مــــاذا يأكــــل المصريــــــون ؟؟؟؟

بقلب فى التلفاز بالليل وألاقى جمال الشاعر على الثقافية ... جايب راجلين لابسين بدل شكلها شيك واحد اسمه محمود نوار يبقى مش عارفه مين كدا حماية المستهلك والتانى اسمه احمد تيمور .. شاعر ... ولفت نظرى كلمة كوبونات انا قولت يمكن عاملين سحب وفوزاير الحج والعمرة اللى بيتحفونا بيها ... اكمل للآخر ينوبنى كوبون واروح احج فى شرم الشيخ ... المهم قاعدة متحفزة ورميت ودانى وسطهم والاقيهم بيقولوا ماذا يأكل المصريون ... ( بياكلوا فى بعض يا خويا بعيد عنك )... بس انا بتفائل بيك خير يا ابو جمال ... اشجينى .. اطربنى انت والبهوات اللى معاك دول ... وانا بقى قاعده متفائلة ومبتسمة ... وهما معقلين على ماذا يأكل المصريون ... زى ميكون بيذلونا جه اتصال تليفونى من مواطن مصرى مطحون .. بيقول انا دخلى 95 جنيه فى الشهر ... وكيلو الرز بقى بـ 4 جنيه وكيلو العدس بـ 9 جنيه طيب أعمل بيهم ايه دول انا ... ( واااااااااااااااااو ده انت كدا فى نعمة يا راجل 95 جنيه ده انت تاكل وتشرب طول الشهر ولا عنك ما اكلت ولا شربت وروح اتبرع بيهم لغزة وفكك من الاكل والشرب .. )
... طبعا ابو جمال طيب خاطره بكلمتين وقفل معاه وراح باصص للبهوات اللى معاه وقالهم سمعتوا .. انا خجلان اقول المبلغ اللى بيعيش بيه طول الشهر تانى ... أظن حضراتكو سمعتوا هو مرتبه كام ... واحد زى ده يعيش ازاى بالمبلغ ده ... سؤال وجيه يا ابو جمال الهى ربنا يجعلك نصير للمصريين ... قام واحد من الرجالة الشيك اللى قاعدين .. اتنحنح وقال .. لابد من اكتفاء المواطنين ما يكفى احتياجاتهم من الغذاء والسلع الاساسية لفترة مستقبلية .. وجوون .. وجووون .. وجوووووون ..... ( كان هاين عليا انط فى الشاشه واقوله يابركة الراجل بيقولك مرتبه 95 جنيه هيوفر منهم ما يكفى للمستقبل ازاى .. هو لاقى ياكل فى الحاضر لما هيوفر للمستقبل ) ... يقوم لاقيت جمال قرا افكارى وساله نفس السؤال بس بطريقة شيك .. قاله طيب ازاى بالمبلغ اللى حضرتك سمعته ده ... محمود نوار افندى رد قاله .. ما هو كل مواطن هياخد خاذوق ... سورى يا مواطن منك له .. اعمل ايه بس فى لسانى .. قال كل مواطن هياخد كوبون ويروح بيه للبقال .. يشترى منه التزماته وطالما معاه الكوبون يبقى الالتزامات هتكون مدعمة ... ايه ياعم محمود انا هروح اجمع البون بم بم جمع الكوبونات تاخد سلع مدعمه .... ما هو يا اما انت جاى تسعبطنا يا اما جاى تستهبلنا ... المهم كتمت نفسى بالعافية وقولت اسمع للآخر .. لاقيت جمال بيقوله والكوبنات دى هتكون مع كل المواطنين .. قاله لمهدودى الدخل والمعاشات .. مهدودى الدخل .. هيبقى ليهم دعم جزئى والمعاشات هيبقى لهم دعم كلى .... يا حلولى .... شوية وجمال قال فاصل انا افتكرتهم .. هيجبوا فى الفاصل ده هيفاء ولا نانسى ولا اليسا اهو الواحد يدلع نفسه شوية بعد العبط اللى سمعه ده ... لاقيتهم جايبين حالات من الشارع ... المذيعه دخلت محل فول وطعمية وبتسال صاحبه .. انت بتبيع دلوقتى اكتر ولا قبل كدا ... قالها لاء طبعا قبل كدا اكتر لانى كنت بجيب اردب الفول بـ 350 جنيه .. دلوقتى بجيبه بـ 600 جنيه وساعات مش بلاقى غير نص اردب .. وبالتالى رفعت فى سعر السندوتشات فالمواطن بدل ما كان بيجى ياخد سندوتشات لولاده دلوقتى بياخد بجنيه فول وبجنيه طعميه ويلمهم حواليه وياكلوا اصل لو اخد سندوتاشت مش هيكفيه 10 جنيه ... اتنقلت بعد كدا لمحل كشرى قابلت هناك مواطن وزوجته وعيلينه قاعدين جنبه .. بتقولهم انتوا بتيجوا تاكلوا كشرى كل اد ايه .. قالها فى الخروجات يعنى كل 15 يوم ..( لووووول .. الا هو الكشرى بقى غذاء ترفيهى دلوقتى وفى الخروجات) ... امال بتاكل لحمة امتا .. قالها والله كيلو اللحمة دلوقتى 42 جنيه وعلشان اكل اكله سخنة يتتكلف لها 50 - 60 جنيه والواحد بيتعب ويشقى على ما يعرف يجيبهم .. راحت مراته متنحنحه وتقريبا خطبته فى رجله .. راح راجع فى كلامه وقالها انا باكل لحمة مرتين فى الاسبوع ولو بيتت للصبح برميها ... انا بشفق على الموظف اللى دخله ثابت وعنده اطفال وبيصرف عليهم انما انا تاجر مكسبى بيزيد ويقل ... ( صدق المثل اللى قال الجبن سيد الاخلاق ) .. رجعوا تانى الاستوديو ولسه الحاج جمال بيرحب من تانى بالضيوف اللى مش اتغيروا اصلا ... وجه اتصال على الهواء .. من مواطن بيقول انا ارزقى ودخلى مش بكفينى وانا بفكر اهج واسيب البلد .. جمال رد قاله ياراجل مش للدرجة دى ( احنا كنا رجاله ووقفنا وقفة رجاله وهنموت من الجوع واحنا برضه رجاله ) .. رد البيه الشيك التانى احمد تيمور ... واللى كان اول مرة ينطق من اول الحلقة وقال دى مشكلة عالمية .. اصل اسعار الذهب كمان فى زيادة .. ياريتك ما نطقت .. طبعا جمال مردش عليه وختم الحلقة وقال وما زلنا بناقش ملف ماذا يأكل المصريون ... والله حركة جدعنه منك يا ابو جمال اصل الراجل ده لو كان كمل كان جالى مرض عضال ..
طيب انا دلوقتى مزنوقة فى مج نسكافيه
اجيب منين الكوبون ؟؟؟؟

Comments

هههههههههههههه
اول تعليق برده
جدعة يا بت يا قطة
اوعى ترمى كوبونات بم بم
اصلها كسبانة كسبانة
وممكن نغيرها بكوبون فول وطعمية
وسلميلى على الملوخية
اسعار الدهب زادت هههههههه
هو كان نايم ولا جاى من كوكب تانى
عامة انا لسه عندى نسكافيه من غير كوبون ممكن اعزمك
سلام يا قطة
:D :D

ربنا مع مهدودى الدخل يارب
حسبنا الله ونعم الوكيل

الشعب ع شفا حفرة او اكثر

قريبا جدا

ثورة الجياع

حصريا

انتظرونا
صدقينى ياقطة
لما اقولك ان بلدك دى فيها ناس
اغرب من غرابة الزرافة الى بتتجوز قرد محشى قطن وعرفى كمان
مش عارف ازاى بس ماشيها المرادى

عم الحج تيمور دة
ربنا يديله الصحة يارب وياخده بعدها بيقولك ان دى مشكلة عالمية

طب ياعم الحج واحنا مالنا فيها مشكلة فى الدهب واحنا مالنا
هو بيقول ان دى مشكلة عالمية صح
طب بزمتك انتى سمعتى عن واحد فى اى دلولة عربية
بلاش اوربية
بيقول انا جعان
طب سمعتى عن واحد فى جيبوتى بيقول انا جعان

هو الاخ دة جيلنا من ايوتها مجرى بالظبط الاخ عايز يساوى
بين الراجل الى بيقبض بالدولار
وبين واحد بيقبض اذا كان بيقبض يعنى بالتعريفة

الاخ خريج جامعة العباسية النموذجية الخاصة جنس تالت
شكله بيقول كدة


لا والاغرب والى بجد اثبتلى بالدليل القالع
ان الحكومة دى فيها ناس
يالهوى عايزين شبشب من بتوع خالتى حنوئة فوق دامغهم عشان يفوقوا
كوبون ايه ولاد الذين عملوها على روحهم

يعنى على اخر الزمن الواحد حياكل بكوبون
يعنى مستقبل الواحد حيبقى متوقف على حتة ورقة شبه تذكرةالترام
المعفنه دى

لا والمصيبة بقى ان موظف غلبان شايل فى محفظتة 95 كوبون و راكب اتوبيس
وانتى عارفه بقى اتوبيس يعنى اكيد حتقبلى واحد امه غسالة
فطالع راجل نضيف وبيحب ينضف الناس
فيطلع يلاقى دة فى وشه يوقم لاتش الكوبون

دة بقى يعمل ايه ساعتها
يروح يقف على باب ابو العباس ويشحتله كوبون بخمسة جنيه فول وطعمية وعيش عشان العيال
ولا يعمل ايه

هههههههههههههههه
لا بس حلوة والله
يعنى لو
واحد راح الشغل وعايز يفطر بس نسى الكوبون فى البيت
ممكن يميل على زميله كدة ويقوله
ملاقيش معاك كوبون بجنيه جنيه فول
افطر
يقوم زميله يطلع ذكى ومفتح
ويرد عليه ويقوله
لا معايا بنص جينه مخلل


بس تصدقى عجبتنى اوى حتة انك بتقلبى التلفاز دى لا وباليل كمان
يعنى حاجة غريبة والله

انتى عارفه انا اعرف واحد كان عايز يقلب التلفاز بتاعهم
بس لان التلفاز كان اتنين ونص بوصة فكان كبير شوية
فراح لواحد خراط اسمه حوكشة
عشان يعمله معلقة على مقاس التلفاز
طبعا عمله واحدة بعد عذاب وعملهاله
استيك كمان
اصل الاستيك الحاجة الوحيدة الى
تاهت من ايد الحكومة



ربنا يستر علينا
دحنا حنشوف ايام اسود من السواد نفسه
تحياتى ياقطة
fatima said…
حد برضو يتفرج على النيل الثقافية يا قطة
يا ماما بلاش البرامج دى ... دول ضيوفهم متنقيين ع الفرازة .
عشان يخلصوا على المشاهدين ...الناس مغلطتش انتى اللى عملتى فى روحك كدا ...
و بعدين صحتك انتى خارجة من شبه حادثة و إحنا عاوزينك
الضيوف اللى جم البرنامج دا عشان يقولو للمصريين ياكلو ايه ينطبق عليهم قول مأثور هو
يا مستنى السمنة من بطن النملة عمرك ما هتقلى
و تحياتى يا حبيبتى و قطتى الحلوة
ههههههههههههههههههههههههه
يا كوبوناتك يا قطة

انا خايفة اقول الواحد يجيب الكوبونات منين
لحسن حد يزعل منى
وعلشان كدة مش هاقول
خمنوا انتوا بقى الواحد ممكن يجيبها منين؟
تحياتى ليكى
اختك خيخة
أنونيمس said…
كوبونات؟؟؟
اشطه .. صباح الهبل كده نبقى زي عهد المأسوف على شبابه ستالين

وربنا معجزة .. الحكومه بتاعتنا رجعتنا لأفكار اتنفذت من سبعين سنه .. انجاز انجاز انجاز
وعقبال ما نرجع للمض الجاز
ياقطه

حد يتفرج علي الثقافيه ليه يعني

مفيش مزيكازوووووووووم
كنتي هتلاقي هيفا ونانسي هناك بدل الفاصل الا في الثقافيه حاجه كدا كانت تطري القاعده


احنا ياقطه بلا فخر
عيشين في ايام سواد والا جاي اسود
انا كمان عايزة كابتشينو هاتي واحد ماج ونخمس فيه سوا
سلاموووووووووووز
وزة
والله وجالك اليوم يا راااايق تشوف ناس مطحونين ومتبهدلين وملحوسين زيك
ياقطه يا اختى
احنا بدون قسم بس صدقينى
لما بنجيب كيلو لحمه
المدام مسس رايق بتفرق كل واحد نايبه
انا عندى اربعه ابناء
وانا والمدام
يعنى سته
تتصورى بتفرق علينا اللحمه
ليومين متتاليين
لما بتدى للعيا نايبه يبقى مش باين فى ايداها
وانا بجد بدون هزار
ايدى شريفه
لم تمتد يوما لاى رشوه من اى نوع
ولا هدايا ولا اى شىء
هتقولى انت رااااااايق وعندك نت وكمبيوتر غيرك مش لاقى
اقولك بجد اقرع ونزهى
فعلا عندى كمبيوتر
ووصله ب 30 جند
ولكن بوفرهم من الجلوس على القهوه
فعلا الشعب المصرى بياكل ايه ؟؟؟؟
ملحوظه
لو عندك كوبون ملهوش لازمه ادهونى رنا يكرمك
وشوفيلى معاكى 300 جند سلف
وابقى اسددهم لكى كوبونات
السلام عليكم المصريين ياكلو اية دى حاجة ماتخص الحكومة وروحوشوفولكم حكومة تانية تشوف هتاكلكم اية وشكرا
Desert cat said…
همس الاحباب
لاء بقى يا خالد ده انت حاططنى تحت المراقبة
عموما سعيدة جدا بانك اول تعليق
ياريت تفضل محافظ على المركز القيم ده
Desert cat said…
همس الاحباب
هو شكله كان واخد منوم طويل المفعول وصحى فجأة
انا مش عايزة نسكافيه
انا عايزة شكولاته كادبورى
Desert cat said…
كفايـة طيبـة
أمين يا حبيبتى
ربنا مع الجميع
Desert cat said…
د/اجدع بنوته
الناس اتبهدلت والله والفقر والجوع قتلهم
منه له
ياااااارب
انت عارف بقى
Desert cat said…
زعيم كمورا مورا
بزمتك مش حاجه فله اوى موضوع الكوبون ده
بدل ما نقبض فلوس نقبض كوبنات
ولا انا حد يجى عندى السيبر يدينى كوبون ويمشى
هههههههههههههه
انت داخل تتريق على بقلب التلفاز
ما هو انت زعيم بقى هو احنا نقدر نتكلم
Desert cat said…
fatima
والله صدقتى فى المثل يا حبيبة قلبى
وانا توبة ما تتعاد ابدا اتفرج على القناة دى تانى
دول كرهونى فى كلمة ثقافة
واثبتوا لى فعلا ان الجهل نورن
تحياتى ليكى يا حبيبتى
Desert cat said…
بت خيخة وأى كلام
طيب قولى لى فى ودنى ومش هقول لحد
يرضيكى كدا تسيبينى فى الزنقة دى
نورتى ياا م شرى
Desert cat said…
أنونيمس
طبعا طبعا دول قاعدين يفكروا يشلونا ازاى
وانهى فئة اللى تقتل بالضغط وانهى فئة تتقتل بالسكته القلبية
لما يخلصوا على الشعب كله
وبعدين يضحكوا ويقولوا انتصرنا
Desert cat said…
انين الحزن
معلشى يا وزة اتهفيت فى نافوخى واهى غلطة ومش اقلب المحطة على قناة الحكايات ابدا
مالها يعنى الحكايات
من عنيا يا جميلة لو لاقيت الكوبنات على طول اجيب لك معايا
Desert cat said…
عبده الرايق
بارك الله فى ميس رايق وربنا يخلى لك الاولاد
نعم بتقول ايه سيادتك
300 مين
هو فين ... مين .. ايه جابه هنا
الحقوووووووووووونى
انا شايفه انى اروح ادور على الكوبون
Desert cat said…
رئـــــيسـة حزب الأحلام
هو احنا عارفين نشوف يا ريسة حكومة تانية ولا تالته ما هم كابسين على نفسنا
koukawy said…
يا ساتيييييييير يا كات يا اختنا مبحبش اللي اسمه جمال الشاعر ده
انتي ازاي استحملتي تكملي
المهم دلوقتي الكوبوبنات يا تري موجوده في محلات 2 و نص
و لا نلاقيها فين يا تري
و بعدين انا مش فاهمه مهتمين ليه يعرفوا
المصريين بيكلوا منين؟؟؟؟؟
اقولهم انا بيكلوا منين المصريين
لو نزلوا يتمشوا في الشارع هيعرفوا ان المصريين بيكلوا من الزباله....من صناديق و كياس الزباله
يعنى هيوزعوا كوبنات
زغرطتى يالى منتش غرمانه
لو لو لول لووووووووووووووى

عقبال عندك يا ام فاروق
قطه ابقى كبرى خط الكتابه مراعاه لكبار السن والمكفوفين لانى بحول على ما اخلص قرايه
ومظنش هيصرفوا بونات للحول
Foxology said…
ههههههههههههههههههههههههههههههه

ينهار ابيض .. عاملة زى مواقف وطرائف كدة

ايه الحلقة المسخرة دى ؟؟ :))

مج النسكافيه مش عليه تدعيم يا استاذة اخرجى من الطابور :))
ياكلوا مربى ياكلوا جتوة

:((((
ياحبيبتى لا نافع موبونات ولا نافع اصلا مرتبات الواحد من دول يموت احسن لة
ربنا ينتقم من كل ظالم وكل حرامى فالبلد دى مصر بقت نهيبة كبيرة والشاطر اللى يسرق الأول
تحياتى
nigro said…
This comment has been removed by the author.
مش عارف ايه البرود ده .الناس دى بتجيب البرود منين .انا لو من مكان جمال كنت لكتو قلمين على وشو علشان يعرف ماذا ياكل المصريين
أنا حر said…
اما صحيح بلد كوبونات
على فكرة في برنامج الطبعة الاولى عرفت ان موضوع الكوبونات ده بيحصل في البلاد اللي فيها احتلال
وده مؤشر ان مبارك وحكومته هيجيبوا حد يحتلنا
تفتكري مين اللي وراهم؟؟
تحياتي
سنووايت said…
هم حاليا بياكلوا في بعض
انا خايف بقي ليعملوا البرنامج ده حلقات علي طريقة المسلسلات المكسيكية وينتهي في الاخر بماذا كان ياكل المصريون لان مادام الحكومة الرشيدة دي في الحكم فنص الشعب ايهج والباقوا اينتحروا او يجيلهم جلطة دماغية من كتر الغيظ كل لما يسمعوا التصريحات الحكومية

انا ساعات بتصور واحد من اعضاءالحكومة " اللي جايبينها عشان تفرس الشعب " وهو قاعد كده في المكتب المكيف وهو بيقلك شوفي العربيات بره بقي تمنها ايه ولا سعر كيلو الكافيار بقي بكام

علي فكرة البلد كلها اتبقي ماشية بالكوبونات ومش بعيد شركات المحمول تنزل هي كمان كروت بالكوبون لمحدودي الدخل ..

سلام يا قطة وكل فرسة وانتي طيبة
بجد العدس اكل المساجين بقا اغلى بكتير من المعقول فممكن ناكل بصله ورغيف عيش واحد فى اليوم بس كفايه احسن يجيلنا تخمه
السادة اصحاب الكرفتات والبدل الشيك دول
هيجننونى بجد

هما عاوزين الناس تستحمل لامتا

والاسعار العالميه عليت

ما كمان دخل الافراد العالمى علا هو كمان

احنا هنا بنزيد جنيه
والاسعار تعلا عشرة

ربنا بقه مع الغلابه
تصدقى مكونتش واخدة بالى من كلمة "تلفاز" اللى فى الاول دي
:D
بصي يا قطة، سيبك من جوز الفيران اللي جابوهم يتكلموا في الموضوع الخطير دا، دول غالبا جم البرنامج غلط، مش كل واحد لبس بدلة يستضيفوه في برنامج بقي عالم ذرة والا يقدر يتناقش في أي حاجة، اهي سبوبة والسلام

موضوع الكوبونات دا متطبق في دول أوروبية كتير وفي أمريكا وكندا كمان (الأتنين الأخرانيين مش متأكد). المهم اللي بيحصل بس علشان دي بلاد منظمة، إن الموظفين بياخدوا مرتب وبياخدوا معاة كوبونات تخليهم يشتروا بعض أنواع السلع من أي سوبرماركت أو بنزين للعربية مثلا بتخفيض زي 20% أو 30%، فيبقي عندهم دعم خدوة في ايدهم وهوا دا الدعم اللي الدولة بتدفعوا فعليا، بس هما بيوصلوة لأيد الناس اللي مخططلهم ياخدوة، فالدعم مبيرحش للناس اللي مبيستحقهوش والدولة مش سابة الدنيا سبهلله

المشكلة أكبر في مصر وأنا مش عارف ازاي حايحلوها لأن كل حاجة في البلد هرجلة وسايحة علي بعضها، هنا في أوروبا مفيش حاجة اسمها محدش مبيشتغلش، اللي بين شغل والتاني بياخد مرتب لفترة لحد ميلاقي شغل، حتي سواقين التاكسي تبع شركات، محدش بيدهن عربيتة أبيض واسود ويلف في الشوارع، فالعواطلية بيخرجوا علطول من الحسابات، ومفيش حاجة اسمها تجيبي مبيض محارة والا سباك واقف علي الرصيف، لازم يا اما يكون محل يا اما تبع شركة، علشان كدة كل الناس لازم تكون مسجلة وليهم ملف ضريبي وبيدفعوا وليهم وظيفة محددة. طبعا ممكن الواحد يشتغل بطريقة غير قانونية بدون تسجيل بس في الأخر ملوش اي حقوق، ومستحيل تلاقي شركة مقاولات مثلا من غير عدد قانوني من الموظفين متناسب مع حجم شغلها، امال هما شغالين ازاي؟؟

طيب دا يحصل في مصر ازاي؟؟؟ نص البشر ويمكن أكتر عواطلية ظاهريا أرزقية باطنيا... حيعملوا اية في سواق التاكسي مثلا؟؟ حيصنف ازاي انة محدود الدخل؟؟؟ طب حياخد كوبونات بكام؟؟ عمال التراحيل اللي علي الرصيف دول حيوصلهم الكوبونات ازاي
وعلي أساس اية؟؟ الفلاحين الغلابة اللي بيشتغلوا في ارض غيرهم من غير عقود حيعملوا فيهم اية؟

في رأيي لو محصلش تنظيم لسوق العمالة قبل الكوبونات وقصة ترشيد الدعم يبقي الحكومة ببساطة كدة عايزة تقص الدعم لناس معينة وتضرب الباقي في جيبها، ويبقي باقي الناس مش حيلاقوا حتي التراب ياكلوة
الساحرة said…
بلد بتاعت كوبونات صحيح ويبقي شعارنا كوبون لكل مواطن

وجيل الكوبونات
والكوبون هو الحل

دي كدة تبقي العيشه هنيه هههههه
appy said…
هههههههههههههههههههههههه
يا فقر تعالى خدى البنبون من عندى
ما انا اتفرجت على البتاع ده بس ساعتها لميت نفسى وقمت حطيت ميه للزرع قولت اعمل حاجه فى دنيتى بدل ما اتشل وانا قاعده هما البعده معندهمش دم بعيد عنك هما بيعملوا لنا رجيم يا اختى بجد
ومين قال ان بجنيه فول كفايه والله بقى مسحتت
وسلميلى على الكفيار ولسان الوزراء فى مارينا
وبعدين احمدوا ربنا انتم شعب مش بيشبع صحيح كله اكل اكل مفيش رجيم
يا كلوا حلاوه يا كلو جاتوه ياكلو كل الى يحبوه عايز كوبون قهوه سكر زياده واتنين مولتو لو سمحتى
Desert cat said…
koukawy
اولا انتى واحشانى
ثانيا هما مهتمين يعرفوا المصريين بياكلوا ايه
علشان لو بيلاقوا العيش يمنعوه
لو حد قال بياكل الفول يغلوه اكتر
لحد ما النس تقولهم بناكل تراب يزيلوا التراب اللى فى الشوارع
نورتينى ا جميله
Desert cat said…
بطوط حبوب
الله يبارك فيك
بس احنا شكلنا ملناش كوبونات علشان بننم عليهم ونجيب فى سيرتهم هيحرمونا من الكوبون
ههههههههههه
تحياتى
Desert cat said…
Foxology
مج النسكافيه مش عليه دعم
يعنى شربونى شاى من الملوخية الناشفة اللى بيعملوها يرضيك كدا
عموما مش مهم هستحمل بس هما يديونى الكوبون
Desert cat said…
مروة الزارع
او ياكلوا باتيه على الاقل رخيص شوية
Desert cat said…
كلاكيت تانى وتانى
هما يسرقوا واحنا نتفرج ولو شافو حد فى جيبه جنيه يطلعوا قانون علشان يشفطوه واحنا بكل بلاهه نقولهم خدوا كمان
والله حاجة تجيب استبحث
Desert cat said…
بطوط حبوب
من عونيا الاربعة يا دكتور
هكبر الخط شوية حاضر
Desert cat said…
nigro
جميل كلام واقعى وينطبق فعلا علينا نحن ابناء الوطن الشحاتون
هههههههههه
وبعدين ياباشا انا اقدر ازعل منك
هو فى حد يزعل من اخواته برضه
المدونة مدونتك واكتب اى حاجه انت عايزه ودوس انتر
ولا يهمك
Desert cat said…
تــــايه ومش تـــايه
هههههههههههههههههههه
ما هو جمال علشان مش يفقد اعصابه ويعمل حاجه توديه فى مكان اله اعلم بيه
ختم الحلقة
ونفض لهم خالص
تحياتى
Desert cat said…
أنا حر
يعنى هما بيقلدوا البللاد المحتلة
طيب ما احنا برضه محتلين من الداخل
هو احنا كدا عارفين نعيش
يعنى المفروض انهم كانوا طبقوه من زمان
Desert cat said…
سنووايت
ما هم مش واخدين بالهم اننا بناكل فى بعض
او واخدين وبيستعبطوا
Desert cat said…
الفارس الملثم
ما هما البهوات اللى بيتكلموا دول مش حاسين بحد
ناس ساكنة فى فيلل وبتركب عربيات مكيفة وبتاكل فعلا كافيار هيحسوا باللى مش لاقيين العيش ازاى
يخلوا البلد كوبونات يخلوها ارقام المهم يحلوا الازمة اللى احنا فيها اللى ما اظنش هتتحل غير بانتحارنا انتحار جماعى
تحياتى
Desert cat said…
صوت من مصر
رغيف ايه وبصل مين
ده يبقى رضا ان لاقيتهم
الناس بتموت فى طوابير العيش
وتقولى رغيف
وكيلو البصل ب 6 جنيه
ياباشا احنا هنشوف ايام اسود من السواد
تحياتى
Desert cat said…
نور الزمان
هما عايزين الناس تسحمل لحد ما تنفجر
هما دلوقتى خلاص البركان وصل للفوهه محتاجين بس اللى يشد الفتيل وبعدها كله هيبقى فى التمام
Desert cat said…
كفايـة طيبـة
هههههههههههههههه
ده معناه انك راجعتى
وده شئ يسعدنى جدا
Desert cat said…
وجهة نظري
كلنا عارفين ان اى بلد تانية بتعرف تحترم مواطنيها
والقوانين فيها بتطبق على الوزير والغفير
احنا عندنا هنا مولد سيدى العريان
تسيب وانتهاك حقوق انسان
اى حد بيشتغل فى اى حاجه
كل واحد مدى نفسه الحق يمد ايده فى جيب اللى يقابله
يبقى لو نظام الكوبونات ده اطبق
برضه مش هيستفيد منه غيرهم هما لان الغلابة مش فى الحسبان
البلد لو فيها قانون بجد وبيتطبق على الجميع كان بقى فيها نظام
وبالتالى كان اصبح معروف من اللى يستحق من الذى لا يستحق
احترامى وتقديرى
Desert cat said…
الساحرة
انا بس اللى ملخبطنى انى لما اروح اخلص اى حاجه من مصلحة حكومية بدل ما اديله رشوة عشرة جنيه هطلع له كوبون
مش عارفه تيجى ازاى دى بصراحة
هههههههه
تحياتى
Desert cat said…
appy
يا حبيبتى طيب مش تنبهينى
وتقولى لى اقفلى البرنامج ده
او اعملى ى حاجه تنفعك
بدل ما انا من وقتها ناقلة هم اجيب الكوبون منين
Desert cat said…
رئيس جمهوريه نفسى
انا معايا كوبون شاى مظبوط
ينفع
Marvel said…
هما الاخين اللي كانوا مع جمال الشاعر دول من الحزب الوطني ولا ايه..اصلهم بيقولوا نفس كلامهم
الشعب هو السبب..الناس هي اللي مش بتعرف تحوش..الناس بتاكل كتير..الناس بتخلف كتير..الناس هي اللي اغبيا

احسن حاجة عملها فعلا انه قفل البرنامج بدري بدري عليهم...شكله كده اتخنق منهم هو كمان

:D
Desert cat said…
Marvel
تعرف اكتر حاجه طولت البرنامج شوية ايه
الفواصل اللى جابوها دى
تقريبا هو والمذيعه متضامنين مع الناس
The Queen said…
احنا اللي نستاهل بجد

شعب ساكت مش بيثور على اي وضع

لما بنعرف نخرج ونبات في الشارع واحنا بنغني ونرقص وفرحانين بالكاس مبنتلمش ونخرج في مظاهرة احتجاجية على غلاء الاسعار ليه؟؟؟؟؟؟

عبرنا عن فرحتنا الحمد لله كذا مرة .. نعبر عن غضبنا بقى ولو مرة واحدة

اصحى يا شعب

شكرا ليكي يا قطة
Desert cat said…
The Queen
العفو يا ملكة
بس الناس دلوقتى فعلا على اشدها
ربنا يستر
oceaneyes said…
هههههههههههههههههههههههههههههههه

والنبى اول ماتعرفى الكوبونات دى بتتباع فين قوليلى

نفسى من زمااااااااان فى واحد فابوتشينو من اللى بيتباع فى ستاربوكس ده

:D
dina said…
هههههههه
اه و الله الناس اللى ببدل شيك دول اول ما يتلموا كدا و يتجمعوا(متجمعين عند النبى ان شاء الله) بقلق منهم بجد...كل واحد بيعد يخرفله شوية و بخ على كدا..زى ما رحنا زى م جينا
احلى حاجة الراجل بتاع التوفير للمستقبل
حكم
Desert cat said…
oceaneyes
حاضر انتى تؤمرى
بس لو عرفتىمكانها انتى الاول ابقى قولى لى
تحياتى
Desert cat said…
oceaneyes
حاضر انتى تؤمرى
بس لو عرفتىمكانها انتى الاول ابقى قولى لى
تحياتى
Desert cat said…
dina
اه امال ايه توفير للمستقبل اصل احنا لاقيين ناكل فى الحاضر
تحياتى
مرسي أوي لزيارتك
اسلوبك بجد في الكتابه شيق جدا ولذيذ
يعني في خفة دم بتسردي الحقيقه الموجوده في اطار فكاهي
ما شاء الله عليكي
قطه على حق

Popular posts from this blog

قميص دهشور

كل تحرش وانتوا طيبين