لطشة خفيفة .. طيب مش تاخد بالك

خلصت شغلى ومروحة عادى جدا زى كل يوم ماشية اتفرج على المحلات واستغرب على التخفيضات اللى نازلة لـ 60 % فى جميع محلات الملابس معقول .... عقبال يارب لما كل حاجه سعرها ينزل كدا ... فجأة والاقى نفسى محشورة بين عربيتين ... عربية واقفه والتانية جاية ماشية من جنبى ... الطبيعى انى اقرب جنب اللى واقفه علشان اللى ماشية جنبى متخبطنيش ... والاقى اللى قربت منها بتتحرك بس بالراحة جدا ... وقفت لاقيته وقف ... طبعا العربية اللى جنبى من الناحية التانية عدت من زمان ... بس اتفتح بعدها سيل من التكاتك الهى ربنا يقصف اجلهم قادر يا كريم ... لما وقف تانى قولت عادى بقى هو راكن على جنب وانا مشيت فى الجنب ده يعنى مش هاروح ارمى نفسى تحت العربية لانه كدا كدا واقف ... وفجأة الاقى الاخ برضه بكل هدوء وكل برود جه من ورايا وراح لاطنشى لاطشة خفيفة اسفرت عن اصابة رجلى الشمال بجرح برضه خفيف الحمد لله ... وبدون ما اشعر بنفسى واروح متوجهه له اااه يا غبىىىىىىىىى ... يا حيوان يا اللى مدينيك رخصة .. هما دلوقتى بيدوا رخص لذوى الاربع ... طبعا كأنى كنت بنادى فى مكرفون ... وألاقى الشارع كله اتقلب ... جم اتنين ستات .. ايه يا بينتشى ... فى ايه يا حبيبتشى .... البتاع اللى فى العربية ده خبطنى ... واحد واقف طيب الحمد لله جت سليمة ... قدر ولطف ... ايوا يعنى ايه جت سليمة يمشى يطلش فى خلق الله وتقولى لى جت سليمة ... طنط اللى جت هى واللى معاها .. ما هما كدا يا حبيبتشى علشان ركبو عربيات يبقا خلاص طلعوا السما ... ماشيين يخبطوا فى الناس .. طبعا الاخ نزل ... فى ايه بس اهدى كدا ... انت تخبطنى وتقولى اهدى ده انت بارد اوى .. وانت لسانك طويل اوى ... ايه يابنتى فى ايه بالراحة شوية حرام عليكى ... طنط التانية جرالك ايه يا حبيبتى ... رجلى يا طنط تقريبا اتعورت ... لاقيته بيقولى ورينى كدا ... فى الحلال يا معلم هى سايبه ولا ايه ( أحم أحم ) .. أوريك ايه انت بتقتل القتيل وتمشى فى جنازته .... انا مبوريش رجلى لحد ... عمو اللى واقف معلشى يا بنتى انتى شايفه الشارع عامل ازاى وغصب عنه قولت له بمزاجه مش غصب عنه .. ورحت حكيت لهم كلهم اللى حصل من الاول ... راحت طنط باصه له بصة احتقار جامدة اوى وقالت له روح يا شيخ منك لله .... طبعا هو مش رد عليها وفضل يقولى انا اسف والله ... ايوا يعنى واسفك ده هيعملى ايه .. وحياتك لاخد رقم العربية ... ورحت مطلعه الموبايل علشان اسجل عليه الرقم ... لاقيته بيقولى طيب ممكن بس رقمك علشان ابقى اطمن عليكى ... يا حج متشكرين باب بيتنا مفتوح اربعه وعشرين ساعه وبابايا موجود فى اى وقت ... احم احم .. لا طبعا مبديش حد رقمى انا لو رجلى جرى لها حاجه هوديك السجن ... راح قالى طيب انا اسف وده الكارت بتاعى ... وابص فى الكارت الاستاذ خلف خيلف خلاف المحامى .... طبعا ده مش اسمه بس هو مش عارفه مين كدا المحامى ... . جسر السويس .. بعد ما بصيت فى الكارت اديته له تانى .. لا مش باخد كروت من حد .. بس جسر السويس وايه اللى جايبك عندنا هو احنا ناقصين مش كفاية اللى عندنا كمان بيستوردوا لنا .. وطبعا كل واحد وقف يديله فى جنابه كلام من جميع الجهات وده واقف زى الفار المبلول ... انا شوفت المنظر كدا قولت طيب ... فتكوا بالعافية ... طيب استنى ابقى اطمن عليكى ازاى ... وانت مالك انت تطمن عليا من بقيت عيلتى مثلا والله عجايب .... وطبعا دخلت اول صيدلية قابلتنى ... لاقيته جرح عادى الحمد لله مش جامد ... والدكتور اللى هناك طهره وحط لى عليه لازق وقالى متقلقيش دى حاجه بسيطة .... وروحت البيت كأنى عامله عمله .. مش عايزه حد يشوف حاجه ... بس اتقفشت وسمعت الاسطوانة اللى كنت عاملة حسابها .. وانتى مش تمشى على الرصيف ليه .. هما عاملين الارصفه ليه وشوية ارشادات عن الطريق ووصف فى مميزات الرصيف كأنى هروح أتجوزه ... طيب ما بعد الاسطوانة الجامدة دى يا ماما .... ما تدينى مصروفى وسندوتشات المدرسة علشان يدوب كدا الجرس ضرب ... طيب اتريقى بس خليكى عارفه انا زعلانة .... وفى الوقت اللى زى ده لازم الواحد يستغل صحابه يبقى مين الى تنفع فى الموقف ده هى نهى مفيش غيرها ... رحت متصلة بيها .. فضلت تسالنى شوية حاجات ... وفى الاخر قالت طيب كويس ده جرح عادى مفيش اى قلق ... طيب ما انا قولت لك الصيدلى قالى كدا ... هو انتوا مش بتثقوا فى بعض ولا ايه .. ولا علشان انتى خريجة طب لازم تعمليهم علينا ... خلاص ياحجه ربنا يهديكى على الطيب ابقى تعالى لى المستشفى الصبح برضه علشان اطمن ... رحت لها المستشفى لاقيتها عملت لى نفس اللى الصيدلى عمله برضه ... ولاقيتها بتقولى ابقى تعالى لى من وقت للتانى بقى ... يا حبيبتى هو انا فاضيه لك علشان اجى لك من وقت للتانى ... هى مرة ومش هتعود ده حتى ريحة المستشفى وحشة ... وسبتها ومشيت وهى قاعدة فاتحة بوئها من غير ما ترد ولا كلمة
طبعا انا سامعه حد بيقول الله اكبر حى على الجهاد ... دى بركة دعاوينا عليكى ... احب ازعلهم واقولهم انا كويسة جدا وزى القردة كمان وعلى قلبكوا ان شاء الله ....
صحابى وحبايبى المدونين .... متقلقوش ومتنسوش انى قطة يعنى بسبع أرواح
لكم جميعا كل الود

تعليقات

‏قال همس الاحباب
احجز يا قطة
راجع تانى
‏قال همس الاحباب
لا الف سلامة
علقة تفوت ولا حد يموت
وابقى امشى فى وسط الشارع بعد كده وخلى العربيات على الرصيف
انتى فعلا زى القطط بسبع ارواح
خسارة كنا عايزين نجيب ورد ونجى
تحياتى
‏قال شريف طلال
الف سلامه و جت سليمه
الحمد لله كنتى هتسيبى مدونتك لمين
يا ساتر يا رب ايه الى بقوله ده
ههههههههههههه
شكراً ليكى
و تحياتى
‏قال د/اجدع بنوته
احجزز وارجع

بما ان المركز الرابع

يستحق المعانا للوصول اليه
‏قال فاتيما
إيه دا ؟؟؟
مين يجرؤ على المساس بطرف قطتنا الحلوة
لا عاش و لا كان
دا محامى ؟؟؟
لأ الطيب أحسن و ربنا هينتقملك منه بس إنتى حسبنى
من بعيد لبعيد
الف سلامة عليكى يا قطة ...
بس و الله كويس ...طمنتينى ... يعنى الواحد لما تحصله حادثة فيه ناس كويسة بتقف معاه
دا أنا كنت فاكرة السلبية تغلغلت فى نفوس الناس و الندالة بقت صفة متأصلة ...
سيبك برضو الراجل طلع ذوق برضو و عرض المساعدة و الأسف
عنده نظر يعنى
سلامتك الف الفا سلامة
و سبع ترواح تسع ترواح ... حرصى عليهم برضو
تحياتى يا حبيبتى
‏قال د/اجدع بنوته
الف سلامه عليكى

بس انا الصراحه مستجرأش اقول انه هو اللى غلطان

لان انا مره كنت هفعص طفل

وهو اللى كان غلطان طبعا

والشارع كله اتلم وطالعين عليا

روحت مثبتاهم

وصوتى كان بيلعلعل

لدرجة م كتر مااحرجتهم

واحد مسك الواد واداله قلم وقاله بترموا بلاويكم تحت عربيات الناس

اللى كانوا م شويه هيمسكونى يقرقشونى

فطبعا الف سلامه عنك

والمسامح كريم

معلش الواحد مبيبقاش هو والفرامل اخوات يعنى

فممكن يكون طالع بالراحه انتى وقفتى فملحقش يشد نفسه

وبعدين مكنتى توريله

مش رجليك طبعا

وريله رقم الموبايل

او باب البيت

هو الواحد بيلاقى عريس ومحامى كل يوم يعنى

ههههههههههههههههه

وتحياتى لنهى زميلة الكفاح

ومتتريقيش عليها

هو احنا كده

بنحب نتأكد م كل حاجه

دى ارواح ناس ياماما

يعنى جرح زى اللى ف رجلك ده

كان ممكن لولا تهاون نهى يؤدى بحياتك لعالم اخر

هههههههههههههههههههههههههههه

خدى بالك م نفسك واسمعى كلام مامى

وامشى ع الرصيف يانانا

برافون عليكى
‏قال بطوط حبوب
فى مصر السائق دايما ع حق
بس جت سليمه
‏قال انين الحزن
ياقتطي

الف مليون سلمه

طب ايه نجيب 2 كيلو سمك ونيجي ولا ايه
هتشربي لبن بس

سلاموووووووووز ياقطه
وزة
‏قال فرنسا هانم
الف سلامه يا قطه
الحمد لله جت سليمهوادينى نمره العربيه
وانا اروح اخد البنت خيخه والبنت دوبا والبنت وزه واروح اسلخلك فروه راسه
تحياتى يا جميل
‏قال Unknown
الف سلامة يا ست القطط كلهم

احلى حاجة ان وقت المشكلة تبقى انتى اللى

ماسكة زمام الامور


عشان محدش يطلعك الغلطانة

عارفة

لو كنتى سكتى

كان هايقولك انك انتى الغلطانة
الف سلامة علي حضرتك , الخبط للجدعان ..

بس برده محامي ومن جسر السويس مش وحش , بس انتي عارفة شكله برده راجل مؤدب لان في ناس ممكن يخبطوكي وعندهم البجاحة الكافية انهم يطلبوكي بتعويض نتيجة خبطك لعربيتهم

الف سلامة عليكي مرة تانية
‏قال وجهة نظري
اسلوبك لطيف في الكتابة الكوميدية، بس القصة من وجهة نظري بتكمل مسلسل الهبالة والعشوائية اللي احنا عاشين فيها، لأن في البلد اللي عايش فيها في أوروبا مرة بفتح باب العربية ناحية الرصيف لمست واحد ماشي (لمستة بس معورتوش) لم عليا الدنيا وعربية البوليس جت وكان يوم لولا إن الراجل مكانش عايز تعويض كنت لبست قضية، ناهيكي عن حقوق المشاة في العبور اللي هيا شيء مقدس.

ربنا ستر عليكي ويستر علي المصريين كلهم
الف سلامة عليكي

والله يكون ف عون الراجل اللي بهدلتيه
:D

انتي باين عليكي اصلا كنتي مدايقة وماصدقتي لقيتي الراجل تطلعي غضبك كله فيه
ههههههه
‏قال dina seliman
الف سلامه يقطقوطه
اول زياره ليا
مدونتك جميله جدا
متاااااااابعه
‏قال Empress appy
هههههههههه انتى بتتتلككى ولا ايه للواد فى الحلال وبيتنا مفتوح 24 ساعه دا انتى اللى خبطى العربيه بقى مش هو اطلعى من دول انا عارفاكى ههههههههه

لا بجد عارفه اكتر حاجه بتغيظنى الناس اللى تقولك ما هو راكب عربيه مفيش حد زيه مش عارفين ان العربيه دى زى البيبى لازم يتصرف عليها بس اهى ارحم من المواصلات
بس طبعا هو غلطان وقليل الذوق
وانتى عبيطه يعنى الحكومه عامله الرصيف ليه مقرتيش عندى بوست الرصيف المظلوم والله حرام تخبطونا وكمان تشتكوا يا ساتر اسمعى الكلام الرصيف اتعمل للقطط بس انما الشارع للاسود يا ساتر شعب يخاف ميختشيش
سلامتك يا نونا
‏قال Heart Beat
يا فندم الف سلامة عليكي الحمدلله انها بسيطة

انا سمعت ان المحامي و من جسر السويس معناه فلوس في الطريق اليك و الله اعلم

ازاي يتجرأ و يخبط خبطة صغيرة هو ايه ماعندوش نظر مابيفهمش

و بعدين ما هو ساعات كتير مابيبقاش في مكان على الرصيف عشان نمشي عليه و بالمناسبة دي احب اشكر كل الباعة المفترشين اللي بيغصبونا نمشي في وسط الشارع لانهم مفترشين الرصيف منذ الصباح الباكر و حتى ساعات الصباح الاولى يعني 24 ساعة

و مين ده بس اللي يتجرأ و يقول ده بركة دعانا عليكي ... قطع لسان اللي يقول كده

حضرتك لا تصيبك هذه النوعية من الادعية لانها غير صحيحة بالمرة

امشي في وسط الشارع و لا يهمك بس اما تقابلي المحامي بتاع جسر السويس ده ابقي اسأليه هو بيعمل ايه عندكم

مش يمكن يكون في حد من اياهم زقه عليكي

زي الافلام يعني و كده

تحياتي يا جميلة و الف سلامة عليكي
‏قال Desert cat
همس الاحباب
هو شكل اول رد اتحجز ليك على طول
مبروك عليك
‏قال Desert cat
همس الاحباب
اممممممم
شامة ريحة ترقية بس هعديها لك
وبعدين انا بوفر لك تمن الورد ده جزائى
تحياتى
‏قال Desert cat
شريف طلال
كنت هسيبها للورثة يا شريف
ههههههههههههه
الله يسلمك
‏قال Desert cat
fatima
ام يوسف الغالية
فى حالة الحوادث بتلاقى الدنيا كلها بتتدخل حتى لو حادثة على الطريق العام واللى اتخبط حد مش معروف هو مين ... انما فى حالة التحرش والاغتصاب على طول الخط البنت هى اللى غلطانة هى اللى شجعت اللى اغتصبها او اللى اتحرش بيها على كدا
يا حبيبتى انتى فى مصر يعنى التناقض التام
تحياتى
‏قال Desert cat
د/اجدع بنوته
الله يسلمك
انتى ممتجرأيش تقولى هو اللى غلطان او مش غلطان كمان ... لان انا اللى كنت موجودة مش حضرتك ... ده واحد واقف اعتقد انه كان فى انتظار حد .. يعنى مش كان ماشى ولاانا اللى جيت قولت له والنبى اخبطنى ... ولا هو كان طالع بالصدفة بدليل ان واحدة فى طولى وعرضى اعتقد انه مش اعمى .... الحاجة التانية فى حالتك انتى بتقولى طلعتى الواد غلطان وواحد ضربه بالقلم ... طيب ما هو كدا غلط ... انتى كنتى مستريحة وانتى كنتى هتضيعى روح بنى ادم ... يعنى ايه انتى والفرامل مش اخوات .. ما هو يا عندك القدرة على القيادة يا مفيش ... زى مثلا مش هروح اجيب واحد فى محو الامية واشغله مدرس ... بدل ما تعتذرى على الخطأ اللى ارتكبتيه تقفى تزعقى ... والتانى يضربه ومبسوطة ... ما يمكن اللى ضربه ده معندوش اخلاق ... حب يساعد بس بشكل مختلف ... يا حلولى على الشعب المصرى وعمال نشتكى من الحكومة .. ما هى الحكومة من الشعب برضه ... يعنى النفوس واحدة
‏قال Desert cat
بطوط حبوب
فى مصر يا محمود الغلطان دايما على حق وبيبجح كمان فى خلق الله
تقريبا زمن اللى اختشوا ماتوا
تحياتى يا دكتور
‏قال Desert cat
انين الحزن
لاء يا وزة نا مبكلش غير كباب وكفته
اصلى قطة متدلعة حبتين
الا فين نصيبى من السبعة مليون جنيه
تحياتى يا جميل
‏قال Desert cat
فرنسا هانم
الحمد لله قدر الله وما شاء فعل
رقم العربية لسه محتفظة بيه حتى الان
شيالاكى لوقت عوزة يا قلبى
تحياتى
‏قال Desert cat
واحد مش فاهم حاجة
طيب والنبى اان اللى غلطانة ازاى وهو كان راكن على جنب وانا اللى ماشية .. واصلا هو متكلمش بالعكس ده اعتذر ولو كان اتنفس او فكر يفتح بؤه والله ما كنت اسيبه غير فى القسم ... مش يبقوا غلطانين ويبحجوا كمان

تحياتى
‏قال Desert cat
الفارس الملثم
الله يسلمك
انا بقى نفسى اقع فى حد من الناس دى
وانا وقتها اخلى اللى ما يشترى يتفرج عليه غير انى هوديه القسم ومش هتنازل عن حقى وها اخده وبالقانون كمان
ما هو فعلا فى ناس كتير جدا بابجاحة المتناهية دى
بس احنا اللى سمحنا لهم
المجتمع فيه كمية سلبيه بشكل مستفز
انا مش من الناس اللى بتسيب حقها بسهولة انا ممكن اسامح لو اللى قدامى محترم .. احترمنى واحترم كلامى .. لكن فى حالة قلة ادبه ... بيبقى هو الجانى على نفسه بقى
تحياتى
‏قال Desert cat
وجهة نظري
بالظبط كدا يا فندم
اذا كان فى رد لأخت بتقولى خبطت الواد ووقفت ازعق وواحد ضربه بالقلم وفرحانة جدا باللى عملته وبتحكى بكل فخر
للاسف الشارع المصرى اختفى منه الاحترام والانسانية
بقينا بندوس على بعض وكمان عمال نشتكى
تقريبا التخلف والهمجية بقت منهج سائد
احترامى وتقديرى
‏قال Desert cat
آلام وآمال
ههههههههههه
ابدا والله يا محمود بالعكس ده انا كنت فرحانة بالتخفيضات
بس الموقف نفسه ضايقنى ... تخيل يبقى واحد واقف وانت علشان مشيت جنبه يتحرك ولما وقفت وقف ولما مشيت قدامه راح لاطشك ... تخيل بقى .. انا وقتها كمان كان رد فعلى هين ... والله لو ما كان اعتذر ما كنت سيبته الا فى القسم ... بس الحمد لله قدر الله وما شاء فعل
تحياتى
‏قال Desert cat
dina
الله يسلمك يا دينا
انتى تشرفى يا جميل
نورتى البلوج
تحياتى
‏قال Desert cat
appy
أأبى حبيبتى انا مش كنت اعرف هو منين فى الاول بس لما بصيت فى الكارت سامحته على طول وصوتى بقى هادى وكنت حاجة زى البسكويت كدا
ههههههههههههه
رسم يا ماما امال ايه
بالنسبة للى بتتغاظى منهم .. طيب انتى يا جميلة بطوط اصلا كلها على بعضها حاجه كدا لو واحد بيلعب كمال اجسام وصحته حلوة ممكن يرفعها بايد واحدة يبقى تزعلى لانها ظاهرة صحية مبتعورش ... انما ده كان راكب تيوتا وشكله فرحان بيها حبتين ...
وبعدين يا امما القطط ليهم الرصيف والشارع لا قتلقى بسبع اروااااح
ههههههههههه
‏قال Desert cat
Heart Beat
حبيبتى ما هو انا لما لاقيت انه محامى ومن جسر السويس وعربية تويتا قولت الم الموضوع .. واديله عنوان البيت بقى وربنا يعمل اللى فيه الخير .. بالنسبة للباعة المفترشين الرصيف الغريب بقى اللى بشوفه على الارصفة اكتر
انى ممكن الاقى محل وعليه يافطة ومنور ومعروف انه محل والاقيه حاطط قدامه ستاند وكاتب عليه برضه اسم المحل ... يعنى كدا كدا لازم الرصيف ينشغل ...
امال هى الناس تمشى ليه يعنى ... المطلوب انهم يركبوا طيارات علشان الناس تستريح ........
هههههههههههه
تصدقى اان فكرت فى الموضوع ده قولت اكيد ده حد باعته ياخد بالتار ولا العار ... وكنت عايزه اساله فى الشارع مين اللى مسلطك ياض .. اعترف ... مين اللى قالك روح اقتل قطة الصحراء .. بس رجعت قولت الناس مش حيفهموا ينى ايه قطة الصحراء ومش بعيد الوضع يتقلب .. ففضلت امشى
محبتى ليكى يا جميله
الف سلامه يا قطه
بس هما كا الى راكبين عربيات البعض منهم انى الشارع ملكه هو بس مالها عجلة خالتى فرنسا مش احسن وبتخف زحمه
‏قال Alexandrian far away
ألف سلامه يا قطه بألف أسد
بس حرام عليكي تكسري قلبه
طيب كنتي خدي الكارت على الأقل

ماحدش عارف
ما محبه إلا بعد حادثه

:-)
تحياتي
‏قال Unknown
عزيزتى قطة
حمد الله على السلامة اولا
ثانيا الناس بجد مبقاش عندها زوق ابدا طيب على الاقل دة رجع وشاف جرى اية ليكى
انا بقى هقولك على موقف حصلى من كام يوم وقت المطرة تانى يوم المطر الجامد وطبعا الشوارع كانت لسة غرقانة وانا نازلة الصبح فى امانة الله رايحة شغلة وماشية والله على الرصيف ووواحد سايق عربية بسرعة جامدة جدا وغرقنى مية ولا حتى وقف يشوف هو عمل اية بالرغم انة شافنى واكيد سمعنى بزعق لاننا كنا بدرى ولسة مفيش دوشة فى الشارع الحمد لله انى كنت لسة قريبة من البيت ورجعت غيرت هدومى وطبعا اتاخرت على الشغل
ربنا يرحمنا
حمد الله على السلامة مرة تانية
‏قال الساحرة
اولاحمدالله علي سلامتك
وجت سليمه
دة انتي شردتي الراجل خالص

عمال يتاسف وانتي سلختيه

دة فيه بيخبطوة ويمشوة بكل برود

والله واحد قدام مدرسه اعدادي خبط ولد ادامي وكان ماشي عادي
بس علي مين وقفته ومسبتوش غير لما الضابط جيه عمل محضر
في الاخر قعد يدعي عليه هههههه
الف سلامة عليكى يا قطوقطة
بس يعنى كنتى خليتى الجدع يطمن عليكى
محدش عارف النصيب فين
‏قال Unknown
لالالالالالالالالالالالالالالالالالالالالا
مستحيل مش قادر اتخيل
مين اللى استجرى وعمل كده فى قطتى
مختيش اسمه ليه وانا كنت بهدلته
وبعدين هو كان عايز يشوف ايه الخايب ده عشان يطمن عليكى
اصل انا عارف الحركات دى كويس

اروح من بعدك فين يا قطة
كان مستقبلى ضاع خلاص
انا هدبح بقرة لالالالا مش كفايه انا هدبح ديناصور وافرقه على الفقراء

بس بينى وبينك اللى حصلك ده عشان معاملتك معايا
بقى يا مفترية عيزانى استنى لحد 2030 حرام عليكى ده انا اكون صديت وتاريخ صلاحيتى انتهى
بس مش مهم حمد الله على سلامتك
ولو رقم موبيلك كمان اطمن عليكى
يبقى 100 100
سلالالالالالالالالالالالالالالالالام
لالالالالالالالالالالالالالالالالالالالالا
مستحيل مش قادر اتخيل
مين اللى استجرى وعمل كده فى قطتى
مختيش اسمه ليه وانا كنت بهدلته
وبعدين هو كان عايز يشوف ايه الخايب ده عشان يطمن عليكى
اصل انا عارف الحركات دى كويس

اروح من بعدك فين يا قطة
كان مستقبلى ضاع خلاص
انا هدبح بقرة لالالالا مش كفايه انا هدبح ديناصور وافرقه على الفقراء

بس بينى وبينك اللى حصلك ده عشان معاملتك معايا
بقى يا مفترية عيزانى استنى لحد 2030 حرام عليكى ده انا اكون صديت وتاريخ صلاحيتى انتهى
بس مش مهم حمد الله على سلامتك
ولو رقم موبيلك كمان اطمن عليكى
يبقى 100 100
سلالالالالالالالالالالالالالالالالام
‏قال nigro
أزال المؤلف هذا التعليق.
‏قال Foxology
الف سلامة يا ستى تعيشى وتاخدى غيرها وكفاية عليه الزفة اللى انتى عملتيهالو وبقى عامل زى الفار المبلول :))
‏قال ويكا
السلام عليكم ورحمة الله وبركاته
الأول الف سلامة عليكي والحمدلله انها جت سليمة المرة دي بس ابقي خلي بالك بعد كده عشان دلوقت اي حد بيسوق اي حاجة زي ما في ناس كده بتسوق الهبل على الشيطانة وهنروح بعيد ليه طيب ما الشعب المصري كلوا بيتساق دلوقتي .........
ثانياً انتي كنتي ماشية فين شكلك كده نزلتي زنقة الستات ووقعتي في ايد ام احمد وام فاروق بتاعت ياحبيبتشي.......
ارجوا اني ماكونش طولت عليكي
بااااااي
‏قال Unknown
ايه بتنا مفتوح 24 ساعة
انتي بتتلككي للواد ؟؟؟
:))

بجد سلامتك

(F)
‏قال موناليزا
سلامتك ياقمر
بس تعرفى كويس انه اهتم ونزل يطمن عليكى ويسمع وابل التوبيخات دى
خدى بالك بعد كده بقى
‏قال Eman Eltaher
هههههههههههههه
والله دمك بجد زى العسل
سلامتك بجد
و ان شاء الله تعدى بسرعة

معلش انا دخلت كده
دى اول زيارة و ان شاء الله مش الأخيرة
أولا أنا مش عارف ازاي قطه بتعيش في الصحراء؟ لكن بجد مدونتك دمها خفيف وأسلوبك جميل ..وألف سلامه يا قطقوطه وشكرا لزيارتك مدونتي المتواضعه
‏قال سنووايت
الف سلامة عليكي
الحمدلله انها جت سليمة ورجعتي للمدونة تاني
لو كا ن يعرف ان قطة الصحراء بتخربش ما كنش عمل كدة
‏قال صوت من مصر
يا ستى ابقى امشى تحت الحيط عشان محدش ياخد باله منك اصلا
وعموما الف سلامه ؟
الاول الف سلامه يا كات
بس انتى شكلك كنتى سرحانه او مذبهله من التخفيضات
واسمعى كلام ماما وامشى على الرصيف
‏قال Desert cat
رئيس جمهوريه نفسى
تعرف يا محمود هو لو كان ماشى كنت قولت غصب عنه
انما ده كان واقف يعنى من الاخر بيستهبل
تحياتى
‏قال Desert cat
Alexandrian far away
ما هو انا فى الالو اخدت الكارت
لما شوفت البيانات بتاعته
ندمت بصراحة على المولد اللى عملته له
هو الواحد ميعرفش يسايس اموره ابدا ولازم من الفضايح دى
معلشى بقى يمكن تتعوض فى حد تانى من المعادى
تحياتى
‏قال Desert cat
ايوية
الله يسلمك يا حبيبتى
اللى حصلك من انسان عديم الذوق بيتكرر كتير خصوصا فى الشتا والمطر بتلاقيه بيجرى فى المية ويبهدل اللى ماشى جنبه ويجرى وبعد ما يعديكى تلاقيه بص وراه وابتسم كانها ابتسامة النصر اصل البعيد كان بيسابق الريح باين
الحمد لله عدت على خير
وربنا يرحمنى ويرحمك ويرحمنا جميعا من العالم دى
تحياتى ليكى يا جميلة
‏قال Desert cat
الساحرة
الله يسلمك يا حبيبتى
هو اصلا كان واقف مكانش ماشى
وانا لما عديت من جنب العربية اتحرك شوية وبعدين وقفت وقف تانى
لما لاقيته وقف تانى مشيت عادى فى نفس الجنب اللى هو واقف فيه لاقيته اتحرك يعنى كدا كدا انا قدامه مكانش يقدر يجرى فى اى اتجاه اصل لو جرى على طول هيخلص عليا ويجيب اجلى
بخلاف ان حظه العاثر وقعه فى طريقى وانا اللى يقع فى طريقى يحصله كدا
هههههههههه
احييكى طبعا على شجعاتك وجرأتك وعدم سكوتك عن الحق
ياريت كلنا نبقى زيك كدا ونتخلى عن السلبية اللى بقت زى الوباء دى
تحياتى ليكى يا اجمل ساحرة
‏قال Desert cat
بت خيخة وأى كلام
ما هى دى الغلطة اللى انا ارتكتبها يا ام شريف
انى مش خليته يطمن
معلشى بقى
محدش عارف يمكن يجى بلدنا مرة تانية
محبتى ليكى
‏قال Desert cat
حــدوتـــة
جوز بنتى الغالى
لوووووووووول
الشخ ده كان متسلط عليا
ايوا متسلط اصل انا عندى سوء الظن هواية ... متشكرة جدا على الديناصور وعلشان كرم اخلاقك ده خلاص انا قررت اجوزك بنتى فى 2015 يادوب تجهز الفيلا والعربية ورصيد فى البنك من دلوقتى
ايه ده مالك
لالالالالالاء
فوق انت مش مستحمل المفاجأة
للدرجة دى مكنتش متخيل
‏قال Desert cat
nigro
يا سيدى انا موافقة على المنصب مش اعترضت هو انا اقدر برضه
ده انا حتى هعيش حياتى واى حد مش يعجبنى اهجم عليه واجيب خبره
النسبة لو انا اللى كنت سايقة العربية مكنتش هعمل كدا لانى بعرف كويس احترم الناس اللى تستحق الاحترام
وطالما محدش عمل فيا حاجه أأذيه ليه
تحياتى
‏قال Desert cat
Foxology
الله يسلمك
هو كان يستاهل لانه اولا انا مبعرفش اسيب حقى
ثانيا هو اللى غلطان
تحياتى
‏قال Desert cat
ويكا
والله على رايك كلنا متساقين
انا كنت ماشية فى شارع عادى جدا
والكابتشن كان واقف على جنب بس مش عارفه ايه اللى خطبه فى دماغه وخلاه يعمل كدا
عموما اخد جزائه
تحياتى
‏قال Desert cat
أنونيمس
بصراحة اه
مش من محامى ومن جسر السويس ده لقطة
ههههههههههههههه
الله يسلمك يا دكتور
‏قال Desert cat
monaliza
ما هو مكانش يقدر يتحرك لانه مكانش فى اى مجال يقدر يجرى منه طبعا وكويس انه سمع لانى مكنتش هسيبه غير فى القسم ل كان فكر يعمل اى حاجه غير انه يسمع ويعتذر كمان
تحياتى
‏قال Desert cat
Eman Eltaher
ميرسى اوى يا ايمان على زوقك
تشرفى اى وقت يا جميل
تحياتى
‏قال Desert cat
العبـد لله
عايشه فى الصحراء عادى
جنب شجرة الصبار اللى على ايدك اليمين
الله يسلمك
وطبعا يشرفنى زيارتك
تحياتى
‏قال Desert cat
سنووايت
ما هو مش كان عارف انه جت فى قطة الصحراء بس يلا بقى قدرة وقعه فى طريقى
الله يسلمك يا حبيبتى
تحياتى
‏قال Desert cat
صوت من مصر
امشى تحت الحيط
طيب هو مشى تحت الحيط ده بيكون ازاى وانا مش امشى غير تحته بعد كدا طالما محدش هياخد باله منى
‏قال Desert cat
تــــايه ومش تـــايه
فعلا والله كنت بتسغرب جدا
على موضوع التخفضيات ده وعربية واقفه ومشيت اان قدامها عادى مش مدية خوانة
بس يلا قدر الله وما شاء فعل
‏قال Soooo
الف سلامه عليكي
‏قال Desert cat
Soooo
الله يسلمك
‏قال oceaneyes
الف مليون سلامة عليكى يا نانا
..هما الناس كدة ..حاجة غريبة بجد ..ال يعنى العملية ناقصاهم

!!

ولا يهمك ..حصل خير ..وابقى خدى بالك من المعتوهين دول المرة الجاية

وخدى بالك من نفسك كويس وما تزعليش من ماما ..هى بس علشان خايفة عليكى ادتلم الموشح بتاع الماماهات ده


يالا افوت عليكى المرة الجاية تكونى بقيتى احسن ان شاء الله


وسلامتك تانى الف سلامة


:)
‏قال عبده الرايق
اوه نووووو
نو
نو
القطه تتلطش بسياره والرايق على ظهر البسيطه حى يرزق ؟؟؟؟
لا والف لا
وكلا والف كلا
الطياره بتاعتى تحت امرك
طياره مخصوص من ايجبت اير
واروح اغير لك على الجرح البسيط ده فى امريكا
او الصومال
او فرنسا
وبس فى حاجه كده صغيره
اعملى حسابك انتى اللى هتدفعى
احسن الحاله لسه جيم
والكادر مجاش
وكمان اعملى حسابك فى ساندويتش وسيجارتين فرط
لزوم السفر
والف سلامه
‏قال فضفضة
اااااااااااااالف سلاااااااااامة

يا خراشي يا خراشي

هو انا اول مرة اجى لك القاكى عاملة حادثة

لالالالالالالالالالا وجيت كده من غير كيس برتقال فى ايدي ولا اى حاجة

يا كسووووووفى

معلشي ملحوقة والحمد لله على سلامتك

ولو عارفة نمرة العربية

هاتيها

صحيح انا بقى لى كتير برة مصر

بس اصحابي فى الدخلية كتيييييييير

من ايام ما كنت قائد طابية هناك

الف سلامة ونورتى عندنا
قطقوطة
‏قال سكينة
كل ده وفاكرة نفسك قطة
:)
خرمشت الراجل وقلقت بال الشارع واشمعنى الصيدلي يشوف رجلك ما كان المحامي فرصة مش وحشة
عامة أديك عرفت الوصفة عمرك ما تمشي على الرصيف
:)
‏قال صالح سعيد
الف سلامه يا قطه
ان شالله وزير الصحه وانتى لا
‏قال Desert cat
oceaneyes
ميرسى يا حبيبتى على مشاعرك الجميلة
ويارب ميكونش فى مرة جاية
تحياتى ليكى يا قمر
‏قال Desert cat
عبده الرايق
واااااااااااااو
مستر عبده رايق هير فى ماى بلوج
يادى النور يادى الهنا
انا عندى فكرة احسن
استنى لما تقبض الكادر وبعدين اتعالج
ممكن احجز بس 5 جنيه سلف من الكادر
‏قال Desert cat
فضفضة
الله يسلمك
بجد معقول كنت قائد طابية
طيب هايل بقا لنا ضهر فى الداخلية
الواحد يمشى فى الشارع يلطش فى خلق الله براحته
لو اللى يفتح بؤه اتصل بيك على طول
نورت البلوج
‏قال Desert cat
سكينة
ما هى غطيتى ان مش خليته يشوف رجلى قصدى الجرح
عموما تتعوض فى محامى تانى
تحياتى
‏قال Desert cat
صالح سعيد
الله يسلمك
ربنا يستجاب الدعوة قادر يا كريم
‏قال Monzer
جسر السويس ده بلديات على فكرة

ومن منطقتى .. يعنى ماحدش يعرف يعمل معاه حاجة .. والى ليه شوق فى حاجة البلوج سفير واسع وفارد كتافه





بس إلا انت .. لانه باين ان ماحدش بياخد معاكى لاحق ولا باطل ..

اتلطيب أحسن يا فندم

ألف سلامة
‏قال Desert cat
Monzer
طيب مش كان يقول يا منذر انكو بلديات علشان كنا نفسحووووه
ههههههههههه
الله يسلمك
هو طبعا طلع محترم واعتذر
طبعا من منطقتك ياباشا يعنى لازم يبقى ناس كومل
نورت البلوج
الف سلامة ياعم كات ... يارب الناس
الوحشة وانت لا

:D
‏قال Desert cat
كفايـة طيبـة
ميرسى يا قمر
الله يسلمك
ألف لا باس عليكي ,,
دمتي بود
‏قال Desert cat
•√♥ أريــ السمر ــج ♥√•
ميرسى يا جميل

المشاركات الشائعة