قســـــوة ...... حنيـــن

الساعة الرابعة صباحاً ... اقرأ الحصن الرقمى لدان براون .. ومن حولى صوت الرائعة فيروز ... سألتك حبيبى يملأ جدران الغرفة ... مندمجة لأقصى درجة رن هاتفى ... أزيك يا نانا اخبارك ايه ... الحمد لله تمام .. وانتى عاملة ايه ... تنهيده كبييييره اهو ماشى الحال ... لأ نبرة صوتك مش مريحانى فى ايه ... الأول أنا أزعجتك .. أصل الوقت يعنى ... لاء عادى انا صاحية يعنى مفيش إزعاج ولا حاجه ...مالك بقى فى ايه ... مش عارفه انام وقلقانة ... ومكلمانى علشان أحكى لك حدوتة مثلا ولا أيه ... امممممم دخلنا فى التريقة ... لاء بجد فى ايه ... أنا اتخنقت من جوزى وهو كمان اتخنق منى احنا الاتنين اتخنقنا من بعض .... هدى بس اعصابك ده ايه الناس المخنوقة دى ... وبعدين بسيطة ..روحى اخلعيه وريحى نفسك بلا قلبة دماغ ... ايه يا ماما اللى بتقوليه ده أنا عايزه اصالحة بس مش عارفه ازاى .... اتصلى بيه ... اتصل بيه واحنا فى بيت واحد ... خلاص ابعتى له اس ام اس قولى له بحبك ... قالت لى لالالا كرامتى ... طيب اكتبى له جواب والزقيه له على مراية الحمام اول ما يصحى الصبح يلاقيه فى وشه تيجى له صدمه عصبية يطب ساكت .... تصدقى فكرة بس انا مش عايزاه يطب ساكت بقولك عازه اصالحه .. مش اقتله ... وكمان مش عارفه اكتب له ايه ... طيب احكى لى الموقف وروحى هاتى ورقة وقلم واكتبى ورايا ... خدى نقطة ومن اول السطر .......
لم أكن أقصد يوماً أن تعرف معنى تلك الكلمات ... لم أكن اقصد يوماً أن أجرح من أحب ولكنى لن أتحمل أكثر من ذلك جراح من أحببت .. هو ليس ذنبك فلقد عبرت عن شئ داخلك وفى نفسك ... محبوساً كما قلت منذ زمن ... كيف تحملت .. كيف كنت تتعامل معى وأنت تشعر بتلك القسوة والمرارة كلها من جديد ... قلت لى كلمات لم تملك معانيها ... لأن وجهك المستعار وقناعك المزيف يخفى وراءه نفس متمردة ... ( ايه اللى بتقوليه ده ) ... ( اكتبى يا لولو لازم يعرف قيمته كويس .. بنات الناس مش لعبة ) اعملى كام نقطة جنب بعض وكملى بعدها ... ليتنى أجد كلمة اضعها مكان تلك النقاط ففى اليوم الذى أدعيت فيه أنك شعرت بالمرارة والأسى ولم تتحمل أى كلمة من أحد ولم تستطيع السيطرة على نفسك رغم إرادتك .. لم أكن أنا المخطأة ... من حقك ان تقول ما تشاء ومن حقى أن افهم ما اشاء ... أفيق يبدو أنك تجهل مع من تتعامل ... أخرج نفسك من أوهامك واخلع اقنعتك ... ( فينك يا لولو ) ..... أنا بدعى لك بالهداية فى سرى .... ده على اساس انى متعفرتة مثلا ولا ايه ... أنتى عايزانى اطلق بعد اول سطرين ... تصدقى انا غلطانة انى بساعدك ... يابنتى بقولك عايزه اصالحه .... مش عايزه اتجوز عليه ..... طيب قطعى الكلام الفاضى اللى فات ده وأكتبى له ..... وجدت نفسى اهرب منك اليك .... واشكى منك اليك ... وابكى منك عليك .... كأننا روح فى جسدين .. قلب ينبض لا قلبين ... يا كل حياتى ... لولو روحتى فين .... اغمن عليكى ولا ايه لاء انا هكتب له فعلا الكلام ده .. شكرا يا نونا ... تصبحى على خير ... ادى اللى بناخده منكو .... وانتى من اهله ... الصبح كلمتنى قولت لها خير ... اطلقتى .. قالت لى لالالالالالا ... عزمنى على الغدا ..... شكرا شكرا شكرا .. وفضلت يجى نص ساعه تقولى شكراً من غير حتى ما تفكر تحولى 5 جنيه رصيد المفروض ان ده اقل واجب يعنى ... طيب اتنين جنيه حتى .... أبداً مفيش
طبعا انا كتبت البوست بعد ما استاذنتها الاول وبعد ما حذفت منه كمان تفاصيل كتير
واللى دفعنى لكتابتة مع انى مكنتش ناوية انزل بوست جديد دلوقتى خالص علشان اللى قبله عاجبنى اوى اوى بصراحة بس قولت الجايات كتير والايام بيننا
نرجع لموضوع البوست ده
انا شوفت بوست عند عاليا حليم بعنوان طريقة منين ؟؟؟
طيب يا آدم ... حواء بالرغم من انك بتزعلها بتحتويك ... وبالرغم من أنك أخطأت فى حقها مش قادرة تستريح وهى حاسة بزعلك ... بالرغم من انك فارد عضلاتك عليها ومستقوى مستحملاك ... مع أى كلمة حلوة ونظرة عطف ... بتتبسط وبتفرح بيها ... تفتكر تستاهل منك تمد إيدك عليها ؟؟؟؟؟ تفتكر إنسانة بالود والحنان والعطف ده ... تستحق تعاقبها ؟؟؟
لو قريتو بوست عاليا هتفهموا معنى كلامى

وبرضه مش كل أدم ولا كل حواء
دمتم جميعاً بكل خير

Comments

اول تعليق
هههههههههههه
ايه يا قطة حمدلله على السلامة
ايه الغياب ده كله
عودا احمد يا قطة
بوست رائع قوى
وكله رقة ومشاعر
ربنا يجعلك دائما نصير لحواء وادم
تحياتى
ازيك يا قطة

اية الخربشة اللى من تحت لتحت دى


البوست جميل

واقعى اوى على فكرة


بس انا عاوز اقول

ان الاحتواء شى طبيعى

زى ماصاحبتك عملت بالظبط

بس برضوا

شى طبيعى بالمثل بالظبط برضوا

ان الراجل يحتوى الست

وبكدة عمرها ما هاتحس ابدا

ان احتوئها لة بيقلل من كرامتها

ولا هو برضوا
ايوية said…
اعتقد المشكلة ان محدش فى الاتنين بيحاول انة يفهم التانى محدش فيهم بيحاول انة يحط نفسة مكان التانى فى اى موقف يحصل بينهم
تحياتى للموضوع
fatima said…
قطتى الحلوة
و الله برافو عليكى
نص المشاكل الزوجية ممكن تتحل بالطريقة دى لو خلصت النوايا بس و الاتنين عايزين يعيشوا و يمشوا المركب
دا انتى طلعتى رومانسية طحن يا قطة
تحياتى ليكى يا حبيبتى
ازيك يا قطقوطة
حلو البوست اوى وعجبنى الكلام اللى انتى ملتيه لصاحبتك
ولسة هاقرا بوست عاليا حليم علشان افهم اكتر

عايزة اتدخل فى موضوع كدة انا ماليش دعوة بيه
بس صعبان عليا
انى اسمع ان قطقوطة ومهندس مصرى
فيه بينهم خلاف
ممكن جدا الخلاف ينتهى بكلمة وكل واحد فيكم يحتفظ بوجهة نظره من غير اى تجريح فى التانى

خيركم من يبدأ بالسلام

لو كلامى ضايقك امسحى التعليق وكأنى ماكتبتش حاجة خالص

سلام يا قطقوطة
اختك خيخة
بصى يانانا
الموضوع كله واقف على شكل العلاقة بين ادم وحوا
لو علاقة فيها احترام وحب وعطف وحنان وبتاع
حتبقى عيشتهم سعيدة
وادم ساعتها مش حيفكر انه يمد ايده على حوا
مع ان دة مش حقه دة رئى
بس مش حيعملها لانه عارف انه
بعت يوم طويل وشاق جدا
ومتعب فى الشغل
حرجع البيت حيستريح

بس برده حتى لو ادم غضب او ثار
فلازم برده حوا تستحمل شوية
وتحاول تريحه

طبعا ميكنش على حساب كرمتها لان لكل شئ حدود
بس برده تحاول على اد متقدر
صدقينى لو نجحت
حتشوف ادم تانى خالص

انتى عارفة غلطة ادم الوحيدة ايه
انه بيدخل البيت
بمشاكله وهموم الدنيا الى شايلها فوق كتافه
وتعب اعصابه
فبيبقى زهقان ومضايق وقرفان وكئيب
وحاسس بممل
ومخنوق
فبدل مبيدخل بيته يرتاح
بيدخل بيته
عشان يتعب اعصابه اكتر
ويخنق نفسه اكتر

وبتكون النتيجة انه بيخنق على حوا
وبدل محوا تحاول تريحه
لا بتخنقه اكتر

بصى المسئلة كلها انا شيفها كدة
لو ادم سعيد حتبقى حوا سعيدة
ادم طالع عينه فحوا لازم حيطلع عينها

والحل الوحيد
ان حوا تحاول على اد متقدر تخلى ادم سعيد
وادم على اد ميقدر يخلى حوا سعيدة
ولازم ينسوا لبعض ومحدش يشيل من التانى
ولو حد غلط يقعدوا مع بعض
ويحاولوا يحله المسئلة

ومش لازم يطلعوا حد غلطان
المهم انهم يتفقوا ان لازم العلاقة الى بينهم يكون فيها شوية تضحية من
الونجين
ادم فى الشمال وحوا فى اللمين
ولازم يمرووا الامور لبعض
عشان يعرفوا يجيبوا قرار مظبوط يخليهم يكسبوا الحياة
فى صفهم
ويودعوا الخنقة
ياقطه انا رأيى ان البوست ده احلى من اللى فات وبوست حلو نتعلم منه ان فعلا اى مشكله ممكن احنا نكبراها وممكن احنا ننهيها ببساطه ونوصل بالمشكله لبر امان
ازيك يا قطه
انا قريت تدوينه عاليا حليم وعجبتنى جدا
مع ان الكلام الاولانى اعمق من التانى
الا ان الكلام التانى سهل وجميل
وابن ناس ومفهوم
ربنا يجعلك فى الخير يا قطه
ومن غير تحويل رصيد
كله عند الله
سلامى وتحياتى
ملحوظه
الكلام الاولانى اللى هى مرضيتش تكتبه واعترضت عليه
Desert cat said…
همس الاحباب
مبروك عليك كسبت معانا جايزة اول تعليق
مصاصة لومبو
Desert cat said…
همس الاحباب
الله يسلمك يا خالد هو انا كنت مسافره ولا ايه
هههههههههه
ميرسى على الكلام الجميل ده
تحياتى ليك ولهمس
Desert cat said…
واحد مش فاهم حاجة
هى مش خربشة اوى يعنى دى حاجه على الخفيف كدا
وبعدين انا لو مش خربشست يجرى لى حاجه
بالنسبة للبوست
فعلا زى ما ذكرت الحياة المبنية على التفاهم والحب والمودة بتجعل الاتنين يحتووا بعض زى الحالة اللى عرضناها فى البوست انا هسميها حالة على اساس انى دكتورة يعنى
ههههههههههههه
سعيدة اوى بردك
تحياتى
Desert cat said…
ايوية
المشكلة ان كل واحد بيسيطر عليه فكرة التانى هو اللى غلطان فعلا لو كل واحد حط نفسه مكان التانى مش هيكون فى مشاكل اصلا
محبتى يا يويو
Desert cat said…
fatima
هى فعلا البنوتة عايزة تعيش وكمان واخدين بعض بعد قصة حب عميقة
طبعا يا فاطومة لما بتطلب معايا رومانسية مش بعرف اوقفها عند حدها
محبتى يا جميلة
Desert cat said…
بت خيخة وأى كلام
حبيبتى الكلمات عجبتك علشان انتى جميلة ودايما عينك بتشوف كل حاجه جميلة
وبعدين انا اقدر احذف ردك
ده انا احذف البلوج كله وردك لاء
انتى تقولى كل اللى نفسك فيه واللى انت عايزاه
يابنتى انا ببقى مبسوطة جدا لما بشوف ردودك ومواضيعك كمان
محبتى يا نور
Desert cat said…
زعيم كمورا مورا
ايه يا زعيم الجمال ده كله
والله انت دمااااااااااغ
بس هو يتخنق بره البيت اللى جوا البيت مالهم بقى
هو يشتكى ماشى
هتسمعه بكل اذان صاغية
يحكى عن اى موقف عادى هيلاقى الحضن اللى بيضمه
انما مديره يعكنن عليه يجى يعكنن عليها دى اللى ملهاش اى مبرر
كلامك الاخير كله لا غبار عليه
تحياتى يا زعيم
Desert cat said…
بحبك يامصر
وانا شايفة ان البوست اللى فات اجمل من ده الف مرة
تحياتى يا فندم
Desert cat said…
فرنسا هانم
ازيك يا فرنسيس انا كويسه يا حبيبتى
هى كان كل همها تصلح المشكلة
الحب يا اختى الحب
ههههههههههه
فمصدقت سمعت كلمتين حلوين علشان تقولهم له
وقد كان
بس انا هفضل احل لهم مشاكل كدا من غير حتى 2 جنيه رصيد طيب سندوتش بيض بالبسطرمة ولا اى حاجه يشوفونى بيها
تحياتى
Desert cat said…
فرنسا هانم
انا من رايك برضه فى الكلام الاولانى
بس البونية عايزة المركب تمشى
محبتى يا جميل
امواااااااااااه
وجدت نفسى اهرب منك اليك .... واشكى منك اليك ... وابكى منك عليك .... كأننا روح فى جسدين .. قلب ينبض لا قلبين ... يا كل حياتى

وعزمها ع الغدا بس

ده كان مفروض يجبلها حاجه دهب

هديه بس برائه

الدهب دلوقت ب 157 جنيه

سمعته ياقطه صحيح عن البنت اللى اتشبكت بفضه

ههههههههههههه

ماعلينا

بس طبعا الجملتين جامدين اوى

تحياتى ليكى

وهاتى رقمك بقى

علشان الواحد شكله هيحتاجك قريب

عشتى ذخرا للمتخانقين

تحياتى ياقمرايه
Desert cat said…
د/اجدع بنوته
هى بصراحة قالت لى غدا مش عارفه كان فى حاجه تانى ولا لاء
بس كويس يعنى البداية غدا
بتقولى الدهب بكاااااااااااام
عوضنا على الله
وبعدين انتى بس اول لما تحسى انك عايزانى اوقفى قولى فطططططططططططططه
هتلاقينى بقولك
نياااااااااااو
ياستى ربنا يسعد كل ايامك ولا تحتاجى لى ولا لغيرى
تحياتى
appy said…
حبيبى النهارده لازم تعرف حبك عاملى دمااااااااغ

انا عرفت معنى الكلام خلاص ههههههههه
يسلم مخك وايديكي وبطلى تكونى ماديه بقى ههههههه عملتي خير نردها لكى فى البلوجات يا حبيبى
وفى المعارك يا ام مخ رايح مش راجع نفسى اعرف بحبك ليه الا متعرفيش انتى هههههههههههههههههههه
نوسه said…
ماهو حتى لو هو اللى غلطان لازم الست هيا اللى تصالح على فكره
ساعتها بقى بعد مايهدى ويقعد بينه وبين نفسه هيقول الست دى اصيله ومفيش منهاوهيصالحها و .....ومش بعيد يعزمها ع الغدا زى ماجوز صاحبتك عمل :)
Desert cat said…
appy
حبيب قلبى ياللى فاضحنى
امواااااااه
انتى دلوقتى عرفتى معنى حبيبى النهارده حبك عاملى دماااااغ
مع انى كنت عاملها مفاجأة بس يلا بقى

تسلمى لى انتى يا جميلة
يعنى هما يتصالحوا ويتعذموا على الغدا وانا لاء
بس خلاص يا ستى هبطل ابقى مادية
اما بقى لو عرفتى انتى بتحبينى ليه لما اعرف انا الاول اصلا انا بحبك ليه
ايه رايك احنا الاتنين نفكر لبعض
دمتى بكل حب يا قلبى

ماشى يا قلبى
بغيظك يا قلبى
ههههههههههههههههه
Foxology said…
البوست جميلة اوى وعنوانها اجمل الحقيقة

كلمة آسف / آسفة مش صعبه ومش عيب وساعات كتيرة بتبقى طوق النجاة الوحيد مش كدة ؟؟
Desert cat said…
نوسه
كلامك صح يا نانوسة
بس المفروض وقت المشكلة ما تحصل حد فيهم يبعد عن التانى لحد ما النفوس تهدىوربنا يصلح حال الجميع
تحياتى
Desert cat said…
Foxology
اه هو كدا برضه
والحب والزواج والعشرة ليها حكمها اللى لا يمكن حد يقدر يحيد عنه
تحياتى
david santos said…
Hello, Desrt cat!
(in portuguese, gato do deserto)
Thanks for your posting and have a good day.
بسم الله الرحمن الرحيم

" و جعلنا بينكم مودة و رحمة "

"خلقكم من نفس واحدة و خلق منها زوجها "
السكينة و الرحمة و الود
هي اصل العلاقة بين الرجل و المراة و جعلها الخالق اساسا لتعمير ارضه و لكن ابناء و بنات ادم و حواء يتفوقون على انفسهم في الابتعاد عن هذه المناطق الحافظة للحياة

اسف ان التعليق اتقسم بس لغبطة كدة انتي فاهمة بقى غباء الكيبوردات
السلام عليكمورحمة الله وبركاته

كا ستات هو ده قدرنا ندادي ونطبطب وكمان ندلع وفي الآخر برضو مش عاجب

يلا لينا ربنا اللي لا يغفل ولا ينام
يا شقاوة قطتنا

انتي متاكده انك كنتي عايزة تصلحي صحبتك على جوزها ولا كنتي عايزة تطلعي عين جوزها

يا بنتي هي صاحبتك ملقتشي حمامة سلام غيرك

اسمعي( بس بس ) ايون يا قطه انتي لو حولت لك الخمسه جنيه امانه عليكي ما تنسنيشي

اختك بردك وليها حق في التحويل

ودقيقه قليله تمنع بلاوي كتيرة

بجد بوست جميل وربنا يا سيتي يقدرك على فعل الخير هااا بنقول الخير يا قطه وبلاش نونوه
Sherif said…
اعجبتنى قدرتك على التحول من اليمين - تخلعيه - الى اليسار - عزومة على الغدا - بنجاح منقطع النظير

الخواطر والحوارات الداخلية تزيد السيناريو جمالا .. فهى نفس خواطرنا

تحياتى
كل حاجه فى الدنيا كرامتى حتى ولو انا الى غلطان لا لازم ادوس على كرامتى عشان انا غلطان
انا عارف انى بستهبل لانى كاتب بوست عن الكرامه بس ؟
احنا الرجاله كده ب 1000 وش
وبوست عاليا حليم بجد كان هايل جدا انا قريته من فتره
الربان said…
تحياتي

بوست رائع يا زميلتي العزيزة...و اهمس
في أذن اخواني من الرجال ...ان الرجوله تصرفات و ليست مسميات...
احتوي زوجتك...اشعرها بالامن و الامان
بالحب و الصدق... و اعلم ان كل ابن خطاء...فلما تستمريء خطئك و تمسك لها
اخطائها...

الحب و الزواج تسامح...و كرامة الزوجه
هي كرامة زوجها... و اعلم انك كما
تُدين تُدان...

و اهمس الي اخواتي...لا تتكبري علي زوجك
و تقاريعه الكلمة بالكلمة...كوني حنونه...كوني بشوشة...كوني قانعه
و اجعلي بيتك روضه من الحب و العشق
و التفاهم....المودة و الرحمة هما السكن
المذكورين في القرأن.

تحياتي و تقديري...و الموضوع باسلوبه
الممتع شدني فأطلت التعليق، فمعذرة.

دمت بالف خير.
صديقتي الغاليه قطه الصحراء

فعلا أأقل واجب تبعتلك 50 جنيه رصيد لول
مش الموضوع فيه غدوه

بس ياحلال العقد انت

هو فعلا الواحه مننا ساعات بتكون حتنفجر و مش معني ده انها بتكون عايزه تنفصل عن اللي بتحبه
لكن كلامك اللي لتلها تكتبه في الجون ياقطه بحييك عليه
و كل سنه و انتي طيبه بمناسبه يوم المرأه العالمي

باي ياقمر
رغم انى مش متجوز بس احيانا من الى بشوفه او بسمعه من مشكلات صحابى فى البيوت ليه العلاقه الزوجيه عباره عن حرب وكلمه الاعتزار بينهم بتكون تقيله وبيحطو حاجز بين الاتنين اسمه كرامتى
العلاقه الزوجيه المفروض بتكون ابسط من كده رغم انهم بيقولوا المركب الى فيها رئيسين بتغرق بس اهى دى المكرب الى لو فيها رئيس وحيد تغرق لانى لو حد همش العنصر التانى فى العلاقه انتهت بدرى بدرى بس لو كانو بيتعاملوا بمبداء انى لكل واحد فيهم حق ابداء رائيه والاتفاق على راى محايد فى حاله الاختلاف وانى اعتزار طرف للتانى مش اهدار للكرامه لانى المفترض كرامتهم بتذوب فى بعض علشان تخلق كرامه مشتركه حجات كتير حتختلف ومشاكل كتير حتتحل
انتى رحتى فين
انا قلت انتى سبتى المدونة وهتبعيها إيجار جديد بس حمد الله على السلامه

وبعدين ايه الجمال ده
انا لو من عمرو اديب كنت اجيبك مكان مدام رجاء
ويبقى الفقرة اسمها اسألوا القطة
نونونونونونو
ومدام انتى بتحلى المشاكل
متشفيلى عروسة بدال منا بزاول نفسى وبزاولكوا معايا
ويا ريت تكون جاهزة يعنى انا من الاخر هشارك بمجهودى وبس وهى بقة تقوم بالباقى عشان انتى عارفة المرتب مبيكفيش ميه ساقعة
لو لقيتيها زنيلى وانا هكلمك
سلالالالالالالالالالالالالالالالالالالام
امين سر said…
أنت
يا سارقة ياء النداء من حروفي
لماذا أنتِ مرتبكة ؟
نعم أعنيك أنت
ادعوك للإنضمام للفكرة
فانتِ وحدك .. تلك التي لم تأت
هذا طريق لم يكن يعرفه احد
و لا يعرف احد
طريق لم تعرفه اقدام المارة
و لم تدنسه من قبل عجلات سيارة فارهة وقودها من عرقك و دمي
تعالي معنا و املئي الدنيا بالضجيج
نظرة على اسرار اون لاين لن تضيرك
و مشاركتك تأكدي انها مصدر سعادة لنا
http://asraronline.com/vb/
Desert cat said…
david santos
meny thank's Mr. David
I'm very happy because u visit my blog
thanks
appy said…
يا قلبي .......
طيب اقولك بقيت الكلام وتقوليه ليه كل يوم الصبح ياااااا انا ابقى اسعد انسانه فى الدنيا ربنا يخليكوا ليه وتغيظوا فيه على طول اهو انتى قولى بدل ما هو مطنش ههههههههههههههههه
خدى الكلام
يا مامى يا عسليه يا حبيبى ياعنيه ههههههههه اهو كلام وخلاص
Desert cat said…
ملك الكبدة

" و جعلنا بينكم مودة و رحمة "

صدق الله العظيم
ليت قومى يعلمون
تحياتى
Desert cat said…
ملك الكبدة
البنى ادمين دول تفقوا على الشيطان ذات نفسه يبقى مش هيتفوقوا على انفسهم
معلشى يا ملك ولا يهمك من الكيبورد البلوج كله تحت امرك
ده انت الملك هو احنا نقدر نقول حاجه
تحياتى
Desert cat said…
خمسة فضفضة
ههههههههههههه
ونعم بالله
بصى يا دكتورة نطبطب وندلع اللى مش عاجبهم يبقى يغسل المواعين عقابا ليه
المفروض يبقى ده قانون حواء الجديد
تحياتى
Desert cat said…
قبلة الحياة
احلى قبلى حياة
امواااااااه
انا كنت بهدى النفوس لكن هى اللى رفضت عموما خير
لو حولت لى جنيه واحد اوعدك احولك نصه وحياتك مقضياها رنات من يوم ما اتعذمت على الغدا ولا افتكرتنى حتى بسندوتش مسقعة مش خمسة جنيه رصيد
عموما عونيا الاربعة هبقى احولك دقيقه
Desert cat said…
Sherif
هو بصراحة انا كنت عايزاها تخلعه بس هى اللى رفضت هنعمل ايه بس
اشكرك جدا على حسن ثنائك
تحياتى
Desert cat said…
صوت من مصر
ههههههههههههه
انت مش بتستهبل انت عايز ضرب النار يا ادم
قصدى يا محمد
هو المفروض اصلا العلاقة بين الزوجين يبقى فيها ود اكتر يعنى كل واحد ياخد باله شوية من معاملتة للتانى علشان المركب تمشى ومش نحتاج ليوم الكرامة العالمى ده
تحياتى
Desert cat said…
الربان
استاذى العزيز
تعليقك اوضح معانى البوست واكمل الفراغات
اطل فى التعليق كيف تشاء فدائما تشدنى خبرتك ونضوج عقلك الواعى
لذلك دائماً انتظر تعلقياتك
احترامى وتقديرى
Desert cat said…
اجندا حمرا
حبيبتى انا والله ما طلبت خمسين جنيه ولا عشرين حتى ان كنت طالبة خمسة جنيه
بس يلا بقى هنعمل ايه قدرنا كدا
المرأة دائما تميل بعاطفتها الى الطبع الرقيق والحنون
ياريت آدم يقدر بقى
تحياتى يا جميله
Desert cat said…
رئيس جمهوريه نفسى
ياريس المركب اللىف يها ريسين بتغرق فى الشغل فى المدرسة فى اى مكان بيجمع الاصدقاء
انما الزوجين لازم فعلا تكون الحياة بينهم مشاورة علشان كل واحد يحس باهتمام التانى ليه
ومش لازم كلمة اعتذار ده حتى لو حد فيهم ابتسم للتانى بدون اى كلام اى خلاف ممكن يزول
تحياتى
Desert cat said…
حــدوتـــة
انا مرحتش ياباشا ولا جيت انا لسه هنا وانا اقدر اسيب البلوج ا أأجرة امال مين اللى هيعمل مشاكل
يمكن السكان الجداد يكونو ناس هايدة ووديعه ومش يتخانقوا اما انا اموت لو مش اتخانقت كل يومين تلاتة على الاكثر
انا بخوفك على فكرة علشان انت داخل تقولى عايز عروسة امال انا بعمل ايه والاتفاقات والوعود والعهود اللى كانت بينا دى تبيعها كدا يا خاين
طب وحياتك لاجرجرك فى محاكم الاسرة
وعلى الباغى تدور الدوائر
Desert cat said…
امين سر
اولا اشكرك جدا على الكلمات الجميلة فى بداية الكومنت
ثانيا انا يشرفى جدا انضم لمنتدى حضرتك
تحياتى
Desert cat said…
appy
ليكى عليا اول ما ادخل الصبح يا عنيا اصبح عليك يا حبيبى .. وابوسك كمان يا مامى يا قطعة عسلية .. لاء وحشااااااااااااانى
المقصود بكلمه
ادم قصدى يا محمد انى بقيت رئيس الرجاله ولا ايه
انا منفعش نظرا لانى بعامل الاناث باحترام شديد جدا ؟
اجمل حاجه فى الدنيا انك تثبتى الى بتحبيه
والله بجد
الكلام تثبيت تثبيت يعنى والحبيب بيبقى طاير من الفرح لما بيتقاله الكلام ده
ربنا يعنا على تثبيت حبيبنا
هههههههههههههههههه
انتى يا بنتى هتتجنينى ع كل لون طلقتى الست ورجعتيها كلة بكلام انتى متصورة ان كلامك اللى أثر فية ياماما الراجل ما بيصدق اصلا دى لو قربت منة بس كان هيقولها اسف استنى الحناقة الجتية اعنف
المفروض الراجل اللى يقول للست الكلام الحلو مش هية
بحبك
أعتقد أن الطبيعه اللى أوجدها ربنا فى حواء أنها تكون سكن ورحمة لأدم
مدونة جميلة وتستحق المتابعة
أدعوكى لزيارة مدونتى آفاق الإسلام فلنبحر سويا
http://islamic-horizon.blogspot.com/
لا بس الخطاب الاولاني ده جامد بصحيح هههههههههههه

بصي انا شايف الموضوع ملوش ليه علاقة بحكاية ادم وحواء , لكن لو كل واحد

بيحب التاني بجد الغلطان فيهم مش ايهون عليه زعل التاني وكل واحد فيهم ايحافظ

علي كرامة التاني
ومادام كل واحد حاسس انه مش ممكن حياته من غير الاخر , اي مشكلة سهل

تتحل ..

تقبلي مروري
قطتى الجميله انتى فين يا قمر
ايه يابنتى عايزه تخربى على صحبتك
على فكره انا كمان عندى واحده بقرفها بمشاكلى وناويه تسبلى البلد وتطفش
بس عارفه هو الحب كده
جميل بوستك
ويظهر ان حواء مجنونه بطبعها
اشطات مستنياكى
nigro said…
This comment has been removed by the author.
يا باشا انا مستغناش عنك ابدا
انا مش عايز بس ابهدلك معايا
اديكى شايفة الظروف المهببة اللى فى البلد واللى ربنا وحده عالم هتنتهى امتى
انا عايز وحدة تخلص على طول
بس اللى فى القلب فى القلب برضة
سلالالالالالالالالالالالالالام
Desert cat said…
صوت من مصر
هو كل اللى اسمه آدم يبقى رئيس الرجالة
طيب لو كدا ياريت انا اسمى حواء
Desert cat said…
بطوط حبوب
هو التثبيت مطلوب حبتين ي محمود بس متزودش فيه اصل ممكن الحبيب ياخد فى نفسه مقلب مش تعرف تسيطر بعد كدا
تحياتى
Desert cat said…
كلاكيت تانى وتانى
انا هعملها ايه بس
انا قولت لها اللى المفروض تقوله على حسب الموقف اللى حكته مش عجبها خلاص يبقى تثبته بكلمتين بقى
وشكلهم مش بيجوا فعلا غير بالطريقة دى
ما هو عزمها على الغدا بقى

بحبك .. وحشتينى
Desert cat said…
عمر المصرى
اوكى سكن ورحمة وآدم مش معنى كدا ان آدم يقابل السكن والرحمة والطبيعة اللى ربنا خلق الست عليها بالعنف والاهانة وعدم التقدير
تحياتى
Desert cat said…
الفارس الملثم
بالظبط
كلامك صح
لو الحب فعلا موجود الاتنين هيخافوا على بعض وهيفكروا الف مرة كمان قبل ما حد يغلط فى حق التانى
لانه هيخاف على مشاعره اللى هى عامل مشترك بينهم هما الاتنين
تحياتى
Desert cat said…
قلوب بتغنى
انا موجودة يا جميل بس انتى تؤمرى
انا كنت عايزاه توريله حقيقة نفسه بس الظاهر انه صعب عليها
اصل لولو صحبتى دى طيبة كدا وبتخاف تتكلم اصلا مع اى حد ان ترجها فما بالك بحب العمر
اااااه
فينك يا اللى فى بالى
احم احم
ما علينا
انا جاية لك حالا يا حبيبتى
تحياتى
Desert cat said…
nigro
انا موجودة هنااااااا
ازيك انت يا نيجرو

ههههههههههههههههه
جميلة النظرية بتاعتك دى
مع انى شايفة ان كلامك مظبوط
تحياتى
وانت تنور فى اى وقت بدرى متاخر المهم انك تيجى وتنورنا
Desert cat said…
حــدوتـــة
مش عارفه ليه حاسه انك بتتكلم بجد
يعنى انت فعلا ناوى
طيب اصبر بقى لحد 2030 علشان اجوزك بنتى اصلى بصراحة مستخسراك فى اى حد تانى ومش عايزاك تخرج برة العيله
قتطي ياقمر

دنا جيت متاخرها اوي
حلوة نظريه نيجرو الا هو مش مقتنع بيها
بس مين بقه الرباط ومين الجزمه

انتي كنتي بتهدي النفووووووووووس صح ولا ايه يامعلم

اسفه بجد علي التاخير بس النت زبااااله بيعذبني
سلاموووووووووز
الحقيقه الموضوع معقد
بصراحه الرجال عموما يحتفظون بميول طفوليه لفترات طويله جدا
وغالبا ما ينسون أن دي مش ماما
وأنها مش مفروض تدلعه للدرجه دي ولا تستحمله للدرجه دي
لكن ورغم أعترافي بأن الكرامه اساسيه
لكني لا ارى معنى للكرامه بين محبين
لا معنى لكرامة الطرفين
هما بمثابة شخصية أعتبارية واحده
يجب أن يتعاونا لإنجاحها
كرامتهما موجهة للخارج وليس للداخل
هما كنصفي محاره
الجزء الصلب للخارج والجزء اللحمي الناعم للداخل
لكن طبعا حين يستهبل أحد الطرفين ويلقي كل الحمل على الأخر فإنه يكسر الرابطه ويستاهل الضرب على دماغه
المفتاح هو أن يفكر كل منهما في الأخر كند له ومساو ويحاول أن ينجح علاقتهما كمشروع مشترك كلاهما سيخسر لو تحطم
لكن
ليست كل النساء حنونات رقيقات
وليس كل الرجال قساة جبارين
أحيانا ليس بالقليله ما ينعكس الوضع
صاحبتك لها حق هي ايديها في النار
وأنت لست على خطأ فيديك في الميه

الموضوع معقد قوي
مافيش وصفه واحده تنطبق على الكل
كل حاله لها طبيعه خاصه بيها وحل يخصها لوحدها
يمكن عشان كده قالوا: أمشي في جنازه ولا تمشي في جوازه
تحياتي وحظ سعيد للجميع
mnoon said…
خيركم من يبدأ بالسلام
مش مهم بقى مين غلط فى مين
المهم إن اللى هيبدأ
فدا أكيد قلبه أصفى من التانى
أنا عايزه أعرف انتى
بتنزلى بالبوست الجديد أمتى؟
سلام
Desert cat said…
انين الحزن
بصراحة يا يزين ما اختارت حد يهدى النفوس البونية كانت مستنية اقولها بيتك وجوزك يا حبيتى اوعى تزعليه
بس سمعت منى العكس
عموما برضه اتصالحوا والمية رجعت لمجاريها والحمد لله
انتى تيجى فى اوى يا جميل
مش متاخر ولا حاجه
Desert cat said…
Alexandrian far away
بالظبط استاذ اسكندرانى الرجال يميلون ميول طفولية معظم النساء اسمعهم يرددون ده الطفل عامل زى الطفل الصغر عايز اللى يسايسه والكلمة الحلوة
بس مش كلهم بصراحة فى رجاله مهما الست تعمل كانها بترسم على مياة النهر ولا بيتمر فيهم والله
عموما بي الازواج المفروض انه لا يوجد اى حواجز
ولكن يجب من الاحترام المتبادل مش معنى انها تتنازل وتصالحه يبقى مش عندها كرامة مثلا ويفضل يهين فيها كل شوبة
يعنى الاحترام هو اساس العلاقة
دمت بكل ود
Desert cat said…
mnoon
لاء يا حبيبتى ازاى مش مهم مين اللى غلط
ما هو كل مرة يغلط وانا اقول مش مهم المهم انى ابقى احسن منه وابدأ بالسلام كدا مش هيعرف انه بيغلط وممكن يزيد فيها ومش بعيد يبقى حق مكتسب عنده اهانتها كل شوية ولما تيجى تلومه بعد كدا يقولها دلوقتى اكتشتفى ان ليكى كرامة
المفروض يبقى فى ود واحترام بين الطرفين علشان المركب تمشى
انا البوست بينزل وقت لما بيكون فى حاجه عايزه اقولها امتا والله فى اى وقت يا منومونه
تحياتى يا جميله

Popular posts from this blog

قميص دهشور

كل تحرش وانتوا طيبين