بنحبك يا بلدنا .... حبينا

انا عارفه ان بلدنا ملهاش دعوة ... وملهاش ذنب ... امال الذنب ذنب مين ؟؟؟؟
ذنب المسؤلين ... هما مش فاضيين لنا ... بيدرسوا قرارات بيع البلد ... وبيدرسوا قررات لفرض ضرايب جديدة .. وبيدرسوا قرارات لرفع الاسعار .... الصبح محمد كلمنى علشان ننزل نشترى شوية حاجات ... وهو واقف ينتظرنى شوفت الطفل اللى فى الصورة دة ماسك الفوطة وواقف ينضف العربية ... المنظر مش جديد وشوفته قبل كدا مئات المرات وخصوصا فى إشارات المرور ... بس احساسى المرة دى هو اللى كان غريب ...... وقتها سألته انت أسمك أيه ... قالى ماجد ... قولت له طيب ممكن يا ماجد اصورك ؟ قالى ليه يا ابلة هتطلعينى فى التلفزيون ... قولت له مش لما اطلع انا الاول ..... قالى طيب صورينى زى ما تحبى .... فى الوقت نفسه لاقيت محمد بيصرخ و بيقولى اوعى رقم العربية يبان ... راح الولد من نفسه واقف بعيد ومتثبت الثبيته اللى فى الصورة دى ..... وبعد ما صورته لاقيتة بيقولى هى الصورة طلعت حلوة .. قولت له تشوفها .. قالى لو مش يضايقك .... وريتها له سالته ها ايه رايك حلوة ؟؟ مردش عليا وابتسم ابتسامة مليانة بمرارة سنين عمرة العشرة ... كان نفسى اتكلم معاه لكن محمد الله يسامحه فضل يدينى كلكسات لما طرشنى و يقولى متاخرييييين .... وقتها قولت له هشوفك تانى ... رد قالى سلميها لله ... ونعم بالله يا ماجد بس حقيقى .. اتمنى أشوفك

يرضيك يا بابا حسنى ؟؟؟ طفل من أولادك يبقى ده منظرة ... طفل من أولادك مش لاقى رغيف العيش ... طفل فى العمر ده بدل ما يلعب ويفرح بالدنيا ... يتحمل مسؤلية ويبقى فى الشارع .. أنهى قلب ده اللى يستحمل يشوف المنظر ده ؟؟؟؟
يرضيكى يا ماما سوزى ... ياراعية حملة الامومة والطفولة .... هو ده مش طفل من ضمن الاطفال ... ولا ده مخلوق شيطانى مالوش ام ؟؟؟ يرضيكى يا صاحبة حملة القراءة للجميع ومكتبة فى كل شارع وكل حى .... طيب مش نعلمهم القراءة الأول ولا نلبسهم ولا نأكلهم علشان يشوفوا يقروا فى حالة لو أتعلموا .... طيب طفل زى ده حتى لو بيعرف يقرا ... تفتكرى هيروح يشترى كتاب يقراه ولا يشترى رغيف عيش ؟؟؟؟؟
يرضيكو يا حضرات الوزراء الأجلاء ياللى مش بتدخلوا أولادكو وأحفادكو غير مدارس لغات أصل التعليم فى مصر مستواة انحدر بالرغم من أن منظر الطفل ده والآلاف غيره يحرق القلب ... إنما حقيقى بكن له كل احترام لأنه على الأقل أتحمل مسؤلية ونزل يدور على لقمة عيش حلال
الطفل ده فى نظرى اجدع من أتخن شنب واقف فى صفوف البطالة فى أنتظار التعيين وبيمد إيده لماما علشان ياخد المصروف علشان ينزل القهوة يختار مكان استراتيجى قدام التلفزيون وبيبص على الشارع علشان يعاكس اللى رايحة واللى جاية وفى مواجهة البوفيه علشان الطلبات توصله بسرعه ....
حقيقى يا ماجد أنت واللى زيك ربنا معاكو فى وطن للبيع

Comments

Migo Mishmish said…
ياقطه انا مش عارف الواد دا متهيألى شفته قبل كدا كتير ..فى اشارات المرور وعلى الارصفه و فى الجناين وعلى الكورنيش ..شفته متشعبط فى الاتوبيس وشفته تباع ميكروباص ..دايما تلاقي ميكانيكى بيضربه او عجلاتى بينفخه ..ساعات بيبقى موجود تحت الكبارى وساعات بيبقى جنب بلاعات المجارى .. عليه نظرة تجبرك انك تركزى معاها وتفكرى ايه قصته وايه حكايته ..عنده مرارة وسخط من المجتمع الى طحنه ..عشان كدا انا مش مستغرب من انك صورتيه او انه لفت نظرك ليه
appy said…
وجعتي قلبي بجد لانى اكتر واحده بتقابلهم

ربنا ياخدهم اللى السبب بجد
اللى معندهمش احساس ولا دم
بجد دول اكبر بعطف عليه ختي لما بيبيعوا حاجات
العزيزه قطه

أكيد اللي زي ماجد كتير اوي
اتحملوا المسؤليه بدري

و كلامك مظبوط قبل ماماما سوزي تفكري تفتح مكتبه في كل حي تفكر في الأطفال اللي زي ماجد اللي بيكافحوا عشان رغيف عيش يسدوا بيه جوعهم

بوست يوجع الألب فعلا ياقطه

الله يكون في عون المحتاج في البلد دي
:(
somaa mahaba said…
ياه يا قطه
انزلى القلعه وحواريها وزواقيقها تلاقى منه الف واحد ادخلى المترو الصبح حتلاقيهم نايمين على الارض
بابا حسنى ...بابا حسنى مين فوقى يا بنتى لولا احترامى لفرق السن بينى وبينه كنت قلب عليه كلمه...
ولا بلاش الاحترام واجب برضو وربنا يخليلنا زعبوله
تحياتى ليكى سومه_87
شربات said…
اقول اية بس



ربنا معانا


تحياتى
nody_1987 said…
مصر فيها
عشرين مليون ماجد
هى دى مصر
وهو ده بابا حسنى
EmY said…
عمالة الاطفال في مهن بتقتل برائتهم للاسف بقت منتشره جدآ عندنا و في زي ماجد كتير جدآ في شوراعنا اتمني ان حد يهتم بيهم و يكون غي مؤسسه ترعاهم بالتعليم و العلاج و المسكن

بوست جميل جدآ تحياتي يا قمر
Anonymous said…
ليه بتخلينى اكرهك
عموما انتى زى اختى
بوست جميل بيناقش اوجاع الوطن
والوطن مليان اوجاع
بيعجبنى استغلالك لمواهبك في الكتابة في الحديث عن آلام الناس ومشاكلهم
ربنا يوفقك
عارفه كلامك موجود جوه كل واحد ماشى راكب اتوبيس عجله ميكروباص المهم انه مصرى
مصر لو استمر فيها الحال كما هو عليه الان ستتحول كلها الى ماجد
وهنبقى كلنا ماجد
لا
كلنا الكابتن ماجد
تحياتى لكى يا قطه
وياريت بابا حسنى يسمع
مفيش كلام يتقال يا نانا
تسلم ايدك

وحسبنا الله ونعم الوكيل
الربان said…
تحياتي

أشكرك علي اهتمامك بهذا الموضوع...
و هوو يعد قنبلة موقوته في مصر.

لعلاج ظاهرة أطفال الشوارع يجب ان نعرف اسبابها، و التي يمكن ان نلخصها في الاتي:

1- تنصل بعض الاباء من ابنائهم، سواء بطلاق الامهات...او عدم الاعتراف بابنائهم كنتيجة للزواج العرفي .

2- الفقر المدقع الذي تمر به اسرة الطفل ...نتيجة انخفاض مستوي الدخل
و كثرة عدد الاطفال.

3- عدم الوعي و انعدام ثقافة تنشئة
الاطفال التنشئة الصحيحة...اما لجهل الام...او لانشغالها بالعمل لمساعدة اسرتها....

و يمكن للدولة من خلال المجلس القومي للطفولة...و المجلس القومي للمرأة المساهمة في تقليص هذه الظاهرة...من خلال:

1- ما يسمي الام المعيلة ...التي تخلي عنها زوجها...و دعمها ماديا و نفسيا
و معنويا..

2- المشاركة مع اسرة الطفل و المدرسة لدعم تعليم الاطفال و الاشراف عليهم.

3- حتي الاطفال الذين لن تستطيع المجالس
والوزرات المتخصصة الاشراف عليهم دراسيا و ماديا...تستطيع هذه الجهات
تأمين عمل لهم او تأمين عملية عملهم الحالي...بمعني الا تتركهم للخضوع لسيطرة
البلطجية...و المدمنيين...ليسلبوا اموالهم التي عملوا بها...بل و يسلبوهم برأتهم و طفولتهم بالاعتداء جنسيا عليهم...

4- يبقي دور هام وحيوي لابد ان يقوم به جميع افراد المجتمع من دعم لهذه الجهود
من خلال دعم الجمعيات الاهلية و جمعيات النفع العام...سواء ماديا او مهنيا
بمعني ان المحامي يقبل ان يترافع في بعض قضايا مثل هؤلاء الاطفال مجانا...و الاخصائيين الاجتماعيين يتطوعوا لساعات
محمدودة اسبوعيا لدعم هؤلاء الاولاد و الاشراف عليهم...كذلكل الاطباء...و كل
طبقات المجتمع.

مرة أخري أشكرك علي كتابتك في هذا الموضوع...و ادعو الجميع الي التراحم و التكاتف كل بما يسر الله له.

تحياتي و تقديري و دمت بالف خير.
shahy said…
حسبي الله ونعم الوكيل

ياسلام لو يعملوا دار لرعاية اطفال دي زي مابيعملوا دار الايتام والمسنين بس هما مين اللي هايعملوا؟ اكيد طبعا الناس مش بابا وماما لانهم خلاص مابقاش عندهم قلب

تحياتي
semsema said…
مشكلة زى ملايين المشاكل موجوده وكل يوم بتثبت وجودها اكتر وبتطور اكتر واكتر وبرده محدش سائل
اللى زى الولد ده من وهو لسه صغير شايف اهله عايشين ازاى وشايف الدنيا كل يوم بتقسى عليه هو واللى زيه ازاى وشايف كمان مستقبله المشرق هيبقى ازاى وبرده عايش وسايبها لربنا

تحياتى
لو بجد بلدنا فيها فلوس و فيها دخل مادى محترم
مكنش المنظر ده يبقى موجود
بجد حسبنا الله و نعم الوكيل
بوست يوجع القلب
تحياتى ليكى
مهو علشان ولادهم يدخلو مدارس لغات .لازم ماجد يمسح عربيات ويشتغل ميكانيكى .علشان هما ياكلو لازم هوا ميلاقيش ياكل .والا هينهبو ازاااااااااااى؟
فاتيما said…
عارفة يا قطة المنظر دا بيقطع قلوبنا قدا إيه
لما كنت بمشى انا و يوسف فى الشارع و نلاقى ولد بيشتغل كنت بقد أدعى على اللى رماه الرمية السودة دى ...يوسف يقوللى يا ماما ناخده معانا البيت يقعد معايا ....
طبعا أحاول أشرحله ان فيا ناس تانية دى شغلاتها فى الحياة و عندنهم فلوس مخصوص لكدا بس هما موش شايفين شغلهم صح
و اننا ظروفنا لا تسمح بدا يا حبيبى
يزعل قوى و نكتفى اننا نديله حاجة حلوة ... لعبة يوسف لسه شرايها ...أديله حتة فاكهة و لا رغيفين عيش أبقى لسه شاريهم مع الطليات ...
و بعد ما اروح أقعد أنب روحى
هوه دا اللى قدرتى عليه ؟
تصورى انك جرالك حاجة و يوسف بقى مكان الولد دا كنتى هتبقى عاوزة الناس تسيبه فى حاله و تكمل حياتها برضو من غير ما تقدر تعمله حاجة؟
انا قلبى بيتقطع مرتين
مرة من الحزن على الولد المظلوم فى الدنيا دا
و مرة تانية من عجزى
ربنا يدينا كلنا القوة نسند بعض
و نقوى بعض
Eman said…
الأطفال دول كتروا أوي للأسف
و بجد تحسي عنيهم فيها حكايات كتييير...حكايات ممكن نعمل منها موسوعة
موسوعة عن المرارة وعن الظلم و الحزن و الألم والصبر و..و.. و
أحييكي علي الفكرة و الأسلوب بجد يوجع ويوصل بسرعة
Desert cat said…
Migo Mishmish
قدرت يا ميجو تترجم احساسى فى اللحظة اللى شوفته فيها فى سطورك
وده معناه ان كلنا عندنا نفس الاحساس الصعب ده
ربنا يتولاهم ويتولانا احنا كمان
تحياتى
Desert cat said…
appy
سلامة قلبك يا حبيبى
بس احنا مش بايدينا نعمل حاجه غير اننا نساعدهم باللى نقدر عليه
ربنا معاهم
Desert cat said…
اجندا حمرا
البلد دى مبقتش بلد ماجد ولا بلدنا بقت بلد رجال الاعمال واللى ليهم ضهر واللى بيدخلوا مدارس اجنبية علشان ماما سوزى تفتح لهم مكتبات فى كل الشوارع
الباقى بقى ليهم رب اسمه الكريم
نورتينى يا ارق اجندة
تحياتى
Desert cat said…
somaa mahaba
ما انا بشوفهم عندى هنا كتير مش لازم اتعب نفسى وانزل القلعة
للاسف دول منتشرين فى كل الجمهورية انا مش عارفه المسؤلين عندهم عمى مثلا ولا بيغمضوا عنيهم لما يشوفوهم فى شارع اصل عنيهم ميصحش تقع على المناظر دى دول ناس كبيرة اصحاب مناصب ومعاهم فلوس المفروض عنيهم تقع على ناس نضيفه وريحتها حلوة وماسكين ورد فى ايديهم مش فوطة صفرا ينضفوا بيها العربيات
تحياتى يا جميل
Desert cat said…
شربات
يا رب
نورتى
Desert cat said…
nody_1987
" كلكم مسؤل وكلكم مسؤل عن رعيته
ماجد له رب كريم احن عليه من اى حد
الدور والباقى على اللى هينسئل علشان مقصر فى حق ماجد
تحياتى
Desert cat said…
EmY
انا كمان بضم صوتى لصوتك
وبدل ما نبنبى مكتبات فى كل الشوارع والحوارى نبنى مكتبات فى كل شارعين تلاته وفى كل عشرين شارع نعمل له ممؤسسه ترحمهم من اللى هما فيه
نورتى يا ميمى
Desert cat said…
Anonymous
تكرهنى ولا تحبنى دى احسايس تخصك لوحدك
بس مش تقول زى اختك
اصل بعد شوية الاقيك داخل تشتمنى وتقولى المفروض اهلك يتبروا منك
الا هو انت مين بقى
طالما انا دلوقتى زى اختك
Desert cat said…
صوت من مصر
اه علشان المنظر ده مش موجود غير فى مصر بس
والله مصر بلد العجايب صحيح
تحياتى
Desert cat said…
فرنسا هانم
ان الله لا يغير ما بقوم حتى يغيروا ما بانفسهم
يعنى لو فضلنا زى ما احنا فى وقت قصير جدا هنكون ماجد
نورتينى يا فرنسيس
Desert cat said…
آلام وآمال
فعلا لا املك الا ان اقول مثلك حسبى الله ونعم الوكيل
نورتنى يا محمود
ومش قولت لى عملت ايه
طمنا عليك لو فى بوست لوحده عندك
ربنا يوفقك
سكــر said…
ربنا يتولانا برحمتة

الواحد مش عارف يعلق يقول ايه

غير حسبنا الله ونعم الوكيل

تحيااتى
احمد سكر
Desert cat said…
الربان
استاذى العزيز
اتمنى واتمنى واتمنى
ان واحد بس من المسؤلين يملك لو نصف عقلك وطرق حلك للمشاكل
فدائما ما اراهم يضعون المشكلة ويتركونا نحن نفكر كفوازير رمضان
ودائما ما أرى فى آراء حضرتك وبوستاتك المشكلة ومعها طريقة حلها
من اجمل العقول اللى قابلتها حضرتك والاستاذ وجهة نظرى
ودائما ما اتسائل مصر فيها عقول جميلة امال احنا غرقانين كدا لييييه
احترامى وتقديرى
Desert cat said…
shahy
وهى الناس دلوقت لاقيه تاكل اصلا علشان تعمل
ده 3/4 مصر بقوا تحت خط الفقر
تحياتى
Desert cat said…
semsema
بالظبط كدا بالرغم من المرارة والقسى مسلمها لربنا علشان عارف ان ربنا هو احن حد عليه
ربنا معاهم ومعانا
تحياتى يا سمسم
Desert cat said…
مواطن مصرى نايم
البلد فيها فلوس
بس مش لينا
عندك دخل قناة السويس بيروح فين
السياحة
ده كفاية بس شرم علينا
دخلها فين
اسفه على وجع القلب
تحياتى
Desert cat said…
تــــايه ومش تـــايه
وهو علشان ينهبوا ويعرفوا يعيشوا يقتلوا براءة غيرهم
طيب ضميرهم مات ولا ايه
والله حاجه توجع القلب بجد
تحياتى
Desert cat said…
فاتيما

احلى ام يوسف
طيب انتى ويوسف وانا وغيرنا قلبنا بيوجعنا
هما المسؤلين عننا مش عندهم قلب
بيستأصلوه وهما جايين يحلفوا اليمين
بس يمين ايه اللى بيحلفوه يوجوعونا وينهبونا ونترمى فى الشوارع
ولا يمين ايه بالظبط
ربنا كريم
تحياتى يا ام يوسف
Desert cat said…
سكــر
اللهم امين يا سكر
تحياتى
Desert cat said…
Eman
حكايات المرار والظلم اللى فى نظرة عينيهم من شقى السنين اللى شافوه من اول ما عنيهم فتحت على الدنيا
بدل ما يتلفوا ويناموا فى سرير اتلفوا واترموا تحت كبارى فى البرد وفى الحر
ربنا معاهم
نورتينى يا ايمان
نداءاتك لبابا حسنى هتقابل بودن من طين وودن من عجين زى ما قالت خيخه
المشكله فعلا كبيره والمسؤليين ولا هما هنا
ربنا ينتقم منهم
تحياتى
انا بحب جدا الاشخاص المجاهدين
انا كمان اشتغلت وانا صغير فى السن فى الاجازات
ده حقيقى مش هزار
سلامى لكى ولماجد
وكلنا ماجد
Zika said…
الاطفال اللي بتهتم بيهم سيدة مصر الاولي هم الاطفال اللي بيطلعوا يف الاعلانات وعلب الزبادي وبالبمابرز
لكن باقية الاطفال اللي ريحتهم زباله وبيعيشوا في عشش
ولا عمرها شافتهم ويمكن لو قابلة واحد فيهم تضربوا زي ما الناس بتعمل في اشارات المرور
Desert cat said…
بحبك يامصر
انا بقول يمكن لعل وعسى ربك يحيى من فى القبور
تحياتى
Desert cat said…
عبده الرايق
وانا كمان بحب الاشخاص المجاهدين جدا
وتحية ليك انت كمان
مودتى
Desert cat said…
Zika
هى اصلا مش بتشوفهم ولا عمرها هتشوفهم ده اثناء مرور احد الوزراء الشوارع كلها بتقف علشان سيادته يعدى
فما بالك بسيدة مصر الاولى
تحياتى
انا مش عارف اقول ايه
بصراحة انتى قولتى كل حاجة
بس المشكلة بتتزايد وتتفاقم يوم بعد يوم
وفى ملايين ماجد فى الشوارع
وغالبا ماجد بيكون احسن من غيره على الاقل بيصرف على نفسه
وبيلاقى قوت يومه
فى غيره لا حول ولا قوة لهم غير الهروب والنوم فى الشوارع من غير ادنى رحمة
ودى حال بلدنا مع الاسف فى الوقت الحالى
تحياتى ليكى
((((وبعد ما صورته لاقيتة بيقولى هى الصورة طلعت حلوة ))))

انا استغربت للجملة دي قوي .... يعني برغم الغلب الي هو فية الا انه مهتم ان صورتة تطلع جميله

السؤال هو :::ـ
بعد 10 سنة ... يا تري اية هايكون حال مجدي ؟؟؟؟؟؟؟؟؟

لا تعليق !!
Desert cat said…
همس الاحباب
ما هو انا بتكلم علشان اللى مش بيلاقوا حد يسال فيهم ولا يعبرهم وفى اطفال اصغر من ماجد بمراحل وبرضه متبهدلين فى الشوارع
المفروض يكون الدولة موفرة لهم مؤسسات اى دولة محترمة بتعمل كدا
تحياتى
Desert cat said…
ناجي العلي 2000
انا مش استغربت للجملة دى اد ما انا استغربت لاحساسه
وانا بقوله تشوفها قالى لو تحبى
الولد زى ميكون خايف يقولى ورينى الصورة احسن اقوله امشى بعيد ولا حاجه ولا روح اغسل ايدك الاول
المفروض نكون كويسين مع الاطفال دول مش يبقى احنا والدنيا عليهم
تحياتى
الــــى أحلى / قطه

ان شاء الله تكونى بخير

كلامك زى الرصاص فى جتت من نحاس

بقى انتى عايزه حسنى يفكر فى الواد ده لا ياستى كفايه عليه جمال وعلاء وامهم هو حشيل هم مين ولا مين كان الله فى عونه وربنا يأخذه أخذ عزيز مقتدر
وجعتيلى قلبى
كلامك كان قوى اوى
انا كل يوم بشوف المناظر دى
لما الواحد خلاص مبقاش عاوز يخرج من البيت
mostafarayan said…
قطة الصحراء العزيزة
ياريت اخوانا البعدا يسمعوا ويشوفوا كلامك دة
لالالالا انتي بصراحة متحاملة زيادة عن اللزوم ياقطة ...ومتشائمة ومش بنتشوفي الحقيقة زي ماهي وظالمة الناس
انتي في بالك يعني بابا وماما مش عارفين بماجد وغير ماجد؟
لا عارفين ومش ساكتين عشان بيكرهوه؟
لا اطلاااااااااااااااقا
دي خطة منظمة الحكومة حاطاها عشان تعمل مننا شعب رجالة بانها تحملنا المسئولية واحنا سوكننين فنطلع رجالة نشيل المسئولية وندفع عجلة التقدم للامام ونعلي معدلات النمو
انما لو ماجد ده طلع زي شباب البيجي بيجي بيلاقي الاكل والعيش واللبس والتعليم وبيلع مع صحابه وله ناس بيحبوه تفتكري هيطلع راجل ويتحمل مسئولية؟
عجبي علينا والله شعب مبيعجبناش العجب الناس عاوزة مصلحتنا واحنا ولا احنا فاهمين
انا اللي صعبان عليا بجد اطفال مدينة نصر والمهندسين وولاد الوزرا ورجال الاعمال
ربنا يتولاهم يارب
hui mu han said…
بجد انا مش عارف اقول ايه
انا كل ماافكر لو انا مكانه كنت هااعمل ايه؟؟
ملقيش اجابة
انا رائي اننا مديونين لماجد
Desert cat said…
الشريف / جمال طة
هو مش فاضى يفكر فى الواد ده ولا فى اى حد هو جالس يتامل مستقبل مصر ياترى بعد سنة هيبقى لسه فى شعب يقرفه ولا كلهم هيهجوا ويسيبوها له
تحياتى
Anonymous said…
صحفية روشة
ما انا برضه كل يوم بشوف نفس المناظر دى بس مش وجعتنى اوى زى ماجد كدا
مش عارفه ليه والله
Desert cat said…
mostafarayan
والله اتمنى
انهم يبقى لسه عندهم القدرة انهم يشوفوا او يسمعوا حتى
Desert cat said…
دكتور مستكنيص
بامانة اطفال مدينة نصر والوزراء يصعبوا على الكافر ياراجل
دى حتى عيال فرافير ومتدلعه ومولدين فى بؤهم معلقة دهب شوفت الغلب اللى هما فيه
هههههههههههههههه
والله انت دكتور زى العسل
تحياتى
Desert cat said…
hui mu han
ماجد ده لو فى بلد محترمة بتحترم ولادها مكنتش هتلاقى اصلا المنظر ده منتشر وبالعشوائية دى
ماجد له رب هو المنتقم الجبار
تحياتى
Heart Beat said…
Dear Desert Cat

هو ابن كل مصري بيتبهدل و مش بعيد ينتهي الحال بكل اطفال الغلابة بالشكل ده

الغلابة بس او بمعنى ادق المصريين بس

اما اللي بيناموا و بطونهم مليانة اكل و شر و فساد

عمر ما ولادهم هايكونوا زيه في اي حاجه

لكن زي ما قلتي هو احسن من اللي بياخد المصروف من مامي و بابي و اونكل
Desert cat said…
Heart Beat
صديقتى الجميلة هارت غايبة فين بقالك كام يوم
قلقتينى عليكى على فكرة
انتشار ماجد واللى زية فى البلد بكثرة وبالصورة دى ده دليل فعلا على احترام بلدنا واهتمام بمواطنيها
ليهم رب موجود
تحياتى

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز