس المدينة بتاعتنا صح وتحياتى لكى
‏قال Desert cat
semsema
والله مش بعيد فعلا
ما هو كل حاجه دلوقتى اللى مسؤل عنها المواطن اللى هو اصلا مش لاقى وطن
تحياتى
‏قال Desert cat
رئـــــيسـة حزب الأحلام
طيب هى جت عندكو النهارده
لو جت عندكو النهارده
يبىقى احنا فعلا من محافظة واحده
يعن إنتى ما عجبكيش تعليقى على البوست اللى فات..وقعدتى تقوليلى(لملمة من السيبرات)..مش كلمة غريبة شوية..وإنتى فى البوست ده كاتبالى(باكبورتات)و(طافحين)..يعنى الحال من بعضه...بس أنا يا قطة عاوز أقولك إن أسلوبى ده اللى خلاه كده(كتابة الزجل)لأن الزجل أساسه الألفاظ(شديدة العامية)..وعموما يا ستى إتفضلى عندنا فى البلد التى لا تغيب عنها المياه....لأننا بصراحة..عندنا البحر..واللى زعلان يشرب منيييييييييين؟؟؟؟؟م البحر طبعا...والله صعبتى عليا جدا...بس برضه ألفاظك معبرة عن الموقف..شفتى بقى الموقف بيفرض على الإنسان الألفاظ إزاى؟؟تحياتى يا قطة
‏قال Desert cat
واحد من البلد دى
اوعى تكون زعلت
انا كنت بستفسر عن الكلمة بس
اصلى حسيت انها غريبة
عموما اان فهمت وجهة نظرك
واسفه جدا جدا لو حضرتك زعلان منى
والله مكانش قصدى اى حاجه
احترامى وتقديرى
طيب مش المفروض قبل مايقطعوها السادة المسؤلين عن الميه وما شابهها من وسائل الصرف الصحى الفترة دى كلها يدولنا علشان نعمل حسابنا

........

كام مفروض المفروض المسؤلين يعملوه؟؟

مفروض يقولوا قبل ما يزودوا فاتوره الكهربا
صح؟
وفاتورة التليفون
صح؟
واسعار السلع
صح؟
وتغيير الادوية
صح؟
وقفل الشوارع وتحويل مسار الاتجاه
والتفنن فى غلق فتحات الدوران فى الشوارع
والمطبات الفجائية الفولازية اللولبية

يوووووه

حاجات كتير اوى

بس معلش

خليها علينا

تعبانين وشقيانين
بينسوا

ربنا يعينهم
من عندنا
ويحطهم
عند هناك
هناك بعيد اوي

لما المية تقطع تانى
ابقى صلى صلاة الغيث

تحياتى لاجمل وارق قطة
‏قال Desert cat
كاميليا
يا كامى ياروح قلبى هما مش هبلغوان بالحاجات دى كلها لاننها بالنسبة لهم شئ لا اهمية
وهو حد يقدر ينطق مش كفاية مستحملينا فى عزبتهم
نورتينى يا جميلة
ياه حاجه صعبه قوي الله يكون في عونكو فضلنا ندور علي رغيف العيش ونسينا الميه يالا نصيبنا حكومه هنيه مهنيه الشعب
‏قال Desert cat
واحد بيدور علي قلبه
ماهو لازم نختار اختيار واحد بس
اما المية او العيش او الكهربا
مش حننهب يعنى
‏قال غير معرف…
ياكبدي يابنتي الميه كمان بيقطعوها ياخبر

الميه دي حياه النفوس زي ماوالدتي بتقول دايما

يعني لما الميه بتتقطع نفسيتي بتكون في الحضيض و فعلا بكون مش طايقه روحي و خصوصا في جو زي الجو العظيم بتاعنا اليومين دول الله يكون في عونك ياقطه و كويس ان الميه جت و يارب ماتقطع تاني و لو يعني حيعملوا صيانه يدوا خبر عشان الناس تعمل حسابها يعني الميه المعدنيه دي تمشي يوم اتنين بالكتير لكن مفيش احسن من ميه الحنفيه و هي نازله ترخ
:)))
‏قال Desert cat
اجندا حمرا
شوفتى يا قلبى لكى ان تتخيلى كم المعاناهة اللى انا كنت فيها وهى مقطوعة يدو مين خبر
يدونا احنا انتى عايزة المسؤلين الكبار ينزلوا لمستوانا ويعملوا كدا
هيهات

المشاركات الشائعة