غـيــــر مرغـــوب فيكـــــو

طبعاً من العنوان معروف مين اللى غير مرغوب فيه يدخل هنا
ايوه بالظبط كدا الاخوان المتأسلمين اللى أول ما بيصدقوا يشموا خبر انى نزلت موضوع ألاقيهم لامين بعض وجايين كأنهم داخلين غرزة ... لأ معلشى انا مش عايزه اشوف طلتكو البهية هنا .. لأنكو ناس متعرفوش تتكلموا ومتعرفوش تتناقشو ومتعرفوش حاجه عن الأدب ولا الأخلاق ... كل اللى تعرفوه أنكو تستقوا أوامر تخزنوها فى عقولكو وتنفذوها بالحرف الواحد ولو سمعت ان حد جاب سيرة ولى نعمتك يبقى تروح تلم باقى الرعية اصحابك وتجيى جرى تقعد ترص فى كلام من عينة يا كافر يا زنديق أصبأت تغلط فى مهدينا ... أه أغلط ونص هو مهديكو ده نبى ولا رسول؟؟؟ واحد مش عارف يحترم الناس وبينشر فكر مسموم ولامم حواليه مجموعة من السهل اللعب فى عقولهم وملهمش اى هدف ... ناس مش بتعرف تدخل الحمام برجلها اليمين او الشمال الا بفتوى ... من حقى انقضه ومن حقى اتكلم عن أخطائه وانت من حقك تناقشنى إنما مش تشتمنى ولا تقل أدبك عليا ولا تورينى سفالتك ولا تعرفنى إنك مش متربى .... ده كمان حاجه غريبة اثبتت لى فعلا ان الناس دى ملعوب فى دماغها ومن عينة حبة فوق وحبة تحت ومطرح ما الريح ما تودى الريح ما تودى ... الاقى رد غريب اوى
من عينه انا ردى مش اتنشر ليه يا علمانية يا كافرة علشان تعرفى بس انك بتكدبى .... انا بكدب ازاى يا اهبل وانا جايبه لك فيديو مهديكو عاكف قاعد فيه بشحمه ولحمة وبيقولك انا دربت فى الجامعه ... البعيد اعمى واصم بس قليل الادب .... نفس الحيوان اللقالى يا علمانية يا كافرة ... ... لما لاقانى مش نشرت الرد بتاعه رجع قالى طيب ده ايميلى ضيفيه علشان نتفاهم .... اصل مش ينفع نتكلم كدا على صفحات البلوج ... برضه مش رديت علي حضرة الاخوانجى اللى عايز يتفاهم ... لأنه المفروض يبقى معروف ليهم كلهم انى رافضه وجودهم هنا ... شوية تانية ايه يا جميل انت مش عايز تتعرف ولا ايه ... تقريبا افتكر انى فاتحه بلوج للتعارف او حب يجرب طريقة جديدة ... يمكن ؟... وادى ايملى مرة تانية ... يهمنى اتكلم معاكى بجد والله مش يمكن نبقى اصحاب ... لاء يا شيخ معقول .. جاى تصاحب علمانية كافرة زى ما قولت ... ايشى خيال يا ناس ... وده يبقى ايميل الكابتشن اللى عايز يتعرف ويصاحب العلمانيين الكفرة للى عايز يتعرف
isoood_elkabeer2000@hotmail.com
اظن العنوان واضح اوى للأعمى فيكو قبل البصير
انا مش بتعرف ولا بصاحب ولا عندى نية ابقى من الاخوات .... ومش عايزة اشوف وش حد فيكو هنا .. واللى يفكر يغلط ويضغط لنك البلوج يبقى يقرا سورة يس الاول ..... لانى مش هسكت لاى حد اشوفه هنا
واى حاجه اشوفها من حد فيكو سواء على النت او بره النت هنشرها وهعمل لكو فضيحة
وقد اعذر من فنزر
بالمناسبة اسم المدونة كان aboooodx
ولما جيت افتحها علشان اشوف هوية الكابتشن لاقيته اسم بدون بلوج
هع هع هع هع يا جبااااان طيب ما تدخل باسمك الحقيقى ولا دى عواديكو ولا هتشتروها

Comments

اول كومينتتتتتتت

لوووووووووول

وجايه
جامدددددددددده

مبيدخلوش الحمام برجل الشمال او اليمين الا بفتوى ده

ههههههههههههههههههههههههههه

ربنا يقويكى وم حئك طبعا

ترحبى بمين وتمنعى مين م دخلو مدونتك

مدونتك زى بيتك وانتى حره ف استضافة اللى يريحك

تحياتى يانانا ياقطه يامخربشه
somaa said…
ازيك قطه..
ليكى حق تعترضى كيفما تشائى على اللى انتى عاوزاه فالموضوع زى ما قلت قبل كدا خبرات شخصيه ...لا اكثر ولا اقل يعنى تتعاملى مع السىء فتحكمى انهم سيئين تتعاملى مع الحسن فتكمى انهم كويسين...اما حكايه الحمام وكدا انا ليا عتاب عليكى فيها هو صحيح ميصحش نفكر فى الصغائر فى الاشياء ونهتم باشياء صغير ونترك الكبير فى ديننا بس برضوا موضوع دخول الحمام بالقدم اليسرى ام اليمنى ودخول المسجد برضوا باليسرى او اليمنى دا فيه احاديث وفيها حكمه...وايا كانت الحكمه والفائده احنا بنستصغرها ...فالدنيا علمتنى الا استصغر شىء فيها سواء دينى او دنيوى انما تستحدث النار من مستصغر الشرر...اقول رايى لكى ولهم بمنتهى الحياديه لانى بالعربى كدا انا مش مع حد انا تبع سرايا المجانين وبس...اللى عاوز ياخذ منى ياخذ واللى مش عاوز هو حر
تحياتى ليكى سومه_7
انا مصرى وارفض الاخوان لكن لا ارفض العيش معم لانهم بشر
ftafeet said…
ايوه يانانا كده شاطره اديلو فوق دماغه علشان يعرف قيمه نفسه كويس

حقك يابنتى تعملى كل ده فيه ده واحد بيستهبل مش اكتر

ودى بلوجك وتكتبى فيه اللى انتى عايزاه وتستقبلى برضه اللى انتى عايزه
ايوه كده اديهم مترحمهمش
Heart Beat said…
تعرفي حتى لو انطباعم عن الاخوان كان عن تجربة شخصية حصلت معاكي على ارض الواقع زي مثلا النائب الاخواني عندكم و لا احاديث و اقاويل المرشد العام بتاعهم

الا ان برضه اللي حصل عندك هنا من مداخلات من ناس بتتبع الجماعة هي برضه مجموعة جديدة من الدلائل اودامنا كلنا ان الناس دي كلهم كده و لا حتى نسبة 99% منهم تفكيرهم و اسلوبهم واحد وقلة قليلة اللي ممكن نقول عليهم بيفكروا بعقل و تروي

يبقى النماذج اللي بنشوفها عندك في المدونة هنا او في مدوناتهم هي دليل على صحة كلامك لكل انسان علق قبل كده عندك و شكك في كلامك

اللي مايشوفش من الغربال يبقى اعمى و مش معقول يعني ان النماذج اللي ذكرتيها قبل كده هم نفسهم اللي بيعلقوا عندك برضه

لكن هم حاجه واحدة جماعة واحدة مغيبة وراء ستار من الكلمات الرنانة و الوعود المؤكدة بدخول الجنة نظير القيام باعمال معينة

اما عن الاستاذ صاحب الايميل الكبير اللي عايز يتعرف ده فاشكرك طبعا انك فضحتيه عشان هو و اخوانه يعرفوا ان في جماعتهم ناس بالحقارة دي

و مع ذلك برضه هاتلاقي ناس منهم جم يقولوا ان الشخص ده لا يمثلهم في اي حاجه

لان هو ده اللي بيعملوه دايما يرتكبوا الخطأ و بعدين يقولوا مش احنا

ربنا يبعدهم عنك يارب
تاااااااااااااااااااانى
عموما
مش هاقدر مسلمشى
تحياتى
هو ان الواحد يدخل الحمام ويخرج بفتوى دى حاجه كويسه ياخد عليها ثواب

الى مش كويس انه يتاجر باسم الدين ويستغله فى الحصول على منافع شخصيه - زى كتير من الاخوان
Desert cat said…
د/اجدع بنوته
مبروك عليكى جايزة اول كومنت
شكولاته كادبورى
Desert cat said…
د/اجدع بنوته
والله يا دكتورة هما اللى اضطرونى لكدا بس هعمل ايه
علشان بس يعرفوا انهم مش فى مولد
تحياتى يا قمر
عزيزتى
كويس انا مش اخوان

يعنى مقبول اخش هنا

طيب الضباط هتمنعى منهم حد ولا الضباط مينفعش تمنعيهم

وامناء الشرطه الارزوقيه دول

مش تبع الشرطه تدفعى عنهم

ولا تخصص ضباط بس

نورتك مش كده

سلام
Desert cat said…
somaa
انا الحمد لله كويسة جدا
ربنا وهب لنا كل واحد عقل نميز بيه
يعنى مش معقول هروح لواحد عامل الدين سبوبة ورزق واقوله افتينى يا عم الشيخ ما هو من الطبيعى هيفتينى على مزاجى علشان يقبض
نحياتى
Desert cat said…
صوت من مصر
كلنا رافضينهم مش انت بس
وهما عايشين مع نفسهم ولاغراضهم يا فندم
تحياتى
Desert cat said…
ftafeet
طبعا يا ماما هو وقع ولا الهوى رماه
افتكر انى حاجبه التعليقات يبقى كدا خلاص يعمل اللى يريحه مش يعرف انى بتلكك نورتينى يا نونا
محبتى يا جميلة
Desert cat said…
Heart Beat
حبيبتى ياريت عضو مجلس الشعب ولا اللى بيدخلوا هنا ولا اللى بيكتبوا فى مدوناتهم بس انما انا شوفت الكتير والكتير على يد اخوانجى غير مهذب وانا كاتبه عنه موضوع من زمان كان اسمه يقولون مالا يفعلون ... بنى ادم لا ينتمى للانسانية ولا يسمع عن الإسلام شئ الا انه فى الرايحة والجاية يتحدث عنه وفى الباطن سفيه وكداب ومنافق وبتاع بنات مبعدش عنى الا لما عملت له محضر فى القسم .. تخيلى خاف من الشرطة اللى كلهم تقريبا بيخافوا منها علشان موقفاهم عند حدهم ومخافش من ربنا اللى رايح جاى يتشدق باسمه ...
طبعا صاحب الايميل الكبير حب يدخل من كذا اتجاه الاول كافره وعلمانية وبعدين نتعرف ونبقى صحاب ... الظاهر موصلوش لحد دلوقتى انى مش طيقاهم ... يمكن
تحياتى ليكى
Desert cat said…
فرنسا هانم
احلى مساء من احلى فرنسا
اموااااااااااااه
Desert cat said…
بطوط حبوب
يا دكتور ياريتها تيجى على التجارة بالدين
الا التجارة بالدين وارهاب وتطرف وانتفاع ومصالح شخصية وبلاوى زرقة
تحياتى
Desert cat said…
احساس لسه حى
على رأى المتنبى ورئيس جمهورية نفسى
لكل داء دواء يستطب به
إلا الحماقة أعيت من يداويها
ايوية said…
العزيزة قطة
على فكرة انتى تعبتى نفسك بالرد عليهم دول ميستحقوش انك تتعبى وتردى وتنشرى موضوع كان اولى انك تكتبى شى اهم منهم ضيعتى وقتك فى الرد عليهم دول ناس من ضعف شخصيتهم وكلامهم ولانهم مش عندهم ما يتناقشون بة فلما ميعرفوش يردوا يبداءو فى اطلاق الشتائم والتكفير و الاتهام بالالحاد
لما يبقى ليهم فكر وقدرة على الحوار العلاقنى الهادى المحترم تبقى تردى عليهم
تحياتى ليكى
EmY said…
لقد صبات قطتنا و ظلت عن طريق الهدي
ليه يا قطه كده حد يقول علي عكوفه كده ده مشخلعنا و مدلعنا و مهشتكنا و مبشتكنا

للاسف هو فاضله زلطه و يعملوا نبي بقي فوق النقض و الي يقول عليه كلمه هايروح النار

انتي شكلك هايخطفوكي قريب علشان يدبحولنا القطه

بس ولا يهمك انا هابقي اخد بالي من السايبر و البلوج

تحياتي يا قمر
Migo Mishmish said…
الاخت قطه الصحراء انا احييكى على مدونتك الجميله فانا اتابعها دائما انا ومشمش زوجوجتى .اما بالنسبه لجماعه الاخوان فانا ارفض اسلوبهم لانهم بعين واحده فقط يرون بها مايريدون هم فقط ولا اعتبار للاخر الذى يعيش فى الوطن والانسانيه ..على فكرة انا قبطى ولكن انتمائى الاول والاخير لهذا البلد الجميل ..انا لست ضد الاسلام ولكن ضد فرض الرأى على الاخر بالقوةفحريتك تقف عند حريه الاخرين فهؤلاء المتاسلمين يحتكرون الدين والرأى لانفسهم فعندهم الراى القويم والصائب والاخر جاهل مهما كان طالما رأيه يتعارض مع افكارهم والدليل على ذلك هو ماقاله المهدى بتاعهم حينما قال طظ فى مصر والى مش عاجبه ياخد بالجزمه ..هذا هو فكرهم ومنهجهم ..وبالمناسبه انا معارض لاى تيار دينى يكون على حساب المواطنه ايا كان هذا التيار مسيحى او اسلامى او يهودى فالدين مكانه القلوب فقط
اهدي شوية يا قطة
وسيبك من الاخوان دول

عايزين بقى مواضيعك الحلوة من تاني
نفسي المرة الجاية ادخل ملاقيش حاجة عن الاخوان

اتمنى
:)
Migo Mishmish said…
لا أمل فى أمه تحولت انظارها عن مقدمه ابن خلدون ..الى مؤخرة هيفاء وهبى !!!!
أنا حر said…
طول عمر العلمانيين بالنسبة للاخوان المسلمين عفاريت علشان بيواجهوهم بالحجج القوية وبنقدر نثبت انهم غلط وان تفكريهم عقيم وبعيد كل البعد عن الدين اللي هما بيتمسحوا فيه
بتفق معاكي في كل كلامك لأني علماني ضد الاخوان المسلمين وضد اي شخص بيقحم الدين في عالم السياسة
لكن احب انصحك بعدم استخدام الاظ جارحة زي اللي في البوست علشان محدش يمسك عليكي حاجة
ارفعي دايما شعار مدونة نظيفة لا تحمل الفاظ بذيئة
تحياتي
oceaneyes said…
اوى كدة عايزاكى تهدى اعصابك وبلاش انفعال زايد بسبب ناس ما تستاهلش

انا اول مرة فى حياتى اشوغ اخوانجى عايز يصاحب !!

والله الدنيا دى بيتشاف فيها العجب فعلا

ولا يهمك يا نانا ..ولا تتضايقى ..

وكويس انك نشرتيه كدة دلوقتى ..وعرفتيه مقامه هو واللى شبهه


يالا حصل خير وكل سنة وانتى طيبة يا جميا بمناسبة المولد ..وعيد الأم كمان



تحياتى

:)
صباحو عسل يا جمل قطه
ايه يا بنتى الى جرى
هما شنوا الحرب خلاص
على راى عادل امام نابيلون ساب ابو قير والحرب وقعد يمضى على اطباق
هما الاخوان سابوا الدنيا كلها وتفرغوا للمدونين
الناس دى بقيت غبيه كده ليه
والبشمهندس مزعل نفسه ليه لما احنا كفار ينام ويطمن هو بس واحنا هندخل النار ميقلقش
اصلى احنا حاسين ان الدنيا برد شويه
عجبى
بالمناسبه انا يساريه والعلمانيه مش كفر ولا حاجه
Sherif said…
أرى شيئا بسيطا

أجمل شئ لمقاومةأى شئ يضايقنا .. هو تجاهله

تحياتى
ايه يا قطة
بالراحة شويه حتى لو فى ناس منهم قلالات الادب ذى ما بتقولى مينفعش تقولى محدش يخش هنا خالص

يعنى انتى تنتقضى مهديهم وتتكلمى ذى ما انتى عايزة ومش عايزة حد يرد عليكى

انتى من حقك تقولى مش عايزة غلط ولا شتيمة وده منهم ومن اى حد ومن حقك تمسحى التعليق اللى فى شتيمة
بس مش معقول كلهم بيشتموا اكيد فى نسبة ولو حتى قليلة هتكلمك بالراحة وتتناقش معاكى
ويا يقنعوكى وتبقى الاخت قطة وتبطلى خربشة
يا تقنعيهم وتبقى كسبتى ثواب

انا ابتديت اخاف منك انتى بقالك كام بوست عمالة تتخنقى وتهددى وانا راجل صاحب مرض وصحتى على قدى ومش حملك

سلالالالالالالالالالالالالالالام
Foxology said…
ههههههههههههههههههههههههههههههههههههههههههههههههههههههههههههههههههههه

والله بوست جامدة جدااااااااااااااا

ينهار ابيض :))

المشكلة فعلا انهم حبة فوق وحبة تحت وبعدين الباشا اللى قالك يا كافرة لو هو بأة اخوانى بصحيح مكنش قالها لأنها فيها حد عقوبة المفروض انه يكون عارفه

تحياتى :)
totaaaa said…
قال اخوان مسلمين قال
دول ولا يعرفوا حاجة عن الاسلام ولاحتى عن ادب الحوار ولا الاسلوب اللى المفروض يتكلموا بيه
وبعدين لو هما اخوان مسلمين احنا ايه اخوان كفرة يعنى و مهدى عاكف ده كمان اللى كان قعد يشتم فى مصر وياستى لو هما عالمين الغيب او يمكن مهديهم عاكف على رايك شاف لهم رؤية ولاحلم ان هما بس اللى هيدخلو الجنة فيلا يتفضلوا بس برجليهم اليمين بقى
والله اكتر ناس بتحرق دمى هما الاخوان المتاسلمين دول
تحياتى ليكى وماتسكتيش وريهم العين الحمرا
احلى سلام
ايه يا قطة
اغيب يوم الاقى الدنيا مولعة
ويافطة مكتوب عليها ممنوع الدخول الا بكوبون وتذكرة مدفوعة مقدما
ولازم ادخل برجلى اليمين المدونة طب اعمل ايه انا دلوقتى اذاكان رجليه الاتنين يمين
ادخل يعنى ولا ارجع تانى اقف فى الطابور
اقول ايه بس ياقطة ربنا يوفقنا جميعا الى ما يحب ويرضى
تحياتى ليكى يا اسد
هما لسه برضه وراكي
معلش كان الله في عونك
بقولك هدي اللعب شويه عشان اعصابك صدقيني والله صحتك اهم

ربنا معاكي وتحياتي
أولا كل سنة وانتى طيبة يا قطتى

ثانيا

بصى بقى

مش كل الأخوان متأسلمين

كل حاجة فيها الحلو والوحش

وكمان انتى غلطتى عشان حاطة ايميلة كدة عالبلوج ودى حاجة تأخذ عليكى كنت أتمنى انك تتناقشى معاة أحسن وتتفاهموا

والأخوان جزء من المجتمع مينفعش نلغية ونحزفة

وعلى فكرة المفروض انك ترحبى بأى حد يخش عندك

كلامك دة هيتفسر بأنك جبانة وخايفة

أيوة هيتفسر أنك خايفة تخشى فى نقاش ومجادلات



متزعليش منى انا بقول رأيى يا عسل

......

كل سنة وانتى وماما طيبين

:))
أنونيمس said…
يا نهار احوس
هو فيه ايه؟؟
اغيب اسبوع كده ألاقي الخناقه دي؟؟؟

بعدين ما تختلفي معاهم زي مانتي عاوزة حقك ..واللي مش قابل يخبط دماغه ف اقرب حيطة اسمنت مسلح

بس متقدريش تمنعي حد بالشكل ده أو تشطبي وجوده
ولا أيه
Desert cat said…
ايوية
والله صدقتى فى كل حرف من حروفك يا ايوية بس انا حبيت افضحهم واعرف الناس عمايلهم وكمان رسالة ليهم اى حد يفكر انه يعمل حاجه مش هسكت مش يغره انه مستخبى ورا شاشه
كل سنة وانتى طيبة يا جميلة
Desert cat said…
EmY
يعملوه نبى على نفسهم
اذا استمروا هما اصلا
ولو جرى لى حاجه اديكى عرفتى مين اللى هيكون عاملها
ابقى بلغى الشرطة
امن الدولة اللى مسببه لهم رعب
كدا يعنى
والسيبر انا عارفه انتى قدها ونص يا حبيبى
Desert cat said…
Migo Mishmish
طبعا ان يشرفنى وجود حضرتك ومدام مشمش فى مدونتى
انا كمان ارفض اى حد يقول اللى يعارضنى هديله بالجزمة
او يقول علينا طز انا مش عارفه الناس اللى عامله منه نبى دى ايه معلشى بقى مغيبين
تحياتى
Desert cat said…
آلام وآمال
حاضر يا محمود ان شاء الله ترجع مواضيعى بس انا حبيت انوه عن الى بيحصل واللى بيعملوه من خلف الكواليس وبعتبر ان ده انذار اما لو حصل تانى فاللى هيعمل كدا هيبقى هو الجانى
تحياتى
Desert cat said…
Migo Mishmish
لقد اصبت
تحياتى لحضرتك ولمدام مشمش
Desert cat said…
أنا حر
طبعا اشكرك على النصيحة
بس الشخص اصر على استفزازى لدرجة وصلتنى للانفعال ده
الغريب انك تلاقى كل واحد فيهم قاعد يقولك علمانيين كفرة ومش يعرف انه وقع فى اثم ولا يعرف اصلا ايه معنى كلمة علمانية لانه دايما يربطها بالكفر
تحياتى
Desert cat said…
oceaneyes
حبيبتى ما هو انا نشرت غسيله اللى ريحته طلعت على البلوج علشان يعرف قيمته كويس
كل سنة وانتى بالف خير يا جميلة
Desert cat said…
قلوب بتغنى
صباحة فل يا قلبى
ما هما دول اللى هيحرروا البلد مننا احنا العلمانيين الكفرة
هههههههههههه
يا حبيبتى دول مش عارفين معناها ايه لانهم دايما بيربطوها بالكفر شوفتى الثقافة
كل سنة وانتى اجمل قلوب بتغنى
تحياتى
Desert cat said…
Sherif
وهذا ما سوف يحدث يا شريف
انا نشرت الميل علشان يعرف انه مش هيفضل يتكلم ويهرتل كدا وانا ساكته اصل اكيد هيكون لى رد فعل
تحياتى
Desert cat said…
حــدوتـــة
يا حدوته مش تخاف انا اهددهم هما اه انت لاء الا انت يا صاحب المشروع اللى هنعمله سوا
يا فندم طالما انت ملاحظ كام بوست مش ملاحظ التعليقات واقنع مين ولا اقتنع بمين انا معنديش استعداد ابقى منهم انا مش عايزه جهل وتخلف .. حرام عليييييك
انا قولت من حقك تناقشنى لكن مش تشتمنى
طيب لما واحد يدخل يقولك يا علمانى يا كافر يبقى ده ايه
بيدلعك
تحياتى يا فندم
Desert cat said…
Foxology
هتقول لمين بقى لما الناس اللى المفروض انها بتطبق صحيح الدين تدخل تقولك يا كافر مستنى ايه من العلمانيين اللى زى حضرتى
ههههههههههه
تحياتى
Desert cat said…
totaaaa
اه هما بس اللى اخوان مسلمين
وهما بس اللى هيدخلوا الجنة واحنا علمانيين كفرة
ربنا يشفيهم
وبعدين انا مش بسكت انا بعمل نشرات اخبار على طول
نورتينى يا توتا
Desert cat said…
همس الاحباب
لاء يا خالد انت مش مع الناس التنيين انت مع الظبابيط
ههههههههههههههههه
يعنى ادخل ولا يهمك برجلك الشيمين
تحياتى
Desert cat said…
اسكندراني اوي
هما شكلهم مش ناويين يسيبونى اصلا بس انا ادهم ما تقلقش اختك برضه اسد
انا لو كتبت عنهم حرف تانى هبقى بديهم اكتر من حجمهم الطبيعى
بس انا حبيت افضح الكابتشن واعرفهم اخلاقهم كويس
تحياتى استاذى الفاضل
وكل سنة وحضرتك بالف خير
Desert cat said…
مروة الزارع
وانتى طيبة يا قمر
مش كلهم متأسلمين وكل مكان فيه الحلو والوحش على حد قولك
طيب ايه رايك فى اللى بيشتموا من غير ما يتكلموا فى حرف من اللى انتى كاتباه وايه رايك فى اللى بيكدب لمجرد انه يقول الكلام ده غلط مع ان الراجل قاعد بشحمه ولحمه وبيعترف بس داخل يكدبه ازاى مش تعرفى وايه رايك فى اللى بيكفرك وايه رايك فى اللى بيتحرش بيكى فى المواصلات او فى اى مكان منهم ولما تعملى له محضر يبقى زى الفار المسلوق وايه رايك فى اللى يقف بملئ فيه ويوقلك فى طز فى مصر وشعب مصر
وايه رايك فى اللى يقولك اللى هيعارض هديله بالجزمة ... واذا كان رب البيت بالدف ضارب
وانتى عارفه انهم كتلة واحدة وجزء لا يتجزأ من بعض
تفتكرى الناس دى بتتناقش علشان تقولى ضعف منى لما اقول مش تدخل هنا
طيب ايه رايك فى الفضيحة اللى فى البوست دى
يعنى انتى سايبه البوست كله وداخله تقولى لى ضعف لما تقولى مش تدخل هنا
ولما اجى اقولك يا كافرة هتقولى لى ايه اتفضلى اجيب لك حاجه ساقعه
يمكن انتى ترضيها على نفسك يا جميلة لكن انا مرضهاش بصراحة وفى الحالة دى مالوش عندى غير الجزمة على دماغه على راى مهديهم عاكف
وانا مش زعلانة يا قمر انتى قولتى وجهة نظرك بمنتهى الهدوء وانا برضه رديت عليها
تحياتى
Desert cat said…
أنونيمس
شوفت يا دكتور غيابك عمل فينا ايه
علشان مش تغيب تانى بقى
انا مش قولت اشطب وجودة
بس انا مش عايزاهم يدخلوا عندى لانهم يفتقروا للادب والاخلاق
تحياتى
وشرفت البلوج
مش تغيب تانى بقى علشان انت شوفت المجازر اللى حصلت فى غيابك
This comment has been removed by the author.
Desert cat said…
AbdElRaHmaN Ayyash
ليه ومش انشره ليه
ده انا هنشر اى حرف ليكو
خلى الناس تتفرج على الادب بتاعكو واسلوب كلامكو القذر فى الرد
واظن دلوقتى واضح من اللى فى قلبه حقد
زيد كمان
هات ما عندك خلينا نتفرج
على الادب الجم وطريقة الحوار الجميلة
خلينا نتفرج كمان على الموضوعية وعلى اسلوب المناقشة اللذيذ
هات ما عندك خلي الناس تتعرف على اخلاق الاخوانجية
للأسف ما فيش حاجة أسمها أستماع لوجهة نظر حد و لا المناقشة بموضوعية مشكلتنا ان كل واحد فينا عامل نفسه مقياس الصح و الغلط و الخير و الشر و عايز يقنع الطرف التانى بالعالفية و بالاكراه انه رايه هو الصواب و العبقرية لمجرد عنترية مدسوسة فى دماء العرب زى السم سم موت العقول و القلوب و كل حاجة ممكن الانسان يستخدمها لفايدة الكون

مدام مش بتتعرضى لأساءة الدين أيه المشكلة اننا نستمع لوجهة نظرك خصوصا انك بتقولى حاجات شوفتيها بعنيكى


ده حتى لو بتسيئى للدين برده يبقى نناقشك بالتحاور البناء ( و لو كنت فظا غليظ القلب لأنفضوا من حولك )

و الرسول ( ص ) لما الراجل اليهودى الى كان بيقضى حاجته كل يوم قدام بيته راح زاره لما سمع انه بطل يجى عشان عيان راح اليهودى اسلم

احنا ليه كده بنتشدق بالدين و احنا بعدين كل البعد عنه

و بعدين لما حد يعاكسك و يبعتلك اميلات و كده ما ترديش ما تديلوش اى اهمية و خلى ايميلك معروف لمقربين الى بتثقى فيهم بس

كل سنة و انتى طيبة
rommantic said…
تحياتى
وده اول مرور
واحب اقرأ ليكى حاجه محسش فيها بعنف
وعلى فكره انا مش اخوان
ياريت تتقبلى مرورى
سلام
appy said…
الله يخربيت مخك يا شيخه
والله صدق اللى قال ماسكه شبشب قوليلى هو جاب لك واحد جديد ولا لسه
بس بجد برافوا عليكى عارفه ليه علشان دول ناس مش محترمه اللى تشتم وتقل فى ادبها سواء بينتمى للاخوان ولا لاى طائفه او حتى مش لاى فكر ويقل ادبه ويتهم حد بحاجه هو اصلا مش فاهمه معناها يستاهل تشرديه له كده
Desert cat said…
عاليا حليم
طبعا كلامك صح يا عاليا
بس الكابتشن مبعتليش ايمله اضافه انما بعته لى فى كومنت علشان عارف انى عاملة مودريشن
عموما انا برضه محرمتوش من التعارف ونشرته له فى بوست مخصوص علشان يتعرف براحته بعيد عنى
كل سنة وانتى بالف خير يا جميلة
Desert cat said…
rommantic
طبعا تشرف والف اهلا وسهلا بيك فى اى وقت
تحياتى
Desert cat said…
appy
هههههههههههه
معلشى يا قمر
جت فيه بقى نعمله ايه ظروفه كدا
كل سنة وانتى طيبة
الربان said…
تحياتي

طبعا هناك من يحاول ان يستغل الفرص
لكن انا متأكد منك..متأكد انك تقدري
تحاوري بالتي هي احسن....فأذا الذي بينك و بينه عداوة كانه ولي حميم...


اسأل الله ان يهدينا جميعا سواء السبيل
وان يؤلف بين قلوبنا لان التراحم بيننا
هو السبيل الي مرضاة الله .


تحياتي و تقديري
Desert cat said…
الربان
استاذى الفاضل
انا محدش حاورنى علشان اعرف انطق او ارد انا قالوا انتى كافرة
طيب منين كافرة ومنين جاى يتعرف عليا
حقيقى انا اسفه لنزول بوست زى ده فى مدونتى لكن مكانش فى حل غير كدا
احترامى وتقديرى
وكل سنة وحضرتك بالف خير
السلام عليكم
عندك حق ياقطة فى ناس شغلة نفسها بحاجات كتير وفى مشاكل اهم لوتفرغنا لحلها ممكن نقدر نعيش
تقريبا اول مرةأعلق عند حضرتك

بطريق الصدفة

ليس من حق اى أحد ان بنعت أحد بالكفر لانه لم يشق على قلبة

وفى نفس الوقت لا ينبغى ان نرمى الاخرين بجريرة اشخاص بعينهم


ما ادارك ان من دخل ونعتك بهذه الصفة يكون اخوان اصلا


حتى وان قالها بلسانة


كلنا أخوان وكلنا مسلمون



اللهم اغفر زلاتنا واخطاءنا


تحياتى
Desert cat said…
رئـــــيسـة حزب الأحلام
حبيبتى والله انا بعت تحذير ولو حد فيهم بس مجرد تفكير يفتح بؤه يبقى هو الجانى
تحياتى يا جميله
Desert cat said…
الطائر الحزين
طبعا حضرتك شرفتنى بتعليقك
بالرغم من زعلى اصلا انى نزلت بوست زى ده بس بجد الكلام استفزنى
اضطريت انزل البوست علشان يعرف هو او غيره انى مش هسكت عن اى تجاوز
احترامى وتقديرى
انا كنت كتبت تعليق هنا وقلت فيه انت تاعبه نفسك على الفاضى مش عارف ليه مش لاقيه
اظاهر ان انت من اللى بيلغوا التعليقات الى مش على مزاجهم

اسف لأزعاجك
Desert cat said…
محمد عبد الغفار
والله يا فندم اول مرة فى حياتى اشوف اسم حضرتك فى البلوج
عموما شرفت
Desert cat said…
محمد عبد الغفار
والظاهر انك من اللى بيرموا اتهامات على الفاضى والمليان
طبعا أصلهم واخدين توكيل حصرى للأسلام في مصر
أنا معاك على طول الخط ضد النازيين الجدد
Desert cat said…
أنت عارفنى وأنا عارفك
هههههههههههههه
والله اجمل تعبير سمعته
بس فعلا لايق اوى على افعالهم
تحياتى
hui mu han said…
بصي اولا انا ليبرالي (يعني الدار امان)وفعلا انا شوفت كتير بيكفرو العلمانيين وبيعتبروهم ملحدين

وكتير كنت بعتب على طريقة حوارهم غير المنطقية واسلوب كلامهم اللي قايم نظرة واحدة للموضوع

بس برضه كل صاحب فكر ليه احترامه
انا عارف انك ممكن ميعجبكيش الكلمة دي بس الاخوان اصحاب فكر حتى ولو كانو خاطئين في افكارهم فاراهم وافكارهم ليها احترامها
واللي يقولك ياكافرة متنزليش نفسك لمستواه واسلوبه المتدني في الحوار

يعني من الاخر لما قولتلهم تعليقك عندي مرفوض ده عدم احترام راي الاخر

معلش انا بؤمن بحرية الراي للجميع دون استثناءات
Desert cat said…
hui mu han
طبعا حضرتك تشرفنى ونروت البلوج
وبعدين حضرتك خلاص اديتنى الامان يعنى ها اخد راحتى فى الكلام من غير ما حد يقولى يا كافرة
ههههههههههههه
يا استاذى انا ما اعترضتش على دخلوهم هنا غير لما الموضوع زاد عن حده واتهامات غير منطقية شوية انتى امن وشوية النقيب قطة الصحراء واخيرا علمانية كافرة انا مش فاهمه ايه علاقة العلمانية بالكفر من الواضح انهم مش عارفين معناها
المهم يا استاذى الفاضل انا مش بحجر على فكرهم هما او غيرهم انما انا كمان يهمنى ان محدش يجى يشتمنى فى مدونتى واللى هى تعتبر بيتى
يعنى حضرتك ترضى ان ضيف يدخلك يشتمك فى بيتك وتسكت له مرة والتانية والتالتة اظن فى الرابعه هتقوله اطلع بره
طبعا احترم راى حضرتك جدا
احترامى وتقديرى
بسم الله الرحمن الرحيم
هكتب بايدى اليمين
تيمنوا فان فى اليمين بركة
لكن لو كتبت بالشمال ربنا مش هيودينى النار
يسروا ولا تعسروا بشروا ولا تنفروا
وربنا الرحمن الرحيم مش هيدخل عباده النار عشان الحاجات الصغيرة دى حتى لو كانو بيعملو كل حاجة صح ولا اية؟
ayman badr said…
طبعا أحييكى على شجاعتك وصدقك أنا شايف إن اللى ياخد من الدين وسيلة للوصول لأغراض دنيوية سواء سلطة او منصب او كرسى او غيره ميستحقش يبقى حتى إنسان
وعلى فكرة هما بيجتمعوا مع بعض فى الأفراح والمناسبات والمياتم عشان يبينوا للناس إنهم وحدة واحدة
وإن هما الإخوان المسلمون والباقيين ولاد الغسالة
شكرا على رأيك الصريح
Desert cat said…
صحفية روشة
ايه ده انتى داخله تكتبى بايدك اليمين من غير فتوى
وكمان بتقولى مش هتدخلى النار

لالالالالالالا
راجعى نفسك وعدوى الى صوابك
ههههههههه
والله عجايب يا اختى الناس دى مش عارفه انا مين ولاها امور المسلمين
تحياتى ليكى يا جميله
Desert cat said…
ayman badr
هما حتى ان مش لقيوا افراح ولا مناسبات بيروحوا يبلغوا عن بعض ويقعدوا يقولوا شوفوا احنا بننسجن ازاى الشرفاء يتسجنوا يا جدعان
ربنا ياخدهم
تحياتى
العزيزة قطة الصحراء

بعيدا عن كل المناوشات الدائرة هنا أحب أن أقول لك ربما السبب في رغبة هذا الأخ في إضافة بريدك الإلكتروني على المسنجر عنده، لأن هذا من أحد الطرق التي يستعملها الهاكرز لمعرفة كلمات السر الخاصة بالمواقع ومنها طبعا مدونتك، ربما بغرض التسلل إليها ومسحها من الوجود فيما بعد. لذا وجب التنبيه. خللي بالك.

أما بخصوص موضوع التدوينة نفسها فأنا متفهم نبرة كتابتك الحادة، ولكني مع ذلك اتفق مع بعض من دعاك إلى عدم اللجوء للألفاظ من العيار الثقيل حتى لا تفقدي الهدوء المطلوب للرد العقلاني وللسيطرة على دفة الحوار.

عميق تحيتي وخالص مودتي

ضياء
Desert cat said…
Dr. Diaa Elnaggar
العزيز دكتور ضياء
اشكرك جدا على لفت انتباهى فعلا لنقطة كانت غايبة عنى
بس الحمد لله عدت على خير
بالنسبة لطريقتى الحادة فانا بجد كنت مستفزة جدا من اللى حصل
لكن احترم وجهة نظر حضرتك
احترامى وتقديرى
سعيدة جدا بتشريف حضرتك

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز