عـــيـــد ميـــــلاد بنتـــــى ...

زى النهارده من سنة بالظبط بدأت أول صرخات بنتى فى الدنيا ... أول ما نطقت برضه كانت بتخربش ... قطة مخربشة من اول ساعة اتولدت فيها ... كانت بتعترض على تعديل الدستور ... وفضلت تنونو وتقول لا يمكن ابدا .. الدستور يتعدل من غير ما يقولى ... نياوووووووو ... وبعدها بدأت كل لما تتكلم تخربش .. فى البداية بصراحة مكانش حد بيعبرنى لأنى طبيعى مكانش حد عارفينى ... بس برضه مش كنت ببطل وكنت باكتب اللى بيخطر فى بالى وفجأة لاقيت بنوتة جميلة كدا اسمها ايوية بتيجى تزورنى كتير وتسيب لى ردود فرحت بيها اوى ... بدأت اتشجع بصراحة وبعدين شوية لاقيت غمض عينيك محمد سمير قولت مش ممكن انا فى ناس بتعرفنى وبتيجى تزرونى .. ده ايه الهنا ده ... وفى يوم ما كتبت بوست فى كلنا ليلى لاقيت رئيس جمهورية نفسى ... انا قولت بس كدا حتتسلمى يا قطة النهاردة ده رئيس الجمهورية بنفسه هنا .... بس بصراحة .. طلع اطيب واجدع رئيس جمهورية قابلته فى حياتى ... ده على اساس انى قابلت رؤساء قبل كدا . و كمان كان اول واحد يقولى كل سنة والقطة طيبة ... ميرسى يا ريس على ذوقك وربنا يخليك للرعية وقططهم ... كمان فى ناس قابلتهم واتعرفت بيهم واتشرفت كمان بيهم .. وناس اثرت فى حياتى وعايشه بيهم وناس اول ما انزل بوست ادور على ردودهم اللى بحب استفيد منها ومن مواضيعهم ومن تجاربهم فى الحياة ..... كمان ناس مقدرش استغنى عنهم .... زى كلاكيت تانى وتانى واللى بجد لما بتكلم معاها بحس انى بتكلم مع اختى الكبيرة ولما بحس ان اختى وحشانى ومش عارفه اتكلم معاها بسبب غربتها بتكلم مع كلاكيت واقعد ارغى فى ودنها لحد ما تصدع وتقوم تاخد مسكن .... وكمان حبيبة قلبى آآبى اللى بجد دخلت قلبى بدون استئذان مش عارفه مش خبطت ليه .. تقريبا وقتها كنت بصلح الباب .... حتى لما الباب اتصلح قفلت عليها جوا قلبى حقيقى يا ابى اشهد الله انى احبك جدا جدا فى الله وبجد مقدرش اتخيل حياتى وانتى مش موجودة فيها ... ربنا يخليكى ليا .... وزى ما فى ناس حبتنى وانا كمان حبيتهم اوى وارتبطت بيهم اوى اوى ... كمان فى ناس هزأتنى ومسحت بيا الأرض .... سامعه حد بيقولى وهو ده وقته هرد عليه واقوله ايوا وقته ... اصل انا قلبى اسود ومش بنسى حاجه ... فى اللى دخل قالى روحى الهى يجى لك ويحط عليكى انتى واهلك ... بس القطة بنوتى الجميلة مش فتنت عليا وراحت قالت لاهلى انى جبت لهم التهزيق ... وفى اللى قالى انتى مريضة نفسيا روحى اتعالجى ... مش عارفه انا ايه اللى خلانى مريضة نفسيا فى نظر الكابتشن .. وفى اللى قالى يا قطة يا كافرة خرجتى عن دين ابائنا وأجدادنا يا زنديقة إذن سنأخذ من كل رجل قبيلة .... وفى اللى قالى يا عانس يا معقدة ... انتى جاية تطلعى عقدك علينا ... بصراحة هو مش قالى انا عندى كام عقدة وياترى ممكن يتفكو ولا لاء .. وبرضة انا مش عارفه انا عانس من انهى مقياس من وجهة نظر الأخ يمكن بمقياس رختر ... واخيراً وليس أخراً ...ايه ده انتى عندك سيبر يعنى انتى حرامية ... انا مش عارفه انا بسرق ايه من السيبر يكونش بسرق دخلى اليومى مثلا او بسرق النت واعبيه فى كياس واروح ابيعه فى السوق السودة لاء وايه اوعى تكتبى عليا حرف اقسم بالله هرفع عليكى قضية تشهير وأبهدلك فى المحاكم ... لووووول يا قطة يا مؤثرة الناس بقت بتخاف انك تكتبى عليهم وبيهددوك بالمحاكم ... نياهاهاهاهاها ...
بنتى حبيبتى كل سنة وانتى بتكبرى قدام عنيا وخربشى يا حبيبتى براحتك وانا هعملك بنفسى مانيكير وباديكير ... كل سنة وانتى قطقطوطة مخربشة بدون كلل او ملل .. كل سنة وانتى انيستى فى افراحى وفى احزانى فى مشاكلى وفى سعادتى .... طبعا اصحابى وحبايبى المدونين انا من غيرهم ولا قطة مخربشة ولا اى حاجه ... لما بحس انى فرحانة باجى اجرى عليكو واحكى لكو ... لما بحس ان فى حاجه مضيقانى ومزعلانى .. بفكر قبل ما اكتبها واقول هما ذنبهم ايه ازعلهم معايا لكنى بتخيل الجميلة فرنسا واستاذى الغالى الربان واحلى زعيم فى الدنيا زعيم كمورا مورا انا مش عارفه ايه البلد دى بس ما علينا وفاتيما احن قلب فى الدنيا مع انى عمرى ما قبلتهم فى حياتى ولا عرفتهم بتخيل كل واحد فيهم واقف قدامى و بيقولى
When you have problem remember me I will always beside you

مبكونش مرتبة الكلام واول ما افتح صفحة البوست باكتب اللى بخطر فى بالى وبلاقى كل اخواتى وحبايبى جنبى بيساندونى فى وقت ضيقى .. ياربى اشكرك على نعمتك هو فى احسن من كدا فى الدنيا ناس بتحبنى وبتفرح لفرحى وبتزعل على زعلى حتى وهما مش عارفينى .. مهما اوصف فى احساسى لا يمكن اقدر اوصله ..... ربنا يخليكو ليا جميعا يا اجمل اخوات واقرب اصحاب لقبلى فى الدنيا .. وعلشان انا بحبكو كلكوا وخايفه اذكر اسماء احسن يضيع منى اسماء تانية علشان كدا النهارده الدعوة عامة للجميع
اخواتى وحبايبى المدونين الحلوين
النهاردة فى عيد ميلاد بنتى الاول كلكوامدعوين لحفل ساهر حتى الصباح الباكر
واللى بيحبنا ميضربش نار فى فرحنا علشان العروسة حامل








وفى نهاية الحفل احب اتوجه بالشكر لكل السادة الحضور واخص بالشكر

لكم منى جميعا كل الحب والود

تعليقات

‏قال Empress appy
كل سنه وانتى قطه حلوة وميرسى خالص لكلامك عليا بجد كسفتنى قوووووووووى

اما بخصوص الباب فمعلش انتى مش واخده بالك انا زى الهوا يا حبيبى زى الهوا لا ارى بالعين المجرده فدخلت وانتى مخدتيش بالك زى ما انتى دخلتى عندى كده

اما عن محمد فبقوله بجد انت هتقعد تلاعبنى كده وانا هواتى التصميم وخلينا قدام بعض ومش هتقدر على تصميماتى ههههههههههههههه وهعاند فيه لغايه ما ابطله يلعب فيها

الناس الوحشين التانين سيبك منهم انا مش بحب حد يحجر على حد فى تفكيرى يا ييتناقش باحترام يا بلاش

وكل سنه وانتى مخربشهوقطتك تكبر خالص وتبقى احلى قطه واحن قطه
كل سنه وانتى طيبه انتى وقطتك الصغيره كل سنه وانتى بتخربشى وتنونى وتملى الدنيا نونه
وعقبال 100 سنه
‏قال فاتيما
يا قطتى الحلوة
كل سنة يا حبيبتى و انتى بالف خير
و تفلى تنونوى كدا لما شاء الله
انا فرحانة قوى ...أسمى مكتوب فى البوست ..انا هموت من الفرحة و قولت الماما يا فرحتك يام فاطمة بنت ك بتعرف ناس حلوة قوى قوى و كمان بيفتكروها و يقولو عليها كلام حلو كدا ..
مبروك على الشكل الجديد ... نيولوك بناتى اكتر و لايق عليكى من غير ما اشوفك ...بس جميل قوى
و إيه كم التورت دى يا حنون ..
يا بنتى انا عاملة ريجيم ..
بس هبوظه مخصوص بس محدش يمد إيديه على اول تورتاية لو سمحتوا عشان انا فى الحلويات معرفش أبويا ....
و عروسة إيه اللى حامل ؟...يا دى الفضايح
اموااااكبيرة يا قطتى الحلوة
‏قال Coca
مبروك مبروك مبروك مبروك عليكم وعلينا

كل سنه وانتي بتعملي حاجه مفيده وبتخربشي بس انا لا بلاش قله ادب

موااااااااه
‏قال Abo 7anf
كل سنه والقطه الجميله بخير
وبتخربش وبتعمل اللى عايزها
وعقابل اقول ايه
لما يبقى عندها كتير قوى
ونفرح بيها يارب
كل سنه و انتى طيبه يا قطقوطه

و عقبال مليون سنه و انتى منورانا

ببوستاتك و كلامك الجميل

و تقولى كل اللى فى نفسك

والى لقاء
‏قال ...
كل سنة وانت طيبة
وبتنونوي وتخربشي
:D
‏قال وجهة نظري
كل سنة والقطة طيبة، وإنتي طيبة.... جميل أوي بوست العرفان دا، وبشترك معاكي في إعجابك بآبي.. بوستاتها فعلا جميلة ربنا يحفظها ويحفظنا جميعا
‏قال nigro
أزال المؤلف هذا التعليق.
‏قال قلب أبيــض
كل سنة وهى طيبة


وعقبال يارب ملية سنة


وتعيش محبوبة ...حبوبة ...مبسوطة

يارب


ارق تحياتى

قلب ابيض
‏قال ملك الكبدة
نونوا معانا

هو انا لما بعلق دلوقتي بقيت بنونو

ماشي
ماعلينا

المهم

جويوز انيفيرسيز مون بيتي كات

و السنة الجاية تكوني قدرتي تخربشي لحد ماتجيبيلنا رقبة عبده كفتة في خربشة من خرابيشك

و خربوش كمان كدة يزبطلنا المهابيل

بس خلاص
‏قال الساحرة
كل سنه وانتي طيبه
ودايما قطه مخربشه
في الحق كلامك اداني امل اني ممكن الناس تعرفني

النيولوك الجديد يجنن
‏قال أحلام عمرنا
والله انتي لذيذه وعسوله يا قطه
دمك خفيف بجد واسلوبك في الكتابه جميل
سعيد جدا بمعرفتك
‏قال Heart Beat
كل سنة و انتي طيبة انتي و القطة الجميلة بتاعتك و تملي الدنيا خربشة و توقفي السفيه عند حده

و يارب دايما تنوري عالم التدوين بخربشاتك الجميلة و الصريحة اللي كلنا بنحبها
‏قال د/اجدع بنوته
كل سنه وانتى طيبه يااقطة نونا العسوله

ومبروك اللبس الجديد واللوك الجامد ده

وان شاء الله السنه الجايه

يبقى معاكى قطتين تلاته اربعه

يتربوا ف عزك ياااااارب
‏قال صوت من مصر
الف مبروك وعقبال 100 سنه كده والمهم قبل ما نتخربش يعنى فين الجاتو والساقع
‏قال مروة الزارع
كل سنة وانتى طيبة ومخربشة يا قمررررر
‏قال بنت القمر
كل سنه وانتي طيبه والسنه الجايه نمرة كبيرة
متابعاكي دايما لانك علي الريدر بتاعي حتي لو معلقتش تحياتي واتوصي بحته جاتوه او شوكولا
عشاني
تحياتي
كل سنة وانتى طيبة يا قطقوطة وعقبال ما نجيلك فى ولادها كدة
معلش يا حبيبتى متأخرة عليكى قريتلك بوست غير مرغوب فيكوا
ياخرابى يا قطقوطة
انا بحييك على شجاعتك فى نشر ايميل الكابتن
بس انتى هزئتيهم جامد اوى

وقريتلك البوست لك وحدك
ربنا يرجعه بالسلامة
هو مين؟
اللى انتى كاتبة البوست علشانه

المهم يا قطوطة
كل سنة وانتى طيبة يا حبيبتى ودايما سعيدة
على فكرة فطست على روحى من الضحك
على اخر جملة
اللى يحبنا مايضربش نار علشان العروسة حامل
هههههههههههههههههههه
تحياتى ليكى
اختك خيخة
كل سنة والقطة الكبيرة والقطة الصغيرة في سعادة , وطبعا مخربشين واحيانا مفترين علي العالم الغلابة اللي بتدخل المدونة هنا هههههههه

مع خالص تحياتي وتقديري
‏قال Soooo
كل سنه وانتي ومدونتك طيبين
‏قال فرنسا هانم
وانتى عارفه اختك فرنسا سداده قوى
وبتقولك فعلا
لو عندك مشكله هتلاقينى جنبك
والمطواه الخمس تكات
موجوده معايا
عموما
كل سنه والقطه طيبه
ومخربشه
تحياتى لكى
سورى يانونا انا قلت للبت لولو بنتى تدخلك وتقولك كل سنة وانتى طيبة وهى طنشت الظاهر لقت فيها هدايا وخلافة وبما انها بلبيسية صميمة فقررت المقاطعة وانا زى مانتى راسية مش مضيطة الايام دى وقالباها عبد الحليم والأطلال بس انا يااحلى قطقوطة بقولك الف كل سنة وانتى طيبة وهديتك لما تفضى واعزمك ع فلم رومانسى ترجعى فية قطة سيامى مش يتخربش ضبطى مع ابى وانا عازماكم
اوك
هستنية تحددى معاد بس العشا كشري ههههههههههههههههههه
تحياتى
السلام عليكم

كل سنه وانتي طيبه وبخير
وعقبال 100 سنه تدوين
سواء إتفقتي مع البعض أو إختلفتي
فالمفروض إن الإختلاف في الرأي لا يفسد للود قضية .

خالص تحياتي ليكي ولقطتك الجميلة
‏قال Alexandrian far away
كل سنه وأنتي طيبه
يا أجدع وأظرف قطه في الصحراء كلها
ويا رب السنه الجايه تبقي حاجه كبيره قوي
نمرة صحراء مثلا

:-)
كل سنه وأنتي طيبه
‏قال غير معرف…
ايه القمال ده ؟

منين القطط دى ؟

كل سنة والقميل الصغير بألف صحة وسعادة .. عقبال ماتشوفيها فى الجامعة ان شاءالله وتشيلى ولادها كمان
‏قال الربان
تحياتي

كل سنة و أبنتك أكبر و أجمل و أشمل
كل سنةو هي بمزيد من الموضوعات و الاراء
النيرة المتفتحة.

نختلف في الرأي نعم ، نفسد الود لا...
نحترم بعض أكيد.... نتدني بالمستوي الفكري و الاخلاقي مرفوض...

كل سنة و صاحبة المدونة الجميلة بالف خير... اسعدتينا بموضوعاتك...و انارتي
الطريق بيتعليقاتك...سواء بالاتفاق
او بالاختلاف...

تحياتي و احترامي و دمت بالف خير.
‏قال ftafeet
كل سنه وهيا بخير وعبقال مليون سنه يارب
وانتى كمان بخير وتتربى فى عزيك ياقمر انتى
وان شاء الله نتعبلك يوم فرحها يااختشى


نوناااااااا
‏قال غير معرف…
كل سنه و قطتك بخير و ينعاد عليكم بالصحه و يارب تفضلي دايما منوارنا
و ربنا يخاليكم لبعض و لينا

هابي بيرث داي تو هير
:))

مع محبتي ياقمرايه
‏قال Migo Mishmish
مياو مياو مياو مياو مياو
مياو مياو مياو مياو مياو
مياو مياو مياو مياوو
سنه حلوة يا جميل
نا حبيت اغنيلك بالقططي علشان تعرفي انا بحبك قد ايه
Love,
MishMish
‏قال Desert cat
appy
وانتى طيبة يا جميل .. وبعدين انتى فعلا زى الهوا يا حبيبى النسيم برضه ينفع كدا يعنى
تصميم محمد راح .. وتصيم ابى راح .. وموجود تصميم كيتشاب .. هههههه
الناس الوحشين دول انا منفضه لهم اصلا
كل سنة وانتى اجمل بنوتة
‏قال Desert cat
رئيس جمهوريه نفسى
وانت طيب ياريس وميرسى اوى على ذوقك
‏قال Desert cat
fatima
وانتى طيبة يا ام يوسف
وان مش كنت اكتب اسمك هكتب اسم مين يعنى انتى المفروض تقولى لطنط ان بنتها طيبة وحنينة وكلنا بنحبها ثم احنا على طول فاكرينك يا جميل
التورتة كلها تحت امرك
امواااااه
‏قال Desert cat
coca
وانتى طيبة يا كوكا
وبعدين انا هخربشك انتى برضه طيب اروح فين من ايمى
هههههه
‏قال Desert cat
Abo 7anf
ميرسى يا ابو حنف وكل سنة وانت بالف خير
‏قال Desert cat
صيدلانيه طالعه نازله
متشكرة جدا يا دكتورة على كلامك الجميل
وكل سنة وحضرتك بالف خير
‏قال Desert cat
بثينــــــة
وانتى طيبة يا بثينة
شرفتينى يا جميل
‏قال Desert cat
بثينــــــة
وانتى طيبة يا بثينة
شرفتينى يا جميل
‏قال Desert cat
وجهة نظري
الاجمل دلوقتى هو رد حضرتك
ويارب دايما بينا بمواضيعك المتميزة وبوجهة نظرك وارائك
تحياتى
‏قال Desert cat
nigro
ميرسى اوى يا نيجرو على كلامك الجميل
بس معلشى سؤال هو اشمعنا 43 سنة مكانش ينفع مثلا 50 او 40
ليه رقم 3 يعنى
ههههههه
شرفتنى بردك يا نيجرو
تحياتى
‏قال Desert cat
قلب أبيــض
ميرسى على ذزقك يا ارق قلب ابيض
‏قال Desert cat
ملك الكبدة
ههههههههه
اه انت تدخل تنونو وبس
وبعدين عايز رقبة ميييين
لالالالالالالالالا
كله الا عبده كفته
انا اجيب لك رقبة حازم شوارمه هههههه
كل سنة وانت طيب يا ملك
‏قال Desert cat
الساحرة
يا حبيبتى انتى مش لسه محتاجه الناس تعرفك انتى خلاص دخلتى عالم الشهرة والنجومية من اوسع ابوابه
تحياتى
‏قال Desert cat
Dream
وانا الاسعد بتشريفك البلوج
تحياتى
‏قال Desert cat
Heart Beat
ربنا يخليكى ليا يا حبيبة قلبى
تعرفى انا فى اى بوست بتسنى ردودك لانى عارفه اد ايه انتى عقل واعى وناضج
علشان كدا ليكى جوا قلبى كل حب واحترام
محبتى ليكى يا احلى هارت
‏قال Desert cat
د/اجدع بنوته
ميرسى يا دكتورة انا مش بحب القطط الكتير هو كفاية اوى القطة دى بس انا اقدر عليها اصل ساعات بتبقى مزعجة اوى
تحياتى
‏قال Desert cat
صوت من مصر
وانت طيب يا محمد
ايه ده انت مخدتش الجاتوه والساقع
ده المدونة مليانة وبعدين فرنسا وابى وكلاكيت عمال يلعبوا بيه لما غرقوا المدونة خالص
روح الحق نصيبك
هههههههه
‏قال Desert cat
مروة الزارع
وانتى طيبة يا جميل
‏قال Desert cat
بنت القمر
وانتى طيبة يا حبيبتى
انا كمان متابعاكى واقوات كتير بقف قدام البوستات بتاعتك بخاف اكتب رد ابوظ بيه جمال البوست
طبعا الجاتوه والكولا كله تحت امرك
لكى ما تشائين
محبتى
‏قال Desert cat
بت خيخة وأى كلام
ام شريف القمر
كل سنة وانتى اصغر ام فى الدنيا
طيب اعمل ايه للكابتن اللى عمال يكفرنى ويصاحبنى اصلى على مزاجه
ملقيتش حل علشان اخلص منه غير كدا
بالنسبة لبوست لك وحدك فالدليل قالوا له
ههههههههه
حبيبتى يارب دايما مبسوطة وحبوبة
محبتى ليكى يا ام شرى
وبسة كبيرة اوى لشيرى حبيبى
‏قال Desert cat
الفارس الملثم
لاء لاء مش تخاف النهارده مفيش افترا ولا خربشه
النهارده فى جاتون
وبيبس
هههههههههه
كل سنة وانت بالف خير
‏قال Desert cat
Soooo
وانت طيب يا سووو
احم احم
يادى الأوحراج والكسوف
وشى احمر يا جدعان
‏قال Desert cat
فرنسا هانم
ميرسى يا فرنسيس هو ده العشم برضه
محبتى ليكى يا جميله
‏قال Desert cat
كلاكيت تانى وتانى
لولو قررت المقاطعة
نعممممممممم
على اساس انى من الدنمارك ولا ايه
ماشى يا لولو بس لما اشوفك
يا حبيبتى انا فاضية على طول
المهم فعلا نرتب يوم مناسب نتقابل فيه احنا التلاتة
وبما ان ظروفك مش متظبطة الايام دى فانا مش هكلفك كتير فى العزومة انتى اعملى حسابك على سباشر تماشر الف بس
وبالنسبة للهدية قولى لولو انى بقبل شيكات بنكية عادى جدا
‏قال Desert cat
علاء سالم
ميرسى اوى على كلامك يا علاء
وكل سنة وانت بخير
‏قال Desert cat
Alexandrian far away
وانت طيب وبالف خير يا اسكندرانى
ومتشكرة اوى على ذوقك
‏قال Desert cat
Sherif
ههههههههههه
يارب يا شريف ربنا يسمع منك
كل سنة وانت بالف خير
‏قال Desert cat
الربان
استاذى العزيز
دايما بتسعدنى ارائك سواء اتفقنا ام اختلفنا
لو وصلت فى الردود للوهن دائما بستمد قوتى من بين سطورك واواصل
لا حرمنى الله منك ولا من جميل مواضيعك
ادامك الله لنا النبراس المنير دائما وابدا
احترامى وتقديرى لشخصك الكريم
‏قال Desert cat
ftafeet
وانتى طيبة يا نونا
ربنا يخليكى ليا يا حبيبتى
‏قال Desert cat
اجندا حمرا
حبيبتى الرقيقة اجندة
يارب دايما منورانى بجمال اخلاقك وبرقتك
كل سنة وانتى بالف خير يا جميلة
‏قال Desert cat
Migo Mishmish
اجمل اغنية سمعتها فى حياتى يا مشموشة
كل سنة وانتى وميجو فى خير وسعادة
‏قال همس الاحباب
عملتيها يا قطة
كده اغيب يوم اجى الاقى المدونة كده
والاقى نفسى اخر واحد يبارك انا زعلان قوى من نفسى
على العموم كل سنة وقطتك بخير وسعادة
وعقبال مليون سنة تدوين بس مش انا اللى اعلق عندك فى الحالة دى ايبقى احفاد احفاد احفادى
كل سنة وحضرتك بخير وبوست رائع وجميل وخالى من الخربشة
ولا ده الهدوء الذى يسبق العاصفة هههههههههه
على اى حال ربنا يسعدك ويمتعك بالصحة والسعادة دائما
تحياتى ليكى
‏قال Unknown
كل سنه و انتي و القطه طيبين و بتخربشوا و تعوروا كمان
ولا يهمك من اي حاجه انتي وراكي رجاله وقت الجد يبلغوا عنك

يارب تفضلي كاتمه علي قلوبهم كده 76 سنه كمان
‏قال alashry
كل سنه واحلى قطه فى مصر طيبه وبخير دايما
وعقبال مليون سنه ياجميل
والخربشه للقطط جميله بس فى حاله الدفاع عن النفس وربنا بكره يجبلها قط يحميها ويجيبوا قطط نووووو نووووو صوغننين
يأخواتى قمر 14
بس انا زعلان لانك معزمتنيش وشكل الجاتوه والتورته كانوا كتير وجامدين
وعقبال الجواز ان شاء الله
على فكره ال مره اقرأ ليكى مواضيع بس بجد كلهم هالين جداااااااااا وطريقه البلدى اللى انتى بتتكلمى بيها لذيذه جدا
‏قال Desert cat
همس الاحباب
معلشى بقى يا خالد
هو حد قالك تاخد اجازة امبارح طيب كنت اجلها الغيها اعمل اى حاجه
مش مهم بقى يا خالد انك اتاخرت المهم انك جيت
‏قال Desert cat
EmY
حبيب قلبى انا عارفه معزتى فى قلبك يا ميمى
ابقى بلغى امن الدولة بس
ههههههه
كل سنة وانتى بنوتة جميلة
‏قال Desert cat
alashry
معلشى بقى مش ليك نصيب فى الجاتوة
اصلك جاى متاخر
وبما انك اول مرة تكتشف طريقتى البلدى فهى دى طريقتى معلشى اصلى بحب المنتج البلدى اوى اصله بيبقى اصلى وابن ناس مش المستورد اللى مش عارفين له بلد منشأ
تحياتى
‏قال Blank-Socrate
كل سنه و هى طيبه
‏قال بحبك يامصر
كل سنه وانتى طيبه ياقطه وقبال مية سنه
وخربشى برحتك الدستور بيديكى الحق فى الخربشه
‏قال mnoon
كــــــــــــــــــل

سنه

وأنتـــــــــــــــــى

طيبه

ياأحلى قطه

والسنه الجايه

يزيد أصحابك أكتر وأكتر

ويبقى عنك بدل البنت

تلاته أربعه

تحياتى
‏قال Unknown
ادة هو انا جيت متاخرة اوعوا ميكونشى فى تورتة ليا انا بحبها شيكولاتة
كل سنة وانتى بخير وتخربشى كمان وكمان
ميرسى قوى على كلامك الجميل
‏قال Desert cat
Blank-Socrate
وانت طيب
‏قال Desert cat
ايوية
وانتى طيبة يا يويو
وانتى تستاهلى كل خير
التورته كلها تحت امرك
محبتى
‏قال Desert cat
بحبك يامصر
وانت طيب
الدستور بيدينا الحق نعمل اى حاجه بس باحترام القانون
الا هو يعنى ايه قانون ؟؟
‏قال Desert cat
mnoon
وانتى طيبة يا جميل
‏قال غير معرف…
الغباء ليه ناسه
‏قال سنووايت
كل سنة وانتي طيبة يا قطقوطة
وعقبال كل سنة وانتي بتنونوي براحتك وبتخربشي كمان
ويا رب اكون ما جيت متاخر علشان الحق التورتة
انا عايزة حتة كبيرة من اخر تورتاية :)
‏قال Desert cat
Anonymous
والجبن وقلة الادب برضه ليها ناسها
‏قال Desert cat
سنووايت
وانتى طيبة يا حبيبتى
التورتاية كلها تحت امرك
اتفضليها
‏قال انين الحزن
قطه

كل سنه وانتي جميله وبخير ديما ياقمر

انتي تستاهلي كل خير ياقمر بجد


بس مش كنتي تجيبي بدل التورتات دي
كلها 2 كيلو سمك
اه صحيح انا نسيت انك قطه دلوعه انتي قلتي كباب وكفته

انتي جميله ياقطه وتستاهلي كل الا بيتقال عنك ماعادا طبعا الناس الوحشيين

سلامووووووووز ياقمر
‏قال Desert cat
انين الحزن
وانتى طيبة يا وزة يا جميلة
يا حبيبتى طول ما فى ناس زى العسل زيكو كدا فى حياتى
يبقى الناس التانية فى الريسيكل بن
تحياتى ليكى يا جميله
كل سنة وانتى طيبة يا قطة المدونات

انا عارف احساسك ده وفاهمه كويس
وعارف يعنى ايه انك تحسى ان ليكى اصدقاء فى جميع المحافظات ويمكن برة مصر يمكن متعرفيش اساميهم ولو قبلتى حد منهم فى الشارع مش هتعرفيه
بس برضة اصدقائك ولما بتعوزى تتكلمى مع حد بتتكلمى معاهم وتشتيكلهم وساعات حد بيقولك حاجة تفيدك وتحل مشكله عندك
انتى فعلا انسانه جميلة وتستهلى كل خير مع ان لسانك طويل والنهار كله بتلطشى فى مخاليق ربنا بس برضة انا اول مدونة بزورها على النت هى
قطة الصحراء

ملحوظة الشخص اللى قالك يا عانس
هو ميعرفش المشروع اللى بنا
ده انا مسيح فى كل المدونات
وعامل دعاوى وموزعها مجانى على الناس
وكله عشانك يا جميل
سلالالالالالالالالالالالالالالام
‏قال زعيم كمورا
هههههههههههه
ياعنى حتى فى اليوم الى بتفرحى بيه م الناس الى بتحبيها وبيحبوكى برده بتتخنقى
لاحول ولا قوة الا بالله
غريبة انتى ياقطة على فكرة
بس طيبة مع انك عاملة فيها رامبو بس طيبة
وروح حلوة
عشان كدة الناس دى حبتك من قبل حتى متشوفك او تعرفك



ياقطة احنا رقبتنا ليكى
احنا رجالة وبنقف وقفة رجالة مع الناس الجدعان


وكل سنة ونتى سعيدة وبتنونوى بس براحة والنبى لحسن فى ناس نايمة
وان شاء الله تفضلى رايقة كدة
وابعد ياشيطان سيب القطة فى حالها
هههههههههه

روحى ياشيخة الله يكرمك ويوقفلك ولاد وينصرك لى من يعاديكى الحلال
قولى امين
بس من قلبك والنبى عشان تتقبل بس
‏قال غير معرف…
كل سنه وانت وبنوتك طيبين

انا يا دوبك لسه عامله افهم
المشكله بتاعت حسام
والرئيس وانت

عامله زى ما اكون كنت نايمه مع اهل الكهف

انا لسه ما قرتش الموضوع ومش فاهمه فى ايه بالضبط

بس عرفت ان فى زعل ما بينك وبين حسام
ومحمود واخد الدفاع

هاحاول اقرا التفاصيل

ومره تانيه
كل سنه وانت ومحمد وقطتك البيبى بخير
‏قال Asmaa mahaba
كل سنه وانتوا طيبين وربنا يحفظهالك
بس انتى كدا جوعتينا منغير ما تاكلينا
تحياتى ليكى سومه_87
‏قال غني يابهيه
بهيه بتقولك كل سنه وانتى طيبه وعاكى قطتك دايما يارب
‏قال غير معرف…
احبه لانه بستحق ان احبه
ذهبت بعيدا ولكن رجعت اليه
اخذتني الدنيا ولكن رجعت لاني احبه
عرفته بالحب عدت بالحب
هل تحبه هل تسمعه ,الك قلب
ان كان لك قلب ستسمع
حتما ستسمع ,
الم يان للذين امنوا ان تخشع قلوبهم لذكر الله وما نزل من الحق ولا يكونوا كالذين اوتوا الكتاب من قبل فطال عليهم الامد فقست قلوبهم وكثير منهم فاسقون
اياك ان تذهب اياك ان تمضي ارجع فقط ,ارجع فحسب ,ارجع ان كنت تحب
ارجع قبل ان يأتي يوم ولاتستطيع الرجوع ,
الك اله سواه الك رب غيره ,ماهذه الدنيا ومن فيها ومن عليها ,
يا حسرتى على ما فرطت في جنب الله وان كنت لمن الساخرين
يا حسرتى على ما فرطت في جنب الله وان كنت لمن الساخرين
يا حسرتى على ما فرطت في جنب الله وان كنت لمن الساخرين
العائد الي النور
‏قال Alexandrian far away
حاجه واحده غايظاني في المدونه دي
أنك مختاره اسم نوع شرس وقوي وحمال أسيه من القطط وبعدين حاطه صور القطط الناعمه الفرافير دي

صباح الفل
أنا باصبح بس
:-)
كل سنة وانت معلم ياقمر

:D
‏قال Desert cat
حــدوتـــة
ميرسى يا حدوته على كلامك الجميل
وبالنسبة للاخ بتاع عانس ده فمعلشى عبيط مش عارف حاجه
مش يعرف اننا ماشيين خطوات المشروع بشكل جاد
هههههههه
ابعت الدعوات بسرعه بقى علشان الناس عايزة تفرح
‏قال Desert cat
زعيم كمورا مورا
ميرسى يا زعيم
وبعدين انا عارفه انك جدع من زمان اوى من ايام ايجى ميكس ولا نسيت
هههههههههه
كل سنة وانت طيب يا زعيم
‏قال Desert cat
shreen
كل سنة وانتى بالف خير
والله يا حبيبتى اان بالنسبة لى ما فى اى مشاكل خالص
انا مش عارفه الناس هى اللى بتعمل مشاكل مع نفسها
حتى هذا الحسام لما بيدخل عندى بنشر ردوده عادى جدا ولا برضى اعبره ولا ارد عليه مش عارفه انا بيشرب مية من الفريزر كل يوم علشان كدا بقى ابرد من البرود ولا ايه الموضوع
عموما حمد الله على سلامتك ونورتى عالم التدوين من تانى
تحياتى
‏قال Desert cat
somaa
وانتى طيبة يا جميل
عندك التورتة والحاجه الساقعه تحت امرك خدى اللى تحبيه
‏قال Desert cat
غني يابهيه
كل سنة وانت وبهية بالف خير
‏قال Desert cat
Anonymous
ونعم بالله
‏قال Desert cat
Alexandrian far away
ده تمويه علشان انت عارف ان قطة الصحراء wanted
فلما يروحوا يدوروا على الصور اللى فى المدونة مش هيلاقوها
والقطة يبقى كدا فى الامان
ههههههههههههه
صباح الفل
‏قال Desert cat
كفايـة طيبـة
وانتى طيبة وبالف خير يا جميله
‏قال Layla
الف مبروك..كل سنة وانتي طيبة..وعقبال السنين الجاية

في انتظار المزيد من الخرابيش

:)
‏قال Desert cat
Marvel
وانت طيب وفى احسن حال
كل سنة وانتى مخربشه .وعقبال ما يبقا عندك مليون ضفر

المشاركات الشائعة