هو النهارده مش بيفكركوا بحاجه ؟؟؟ !!

...... اه فعلا النهارده الجمعة بس مش اليوم عموما انا قصدى التاريخ 4/4
بالظبط كدا يوم اليتيم .....طبعا زى ما البعض عارف انا عضوة غير فعالة اوى فى جمعية رسالة طبعا بسبب ظروف شغلى انما لو فاضية انا كنت سويت الهوايل ... طبعا كدا وكدا لانى مش فاضية المهم بقى مش هطول ... قولوا لاء طولى براحتك ما هو اصلنا فاضيين لك .... من كام يوم لاقيت قافلة من رسالة جايين يزورونى ... وخسرونى عزومة شاى بصراحة وانا كان هيجينى سكتة قلبية بعد ما مشيو اصلى بموت على الجنية .... المهم لاقيتهم بيقولوا لى هتعملى ايه يوم الجمعة ... قولت لهم هنام الا اذا عزمتونى على رحلة الغردقة شرم .. كدا يعنى ... لاقيت احمد ومحدش يقولى احمد مين لانى لو قولت مين احمد محدش هيعرفه يبقى ليه ما علينا .. لاقيته بيقولى انى اخاف الله انا راجل مش بتاع رحلات الا لو حد عزمنى معاكى ... ساعتها هشكره بشدة ... اممممم اوكى يا عم التقى ما علينا خلصونى انا مش فاضية طابين عليا زى القضى المستعجل كدا بربطة المعلم عايزين ايه .. قالى هتيجى يوم الجمعة الساعه كاااام ؟؟؟ تانى يابنى فى ايه قالى 4/4 يا نانا .. اها انتوا هتعملوه فين .. قالوا لى دار رعاية الطفل وكمان رحنا الشئون الاجتماعية وهنجيب من هناك 100 طفل بخلاف ان جمعية اشراقة لذوى الاحتياجات الخاصة كمان هتجيب اطفال من عندها وكمان معانا الغد المشرق ودول هيجيبوا اطفال من بيوتهم ويرجعوهم تانى .. هنا وبرقت .. انت يابنى انت وهو واعيين للكلام اللى بتقوله .. يعنى اطفال من الشئون الاجتماعية على الاطفال الاساسين اللى موجودين فى الدار وكمان اطفال من إشراقة والغد المشرق هو المكان هياخد كل ده ... قالوا هياخد تتحل المهم انتى معانا .... على البركة هتبدأوا الساعه كام ؟؟؟ عبودى نط فى الكلام وقالى احنا اصحاب الدعوى يعنى احنا المؤسسين يعنى تكونى موجودة من الساعه 10 ... ليه ياعم احنا هنبيع لبن ... قالى معلشى بقى علشان نرتب كدا ونشوف نظام القعدة هيكون ازاى وهنبدأ لان الناس هتبتدى تيجى بعد الصلاة مباشرة ... قولت خير ان شاء الله ... طبعا مش عرفت اصحى بدرى ... والبنات زمايلى فى رسالة عملوا لى هوس كل شوية تليفون واقولهم جاية .. وارجع انام تانى .... ونزلت بعد الصلاة ... هو مش لازم اصحى براحتى برضه ولا ايه ؟؟؟
وصلت هناك الساعه 2 .. طبعا لاقيت السادة الحضور ايه ددددددده ... ده اليوم كان بتاعهم هما مش بتاع الايتام ... مدير الدار وصحابه وقرايبه وعيلته باين ... المسؤلين عن الشئون الإجتماعية ونصهم ستات ... طبعا المسؤلين عن جمعية اشراقه وعلشان اللى مأساسها واحدة ست فكانوا كلهم ستات برضه ... برضه مدير المستشفى العام وكام دكتور كدا ايجو سلموا ومشيوا على طول .... وكمان مؤسسين جميعة الغد المشرق والاعضاء ... وجمعية رسالة واعضائها بقى اللى هما احنا واللى بجد بجد كانوا منورين الدنيا كلها ... طبعا مين يشهد ...عموما اترككم مع الصور وارجع تانى

انا دخلت والعرض ده شغال ... وقفت اتفرج لاقيت بنوتات رسالة جايين زعلانيييييين لاء وكمان وصلت متاخرة ومش رحت اسلم عليهم واقفه لو حدى وعمال اتفرج ....ولما قولت لهم انتوا كدا عملتوا لى ازعاج وقطعتوا خلوتى وانا بتفرج والجو حر وممكن اعمل اى حاجه دلوقتى .... راحوا جابوا لى حاجة ساقعة .. عيال مؤدبة والله

دى طفلة عمرها تقريبا 45 يوم هى فى الاصل حاجه طول القلم بالظبط .... مين بقى اللى يجى لها قلب ترمى البراءة دى فى الشارع وتسيبها وتمشى ... حقيقى حسبى الله ونعم الوكيل ... وللأسف البنت دى فى منها كذا حالة موجودة فى دار الرعاية يعنى مش الفريدة من نوعها


شايفين شكل الاطفال يفرح ازاى ... بالمناسبة اللى واقف فى الصورة ده يبقى احمد .. اى حد يتعرف على القفا يقوله انت احمد اللى فى رساله .. ههههههههه .. طبعا انا عارفه هيشوف البلوج ومش بعيد يقطع عليا الطريق وانا ماشية

الصورة دى نيرة اللى مصوراها علشان فيهم اخوها ... وعلشان مش انا اللى مصوراها مش عرفكوا عليهم انا هكتفى بقول لفيف من السادة الحضور

ده عرض الحصان

طبعا اليوم هنا مكملش لان كان فى عرض العنب وعرض تانى مش عارفه اسمه ايه بصراحة .. بس انا مركزتش ومصورتش ...

ما انا كنت بلعب بقى هو انا كنت فاضية .... دى فرصتى بلونات وكورة وحوارات ... والفرصة بيتجى فى العمر مرة واحدة ينفع اضيعها وينفع اصلا الاقى لعب وملعبش ... دى حتى يبقى عييييب

كل سنة وانتوا طيبين ... ادعوا لى شهر 4 ده يعدى على خير اتسرقت فيه السنة اللى فاتت تحديدا يوم 9/4 ومن اول ما الشهر ده هل عليا ببركاته كدا وانا قلبى بياكلنى دعواتكوا وكتروا من الدعاء الايام دى خصوصا وان 9/4 قرب اوى

Comments

احجز اول تعليق
واشوف يوم اليتيم وراجع
تانى
عامة كل سنة وانتى طيبة
وكل الاطفال الايتام بخير وسعادة
وتعيشى وتفتكرى يا ست نانا
وربنا يستر ويعدى شهر 4 على خير
تحياتى ليكى
خالد
fatima said…
دا عيد ميلادك اللى فى 9/4 يا قطقطوة ؟
fatima said…
آه
ربنا يسعد قلبك زى ما بتسعدى القلوب الصغنونة الحلوة دى
و الست اللى ترمى ملاك برىء زى البنوتة الجميلة دى ...
الواح دممكن يقول عليها إيه بس ؟؟
ربنا يسامحها
و يعوض كل يتيم باللى يستحقه من رحمة و سعادة
و قلبك فيه الخير يا قطتى
طب مش كان واجب ليكى برده بدل منتى واقفة تصورى الحصان
الي بصراحة مش قادر اقتنع لغاية دلوقتى انه حصان

ياله مالينا المهم
مش كان واجب عليكى برده تعزمى الاخ الى راكب على عالعجلة ورا دة شايفاه
الراجل وقف ونفسه يتفرج على الحصان
كنتى
ناديه وعزميه يتفرج مفيهاش حاجة يعنى

لكن ياله مش مهم
اهو اتفرج برده
مش مشكلتنا بقى اتفرج من بعيد اتفرج من قريب مش مهم
هو حينهم يعنى
مش كفاية انه طل فى مدونة القطة
يعنى احسن من اجدعها محطة فضائية
والمحطات المجاورة كمان


المهم

كل سنة وانتى طيبة ياقطة
ول سنة وكل ايتام مصر بخير وسعادة
وان شاء الله
يلاقوا الى يساعدهم انهم يحلموا ويحققه احلامهم

تحياتى
احسن حاجه تعملى بيات شتوى لغايه شهر 4 ما يعدى
لكن بيات شتوى نص نص
يعنى متطلعيش بشنط ولا فلوس ولا موبايل
ربنا يوفقكم فى رسم البسمه على شفاه اليتيم
hui mu han said…
يوم اليتيم فعلا فكرة جميلة
ورسالة كويسين قوي

يلا معاكي ربنا
blackcairorose said…
ربنا يسترها معاكى ومتتسرقيش ياقطة الا لو حد سرق قلبك فده موضوع تانى

وياريت برضه يبقى فى ابريل!!
يوم اليتيم عندى يتيم فعلا لانه يوم وفاه والدى رحمه الله
حلوة عصفورى النونو دى ؟

ده واجب علينا كلنا تجاه الايتام كفاية وصية الرسول بخصوصهم

-------------
مين احمد باه ؟
وش مطلع لسان :)
Desert cat said…
همس الاحباب
مبروك كسبت جايزة اول رد
Desert cat said…
وانت طيب يا خالد
ربنا يجعلها فى ميزان حسناتكم جميعا ان شاء الله
Desert cat said…
fatima
لاء انا عيد ميلادى يوم 25/4 يادوب تحوشى من دلوقتى بقى
ههههههههههههه
9 / 4 ده كان الذكرى الهباب اللى اتسرقت شنطتى فيها وانا ماشية فى اشلارع وقضيت بقيت الشهر اقسام ونيابات
اعاااااااااا
Desert cat said…
fatima
اللهم امين
تعرفى يا ام يوسف انا اول ما شوفت الاطفال افتكرت حضرتك وحنية قلبك والله وقتها وقفت دعيت لك ربنا يرجع لك يوسف بالف سلامة ومش يحرم اى ام من اولادها ... طبعا مفيش اى وجه مقارنة
بس استغربت ان فى نناس بترمى ولادها وناس هتموت على فراق اولادها
Desert cat said…
زعيم كمورا مورا
ههههههههههههههه
ايه يا زعيم الراجل بتيفرج من نفسه تصدق مش خدت بالى انه فى الصورة اصلا
يلا اهو كدا دخل التاريخ
كل سنة وانت بخير يا زعيمنا
Desert cat said…
فرنسا هانم
ياروح قلبى انا طول السنة مرعوبة بس رعبى زاد من اول شهر 4 .. ربنا يسترررررر
انا بفكر فى اليوم ده اعمل اضراب لوحدى ومش اخرج
كل سنة وانتى بخير
Desert cat said…
hui mu han
اللهم امين
اه فعلا جمعية رسالة كويسة بحس فيهم انهم ايد واحدة كدا ونسا همها الخير وبس
هو انا بحبهم من شوية
تحياتى
Desert cat said…
blackcairorose
حبيبة قلبى والله بكون سعيدة جدا بتعليقاتك الجميلة
نورتينى يا احلى روز
Desert cat said…
صوت من مصر
الله يرحم والدك يا محمد
تعيش وتفتكر
Desert cat said…
عاليا حليم
الاغنية حلوة علشان انتى زى القمر وعنيكى جميلة علشان كدا شايفة كل حاجه حلوة
احمد بقى يا حبيبتى يبقى زميلى اللدود فى جمعية رسالة
هو شاب حليوة كدا شايل الجمعية على اعتقاه بجد شاب مسؤل مسؤل يعنى وهو بالفعل اد المسؤلية
محبتى ليكى
Desert cat said…
رئيس جمهوريه نفسى
ان شاء الله
appy said…
طيب ده ينفع مش تقولى ليه بدل ما انا قاعده ساكته والعيال اللى هنا قالولك هنروح وكلهم بيقولوا وخلاص يا لهوى ياانا كده ماشى
عموما ربنا يكتب لكى بها حسنات يا رب يا نونا
ويعدى الشهر على خير وعموما لو حصل حاجه انتى بس كلمنى وانا اقفل التليفون على طول ولا اعرفك ههههههههههه
كل سنة وانتي طيبة , وكل الاطفال طيبين , واكيد لو حد قدر يرسم ابتسامة علي طغل ارتبطت حياته بالشقاء من بداية مولده تسوي الدنيا وما فيها ..

ربنا يبعد عنك الحرامية بمختلف انواعها خاصة الحرامية اللي فوق " مش فوق السطوح طبعا ..الحدق يفهم بقي"

مع خالص تحياتي
semsema said…
اولا بحييكى على اللى عملتيه انت واصحابك باستثناء انك روحتى الساعة 2

وخلى بالك على نفسك بقة

حاولى تستخبى الشهر ده

تحياتى
Desert cat said…
appy
يا حبيبتى انا افتكرتك حتروحى عندكو خصوصا واننا متكلمناش فى الموضوع ده
عموما تتعوض يا قمرى الجايات كتير
Desert cat said…
الفارس الملثم
وانت طيب
انا ماليش دعوة بالحرامية الكبار اللى تقصدهم انا بتكلم عن الحرامية اللى مالية الشوارع
تحياتى
Desert cat said…
semsema
شكرا يا قمر وربنا يستر ويعدى الشهر ده على خير
تحيااتى
كل سنه و الايتام بخير و تعيشى لكل احتفال و انتى طيبه
اهم حاجه نفضل فاكرينهم بعد الاحتفال
Desert cat said…
صيدلانيه طالعه نازله
ان شاء الله يا دكتورة
ربنا يعمل اللى فيه الخير
نورتينى
oceaneyes said…
عسسسسسسسسسسسسسسسسسل

عسل اوى بجد العيال الصغننة دى

بجد ما شاء الله عليهم ..ربنا يحميهم ياااااااااارب

انا مش فاهمة مين ده اللى يجيله قلب يرمى عياله ويسبهم يحملوا لقب " ايتام " ..سبحان الله بجد

ده فى اللى هايموتوا على عيل ومش لاقيين


بس هانقول ايه ..

!!


الحمد لله على كل شىء



تحياتى


:)





صحيح

ما تقلقيش يا جميل ان شاء الله الشهر ده هايعدى على خير ..
Desert cat said…
oceaneyes
يارب يعدى على خير
دعواتك كدا

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز