لطشة خفيفة .. طيب مش تاخد بالك

خلصت شغلى ومروحة عادى جدا زى كل يوم ماشية اتفرج على المحلات واستغرب على التخفيضات اللى نازلة لـ 60 % فى جميع محلات الملابس معقول .... عقبال يارب لما كل حاجه سعرها ينزل كدا ... فجأة والاقى نفسى محشورة بين عربيتين ... عربية واقفه والتانية جاية ماشية من جنبى ... الطبيعى انى اقرب جنب اللى واقفه علشان اللى ماشية جنبى متخبطنيش ... والاقى اللى قربت منها بتتحرك بس بالراحة جدا ... وقفت لاقيته وقف ... طبعا العربية اللى جنبى من الناحية التانية عدت من زمان ... بس اتفتح بعدها سيل من التكاتك الهى ربنا يقصف اجلهم قادر يا كريم ... لما وقف تانى قولت عادى بقى هو راكن على جنب وانا مشيت فى الجنب ده يعنى مش هاروح ارمى نفسى تحت العربية لانه كدا كدا واقف ... وفجأة الاقى الاخ برضه بكل هدوء وكل برود جه من ورايا وراح لاطنشى لاطشة خفيفة اسفرت عن اصابة رجلى الشمال بجرح برضه خفيف الحمد لله ... وبدون ما اشعر بنفسى واروح متوجهه له اااه يا غبىىىىىىىىى ... يا حيوان يا اللى مدينيك رخصة .. هما دلوقتى بيدوا رخص لذوى الاربع ... طبعا كأنى كنت بنادى فى مكرفون ... وألاقى الشارع كله اتقلب ... جم اتنين ستات .. ايه يا بينتشى ... فى ايه يا حبيبتشى .... البتاع اللى فى العربية ده خبطنى ... واحد واقف طيب الحمد لله جت سليمة ... قدر ولطف ... ايوا يعنى ايه جت سليمة يمشى يطلش فى خلق الله وتقولى لى جت سليمة ... طنط اللى جت هى واللى معاها .. ما هما كدا يا حبيبتشى علشان ركبو عربيات يبقا خلاص طلعوا السما ... ماشيين يخبطوا فى الناس .. طبعا الاخ نزل ... فى ايه بس اهدى كدا ... انت تخبطنى وتقولى اهدى ده انت بارد اوى .. وانت لسانك طويل اوى ... ايه يابنتى فى ايه بالراحة شوية حرام عليكى ... طنط التانية جرالك ايه يا حبيبتى ... رجلى يا طنط تقريبا اتعورت ... لاقيته بيقولى ورينى كدا ... فى الحلال يا معلم هى سايبه ولا ايه ( أحم أحم ) .. أوريك ايه انت بتقتل القتيل وتمشى فى جنازته .... انا مبوريش رجلى لحد ... عمو اللى واقف معلشى يا بنتى انتى شايفه الشارع عامل ازاى وغصب عنه قولت له بمزاجه مش غصب عنه .. ورحت حكيت لهم كلهم اللى حصل من الاول ... راحت طنط باصه له بصة احتقار جامدة اوى وقالت له روح يا شيخ منك لله .... طبعا هو مش رد عليها وفضل يقولى انا اسف والله ... ايوا يعنى واسفك ده هيعملى ايه .. وحياتك لاخد رقم العربية ... ورحت مطلعه الموبايل علشان اسجل عليه الرقم ... لاقيته بيقولى طيب ممكن بس رقمك علشان ابقى اطمن عليكى ... يا حج متشكرين باب بيتنا مفتوح اربعه وعشرين ساعه وبابايا موجود فى اى وقت ... احم احم .. لا طبعا مبديش حد رقمى انا لو رجلى جرى لها حاجه هوديك السجن ... راح قالى طيب انا اسف وده الكارت بتاعى ... وابص فى الكارت الاستاذ خلف خيلف خلاف المحامى .... طبعا ده مش اسمه بس هو مش عارفه مين كدا المحامى ... . جسر السويس .. بعد ما بصيت فى الكارت اديته له تانى .. لا مش باخد كروت من حد .. بس جسر السويس وايه اللى جايبك عندنا هو احنا ناقصين مش كفاية اللى عندنا كمان بيستوردوا لنا .. وطبعا كل واحد وقف يديله فى جنابه كلام من جميع الجهات وده واقف زى الفار المبلول ... انا شوفت المنظر كدا قولت طيب ... فتكوا بالعافية ... طيب استنى ابقى اطمن عليكى ازاى ... وانت مالك انت تطمن عليا من بقيت عيلتى مثلا والله عجايب .... وطبعا دخلت اول صيدلية قابلتنى ... لاقيته جرح عادى الحمد لله مش جامد ... والدكتور اللى هناك طهره وحط لى عليه لازق وقالى متقلقيش دى حاجه بسيطة .... وروحت البيت كأنى عامله عمله .. مش عايزه حد يشوف حاجه ... بس اتقفشت وسمعت الاسطوانة اللى كنت عاملة حسابها .. وانتى مش تمشى على الرصيف ليه .. هما عاملين الارصفه ليه وشوية ارشادات عن الطريق ووصف فى مميزات الرصيف كأنى هروح أتجوزه ... طيب ما بعد الاسطوانة الجامدة دى يا ماما .... ما تدينى مصروفى وسندوتشات المدرسة علشان يدوب كدا الجرس ضرب ... طيب اتريقى بس خليكى عارفه انا زعلانة .... وفى الوقت اللى زى ده لازم الواحد يستغل صحابه يبقى مين الى تنفع فى الموقف ده هى نهى مفيش غيرها ... رحت متصلة بيها .. فضلت تسالنى شوية حاجات ... وفى الاخر قالت طيب كويس ده جرح عادى مفيش اى قلق ... طيب ما انا قولت لك الصيدلى قالى كدا ... هو انتوا مش بتثقوا فى بعض ولا ايه .. ولا علشان انتى خريجة طب لازم تعمليهم علينا ... خلاص ياحجه ربنا يهديكى على الطيب ابقى تعالى لى المستشفى الصبح برضه علشان اطمن ... رحت لها المستشفى لاقيتها عملت لى نفس اللى الصيدلى عمله برضه ... ولاقيتها بتقولى ابقى تعالى لى من وقت للتانى بقى ... يا حبيبتى هو انا فاضيه لك علشان اجى لك من وقت للتانى ... هى مرة ومش هتعود ده حتى ريحة المستشفى وحشة ... وسبتها ومشيت وهى قاعدة فاتحة بوئها من غير ما ترد ولا كلمة
طبعا انا سامعه حد بيقول الله اكبر حى على الجهاد ... دى بركة دعاوينا عليكى ... احب ازعلهم واقولهم انا كويسة جدا وزى القردة كمان وعلى قلبكوا ان شاء الله ....
صحابى وحبايبى المدونين .... متقلقوش ومتنسوش انى قطة يعنى بسبع أرواح
لكم جميعا كل الود

Comments

احجز يا قطة
راجع تانى
لا الف سلامة
علقة تفوت ولا حد يموت
وابقى امشى فى وسط الشارع بعد كده وخلى العربيات على الرصيف
انتى فعلا زى القطط بسبع ارواح
خسارة كنا عايزين نجيب ورد ونجى
تحياتى
الف سلامه و جت سليمه
الحمد لله كنتى هتسيبى مدونتك لمين
يا ساتر يا رب ايه الى بقوله ده
ههههههههههههه
شكراً ليكى
و تحياتى
احجزز وارجع

بما ان المركز الرابع

يستحق المعانا للوصول اليه
fatima said…
إيه دا ؟؟؟
مين يجرؤ على المساس بطرف قطتنا الحلوة
لا عاش و لا كان
دا محامى ؟؟؟
لأ الطيب أحسن و ربنا هينتقملك منه بس إنتى حسبنى
من بعيد لبعيد
الف سلامة عليكى يا قطة ...
بس و الله كويس ...طمنتينى ... يعنى الواحد لما تحصله حادثة فيه ناس كويسة بتقف معاه
دا أنا كنت فاكرة السلبية تغلغلت فى نفوس الناس و الندالة بقت صفة متأصلة ...
سيبك برضو الراجل طلع ذوق برضو و عرض المساعدة و الأسف
عنده نظر يعنى
سلامتك الف الفا سلامة
و سبع ترواح تسع ترواح ... حرصى عليهم برضو
تحياتى يا حبيبتى
الف سلامه عليكى

بس انا الصراحه مستجرأش اقول انه هو اللى غلطان

لان انا مره كنت هفعص طفل

وهو اللى كان غلطان طبعا

والشارع كله اتلم وطالعين عليا

روحت مثبتاهم

وصوتى كان بيلعلعل

لدرجة م كتر مااحرجتهم

واحد مسك الواد واداله قلم وقاله بترموا بلاويكم تحت عربيات الناس

اللى كانوا م شويه هيمسكونى يقرقشونى

فطبعا الف سلامه عنك

والمسامح كريم

معلش الواحد مبيبقاش هو والفرامل اخوات يعنى

فممكن يكون طالع بالراحه انتى وقفتى فملحقش يشد نفسه

وبعدين مكنتى توريله

مش رجليك طبعا

وريله رقم الموبايل

او باب البيت

هو الواحد بيلاقى عريس ومحامى كل يوم يعنى

ههههههههههههههههه

وتحياتى لنهى زميلة الكفاح

ومتتريقيش عليها

هو احنا كده

بنحب نتأكد م كل حاجه

دى ارواح ناس ياماما

يعنى جرح زى اللى ف رجلك ده

كان ممكن لولا تهاون نهى يؤدى بحياتك لعالم اخر

هههههههههههههههههههههههههههه

خدى بالك م نفسك واسمعى كلام مامى

وامشى ع الرصيف يانانا

برافون عليكى
فى مصر السائق دايما ع حق
بس جت سليمه
ياقتطي

الف مليون سلمه

طب ايه نجيب 2 كيلو سمك ونيجي ولا ايه
هتشربي لبن بس

سلاموووووووووز ياقطه
وزة
الف سلامه يا قطه
الحمد لله جت سليمهوادينى نمره العربيه
وانا اروح اخد البنت خيخه والبنت دوبا والبنت وزه واروح اسلخلك فروه راسه
تحياتى يا جميل
الف سلامة يا ست القطط كلهم

احلى حاجة ان وقت المشكلة تبقى انتى اللى

ماسكة زمام الامور


عشان محدش يطلعك الغلطانة

عارفة

لو كنتى سكتى

كان هايقولك انك انتى الغلطانة
الف سلامة علي حضرتك , الخبط للجدعان ..

بس برده محامي ومن جسر السويس مش وحش , بس انتي عارفة شكله برده راجل مؤدب لان في ناس ممكن يخبطوكي وعندهم البجاحة الكافية انهم يطلبوكي بتعويض نتيجة خبطك لعربيتهم

الف سلامة عليكي مرة تانية
اسلوبك لطيف في الكتابة الكوميدية، بس القصة من وجهة نظري بتكمل مسلسل الهبالة والعشوائية اللي احنا عاشين فيها، لأن في البلد اللي عايش فيها في أوروبا مرة بفتح باب العربية ناحية الرصيف لمست واحد ماشي (لمستة بس معورتوش) لم عليا الدنيا وعربية البوليس جت وكان يوم لولا إن الراجل مكانش عايز تعويض كنت لبست قضية، ناهيكي عن حقوق المشاة في العبور اللي هيا شيء مقدس.

ربنا ستر عليكي ويستر علي المصريين كلهم
الف سلامة عليكي

والله يكون ف عون الراجل اللي بهدلتيه
:D

انتي باين عليكي اصلا كنتي مدايقة وماصدقتي لقيتي الراجل تطلعي غضبك كله فيه
ههههههه
dina said…
الف سلامه يقطقوطه
اول زياره ليا
مدونتك جميله جدا
متاااااااابعه
appy said…
هههههههههه انتى بتتتلككى ولا ايه للواد فى الحلال وبيتنا مفتوح 24 ساعه دا انتى اللى خبطى العربيه بقى مش هو اطلعى من دول انا عارفاكى ههههههههه

لا بجد عارفه اكتر حاجه بتغيظنى الناس اللى تقولك ما هو راكب عربيه مفيش حد زيه مش عارفين ان العربيه دى زى البيبى لازم يتصرف عليها بس اهى ارحم من المواصلات
بس طبعا هو غلطان وقليل الذوق
وانتى عبيطه يعنى الحكومه عامله الرصيف ليه مقرتيش عندى بوست الرصيف المظلوم والله حرام تخبطونا وكمان تشتكوا يا ساتر اسمعى الكلام الرصيف اتعمل للقطط بس انما الشارع للاسود يا ساتر شعب يخاف ميختشيش
سلامتك يا نونا
Heart Beat said…
يا فندم الف سلامة عليكي الحمدلله انها بسيطة

انا سمعت ان المحامي و من جسر السويس معناه فلوس في الطريق اليك و الله اعلم

ازاي يتجرأ و يخبط خبطة صغيرة هو ايه ماعندوش نظر مابيفهمش

و بعدين ما هو ساعات كتير مابيبقاش في مكان على الرصيف عشان نمشي عليه و بالمناسبة دي احب اشكر كل الباعة المفترشين اللي بيغصبونا نمشي في وسط الشارع لانهم مفترشين الرصيف منذ الصباح الباكر و حتى ساعات الصباح الاولى يعني 24 ساعة

و مين ده بس اللي يتجرأ و يقول ده بركة دعانا عليكي ... قطع لسان اللي يقول كده

حضرتك لا تصيبك هذه النوعية من الادعية لانها غير صحيحة بالمرة

امشي في وسط الشارع و لا يهمك بس اما تقابلي المحامي بتاع جسر السويس ده ابقي اسأليه هو بيعمل ايه عندكم

مش يمكن يكون في حد من اياهم زقه عليكي

زي الافلام يعني و كده

تحياتي يا جميلة و الف سلامة عليكي
Desert cat said…
همس الاحباب
هو شكل اول رد اتحجز ليك على طول
مبروك عليك
Desert cat said…
همس الاحباب
اممممممم
شامة ريحة ترقية بس هعديها لك
وبعدين انا بوفر لك تمن الورد ده جزائى
تحياتى
Desert cat said…
شريف طلال
كنت هسيبها للورثة يا شريف
ههههههههههههه
الله يسلمك
Desert cat said…
fatima
ام يوسف الغالية
فى حالة الحوادث بتلاقى الدنيا كلها بتتدخل حتى لو حادثة على الطريق العام واللى اتخبط حد مش معروف هو مين ... انما فى حالة التحرش والاغتصاب على طول الخط البنت هى اللى غلطانة هى اللى شجعت اللى اغتصبها او اللى اتحرش بيها على كدا
يا حبيبتى انتى فى مصر يعنى التناقض التام
تحياتى
Desert cat said…
د/اجدع بنوته
الله يسلمك
انتى ممتجرأيش تقولى هو اللى غلطان او مش غلطان كمان ... لان انا اللى كنت موجودة مش حضرتك ... ده واحد واقف اعتقد انه كان فى انتظار حد .. يعنى مش كان ماشى ولاانا اللى جيت قولت له والنبى اخبطنى ... ولا هو كان طالع بالصدفة بدليل ان واحدة فى طولى وعرضى اعتقد انه مش اعمى .... الحاجة التانية فى حالتك انتى بتقولى طلعتى الواد غلطان وواحد ضربه بالقلم ... طيب ما هو كدا غلط ... انتى كنتى مستريحة وانتى كنتى هتضيعى روح بنى ادم ... يعنى ايه انتى والفرامل مش اخوات .. ما هو يا عندك القدرة على القيادة يا مفيش ... زى مثلا مش هروح اجيب واحد فى محو الامية واشغله مدرس ... بدل ما تعتذرى على الخطأ اللى ارتكبتيه تقفى تزعقى ... والتانى يضربه ومبسوطة ... ما يمكن اللى ضربه ده معندوش اخلاق ... حب يساعد بس بشكل مختلف ... يا حلولى على الشعب المصرى وعمال نشتكى من الحكومة .. ما هى الحكومة من الشعب برضه ... يعنى النفوس واحدة
Desert cat said…
بطوط حبوب
فى مصر يا محمود الغلطان دايما على حق وبيبجح كمان فى خلق الله
تقريبا زمن اللى اختشوا ماتوا
تحياتى يا دكتور
Desert cat said…
انين الحزن
لاء يا وزة نا مبكلش غير كباب وكفته
اصلى قطة متدلعة حبتين
الا فين نصيبى من السبعة مليون جنيه
تحياتى يا جميل
Desert cat said…
فرنسا هانم
الحمد لله قدر الله وما شاء فعل
رقم العربية لسه محتفظة بيه حتى الان
شيالاكى لوقت عوزة يا قلبى
تحياتى
Desert cat said…
واحد مش فاهم حاجة
طيب والنبى اان اللى غلطانة ازاى وهو كان راكن على جنب وانا اللى ماشية .. واصلا هو متكلمش بالعكس ده اعتذر ولو كان اتنفس او فكر يفتح بؤه والله ما كنت اسيبه غير فى القسم ... مش يبقوا غلطانين ويبحجوا كمان

تحياتى
Desert cat said…
الفارس الملثم
الله يسلمك
انا بقى نفسى اقع فى حد من الناس دى
وانا وقتها اخلى اللى ما يشترى يتفرج عليه غير انى هوديه القسم ومش هتنازل عن حقى وها اخده وبالقانون كمان
ما هو فعلا فى ناس كتير جدا بابجاحة المتناهية دى
بس احنا اللى سمحنا لهم
المجتمع فيه كمية سلبيه بشكل مستفز
انا مش من الناس اللى بتسيب حقها بسهولة انا ممكن اسامح لو اللى قدامى محترم .. احترمنى واحترم كلامى .. لكن فى حالة قلة ادبه ... بيبقى هو الجانى على نفسه بقى
تحياتى
Desert cat said…
وجهة نظري
بالظبط كدا يا فندم
اذا كان فى رد لأخت بتقولى خبطت الواد ووقفت ازعق وواحد ضربه بالقلم وفرحانة جدا باللى عملته وبتحكى بكل فخر
للاسف الشارع المصرى اختفى منه الاحترام والانسانية
بقينا بندوس على بعض وكمان عمال نشتكى
تقريبا التخلف والهمجية بقت منهج سائد
احترامى وتقديرى
Desert cat said…
آلام وآمال
ههههههههههه
ابدا والله يا محمود بالعكس ده انا كنت فرحانة بالتخفيضات
بس الموقف نفسه ضايقنى ... تخيل يبقى واحد واقف وانت علشان مشيت جنبه يتحرك ولما وقفت وقف ولما مشيت قدامه راح لاطشك ... تخيل بقى .. انا وقتها كمان كان رد فعلى هين ... والله لو ما كان اعتذر ما كنت سيبته الا فى القسم ... بس الحمد لله قدر الله وما شاء فعل
تحياتى
Desert cat said…
dina
الله يسلمك يا دينا
انتى تشرفى يا جميل
نورتى البلوج
تحياتى
Desert cat said…
appy
أأبى حبيبتى انا مش كنت اعرف هو منين فى الاول بس لما بصيت فى الكارت سامحته على طول وصوتى بقى هادى وكنت حاجة زى البسكويت كدا
ههههههههههههه
رسم يا ماما امال ايه
بالنسبة للى بتتغاظى منهم .. طيب انتى يا جميلة بطوط اصلا كلها على بعضها حاجه كدا لو واحد بيلعب كمال اجسام وصحته حلوة ممكن يرفعها بايد واحدة يبقى تزعلى لانها ظاهرة صحية مبتعورش ... انما ده كان راكب تيوتا وشكله فرحان بيها حبتين ...
وبعدين يا امما القطط ليهم الرصيف والشارع لا قتلقى بسبع اروااااح
ههههههههههه
Desert cat said…
Heart Beat
حبيبتى ما هو انا لما لاقيت انه محامى ومن جسر السويس وعربية تويتا قولت الم الموضوع .. واديله عنوان البيت بقى وربنا يعمل اللى فيه الخير .. بالنسبة للباعة المفترشين الرصيف الغريب بقى اللى بشوفه على الارصفة اكتر
انى ممكن الاقى محل وعليه يافطة ومنور ومعروف انه محل والاقيه حاطط قدامه ستاند وكاتب عليه برضه اسم المحل ... يعنى كدا كدا لازم الرصيف ينشغل ...
امال هى الناس تمشى ليه يعنى ... المطلوب انهم يركبوا طيارات علشان الناس تستريح ........
هههههههههههه
تصدقى اان فكرت فى الموضوع ده قولت اكيد ده حد باعته ياخد بالتار ولا العار ... وكنت عايزه اساله فى الشارع مين اللى مسلطك ياض .. اعترف ... مين اللى قالك روح اقتل قطة الصحراء .. بس رجعت قولت الناس مش حيفهموا ينى ايه قطة الصحراء ومش بعيد الوضع يتقلب .. ففضلت امشى
محبتى ليكى يا جميله
الف سلامه يا قطه
بس هما كا الى راكبين عربيات البعض منهم انى الشارع ملكه هو بس مالها عجلة خالتى فرنسا مش احسن وبتخف زحمه
ألف سلامه يا قطه بألف أسد
بس حرام عليكي تكسري قلبه
طيب كنتي خدي الكارت على الأقل

ماحدش عارف
ما محبه إلا بعد حادثه

:-)
تحياتي
ايوية said…
عزيزتى قطة
حمد الله على السلامة اولا
ثانيا الناس بجد مبقاش عندها زوق ابدا طيب على الاقل دة رجع وشاف جرى اية ليكى
انا بقى هقولك على موقف حصلى من كام يوم وقت المطرة تانى يوم المطر الجامد وطبعا الشوارع كانت لسة غرقانة وانا نازلة الصبح فى امانة الله رايحة شغلة وماشية والله على الرصيف ووواحد سايق عربية بسرعة جامدة جدا وغرقنى مية ولا حتى وقف يشوف هو عمل اية بالرغم انة شافنى واكيد سمعنى بزعق لاننا كنا بدرى ولسة مفيش دوشة فى الشارع الحمد لله انى كنت لسة قريبة من البيت ورجعت غيرت هدومى وطبعا اتاخرت على الشغل
ربنا يرحمنا
حمد الله على السلامة مرة تانية
الساحرة said…
اولاحمدالله علي سلامتك
وجت سليمه
دة انتي شردتي الراجل خالص

عمال يتاسف وانتي سلختيه

دة فيه بيخبطوة ويمشوة بكل برود

والله واحد قدام مدرسه اعدادي خبط ولد ادامي وكان ماشي عادي
بس علي مين وقفته ومسبتوش غير لما الضابط جيه عمل محضر
في الاخر قعد يدعي عليه هههههه
الف سلامة عليكى يا قطوقطة
بس يعنى كنتى خليتى الجدع يطمن عليكى
محدش عارف النصيب فين
MSHMSH said…
لالالالالالالالالالالالالالالالالالالالالا
مستحيل مش قادر اتخيل
مين اللى استجرى وعمل كده فى قطتى
مختيش اسمه ليه وانا كنت بهدلته
وبعدين هو كان عايز يشوف ايه الخايب ده عشان يطمن عليكى
اصل انا عارف الحركات دى كويس

اروح من بعدك فين يا قطة
كان مستقبلى ضاع خلاص
انا هدبح بقرة لالالالا مش كفايه انا هدبح ديناصور وافرقه على الفقراء

بس بينى وبينك اللى حصلك ده عشان معاملتك معايا
بقى يا مفترية عيزانى استنى لحد 2030 حرام عليكى ده انا اكون صديت وتاريخ صلاحيتى انتهى
بس مش مهم حمد الله على سلامتك
ولو رقم موبيلك كمان اطمن عليكى
يبقى 100 100
سلالالالالالالالالالالالالالالالالام
لالالالالالالالالالالالالالالالالالالالالا
مستحيل مش قادر اتخيل
مين اللى استجرى وعمل كده فى قطتى
مختيش اسمه ليه وانا كنت بهدلته
وبعدين هو كان عايز يشوف ايه الخايب ده عشان يطمن عليكى
اصل انا عارف الحركات دى كويس

اروح من بعدك فين يا قطة
كان مستقبلى ضاع خلاص
انا هدبح بقرة لالالالا مش كفايه انا هدبح ديناصور وافرقه على الفقراء

بس بينى وبينك اللى حصلك ده عشان معاملتك معايا
بقى يا مفترية عيزانى استنى لحد 2030 حرام عليكى ده انا اكون صديت وتاريخ صلاحيتى انتهى
بس مش مهم حمد الله على سلامتك
ولو رقم موبيلك كمان اطمن عليكى
يبقى 100 100
سلالالالالالالالالالالالالالالالالام
nigro said…
This comment has been removed by the author.
Foxology said…
الف سلامة يا ستى تعيشى وتاخدى غيرها وكفاية عليه الزفة اللى انتى عملتيهالو وبقى عامل زى الفار المبلول :))
ويكا said…
السلام عليكم ورحمة الله وبركاته
الأول الف سلامة عليكي والحمدلله انها جت سليمة المرة دي بس ابقي خلي بالك بعد كده عشان دلوقت اي حد بيسوق اي حاجة زي ما في ناس كده بتسوق الهبل على الشيطانة وهنروح بعيد ليه طيب ما الشعب المصري كلوا بيتساق دلوقتي .........
ثانياً انتي كنتي ماشية فين شكلك كده نزلتي زنقة الستات ووقعتي في ايد ام احمد وام فاروق بتاعت ياحبيبتشي.......
ارجوا اني ماكونش طولت عليكي
بااااااي
أنونيمس said…
ايه بتنا مفتوح 24 ساعة
انتي بتتلككي للواد ؟؟؟
:))

بجد سلامتك

(F)
monaliza said…
سلامتك ياقمر
بس تعرفى كويس انه اهتم ونزل يطمن عليكى ويسمع وابل التوبيخات دى
خدى بالك بعد كده بقى
Eman Eltaher said…
هههههههههههههه
والله دمك بجد زى العسل
سلامتك بجد
و ان شاء الله تعدى بسرعة

معلش انا دخلت كده
دى اول زيارة و ان شاء الله مش الأخيرة
أولا أنا مش عارف ازاي قطه بتعيش في الصحراء؟ لكن بجد مدونتك دمها خفيف وأسلوبك جميل ..وألف سلامه يا قطقوطه وشكرا لزيارتك مدونتي المتواضعه
سنووايت said…
الف سلامة عليكي
الحمدلله انها جت سليمة ورجعتي للمدونة تاني
لو كا ن يعرف ان قطة الصحراء بتخربش ما كنش عمل كدة
يا ستى ابقى امشى تحت الحيط عشان محدش ياخد باله منك اصلا
وعموما الف سلامه ؟
الاول الف سلامه يا كات
بس انتى شكلك كنتى سرحانه او مذبهله من التخفيضات
واسمعى كلام ماما وامشى على الرصيف
Desert cat said…
رئيس جمهوريه نفسى
تعرف يا محمود هو لو كان ماشى كنت قولت غصب عنه
انما ده كان واقف يعنى من الاخر بيستهبل
تحياتى
Desert cat said…
Alexandrian far away
ما هو انا فى الالو اخدت الكارت
لما شوفت البيانات بتاعته
ندمت بصراحة على المولد اللى عملته له
هو الواحد ميعرفش يسايس اموره ابدا ولازم من الفضايح دى
معلشى بقى يمكن تتعوض فى حد تانى من المعادى
تحياتى
Desert cat said…
ايوية
الله يسلمك يا حبيبتى
اللى حصلك من انسان عديم الذوق بيتكرر كتير خصوصا فى الشتا والمطر بتلاقيه بيجرى فى المية ويبهدل اللى ماشى جنبه ويجرى وبعد ما يعديكى تلاقيه بص وراه وابتسم كانها ابتسامة النصر اصل البعيد كان بيسابق الريح باين
الحمد لله عدت على خير
وربنا يرحمنى ويرحمك ويرحمنا جميعا من العالم دى
تحياتى ليكى يا جميلة
Desert cat said…
الساحرة
الله يسلمك يا حبيبتى
هو اصلا كان واقف مكانش ماشى
وانا لما عديت من جنب العربية اتحرك شوية وبعدين وقفت وقف تانى
لما لاقيته وقف تانى مشيت عادى فى نفس الجنب اللى هو واقف فيه لاقيته اتحرك يعنى كدا كدا انا قدامه مكانش يقدر يجرى فى اى اتجاه اصل لو جرى على طول هيخلص عليا ويجيب اجلى
بخلاف ان حظه العاثر وقعه فى طريقى وانا اللى يقع فى طريقى يحصله كدا
هههههههههه
احييكى طبعا على شجعاتك وجرأتك وعدم سكوتك عن الحق
ياريت كلنا نبقى زيك كدا ونتخلى عن السلبية اللى بقت زى الوباء دى
تحياتى ليكى يا اجمل ساحرة
Desert cat said…
بت خيخة وأى كلام
ما هى دى الغلطة اللى انا ارتكتبها يا ام شريف
انى مش خليته يطمن
معلشى بقى
محدش عارف يمكن يجى بلدنا مرة تانية
محبتى ليكى
Desert cat said…
حــدوتـــة
جوز بنتى الغالى
لوووووووووول
الشخ ده كان متسلط عليا
ايوا متسلط اصل انا عندى سوء الظن هواية ... متشكرة جدا على الديناصور وعلشان كرم اخلاقك ده خلاص انا قررت اجوزك بنتى فى 2015 يادوب تجهز الفيلا والعربية ورصيد فى البنك من دلوقتى
ايه ده مالك
لالالالالالاء
فوق انت مش مستحمل المفاجأة
للدرجة دى مكنتش متخيل
Desert cat said…
nigro
يا سيدى انا موافقة على المنصب مش اعترضت هو انا اقدر برضه
ده انا حتى هعيش حياتى واى حد مش يعجبنى اهجم عليه واجيب خبره
النسبة لو انا اللى كنت سايقة العربية مكنتش هعمل كدا لانى بعرف كويس احترم الناس اللى تستحق الاحترام
وطالما محدش عمل فيا حاجه أأذيه ليه
تحياتى
Desert cat said…
Foxology
الله يسلمك
هو كان يستاهل لانه اولا انا مبعرفش اسيب حقى
ثانيا هو اللى غلطان
تحياتى
Desert cat said…
ويكا
والله على رايك كلنا متساقين
انا كنت ماشية فى شارع عادى جدا
والكابتشن كان واقف على جنب بس مش عارفه ايه اللى خطبه فى دماغه وخلاه يعمل كدا
عموما اخد جزائه
تحياتى
Desert cat said…
أنونيمس
بصراحة اه
مش من محامى ومن جسر السويس ده لقطة
ههههههههههههههه
الله يسلمك يا دكتور
Desert cat said…
monaliza
ما هو مكانش يقدر يتحرك لانه مكانش فى اى مجال يقدر يجرى منه طبعا وكويس انه سمع لانى مكنتش هسيبه غير فى القسم ل كان فكر يعمل اى حاجه غير انه يسمع ويعتذر كمان
تحياتى
Desert cat said…
Eman Eltaher
ميرسى اوى يا ايمان على زوقك
تشرفى اى وقت يا جميل
تحياتى
Desert cat said…
العبـد لله
عايشه فى الصحراء عادى
جنب شجرة الصبار اللى على ايدك اليمين
الله يسلمك
وطبعا يشرفنى زيارتك
تحياتى
Desert cat said…
سنووايت
ما هو مش كان عارف انه جت فى قطة الصحراء بس يلا بقى قدرة وقعه فى طريقى
الله يسلمك يا حبيبتى
تحياتى
Desert cat said…
صوت من مصر
امشى تحت الحيط
طيب هو مشى تحت الحيط ده بيكون ازاى وانا مش امشى غير تحته بعد كدا طالما محدش هياخد باله منى
Desert cat said…
تــــايه ومش تـــايه
فعلا والله كنت بتسغرب جدا
على موضوع التخفضيات ده وعربية واقفه ومشيت اان قدامها عادى مش مدية خوانة
بس يلا قدر الله وما شاء فعل
Soooo said…
الف سلامه عليكي
Desert cat said…
Soooo
الله يسلمك
oceaneyes said…
الف مليون سلامة عليكى يا نانا
..هما الناس كدة ..حاجة غريبة بجد ..ال يعنى العملية ناقصاهم

!!

ولا يهمك ..حصل خير ..وابقى خدى بالك من المعتوهين دول المرة الجاية

وخدى بالك من نفسك كويس وما تزعليش من ماما ..هى بس علشان خايفة عليكى ادتلم الموشح بتاع الماماهات ده


يالا افوت عليكى المرة الجاية تكونى بقيتى احسن ان شاء الله


وسلامتك تانى الف سلامة


:)
اوه نووووو
نو
نو
القطه تتلطش بسياره والرايق على ظهر البسيطه حى يرزق ؟؟؟؟
لا والف لا
وكلا والف كلا
الطياره بتاعتى تحت امرك
طياره مخصوص من ايجبت اير
واروح اغير لك على الجرح البسيط ده فى امريكا
او الصومال
او فرنسا
وبس فى حاجه كده صغيره
اعملى حسابك انتى اللى هتدفعى
احسن الحاله لسه جيم
والكادر مجاش
وكمان اعملى حسابك فى ساندويتش وسيجارتين فرط
لزوم السفر
والف سلامه
فضفضة said…
اااااااااااااالف سلاااااااااامة

يا خراشي يا خراشي

هو انا اول مرة اجى لك القاكى عاملة حادثة

لالالالالالالالالالا وجيت كده من غير كيس برتقال فى ايدي ولا اى حاجة

يا كسووووووفى

معلشي ملحوقة والحمد لله على سلامتك

ولو عارفة نمرة العربية

هاتيها

صحيح انا بقى لى كتير برة مصر

بس اصحابي فى الدخلية كتيييييييير

من ايام ما كنت قائد طابية هناك

الف سلامة ونورتى عندنا
قطقوطة
سكينة said…
كل ده وفاكرة نفسك قطة
:)
خرمشت الراجل وقلقت بال الشارع واشمعنى الصيدلي يشوف رجلك ما كان المحامي فرصة مش وحشة
عامة أديك عرفت الوصفة عمرك ما تمشي على الرصيف
:)
الف سلامه يا قطه
ان شالله وزير الصحه وانتى لا
Desert cat said…
oceaneyes
ميرسى يا حبيبتى على مشاعرك الجميلة
ويارب ميكونش فى مرة جاية
تحياتى ليكى يا قمر
Desert cat said…
عبده الرايق
واااااااااااااو
مستر عبده رايق هير فى ماى بلوج
يادى النور يادى الهنا
انا عندى فكرة احسن
استنى لما تقبض الكادر وبعدين اتعالج
ممكن احجز بس 5 جنيه سلف من الكادر
Desert cat said…
فضفضة
الله يسلمك
بجد معقول كنت قائد طابية
طيب هايل بقا لنا ضهر فى الداخلية
الواحد يمشى فى الشارع يلطش فى خلق الله براحته
لو اللى يفتح بؤه اتصل بيك على طول
نورت البلوج
Desert cat said…
سكينة
ما هى غطيتى ان مش خليته يشوف رجلى قصدى الجرح
عموما تتعوض فى محامى تانى
تحياتى
Desert cat said…
صالح سعيد
الله يسلمك
ربنا يستجاب الدعوة قادر يا كريم
Monzer said…
جسر السويس ده بلديات على فكرة

ومن منطقتى .. يعنى ماحدش يعرف يعمل معاه حاجة .. والى ليه شوق فى حاجة البلوج سفير واسع وفارد كتافه





بس إلا انت .. لانه باين ان ماحدش بياخد معاكى لاحق ولا باطل ..

اتلطيب أحسن يا فندم

ألف سلامة
Desert cat said…
Monzer
طيب مش كان يقول يا منذر انكو بلديات علشان كنا نفسحووووه
ههههههههههه
الله يسلمك
هو طبعا طلع محترم واعتذر
طبعا من منطقتك ياباشا يعنى لازم يبقى ناس كومل
نورت البلوج
الف سلامة ياعم كات ... يارب الناس
الوحشة وانت لا

:D
Desert cat said…
كفايـة طيبـة
ميرسى يا قمر
الله يسلمك
ألف لا باس عليكي ,,
دمتي بود
Desert cat said…
•√♥ أريــ السمر ــج ♥√•
ميرسى يا جميل

Popular posts from this blog

قميص دهشور

كل تحرش وانتوا طيبين