إلتماس للشركة الثالثة للمحمول ( إتصالات يعنى )

حد فيكو يا جماعه ليه علاقة بأى مسئول فى شركة المحمول الثالثة ( إتصالات ) لاء انا مش عايزة اشتغل فيها ولا حاجه ولا عايزة منهم خط ... من يوم ما نزلوا العرض بتاع الكارت اللى بعشرين جنيه يديلك عشرين دقيقة واللى باربعين يديلك اربعين دقيقة ... وانا تليفونى طول الليل وفى اول ساعات النهار الاولى مبيبطلش رن لدرجة انى كنت هنطرد من البيت فى فجر احد الايام من قريب اوى .... اول مرة الرقم ده رن عليا شخص بيسأل على إيمان ... قولت له النمرة غلط وقفلت ... بعدها بعشر دقايق نفس الرقم طيب انا محمد ممكن نتعرف ... لاء اسفه انا مش بتعرف على حد وقفلت ... بعدها بـ 3 ثوانى انتى بتقفلى السكة فى وشى ليه ... هو انتى مش عندك اخوات صبيان ... لاء معنديش وبعدين انت شكلك واحد فاضى من فضلك مش تتصل فى الرقم ده تانى وبرضه قفلت ... وطبعا فى الوقت مكانش ينفع اقفل التليفون لانى كنت مستنية مكالمة من رفح ... بعد شوية اتصل تانى نفس الاخ .. لو سمحتى ممكن مش تقولى عليا فاضى تانى ... لانى انسان كبير ومحترم وعلى فكرة انا عارفك شخصيا وتعبت جدا والله لحد ما وصلت لرقمك .. وانا كنت عايز اتكلم معاكى فى موضوع .... والله يا فندم مش بتكلم مع حد وياريت تقفل دلوقتى لانى بجد مش ينفع يبقى تليفونى مشغول فى الوقت ده بالذات ... بعدها بدقيقة واحدة تليفونى رن .... لاء مكانش هو كان حد تانى .... أيون اللى فى رفح ... الحمد لله المكالمة خلصت على خير بعد كام استجواب وعدت ... الساعه 4 صباحاً .... لاقيت الاخ بتاع 011 ده بيتصل روحت مكنسلة وقافلة الموبايل خالص ... لسه بفتح الموبايل الصبح لاقيت منه رساله ... بصراحة كدا عيب وميصحش تقفلى فى وشى .... ولسه بعمل ديليت للرسالة ... والاقيه بيتصل ... سبته يرن ويرن ويرن وانا مارست طقوسى اليومية عادى جدا ... ونزلت الشغل ... لسه بوصل الشغل والاقى رسالة ... تصدقى لون الكوتشى بتاعك يجنن والله من زمان بدور على كوتشى زيه كدا الا هو مفيش منه رجالى .... قولت يمكن جت معاه صدفة يعنى .... الدنيا مطر والطبيعى ان اى حد ممكن يلبس كوتشى ... طول اليوم يتصل وانا اكنسل لما عملى هوس .... فى الاخر فتحت ومش اتكلمت ... لاقيته بيقول بصى ما هو انا مش هسيبك لانى بصراحة بحب الحاجات التنكة دى ... وطريقة معاملتك خلتنى احطك فى دماغى اكتير .... انا قولت بس انا شكلى هتخطف النهارده .... رجع يتصل تانى وكل لما يتصل افتح وما اردش ... تانى يوم الصبح لاقيته باعت لى رسالة مدينى مواصفات لبسى كله .... ده كدا بقى يبقى حد فعلا عارفنى .... اتصل رديت عليه بالآتى ... بص حضرتك انا مش هسالك انت جبت رقمى منين ولا انت تبقى مين لأن ده اصلا ميهمنيش فى حاجه ... بس كل اللى هقوله لك ... من الواضح انى معنديش استعداد اتكلم معاك ولا مع غيرك وبالرغم من كدا بتتصل كتير وفى اوقات مختلفة وده بيعملى ازعاج وبيضايقنى جدا ... لاقيته اتاثر وشوية وهيعيط ويقولى خلاص انا اوعدك مش اتصل تانى وانا راجل وعند وعدى .... قولت له شكرا وقفلت على كدا ... التزم بوعده 12ساعة ... والصبح لاقيته باعت لى رسالة بصى انا اسف للازعاج بس ليا عندك طلبين وبعدها مش هتشوفى رقمى تانى ... ياريت مرة واحدة بس تمشى من غير النضارة .. والتانى انا بكره اوى الموضة بتاعة البنطلونات الجينز المتقطعة دى .... انا معنديش حريم يلبسوا جينز مقطع انتى فاهمة ولا لاء .... هنا وكنت هرقع بالصوت الحيانى وافرج عليا الناس ..... لولا ستر ربنا وتماسكت فى اللحظات الاخيرة ..... وعليها اخدت قرار انى اغير الطريق هو اينعم الطريق التانى لفة كبيرة شوية بس مش مهم .... استلمنى الاخ كل شوية رسالة انتى فين ... مبتعديش ليه ... انا قلقان عليكى ... يا حرام قطعت قلبى عليك يابنى . وهو يبعت فى رسايل وانا احذف ... امبارح بالليل الجو كان برد شوية والشارع فاضى قولت كويس اروح من طريقى العادى .... وانا ماشية وماشية وماشية والاقى حد جاى جنبى يقولى انتى كنتى فييييييين قلقتينى عليكى .... على فكرة انا محمد ... ولا بصيت شوية وايه ده انا محمد 011 ... واخيرا شوفتك من غير نضارة فى سرى قولت والله حهزأه وأبص جنبى والاقى ايه ده الواد طلع موووووز مووووووز ... وكفاية عليه كدا اصل البلوج احيانا بيكون متراقب .... ومن غير ما انطق ولا حرف رحت موقفة توكتوك مع انى عاملة مقاطعة من يوم ما اتسرقت بس قولت العمر واحد ... وحتى الان هذا الزيرو حداشر مبطلش رن ولا رسايل ... اخرهم انا محمد وعندى 29 سنة تتجوزينى ... البعيد بيتفرج على قناة ميلودى كتير وبيغش من الرسايل اللى بتيجى عليها ..... انا من بلوجى هذا ومن هذا الموقع اناشد السادة المسؤلين عن الشركة الثالثة للمحمول ارحمونى بقى والغوا العرض ده علشان الاستاذ محمد اللى عنده 29 سنة بيستغله غلط

تعليقات

‏قال Unknown
الحكاية دى حصلت معايا بس من موبينيل :))))
و لما لقيته واحد قليل الادب ما ردتش عليه تانى و لا بيقت ارد على رقم غريب لحد ما زهق هو

و فيه حل تانى افتحى عليه بس ما تكلميش و خلصيله رصيده :)))9

يا بنتى ما تاخديش و تدى مع الاشكال دى من اول مرة لقيتى كده ما كنتيش ردتى تانى و هو كان حيسكت لوحده و اذا كان على مشاكل البيت اعمليه سايلنت و انتى فيه و خلصى نفسك

سلام يا جميل
‏قال خمسة فضفضة
السلام عليكم ورحمة الله وبركاته

ههههههههههههه
والله يابنتي انا قلت دي حست بالمشكله اللي انا فيها وبتناشد الشركه انها تديني الدقايق المجانيه
اصل انا شحنت بس ماكنتش اعرف موضوع الرساله بتاع اربع خمسات دي
تفتكري هايدوني الدقايق ولا هايطنشوا ؟؟؟؟

ههههههههههههه
‏قال Desert cat
عاليا حليم
والله يا حبيبتى كنت بعمل كدا
افتح الخط وما اردش خالص
وده مفيش فايده
قولت اقوله انى مش بتعرف على حد يمكن يرحم نفسه
بس شكله شاحن الكارت اللى بـ 250 جنيه وواخد 250 دقيقة مجانى فقال يخلصهم عليا
...
وده باللى بعملة دلوقتى برضه وكمان غيرت الطريق بتاعى خالص
الموبايل بقيت بقفله خالص لما بدخل البيت
ربنا يرحمنا
‏قال Desert cat
خمسة فضفضة
عليكم السلام ورحمة الله وبركاته
لو اعرف كنت بعت لهم
بس ما تحاولى تتصلى بخدمة العملاء وتقولى لهم يمكن يديهم لك
اصل انا ماليش فى الاتصالات دى انا فودافوووووووون
عارفة انجي صاحبة مدونة اي حاجة بقى
واحد بردو حب يغلس عليها كده راحت عاملة حركة تمام اوي
عملت بوست وكتبت الرقم اللي كان مدايقها وفضحته ادام المدونين كلهم
هههههههه

بصي انا شايف ان الموضوع حله ف اديكي
لازم تكوني أشد من كده شوية

يعني انا كنت متخيل وانتي بتقولي لقيته جمبي وبيقولي انا محمد
قلت بئا هتقلبي عليه الشارع وتفرجي عليه الناس

يعني م الاخر خليكي جريئة ووريلو العين الحمرا
بالضبط يا قطة
كان المفروض فرجتي عليه الشارع
و لو استمرت المضايقة بلغي فيه البوليس و وديه في داهية
ناس مقرفة
:(
يا اما لو الواد موز قوي
يبقى لو عارف سكة بيتك يتقدم لك و يا تقبليه يا ترفضيه
ثم 29 سنة و لسه بيعاكس بالموبايل
دي مراهقة متأخرة
‏قال ملك الكبدة
انتي اللي غلطانة يا نانا

ليه انتي تنكة و الحاجات دي و طريقة معاملتك هي اللي خليته يحطك في دماغه الكبير

غيري الصنف تستريحي

و مالكيش دعوة بالنفحة بتاعت اتصالات لزباينها

أنا فودافون

يعني عندي كود جامد جدا يخليني غير متاح
و الاجمد بقى انه يخليني غير متاح لرقم معين بس

ههههههههههههههههههههههه

انا عارفك لئيمة هتفكري اني بقوللك كدة عشان تعرفيني انتي شبكة ايه
يعني لو فودافون هاتقوليلي مولاي الملك من فضلك انعم على قطتك الاثيرة برتبة الكود لمنع الازعاج

و لو موبينيل هاتقوليلي يا ريت كان في يا مولاي اكواد من دي في موبينيل

وواضح جدا من البوست انك مش اتصالات

حودة فون أم نبيل أم صلاح

يا ترى مين وراهم
انا حأقول لك على حاجة من اتنين
يا اما تشغلى له اغنية يتربى فى عزو حمادة عزو لان شكله كده من اياهم
.......................
او تجيبى له عروسة
حرام عليكى يا شيخة جننتى الراجل

وبعدين حد لاقى جواز اليومين دول
شوفى الاول نظامه اية يعنى خط ولا كارت ولا يمكن طنط دعيالك ويطلع بيزنيس وتبقى كده لعبت معاكى خلاص

انا لو منك اتكل على الله وعلى الاقل هتكلم من عنده ببلاش
‏قال فرنسا هانم
انتى احسن حل فعلا زى ما قالت عاليا حليم
تفتحى الخط ومتسمعيش حاجه
تركنى التليفون لغايه لما يزهق هو ويغور
تحياتى وسلامى لكى
ألف مبروك يا فندم
ربنا يتمم بخير ان شاء الله
بجد فرحتلك ومش تريقه
ان شاء الله خير
على فكرة انا متأكدان كل اللى ردوا واعترضوا من البنات غيرانيين منك
وكل اللى ردوا واعترضوا من الشباب غيرانيين عليكى
انا الوحيد اللى ما تفرقش معايا
ههههههههه
اتمنى يا رب يكون خير
‏قال nigro
أزال المؤلف هذا التعليق.
‏قال Foxology
ههههههههههههههههههههههههههههههههه

كدة برضه ؟؟ ده الواد شكله ابن حلال وعاوز الخير :))

معلش يا ستى بتحصل كتير وياما اتخانقت وخرجت عن شعورى جوة التليفون وبراه بسبب الموضوع ده بس برضه احب الفت نظرك ان زى ما فى شباب كدة فى برضه بنات كدة وهذا عن تجربة شخصية بحتة

سلام :)
‏قال قلوب بتغنى
ههههههههههههههه
طب والله الواد دمه خفيف
اعانك الله على عروض المحمول
شكرا على مرورك للمدونه بتاعتى
واتمنى نكون اصدقاء على طول
سلام يا قطتى الجميله
‏قال صحفية روشة
هتلاقى صوتك حلو بس
عشان كدة كان بيعاكسك
يبدو ان الموضوع ملهوش علاقة باتصالات
شركة المحمول اللى خرباها فى مصر
‏قال Unknown
أيه ده
الراجل ده باينه عامل زي الناس السايكو بتوع الأفلام الأمريكيه

عندي فكره حلوه

كل ما يتصل
افتحي عليه واقفلي الخط
والرصيد هايخلص
:)
‏قال Desert cat
آلام وآمال
ده شكله رقم وداير على الكل
ما انا اقدر انزل رقمه فى البلوج وفى الاهرام والجمهورية والفضائيات بس على ما اعتقد انى كدا بعمله تسويق اعلانى
والله عملت كل حاجه والاخ مبيحسش اصلا
‏قال Desert cat
مهندس مصري
ماهو ده اللى كان هيحصل كنت هخلى الكيلو منه بنص فرنك
بس لسه بلتفت والاقى ايه ده هى البلد دى فيها موزززززز كدا وانا معرفش
لاقيت الحل الامثل هو الهروب
اصلى اتفاجأت
‏قال Desert cat
ملك الكبدة
طيب يا فندم انا فودافون بقى
ولو تكرمت يا جلالة الملك ممكن الكود ده
الهى ما يغلب لك رعايا ابدا
‏قال Desert cat
مصرى وبدرجة مواطن
لاء انت ارسى على بر حمادة عزو دى اعملها لمين بالظبط
بس تصدق تقريبا كلهم حمادة عزو وانا اخر من يعلم
موضوع اشوف له عروسة ده نبقى ندرسة بعدين ... ممكن افكر الب السيبر مكتب خاطبة على الاقل هيكسب كويس والحكومة تبعد عنى شوية
‏قال Desert cat
حــدوتـــة
امممممم
يعنى انت شايف كدا
يعنى ده رأيك
امال قطة حدوتة مين اللى هيعملها
ماااااااااشى
ماااشى
ان ما جيت فجرت لك البلوج بالزوار
‏قال Desert cat
فرنسا هانم
وحياتك يا ريسة بعمل كدا
وده لازقه انجليزى
واجمل حاجه انك تفضلى فاتحة الخط اكتر من ربع ساعة وحد مشغلك اغانى
نياهاهاهاهاهاها
‏قال Desert cat
الباحث عن الحقيقة
لا ما انا عارفه انك مش بتتريق انت بتتمنى لى الخير
‏قال Desert cat
الباحث عن الحقيقة
يعنى انت شايف ان الناس دى بتحقد عليا اتوكل على الله واوافق اتجوز واحد عن طريق الموبايل تصدق جوازة شيك برضه
يابنى ده واحد معاه دقايق كتير مجانية وبيدور على حد يخلصهم عليه
منها لله قناة ميلودى وروتانا والخليجية
‏قال Desert cat
Nigro
بص يا محمد انا كنت والله ناوية فعلا اهزئة انا مش طبعى حونينة مع الولاد خالص انا اى حد بيقولى بس بس بقولوا نيااااااااااااااااااو وتلاقينى هجمت وهاتك يا خربشة
ده كنت هعضه مش اخربشه بس
لكن ببص لاقيته مووووووز
حاجه كدا مش ينفع خالص معاها زئير الاسد
‏قال Desert cat
Foxology
اه فعلا فى بنات كدا
ان قريت مرة موضوع بلوتوث وكدا كان تقريبا عند صوت من مصر
بس انا مش كدا خالص والله
ايه رايك نجمع اللى كدا على دكهوما ونخلص احنا من الخنقة دى
‏قال Desert cat
قلوب بتغنى
يا حبيبتى ربنا يحرمنى من خفة دمه دى
دعواتك كدا
‏قال Desert cat
صحفية روشة
تفتكرى واحدة بتتخانق فى التليفون وكل كلامها زعيق ده حتى لو كراون فى الوقت ده بيقلب لصوت عبدالفتاح القصرى غصبا واقتدارا
‏قال Desert cat
أنونيمس
والله غلبت
استخدمت كل الطرق
الحل ان العرض ينتهى واخللللللللص
‏قال انين الحزن
ياااااااقطتي وحشاني

عامله ايه ياقمر

انا بردك ومن نفس الموقع بااناشد الساده المسئولين انهم
يلغوا رساله كلمني شكراً
بتخنق منها

اه صحيح هو الواد جامد اوي ؟؟

سلاموووووووز ياقمر
‏قال خيرالدين
الله يخرب بيت الاساليب القديمه

ده عتيق جدا
‏قال Unknown
هههههههههه
انا مش فاهمة مادام هو الواد موووووز مووووووز ايه المشكلة بقى أتكلى على الله يابنتى وبعدين انت قلبك حد مطاوعكيش تهزقيه هوا بيبتدى كده على فكرة
هههههههههههههه
ولا يهمك افتحى انتى عليه وماترديش والرصيد اكيد مش هيصمدوهيخلص بدرى بدرى
احلى سلام
‏قال صوت من مصر
ده نفس بلوج البلوتوث الى عندى بجد بس الفرق هنا ان انا الولد وهى البنت والعكس صحيح
بامانه الى يحي يتعرف على البنت بالطريقه دى مش انسان كويس ابدا
‏قال ملك الكبدة
شوفي يا كات

لو طلعتي رقم 4000

هاديلك الكود

ايستابينا ؟

ايستابينا يعني اتفقنا بالايتاليانو

سي بارلو ايتاليانو
‏قال Desert cat
انين الحزن
تصدقى انا كمان الرسالة دى خنقانى برضه
بصراحة الواد كان جامد طحن يعنى
‏قال Desert cat
e7na
هو بصراحة الاسلوب عتيق لكن الواد على احدث الطرز
يمكن كان عايش فى الكهف ولسه خارج
‏قال Desert cat
totaaaa
لاء خالص انا قولت الموووووز ده كله يتهزء فى الشارع ده حتى يبقى عيب
والله بفتح عليه
ولا هعبره برضه
‏قال Desert cat
صوت من مصر
انا دلوقتى بس حسيت بمعناتك
‏قال Desert cat
ملك الكبدة
هو السيستم ايه
نفع واستنفع
اوكى يا ملك
يااااااااارب
انت عارف بقى
‏قال oceaneyes
هههههههههههههههههههههههههههههه

طيب طالما الواد موووووووووووووووووووز

فين المشكلة بقى ؟؟؟؟

:P


ازيك يا قطقوطة؟؟؟



عاملة ايه واخبارك ايه ؟؟؟؟



ابقى طمنينى عليكى يا جميل
ههههههههههههههههههههههههههههههههههههههههههههههههههه

عسل
انا مبطلتش ضوووحك من ساعة ماقريت اللى انتى كاتباه وخصوصا
موووووووووووووز دى
ولا الطريقه الجديده لكتابة الزيوز حداشر
انا راىى انك تبعتيله ماسيج وتقليله اتفرج على القناه السابعه على برنامج مالا يطلبه المشاهدون
‏قال صالح سعيد
احلى حاجه انك بتعرفى تخلى الواحد يقرا موضوعك وهو مش عارف نهايته ايه
اسلوبك فى السرد ممتاز بصراحه
ام عن الاخ اللى معندوش دم وشكله متبرع بيه لهيئة الرخامه الابديه
فانتى خليه يتصل وافتحى ومترديش
ده اقوى حل واستمرى على كده
لحد ميبعتلك رساله
اشحنلى شكرا
‏قال شريف طلال
ده شخص ممل و لزقه
بس طالاما طلع موز بقى يبقى خلاص
أطلع منها أنا
هههههههههههه
و احب اضم صوتى لصوتك حتى يصل الى شركه أتصالات
ههههههههه
شكراً ليكى
‏قال عبده الرايق
عبده الرايق
مدونه ساخره
عبده الرايق
لعب وجد وضحك وضرب ................
عبده الرايق
يقدم لكم احلى تشكيله من المكسرات والمفتفتات والمطحونات والتعلب فات فات وفى ديله سبع لفات
عبده الرايق
راااااااااااااااااااااااااااااااااااايق
ومرووووووووووووووووووووووووووق
والدنيا كاسحاه فى ديلها
‏قال عبده الرايق
مقولتش رأيى لسه
انتى تفتحى عليه وتسيبيه
يتكلم مع نفسه
لغايه لما يتقطع نفسه
‏قال blackcairorose
طيب يا قطة الصحراء

الواد موز وصارف عليكى متين وخمسين جنيه مكالمات يبقى عايزة ايه اكتر من كده؟

تحياتى
‏قال Desert cat
oceaneyes
المشكلة انه مزعج
وممكن اكون مشغولة والاقيه عاملى صداع
او محتاجه انام وعاملى ازعاج
انا كويسة يا قمر طول ما انت كويسة
‏قال Desert cat
حبة حاجات (ايمان)
يارب دايما مبسوطة
هو انا كاتبة زيرو حداشر غلط
معلشى التمسى لى العذر اصلها بصراحة حاجه تطلع الواحد من هدومة
‏قال Desert cat
صالح سعيد
ما هو ده النظام المتبع حاليا
هو يتصل وانا افتح وارمى الموبايل بعيد شوية
علشان يفضل يكلم نفسه
يارب العرض ده ينتهى بقى يااااارب
‏قال Desert cat
شريف طلال
ما هو الحاجة الوحيدة اللى تشفع لرخامتة انه طلع موووز
الا هو شركة اتصالات دى مبيسمعوش
اصل العرض لسه شغااااال
‏قال Desert cat
عبده الرايق
والله ده اللىب بيحصل بس هو العرض مازال مستمر ومازال هناك دقائق مجانية فتقريبا الموضوع عادى
‏قال Desert cat
blackcairorose
عايزاه يتعلم الزوق ويبعت لى رسالة يسالنى على عنوان بيتنا
موووووووووووز
والله عسل يا قطتي..
بس ماكنش ليكي حق تردي عليه أصلا بعد أول مره لما عرفتي انه بيعاكش أو حد ماتعرفهوش
ماهو لما لقاكي رديتي بدل المره كذا مره
قال طالما لانت وبترد حتى لو بتقول كلام خشن
بكره تلين أكتر وأكتر ونبدأالناعم...والززن على الودان أمر من السحر... آه ياختشي مانتا عارفه شبان اليومين دول...

ولو غرضه شريف يبقى يا ريت.. وباب البيت مفتوح لكل الموز والتفاح والبرتقان....ههههه
بس والله انك عسل

تحياتي
‏قال Desert cat
أوشــــــه
تفتكرى هو فكر بالشكل ده
بس انا فعلا بطلت ارد وبفتح الخط بس
وده يا اختى تقوليش لزقة
بس خلاص بقى انا سالت على الكود بتاع غير متاح ده وعرفته ومشغلاه دلوقتى ويبقى يخلى زيرو حداشر ينفعه
‏قال زعيم كمورا
بصى انا مخنوق اساسا وبعد مقريت اتخنقت اكتر
فانا حطلع الخنقة كلها هنا
فمش عارف الكلام حيطلع ازاى
فياريت تعذرينى


عندنا فى كمورا مورا الراجل كرامة

معروفة راجل يعنى تلاقى كرامة
والكرامة مبتتهنش
وان اتهانت بتضيع

ولما الراجل يعوز حاجة بيروح لصاحبها وبيطلبها منه
يعنى بيقف قدامه
ويقوله انا عايز كذا
لو لقى الجواب بالنفى
بيلم بعضه فى شوال وبيمشى من سكات ومبيعدهاش

وبرده الراجل مبيبصش على بنات الناس وهى ماشية فى السكة
ويتفحص هى لابسة ايه
عيب ... عيب .... عيب
وكدة ميصحش

ويعنى ايه واحد يتصل بواحدة فى نص الليل
حتى لو كان يعرفها ليه
هو الاخ ميعرفش ان البيوت ليها
حرمتها
الى يخنق اكتر ان عنده 29 شنة
يعنى المفروض انه بقى راجل عاقل
انتهى من مرحلة النزوات والشهوات
وبقى راسى وهادى وبقى يعرف الى يصح والى ميصحش
وبقى عارف الاصول والعادات والتقاليد بتاعتنا
الى حضرته اخترقها وبكل سهولة فى رسالة
اول مرة اشوف حد عايز يتجوز بالرسايل
وبعد كدة حتخلفه فى رنة

بس تصدقى اول مرة اسمع عن النوع دة من الجواز
لا فعلا البلد بتتقدم بينا

ربنا يعينك يابنتى والله
ربنا معاكى ومع الى زيك
انتوا حالتكم مستعصية
وحرجة فى نفس الوقت



ياله ماعلينا
ربنا يبعدنا عن الاشكال دى
وربنا معاكى ياحنان
وتخلصى من المحنة دى

بقولك ايه
بالنسبة للموز
متبقيش طفسة وهاتى حتة
لحسن انا مأكلتش بقالى قرنين
فاعلمى معايا واجب

ماشى
‏قال Desert cat
زعيم كمورا مورا
تعرف انا الاول كنت متاضقية علشان قلة ادبة واتصالاته فى كل وقت
دلوقتى انا متضايقة اكتر علشان طلع موووووووز
يعنى لو كان طلع بطيخ مش كان زمانى هزأته وخلصت من الصداع بتاعه
بس بجد بجد يعنى لو شوفته مرة تانية
هنضف بيه الاسفلت
تحياتى ياباشا
‏قال بطوط حبوب
والله ولاد تحفه
ارحمى قلبه الولهان
هههههههههههههههههه
ولو عرفتى الكود ابقى قوليلى انا عايز اعرفه بتاع فودافون ده
‏قال Desert cat
بطوط حبوب
هههههههههههه
ماشى يا بطوط
عونية الاربعة
‏قال دكتورة سنان
هههههههههههههههههههههههههههه
والله انتى زى العسل
فكرتينى بواحده صحبتى دايما يتصل بيها ارقام غريبه ويعاكسوا ويبعتوا رسايل بس هيا كانت بتتبسط بقى:)
‏قال Desert cat
نوسه
بتتبسط من الارقام الغريبة
طيب هى رقمها كام وانا اخليها تبيعالموبايل من الصبح
تحياتى يا نوسة
‏قال همس الاحباب
الله عليكى وعاملة قطة ومش اى قطةدى انتى قطةالصحراء
يعنى خربوش واحد منك ويبقى البقية فى حياتك فيه بس الشارع عندك كله طينة وتراب
اتمسحى الاسلفت بيه ازاى بس خلى بالك الموووووووووز اللى فى السوق شكل من غير طعم
تحياتى خالد
‏قال Desert cat
همس الاحباب
انا كنت ماشية فى شارع رئيسى يعنى كبير وفيه اسفلت هو اينعم اسفلت قريب من العدم بس خليها فى سرك ومشيها اسفلت وخلاص
طبعا الموووز لو كان ليه طعم اكيد كان احترم نفسه من اول مرة اتهزء فيها
س نعمل ايه فى المظاهر الخداعة
تحياتى
‏قال غير معرف…
ده واد تبت اوي اوي
غلس شكل

بصي ابنتي نصيحتي افحي عليه كل مايتصل و سيبيه يتكلم و انتي حطي الموبيل جنبك لحد مارصيده يقفل

و ممكن برضه تروحي اي مركز لاتصالات و تديهم رقمه و تقوليلهم انه بيضايقك يمكن يرتجع

معلش ياقمر ماتضايقيش نفسك فيه ناس غتيته كده
‏قال د/اجدع بنوته
يابتتتتتتتت

وحد طايل ياقطتى

اقفشى ف رقبته

وكمان موووووز

واسمه محمد

و 011

يعنى معدى اخر حاجه

وبيكرهه البناطيل المقطعه

بيفهم والله

بقى انتى

ياختى بتلبس بناطيل مرقعه اصدى مقطعه

ومش عايزه الناس تتجنن عليكى

وانا اقول العرسان حصلها شيفت واتشفطت م عندى ليه

اتاريهم جرى عليكى

ااااااااااااااااااه ياانا منك
:D :D

rabena m3aky ya benty

i hate these people awy bgd
‏قال Desert cat
اجندا حمرا
بصى يا حبيبتى
ده اللى بعمله
بس الظاهر انه حد شاحن له علشان كدا مش حاسس ان الرصيد بيخلص
يارب الرصيد بتاعه يخلص بقى
‏قال Desert cat
د/اجدع بنوته
ما هو انا فعلا نويت اقفش فلا رقبته بس علشان اطلع روحه واخلص البشرية من رخامته
‏قال Desert cat
كفايـة طيبـة
me too
hat this people
thank's 7abibi
‏قال Stella De Mare
طيب ده انتى فى نعمة تعملى ايه بقى للى بيعاكس بقالة 7 سنين و مبيبطلش و فتحت عليه بالساعات و هو بيهاتى يكلم نفسة و فرق النمرة على خط الصعيد كلة لانه لهجتة و لهجة اى حد بيتكلم صعيدى و وصلتلة و اتجرجر على القسم و اتهزق و مبطلش بردو و انا بالعند مغيرتش النمرة عشان هو مش هيلوى دراعى
و حطيت نمرتة فى شات روم لل Ga*s
و اتبهدل و مبطبش بردو
‏قال غير معرف…
تصدقي أنا كمان 011 إتصالات
ممكن النمرة بتاعتك علشان أنا كمان مشترك في العرض ده ومعايا دقايق مجانية كتيييييييييييير ومش عارف أوديها فين
عامة يا قطة العيب عليكي ، لو كنتي أسداية ولا حاجة ماكانش قدر يقربلك وإلا كان إتقطع مليون حته
وطالما الواد موووووووووز موووووووووز وطالب القرب منك يبقى خلاص على بركة الله ، وعلى رأي المثل ما محبه إلا بعد رنات
على فكرة تبقى مصيبة لو يعرف البلوج بتاعتك لإن كده مش حيبطل لا إتصالات ولا مسجات وحينتقل للمرحلة رقـ2ـم من الخطة
أتمنى أسمع أخبار سعيدة عنكم بإذن الله ويابخت من وفق راسين في الحلال
‏قال غير معرف…
تصدقي أنا كمان 011 إتصالات
ممكن النمرة بتاعتك علشان أنا كمان مشترك في العرض ده ومعايا دقايق مجانية كتيييييييييييير ومش عارف أوديها فين
عامة يا قطة العيب عليكي ، لو كنتي أسداية ولا حاجة ماكانش قدر يقربلك وإلا كان إتقطع مليون حته
وطالما الواد موووووووووز موووووووووز وطالب القرب منك يبقى خلاص على بركة الله ، وعلى رأي المثل ما محبه إلا بعد رنات
على فكرة تبقى مصيبة لو يعرف البلوج بتاعتك لإن كده مش حيبطل لا إتصالات ولا مسجات وحينتقل للمرحلة رقـ2ـم من الخطة
أتمنى أسمع أخبار سعيدة عنكم بإذن الله ويابخت من وفق راسين في الحلال
‏قال Desert cat
MoodyLicious
يالهووووى
ده ايه التناحة دى
معلشى فى ناس كدا بتكون عايشة على التهزيئ
تموت لو عاشت من غيره
‏قال Desert cat
DoctorAllam
راسين فى الحلال وما محبة الا بعد رنات
ده انا كدا ممكن يجرى لى حاجه
هو اينعم مووووز
بس قليل الادب
الا هو لسه معاك دقايق مجانية
طيب ما تحولهم لى
ولا مش ينفع اتصالات يحول فودافون
010000000000000
جرب كدا تكسب ثواب
‏قال Blank-Socrate
بصراحه انا لى وجهة نظر تانيه
انا شايف انه اسلوبه غلط
لكن هو فعلا مهتم
مش مجرد موضوع معاكسه
؟
!!!!!!!!!!!!!!
هاهاهاهاهاه
باتكلم جدا
‏قال m-k88
انا كنت بلف على النت بدور على شوية حاجات في البيزنس وكده ووقاعت المقاله دي تحت ايدي بالصدفه بس بجد دمك خفيف
بس تعرفي والله انا بيصعب عليا البنت اللى زيكم الرجاله في مصر يا عينني خلاص اتهطلت مبقيناش بنعرف ازاى نتعامل مع الجنس اللطيف بقينا بنفتقد المبادئ الاساسية في التعامل مع البنات علشان كده بكل احترام احب اقولك اتأمرى جدا انتى وكل البنات لان فيه الف بغل ممكن يشيل
بس بجد انت دمك خفيف

المشاركات الشائعة