حتضرب . ولا حتبلطـــج ؟؟؟

اكيد كلنا كمدونين عارفين ان فى أضراب يوم 6 ابريل ان شاء الله
طبعاً كخطوة لتصحية الشعب اللى اصبح ميت وبياخد على قفاه وهو ماشى ضهره مقطوم من الاسعار اللى كل يوم فى زيادة والعيشة الذل اللى احنا فيها ... فى حد ذاتها جميلة جدا
لكن لحظة من فضلك ... كام واحد من الشعب عارف
احنا مجتمع المدونيين .. طيب احنا معظمنا اللى من أقاليم واللى خارج مصر اساسا ..... فى موظفين مسمعوش عنه ... وفى فلاحين مش عارفين يعنى ايه اضراب اصلا ومش بعيد لو رحت لواحد فيهم قولت له اعمل اضراب ومش تنزل الارض النهاردده .. تلاقيه بيبصلك من فوق لتحت و يخلى عياله يجروا وراك ويحدفوك بالطوب ... طيب الإضراب ده علشان يكون منظم ما هو لازم يكون فى تكاتف للشعب كله .... لازم تضمن مفيش موظف هيخرج من بيته ولا مهندس ولا طبيب ولا اى فئة من فئات الشعب .. علشان تقدر تعمل حركة شلل تامة للشارع ككل ... انما اللى احنا بنفكر فيه دلوقتى اثره مش هيكون قوى ... لان اقدر اقولك وبكل ثقة عدد المضربين لن يتجاوز الألف وإن الألف اضربوا اساسا ... اقدر برضه احدثك بنفس الثقة اللى فاتت ... ان فى ناس حتقولك انا هعمل اضراب ومش خارج من بيتنا وهعتصم .. وهتلاقيه نازل شغله فى معاده ولا كان فى اى حاجه ... نيجى لنقطة تانية وهى ان الإضراب ده حيأثر على مين ؟؟؟
اكيد مش على الحكومة ... لأن الحكومة لو خسرت فى اليوم ده مليون جنيه مثلا .. هتعوضه 2 مليون ... بتفصيل وتأييف قوانين تحت اختراع اى مسمى وكلنا عارفين الراجل بتاع تفصيل القوانين قاعد وجاهز تحت الطلب .... هترفع اسعار السلع الاساسية أكتر ما هى مرفوعة ورفعت ضغطنا معاها ... انا مش بقول انا ضد الإضراب ... بس الإضراب ده هيكون حاجه وقتيه ... يعنى يوم وهينتهى والحكومة لو خسرت هتعرف تعوض خسارتها كويس اوى ومن دمنا احنا ... بس تخيل الطبيب مش ينزل المستشفى .. كام حالة حرجة هيحصل لها ايه ... لو المهندس منزلش شغله ... ايه اللى ممكن يحصل ... طلبة المدارس كدا كدا بيهربوا من فوق السور وطلبة الجامعات بيروحوا يقابلوا فى الكافتريا فالفئة دى خليهم فى حالهم... انا من وجهة نظرى واللى عنده تصحيح ليها يتفضل ... ان الاضراب مش هو الحل ... احنا محتاجين نعمل حاجه اقوى واكبر حاجه تستمر علشان نقدر نأثر .. يعنى عمال المحلة وموظفين الضرائب العقارية ما اعتصموش يوم ورجعوا .... دول مش اتحركوا غير لما طلباتهم اتنفذت أصل يوم دى ما هى الحركة هترجع تانى يوم اللى غاب عن شغله هيتسجل غياب ويتخصم منه اليوم اللى غابة ويادار ما دخلك شر ... انا فرحانة اوى بالصحوة اللى احنا فيها .... وسعيدة ان فى ناس بتفكر وبدأت تتحرك وبتفكر تعمل خطوة ايجابية ... عايزين نقول للحكومة احنا اهوه ... لازم نبقى ايد واحدة ... لازم نكون موجودين فى صف واحد طلبة وموظفين وعمال وفلاحين ومثقفين ... جميع فئات المجتمع .. نقولهم احنا خلاص تعبنا من الغلاء اللى قطم وسطنا قرفنا من القوانيين اللى حبستنا جوا جحور ... عايزين نعمل حاجه تفيد فعلا وتجيب نتيجة فعلية ... من الاخر محتاجين اتحاد ... محتاجين نبقى صوت واحد صرخة واحدة لسبب بسيط إن همنا واحد

محتاجين تعليم افضل ... صوتك مش هيتسمع من يوم واحد اضراب
محتاجين نعيش كويس .. وكرامتنا محفوظة
محتاجين ناكل اكل من غير سرطان
محتاجين نشرب مية نضيفه مش مية ميت فيها حمير ولا مقلوب فيها باكورتات
محتاجين جو صحى من غير تلوث
محتاجين وطن يحس بينا ويحفظ لنا ولادنا اللى اكلهم السمك فى عرض البحار
محتاجين مصالح حكومية نضيفة مفيهاش فساد ولا موظفين مرتشين
محتاجين نقول لاء لغلاء الاسعار
من الاخر محتاجين نعيش كبنى ادمين
تفتكروا يوم هيعمل كل ده؟؟؟؟؟
احنا بدأنا نفكر .. صح .. يبقى لازم نوصل صوتنا صح

Comments

Baker said…
عارفه لو الشعب المصرى بالقوه دى بجد و يقدر يتحد على كلمه واحدة بجد ياااااااااااه حجات كتير اوى هتتغير مش لازم نتحد على الاضراب بس اى حاجة تبين ان احنا ممكن نبقى كلمة واحدة ضد اوضاع غلط انا خايف يجى يوم 6 و محدش يعمل حاجة رغم انى ناوى معملش حاجة كلام فى سرك بس بجد هفرح اوى لو حسيت ان حصل حاجة و هتكسف اوى لو اليوم ده جه منغير حاجة
الطفل بيحبى قبل ما يمشى يا انان وجنين الثوره اتبذر فى رحم مصر خلاص دكاتره الجامعه اضربو والعمال كمان المهندسين موظفى الضرائب العقاريه اضراب يوم6/4 مجرد بدايه فى نسبه كبيره حتتفرج بس الاضراب الى وراءه ناس تانى حتشارك وهاكذا والعدد حيزيد ولما تتكرر الاضربات معتقدتش انى الحكومه حتستحمل
الحكومه عامله زى الملاكم الى ابتدى الماتش واللكمات واستنفذ قوته وسياسه المسكنات مش ماشيه ولا حتحل حاجه ولازم نشوف حلول جزريه الملاكمالى هو الحكومه خد ذربات خفيفه من الاطباء والمعلمين وموظفى الضرائب العقاريه وعمال المحله دلوقتى ابتدت الضربات المركزه من الشعب بدون استثناء او حصره فى صفه معينه او فئه معينه
ابتدء الطفل يحبى واكيد ان شاء الله بكره حيمشى
قتطي

انا كمان معرفتش موضوع الاضراب ده غير من المدونات لان انا لومكنتش بدخل مدونات اكيد مكنتش هاعرف

يعني فيه كتير مايعرفوش
وحاسه ان يوم 6 هيجي ومحدش هيعمل حاجه
بس انا بجد نفسي في يوم كدا زي ايام انور السادات لما عملوا اضراب والحاجات رجعت تاني

يااااااااااااااريت
سلامووووووووووز
وزة
هقولك على حاجه حلوه
انا عن نفسى هضرب بانجووووووووووووو او حشيش وانا فى البيت
fatima said…
واحدة واحدة يا قطتى الحلوة
اللى قعد كتييير مينفعش يقوم مرة واحدة و الا يدوخ و يقع ....
الاضراب دا فكرة هايلة
لو قلتى للناس هنمشى فى مظاهرة أو وقفة احتجاجية ممكن تخاف من البهدلة أو ملهاش فى النشاط الى من النوع دا ...
يبقى الحل المناسب للكل انك تطالبيهم ميعملوش حاجة فى اليوم دا ...
الحياة تقف ...
تفتكرى لو دا حصل حتى بنسبة خمسين فى المية موش يبقى كويس ...
دا معناه ان المرة الجاية هيزيد العدد
و هكذا
دا قياس فطرى لمدى قابلية الناس و رغبتهم فى التغيير
و انهم خلاص زهقوا
و التغيير قادم ...بس
واحدة واحدة
يا قطتى الحلوة
أنا عملت إلي عليا وقلت رأيي في بوست عندي، خلينا نفكر بموضوعية مش نجري ورا فكرة في الخيال. علشان صوت حد يوصل للحكومة لازم يكون عارف هوا بيعمل إية، ويكون عندة الثقافة الكافية للضغط، وفي نفس الوفت علشان الفكرة تنجح لازم يكون في ناس كفاية مؤمنين بيها، وإلا حتقلب زي حركات الضرب والتكسير أيام السادات

ما علينا، كل واحد حر يفهم إلي عايز يفهموا، بجد انا زهقت
اولا
هو العنوان ايه علاقته بالموضوع
يريت توضحيلى النقطة دى لانها مهمة جدا واهم من الاهمية ذات نفسها

فأرجو من دالة المحمكة قصدى منك يعنى انك توضحيلى ايه علاقة العنوان
بنص الموضوع

نلف بقى ونرجع على السريع كدة للنقطة التانية

بصى ياقطة هما المصرين طول مرهم كدة من ايام الفراعنة
والمصرين ناس عايشة
راضية وصابرة ولربها حامدة وشاكرة
ناس بترضى بقليلها
بتتسرق وبتتنهب
وعارفة وبعنيها شايفة
السارق وعارفاه
وكل يوم تشوفه وتضربله تعظيم سلام
طول عمرنا احنا المصرين كدة وحنفضل كدة لحد النهاية
بس زى محنا كدة
فى برده نحية تانية
وجانب تانى
لما بيطلع
دة لو مين واقف قدامهم

وكويس ياستى ان فى بداةي وخطوة اخدوها
احنا كنا فين وبقينا فين
احدى ربنا انان بدينا نفكر
ومدام بدينا نفكر يبقى الجمجمة اشتغلت
يبقى ان شاء الله فيه امل

ولكل شئ نهاية ولكل شئ حدود

تحياتى ياقطة
oceaneyes said…
انا موافقاكى 100 100

كلامك صح بجد ..احنا لازم نوحد كلمتنا قبل ما ناخد قرار بأى شىء ..بس مشكلتنا اننا شعب بتاع كلام ..وشكله مش ناوى يوحد كلمته

مش عارفة بقى

ربنا يسهل


تحياتى


:)
nigro said…
This comment has been removed by the author.
أم أحمد said…
انتي عاوزة الناس ماتروحش الشغل طب أنا هابلغ جوزي وأشوف هايقووول أيه
ده روحه في شغله
انا كنت فاكرة الإضراب ده بس مانشتريش حاجة
طب وأنا أضرب إذاي ماأروحش شغل البيت ده يبقي إضراب حلو أوي
الساحرة said…
بصي احنا محتاجين وطن


بس حكايه الاضراب دي غيرمنطقيه

يمكن لوالناس اتحركوة شويه
ونزلوة الشوارع وفهموة الناس الغلابه كان يبقي ممكن

بس اللي هيتاذي في الحكايه دي الناس واحوال البلد اللي مش ناقصه تدهور
appy said…
اممممممممم انا هضربك انتى ايه رايك
بصى يا نانا انا فاهمه وجهه نظرك يا حبيبتى بس ده بجد وانتى فاهمه انى بتكلم بجد راعبهم الموضوع ده جدا لانهم عندهم علم بيه المشكله مش فى كده انه يوم ويخلص لا المشكله انه هيسيب اثر فى نفسهم ان البلد هتولع خلاص وان ده انذار موجهه للحكومه
ولما نكون الف دلوقتى
المرة الجايه الاف اللى بعدها ملايين
بس فهمتى
باى يا قطتى
قلوب حائرة said…
والله ياقطة أنا انا شايفة أن يوم 6 ده هيعدي زي اي يوم مش لاننا مش ايجابين لاننا لسة جوانا الوعي مش كافي لاي حد ممكن يأثر الاضراب ده وفي ناس لو اضربوا مش هتفرق كتير في مصالحهم حاجة ومش هينوبهم غير خصم اليوم ده والسلام يعني مثلا اغلبية القطاع الخاص مش هتفرق معاه ياريت تكون في وسيلة اقوى ياريت
الربان said…
تحياتي

في رأيي ، ان الإضراب لا يؤدي الي الحلول التي يريدها الجميع.
و مهما الناس اضربت ...التعليم و الصحةو مسكن مناسب و تأمين قوت يومهم... لكن بصراحة شديدة...صعب جدا ان يتم هذا لان هناك من يتحكم في كل هذا...و يتربح المليارات من ورائه..
و لن يوقفهم اضراب يوم او اسبوع..

لكن يبقي املنا الاخير في رئيس الجمهورية
و ندعوا الله ان يهيء له البطانة الصالحة...التي تدله الي الحق و تعينه عليه.

عندي آمل...و آمل كبير ...


تحياتي و تقديري و دمت بألف خير.
ايوية said…
الحقيقة انا معاكى ان الاضراب مش حل
انا ليا راى بسيط ومتواضع ان كل واحد يروح شغلة عادى جدا بس نعلم التجار والحكومة درس مهم جدا بطريقة تانية مش هيحصل حاجة لو كل مصر اتفقت ان يوم مش هناكل خضار محدش يشترى حاجة التجحار غصب عنهم هيرخصوا الحاجة ولالا هتبوظ عندهم ويوم تانى محدش يشرتى لحمة ولا بقالة وهكذا
التحار تيعلموا اننا نقدر نستغنى عن بضايعهم مش هنموت من يوم او انين من غير اكل خالص
تحياتى لموضوعك
يا ريت فعلاً الشعب كله يعمل اضراب
موظفيين عمال فلاحيين أساتذه مدارس و جامعات و طلاب
معادا طبعاً الأطباء و ظباط الشرطه و المطافى
بجد يا ريت يبقى يوم تاريخى 6 ابريل
شكراً ليكى
تحياتى
ياقطه
انتى عايزه بعد النوم الرهيب اللى نمناه ده نقوم من نومنا ونعمل عمل منظم ميه فى الميه كده حلو اوى بس فعلا لازم الناس يكون عندها وعى اللى هيخرج من بيته لازم ميتعرضش لاى ملكيات بالتخريب لانها ببساطه وقفه احتجاجيه مش عمل انتقامى
وعلى رأى المثل العيار اللى ميصبش يدوش
تحياتى
Abo 7anf said…
مش عارف اقلك ايه
انا معاكى اناالاضراب مش هيجيب نتيجه قوى
بس بءده اهى خطوه وانذار
من ممكن حاجه اكبر تحصل
وتمهيد لان يكون عندنا وعى وحماس
وموقف اتجمعنا فيه
وربنا يوفق
انا حضرب و اول ما حضرب حضرب في طهقان

مش مغدياهم يوم 6 و لا مرتبة البيت و حبلطج لهم


بهزر طبعا

انا فعلا مقتنعة بالاضراب و شايفه انه حيجيب نتيجة ان شاء الله بس يا رب الحكومة تصحى و تحس بينا


اوروفوار
نسيت استاذنك اني احط اللوجو عندي و انشره في الايميل

اوك؟
Desert cat said…
Baker
ما هو ده كمان اللى قالقنى ان احنا نيجى يوم 6 /4 ومفيش اى حاجه تتنفذ علشان كدا بقول المفروض اننا نضمن الاول الاتحاد ونكون كلنا صوت واحد ومش نتحرك الا لما طلباتنا تتنفذ مش يوم ويعدى
تحياتى
Desert cat said…
رئيس جمهوريه نفسى
انا خايفة يا محمود ان الاضراب ده ياثر علينا احنا
الحكومة كدا كدا مش خسرانة حاجه ولو خسرت هتعوض خسارتها من دمنا احنا
انا عايزه نعمل حاجه نتحد فيها كلنا
طالما بدأنا نفوق يبقى نتحرك ايد واحدة مش ناس واقفة وناس نايمة
عموما ربنا يعمل اللى فيه الخير
تحياتى
Desert cat said…
انين الحزن
طيب انتى سمعتى من المدونات يا وزة فى كتير اوى مسمعوش عنه اصلا
احنا عايزين نوصل صوتنا الاول بعد كدا نعمل اللى نعمله
المهم الوعى يوصل للناس كلها
تحياتى
Desert cat said…
صوت من مصر
يا فرحتك بشبابك يا مصر
Desert cat said…
fatima
ياريت النسبة تكون خمسين فى المية يا ام يوسف
وقتها هيكون فى اثر فعلا انما واحد فى المية مش هيكون فى تاثير
المفروض الاول ننشر ثقافة الاضرابات ونفهم الناس الدور بتاعهم .. انما كدا لا هيحصل تاثير ولا حياة لمن تنادى
تحياتى
Desert cat said…
وجهة نظري
معلشى الف سلامةعلى حضرتك من الزهق
فعلا هو اللى انا اقصده من البوست ان لازم كل واحد يفهم دوره كويس ويعرف ايه اللى ممكن يعمله
انما واحد قايم وعشرين نايم ولا هيحصل اى حاجه
تحياتى
Desert cat said…
زعيم كمورا مورا
العنوان هو مضمون الموضوع
وبما اننا طول عمرنا بنتسرق وساكتين مش المفروض لما ننطق ننطلق كلنا مع بعض ويكون فى نقط واضحة نمشى عليها كلنا وننفذها وكلنا ايد واحدة
؟؟؟
انا مش طالبة كتير انا طالبة اتحادنا وتحديد اهدافنا مش اكتر
تحياتى
Desert cat said…
oceaneyes
ماهو ده اللى انا قلقانة منه اننا مش نعمل حاجه علشان كدا بقول نتوحد الاول
ربنا يسهل
تحياتى
Desert cat said…
nigro
كل الكلام اللى بتقوله حلو اوى وجميل يا محمد
بس ده فى حالة لو اتكاتفنا لو احنا ايد واحدة
لو احنا محددين اهدافنا والنقاط اللى عايزينها تتنفذ تتلخص فى 1
2
3
انما واحد عامل اضراب فى اليويمن واتنين فى الشمال وخط الوسط ناااااااااااايم
من الطبيعى الحكومة برضه هى اللى كسبانه
بس انا كمان سر سعادتى ان الافكار بدات تتغير والناس بدات تحس وتثور زى ما انت قولت
حاجه على جنب
هو انت عرفت اسمى منين ؟
هههههههههههه
عموما عادى ياباشا
شرفت البلوج
تحياتى
Desert cat said…
أم أحمد
يا حبيبتى هو المفروض يكون اضراب شامل كامل عن كل حاجه
بس المشكلة ان يوم مش حياثر
طبعا انتى لو اضربتى هيبقى اضراب ممتاز ليكى
ومش بعيد كل يومين تلاته متروحيش شغل البيت واهو انتى عاملة اضربا ايه المشكلة
نورتينى يا جميل
Desert cat said…
الساحرة
وهذا هو المطلوب اثباته
المهم الوعى الاول ونفهم الناس اللى المفروض يحصل ونحدد اهدافنا وبعدها تطلب زى ما تطلب

تحياتى
Desert cat said…
appy
تضربينى
نوووو
يا رايح قومى ويا امطار امطرى
ده انتى لسه ماكلانى قشطة مربى عندك ومشربانى حاجات حلوة حلوة يعنى
يقوم تختميها ضرب
يا روح قلبى انا فاهمه والله وجهة نظرك كويس اوى
بس هقول تانى انا بقول نتحد ونحدد مطالبنا
ومش نتحرك غير لما تتنفذ نعمل ثورة
ويبقى علينا وعلى الحكومة ..
نياهاهاهاها
لازم كلنا نكون ايد واحدة ويكون لينا دور مؤثر علشان نعرف ناثر فيهم اصل دول عالم معندهمش شئ من التاثر
الله يخرب بيوتهم خلونى اهيس
Desert cat said…
قلوب حائرة
وفى ناس هتستخر اليوم اللى هيتخصم وتنزل عادى جدا
ده ان كان الناس اصلا عندها فكرة عن كلمة اسمها اضراب
تحياتى
بصراحة انا مش فاهم حاجة
اصلى صعيدى ومخى تخين شوية
هو الاضراب ده ايكون عندنا فى مصر
ولا فى بلد تانى
ههههههههههههههه
طبعا تصفيق حاد لكلامك يا نانا وموقفك المشرف
بس المشكلة اننا غير مؤهلين لذلك
وثقافة الاضراب عندنا زيرو
يعنى اضراب بدون وعى وثقافة صح مالوش اى لزمة
يعنى ممكن نعمل اضراب تلاقى البعض نزل يكسر فى المحلات والسيارات فى الشوارع ليه الله اعلم
اضراب يعنى تكسير وتدمير فى ثقافة شعبنا الجميل
اعتصام كام واحد يمكنهم الاعتصام مش كتير
لازم يبقى فيه مؤسسات وطنية تفهم وتوعى الشعب ايه معنى اضراب
ازاى الاضراب ياتى بنتيجة مع الحكومة
غير كده انا مش شايف اهمية للاضراب غير اننا بدانا نفكر ونحس بما يحدث
بس مطلوب تكاتف واغلبية ليكون التاثير صح والضغط قوى على الحكومة الذكية .
تحياتى ليكى
Desert cat said…
الربان
انا حسيت بالامل من خلال كلامك وتفاؤل حضرتك
اتمنى ان الاحوال تتصلح
والشعب يعرف يعيش حياة كريمة
بدون اضرابات واعتصامات
ومفيش شئ بعيد الله سبحانه وتعالى
ربنا يهئ لنا الصالح ويحفظ بلدنا ويخلصها من ايد الفاسدين
احترامى وتقديرى
Desert cat said…
ايوية
تعرفى يا ايوية المشكلة فى ايه
ان فى ناس مش بيهمها اضرابات ولا غلابة ولا فقرا
ممكن عشرة عشرين مش يشتروا يجوا واحد ربنا مديله يقولك وانا مالى اعمل زيهم
احنا محتاجين نبقى ايد واحدة بس والله ووقتها هيكون لينا تاثير كبير جدا
اتمنى رايك يتنفذ ولو بنسبة 50 % حتى وساعتها هنقدر فعلا يبقى لنا صوت وهيتعمل لنا الف حساب
تحياتى
Desert cat said…
شريف طلال
انا كمان بتمنى نفس الامنية ان كل الناس فعلا تتحد وتعمل اضراب ويبقى صوتهم واحد وصرختهم واحدة
علشان صوتنا يتسمع بجد
تحياتى
Desert cat said…
بحبك يامصر
تعرف لو العيار جه فى المليان هيكون اثره اقوى وافضل الف مرة
بس ياريت اللى احنا بتنمناه يوم 6 / 4 يعمل نتيجة او يفيد
او اليوم اصلا يتنفذ فيه حاجه
اتمنى والله
تحياتى
Desert cat said…
Abo 7anf

انا مش ضد اللى الناس عايزه تعمله
بس انا بقول يكون فى وعى كفاية
انا اتمنى التغيير اكتر من اى حد والله
لانى فى قلب المعمعه وربنا يعلم
تحياتى
Desert cat said…
bastokka طهقانة
اولا نورتى البلوج سبوت من تانى
ثانيا انا بتمنى ان صوتنا يوصل ونقدر ناثر ويعملوا لنا اى حاجه
مش يعملوا عجين الفلاحة ويسدوا ودانهم
واحنا ولا كانك يا ابويد ما غزيت
تحياتى
Desert cat said…
bastokka طهقانة
اه طبعا اتفضلى اللوجو تحت امرك
Desert cat said…
همس الاحباب
برافو عليك يا خالد
لخصت البوست فى ردك
ووصلت للمعنى المطلوب
تحياتى
ياريت بجد نقدر ننشر الاضراب فى كل المجتمع المصرى شرايحة وطوايفة بس زى ما باقولى مش كل المجتمع هيفهم نعمل اية وازاى
انا قلت لتيتة بس قالتلى يا بنتى طب ما الناس هتشترى حاجتها كلها قبلها بيوم حاولت افهمها ان المهم اننا نبقى ايد واحدة قالتلى عاوزة 80 مليون يبقوا ايد واحدة انتى بتهزرى طب والناس اللى اصلا بتحوع ومبتاكلش هيفرق معاهم اية الاضراب
تحياتى
تصدقي مكنتش اعرف الا من المدونه عندك بس لو اضربت ومبعتش همل ايه وهقبض العمال منين مش عارف ايه الحل اضراب ولا انقلاب ولا حرقة دم ؟
عزيزتى

طبعا مجتمع المدونيين بس لو عارف يبقا شئ بسيط

بس لو اتعرض فى البيت بيتك يبقا شئ جميع ويتضاعف انتشاره

تصدقى ولا البيت بيتك بتعتبيره بس

سلام
لأ يا كات، مش واحد قايم وعشرين نايم، دا شعب نايم وعشرين متثقيش في حد فيهم بشلن. هاتيلي إسم تقدري تثقي في كلمتة وأغراضة في مصر! ما أسخم من ستي إلا سيدي

حد من إلي فاتحين بقهم كلام في الفضائيات والصحف المعارضة إلي زي الرز عمال علي بطال قال حاجة فيها كلمة "أنا عملت فعلا"؟؟ والا كلة رامي المسئولية علي أشخاص مجهولين ميتين مسمينهم الحكومة؟ دي الحكومة معملتش، دي الحكومة مسويتش، دى الحكومة متجاهلة، وإديله صور وريبورتاجات تسد النفس... طيب حضراتكم بتعملوا إية؟ فين الناس بتاعتكم إلي في حزبكم وحركتكم وجماعتكم؟؟

علشان بس ميتفهمش إني بهاجم حد بعينه، متحدث رسمي بإسم ناس معينة، وعضو في مجلس الشعب فرحان أوي بالقاعدة العريضة لأفكارهم، أقسم بالة إن حتي القاعدة العريضة بتاعتهم ما لاقية تاكل، يعني حتي معملوش حاجة تفيد أعضائهم

دانا لو عضو في نادي رياضي، مش حقولك مواطن في البلد، النادي بيعمل إية؟ لو أنا مش مقتنع برئيس النادي وأعضاء مجلس النادي وشايف إنهم حرامية والنادي معندوش موارد بيحصل إية؟؟ بتلاقي شلل مقدمة نفسها علي إنهم مرشحين للإنتخابات القادمة، وتلاقي ناس بتلف علي الأعضاء مش علشان مايجوش النادي يوم إحتجاج، إنما علشان يقولولهم عايزين تبرعات ننضف حمام السباحة، ونعمل ملعب في الأرض الفاضية، ومطاعم في سور النادي، وتلاقي النادي إتملي شلل كل واحده بتقدم وجهة نظرة بتحضر وإحترام وكل واحد نفسة بجد يخلي النادي بيلمع وأحسن نادي في الدنيا، وحتلاقي مجلس الإدارة خاف إسم اللة علي مقامة وهب هوا كمان يلمع النادي لحسن يطير

عمرك شفتي في نادي عيل بيكسر كرسي؟؟ عمرك شوفتي ناس عاملين إضراب في نادي في مصر (غير نادي الزمالك طبعا)؟؟؟ عمرك شفتي نادي في مصر قام واحد يقلك مانجيش النادي من بكرة علشان نضغط علي مجلس الإدارة؟؟ في نادي محترم عضو ممكن يقول فية الإسلام هوا الحل؟؟ كان عيال النادي زفوه لغاية الشارع.... إسلام إية يبني، إنت جاي تبشر ناس كافرة، برة يالا؟؟ أنا بتكلم علي نادي محترم فية مصريين محترمين... إشمعني النوادي بنحترم أوي وجودنا فيها ولما نخرج الشارع بنتصرف زي القرود؟؟ مش علشان حاسين إن النادي دا بتاعنا ولينا رأي فية، والشارع دا بتاع العدو

يبقي لو في حد عايز الشارع يبقي بتاعنا لازم يكون لينا مشاركة فية ... طب الحكومة مش عايزه يكون لينا مشاركة فية أو في البلد حانسيبهم وحنضرب ونقعد في بيوتنا؟؟ والا الأحسن نشارك بالعافية؟؟

في بوست عندي كتبت مثل عن محمود سعد، الناس وثقت فية، بقي يقول مائة ألف جنية علشان حالة معينة تتلم في عشر دقايق.... يعني إية دا؟؟ يعني الناس عايزة تشارك.... يعني مائة ألف والا مليون والا إتنين والا عشرة حتتلم ..... الراجل لم من علي الهوا كدة في البرنامج من إسبوعين 850 ألف جنية وهوا قاعد، ماراحش في حتة.... الناس إلي دفعت دي عايزة تقول إن البلد دي بتاعتنا إحنا، المواطنين إلي محتاجين دول إخواتنا ومواطنينا إحنا

يووة، أنا برغي كتير انا عارف .... إلي عايز يعمل إضراب يضرب براحتة، الضرب في الميت حرام
نوسه said…
ياجدعان شوفوا يوم تانى غير 6-4 ده
حرررررام ده يوافق تاريخ خطوبتى يعنى مش وضع خالص يبقى فيه اضراب وكلام من ده :)
يعنى لنفرض عاوزه اجيب للراجل هديه او الراجل عايز يجيبلى هديه ونديها لبعضنا فى اليوم ده يبقى نعمل ايه بقى وسط الاضراب يعنى:)
هو يمكن الموضوع عامل زي غريق بيتعلق بقشاية يعني الناس نفسها اي طريقة تعبر بيها عن الغيظ المكتوم جواها ..

هي بمكن المؤشرات لا توحي بالتفاؤل بس لعل ولعسي يحدث في اليوم ده اشياء غير متوقعة ويحصل مشاركة في الاضراب علي شكل واسع ..

ان لناظره قريب ...

تحياتي
متفق معاكي تماما
انا بردو مش مقتنع بحكاية اضراب يوم واحد دي
ده كلام فاضي وسد خانة وخلاص
ونفسي اشوف حد من اللي بنسمع انهم اصحاب الفكرة يطلع في الإعلام ويقول للناس ازاي نعمل إضراب مثلا ويشجع الناس ويحفزهم

يعني انا عمري ما اتخيل ان ممكن موظف يضحي بيوم من مرتبه عشان حاجة يا تيجي يا متجيش
لأن أكيد المدراء وأصحاب الشركات والهيئات هيقفلو مصالحهم
soska said…
كلامك مقنع جدا يا قطة بس لازم نعمل اول خطوة وبعدها خطوات كتير
مش شايفة ان سكوتنا واللامبالاة دي خلتهم يحطوا السكاكين على رقبينا ولسه لو سكتنا اكتر من كدة يعالم هيعملوا ايه
انتي خايفة يمصوا دمنا اكتر من كدة؟ هو احنا بقى فينا دم يا قطة قال ضربوا الاعور على عينه قال ماهي خربانة خربانة انا ضد الناس المعلقين المحبطين لازم يكون فيه عزيمه اكتر من كدة يا جماعه احنا بجد اللي احنا فيه ميقلش عن اللي بيحصل في اي دوله محتلة وبكره سكوتنا هيوصلنا للمنتهى مش بس هنجوع و مش هنلاقي مية نضيفة و اكل مفيهوش سرطان لأ حتى ده يمكن بكره نتمناه و منلاقيهوش بصوا حواليكم يا عرب شوفوا اللي بيحصل فالعراق في فلسطين ولبنان لازم نقوم بقى من النوم الحكومه نايمة و متغطية بلحاف امريكا والصهاينه اللي مليان عقارب و تعابين و كله هياكل فينا احنا لازم ثورة
لازم وقفة
لازم نتكلم
لازم نصحى يا شعب
اولا انا معا الاضراب .علشان نوضح ليهم اننا مش مستسلمين ليهم .بس الاطباء بلاش الاضراب .ممكن تبقى واقفه احتجاجيه ساعتين مثلا ادام المستشفيات .وكمان طلبة الجامعات ميناموش فى البيت .يخرجو للجامعه ويعتصمو فيها اليوم ده لحد اخر اليوم .وهيئات التدريس تشارك معانا .مش ينامو فى بيوتهم .والفلاحين يفضلو فى ارضهم وميشتعلوش .وميبعوش زرعهم فى اليوم ده .اصحاب المحلات يبقو ادام محلاتهم قافلينها .
المهم نبقى كلنا فى الشوارع بس فى حالة ثبات مبنعملش حاجه .
وياريت يتكرر لو مجبش نتيجه او لو جاب نتيجه عكسيه .
اهو طريقه نقول بيها احنا موجودين
حل وسط said…
This comment has been removed by the author.
حل وسط said…
مش عايزة اكون متشائمة
بس احنا عارفين كويس ان فيه حاجات كتير اكبر مننا
ومش هنقول عايزين
يقوموا يقولولنا اتفضلوا يا حبايبي

ما يقدر على القدرة الا ربنا

عارفة لما الاكل غلي عملت ايه
استبدلت اصناف باصناف اقل
ماكنتش ارضى اكلها
بس الاصناف دي كمان بتغلى
وكذلك اللبس
وكذلك العلاج

وكذلك كل حاجة

واحده قالتلي انا كنت بادفع الفين جنيه لابويا في العناية المركزة كل يوم
وبقيت مش عارفة هاعمل ايه لما الفلوس تخلص
هاطلع ابويا من المستشفى؟

واهو ربنا رحمه ومات الله يرحمه

المشكلة في العايشين

هنوصل لفين بعد كده
المنسى said…
أنا عامستنى يوم الإضراب ده عشان حاجة واحد بس
هل البع المصرى لا تزال لديه الإرادة لكى يرفض شىء ما
ولا ماتت والقاء لله
مش مهم رد فعل الحكومة ولا الاحزاب ولا أى حاجة عندى
أهم حاجة الشعب ده لسة عايش ولا .............................


مدونتك حلوة
دى أول زيارة
تحياتى لكى
http://www.elmancy2000.blogspot.com/
فى القلب said…
والله يا رب الأعتصام ده ينجح

وكلنا مع الاعتصام وهنفذه

عن نفسى مش هبعت الأولاد المدرسه
ومش هخر ج من البيت أصلاً
almasry said…
ازيك

شكلنا كده حياتنا كلها هتكون اضرابات ما خلاص احنا أخدنا عليها وبقت بتجرى فى دمنا .. مابلاش الحكايه دى ايه رأيك نفكر فى حاجه أحسن؟ تفيدنا ومش تضر غيرنا؟

شكرا على زيارتك واتمنى تعاودى الزياره


تحيـــــــــاتى
المصـــــــــــــــــرى
Soooo said…
انا عن نفسي اجبرت الصنايعيه اللي بيشتغلو معايا وقلتلهم مافيش شغل

بس حاسس انهم هياخدو اليوم فسخه وينزلو يشترو كتطلبات الحياه

عموما .. كل شيء وليه بدايه
وادينا هنبدأ




سلامووووووووووووز
صديقتي القطة القطقوطة اولا وحشتيني
ثانيا زعلانةمنك بقي اغيب اكتر من شهر ما تسأليش عني و شوفي انا لما رجعت زرتك ازاي يلا معلش بقي ما بين الخيرين حساب :)
ثالثا بقي انا للاسف معاك في ان الاضراب مش حيجيب نتيجةو اننا لسه مش قادرين نقوم بعمل جماعي فعال يعني انا مثلا مدرسة لو غبت يومها ( انا لسه مأخذتش القرار بعد ) بس لو حصل يوم سيخصم من اجازتي و خلاص و ربما لن يدرك اغلب الموجودين في المدرسة سبب غيابي
ايه رأيك بقي اغيب و لا لأ
Desert cat said…
كلاكيت تانى وتانى
مفيش حد مبياكولش يا نرمو
المهم دلوقتى اننا نتحد ازاى
والاهم اننا نعمل حاجه فعالة ازاى
من غير تدمير ولا تكسير ولا اى حاجه
تحياتى
Desert cat said…
وجهة نظري
يا فندم للأسف إحنا نفتقد لكل شئ ما عدا شئ واحد الخناق ورمى الاتهامات
بمعنى المثل المذكور ان الاستاذه اللى بيتحدثوا فى الفضائيات ولا واحد فيهم بيتحرك هو لسان قاعد يبلبل ووقت الفعل وانا هعمل لوحدى وانا هكون لوحدى أه ابدأ بنفسك ولو مجموعة مكونة على الاقل من عشر افراد حطوا ايديهم فى ايد بعض وبدؤا بعمل شئ بكره المجموعة دى تكبر ونلاقي الاف المجاميع فى كل شارع وحى إنما للاسف احنا متعودين على ان الراجل يروح الشغل ويرجع اخر النهار شايل البطيخة على كرشة ويتغدى وينام وينزل القهوة ويرجع بالليل يأدى واجب مع مراته ويخلف له قيمة عشر عيال بدون وضع اى شئ فى الحسبان
اللى حضرتك بتتكلم فيه محتاج لتغيير ثقافة شعب باكلمة شعب يعرف يعنى ايه مسؤلية علشان فى اسر غيره محتاجه تاكل وتعيش
تحياتى
Desert cat said…
نوسه
ههههههههههههه
معلشى بقى يا نوسة جت معاكى اوت المرة
احتفلى بخطوبتك يا اما يوم 5 او اجليها ليوم 7
انا بقى عيد ميلادى يوم 25
يعنى بعيد كل البعد
تحياتى
Desert cat said…
الفارس الملثم
انا كمان بتمنى نفس اللى بتتمناه ومش فى ايدى غير انى انتظر معاك غداً
تحياتى
Desert cat said…
آلام وآمال
طيب ياريت المدراء واصحاب الشركات يقفلوا شركاتهم علشان يبقى مفيش ازمة والاضراب يبقى عام
ووقتها فعلا اقدر اقولك هيكون فى تاثير على الاقل لو بجزء بسيط
انما كدا
كام واحد عارف ان فى اضراب ومن اللى عارفين كام واحد هيضرب بالفعل
عموما يوم 6 مش بعيد ولعل وعسى
تحياتى
Desert cat said…
soska
يا حبيبتى انا والله مش ضد الاضراب بس علشان يكون صح لازم يبقى فى اتحاد ولازم نصمم على طلباتنا ولازم نطالب بحقنا بصوت اعلى من كدا الاضراب مش حل ويوم مش حل
احنا بنطالب بحقنا فى بلدنا
بناطلب بحقنا فى توفير مستوى كويس وعيشة ادمية
احنا اصحاب الحق والحق دايما صوته عالى يبقى لازم صوتنا يوصل بجد
تحياتى
Desert cat said…
تــــايه ومش تـــايه
كلام ممتاز وانا موافقة عليه جدا
بس الناس دى هتتجمع ازاى
وهتبقى ايد واحدة ازاى
وهيبقى تفكيرنا واحد ازاى
طيب لو اضربنا ومش عملوا لنا حاجه مش نفكر احنا على الاقل نعمل لنفسنا اى حاجه ونستغنى عنهم خالص
تحياتى
Desert cat said…
حل وسط
ماهم بيشوفوا ايه الحاجات اللى عليها الطلب اكتر وبيرفعوا فى سعرها علشان احنا نموت يا اما من الجوع يااما من الحسرة حتى لو حاجه احنا مبنرضاش ناكلها
طيب هنسكت ؟؟؟
طيب الحل تفتكرى فى الاضراب ؟؟؟
الاضراب هيبقى كانه نقطة فى بحر بالشكل ده

الله يرحم والد صديقتك
Desert cat said…
المنسى
طيب هو فين الشعب
احنا محتاجين الشعب كله يتاكتف ويبقى ايد واحدة
لكن هنا فين الشعب ؟؟
ميرسى جدا لذوقك
ويسرفنى زيارة مدونتك
تحياتى
Desert cat said…
واحد بيدور علي قلبه
وهو ده بالظبط اللى انا اقصدة ان مش كل الشعب عارف
علشان يبقى لنا تاثير لازم كلنا نتحد ونكون مع بعض فى وقت واحد مش واحد عارف وبيستعد والباقى داير فى الساقية علشان يعرف يجيب رغيف العيش اللى مبقناش لاقيينه
بالنسبة لقبض العمال
ربك بيرزق
تحياتى
Desert cat said…
فى القلب
طيب دى خطوة ايجابية من حضرتك
بس كام واحد فى البلد هيعمل اضراب وكام واحد اساسا عنده علم بالاضراب
تحياتى
Desert cat said…
almasry
لاء احنا معملناش اضرابات قبل كدا احنا بننضرب على قفانا وبنسكت لكن اضراب 6/4 ده هيكون حاجه جديده فعلا علينا
بالنسبة للحاجه الافضل ما تكتب افكارك حضرتك واحنا نفذ
تحياتى
Desert cat said…
Soooo
انا كمان حاسة نفس احساسك ومش الصنايعية اللى عندك بس هما اللى هيعملوا كدا انا حاسة ان الناس اللى تعرف بالاضراب اغلبهم هيعملوا كدا
احنا لسه مش مؤهلين للاسف لثقافة الاضراب
عموما ربنا يعمل اللى فيه الخير
تحياتى
Desert cat said…
أم أحمد المصرية
حبيبة قلبى والله وحشتينى
وكنت بدخل اشقر عليكى من وقت للتانى واشوف ايه جديدك
لكن للاسف انا مش عارفه اى حاجه علشان اسال من خلالها
عودة قوية باذن الله
وحمد الله على سلامتك
بالنسبة للاضراب انتى اتكلمتى على اللى اقصدة ان مش كل الناس عارفه ان فى اضراب فى اليوم ده واللى هيغيب من شغله ممكن زمايلة يفتكروه تعبان او كسل ينزل النهارده ولا حاجة
حمد الله على سلامتك يا جميل
تحياتى
لو عوزة توجهات عامه والمفروض تعملى ايه وتوعى الناس حوليكى انهم يعمله ايه
هتجديه على الرابط دة

http://www.el3amal.net/news/news.php?i=17316

تحياتى
احمد الجيزاوى
Desert cat said…
احمد الجيزاوى
طيب ما هو اللى على الرابط ده الناس عارفاه
المهم تجمعهم ازاى ؟؟؟؟؟؟
تلك هى المشكلة هذا هو لب الموضوع
تحياتى
حقيقي برافو عليكي

فعلا فعلا رب قطة خير من الف اسد
انا ملاحظ ان الاضراب ده البنات ماشاء الله بيدعو ليه اكتر من الاولاد
انا عرفت عن الاضراب من مدونة العزيزة مدونة من اجل الحب
حقيقي بحييا شجاعتك وروحي
نادرة اوي ان يلتقي الذكاء والجمال والشجاعة
كان نفسي اكون معكم
بس انا هشارك برضه باذن الله
بان ادعو للاضراب من هنا
ربنا يوافقكم جميعا
انا بقيت بقعد الايام دى مع ناس
بيحسسونى انى مابحبش البلد دى
لما اقولهم البلد عاوزة تتغير

عموما يوم 6 لو عدا من غير تغيير ولو واحد فى المية
يبقى احنا نستاهل اللى يحصلنا ومانفتحش بقنا بعد كدة فى اى حاجة

تحياتى على المدونة الرائعة
اهو ع قد منقدر بنوصل صوتنا

ولو انا واثقه ان صوتنا هيتنبح ويروح خالص

ويكون لسه موصلش برده

وطبعا انا مضربه ومبلطجه ومبرمجه

وكل حاجه يوم 6 ابريل ده

اشوفك هناك بقى

نبقى نضرب سوااا
العزيزه قطة الصحراء
الصراحه أنا مرتبك قليلا بشأن موضوع الأضراب ده
أولا : هو اضراب ولا عصيان مدني ولا وقفه أحتجاجيه ولا عصيان أنذاري، ولا ايه؟
تحديد هو أيه بالظبط هو ما سيحدد ما نريد من وراءه، فلا الناس تحط سقف عالي قوي وتحبط وتنصدم، ولا تحط سقف واطي جدا وتفاجىء أن حركتها أعلى مما خططت فترتبك، الموضوع يجب تحديده كويس، الأهداف الموضوعه ظريفه خالص لكن يوتوبيه جدا، في الحلم خالص يعني، أنا شخصيا أرى أن للحركه دي هدفين اساسيين، الأول هو أرهاب الحكومه الملعونه دي وأظهار العين الحمرا يمكن ترتجع شويه وأظهار أن الناس قادره عليها مش عاجزه، والهدف التاني أقامة ما يمكن تسميته مناورات شعبيه لتدريب الناس على قيام عصيان مدني حقيقي موسع ممتد مخطط له جيدا جدا

طبعا بما أني خارج مصر ولن أشارك فيه فرايي يعد مجرد أستشاري

تحياتي ومودتي وأحترامي
Desert cat said…
ساعد نسرين الايمن
انا متشكرة جدا على كلامك الجميل
وان شاء الله فى انتظار الاضراب ونتمى نتيجة مبشرة بالخير
تحياتى
Desert cat said…
مطرح ما ترسى....دقلها
طيب قولهم عايزين نعثوا فى البلد فسادا علشان يقولوا انك بتحبها
والله انا عندى احساس ويارب يبقى كداب ان الاضراب هيبقى كان لم يكن
انا بدعى من كل قلبى ربنا يكدب احساسى بس
انا اللى بشكر جدا حضورك
تحياتى
Desert cat said…
Alexandrian far away
العزيز اسكندرانى
انا شايفة ان الاضراب خطوة ايجابية ممتازة بس فى حالة لو منظم لو الاهداف واضحة امام الجميع لو الجميع ايد واحدة واتحدنا يعنى السبعين مليون بلاش كلهم خلى عشرين مليون بس يتحدوا مع بعض
ووقتها اقدر اقولك ان هيكون فى نتيجة
انما لحد دلوقتى انا لما بقول لحد هتعمل اضراب الاقيه بيقولى يعنى ايه وازاى وامتا وفين الناس معندهاش وعى كفاية
عموما ان غدا ليوم 6 ابريل قريب لما نشوف
وأأمل يكون فى خير
احترامى وتقديرى

Popular posts from this blog

قميص دهشور

كل تحرش وانتوا طيبين