الإخوان المتأسلمين .. عندما تتجسد المصلحة

البوست ده انا جايباه من عند دكتور علام بعد ما استأذنته وهو وافق على النشر
ربنا يرحم والده ويجعل مثواه الجنة
ندخل بقى فى الموضوع على طول وبدون أى زيادة أو نقصان والبوست ده إهداء كدا حاير طاير للأخوانجية
لما يبقى هم الإخوان المسلمين ، على كده بقى إحنا كفار قريش




طاقية الإخفاء أو عباءة الإخفاء .. كلها أشياء خيالية يتمكن صاحبها من فعل ما يريد وتحقيق ما يشاء حيث لا رادع ولا حسيب .. ولكن لأنها خيالية وصعبة الوجود ، فكان لزاماً عليهم إيجاد بدائل متاحة للوصول لأغراضهم وأهدافهم ، فكانت عباءة الدين وخداع الناس بقال الله وقال الرسول
هم كالحرباء التي تتلون بألف لون من أجل مصلحتها ومصلحتها ثم مصلحتها فقط دون أدنى إهتمام بالمصلحة العامة .. إنهم الإخوان المسلمين
الإخوان المسلمين .. عالم غريب وعجيب ملئ بالمتناقضات والغرائب ، بس فيه حاجة واحدة ثابتة لا تتغير فيه أبداً وهي إن مصلحتهم تأتي قبل أي حاجة حتى لو كانت مصلحة البلد نفسها .. أفعالهم وتصرفاتهم كلها بتقول كده وآخر الأفعال دي اللي حصل اليومين اللي فاتوا ، وبالتحديد موضوع الإضراب وبعدها إنتخابات المحليات
مصر كلها عرفت وسمعت عن موضوع الإضراب العام اللي تقرر يوم 6 إبريل 2008 بالتحديد لإنه نفس اليوم اللي قرر عمال المحلة الكبرى عمل الإضراب بتاعهم فيه .. وكان الإضراب عبارة عن عصيان مدني ، اللي هو يعني لإخواتنا الكفتجية حركة شلل تام للمصالح في البلد كلها .. مفيش حد ينزل الشارع ، ولا يروح الشغل ، ولا مدرسة ، ولا جامعة ، ولا أي حاجة خاااااالص ، حتى مفيش لا بيع ولا شراء في اليوم ده .. من الآخر زي ما قلت شلل تام لمظاهر الحياة في البلد كنوع من أنواع الضغط على الحكومات لتغيير المظاهر السلبية والمساوئ الموجودة .. الفكرة بدأت في دماغ شباب وشابات زي وزيكم كده على
الفيس بوك (FaceBook) قالوا ليه مش نعمل إضراب يكون سلمي ونحاول نأثر بيه على الحكومة وتبقى بطريقة متحضرة .. وطبعاً الحكومة بدأت تحاول تفشل الإضراب ده بأي طريقة ، بس ده مش موضوعنا دلوقتي





موضوعنا إن الفكرة عجبت معظم قوى المعارضة وقرروا فعلاً الإشتراك فيها وكانت أبرز الحركات المشتركة هي حركة كفاية وأحزاب تانية كتير .. كان هدف الكل هو مصلحة البلد قبل كل شئ .. إلا إخوانا البُعدة دول .. قالوا في الأول حندرس الموضوع ونشوف .. وفي الآخر قالوا آسفين ياجماعة مش حنقدر نشترك ، والسبب قال إيه إن مفيش حد أخد رأينا في الموضوع ده ولا كنا نعرف من الأول .. طب ناخدها واحدة واحدة علشان اللي مش متابع الأخبار
أحزاب أعلنت مشاركتها وجماعة الإخوان تبحث الفكرة
انتشار رسائل إلكترونية تدعو لعصيان مدني في مصر عبر “البقاء بالبيت”
ده رابط الخبر اللي قريته على موقع العربية وبيتكلموا فيه عن فكرة الإضراب ، وإزاي نشأت الفكرة ، ورأي معظم القوى السياسية فيها ، ورأي الحكومة فيها .. من الآخر موضوع مخلص من كله .. بس اللي شدني فيه الفقرة المتعلقة برأي جماعة الإخوان المسلمين إسماً ، المتأسلمين فعلاً
الاخوان يدرسون الموقف
وقال أكرم الشاعر، عضو مجلس الشعب عن الاخوان المسلمين لـ”العربية.نت” إن الجماعة تدرس الموقف بدقة، وستعلن في الوقت المناسب قرارها بشأن الدعوات الموجهة إليها للمشاركة”. أضاف “نحن نريد المشاركة لأن الناس أحوج ما تكون إلى التعبير عن مشاكلها، والمبدأ نفسه موجود في أهمية إفساح المجال أمام الناس في التنفيس عن الغضب بشكل سليم وسلمي في الوقت ذاته، إلا أن طبيعة المشاركة وتوقيتها مازال محل الدراسة لتحديد الموقف النهائي”. وأشار إلى أن الإضراب المرتقب في 6 إبريل، يأتي بعد يومين من الانتخابات المحلية التي توافق 4 ابريل. ويخوض الإخوان الانتخابات ما يزيد عن 2000 مرشح ضد الحزب الوطني. وتابع أنه “بعد الإضراب بأسبوع ستعقد جلسة صدور حكم على 40 من قيادات الجماعة في المحكمة العسكرية، بينهم النائب الثاني للمرشد خيرت الشاطر وهو ما يفسر التمهل في اتخاذ القرار المناسب، على الرغم من أن اليوم هو الثاني من ابريل”.
ماشي ياجماعة يدرسوا براحتهم القرار .. معاهم حق أكيد لإن قرار زي ده محتاج دراسة وتمحيص وتدقيق وفاخر كمان .. بس مش ملاحظين إنهم دخلوا في النص موضوع إنتخابات المحليات ، وموضوع محاكمة القيادات بتاعتهم ، وإن الحكومة حطاهم في دماغها والكلام ده .. بلاش تاخد كل حاجة على صدرك كده ياعم الحاج وتقول إنهم بيدوروا على مصلحتهم قبل أي حاجة ومش عاوزين يزعلوا الحكومة منهم .. الراجل وبيفضفض باللي جواه
وقبل الإضراب بيومين تقريباً صدر بيان من قيادة الإخوان بتوقيع مرشدهم العام (صاحب التلات طزات) محمد مهدي عاكف يعلن فيه عدم مشاركة جماعة الإخوان المسلمين في الإضراب بحجة إيه بقى إن مفيش حد أخد رأيهم ولا إستشارتهم في الليلة دي كلها !!

دلوقت حنشوف مع بعض تقرير قناة البي بي سي العربية BBC Arabic واللي إتكلموا فيه عن الإضراب ونشوف رأي واحد من فطاحلة جماعة الإخوان وتبريره العبيط لعدم الإشتراك في الإضراب ، وبعدها على طول حنشوف رد صحفي عليه وإنهم كان فاضل يبوسوا إيد الإخوان علشان يشتركوا معاهم ويخططوا مع بعض ، بس الإخوان رفضوا !!
تقرير البي بي سي العربية عن إضراب 6/4/2008
يعني كمان عالم مصلحة ، لأ وكدابين !! طب بالمرة نشوف البيان اللي أصدرته الجماعة من على الموقع الرسمي بتاعهم ولو حد فاهم منه حاجة يقولي ألا أخوكم فهمه على قده .. حكم الطول بقى
بيان حول موقف الإخوان المسلمين من إضراب 6 أبريل
إزاي بقى في البيان بيطالب الشعب كله وكافة قواه الحية بالإصلاح والتغيير ومواجهة الفساد والإستبداد وهم لأ ؟!! تقريباً هم من قوى الشعب الغير حية زي الفراخ المجمدة كده !!
هم دول بقى بتوع قال الله وقال الرسول (صلى الله عليه وسلم) ، واللي متخذين الدين مجرد وسيلة لهدفهم الغير معلن وهو الوصول لحكم مصر !! مش عاوز حد يقولي دول همهم الشعب ومصلحة مصر ، لأ دول همهم الأول والأخير مصلحتهم الخاصة والوصول لحكم مصر بشتى الطرق ولو كانت التحالف مع الشيطان نفسه !! مش مصدقني منك له ؟!!
الإخوان برروا عدم مشاركتهم بإن زي ما قلنا مفيش حد أخد رأيهم من البداية ولا رجع ليهم !! أظن إن الموضوع كله في مصلحة البلد ومش لأجل مصلحة شخصية ، يبقى ليه ترفضوا الإشتراك فيه ؟!! هل لإن مفيش حسنة حتطلعكم من وراه ؟!! ولا لإنكم خايفين الحكومة تقفش فيكم ؟!! ياريت المرة الجاية تقولوا أسباب مقنعة أكتر والكداب بيروح فين ؟!! إوعى تقول مارينا
تبرير تاني خايب هو إن اللي دعى للإضراب ده شوية عيال مدونين (سمعتها من واحد منهم) !! هم العيال دول مش مصريين ومنهم اللي بيخاف على مصر أكتر من أتخنها نفر فيكم ؟!! هم العيال دول مش اللي قدروا يوحدوا الشعب كله حول هدف واحد بفكرة بسيطة ؟!! هو لازم يعني الأفكار تطلع منكم إنتم أو من حزب معارض كبير (سناً وليس قيمة) ؟!! يبقى والله ليهم حق يقولوا إن مرشح رئاسة الجمهورية يبقى من حزب كبير وقديم له وزنه في البلد

طب نكمل الموقف التاني ونشوف بس حنرجع شوية قبل موضوع لإضراب ده .. فاكرين إنتخابات مجلس الشعب الأخيرة ؟!! أكيد فاكرينها وفاكرين الحدث الأهم فيها وهو فوز 88 عضو من جماعة الإخوان المسلمين المحظورة قانوناً بمقاعد في مجلس الشعب .. قوة لا يستهان بها بأي شكل من الأشكال ، ولكنها لاتعكس مدى قوة الجماعة في مصر كما يدعي الإخوان ، بل تعكس مدى كره وسخط الشعب من الحزب الوطني ، والدليل إن الناس كانت بتنتخب أي شخص كان طالما واقف ضد مرشحين الحزب الوطني حتى لو كان شحات أجرب .. دي كانت الخطوة الأولى
وطبعاً فاكرين التعديلات الدستورية اللي أتاحت حق الترشيح لرئاسة الجمهورية بس فيه شروط زي إنه يكون عضو في حزب سياسي معترف به قانوناً ، وحصوله على نسبة معينة من أصوات المجالس المحلية على مستوى الجمهورية ليتمكن من الترشيح .. دي بقى هي الخطوة الأهم بالنسبة للإخوان اللي طول عمرهم بيقولوا الحكم مش هدفنا ، ولكن أفعالهم تفضح نواياهن الخبيثة
الفترة الحالية هي فترة الإنتخابات المحلية في مصر كلها اللي إتفتحت ليها أبواب الترشيح من فترة ، وجهز الإخوان عدد مهول من المرشحين للسيطرة على أكبر نسبة من مقاعد المحليات تؤهلهم بعدين من نيل النسبة الكافية للترشيح لإنتخابات رئاسة الجمهورية ، ولكن الحكومة واخدة بالها كويس قوي من تخطيطهم الخبيث ده ومنعت كتير منهم من الترشيح .. كان إيه بقى رد حبايبنا في مجلس قيادة الإخوان ؛ التهديد بأعمال عنف في أنحاء مصر كلها !!
جهات مسؤولة اعتبرته تهديدا سياسيا
إخوان مصر يحذرون من أعمال عنف بعد استبعاد مرشحيهم للمحليات
شفتم وصل الأمر لإيه ؟!! تهديد علني وصريح بحالة من العنف والفوضى قال إيه إن الشعب المصري هو اللي حيعملها علشان خاطر الإخوان ؟!! على رأي أبوالليل ياخي بعدك منك له .. وفعلاً إنتقل الوضع للمرحلة التانية عن طريق مظاهرات في أماكن كتير قوي منها طنطا اللي كانت من أكبر المظاهرات تقريباً والسبب إن الناس إنضمت ليها ، مش حباً في الإخوان ولا حاجة ، بس كرهاً في الحكومة مش أكتر
احتجاجاً على عدم إدراج أعضاء منها بكشوف مرشحي انتخابات المجالس
الأمن المصري يفرق الألوف من متظاهري “الاخوان” ويحتجز العشرات
واخدين بالكم من اللي عملوه .. مظاهرات في أنحاء كتيرة من مصر علشان منع ترشيح ناس منهم في المحليات !! يعني عملوا مظاهرات علشان مصلحتهم برضه مش أكتر .. لأ وركز قوي في آخر فقرة من الموضوع اللي فات اللي بتقول
(وبحسب تعديل دستوري أجري عام 2005 يحتاج من يريد ترشيح نفسه مستقلا الى تزكية من 65 عضوا منتخبا في مجلس الشعب و25 عضوا في مجلس الشورى و140 عضوا في المجالس المحلية للمحافظات.)
يعني أول شرط حققوه ومعاهم 88 عضو في مجلس الشعب بيأتمروا بأمرهم عملاً بمبدأ السمع والطاعة ، وبيسعوا لتحقيق الشرط التاني وهو الحصول على أصوات كافية في المجالس المحلية .. وكل ده علشان الترشيح لرئاسة الجمهورية والوصول لكرسي الحكم .. الهدف الأساسي والأول للإخوان منذ إنشائها كورم سرطاني في جسد هذا البلد
لحد كده إشطات يافوزي اللي هو صاحب أبوالليل الأنتيخ .. طب إيه بقى اللي حصل جديد ياعم علام ؟!! اللي زاد وغطى وفلقني وخنقني وخلاني أنفجر هو آخر تصريح لفضيلة المرشد العام للجماعة زي ما بيقولوا عليه محمد باشا مهدي عاكف اللي بيطالب فيه الشعب المصري بمقاطعة إنتخابات المحليات وفي نفس ذات الوقت إستمرار مرشحي الإخوان الـ 20 في الإنتخابات !! يامثبت العقل والدين يارب .. منين عاوزين الناس تقاطع ومنين مش عاوزين تسحبوا المرشحين بتوعكم ؟!!
وصفها أنها تجري في إطار ملف توريث السلطة
مرشد الإخوان يؤكد استمرار مرشحيهم للمحليات بمصر رغم المقاطعة
وبالمرة نشوف بقى الخبر من على موقع الإخوان نفسه ، حاجة قمة في الوقاحة ياجدع .. بعد ما خذلوا الشعب ورفضوا الإشتراك في الإضراب العام ، بيطلبوا من الناس والشعب كله إنه يقاطع الإنتخابات المحلية علشان خاطرهم ، علشان خاطر ننوس عين أمه جماعة اللي يلحق الأول يكوش
الإخوان المسلمون يقاطعون انتخابات المحليات







طلقات في الهوا
» اللي فات ده موقفين بيوضحوا مدى تناقض أفعال وأقوال ما تسمى بجماعة الإخوان المسلمين وتلونهم حسب ما تمليه عليهم مصلحتهم دون النظر لمصلحة مصر ولا شعب مصر !! خذلوا الشعب ورفضوا يشتركوا في الإضراب بحجة إن مفيش حد أخد رأيهم ولا بلغهم بالموضوع ، مع إن حركات المعارضة كان فاضل تبوس جزمهم علشان يشتركوا !! وفي نفس الوقت عاوزين الشعب كله يقاطع إنتخابات المحليات علشان خاطر عيونهم !!
» هدد الإخوان ولمحوا بإثارة حالة من الفوضى والعنف في كافة أنحاء البلاد كرد على منع الحكومة لمرشحيهم من تقديم طلبات الترشيح !! حاجة مش جديدة عليهم فتاريخهم ملئ بمثل هذه الأفعال منذ إنشاء الجماعة وحتى الآن .. فمن محاولة إغتيال عبدالناصر في المنشية ، إلى جماعات الجهاد والتكفير والهجرة التي إنبثقت من عباءة الإخوان ، مروراً بأحداث الأزهر الأخيرة والإستعراض العسكري في قلب الحرم الجامعي لأعضاء الجماعة !! لأ فعلاً عالم بتاعة سلام
» في كافة مظاهرات الجماعة يقومون برفع المصاحف عالياً !! في وجه من ترفعونها ؟!! أليس كلنا مسلمين موحدين بالله ومؤمنين برسول الله (صلى الله عليه وسلم) ؟!! ومادخل الدين بما تريدون تحقيقه من مصالح دنيوية وشخصية أبعد ما تكون عن الدين ؟!! هل أصبح الدين والإيمان والإسلام ملكاً لكم دوناً عن باقي البشر ؟!!
» هل من الدين إن الإخوات العضوات في الجماعة يحضرن إجتماعات الجماعة اللي أحياناً بتنتهي بعد منتصف الليل وحدهن دون إذن أزواجهن ؟!! وهل من الدين إن الإخوات يأتمرن بأمر قيادات الجماعة بغض النظر عن أوامر أزواجهن خاصة لو خارج الجماعة ؟!! الكلام ده أقسم بالله شايفه بعيني وبلاش نفتح أكتر من كده مؤقتاً
» فضيلة المرشد العام الأستاذ محمد مهدي عاكف حكم عليه من قبل بالإعدام ثم خفف الحكم لـ25 سنة في السجن ، ومتهم في محاولة إغتيال عبد الناصر بالمنشة سنة 1954م !! محمد مهدي عاكف صاحب الثلاث طزات الشهيرة “طز في مصر ، وأبو مصر ، واللي في مصر” في حديثه مع مجلة روز اليوسف وتم إذاعة هذا الجزء في برنامج البيت بيتك !! محمد مهدي عاكف صاحب الجملة الشهيرة بإن لما نوصل للحكم حندي اللي يعارضنا بالجزمة !! ونعم القيادة






فضيلة المرشد العام محمد مهدى عاكف صرح في حرب لبنان تموز 2006 بإنه مستعد يرسل 10 آلاف مقاتل إلى جنوب لبنان للمقاتلة مع حزب الله ضد إسرائيل !! لسه برضه مصممين إنه تنظيم سلمي إبتعد عن العنف ؟!!
» الشهيد حسن البنا مؤسس جماعة الإخوان المسلمين ، ماهي الأسباب والدوافع لإطلاق لقب شهيد عليه ؟!! هو مات وهو بيحرر فلسطين ؟!! ولا يمكن مات في حرب 1973م ؟!! ولا يمكن مات غرقان حتى ؟!! اللي يعرف الإجابة يتصل على 09001986 وبإذن الله حياخد على قفاه

الإخوان بيهللوا من يومهم ويقولوا إن اللي إغتال حسن البنا هو الملك وأعوانه من الحكومة ومش عارف إيه وكلام أهبل من ده .. أهديهم رابط الموضوع ده ومستني بقى ردهم عليه بفارغ الصبر(قيادي إخواني قديم يبرّئ الملك فاروق من اغتيال حسن البنا)
» غريبة ظهور وثائق وأدلة ناقشها الأستاذ والصحفي الكبير محمد حسنين هيكل في برنامجه على قناة الجزيرة تثبت بأن حسن البنا مؤسس جماعة الإخوان المسلمين كان على علاقة بالمخابرات البريطانية وبياخد منهم أموال وخلافه ، من الآخر زي عميل أو تابع ليهم بالظبط !! وعلى الرغم من إن الكلام كان على عينك ياتاجر ماسمعتش إن واحد منهم طلع كدب ولا نفى الكلام ده !! ينفي إزاي والكلام كله بالأدلة ومن المخابرات البريطانية كمان وموثقة


» الشهيد السيد قطب (مات في سجون الإحتلال الصهيوني برضه) اللي أعدمه عبد الناصر ظلماً وبدون وجه حق !! عارفين إن سبب الإعدام هو إصداره لفتوى في كتاب ليه يبيح أموال من هم خارج الجماعة لأعضاء الجماعة !! يعني أموالي وأموالك إحنا المسلمين لأعضاء الجماعة !! طب لما يعملوا معانا إحنا المسلمين الموحدين بالله كده ، توقع بقى ممكن يعملوا إيه مع أقباط مصر الذين إستوصى الرسول بهم خيراً !!
» خيرت الشاطر ثروته حوالي 6 مليارات !! أموال تأتي للجماعة من جهات غير معلومة من خارج البلاد !! أموال توزع على أعضاء الجماعة في كل مكان في كافة المناسبات !! التبرع بنسبة 10% من مرتبات أعضاء الجماعة للجماعة شهرياً !! دعايا وإعلانات تتكلف ملايين شهرياً !! من أين لك هذا ؟!!
» اللي بيتقبض عليه من الجماعة بيحصله الآتي ؛ أفخر أنواع المأكولات والأطعمة تروحله يومياً في الحبس أو السجن أو المعتقل !! مبالغ مهولة من المال تصرف لأهله من القيادة وتبرعات من باقي الأعضاء ضمن نطاق المدينة !! لما يتم الإفراج عنه يتم عمل زفة ليه ولا زفة أكبر معتقل في سجون الإحتلال الصهيوني !! سيب الواد يلعب براحته
» تلاقي الواحد من دول حتة موظف على قد حاله مرتبه مايمكلش 500 جنيه بالحوافز بكله ، وأول ما ينضم للجماعة ربنا يفتحها عليه من حيث لاتدري ولا تعلم ، ويبني بيوت ، ويجيب عربيات ، وفلوس ولبس والذي منه !! فعلاً الرزق يحب الخفية ياجدعان
» سمعت إن اللي تبع الإخوان مش بيدخل الجيش بس لازم يجيب ورقة بكده من الظابط بتاع أمن الدولة اللي تبعه !! أي نعم الشيطان صايع بس نار الجيش ولا جنة الإخوان









» لو كان البديل للحزب الوطني هم الإخوان المسلمين ، فأنا مع التوريث قلباً وقالباً بأي شكل وبأي لون كان ولو طلبت حياتي .. أصل نموت من الجوع ولا إننا نموت مدبوحين زي الجزائر في تسعينات القرن الماضي .. مدبوحين
» واحد من الإخوان فاتح محل عندنا ، وتلاقيه قاعد حاطط رجل على رجل ومنجعص قوي وماسك المصحف بيقرأ فيه !! ولو حد قاله السلام عليكم ، تخيلوا يكون إيه رده ؛ مساء الخير إتفضل !!
» في إنتخابات مجلس الشعب الأخيرة والتي قبلها منعت قوات الأمن لابسات الخمار من الإدلاء بأصواتهن ، فماذا كانت ردة الفعل ؟!! قمن بخلع الخمار ، ولبسوا لبس عادي وعلى الموضة وضربوا وشهن مكياج وإشي أحمر وإشي أخضر وحاجات كده !! مبادئ تتغير حسب الحاجة ، إنها حقاً حرباة
» هل تعرف ماهو مبدأ جماعة الإخوان المسلمين ؟!! هو السمع والطاعة ؛ بمعني أنك تنفذ ما تؤمر به ممن هم أكبر منك في الجماعة دون تفكير أو مناقشة ولو على رقبتك ورقبة اللي جابوك .. أين هي شورى رسول الله (صلى الله عليه وسلم)
» في النهاية أنا لا أهاجم أفراد ولكن أهاجم فكر يعتنقه أفراد، فمنهم من أحبهم وأحترمهم جداً وأقارب لي ، ولكن الحلو ما يكملش

فى النهاية بشكر دكتور علام جدا جدا على هذا التقرير المفصل بالوثائق والصور وفى انتظار باقى السلسلة يا دكتور خلينا نتعرف سوا اكتر واكتر

تعليقات

ححجز مقعد وارجع تانى بعد القراءه
‏قال Desert cat
ترجع بالف سلامة ياريس
‏قال Hook
بصراحة خير ما عملو انهم ما شاركوش في الاضراب...هما من غير ما يقصدو فادو الاضراب جدا...لأنهم لو كانو شاركو كان الموضوع لبسهم...لكن دلوقتي باين جدا ان الناس اللي خرجت و اعتصمت دي...مافيش حد جييشها و ووجهها...الحكومة بتتكلم عن اطراف خفية...طيب مين الأطراف الخفية دي؟
انا عارف هما مين...رغيف العيش و قزازة الزيت و كيل اللحمة...
‏قال rommantic
مكذبش واقول قريت كل ده اهتمى بالحجم بعد كده اونزليهم على مرات بس انا رئى انك تنفعى صحافيه سلام
‏قال rommantic
كل ده كلام
ربنا يقدرنى واقراه
سلام
‏قال Abo 7anf
السلام عليكم
بصى اكتر شئ فعلا استغربت منوا
الما قريت توبيك انهم مش هيشركوا
عندك هنا فى المدونه
انا من زمان بقول انهم زى غيرهم بس بمجرد شعار
ومفيش فرق
وبعدين ضحكت تانى يوم لما لاقيتهم بيقولوا قاصعوا الانتخابات
والمقاطعه نفس فكره الاضراب
وفى نفس الوقت لما شفت عصام العريان وهو فرحان وبيتكلم على الاضراب كانوا كان مشارك فيه
يعنى بيتلونوا كل يوم بلون
حسب ميكون الجو عامل ازاى
وتقبلى مرورى
‏قال david santos
Great work, desert cat!
I loved this post. Have a nice weekend.
‏قال Asmaa mahaba
يااااااااااااه بقالى كتير مدخلتش هنا حشرب الشاى واسلم واتكل بقى
وسلميلى على بنوتك
وعلى فكره رئيس جمهوريه خباص بيقول حروح اقرا وميرجعش تانى
ههههههه
صدقينى انا
تحياتى ليكى سومه_87
‏قال dr_modymodak
البوست ده من اجمل واصعب ما كتب اخويا علام ربنا يصبره علي وفاة والده بس علام راجل وقدها وقدود

انا اول مره ادخل مدونة حضرتك وملاحظ هههههه انك بتكرهي الاخوان مووووووت

انا لا بحبهم ولا بكرهم بس مبيعجبنيش تفكيرهم وسياستهم

خدي بالك من نفسك يا قطه بس اللي ملاحظه ان اظافرك طويله وواثقه من نفسك وبتقولي اللي مقتنعه بيه وده في حد ذاته يحسب ليكي مش عليكي

تقبلي تحياتي
‏قال momken
ياستى احنا ولا عندنا احزاب
ولا سياسه
واستغفر الله العظيم ولا حتى دين

الجمعات اصبحت بتاخد الدين تاكسى يوصلها للحته الى تحبها

اخوان ايه ومسلمين مين
هما بيطالبوا بتداول سلمى للسلطه وهما نفسهم المرشد العام عندهم بيحكم لحد ما يموت ويجى اقدم واحد بعده اكنه كابتن الفريق
هو فى كده غير فى الملكيه مع اختلاف التوريث

البوست جامد بس طووووووويل اوى اوى اوى

تحياتى
‏قال Foxology
ينهار ابيض

دى اجرأ واصح مقالة قريتها عن الأخوان

وفعلا هما كدة ودى طبيعتهم

ربنا يهدى هنقول ايه يعنى ؟؟

تحياتى :)
‏قال Empress appy
انا قولت بقى اخلى بالى من علام ولا منك طيب اعمل ايه

بصى راى بصراحه هما مطلعوش مبرر خالص للى حصل واللى عملوه واستغربت لما طالبونا اننا نقاطع الانتخابات واحنا اساسا مقاطعنها لان نتايجها باينه ومزورة من البدايه من بدررررررررررى

كل اللى اتقال فى الاعلام فى برنامج العاشرة بيان اذيع من مكتب الارشاد فى المنيل ان علشان كانوا مرشحين من عندهم 10الاف وصفصفوا على 300تقريبا فمرضيوش
انما موضوع الاضراب محدش من القيادات قال حاجه او برر وكل اللى فى المدونات واللى بيتقال ما بينا اجتهادات وتخمينات شخصيه حتى من الاخوان نفسهم دفاع بس محدش من قيادتهم قال
وده الاختلاف السياسى اللى ما بينا
هيجى حد ويوقلى اشمعنى يعنى الاخوان زعلانين منهم اقول ببساطه علشان 88 مقعد اللى فى مجلس الشعب ان الناس وثقت فيهم وانهم كمان عاوزين يحكموا مصر طيب ايه الدليل على المصلحه يمكن فيه سبب هما مش قالوه تعرفهوش انتى يا اختى والنبى
‏قال غير معرف…
ان شاء الله عن قريب جدا ربنا هينتقم منك يا رويبضه
ما ضر نهر الفرات يوما *** ولوج بعض الكلاب فيه

اسال الله جل وعلا ان يجعلك عبرة لكل من سلك طريقك
‏قال عمو احمد
دى بالظبط وجهه نظرى فيهم من زمان
حزب سياسى وواخد الدين عبايه
وهما لاليهم دعوه بالدين ولاحاجه
مجرد سكه عشان يكسبو الناس وخلاص
ويقدرو يوصلو للحكم
‏قال مصطفى فتحي
مدونة رائعة وقلم مختلف عن المألوف
تحياتي
‏قال Dr. Eyad Harfoush
عزيزتنا قطة الصحراء
مقال جميل نشكرك على نشره و نشكر الدكتور علام ، و أشكرك على تعريفي بمدونته المتميزة للغاية ، توقعت أن أسمع منك تعليقا على المقال الذي نشرته حول الاخوان و العصيان و الذي كنت أنت من أوحى به ، و قد ذكرت هذا بمقالي

تجدينه هنا
http://eharfoush.blogspot.com/2008/04/embryonic-revolution.html

مع تحياتي و تقديري
‏قال ملك الكبدة
هو الاخوان عادي يعني ليهم حق يترشحوا رؤساء ووزراء و اللي هما عايزينه

بس يبعدوا عن ربنا

لان طريقتهم في التعامل مع معطيات السياسة علمانية بحتة في حين هما بيقولوا انهم بتوع ربنا

المهم انا عايز اقول حاجة

اول ابريل و ماكانتش كدبة احمد فتحي سرور قال الاخوان لازم يكونولهم حزب

و الصحف قبل كدة قالت ان في صفقة بالسماح بحزب اخواني مقابل الموافقة على التوريث

في صفقة مشابهة لصفقة استفتاء 1987

اطلاق التصريح ده قبل ايام من الاضراب
يعني على قد فهمي هو اجتماع لارادة الحكومة افشال الاضراب المدني و في نفس الوقت تسكيت الاخوان بورقة الحزب المنشود

يعني من الاخر الاخوان لا حد ماشاورهمش ولا دياولو

دول شوية عالم وسخة كانت مصلحتهم انهم مايشاركوش و زيادة في اصطناع موقف كمان قالو ان ماحدش شاورهم بس على مين و فعلا بقى على راي ابو الليل

ياخي ..........

سؤال برئ

منين بتقاطعوا حركة شعبية معارضة زي الاضراب وتدعوا الشعب للتضامن معاكم تاني يوم ضد الحكومة عشان المحليات

تحياتي يا قطة و تحياتي للدكتور علام
‏قال فرنسا هانم
تحيه وسلام ليكى يا قطه
ايه ده ؟؟
بسم الله مشاء الله
نفسك طويل قووووووووووى
‏قال nody
البوست جميل
وبيكشف بعض حقائق الاخوانجيه الكسالا العوطليه
اما بالنسبه للاضراب فا بجد الاحزاب هى الغلطانه
المفروض كانت بعتت لهم دعوه
ةطمنتهم ان الموضوع ها يبقى فيه ارز باللبن مش حاف يعنى
تحياتى
‏قال (احمد سكر )
بوست طووووووووووووووووووووووووويل

بس ممتع وشيق

سواء ان كنت مع او ضد

تحياتى
احمد سكر
‏قال Me, myself, and her
مرحبا قطة الصحراء

لم أشأ أن أكون مدونة كي أثير ضغينة من أي نوع ، هذا ولا أجد سبب يجعلني أشتمك مثلاً ، لذلك فلستُ أنا المعنية برسالتك التي تركتها لي في مدونتي

وإن كانت هي الرسالة الموجودة هنا بين الردود التي ظننتني كتبتها ، فهذا ليس أسلوبي في الخطاب وحتى في نسق الكلمات

تحياتي لك

هذا المرفق لك ولجميع ضيوفك مع التحية:

***********************************
عذراً على اقتحام المدونة هكذا لكن كما يقال "للضرورة أحكام"

في حملة فردية أقوم بالمساهمة على نشر وتوزيع فيلم "المُفتِنون" الذي يرد على الفيلم الهولندي "فتنة" ، بإرسال الرابط التالي لكل الداتا لدي من مواقع ومدونات وبريد

أرجو منكم – بعد المشاهدة - المساهمة معي في نشره من خلال قائمتكم أيضاً

شكرا لكم

Sorry for this sudden entrance in here but as said "necessity has its laws"

In a "singular" campaign I am making now to defend against the anti-islam Dutch short movie "Fitna", siting to every possible link and address

I wish that you be part of it by watching and forwarding the link below to all yours as possible, too

Thank you every one

http://dejavupress.blogspot.com/2008/03/blog-post_31.html
‏قال الربان
تحياتي

طبعا حضرتك تعلمي رأيي في هذا الموضوع
لكن احب ان أضيف ، ان معظم من علي الساحة السياسية همهم الاول و الاخير مصلحتهم الشخصية.... سواء الحكم نفسه
او ان يكونوا بالقرب من مراكز السلطة و صنع القرار....

اما عن كفاية و ما شابه...فحديث
الاستاذ مرتضي منصور ، رئيس نادي
الزمالك السابق ، يمكن ان يميط اللثام
عن هذه الجماعة...

بصراحة.... طالما المصلحة الشخصية هي الدافع فقط ...فلن نري خيرا من اي من
الاحزاب او الجماعات او التجمعات و الجمعيات و المجالس التي اصبح عددها أكثر من عدد سكان مصر المحروسة.

تحياتي و تقديري.
بصى يا قطه من واقع ملموس وتجربه من خلال نقابه محامى مصر الى انا طبعا عضو نقابه فيها علشان محدش يقول انى بتجنا على احد
عقب اعلان فوز سامح عاشو بمنصب النقيب وكمان حوالى 15 مقعد فى مقاعد مجلس النقابه للقائمه بتعته قام الاخوان بعمل بعض الضعون لطعن فى فوز سامح عاشور وقائمته وانتهى الامر الى القضاء ببطلان مجلس النقابه واعتبار المجلس باطل واعاده الانتخبات على مجلس النقابه واعتبار المده السابقه كان لم تكن الامر لحد هنا عادى جدا
يوم الخميس الماضى كان فى اتماع جمعيه عموميه للنقابه بناء على طلب المحامين تبرع دكتور طوسون وسامح عاشور بالدخول لقاعه الاجتماعات متكاتفى الايدى مع الحديث عن قيام تحالف اخوانى مع سامح عاشور ومبايعته كنقيب لمده قادمه رغم انى سامح عاشور اسقط مرشحين للاخوان على منصب النقيب كان احدهم رجائى عطيه الانتخبات الماضيه
بس العبره ايه المصلحه فين
‏قال غير معرف…
.............
..............
..............
.............
ممكن سؤال
فين الاخت قطة الصحراء؟؟
يا ريت الرد ده ما يظهرش لانه رسالة شخصية ليكى
خفي شوية
الناس كلها عارفه الاخوان وتاريخ الاخوان
انتى بتفضحيهم قدام مين
قدام العدم منتمين ولا المنتمين
اللى انتى بتعمليه ده يا استاذه تضيع وقت
بتضيعى وقتك في حاجات فاضية
تاريخ الاخوان محفوظ ومعروف بكل عيوبه ومساوئه
مش عارف ليه حاسس بكراهية شخصية مخلياكى زى التور بتلفي فى ساقية سب وشتيمة الاخوان وموضوعات مكرره
فوقى بقى
بطلى قلة الادب دى
دى قلة ادب
وقلة تفكير
وقلة زوق
اصحى يا ماما وارجعى زى الاول
بلاش تضيعى وقتك في كراهية مش هتقدم ولا تأخر ولا تفيد الناس
على فكرة انا كنت هسيب اسمى
بس هعمله باسم مجهول ..مش لانى جبان زى ما عقلك هيصورلك
وانما لانى اتخنقت منك ومن تفكيركواسلوبك
ومعدش ينفع معاكى كلام
سلام ياللى كنتى
لان الحالية انسانه معرفهاش
‏قال Desert cat
Hook
انا برضه بضم صوتى لصوتك وبقلو كويس انهم ما شاركوش
مش علشان الاسباب اللى ذكرتها انما علشان كانوا هينسبوا الفكرة لنفسهم
ويتباكو لو اعتقل منهم حد مع انهم فى الاساس بيبلغوا على بعض اساسا
تحياتى
‏قال Desert cat
rommantic
طبعا ميرسى جدا على كلامك وزوقك
بس مش انا اللى كاتبه المقال ده انا ناقلاه من عند دكتور علام
مودتى
‏قال Desert cat
Abo 7anf
بالظبط كدا يا ابو حنف انت كدا فهمتهم فعلا على حقيقتهم بيتلونوا حسب المصلحة الشخصية
تحياتى
‏قال Desert cat
david santos
many thank's M.r Dived
‏قال Desert cat
somaa mahaba
ومالوا اشربى اشلاى براحتك بس مش تنسى تدفعى الحساب
بالنسبة لرئيس جمهورية نفسى عمره ما وعد وأخلف .... حتى لو على حساب نفسه لانه بيعرف يحترم كلمته كويس اوى
يمكن الظروف منعته يرجع عندك تانى
تحياتى
‏قال Desert cat
dr_modymodak
رنا مع دكتور علام ويرحم والده
وانا بشكره جدا على موافقته على نشر البوست فى بلوجى المتواضع
بالنسبة للاخوان انا كمان رافضه سياستهم ورافضه وجودهم بالمرة
هههههههههههه
اشكرك جدا لذوقك يا دكتور
تحياتى
‏قال Desert cat
momken
انا معنديش مانع انهم يبقوا حزب بس مايتجروش بالدين
مش يبقى الوسيلة اللى بيشتروا بيها الكرسى
مش يبقى وسيله وهدف لتحقيق مصلحة شخصية
ميبقاش وسيلة للضحك على العامة والجهلاء من الناس
شرفتنى برايك
تحياتى
‏قال Desert cat
Foxology
وانا كمان هقول زيك
ربنا يهدى
تحياتى
‏قال Desert cat
appy
معلشى يا ابى خليها عليكى يا قلبى
مش هوصيكى لو جرى لى حاجه تبلغى على طول انتى عارفه بقى
الاخوان معروفين من زمان اوى منذ قديم الازل وتاريخهم الدموى خير شاهد
انام موقفهم من الاضراب فهنا كانت الاضاءة عالية اوى اوى لدرجة بروز صورتهم قدام المجتمع ككل
نورتينى يا جميلة
‏قال Desert cat
Anonymous
يعنى الاخوان دلوقتى نهر الفرات ولا هما الكلاب اللى هيمرو فيه
ولا ايه بالظبط
مش كفاية انك داخل انونيمس
يا شجااااااااعتك ولا يا بجاحتك
‏قال Desert cat
عمو احمد
ماهو للاسف يا عمو فى كل موقف بتلاقى العباية بتوسع عليهم
لحد ما خلاص سقطت منهم خالص وبان المستخبى تحت عباية الدين
تحياتى
‏قال Desert cat
مصطفى فتحي
ميرسى جد استاذ مصطفى
تحياتى
‏قال Desert cat
Dr. Eyad Harfoush
انا بشكر حضرتك دكتور اياد على ارائك السديدة وبوستاتك المتميزة وفى انتظار كتابة السلسلة عن المتأسلمين
خلينا نعرف ما خبى التاريخ
بالنسبة للتدوينة المذكورة انا سعيدة جدا بكون اسمى اتكتب فيها لانه حقيقى شرف كبير ليا ... انا قريتها اول ما نزلت وقريتها بالامس ... وان شاء الله ابدى رأى فيها
شرفتنى واسعدتنى جدا بحضورك الجميل
احترامى وتقديرى
‏قال Desert cat
ملك الكبدة
بالظبط يا ملك
انا كمان شميت ريحة نتنة فى موضوع انسحابهم من الاضراب
ولفت نظرى اكتر احد الاصدقاء الاعزاء
عموما قريبا ستسفر لنا الايام عقب محاكمة الشاطر ورفاقه
ولا يسعنى الا ان اختم الرد بفعلا عالم وسخة اخوانية مصلحجية كفتجية
هههههههه
نورت يا ملك
‏قال Desert cat
فرنسا هانم
احلى شاى مظبوط لاحلى فرنسا فى الدنيا
نورتينى
‏قال Desert cat
nody_1987
اه اصلهم رايحين فرح ولاد المصلحجية علشان عايزين دعوة
ياخى دعوة لما تخلصنا منهم قادر يا كريم دول مش عايزين رز باللبلن يا حبيبتى دول عايزين الهوبر كله
‏قال Desert cat
سكــر
شرفت يا احمد
سواء برضه كنت مع او ضد
‏قال Desert cat
deja vu
انا اسفه لو كنت اخطأت الفهم
بس انا لما بصيت فى الفييدنج عندى لاقيت مدونة حضرتك اخر حاجه يعنى فى نفس التوقيت اللى الانونيمس ترك فيها شتيمة
عموما انا اسفه مرة تانية
وياريت متزعليش
شرفتينى
‏قال Desert cat
الربان
بالظبط يا استاذى
طالما المصلحة الشخصية هى الاهم لكل من يريد السلطة فعليه العوض فى المحروسة
ولشعبها الله
احترامى وتقديرى
‏قال Desert cat
رئيس جمهوريه نفسى

يا محمود ده موقف من آلاف المواقف
واللى اخرهم انتخابات المحليات لما لقيوا نفسهم ورقة واتحرقت قالوا نقطاع بس هنشترك ايه الشيزوفرنيا دى انا مش عارفه بصراحة منين هيقاطع ومنين هيشترك ده اهبل ولا ايه مثلا مش عارفه بامانة
وتتوالى المواقف ويتوالى كشف الاقنعة
نورت ياريس
‏قال Desert cat
Anonymous
هو بالرغم من حضرتك طلبت انى منشرش الرسالة بس قلة ادب بقلة ادب بقى انا نشرتها
علشان اجاوب على اسألتك وحضرتك تجاوب على استفساراتى
.................
ممكن سؤال
اتفضل اسال
.................
فين الاخت قطة الصحراء؟؟
انا هنا الا هو حضرتك داخل تسيب الرسالة دى لمين لما انت بتسال عليا ؟؟
..........................
يا ريت الرد ده ما يظهرش لانه رسالة شخصية ليكى
لاء معلشى انا معنديش خصوصيات
......................
خفي شوية
ليه هو حد اشتكا لك انى تقيلة ولا حاجه ده انا حتى وزنى مثالى
...............................
الناس كلها عارفه الاخوان وتاريخ الاخوان
ما هو انا عارفه ان الناس كلها عارفه تاريخ الاخوان بس لو حضرتك كنت قريت البوست كنت هتعرف ان مش انا اللى كتباه اصلا ولو انى اشيد حقيقى واشكر اللى كتبه وبقوله تسلم ايدك ويسلم كيبوردك
......................

انتى بتفضحيهم قدام مين
قدام العدم منتمين ولا المنتمين
اللى انتى بتعمليه ده يا استاذه تضيع وقت
بتضيعى وقتك في حاجات فاضية
لاء ما هو انت متعرفش انى فاضية ومش لاقيه حاجه اعملها فقولت اتسلى
.......................
تاريخ الاخوان محفوظ ومعروف بكل عيوبه ومساوئه
ما انا عارفه انه معروف بكل عيوبه مساؤه بس برضه قولت حاجه كدا للتذكرة زى صلاة الجمعه هى الناس مش بتكون عارفه اللى الامام بيقوله بس اهو للتذكرة لعل وعسى يكون حد مسمعش قبل كدا يسمع المرة دى او كلمة سقطت منه قبل كدا يركز فيها المرة دى وهكذا
..........................
مش عارف ليه حاسس بكراهية شخصية مخلياكى زى التور بتلفي فى ساقية
انا زى التور الله يكرم اصلك ويكرم تربيتك عموما انا متعودتش ارد الاساءة بالاساءة
............................
سب وشتيمة الاخوان وموضوعات مكرره
فوقى بقى
بطلى قلة الادب دى
دى قلة ادب
وقلة تفكير
وقلة زوق
برضه واضح التربية والنشئة الحسنة الله يكرم والديك عرفوا يربوا بالفعل
.........................
اصحى يا ماما وارجعى زى الاول
ايه وان مارجعتش هتحط السيخ المحمى فى صرصور ودنى ولا ايه علشان بس اكون عارفه ايه اللى هيحصل لى
.....................
بلاش تضيعى وقتك في كراهية مش هتقدم ولا تأخر ولا تفيد الناس
ما انا قولت لك قبل كدا انى فاضية حتى لو مش فاضيه افضالكو
..............................
على فكرة انا كنت هسيب اسمى
بس هعمله باسم مجهول ..مش لانى جبان زى ما عقلك هيصورلك
وكمان دخلت فى عقلى وعرفت هيصور لى ايه ده انت مكشوف عنك الحجاب بقى بركاتك يا شيخ
.........................
وانما لانى اتخنقت منك ومن تفكيركواسلوبك
ومعدش ينفع معاكى كلام
طيب وبتيجى هنا ليه لما انت مخنوق منى ده انت شكلك بتحب الخنقة اوى
.........................
سلام ياللى كنتى
لان الحالية انسانه معرفهاش
لاء لاء لاء وحياة والدك كدا الناس تفكيرها يروح لبعيد
يعنى المفروض توضح كنت مثلا خالتك عمتك بنت الجيران
انما كدا لاء سمعتك تبوظ وانا يهمنى سمعتك
كنت ايه بقى ها ... عايز توحى لى بايه وعايزنى اقعد افكر واستنتج مش هيحصل لسبب بسيط
انى والله العظيم ما اعرفك يا بنى
ولا يشرفنى اعرفك
لان كل معارفى واصحابى ناس محترمين مش بيروحوا يشتمو حد فى بيتهم ويقولا له انت قليل الادب وانت صفاتك ومواصفاتك وفى الاخر يقولوا يا اللى كنت
بقولها لك تانى كل معارفى واصحابى ناس محترمة اللى بيشتمهم مش بيردوا عليه بيسيبوه مع نفسه كدا لحد ما ينشف وانا بالمثل
ولو كنت بالفعل قريت التدوينة كنت هتعرف انى نقلاها
هععععععع
يلا بقى وياريت مش تورينى طلتك البهيه هنا تانى يا اللى مش كنت
‏قال Unknown
الكلام فيه نقاط سليمه تماماً
وفيه كمان شوية حجات عليها اختلافات

حقك أن تختلفي مع من تشائين كما تشائين
‏قال shreen
صديقتى القطة التى هى بالف الف اسد

هل تعلمين
استراتيجيه الحرباء فى التلون حسب البيئة المحيطة بها

كى تستطيع البقاء

هى ذاتها استراتيجيه الاخوان

انهم يتلون حسب اللحظه
باللون المناسب الذى يفيد مصالحهم
وبقائهم

واستمرار وجودهم بالصورة

هم يفعلون اى شئ
ويقولون اى شئ

كى يصلوا
كى يظلوا
كى يبقوا

بغض النظر عن الشعارات التى يرفعونها
والكلمات المنمقه المحسوبه

انها ببساطة استراتيجيه الحرباء
‏قال micheal
مقال هابات هايل بجد..شافي و وافي لكل كبيره و صغيره
أنا طول عمري بقول أنهم منافقين و لا يهمهم الا الكرسي و بس
تحياتي
‏قال محمد حمدي
ميرسى جدا جدا جدا ليكى وللدكتور مخنوق

أديتونى ماده تحفه هنفذ بيها حاجه فى دماغى كده

ميرس جدا لموضوعك الجميل
‏قال Me, myself, and her
مش زعلانة يا قطة

ابقي شرفيني دايما في البلوج بتاعي
‏قال Rania Lelah
بصى انا كنت متابعة اخبار الاضراب الخاص بمصر فى العالم بحكم انى بترجم مقالات الوكات الاجنبيه عن مصر
المهم
جه فى كذا خبر ان الاخوان يعلنون رسميا تضامنهم مع الاضراب و الخبر دة جه فى كذا وكاله
فرحت و قلت يا قوى عينا على القوى

لقيت صديقى بيوقلى متفرحيش كدة قوى انا اخاف انشر الخبر الاقيهم رجعوا فى كلامهم
لان ببساطة هما ملهمش كلمه
دة الى اتقالى
بس عامه رايى فى الاخوان عموما انى مش هدخا الدين فى السياية دة لو كنت فعلا بتعملوا بالدين

تحياتى
صباح الخير .
لو هتكتبى بوست طويل تانى زى ده ابقى سيبيلى مج شاى عند عنوان البوست
تحياتى
‏قال صالح سعيد
دعينا نعترف ان الاخوان المسلمين لهم كيان واضح فى المجتمع المصرى
والناس دى كمعامله كويسين جدا فعلا ومحدش يقدر ينكر ده
لكنهم عند الوصول لنقطة السياسه لا يصبحون على نفس المستوى من القدره على اكتساب ثقة الناس
وتاييد الناس لهم فى الانتخابات الاخيره نابع من كره الناس لكل ما هو حكومى ما عدا المرتب
لست مع كلمة الاخوان المسلمون فكلنا مسلمين
وخدى بالك انتى هتجيلك تعليقات مؤذيه بسبب تناولك لهذا الموضوع الشائك
اتمنى يبقى عندك القدره انك تتحملى التعليقات
تحياتى
‏قال غير معرف…
قطه الصحراء الشقيه

اولا احب احييكي و احيي دكتور علام علي الجهد المبذول في تجميع كل المعلومات القيمه دي و اللي قريتها كلها و مع اني مش من هواه المواضيع الطويله بس مكتوبه بحرفيه شديده و ملحق بيها ادله يعني مش كلام علي الفاضي و بس

شوفي ياقطه انا ماكنتش اعرف كتير عن الأخوان
بس لما بدأت اقرأ عنه حسيت انهم بيتخذوا من الدين عباءه ليهم عشان يعملوا كل اللي نفسهم فيه و يجمعوا حواليهم اكبر قدر من المريدين و يأثروا في عقول الناس بشكل خاطئ

شوفي انا مقتنعه بحاجه ان اي حد بيمسك سلطه بيختلف 360 درجه في شخصيته عن قبل مايمسك السلطه دي سواء بقه الأخوان و لا اي سلطه تانيه

عايزه كمان اقول حاجه انتي بتقولي رأيك و احنا كمان بنقول رأينا
ممكن نتفق ممكن نختلف بس عمرنا مانقل أدبنا علي بعض
كل واحد حر في رأيه
فيه ناس اصلها ياقطه بتنصب نفسها حاميه الحمي و تفضل تقول احنا عملنا ايه و سوانا ايه احنا اساسا مانسويش و للأسف مابيبصوش لنفسه
صدقيني ياقطه لو كل واحد بدأ بنفسه صدقيني ممكن يكون فيه أمل

البني ادم مننا رأي و اللي عنده ضحاله في الفكر صدقيني بيبان و اللي مخه موزون بيبان
عايزه في الأخر عشان ماطولش عليكي اقولك اني بساندك و بحترمك و بعتز بصداقتك
انا كنت فاكر ان انا علقت بس مش لاقى التعليق
يبقى انا كنت نايم بجد
نعلق تانى بعد ما صحيت
ــــــــــــــــــــــــ
انتى عارفة بسسب انهم قاطعوا الاضراب
الاضراب كان له طعم مصرى
طعم الشعب اللى بيحب مصر
مش الناس اللى بتدور على السلطة
انا اول مرة احس ان الشعب من غير الاخوان
له كاريزما تانية كده
بجد انا فرحت انهم مشتركوش فى الاضراب
و يا ريت يعزلوا نفسهم عننا احسن
لان احنا بنحب مصر
مش بنحب كرسى السلطة
على اسم مصر التاريخ يقول ما شاء انا مصر عندى احب و اجمل الاشياء
تحياتى ليكى
‏قال الميكروباص
دي مشكلتهم- يا ويلك لو عاديت الاخوان يا ويلك، ويا ويلك لو قلت رأي مخالف لهم، يشكون من النظام الحاكم ويقولون عليه انه غير ديمقراطي وهم أول ناس لا يقبلون الرأي الآخر- ده طبعا غير أنهم أوصياء على المسلمين، فهم أول من قاموا بقسمة الشعب المصري إلى مسلم إخواني ومسلم غير إخواني
‏قال Desert cat
أنونيمس
شكرا يا دكتور على زيارتك
شرفت
‏قال Desert cat
shreen
صديقتى الغالية اوى
والله انا بقف قدام كلامك بحس انى حاجه صغنونة كدا ومش بكون عارفه اقولك ايه
ميرسى اوى اوى على زوقك

بالنسبة لاخواتنا البعدة
فالبفعل زى ما ذكرتى انهم كالحرباء يتلونو حسب المصالح الشخصية
لكن هيهات زال القناع
نورتينى يا جميلة
محبتى
‏قال Desert cat
micheal
وهنا وضحت نظريتك ونظرية كل واحد كان حاسس بالنفاق من تجاههم
شرفتنى
تحياتى
‏قال Desert cat
Mohamed Hamdy
العفو على ايه
ده اقل واجب ممكن نعمله انا والدكتور مخنوق
علشان نعرف الناس حقيقتهم
شرفت
‏قال Desert cat
deja vu
طيب الحمد لله
انا يشرفنى جدا زيارة بلوجك
تحياتى
‏قال Desert cat
Rania
انا برضه فى الاول قولت زيك كدا يارانيا
لكن للاسف انا جالى هاجس وقالى مش تصدقى
وانتصر عليا الهاجس
ورجعوا فى كلامهم بتوع التلات ورقات
تحياتى
‏قال Desert cat
تــــايه ومش تـــايه
يا صباح الفل
انا هبقى احط لك جنب العنوان شاى وقطعة كيك
علشان تفطر بالمرة
انت داخل على طمع باين
ده انا كنت لسه بدعى لك تنجح وبامتياز
فين البيبسى كنز بتاعى بقى
نورت
‏قال Desert cat
اجندا حمرا
صديقتى الغالية اوى اجندة
بالظبط زى ما ذكرتى
واخدين من الدين عابية بس وسعت عليهم اوى لحد ما وقعت وظهر المستخبى وزالت كل الاقنعة
بالنسبة للى معيينين نفسهم رقباء على غيرهم ويالسموا ويكفروا ويفرضوا اراء براحتهم فدول بالجزمة اللى فى رجلك يا روحى ولا يهمك اى حد
انا سعيدة اوى بيكى وبهارت
وربنا يخليكى ليا يا احلى اصدقاء فى الدنيا
محبتى ليكو انتوا الاتنين
‏قال Desert cat
مواطن مصرى نايم
صديقى العزيز
والله يا حضرة المواطن اول مرة اشوف رد على الموضوع ده
والله على ما اقول شهيد
ياباشا الحمد لله انهم اعتذروا عن الاضراب باسبابهم اللايلة للسقوط دى علشان الناس اللى بتصدقهم تكشفهم على حقيقتهم
وكمان كان هينسبوا الاضراب ليهم انا عارفاهم دول لو حد كح يقولوا لك احنا اللى قزولنا له كح
ههههههههه
ربنا يشفى
نورت يا حضرة المواطن
‏قال Desert cat
لورنس العرب
هههههههههههههه
انت هتقولى خير نموذج عندى فى بوست لوحدة اسفل هذا البوست
انت مش معانا يبقى انت امن دولة
اذن سنقيم عليك الحد خسئت يا ابن ابو مش عارفه مين الاسامى الغريبة بتاعتهم دى
شرفت البلوج
تحياتى
‏قال Dr. Diaa Elnaggar
أزال المؤلف هذا التعليق.
‏قال Dr. Diaa Elnaggar
عزيزتي قطة الصحراء

لخطأ صغير في تعليقي السابق اعيد نشره من جديد


أولا أحييك على شجاعتك المدنية والأدبية والدينية وكل أشكال الشجاعة قاطبة.

ثانيا: عنوان البوست "الأخوان المتأسلمين"، يمكن أن يضاف إليه الألقاب التالية، إذا سمحت لي بالاقتراح:

الأخوان المستسلمين

الاخوان المسالمين

ليكونوا في الآخر "الاخوان السالمين"0،

شوفتي كمية الأوصاف التي تنطبق عليهم من أصل كلمة "الإسلام" الذي لا يعرفون عنه الشيء الكثير !!!!!!!!!0

ثالثا: تحية كبيرة لاسلوبك الكوميدي الساخر.

رابعا: لا أدري لماذا لم ينتبه أحد في تعليقاته إلى حسن اختيارك للأغنية المصاحبة للبوست، وهي فعلا كده:

بانوا بانوا على أصلكو بانوا !!!!!!!! 0

عميق تحيتي وخالص مودتي

ضياء
‏قال Desert cat
Dr. Diaa Elnaggar
دكتورنا الجميل دكتور ضياء
انا بشكر حضرتك جدا على حسن ثنائك
حقيقى كلاماتك شرف ليا ووسام اعتز بيه
بالنسبة للمتأسلمين
فهم لم ينتبهو لاى شئ واقدر اقولك انهم مقروش البوست اصلا هما داخلوا يهاجموا من خلال العنوان فقط لا غير
يعنى لا سمعوا الاغنية ولا قروا البوست وهكذا هم
يحكمون دائما بسطحية وياخذون بالظاهر متخيلين ان الجميع مثلهم شعارات جوفاء لا غير
تشرفت جدا بتعليق حضرتك
احترامى وتقديرى
‏قال الميكروباص
أحب أضيف شيء هام عن الاخوان المسلمين
وهو ان من ينتقدهم دائما يتهمونه بأنه يحقد عليهم
كذا مره عندما أتعرض لهم بالنقد يقولوا لي انت بتحقد علينا
مش عارف الحقيقه أحقد عليهم ليه- من الجمال اللي هما فيه ولا على ايه بالظبط؟
‏قال ِAhmed…
الإخوان المتأسلمين لا سياسة ولا دين

كل شيء مطوع لهدف واحد . الوصول للكرسي والحكم
تناقض ما بعضه تناقض وتفصيل للدين بالمقاس على رغباتهم وأهوائهم
بيتنططوا علشان الإنتخابات وعلشان حماس وعلشان اي شيء يخصهم
لكن عمرهم ما وقفوا مرة اي وقفة تخص مصر . أو تهم المواطن المسكين أو ترفع عنه ظلم او ترد له حق
..
اين هم من حادث العبارة
تصدير الغاز المصري لإسرائيل
الغلاء - الإحتكار
واين هم من إضراب ابريل
صفقة مع الحكومة تخلص كل شيء
..
‏قال Unknown
العريان: لا عصيان مدنيا ولا انقلاب عسكريا..وستبقى مصر لكل المصريين

http://amwalalghad.com/index.php?option=com_content&view=article&id=103423:

المشاركات الشائعة