مــــن هــنـــا وهــنــاك


افكار مبعثرة ... إحساس بالتوهان ... ابحر فى عالم النت ... لاول مرة اشعر انى ممكن استغنى عنه ...
افتح ماسنجرى ولكنى اوف لاين ... اشخاص تدخل وآخرون يخرجون أفكر ... حقاً صدق المثل اللى قال وما الدنيا إلا ماسنجر كبيييييير ... افتح ماى كمبيوتر ابحث عن روياتى المفضلة ... اتصفح رواية الآمال الكبرى لتشارلز ديكينز .... ولما هذه الرواية تحديدا مع انى قريتها كتيييييييييير ... صوت من داخلى يووووه انتى رخمة اوى هو كل حاجه اشمعنا اشمعنا ما تقرى وتخلصينا .... اتصفح الرواية .... وسألنى الرجل ما اسمك ؟؟؟ .. اجب بسرعة .... فى نفس الوقت ينبعث من جهازى صوت ماجدة الرومى .. يسمعنى حين يراقصنى كلمات ليست كالكلمات ..... هنا يشرد ذهنى ... يا ترى كان بيقولها ايه ... علشان تبقى كلماته ليست كالكلمات ..... من بين افكارى يرن هاتفى ... امك تتصل بك احترس ... وطبعا دى النغمة اللى انا عاملاها لست الحبايب يا حبيبة ... وبالرغم من انى عارفة ان اللى بتتصل ماما ما هو عمال يقولى احترس برضه بصيت على الشاشة مش عارفه ليه .... عدت لاستكمال الرواية ... امسكنى بقوة وقلبنى رأساً على عقب ..... تصيح ماجدة الرومى ... يخبرنى أنى تحفته وأساوى آلاف النجمات .... يا بختتتتتتتتتك ... اللى عطاكى يعطينا يا ست ماجدة ... ثم اشرد بفكرى وافكر وافكر وافكر .... وفى النهاية اجد انى كنت لا افكر فى شئ .... يعنى انتى تعبانى معاكى من الصبح وعمال تفكرى وتفكرى وفى الاخر مش لاقية حاجه تفكرى فيها ..... ارحمينى بقى ربنا يرحمك دنيا واخرة .... وده يبقى عقلى الباطن .... وبينما اقنع عقلى الباطن بانى كنت اريد ان اشغله فى اى شئ بدل ما هو واقف زى عقارب الساعة اللى مش فيها حجر .... يقاطعنى رنين هاتفى ... ايوه يا ايمو ... هتروحى امتا .... اممممم مش عارفه ... طيب لو هتتاخرى رنى لى علشان اوصلك ... لاء مش تشغل بالك هروح لوحدى .... بعد مرور ثلاث دقائق .... ايوا يا ايمو ... ابقى تعالى روحنى ... اشرد بذهنى للمرة رقم كام مش فاكرة ... هو الشخص ده مستحملنى ازاى ... كتير بتنرفز عليه ... وكتير جدا بكون رخمة لدرجة مش بقدر استحمل انا نفسى وبزهق منها وبفضل ازعق فيها واقولها ارحمييييينى .... انتى يا نفسى رخمة وعصبية وبتتنرفزى كتير على اقرب الناس ليكى ... ناس كتير اوى بتزعل منك بسبب عصبيتك وشخطك فيهم لاتفه سبب ... الاقيها ترد عليا بكل رخامة .... لاء متخافيش .... اللى قريبين منك فهمونى كويس اوى علشان كدا مش بيزعلوا واللى مش قريبين وعايزين يزعلوا يتفلقوا ..... ارفع لها سبابتى وارفع صوتى عليها .... نظام خدوهم بالصوت و اقولها اسمعى .... انتى لازم تبقى اهدى من كدا شوية ... ولازم تفكرى فى كلامك الف مرة قبل ما تقوليه علشان مش نزعل حد مننا ولا نفهم الناس غلط ونزعل منهم ... تدينى ضهرها وتقولى انا حرة ومش تزعقى لى كدا تااااانى والا دورى لك على نفس غيرى .... تهورت وكنت خلاص همد ايدى عليها مع انى ضد الضرب .... بس قولت استخدم معاها نظام التعذيب فى المعتقلات يمكن تفوق لنفسها وتعترف .... ولم ينقذها منى سوى صوت احدهم يقف امامى .... يمد لى ورقه لو سمحتى محتاج اعمل البحث ده .... انظر لساعتى انها العاشرة والنصف مساءاً ..... وقبل انا انطق وكأنه فهم معنى نظرتى الى الساعه .... على فكرة انا مش عايزه دلوقتى ... ها اجى اخده بكره على العصر ... كويس .... اممممم كويس .... والآن جهازى العزيز

Shut down

أغداً ألقاك
؟؟؟؟؟

Comments

انا كنت لسه ممشتش فلقيت نفسى الاول
حلوه اوى الحوار مع النفس ده
الى هوه تطليع نفس نفسك
ايه رأيك فى الكام الكبير ده
عارفه الاوبشن بتاع ابير اوف لاين ده لو موجود منه فى الحقيقه
واااااااااااو
حاجه جامده بجد
الواحد يبقى شايف الناس انما هو اوف لاين
لو لقيت كلام تانى هاجى اقوله انتوا فاتحين لحد امتى؟
son's egypt said…
السلام عليكم
ممكن يكون السرحان اللي بيصيب الواحد مش لسبب معين مجرد سرحان خلاص
ممكن يكون تعب زهق من حاجة معينه
زهق من الروتين اليومي اللي الواحد فيه كل يوم
الموضوع بيجي لنس كتير في بعض الاحيان
بس هي فترة وبتعدي
سنووايت said…
المهم عرفتي هو كان بيقولها ايه؟وايه هي الكلمات الي ليست كالكلمات؟
لذيذة طريقة سردك للاحداث وتشابكها في بعضها خلتني عشت الموقف بجد
Soooo said…
قطه الصحرا ضربت يا جرعان

الا مين اول واحد قال يا جرعان دي؟؟؟

خبر ايه يابنتي مالك في ايه
روقي كده وبلاش تعاندي مع نفسك
عشان انا عارفك لما تتنرفزي وتتشعنني
بس تهون عليكي نفسك برضه؟؟



------
جميل قوي تصويرك للحظة التوهان والتخبط اللي انتي فيها
بس على فكره
كلنا زيك برضه
مش لاقيين نفسنا .. ولو لقيناها
يالهووووووووووي
شيلوه من فوقي لاقطعه





سلاموووووووووووووز
ايه التهوان الى انتى فيه ده؟؟
أشكمى عقلك الباطن
هههههههههههههه
هههههههههه

حوارلذيذ ودمه خفيف جدا

علي فكرة بجد احيانا بنبقي عاوزين نتخانق مع نفسنا لاننا حاسين انها مسببلنا مشاكل كتير بس انعمل ايه مفيش نفسات للبيع عشات الواحد يشتري واحدة جديدة متعكننش عليه كل شوية

تقبلي مروري الاول
e7na said…
هذه ليلتى أحسن من أغدا ألقاك

الانتظار وحش

_________
نتكلم جد

مالك يا جميل

منه لله الواد ابو خط اتصالات
Nigro said…
This comment has been removed by the author.
كلنا كده بجد والله
التوهان ده بقا حاجه طبيعيه ولا ايه ؟
Baker said…
انا حابب بس اسجل اعجابى بمدونتك
appy said…
حلو انك تكونى عارفه عيوب نفسك وتصلحيها بس عموما انت لو مش عارفه تسكتيها هاتيها وانا اعذبها لكى دا تخصص بقى اسمعى عمرو دياب تعالى على نفسك وعذبها
الا مين ايمو دا ابن اختى ولا ايه ههههههههههههههههه
عموما انا عجبنى انك حطيتى ايديك على وجيعة نفسك او المها ربنا يعنا على انفسنا
امشى بقى يا نفسى من جنبى اصل نفس نونا هتضربك
walaa said…
ازيك يا قطه عامله ايه
لا انا معاكى لازم نقغد مع نفسينا شويه ونحسبها منسبهاش ماشيه كده وخلاص
حلو قوى لما الواحد يقعد من نفسه
يشوف ايه اخطائه ويحاول يصلا حها
اما العصبيه فانا بيتهيألى ان معظم الجيل بتاعنا كده متعرفيش ليه انا كمان عايزه اخف من حدة العصبيه دى
تحياتى ولاء
الربان said…
تحياتي

كلنا تنتابنا من حين لاخر حالة من الملل
او الضيق غير المبرر...وفي رأيي ، ان غذائنا له تأثير مباشر علي حالتنا المزاجيه...عموما حاولي تجربي تاكلي شوكولاته حين تحسين بالملل او العصبية..

أيضا علاج رباني للضيق اكثري من قول:

لا اله الا انت سبحانك
لا حول ولا قوة الا بالله العلي العظيم
و افوض امري الي الله ، ان الله بصير بالعباد...


تحياتي و ان شاء الله تكوني في احسن حال
و شرح الله صدرك بالنور و الايمان و دمت بألف خير.
حل وسط said…
كلنا كده
انا كمان عصبيه
بس ما بقدرش اطلع عصبيني على حد
عشان كده القولون عندي هينفجر قريب

تحياتي
وربنا يحميكي من التوهان
قطة الصحراء
صحيح مهم ان الواحد يقعد مع نفسه ويحاسبها
بس انتى كنتى بتتخانقى معها مش بتحاسبيها عشان خاطرى براحه شويه على نفسك هى نفسك يا عينى هتستحمل ايه ولا ايه
Desert cat said…
بطوط حبوب
يا الف اهلا وسهلا فى اى وقت منور البلوج
المهم ادفع حساب اللفة اللى اخدتها فى البلوج وةانت خارج
احنا فاتحين 24 ساعة
Desert cat said…
son's egypt
انا معاك انه بيحصل لناس كتير وبيناتنبى انا شخصيا كتير جدا
ربنا يعديها على خير
تحياتى
Desert cat said…
سنووايت
ما هو اللى تاعبنى لحد دلقوتى انى مش عرفت كان بيقولها ايه
تحياتى يا جميل
Desert cat said…
Soooo
هو ضربان بعقل ده ضربان بتهور
بس هو يعنى ماذا تعنى كلمة جرعان فى القاموس
هل هى كلمة ليها ريحة مثلا
عموما كويس ان الواحد مش عارف يلاقى نفسه اصلها زى مبتقول كدا بتكون مشكلة جامد
ده انا كنت هقتلها امبارح
بس ربنا ستر
Desert cat said…
شريف طلال
حاضر اوعدك انى اعلمه الادب
ههههههههه
Desert cat said…
الفارس الملثم
انا سمعت ان الصين بتصنع جديد دلوقتى
هبقا اتاكد من الموضوع ده واجيب لك العنوان
شرفت البلوج
تحياتى
Desert cat said…
e7na
لاء انا كنت بغنى له امل حياتى
بس لما قربت اروح قولت اغدا القاك على موعد باللقاء يعنى
انا قولت برضه الواد ابو خط اتصالات ده هو السبب
انا لو شوفته هقتله واقتل نفسى واستريح منهم هما الاتنين
Desert cat said…
Nigro
انا عاملة محشى
هو مود التوهان بيكون حلو وجميل لما الواحد بيحاول ينسى حاجه معكننة عليه
تحياتى
Desert cat said…
صوت من مصر
الشعب المصرى كله يا عزيزى بيمر بحالة توهان غير طبيعية ربنا يرحمنا جميعا
Desert cat said…
Baker
اشكرك جدا وسعيدة ان المدونة نالت اعجابك
تحياتى
Desert cat said…
appy
انا هعذبها بالكهربا وهبعتها لك تعذبيها باى وسيلة تعذيب مختلفة طالما انتى تخصص
ايمو يبقى ؟؟؟
وانتى عاملة ايه دلوقتى بقى
وبعدين انتى واخده نفسك وماشية ليه سيبها اعذبها مع النفس بتاعتى وابعت لك الاتنين مع سوا
Desert cat said…
walaa
ازيك يا لولو عاملة ايه
انا بصراحة قعدت مع نفسى دى شويات كتير وبرضه مش عايزة تسمع الكلام
بدور لها على وسيلة تعذيب كويسة علشان تحترم نفسها بدل ما اشربها سم واريحها من الدنيا كلها واستريح انا كمان
مش تتنرفزى كتير يا لولو الدنيا مش مستاهلة غير شوية عصير عنب والباقى يبقى فل اوى
Desert cat said…
الربان
استاذى العزيز
اشكرك جدا وما اعظمها من نصيحة وما اجملها من كلمات
دمت بالف خير
Desert cat said…
حل وسط
له كدا طلعى عصبيتك على اى حد يقع فى طريقك انا بعمل كدا مش بعرف اتحكم فى نفسى اساسا اصل الريموت كنترول بتاع نفسى ضاع
سلامة قولونك العصبى يا قمر
Desert cat said…
بحبك يامصر
هى اللى جابته لنفسها
كانت بتقاوح معايا وكل لما اقولها حاجه تعاندنى
خلتنى اتهور عليها اعمل ايه بس
تحياتى
ياقطتي ياقمر

براحه علي نفسك شويه كلميها مره واتنين وتلاته متوصليش بنكم الخلاف لدرجه الضرب

دي نفسك برضه مش هتلاقي احسن منها


سلامووووز يااحلي قطه

وزة
اولا حلوة الصراحة دى مع النفس
ثانيا اى حد يفتكر ان ربنا خلقه كده وانه مش ممكن يتغير ابدا يبقى هو اللى مش عايز يتغير لان الانسان ممكن يغير من نفسه
والعصبيه دى وحشه جدا وبالذات فى البنات لان البنت المفروض تبقى هاديه وتقيله كده
وبعدين سيدنا على كان بيقول
لسان العاقل وراء قلبه وقلب الاحمق وراء لسانه
عشان كده قبل الواحد ما يتكلم لازم يعرف هو بيقول ايه وبيقواه اذاى
اسف لو طولت عليكى وانا لسة مستنى رأيك فى مشروع قطة حدوته
احترس امك تتصل بك
هههههههههههههههههههههه
اما انتى عليكى حركات يا قطقوطة
بس على فكرة انتى فعلا عصبية اوى
مشانا شوفتك مرةواحدة
بس يبان عليكى انك عصبية
وكمان قوية ومفترية
بس البوست ده بين انك من جواكى طيبة اوى
خصوصا لما اتصلت بايمو تانى علشان يروحك
بجد حسيت انك طفلة صغنونة اوى
قطتني

ااقولك على سر

من غير ما تقولي لحد

ساعات انا كمان والله بختلف كتير انا ونفسي بس انا بمد ايدي عليها او بالاصح عشان اعاقبني بروح جايبه المقص واروح قاصه شعري اللي هو شعرها يعني ( نفسي ) ال ايه بعاقب نفسي

ويرجع الحاج ابويا من الشغل يلاقي شعري اتقزعر يروح باصص لي بصه مش عارفه ايه مغزاها بالظبط

يا اما بصعب عليه يا اما بيكون عايز يخنقني

بس المهم اديني بعلم نفسي درس عشان ما تعملشي كدهون تاني

بجد بوست روعه كله شاعريه ورمانسية ورقه وماجدة الرومي وماسنجرات

اوقات بنحس واحنا في وسط ناس كتير معانا وحوالينا بنحس اننا لوحدينا

في كوكب بعيد

وبنغني مع ماجدة يروي أشياء تدوخني تنسيني المرقص والخطوات

اسلوب لذيذ اوي وجميل جدا من قطة رقيقه

تقبلي تحياتي

اني احبك في الله
يا خوف فؤادى من غدى يالا شوقى واحتراقى من انتظار الموعد

ساعات الواحد مننا بيفكر فى حاجه ومش عارف بيفكر فى ايه
ويقعد يفكر ويشرب قهوه وراء قهوه
واكيد القهوه مضره للجيب
علشان كده انا بشرب نص فنجان فى اليوم اصلى ناصح
وبعد كل التفكير
يطلع فى الاخر شروووووووووود
قطتى الغاليه
نانا
ليه الشرود ده
وعدم التركيز
اكيد فى حاجه فى دماغك انتى بتفكرى فيها
هداكى الله الى الطريق السليم
وامواااااااااااااه
fatima said…
الأقراااااار
يا جماعة البنية مشغولة بالاقرار و محمد شومان الى هارينا اعلانات ..
صح يا قطتى الحلوة
ايه بقى عجبك كدا ... يا قطة المحاورات الثنائية دى عادية جدا و بتحصل فى أحسن العائلات ..
شوية جد..
انا بقلق من الى مبيعقدش مع نفسه دا ... بيبقى خلاص مقرر انه صح ولا فرصة حتى للمراجعة مع النفس ..
الى بتعمليه دا مع رخامته احيانا ... ضرورى ..اديكى طلعتى بعتاب ذاتى انك عصبية و لازم تخفى شوية على الى حواليك ... بس انتى شكلك كدا من الناس الى لما بيتحبوا بيبقوا على القلب زى العسل .. يعنى حبابيبك هيبلعولك الزلط من الآخر
تحياتى يا قطتى
fatima said…
و بعدين با ماما ...أغنية ماجدة الرومى دى
تخلى الواحد يتقهر ..
عم نزار قبانى و حبه المستحيل ..
فيه حد ممكن يحب كدا
دا كلماته لوحدها كفاية تعملك
انعدام وزن وفلتان اعصاب ..
علوة said…
ما الدنيا إلا روح
لا علاقة لها بالأسلاك والشاشة
رغم أن لها علاقة كبيرة
بتشارلز ديكنز وماجدة الرومي
...
أول مرور
وأول استمتاع بالكتابة
وبروح الكلمات
صباح الفل
احسن حاجة الواحد يبستف نفسه ويدخلها المعتقل بدل ماحد ييجي يبستفهاله
Rania said…
حوار خفيف الظل
من انسانه خفيفه الدم
تحياتى
اول زيارة و انتظرينى دوما
هو ال 011 لسه بيشحن ولا ايه

دى قلبت بيسمعنى اهو

بكره نسمعها يادبلة الختوبه

الله يسهلللللللللله ياعم

بس بجد واضح م البوست انك ف سلام نفسى جدا

وجواكى موجة حب وهدوء وانتعاش

ورايقه اخر حاجه

ديمها عليكى نعمه يارب
ana haroo7 anazzl el oghnia dy now :D

rabena yrawwa2 balek ya habibty ya rabb :)

el post dh 7asseeto mokhtalef w oslobo gameel 3la fekra fe3lan :)
يا سلام ما يكونش ده اللى اسمه الهوى
عامة كلنا بنسرح ونتوه وخصوصا ولا بلاش
المهم انتى تزعقى لنفسك انتى حرةتضربيها براحتك
بس تسمعى ماجدة الرومى وخصوصا اغنية كلمات لوحدك طبعا لالالالالالالا
انا بحب الاغنية قوى
تحياتى خالد
يا سلام ما يكونش ده اللى اسمه الهوى
عامة كلنا بنسرح ونتوه وخصوصا ولا بلاش
المهم انتى تزعقى لنفسك انتى حرةتضربيها براحتك
بس تسمعى ماجدة الرومى وخصوصا اغنية كلمات لوحدك طبعا لالالالالالالا
انا بحب الاغنية قوى
تحياتى خالد
Desert cat said…
انين الحزن
ازيك يا وزة
كان لازم اعنف نفسى علشان مش تزعق فى حد تانى
تحياتى يا جميل
Desert cat said…
حــدوتـــة
جميلة الحكمة يا حدوتة
بس انا لما بكون واخدة على نفسى الف عهد مش انرفز او اتعصب عى حد
وعند اول موقف تلاقينى ايييييه مش انا خالص
ربنا يهدى
المشروع انا قولت لك من زمان موافقة عليه
بس انت اللى قاعد فاضى لبتوع ستار اكاديمى اعملك ايه انا
ركز شوية علشان المشروع يخلص
ونفض بقى لستار اكاديمى سيب الناس تعيش حياتها براحتها وادينا بنتفرج
تحياتى
Desert cat said…
بت خيخة وأى كلام
انا ده انا نكدية مش عصبية
ماما اصلا اول ما سمعت الرنة اللى انا عمالها لها كانت هيغمى عليها
بس برضه بتتصل مش عارفه انا اعملها ايه احط لها ديناميت فى الموبايل
....

وبعدين يا اما شريف انتى لما شوفتينى انا كنت قطة هادية ووديعة واليفة واستنتجتى كل ده امال لو شوفتينى وقت الجنونة ما بتطلع
ببقى حاجه صعب خالص
ربنا يوريكى
تسلمى لى يا قمر
Desert cat said…
قبلة الحياة
تعالى جنبى هنا بقينا زومل
كل واحد تبكت فى نفسها وتهزأها براحتها
ساعات برضه والله بتهور واروح اقص شعرى زيك كدا
بس انا بعملها فى بدايات الصيف علشان بيحررنى فى الصيف اوى على ما يجى الصيف اللى بعده يكون رجع لسابق عهده واقصه من تانى
عموما عادى كلنا بتنتابنا الحلات دى
اشكرك جدا يا ارق قبلة
والله كمان اشهد الله انى احبك جدا فى الله
محبتى يا جميلة
Desert cat said…
عبده الرايق
طيب وليه التبذير ده
دة حتى ربع فنجان شاى يخرب البيوت العمرانة
كفاية اوى شفطة
هايل وهتعمل دماغ برضه
Desert cat said…
فرنسا هانم
اااااااااااه
حاجات يا حبيبتى حاجات
ربنا ما يوريكى
تسلمى لى يا جميل
اموااااااااااه كبيرة اوى
Desert cat said…
fatima
الاقرار وما ادراكى ما الاقرار يا ام يوسف
طيب يارب تيجى على الاقرار وتبقى سهله
مش يستلمونى كل شوية فرض اتوات من غير اى مبرر ربنا يستر
عتاب النفس بيكون حاجة جميلة بس الواحد بعد ما يعاتب نفسه يصلح اخطاءه مش يرجع لها تانى
انا بقى مش بعرف اقل حاجه بتضايقنى الاقيش عندك علاج ؟؟؟
Desert cat said…
fatima
عم نزار قبانى ده شكله حالف يخلص عليا
اخلص من كاظم تلطع لى ماجدة الرومى
وربنا يقوينا عليهم
Desert cat said…
علوة
سعيدة جدا ان البوست نال استحسان حضرتك
تحياتى
Desert cat said…
المفقوعة مرارتها
وانا برضه اسمح لحد يبستف نفسى حتى لو انا مش بستفتها
ده انا كنت عملته بسطرمة وعزمت مامته عليه
لالالالالالا
ده اللى يقولى بس بس اقوله نونو واخربشه كمان
Desert cat said…
Rania
ميرسى اوى يا رانيا
تشرفى دايما
Desert cat said…
د/اجدع بنوته
والله ما اعرف عنه اى حاجه يا دوك
ولا عايزة اعرف
بالسبة للبوست ده مليان خناقات
ربنا يعافينا ويسترها على نفسى اصل ممكن اتهور واقتلها
Desert cat said…
كفايـة طيبـة
ميرسى يا حبيبتى وفرحانة اوى اوى علشان البوست نال اعجابك
كل لما تسمعى الاغنية ابقى افتكرينى بقى
تحياتى
Desert cat said…
همس الاحباب
طيب لما اجى اسمع الاغنية اعمل ايه ما انا بكون فعلا لوحدى
عموما مش هزعلك والمرة اللى جاية اعمل بث مباشر
تحياتى
ما الدنيا الا ماسنجر كبير
كلمة يوسف باشا معاطي الكبير
بس عارفة يا قطة؟
ان الخاصية اللي اهم من ابير اوف لاين
واللي نفسي تكوني عندي
خاصية التراجع في الاوفيس
نفس اشوف شكل حياتي تاني قبل كل القرارات الغبية اللي انا خدتها
حالة التهوان بتاعك حلوة اوي
تهوي من كل حاجة
بس اوي تتهوي مننا
السلام عليكم ورحمة الله وبركاته

حلو الحوار ده
فكرتيني بعبد المنعم مدبولي في المسرحية اللي مش فاكره اسمها لما كان بيقول

وأخذ يفكر ويفكر ، ثم اخذ يفكر ويفكر
وحك راسه قليلا ثم اخذ يفكر ويفكر

:-)
قطة الصحراء العزيزه
تحياتي
بأختصار اقول لك نصيحه بتنفعني قوي في الحالات البتنجاني دي
ألعبي جايم
GAME
وبالتحديد أستراتيجي
وأنصح بالجيم الهايله دي
COSSACKS
صديقتي في أوقات الملل وعطلان المخ

على فكره أخبار محمد 011 أيه؟

صباح الفل
Desert cat said…
صحفية روشة
الاروع وجودك فى البوست يا قمر
Desert cat said…
ساعد نسرين الايمن
بايدينا اننا منتسرعش فى القرارات والمفروض اننا ندرسها قبل ما نتهور وناخدها
خصوصا لو كان قرار حياة
ما انصحكش بالتوهان لانه بيؤدى للضياع
تحياتى
Desert cat said…
خمسة فضفضة
شكل عبدالمنعم مدبولى هو السبب
الله يسامحه بقى
Desert cat said…
Alexandrian far away
انا محترفة سوليتير
و بحلب اوى
police
اللى بتفضل تقتل فى المجرمين اصلى بعشق القتل
و
medel of honer
غير كدا خييييييبه
هذا الزيرو 011 معرفش عنه حاجه
اصلى غيرت طريقى
على طريقة عمرو دياب انا غيرت خلاص عنوانى
هى والدنيا الا مسنجر كبير صدقتى والله بنضيف ناس وندلت ناس ونعمل لناس بوك احيانا
بس نصيحه خدى ليكى يومين اجازه واتوكلى على الله علشان تعملى رستار واب ديت لدماغك وتصالحى عقلك الباطن
الله الله جميلة جدا جدا
حلو قوي الحوار والخناق مع النفس ده
سواعي بتطلع منه درر برضه
زي البوست السكر ده
تحياتي يا قطتي
Desert cat said…
رئيس جمهوريه نفسى
اه صح
وانا طول الوقت قاعدهة اعمل على الماسنجر بلوك ... ولما بحس بالزهق يبقى ديلت
تحياتى
Desert cat said…
mariamagdolen new
many thank's
Desert cat said…
أوشــــــه
سعيدة ان البوست نال اعجابك
تحياتى
مشمش said…
كلامك بيدل علي انك زهقانة من كل حاجة متعقديهاش محدش واخد منها حاجة واوعي تضربي نفسك لتزعل منك وتسيبك وتمشي من غير نفس خلي بالك من نفسك باة
Desert cat said…
مشمش
لاء انا دلوقتى رايقة اوى خالص اصلى شربت كابتشينو
ونفسى بتشكرك جدا وبتقولك انا خلاص صلحتها ومش هنزعل تانى
تحياتى
وانا بشوف كلامك حسيت بحاجة : ان حالة الشجن اللى بتصيب الواحد مش دايما بتكون وحشة
ساعات بتكون مفيدة لانها بتخليه يعيد حساباته او على الاقل يكتب بوست حلو زى بتاعك
بس المهم انها ماتطولش لانها كدة ممكن تقلب باكتئاب
ربنا يسعدك دايما
Desert cat said…
simple girl.. ..simple dream
لاء مش هتطول باذن الله
ميرسى اوى يا جميل
سعيدة بان البوست نال اعجابك
oceaneyes said…
جميل جدا انك تتحاورى مع نفسك وتشوفى هى عايزة ايه وبتتصرف كدة ليه ..بس الاهم انك تكونى وصلتى لحل

وما تسيبيش الموضوع معلق كدة

واتمنى تكونى وصلتى للحل ده


تحياتى


:)
Desert cat said…
oceaneyes
طبعا يا قلبى وصلت لحل وعلمتها الادب كمان
متخافيش اختك جامدة برضه
mnoon said…
بجد مش عارفه
اعلق اكتب ايه
بس انتى عسل
عسل
عسل
خالص
انتى احلى قطه عرفتها
قد استريحت اما قريت كلامك
مش عارفه ليه؟
يمكن للأنك عبرتى صح عن حاجه بحساها كتير
أسلوبك جميل
Desert cat said…
mnoon
ميرسى يا جميل
والله الكلام الحلو ده فرحنى اوى
ربنا يخليكى ليا

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز