هى البلد دى مفيهاش حد غيرى ولا أيه ؟؟

معلشى انا بقالى كتير مش بتكلم غير فى مشاكل .. بس اعمل ايييه ... ما هى المشاكل اللى بتيجى لى لحد عندى مش انا اللى بروح لها امبارح ... لسه بدخل السيبر والاقى جاى لى جواب ..... خير اللهم اجعله خير .. اصل ده متخصص جوابات الضرايب ... وجاى يقولى وقعى هنا يا استاذة واستملى ..... نعم اوقع على ايه حضرتك .. زى ما انتى شايفة جواب من الضرايب ... اصلا انا لسه معملتش الاقرار يبقى هيبعتوا لى جوابات علشان ايه ... قالى والله مش عارف حضرتك توقعى بقى وتستلمى الجواب علشان امشى انا ... ومالك فرحان كدا نظام انك هتسلمنى ورقة طلاقى ... وادى توقيعى الكريم يا سيدى .... وافتح الجواب والاقى اييييه ده ... ضرايب للمرة التانية فى خلال 4 شهور على اليافطة ... هى الناس دى فاضية ولا ايه مفيش غيرى عامل مشروع فى ام البلد دى .... رحت متصلة على شخص كان زميلى ايام الدراسة .... وبيشتغل هناك ... قابلته هناك بالصدفة فى اخر مرة كنت رايحة علشان برضه اخلص موضوع اليافطة ده ...
هو :آلو اخبارك ايه
انا : بدون اى مقدمات .. انت بتعمل ايه عندك يابنى .. كل شوية استلم جواب وضرايب على اليافطة دى كلها على بعضها مش مكملة متر وكمان مش بنورها ولا ليها اى لزوم اصلا ... بقولك ايه انا المرة اللى جاية مستنية ضرايب على التراب اللى بمشى عليه فى الشارع ... ما هو ده اللى ناقص
هو : اهدى بس فى ايه
انا : حكيت له طبعا على كل اللى حصل وانا مفقوعة ... راح قالى هتعملى اللى عملتيه المرة اللى فاتت ... وهو بقى يا حضرات
انى هروح مجلس المدينة ... واجيب من هناك جواب ان مفيش حاجه عندهم اسمها ترخيص كوفى نت واخده اقدمه فى الضرايب وكان الله بالسر عليم .... بس المرة اللى فاتت كان معايا ايهاب وخلص لى كل الحاجات دى فى وقت قياسى المرة دى انا لوحدى ... استعنت على الشقا بالله .. رحت الصبح النهاردة مجلس المدينة ... وطلعت قسم الادارة الهندسية والادارة الهنسية تقولى التنظيم والتنظيم يقولى الادارة الهندسية ... وانا طالعة نازلة .. نازلة طالعة ... خلاص هنجت ومش قادرة اتحرك فينك يا ايهاااااب .... بعد ما كنت رايحة بورقة واحدة بس اتجمع فى ايدى ملف كامل وكله توقيعات ... دخلت لموظف الادارة الهندسية عاشر قالى لازم توقيع مدير الادارة الهندسية ... يا عم هو انا هبنى عمارة .. ده انا عايزاكو تقولولى انتى مالكيش عندنا ترخيص ... طيب ما هو حضرتك لو هتبنى عمارة التوقيع الواحد هتجيبيه فى شهر .. قولت له امرى لله ادخل للمدير هو انا يعنى صغيرة .. قالى لاء مينفعش الاستاذ عبعال هو اللى هيدخله ... هو فين الاستاذ حبعال ده .... لاقيت واحد حاطط النضارة على مناخيرة وبيقولى نعم قولت له لاء مفيش عايزة توقيع المدير بتاعكو بس .. قالى هاتى الجواب هدخله مع الاوراق دى ... وفضلت قاعدة وقاعدة وقاعدة لما الكرسى اشتكى من طول قعدتى ... شوية الاقى واحده داخله وزنها تسعتلاف كيلو ولابسه خمار كبييييير وحاضنة لى كام رغيف عيش وتبص لى من فوق لتحت وتقولى هو حضرتك محامية ... انا باذبهلال .. ها لاء مش محامية ... امال بتعملى ايه هنا ... ولا حاجه جاية اشم النسيم ... شوية تانية واحدة لا تقل عنها فى الوزن وتقريبا موحدين اليونيفورم بس المرة دى حاضنة برطمان مربى مليان سكر ... ولاقيتها نفس البصة الى بصتها لى الاولانية ... وتقولى هو انتى قريبة الاستاذ على .. والله ولا اعرفه يا فندم .. امال انتى محامية .. يا ستى انا مش زفت .... ورحت ماده لهم البوز المتين ومطلعة ورقة من الملف اللى اتكون فى ايدى عندهم .. وعمال ابص فيها لما حفظتها ... شوية ودخل واحد ... وفضل يبص لى اوى ... وانا اتنح له .. ياربى السحنة دى مش غريبة عليا ... اتاريه مييييين .. الشخص اللى بيجى يقولى هاتى 120 جنيه رسوم نظافة وانا بنفض له .... لاقيته بيقولى انتى بتاعة النت .. جاية تدفعى رسوم النظافة ؟؟؟؟ ... نظافة مين ياعم الحاج فى سرى بقى ربنا ينظفكوا كلكوا من البلد ونخلص ... وبعدين ايه انتى بتاعة النت دى ... قالى ما انا مش عارف اسمك ... قولت له ممكن تقولى يا انسة .. يا بشمهندسة ... احترت فى الالقاب خالص ممكن تقولى يا استاذة ... لاقيته بيقولى انتى بتتكلمى كدا ليه .. ده انتى جايه لنا برجليكى ... من قبل ما ارد الشخص اللى قاعد قدامى .. قاله هى صح .. حد مش عارفه يبقى استاذ فلان او استاذه فلانة او من غير فلان دى خالص .... وفى هذا الوقت الحاسم دخل الاستاذ حبعال وجاب لى الجواب وعليه توقيع المدير بتاعهم و لاقيته بيقولى جيبى توقيع من التراخيص ... فى الدور الاخير ياربىىىىىى امرى لله .. وانا ماشية موظف رسوم النظافة بيقولى طب و120 جنيه ... قولت له بص انا عندى استعداد ادفعهم لك دلوقتى .. بس ماتقوليش كلمة نظافة ممكن تقولوا اتاوة .. شحاته .. اخر مرة المطر كانت من اسبوع والى بيدخل السيبر عندى لحد النهاردة كانة جاى طالع من بركة مليانة بلهارسيا ... وسبته فاتح بؤه وطلعت التراخيص فوق .. شوية موظفين كتيييييير ماليين المكاتب حوالين بعض .. واللى ماسك جرنان .. واللى ماسك كوباية شاى .. واللى قاعد يلعب فى صوابعة ... وكل لما ادى الجواب لموظف يقولى الاستاذ فلان والاستاذ فلان يشاور لى على الاستاذ علان ... يا جماعة ما تخلصونى هو فى ايه .... لاقيت واحد قاعد بيضحك بيقولى تعالى وان هخلصك ... صورى لى بطاقتك صورتين ... متصورة اتفضل مسك البطاقة ... وقعد يبص فيها ويبص لى وعلى الحال ده يجى عشر دقايق .. قولت له حضرتك بتشبه عليا ولا انا متبلغ عنى ومشتبه فيا ولا ايه ... لاقيته بيقولى هو انتى ساكنة فى ؟؟؟؟؟؟؟ ما العنوان عندك فى البطاقة ... هى مامتك اسمها ؟؟؟؟؟؟؟ وراح قايلى اسم ماما الثلاثى ... لاء بقولك ايه كله الا سيرة الام .... خالك يبقى الكابتن ؟؟؟؟؟ هو فى ايه حضرتك ... راح قالى انتى لازم تشربى حاجه ... من غير ما اشرب انت عارف الناس دى منين .. قالى ابقى اسالى مامتك على المهندس ؟؟؟ وقالى اسمه الثلاثى برضه .. قولت له لاء حضرتك اللى هتقولى .. راح قالى كنا جيران زمان ايام بيت جدك القديم ... بس ظروف الحياة اختلفت ... بس لما بقابل حد من اخوالك بطمن منه على العيلة طبعا .... فى سرى : اصيل ابو احمد ... طيب بما انكو كنتوا جيران بقى ممكن حضرتك توقع لى ... قالى بس كدا عنيا الاتنين بس لازم تشربى حاجه الاول ... اشرب نسكافية .. بصى يابنتى علشان مش نخسر بعض هو اللى هنا يا شاى يا قهوة يا حلبة ... لا ياعم جيبلى قهوة .... ونفس الشخص اللى جابلى القهوة لاقيت البشمهندس بيقوله خد الورقة دى وانزل ادفع الرسوم من الخزنة وجيب لى الايصال وتعالى .. دفع الرسوم واللى كانت اربعة جنيه وربع ... ومرضيش ياخدهم منى ... ده ان جاية عليك بخسارة النهاردة قهوة واربعة جنية وربع ... قالى لسه توقيع مش عارفه المهندس مين من خدمة العملاء ... فى الارضى تحت وبعدها خلاص ... طيب بسيطة ... لاء استنى ... وراح باعت نفس الشخص اللى دفع لى الرسوم بكل الاوراق اللى كانت معايا وطلع بعد شوية بالجواب اليتيم اللى رحت بيه فى الاول وجاب توقيع موظف خدمة العملاء فى 5 دقايق .... وسلم عليا اوى ولو احتجتى اى حاجه ابقى تعالى ... انا فى سرى شكرا ربنا ما يحوجنا ليكو تانى ... وبابتسامه صفرا انسحبت ورحت الضرايب ... قابلت السيد المسؤل عن الملف بتاعى واديت له الجواب اللى عليه سبعين الف توقيع .... وقولت له انا جاية اعمل الاقرار الضريبى الاسبوع اللى جاى قبلها بيوم ابعت لى جواب فيه ضرايب على الرصيف اللى بقف عليه او على التراب اللى بمشى عليه فى الشارع .... وسبته ورجعت السيبر .... اولا لو مش الشخص اللى فى الترخيص ده كان جار جدى ايام زمان كان زمانى لسه قاعده هناك لحد دلوقتى ... هو لازم فى كل مكان يبقى لى واسطة .... ولازم علشان افتح مشروع يصطادونى كل يومين اختراع جديد وضرايب جديدة ورسوم نظافة على شوارع مطينة ومتبهدلة ومليانة زبالة ..... ممكن بقى السادة المسؤلين عن البلد يشوفوا لهم حد غيرى ... يا اما اقفل السيبر ويشغلونى هما بمعرفتهم بقى

Comments

fatima said…
قطتى الحلوة ..
اقولك ايه؟؟
كل حاجة ماشية بنظرية الفوضى ... وميت مطب يعطلك ..
بس ربنا يسهلك الاحوال و يوقفلك ولاد الحلال زى ما حصل المرة دى .. يظهروا برضه لما تقدمى الاقرار ..ربنا يعينك ..و ابقى طمينينا عملو فيكى ايه تانى بقى
تحياتى و دعواتى بالتساهيل
كويس انهم ما طلبوش منك الشاي بتاعهم
و لا حد قالك كل سنة و انتي طيبة
:)
ممكن اقولك على حاجه حلوه ارمى همومك وره ضهرك وفوتى والحياه هتمشى بالطول او العرض
dina said…
ههههههههه
اتارى محمد شومان مضحوك عليه
الضاريب..مصلحتك اولا
Nigro said…
This comment has been removed by the author.
و لما تقفلي الكافيه مفكراهم هيشغلوكي بمعرفتهم ايه انشاء الله

سفيرة

ولا رئيسة اتحاد المقيمين في الصحراء

يابنتي انا هقوللك نصيحة

اهاااااااااااااااا
من واقع دراستي في كلية تجارة و بحكم اني شعبة محاسبة و فاشل دراسيا و معمر كمان تساليني ايه علاقة الفشل و اني معمر في الجامعة اقولك ده معناه اني درست قانون الضرايب القديم و الجديد

احب اقولك ان القانون الجديد يتلخص في المثال الاتي

بدلا من ان نفتح ثقبا كبيرا نشفط من تنك المواطن يكون الثقب مؤلم و مجهودات فتحه كبيرة

الافضل ان نعدد الثقوب عشان ما يحسش بكل ثقب و نقدر نشفط اكتر و من غير ما يحس بينا

لو صعبة دي يبقى تقدري تراجعي قصة راسبوتين لو صعبة عليكي يبقى ادفعي و خلاص يا نانا بقى مش كل شوية تصدعينا او اقوللك

اعملي تصنيف اسمه انا و الضرايب ولا بلاش سميه انا و اي مصلحة حكومية و انشري تحت التصنيف ده مغامراتك مع المصالح الحكومية اللولبية المهلبية

الا بالحق

الاخت محامية ؟

" ابتسامة شيطانية ملكية كبداوية "

تحياتي
النظام الضريبى الجديد يعتمد على الثقه بين الحكومه و الشعب
عيب تقولى كده
خلاص مفيش ثقه
ههههههههههه اما والله العظيم
حكومه فاضيه مورهاش حاجه
Foxology said…
ينهار ابيض

وسلملى على الحكومة الأليكترونية

والله حاجة تفقع الله يكون ف عونك وعون الناس الشقيانة
Desert cat said…
fatima
ربنا يسمع منك يا حبيبتى
انى الاقى حد يكون قلبه طيب وحنوين ويطلع جار جدى السابع عشر المهم يخلنى على طول
لما اعمل الاقرار هبقى اطمنك طبعا
ربنا يخليكى ليا يااحلى ا م يوسف
السلام عليكم ورحمة الله وبركاته

ربنا يكون في عونك يا قطه
والله حاسه بيكي بيحصل معايا اللي انت قلتيه ده واكتر ، كل شوية الاقي حد داخل يطلب فلوس وخلاص من غير اسباب مقنعه
بس انا عمري ما اتهورت ورحت مجلس المدينه زيك كده ،
الحمد لله جوزي الله يكرمه اللي بيقوم عني بكل الحاجات دي والحمد لله برضو ليه معارف في كل حته بيخلصوله طلباته


زمان اول ما فتحت البلوج كتبت تدوينه عنوانها يا قاعدين يكفيكوا شر الجايين
عن الضرايب بتاع اليفط دي
Desert cat said…
مهندس مصري
بتبقى تحجصل معايا بس انا بعمل نفسى مش واخدة بالى ... انا مش جاية اصرف عليه ولا اسدد ديونة ... هو قاعد فى المكان ده علشانى انا وغيرى وبياخد مرتب على كدا مش مشكلتى اذا كان مرتبه بيكفيه من عدمة ولاو حد اتبجح وقالها لى مباشرة بقوله ممكن تعف نفسك من ذل السؤال وتشتغل شغل اضافى ووقتها يا اما ورقى بيترمى فى الدرج يا اما حد غيرى اللى بيروح يخلصه لى لانه غالبا لما بيشوف وشى الكريم مش بيعبرنى
تحياتى
Desert cat said…
صوت من مصر
طبعا الحياة مبتقفش
وربنا المستعان
Desert cat said…
dina
هما قصدهم ان الضرايب مصلحتهم هما اولا
ومص دم الشعب ثانيا وثالثا وعاشرا
Desert cat said…
Nigro
يعنى انا المفروض بقى بعد كدا ادخل مكان ادور على جيران قدام لماما او اى معارف حتى من الدرجة السبعين
والله انا مش مبسوطة علشان قابلت حد واوراقى خلصت بالعكس ده انا بقول فيها ايه لما كل واحد مصلحتة تخلص من غير معارف او كارت توصية
ربنا يهدى البشر
Desert cat said…
ملك الكبدة
لاء والله يا ملك انا مش عايزه اشتغل لا سفيرة ولا رئيسة اتحاد اشتغل شغلانة محترمها ودخلها كويس .. يعنى مش اشحت من المواطنين اللى بخلص خدمات وفى نفس الوقت مش امد ايدى اخد رشوة وادخل بيها جهنم ... يا اما بقى يطلعونى من دماغهم ويتنفضولى خالص ده استقصاد انا عارفه
الناس دى متوصية عليا
حد دافع لهم فلوس علشان يرقفونى وغالبا من اسكندرية
دائرة الشك تحولت
احترس
نياهاهاهاهاها
Desert cat said…
شريف طلال
لاء هى الحكومة مش فاضية يا شريفة هى الحكومة بتشتغلنا اه والله بتقول الناس دى فاتحة مشاريع يعنى معاهم فلوس طيب احنا بقى نستنزف الفلوس دى لحد ما يقفلوا المشاريع ويقعدوا يقشروا بصل هما الشباب والشابت اللى واقفين فى صفوف البطالة احسن مننا فى حاجه
انتظرونى انى قادمة
Desert cat said…
Foxology
حكومة الكترونية مين بس
ده الخيبة التقيلة مش جت الا مع الحكومة الالكترونية
تحياتى
انا مش عارف ايه اللى جابك من الصحراء اصلا كنتى فضلتى قطة زى ما انتى
عامة ده حال البلد فى كل المصالح الحكومية وعامة مش انتى بس انا شفت الويل فى الاحياء والمحليات وياما دفعت ولسه بدفع اتاوات اسمها رسوم نظافة عامة انتى بنت حلال فكرتينى اروح ادفع ترخيص اليافطة بتاعت الكافتيرياويارب الاقى موظف يعرفنى احسن اللى ليه ضهر ما ينضربش على بطنه
ونصيحة لو قفلتى السيبر مش ايسيبوكى برده اتلاقى اتاوات وضرايب وخلافه من الاخر مفيش فايدة
تحياتى همس الاحباب
شكل الضرايب حطاكي في دماغها ومعجبه بيكي وطالبه القرب؟؟!!
ماعلينا..أنا قلت أسلم
وحشاني وواحشني اخبارك وحكاياتك
سلام يا قمر
قطتي ياقمر

عامله ايه

وبالنسبه للضرايب بقه

يبقي احنا اكيد اكيد في مصر

سلامي ليكي ياقمر

وزة
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

ياخراشى ع ده لف ودى مرمطه يابنتى

ربنا يكون ف عونك بجد

بس انتى ماشاء الله جامده وبتعرفى تفوتى ف الحديد

وبرافو عليكى بجد انك شايله مسئوليه كده

ربنا يقويكى يارب
هوا كل ده حصل فعلاً ؟؟؟
.
.
ربنـــــــا يـكـــون ف عونـــك

.
.
وتحياتي
والله على راى ملك الكبده .همه عايزين يشفطو اللى يقدرو عليه مننا .وياريتهم يشفطوه ويسكتو لازم يطلعو عين اهلنا
المشكلة مش فى انك تقفلى السايبر او انهم يشغلوكى او انك لقيتى الجار القديم
المشكلة
فى رسوم النضافة
لانك فى النهاية حتدفعيهم حتدفعيهم
بغض النظر عن اى شىء
لان النضافة من الايمان
ممكن سؤال ؟
هى رسوم النضافة دى على الجيوب ولا نضافة الشوارع
Soletoo said…
7abebyyyy:
wa7shany ya bent el 2e enty,ana bas3ayza 2a3raf meen eham dah ya anem
yalla salam ya gamiel
o te3eshy o ta7'dy 3'erha
bas ya reet teshely om el yafta deh bala waga3 dema3'
salam ya 2a7la desert cat
domty b 7ob
صباحو يا قطتى الجميله
قريت البوست المعجزه
والى حيرنى
يا عينى يابنتى بعد كل ده لسه عندك دماغ تقعدى وتكتبى
بس عارفه
كده انتى فعلا فمصر
مستنيه تعليقك على البوست الجديد
اشطات
الربان said…
تحياتي

لا ادري ما اقول....لكن المسؤلون يقولون شيء و الواقع شيء اخر.

هم يشجعون الشباب علي العمل الحر لان ماما ( الحكومة ) خلاص لن توفر وظائف.
و في نفس الوقت يضعوا الاف العراقيل امام الشباب و من يفكر في العمل الحر.

أسأل الله ان ييسر لنا امرنا و يصلح
أحوالنا...

تحياتي و تقديري
semsema said…
اولا انا عاوزة اقول ان الواسطة نوعين
الاول هو ان حد ياخد حق حد تانى يكون يستاهل اكتر منه عن طريق حد معرفة
وده طبعا غلط
اما التانى هو انك مش عارفة تاخدى حقك فبتخديه بس عن طريق معرفه وده مش غلط لان احنا مش عارفين ناخد حقوقنا فى بلدنا يبقى ناخدها عن طريق الوسايط بس المهم اننا مناخدش حق حد
وعاوزة اقول لك ان هو ده الشعب المصرى وهو ده نظام بلادنا
طبيعى وانتى غلطانه لما تروحى مصلحه حكوميه شوفى اى معرفه هناك ولا حتلعب التلعب فات وتلفى المصلحه سبع مرات ده عرف مصر معروف يعنى
MerMaid said…
قطة الجميلة القمر

:)

معلش
مرحبا بكي في مصر ومصالحها الحكومية
بجد حاجة تقرف
انا لما انزل حاجة زي كدة لاااااازم اتخانق والله
مبستحملش استهبال الموظفين

تحياتي ليكي و استحمللي شوية
ممكن توقعى هنا
هتسألينى ايه دى؟
دى عريضة دعوى تعويض من نقابة المحامين مرفوعة ضدكم

بقى لما سألوكى انتى محامية قلتى لا انا مش زفت
ما شاء الله
انتى وقعتى ولا الهوا رماكى
طييييب
وقعى هنا خلينى امشى
قطة الصحراء
يابختك لاقيتى حد تعرفيه هناك امل اللى ميعرفش حد يعم ايه
Desert cat said…
خمسة فضفضة
عليكم السلام ورحمة الله وبركاته
طيب يا دكتورة حضرتك عندك صيدلية وليها ترخيص وكل حاجه
يقرفوكوا ليه
ده ان بقول احنا الملطشة بتاعتهم لانهم اصلا مش معترفين بينا
تروحى مجلس المدينة يقولك لاء انتوا مش ليكو ترخيص عندنا
انتوا ترخيصكو بيطلع من امن الدولة .. طيب ما احنا بالفعل لينا ملفات فى امن الدولة يقولك طيب خلاص انتوا كدا مرخصين
يجى بتاع الاموال العامة يقولك رخصك .. تقولى له ملفى رقمه كذا فى امن الدولة وادى البطاقة الضريبية يقولك لاء انا عايز ترخيص المجلس
تحكى له اللى المجلس قاله لك يقولك ان ماليش دعوة
ويروح ملبسك قضية ادارة سيبر بدون ترخيص ... وادفعى غرامات للدولة
والله العظيم انا مرة اتعملى قضية واتحكم فيها بالغرامة من غير انا ما اعرف ... انا أتفاجأت بالمخبر جاى ياخد الغرامة ... طيب هو انا اصلا حد عبرنى ولا ورانى وشه قالى مش مشكلتنا بقى ممكن يكون اللىعملك القضية كان فاضى قال يتسلى على اسامى الناس اللى عنده ... صلان النبى يتسلى يقوم عاملى قضية وانا قاعده فى بيتنا ... ربنا يهديهم او يهدهم
Desert cat said…
همس الاحباب
انا اللى جابنى من الصحرا الحر الشديد اللى هناك
بس لما جيت هناك اكتشفت انه حر الصحرا ولا جنة المدينة
ابقى قولى بقا دفعت كام فى الضرايب
Desert cat said…
أوشــــــه
طيب لما هما طالبين القرب مش يقولوا
كنت لبست اللى على الحبل ورحت بدل ما انا بروح فاردة بوز شبرين
انتى كمان وحشانى يا جميل
ها رسيتى على اسم النونو ولا لسه ؟
Desert cat said…
انين الحزن
انا كدا بصمت بالعشرية انى فى مصر
تحياتى يا جميل
Desert cat said…
د/اجدع بنوته
مين اللى قال انى بعرف افوت فى الحديد انا اخرى كوبرى اعدى من عليه
بس ربنا يبعدهم عننا شوية
Desert cat said…
إبـراهيم ... معـايــا
اه والله حصل فعلا
ربنا يكون فى عون الجميع
Desert cat said…
تــــايه ومش تـــايه
طيب وبعدين ان هفضل اشتغل كدا واصرف عليهم
يعنى انا صحتى تروح وهما ستنزفوا فلوسى
Desert cat said…
مصرى وبدرجة مواطن
هههههههههههههههه
رسوم النظافة دى على الجيوب والمعدة
روح ادفعهم بقى اصل انت مش ناقص
Desert cat said…
Soletoo
sola ezyak ya gamil
enty mary7a nafsek o septyna e7na 7ena
3agebk ely by7saly daaaaaaaaah
menohm lleaaaaaaaaaah
Desert cat said…
قلوب بتغنى
اللى حصلى ده بيحصل كل يوم لحد فينا بس بطرق مختلفة
ها اجى حالا اشوف البوست يا جميل
Desert cat said…
الربان
هما يشجعوا على الرشوة
على تقليب المواطنين
على سد كل السبل فى فرص عمل حتى للى بيحاول يشتغل ومش مستنى منهم حاجه
انما يوفروا لنا حاجه مريحة ابداااا
لنا الله
احترامى وتقديرى
Desert cat said…
semsema
طيب يا حبيبتى انا مش فى كل الاماكن مش هلاقى حد يعرفنى
ما انا بروح اماكن تانية وبستنى فيها بالاسبوع على ما اخلص حاجه
انا معترضة على مبدأ الواسطة اساسا
علشان بس الامور تمشى للجميع
ربنا ما يحوجنا ليهم
تحياتى
Desert cat said…
رئيس جمهوريه نفسى
والله هو ده الحل وساعات فعلا بعمل كدا بس بتضايق بقول ليه من الاساس نلجأ للطريقة القذرة دى
بس الغاية تبرر الوسيلة
Desert cat said…
MerMaid
كنت زيك كدا ظماااااااان
وكان ورقى بيترمى فى اقرب درج على ايده اليمين او الشمال مش حتفرق كتير
وبعدها بشهرين تلاته او لما يتنقل الموظف نفسه او يطلع معاش حتى مصلحتى تخلص
تحياتى يا جميل
Desert cat said…
الباحث عن الحقيقة
اوباااااا
وقعت انا كدا فى شر اعمالى اسفين ياباشا مكنتش اعرف والله
بس ياترى التعويض المدنى اد ايه
وفى نهاية العريضة محملنى المصاريف واتعاب المحاماه وقدرها خمسون جنيها ولا واحد وخمسون جنيها
اصلها بتفرق كتير
Desert cat said…
بحبك يامصر
اللى ميعرفش حد يروح لهم كل يوم من الساعه 8 الصبح للساعه 3 بعد الضهر لمدة اسبوعين وفى نهاية الاسبوع هيكون مشى فى اشلارع يشد فى شعره من المهازل اللى هيشوفها
تحياتى
دول كمان عايزين الحلاقين واصحاب المهن الحرة تعمل فواتير لكل الزباين اللي بيجولهم

يا اما كده يا اما هيظبطوه
---

والقادم أجمل
دول كمان عايزين الحلاقين واصحاب المهن الحرة تعمل فواتير لكل الزباين اللي بيجولهم

يا اما كده يا اما هيظبطوه
---

والقادم أجمل
Desert cat said…
آلام وآمال
ده انا على كدا بقى ابوس ايدى شعر ودقن
اصل مش قالوا لى كل واحد يجى يحجز ساعه هاتى لنا بيه فاتورة
ولا يمكن لسه بيفكروا
والله مش بعيد فعلا ده يحصل
انا بصراحة لما شوفت الاعلان اول مرة كنت فاكر انهم يقصدو حاجة تانية
لكن لما اتعاد كذا مرة اتأكدت منه أكتر

ربنا يسترها معانا
الايام الجاية دي واضح انها صعبة ومنيلة بنيلة

والحقي بوسي ايدك شعر ودقن وضوافر كمان
Desert cat said…
آلام وآمال
بص يا محمود
قال يا فرعون ايه فرعنك
انت عارف الباقى بقى
هما عمال يزيدوا فى استنزاف جيوب الناس وبهدلتهم والناس بتدفع وهى قرفانة بس ساكتة
يبقى بعد كدا لو طلبوا من الناس يدفعوا على عدد الكلام اللى بيتكلموه فى الساعه محدش يلموهم
ربنا يستر

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز