غـيــــر مرغـــوب فيكـــــو

طبعاً من العنوان معروف مين اللى غير مرغوب فيه يدخل هنا
ايوه بالظبط كدا الاخوان المتأسلمين اللى أول ما بيصدقوا يشموا خبر انى نزلت موضوع ألاقيهم لامين بعض وجايين كأنهم داخلين غرزة ... لأ معلشى انا مش عايزه اشوف طلتكو البهية هنا .. لأنكو ناس متعرفوش تتكلموا ومتعرفوش تتناقشو ومتعرفوش حاجه عن الأدب ولا الأخلاق ... كل اللى تعرفوه أنكو تستقوا أوامر تخزنوها فى عقولكو وتنفذوها بالحرف الواحد ولو سمعت ان حد جاب سيرة ولى نعمتك يبقى تروح تلم باقى الرعية اصحابك وتجيى جرى تقعد ترص فى كلام من عينة يا كافر يا زنديق أصبأت تغلط فى مهدينا ... أه أغلط ونص هو مهديكو ده نبى ولا رسول؟؟؟ واحد مش عارف يحترم الناس وبينشر فكر مسموم ولامم حواليه مجموعة من السهل اللعب فى عقولهم وملهمش اى هدف ... ناس مش بتعرف تدخل الحمام برجلها اليمين او الشمال الا بفتوى ... من حقى انقضه ومن حقى اتكلم عن أخطائه وانت من حقك تناقشنى إنما مش تشتمنى ولا تقل أدبك عليا ولا تورينى سفالتك ولا تعرفنى إنك مش متربى .... ده كمان حاجه غريبة اثبتت لى فعلا ان الناس دى ملعوب فى دماغها ومن عينة حبة فوق وحبة تحت ومطرح ما الريح ما تودى الريح ما تودى ... الاقى رد غريب اوى
من عينه انا ردى مش اتنشر ليه يا علمانية يا كافرة علشان تعرفى بس انك بتكدبى .... انا بكدب ازاى يا اهبل وانا جايبه لك فيديو مهديكو عاكف قاعد فيه بشحمه ولحمة وبيقولك انا دربت فى الجامعه ... البعيد اعمى واصم بس قليل الادب .... نفس الحيوان اللقالى يا علمانية يا كافرة ... ... لما لاقانى مش نشرت الرد بتاعه رجع قالى طيب ده ايميلى ضيفيه علشان نتفاهم .... اصل مش ينفع نتكلم كدا على صفحات البلوج ... برضه مش رديت علي حضرة الاخوانجى اللى عايز يتفاهم ... لأنه المفروض يبقى معروف ليهم كلهم انى رافضه وجودهم هنا ... شوية تانية ايه يا جميل انت مش عايز تتعرف ولا ايه ... تقريبا افتكر انى فاتحه بلوج للتعارف او حب يجرب طريقة جديدة ... يمكن ؟... وادى ايملى مرة تانية ... يهمنى اتكلم معاكى بجد والله مش يمكن نبقى اصحاب ... لاء يا شيخ معقول .. جاى تصاحب علمانية كافرة زى ما قولت ... ايشى خيال يا ناس ... وده يبقى ايميل الكابتشن اللى عايز يتعرف ويصاحب العلمانيين الكفرة للى عايز يتعرف
isoood_elkabeer2000@hotmail.com
اظن العنوان واضح اوى للأعمى فيكو قبل البصير
انا مش بتعرف ولا بصاحب ولا عندى نية ابقى من الاخوات .... ومش عايزة اشوف وش حد فيكو هنا .. واللى يفكر يغلط ويضغط لنك البلوج يبقى يقرا سورة يس الاول ..... لانى مش هسكت لاى حد اشوفه هنا
واى حاجه اشوفها من حد فيكو سواء على النت او بره النت هنشرها وهعمل لكو فضيحة
وقد اعذر من فنزر
بالمناسبة اسم المدونة كان aboooodx
ولما جيت افتحها علشان اشوف هوية الكابتشن لاقيته اسم بدون بلوج
هع هع هع هع يا جبااااان طيب ما تدخل باسمك الحقيقى ولا دى عواديكو ولا هتشتروها

تعليقات

‏قال د/اجدع بنوته
اول كومينتتتتتتت

لوووووووووول

وجايه
‏قال د/اجدع بنوته
جامدددددددددده

مبيدخلوش الحمام برجل الشمال او اليمين الا بفتوى ده

ههههههههههههههههههههههههههه

ربنا يقويكى وم حئك طبعا

ترحبى بمين وتمنعى مين م دخلو مدونتك

مدونتك زى بيتك وانتى حره ف استضافة اللى يريحك

تحياتى يانانا ياقطه يامخربشه
‏قال Asmaa mahaba
ازيك قطه..
ليكى حق تعترضى كيفما تشائى على اللى انتى عاوزاه فالموضوع زى ما قلت قبل كدا خبرات شخصيه ...لا اكثر ولا اقل يعنى تتعاملى مع السىء فتحكمى انهم سيئين تتعاملى مع الحسن فتكمى انهم كويسين...اما حكايه الحمام وكدا انا ليا عتاب عليكى فيها هو صحيح ميصحش نفكر فى الصغائر فى الاشياء ونهتم باشياء صغير ونترك الكبير فى ديننا بس برضوا موضوع دخول الحمام بالقدم اليسرى ام اليمنى ودخول المسجد برضوا باليسرى او اليمنى دا فيه احاديث وفيها حكمه...وايا كانت الحكمه والفائده احنا بنستصغرها ...فالدنيا علمتنى الا استصغر شىء فيها سواء دينى او دنيوى انما تستحدث النار من مستصغر الشرر...اقول رايى لكى ولهم بمنتهى الحياديه لانى بالعربى كدا انا مش مع حد انا تبع سرايا المجانين وبس...اللى عاوز ياخذ منى ياخذ واللى مش عاوز هو حر
تحياتى ليكى سومه_7
‏قال صوت من مصر
انا مصرى وارفض الاخوان لكن لا ارفض العيش معم لانهم بشر
‏قال ftafeet
ايوه يانانا كده شاطره اديلو فوق دماغه علشان يعرف قيمه نفسه كويس

حقك يابنتى تعملى كل ده فيه ده واحد بيستهبل مش اكتر

ودى بلوجك وتكتبى فيه اللى انتى عايزاه وتستقبلى برضه اللى انتى عايزه
ايوه كده اديهم مترحمهمش
‏قال Heart Beat
تعرفي حتى لو انطباعم عن الاخوان كان عن تجربة شخصية حصلت معاكي على ارض الواقع زي مثلا النائب الاخواني عندكم و لا احاديث و اقاويل المرشد العام بتاعهم

الا ان برضه اللي حصل عندك هنا من مداخلات من ناس بتتبع الجماعة هي برضه مجموعة جديدة من الدلائل اودامنا كلنا ان الناس دي كلهم كده و لا حتى نسبة 99% منهم تفكيرهم و اسلوبهم واحد وقلة قليلة اللي ممكن نقول عليهم بيفكروا بعقل و تروي

يبقى النماذج اللي بنشوفها عندك في المدونة هنا او في مدوناتهم هي دليل على صحة كلامك لكل انسان علق قبل كده عندك و شكك في كلامك

اللي مايشوفش من الغربال يبقى اعمى و مش معقول يعني ان النماذج اللي ذكرتيها قبل كده هم نفسهم اللي بيعلقوا عندك برضه

لكن هم حاجه واحدة جماعة واحدة مغيبة وراء ستار من الكلمات الرنانة و الوعود المؤكدة بدخول الجنة نظير القيام باعمال معينة

اما عن الاستاذ صاحب الايميل الكبير اللي عايز يتعرف ده فاشكرك طبعا انك فضحتيه عشان هو و اخوانه يعرفوا ان في جماعتهم ناس بالحقارة دي

و مع ذلك برضه هاتلاقي ناس منهم جم يقولوا ان الشخص ده لا يمثلهم في اي حاجه

لان هو ده اللي بيعملوه دايما يرتكبوا الخطأ و بعدين يقولوا مش احنا

ربنا يبعدهم عنك يارب
‏قال فرنسا هانم
تاااااااااااااااااااانى
عموما
مش هاقدر مسلمشى
تحياتى
‏قال بطوط حبوب
هو ان الواحد يدخل الحمام ويخرج بفتوى دى حاجه كويسه ياخد عليها ثواب

الى مش كويس انه يتاجر باسم الدين ويستغله فى الحصول على منافع شخصيه - زى كتير من الاخوان
‏قال Desert cat
د/اجدع بنوته
مبروك عليكى جايزة اول كومنت
شكولاته كادبورى
‏قال Desert cat
د/اجدع بنوته
والله يا دكتورة هما اللى اضطرونى لكدا بس هعمل ايه
علشان بس يعرفوا انهم مش فى مولد
تحياتى يا قمر
‏قال احساس لسه حى
عزيزتى
كويس انا مش اخوان

يعنى مقبول اخش هنا

طيب الضباط هتمنعى منهم حد ولا الضباط مينفعش تمنعيهم

وامناء الشرطه الارزوقيه دول

مش تبع الشرطه تدفعى عنهم

ولا تخصص ضباط بس

نورتك مش كده

سلام
‏قال Desert cat
somaa
انا الحمد لله كويسة جدا
ربنا وهب لنا كل واحد عقل نميز بيه
يعنى مش معقول هروح لواحد عامل الدين سبوبة ورزق واقوله افتينى يا عم الشيخ ما هو من الطبيعى هيفتينى على مزاجى علشان يقبض
نحياتى
‏قال Desert cat
صوت من مصر
كلنا رافضينهم مش انت بس
وهما عايشين مع نفسهم ولاغراضهم يا فندم
تحياتى
‏قال Desert cat
ftafeet
طبعا يا ماما هو وقع ولا الهوى رماه
افتكر انى حاجبه التعليقات يبقى كدا خلاص يعمل اللى يريحه مش يعرف انى بتلكك نورتينى يا نونا
محبتى يا جميلة
‏قال Desert cat
Heart Beat
حبيبتى ياريت عضو مجلس الشعب ولا اللى بيدخلوا هنا ولا اللى بيكتبوا فى مدوناتهم بس انما انا شوفت الكتير والكتير على يد اخوانجى غير مهذب وانا كاتبه عنه موضوع من زمان كان اسمه يقولون مالا يفعلون ... بنى ادم لا ينتمى للانسانية ولا يسمع عن الإسلام شئ الا انه فى الرايحة والجاية يتحدث عنه وفى الباطن سفيه وكداب ومنافق وبتاع بنات مبعدش عنى الا لما عملت له محضر فى القسم .. تخيلى خاف من الشرطة اللى كلهم تقريبا بيخافوا منها علشان موقفاهم عند حدهم ومخافش من ربنا اللى رايح جاى يتشدق باسمه ...
طبعا صاحب الايميل الكبير حب يدخل من كذا اتجاه الاول كافره وعلمانية وبعدين نتعرف ونبقى صحاب ... الظاهر موصلوش لحد دلوقتى انى مش طيقاهم ... يمكن
تحياتى ليكى
‏قال Desert cat
فرنسا هانم
احلى مساء من احلى فرنسا
اموااااااااااااه
‏قال Desert cat
بطوط حبوب
يا دكتور ياريتها تيجى على التجارة بالدين
الا التجارة بالدين وارهاب وتطرف وانتفاع ومصالح شخصية وبلاوى زرقة
تحياتى
‏قال Desert cat
احساس لسه حى
على رأى المتنبى ورئيس جمهورية نفسى
لكل داء دواء يستطب به
إلا الحماقة أعيت من يداويها
‏قال Unknown
العزيزة قطة
على فكرة انتى تعبتى نفسك بالرد عليهم دول ميستحقوش انك تتعبى وتردى وتنشرى موضوع كان اولى انك تكتبى شى اهم منهم ضيعتى وقتك فى الرد عليهم دول ناس من ضعف شخصيتهم وكلامهم ولانهم مش عندهم ما يتناقشون بة فلما ميعرفوش يردوا يبداءو فى اطلاق الشتائم والتكفير و الاتهام بالالحاد
لما يبقى ليهم فكر وقدرة على الحوار العلاقنى الهادى المحترم تبقى تردى عليهم
تحياتى ليكى
‏قال Unknown
لقد صبات قطتنا و ظلت عن طريق الهدي
ليه يا قطه كده حد يقول علي عكوفه كده ده مشخلعنا و مدلعنا و مهشتكنا و مبشتكنا

للاسف هو فاضله زلطه و يعملوا نبي بقي فوق النقض و الي يقول عليه كلمه هايروح النار

انتي شكلك هايخطفوكي قريب علشان يدبحولنا القطه

بس ولا يهمك انا هابقي اخد بالي من السايبر و البلوج

تحياتي يا قمر
‏قال Migo Mishmish
الاخت قطه الصحراء انا احييكى على مدونتك الجميله فانا اتابعها دائما انا ومشمش زوجوجتى .اما بالنسبه لجماعه الاخوان فانا ارفض اسلوبهم لانهم بعين واحده فقط يرون بها مايريدون هم فقط ولا اعتبار للاخر الذى يعيش فى الوطن والانسانيه ..على فكرة انا قبطى ولكن انتمائى الاول والاخير لهذا البلد الجميل ..انا لست ضد الاسلام ولكن ضد فرض الرأى على الاخر بالقوةفحريتك تقف عند حريه الاخرين فهؤلاء المتاسلمين يحتكرون الدين والرأى لانفسهم فعندهم الراى القويم والصائب والاخر جاهل مهما كان طالما رأيه يتعارض مع افكارهم والدليل على ذلك هو ماقاله المهدى بتاعهم حينما قال طظ فى مصر والى مش عاجبه ياخد بالجزمه ..هذا هو فكرهم ومنهجهم ..وبالمناسبه انا معارض لاى تيار دينى يكون على حساب المواطنه ايا كان هذا التيار مسيحى او اسلامى او يهودى فالدين مكانه القلوب فقط
اهدي شوية يا قطة
وسيبك من الاخوان دول

عايزين بقى مواضيعك الحلوة من تاني
نفسي المرة الجاية ادخل ملاقيش حاجة عن الاخوان

اتمنى
:)
‏قال Migo Mishmish
لا أمل فى أمه تحولت انظارها عن مقدمه ابن خلدون ..الى مؤخرة هيفاء وهبى !!!!
‏قال أنا حر
طول عمر العلمانيين بالنسبة للاخوان المسلمين عفاريت علشان بيواجهوهم بالحجج القوية وبنقدر نثبت انهم غلط وان تفكريهم عقيم وبعيد كل البعد عن الدين اللي هما بيتمسحوا فيه
بتفق معاكي في كل كلامك لأني علماني ضد الاخوان المسلمين وضد اي شخص بيقحم الدين في عالم السياسة
لكن احب انصحك بعدم استخدام الاظ جارحة زي اللي في البوست علشان محدش يمسك عليكي حاجة
ارفعي دايما شعار مدونة نظيفة لا تحمل الفاظ بذيئة
تحياتي
‏قال oceaneyes
اوى كدة عايزاكى تهدى اعصابك وبلاش انفعال زايد بسبب ناس ما تستاهلش

انا اول مرة فى حياتى اشوغ اخوانجى عايز يصاحب !!

والله الدنيا دى بيتشاف فيها العجب فعلا

ولا يهمك يا نانا ..ولا تتضايقى ..

وكويس انك نشرتيه كدة دلوقتى ..وعرفتيه مقامه هو واللى شبهه


يالا حصل خير وكل سنة وانتى طيبة يا جميا بمناسبة المولد ..وعيد الأم كمان



تحياتى

:)
‏قال قلوب بتغنى
صباحو عسل يا جمل قطه
ايه يا بنتى الى جرى
هما شنوا الحرب خلاص
على راى عادل امام نابيلون ساب ابو قير والحرب وقعد يمضى على اطباق
هما الاخوان سابوا الدنيا كلها وتفرغوا للمدونين
الناس دى بقيت غبيه كده ليه
والبشمهندس مزعل نفسه ليه لما احنا كفار ينام ويطمن هو بس واحنا هندخل النار ميقلقش
اصلى احنا حاسين ان الدنيا برد شويه
عجبى
بالمناسبه انا يساريه والعلمانيه مش كفر ولا حاجه
‏قال غير معرف…
أرى شيئا بسيطا

أجمل شئ لمقاومةأى شئ يضايقنا .. هو تجاهله

تحياتى
ايه يا قطة
بالراحة شويه حتى لو فى ناس منهم قلالات الادب ذى ما بتقولى مينفعش تقولى محدش يخش هنا خالص

يعنى انتى تنتقضى مهديهم وتتكلمى ذى ما انتى عايزة ومش عايزة حد يرد عليكى

انتى من حقك تقولى مش عايزة غلط ولا شتيمة وده منهم ومن اى حد ومن حقك تمسحى التعليق اللى فى شتيمة
بس مش معقول كلهم بيشتموا اكيد فى نسبة ولو حتى قليلة هتكلمك بالراحة وتتناقش معاكى
ويا يقنعوكى وتبقى الاخت قطة وتبطلى خربشة
يا تقنعيهم وتبقى كسبتى ثواب

انا ابتديت اخاف منك انتى بقالك كام بوست عمالة تتخنقى وتهددى وانا راجل صاحب مرض وصحتى على قدى ومش حملك

سلالالالالالالالالالالالالالالام
‏قال Foxology
ههههههههههههههههههههههههههههههههههههههههههههههههههههههههههههههههههههه

والله بوست جامدة جدااااااااااااااا

ينهار ابيض :))

المشكلة فعلا انهم حبة فوق وحبة تحت وبعدين الباشا اللى قالك يا كافرة لو هو بأة اخوانى بصحيح مكنش قالها لأنها فيها حد عقوبة المفروض انه يكون عارفه

تحياتى :)
‏قال Unknown
قال اخوان مسلمين قال
دول ولا يعرفوا حاجة عن الاسلام ولاحتى عن ادب الحوار ولا الاسلوب اللى المفروض يتكلموا بيه
وبعدين لو هما اخوان مسلمين احنا ايه اخوان كفرة يعنى و مهدى عاكف ده كمان اللى كان قعد يشتم فى مصر وياستى لو هما عالمين الغيب او يمكن مهديهم عاكف على رايك شاف لهم رؤية ولاحلم ان هما بس اللى هيدخلو الجنة فيلا يتفضلوا بس برجليهم اليمين بقى
والله اكتر ناس بتحرق دمى هما الاخوان المتاسلمين دول
تحياتى ليكى وماتسكتيش وريهم العين الحمرا
احلى سلام
‏قال همس الاحباب
ايه يا قطة
اغيب يوم الاقى الدنيا مولعة
ويافطة مكتوب عليها ممنوع الدخول الا بكوبون وتذكرة مدفوعة مقدما
ولازم ادخل برجلى اليمين المدونة طب اعمل ايه انا دلوقتى اذاكان رجليه الاتنين يمين
ادخل يعنى ولا ارجع تانى اقف فى الطابور
اقول ايه بس ياقطة ربنا يوفقنا جميعا الى ما يحب ويرضى
تحياتى ليكى يا اسد
هما لسه برضه وراكي
معلش كان الله في عونك
بقولك هدي اللعب شويه عشان اعصابك صدقيني والله صحتك اهم

ربنا معاكي وتحياتي
‏قال مروة الزارع
أولا كل سنة وانتى طيبة يا قطتى

ثانيا

بصى بقى

مش كل الأخوان متأسلمين

كل حاجة فيها الحلو والوحش

وكمان انتى غلطتى عشان حاطة ايميلة كدة عالبلوج ودى حاجة تأخذ عليكى كنت أتمنى انك تتناقشى معاة أحسن وتتفاهموا

والأخوان جزء من المجتمع مينفعش نلغية ونحزفة

وعلى فكرة المفروض انك ترحبى بأى حد يخش عندك

كلامك دة هيتفسر بأنك جبانة وخايفة

أيوة هيتفسر أنك خايفة تخشى فى نقاش ومجادلات



متزعليش منى انا بقول رأيى يا عسل

......

كل سنة وانتى وماما طيبين

:))
‏قال Unknown
يا نهار احوس
هو فيه ايه؟؟
اغيب اسبوع كده ألاقي الخناقه دي؟؟؟

بعدين ما تختلفي معاهم زي مانتي عاوزة حقك ..واللي مش قابل يخبط دماغه ف اقرب حيطة اسمنت مسلح

بس متقدريش تمنعي حد بالشكل ده أو تشطبي وجوده
ولا أيه
‏قال Desert cat
ايوية
والله صدقتى فى كل حرف من حروفك يا ايوية بس انا حبيت افضحهم واعرف الناس عمايلهم وكمان رسالة ليهم اى حد يفكر انه يعمل حاجه مش هسكت مش يغره انه مستخبى ورا شاشه
كل سنة وانتى طيبة يا جميلة
‏قال Desert cat
EmY
يعملوه نبى على نفسهم
اذا استمروا هما اصلا
ولو جرى لى حاجه اديكى عرفتى مين اللى هيكون عاملها
ابقى بلغى الشرطة
امن الدولة اللى مسببه لهم رعب
كدا يعنى
والسيبر انا عارفه انتى قدها ونص يا حبيبى
‏قال Desert cat
Migo Mishmish
طبعا ان يشرفنى وجود حضرتك ومدام مشمش فى مدونتى
انا كمان ارفض اى حد يقول اللى يعارضنى هديله بالجزمة
او يقول علينا طز انا مش عارفه الناس اللى عامله منه نبى دى ايه معلشى بقى مغيبين
تحياتى
‏قال Desert cat
آلام وآمال
حاضر يا محمود ان شاء الله ترجع مواضيعى بس انا حبيت انوه عن الى بيحصل واللى بيعملوه من خلف الكواليس وبعتبر ان ده انذار اما لو حصل تانى فاللى هيعمل كدا هيبقى هو الجانى
تحياتى
‏قال Desert cat
Migo Mishmish
لقد اصبت
تحياتى لحضرتك ولمدام مشمش
‏قال Desert cat
أنا حر
طبعا اشكرك على النصيحة
بس الشخص اصر على استفزازى لدرجة وصلتنى للانفعال ده
الغريب انك تلاقى كل واحد فيهم قاعد يقولك علمانيين كفرة ومش يعرف انه وقع فى اثم ولا يعرف اصلا ايه معنى كلمة علمانية لانه دايما يربطها بالكفر
تحياتى
‏قال Desert cat
oceaneyes
حبيبتى ما هو انا نشرت غسيله اللى ريحته طلعت على البلوج علشان يعرف قيمته كويس
كل سنة وانتى بالف خير يا جميلة
‏قال Desert cat
قلوب بتغنى
صباحة فل يا قلبى
ما هما دول اللى هيحرروا البلد مننا احنا العلمانيين الكفرة
هههههههههههه
يا حبيبتى دول مش عارفين معناها ايه لانهم دايما بيربطوها بالكفر شوفتى الثقافة
كل سنة وانتى اجمل قلوب بتغنى
تحياتى
‏قال Desert cat
Sherif
وهذا ما سوف يحدث يا شريف
انا نشرت الميل علشان يعرف انه مش هيفضل يتكلم ويهرتل كدا وانا ساكته اصل اكيد هيكون لى رد فعل
تحياتى
‏قال Desert cat
حــدوتـــة
يا حدوته مش تخاف انا اهددهم هما اه انت لاء الا انت يا صاحب المشروع اللى هنعمله سوا
يا فندم طالما انت ملاحظ كام بوست مش ملاحظ التعليقات واقنع مين ولا اقتنع بمين انا معنديش استعداد ابقى منهم انا مش عايزه جهل وتخلف .. حرام عليييييك
انا قولت من حقك تناقشنى لكن مش تشتمنى
طيب لما واحد يدخل يقولك يا علمانى يا كافر يبقى ده ايه
بيدلعك
تحياتى يا فندم
‏قال Desert cat
Foxology
هتقول لمين بقى لما الناس اللى المفروض انها بتطبق صحيح الدين تدخل تقولك يا كافر مستنى ايه من العلمانيين اللى زى حضرتى
ههههههههههه
تحياتى
‏قال Desert cat
totaaaa
اه هما بس اللى اخوان مسلمين
وهما بس اللى هيدخلوا الجنة واحنا علمانيين كفرة
ربنا يشفيهم
وبعدين انا مش بسكت انا بعمل نشرات اخبار على طول
نورتينى يا توتا
‏قال Desert cat
همس الاحباب
لاء يا خالد انت مش مع الناس التنيين انت مع الظبابيط
ههههههههههههههههه
يعنى ادخل ولا يهمك برجلك الشيمين
تحياتى
‏قال Desert cat
اسكندراني اوي
هما شكلهم مش ناويين يسيبونى اصلا بس انا ادهم ما تقلقش اختك برضه اسد
انا لو كتبت عنهم حرف تانى هبقى بديهم اكتر من حجمهم الطبيعى
بس انا حبيت افضح الكابتشن واعرفهم اخلاقهم كويس
تحياتى استاذى الفاضل
وكل سنة وحضرتك بالف خير
‏قال Desert cat
مروة الزارع
وانتى طيبة يا قمر
مش كلهم متأسلمين وكل مكان فيه الحلو والوحش على حد قولك
طيب ايه رايك فى اللى بيشتموا من غير ما يتكلموا فى حرف من اللى انتى كاتباه وايه رايك فى اللى بيكدب لمجرد انه يقول الكلام ده غلط مع ان الراجل قاعد بشحمه ولحمه وبيعترف بس داخل يكدبه ازاى مش تعرفى وايه رايك فى اللى بيكفرك وايه رايك فى اللى بيتحرش بيكى فى المواصلات او فى اى مكان منهم ولما تعملى له محضر يبقى زى الفار المسلوق وايه رايك فى اللى يقف بملئ فيه ويوقلك فى طز فى مصر وشعب مصر
وايه رايك فى اللى يقولك اللى هيعارض هديله بالجزمة ... واذا كان رب البيت بالدف ضارب
وانتى عارفه انهم كتلة واحدة وجزء لا يتجزأ من بعض
تفتكرى الناس دى بتتناقش علشان تقولى ضعف منى لما اقول مش تدخل هنا
طيب ايه رايك فى الفضيحة اللى فى البوست دى
يعنى انتى سايبه البوست كله وداخله تقولى لى ضعف لما تقولى مش تدخل هنا
ولما اجى اقولك يا كافرة هتقولى لى ايه اتفضلى اجيب لك حاجه ساقعه
يمكن انتى ترضيها على نفسك يا جميلة لكن انا مرضهاش بصراحة وفى الحالة دى مالوش عندى غير الجزمة على دماغه على راى مهديهم عاكف
وانا مش زعلانة يا قمر انتى قولتى وجهة نظرك بمنتهى الهدوء وانا برضه رديت عليها
تحياتى
‏قال Desert cat
أنونيمس
شوفت يا دكتور غيابك عمل فينا ايه
علشان مش تغيب تانى بقى
انا مش قولت اشطب وجودة
بس انا مش عايزاهم يدخلوا عندى لانهم يفتقروا للادب والاخلاق
تحياتى
وشرفت البلوج
مش تغيب تانى بقى علشان انت شوفت المجازر اللى حصلت فى غيابك
‏قال AbdElRaHmaN Ayyash
أزال المؤلف هذا التعليق.
‏قال Desert cat
AbdElRaHmaN Ayyash
ليه ومش انشره ليه
ده انا هنشر اى حرف ليكو
خلى الناس تتفرج على الادب بتاعكو واسلوب كلامكو القذر فى الرد
واظن دلوقتى واضح من اللى فى قلبه حقد
زيد كمان
هات ما عندك خلينا نتفرج
على الادب الجم وطريقة الحوار الجميلة
خلينا نتفرج كمان على الموضوعية وعلى اسلوب المناقشة اللذيذ
هات ما عندك خلي الناس تتعرف على اخلاق الاخوانجية
‏قال Unknown
للأسف ما فيش حاجة أسمها أستماع لوجهة نظر حد و لا المناقشة بموضوعية مشكلتنا ان كل واحد فينا عامل نفسه مقياس الصح و الغلط و الخير و الشر و عايز يقنع الطرف التانى بالعالفية و بالاكراه انه رايه هو الصواب و العبقرية لمجرد عنترية مدسوسة فى دماء العرب زى السم سم موت العقول و القلوب و كل حاجة ممكن الانسان يستخدمها لفايدة الكون

مدام مش بتتعرضى لأساءة الدين أيه المشكلة اننا نستمع لوجهة نظرك خصوصا انك بتقولى حاجات شوفتيها بعنيكى


ده حتى لو بتسيئى للدين برده يبقى نناقشك بالتحاور البناء ( و لو كنت فظا غليظ القلب لأنفضوا من حولك )

و الرسول ( ص ) لما الراجل اليهودى الى كان بيقضى حاجته كل يوم قدام بيته راح زاره لما سمع انه بطل يجى عشان عيان راح اليهودى اسلم

احنا ليه كده بنتشدق بالدين و احنا بعدين كل البعد عنه

و بعدين لما حد يعاكسك و يبعتلك اميلات و كده ما ترديش ما تديلوش اى اهمية و خلى ايميلك معروف لمقربين الى بتثقى فيهم بس

كل سنة و انتى طيبة
‏قال rommantic
تحياتى
وده اول مرور
واحب اقرأ ليكى حاجه محسش فيها بعنف
وعلى فكره انا مش اخوان
ياريت تتقبلى مرورى
سلام
‏قال Empress appy
الله يخربيت مخك يا شيخه
والله صدق اللى قال ماسكه شبشب قوليلى هو جاب لك واحد جديد ولا لسه
بس بجد برافوا عليكى عارفه ليه علشان دول ناس مش محترمه اللى تشتم وتقل فى ادبها سواء بينتمى للاخوان ولا لاى طائفه او حتى مش لاى فكر ويقل ادبه ويتهم حد بحاجه هو اصلا مش فاهمه معناها يستاهل تشرديه له كده
‏قال Desert cat
عاليا حليم
طبعا كلامك صح يا عاليا
بس الكابتشن مبعتليش ايمله اضافه انما بعته لى فى كومنت علشان عارف انى عاملة مودريشن
عموما انا برضه محرمتوش من التعارف ونشرته له فى بوست مخصوص علشان يتعرف براحته بعيد عنى
كل سنة وانتى بالف خير يا جميلة
‏قال Desert cat
rommantic
طبعا تشرف والف اهلا وسهلا بيك فى اى وقت
تحياتى
‏قال Desert cat
appy
هههههههههههه
معلشى يا قمر
جت فيه بقى نعمله ايه ظروفه كدا
كل سنة وانتى طيبة
‏قال الربان
تحياتي

طبعا هناك من يحاول ان يستغل الفرص
لكن انا متأكد منك..متأكد انك تقدري
تحاوري بالتي هي احسن....فأذا الذي بينك و بينه عداوة كانه ولي حميم...


اسأل الله ان يهدينا جميعا سواء السبيل
وان يؤلف بين قلوبنا لان التراحم بيننا
هو السبيل الي مرضاة الله .


تحياتي و تقديري
‏قال Desert cat
الربان
استاذى الفاضل
انا محدش حاورنى علشان اعرف انطق او ارد انا قالوا انتى كافرة
طيب منين كافرة ومنين جاى يتعرف عليا
حقيقى انا اسفه لنزول بوست زى ده فى مدونتى لكن مكانش فى حل غير كدا
احترامى وتقديرى
وكل سنة وحضرتك بالف خير
السلام عليكم
عندك حق ياقطة فى ناس شغلة نفسها بحاجات كتير وفى مشاكل اهم لوتفرغنا لحلها ممكن نقدر نعيش
تقريبا اول مرةأعلق عند حضرتك

بطريق الصدفة

ليس من حق اى أحد ان بنعت أحد بالكفر لانه لم يشق على قلبة

وفى نفس الوقت لا ينبغى ان نرمى الاخرين بجريرة اشخاص بعينهم


ما ادارك ان من دخل ونعتك بهذه الصفة يكون اخوان اصلا


حتى وان قالها بلسانة


كلنا أخوان وكلنا مسلمون



اللهم اغفر زلاتنا واخطاءنا


تحياتى
‏قال Desert cat
رئـــــيسـة حزب الأحلام
حبيبتى والله انا بعت تحذير ولو حد فيهم بس مجرد تفكير يفتح بؤه يبقى هو الجانى
تحياتى يا جميله
‏قال Desert cat
الطائر الحزين
طبعا حضرتك شرفتنى بتعليقك
بالرغم من زعلى اصلا انى نزلت بوست زى ده بس بجد الكلام استفزنى
اضطريت انزل البوست علشان يعرف هو او غيره انى مش هسكت عن اى تجاوز
احترامى وتقديرى
انا كنت كتبت تعليق هنا وقلت فيه انت تاعبه نفسك على الفاضى مش عارف ليه مش لاقيه
اظاهر ان انت من اللى بيلغوا التعليقات الى مش على مزاجهم

اسف لأزعاجك
‏قال Desert cat
محمد عبد الغفار
والله يا فندم اول مرة فى حياتى اشوف اسم حضرتك فى البلوج
عموما شرفت
‏قال Desert cat
محمد عبد الغفار
والظاهر انك من اللى بيرموا اتهامات على الفاضى والمليان
طبعا أصلهم واخدين توكيل حصرى للأسلام في مصر
أنا معاك على طول الخط ضد النازيين الجدد
‏قال Desert cat
أنت عارفنى وأنا عارفك
هههههههههههههه
والله اجمل تعبير سمعته
بس فعلا لايق اوى على افعالهم
تحياتى
‏قال hui mu han
بصي اولا انا ليبرالي (يعني الدار امان)وفعلا انا شوفت كتير بيكفرو العلمانيين وبيعتبروهم ملحدين

وكتير كنت بعتب على طريقة حوارهم غير المنطقية واسلوب كلامهم اللي قايم نظرة واحدة للموضوع

بس برضه كل صاحب فكر ليه احترامه
انا عارف انك ممكن ميعجبكيش الكلمة دي بس الاخوان اصحاب فكر حتى ولو كانو خاطئين في افكارهم فاراهم وافكارهم ليها احترامها
واللي يقولك ياكافرة متنزليش نفسك لمستواه واسلوبه المتدني في الحوار

يعني من الاخر لما قولتلهم تعليقك عندي مرفوض ده عدم احترام راي الاخر

معلش انا بؤمن بحرية الراي للجميع دون استثناءات
‏قال Desert cat
hui mu han
طبعا حضرتك تشرفنى ونروت البلوج
وبعدين حضرتك خلاص اديتنى الامان يعنى ها اخد راحتى فى الكلام من غير ما حد يقولى يا كافرة
ههههههههههههه
يا استاذى انا ما اعترضتش على دخلوهم هنا غير لما الموضوع زاد عن حده واتهامات غير منطقية شوية انتى امن وشوية النقيب قطة الصحراء واخيرا علمانية كافرة انا مش فاهمه ايه علاقة العلمانية بالكفر من الواضح انهم مش عارفين معناها
المهم يا استاذى الفاضل انا مش بحجر على فكرهم هما او غيرهم انما انا كمان يهمنى ان محدش يجى يشتمنى فى مدونتى واللى هى تعتبر بيتى
يعنى حضرتك ترضى ان ضيف يدخلك يشتمك فى بيتك وتسكت له مرة والتانية والتالتة اظن فى الرابعه هتقوله اطلع بره
طبعا احترم راى حضرتك جدا
احترامى وتقديرى
‏قال صحفية روشة
بسم الله الرحمن الرحيم
هكتب بايدى اليمين
تيمنوا فان فى اليمين بركة
لكن لو كتبت بالشمال ربنا مش هيودينى النار
يسروا ولا تعسروا بشروا ولا تنفروا
وربنا الرحمن الرحيم مش هيدخل عباده النار عشان الحاجات الصغيرة دى حتى لو كانو بيعملو كل حاجة صح ولا اية؟
‏قال Unknown
طبعا أحييكى على شجاعتك وصدقك أنا شايف إن اللى ياخد من الدين وسيلة للوصول لأغراض دنيوية سواء سلطة او منصب او كرسى او غيره ميستحقش يبقى حتى إنسان
وعلى فكرة هما بيجتمعوا مع بعض فى الأفراح والمناسبات والمياتم عشان يبينوا للناس إنهم وحدة واحدة
وإن هما الإخوان المسلمون والباقيين ولاد الغسالة
شكرا على رأيك الصريح
‏قال Desert cat
صحفية روشة
ايه ده انتى داخله تكتبى بايدك اليمين من غير فتوى
وكمان بتقولى مش هتدخلى النار

لالالالالالالا
راجعى نفسك وعدوى الى صوابك
ههههههههه
والله عجايب يا اختى الناس دى مش عارفه انا مين ولاها امور المسلمين
تحياتى ليكى يا جميله
‏قال Desert cat
ayman badr
هما حتى ان مش لقيوا افراح ولا مناسبات بيروحوا يبلغوا عن بعض ويقعدوا يقولوا شوفوا احنا بننسجن ازاى الشرفاء يتسجنوا يا جدعان
ربنا ياخدهم
تحياتى
‏قال Dr. Diaa Elnaggar
العزيزة قطة الصحراء

بعيدا عن كل المناوشات الدائرة هنا أحب أن أقول لك ربما السبب في رغبة هذا الأخ في إضافة بريدك الإلكتروني على المسنجر عنده، لأن هذا من أحد الطرق التي يستعملها الهاكرز لمعرفة كلمات السر الخاصة بالمواقع ومنها طبعا مدونتك، ربما بغرض التسلل إليها ومسحها من الوجود فيما بعد. لذا وجب التنبيه. خللي بالك.

أما بخصوص موضوع التدوينة نفسها فأنا متفهم نبرة كتابتك الحادة، ولكني مع ذلك اتفق مع بعض من دعاك إلى عدم اللجوء للألفاظ من العيار الثقيل حتى لا تفقدي الهدوء المطلوب للرد العقلاني وللسيطرة على دفة الحوار.

عميق تحيتي وخالص مودتي

ضياء
‏قال Desert cat
Dr. Diaa Elnaggar
العزيز دكتور ضياء
اشكرك جدا على لفت انتباهى فعلا لنقطة كانت غايبة عنى
بس الحمد لله عدت على خير
بالنسبة لطريقتى الحادة فانا بجد كنت مستفزة جدا من اللى حصل
لكن احترم وجهة نظر حضرتك
احترامى وتقديرى
سعيدة جدا بتشريف حضرتك

المشاركات الشائعة